ລິງຂອງລັດຖະບານ
ລິ້ງເອກະສານ
ພິທີມອບ - ຮັບເຮືອບິນ ແອຣບັສ A320 ຢ່າງເປັນທາງການ
ໃນຕອນແລງຂອງວັນທີ 8 ພະຈິກ 2011 ຢູ່ທີ່ສະໜາມບິນສາກົນວັດໄຕໄດ້ມີພິທີມອບ-ຮັບເຮືອບິນແອຣບັສ໌ A320 ຂື້ນລະຫວ່າງ ທ່ານ ດຣ. ສົມພອນ ດວງດາລາ ຜູ້ອຳນວຍການໃຫຍ່ລັດວິສາຫະກິດການບິນລາວກັບ ທ່ານ Therry MARIANI ລັດຖະມົນຕີກະຊວງຂົນສົ່ງ ແຫ່ງສາທາລະນະລັດຝຣັ່ງໂດຍເປັນກຽດເຂົ້າຮ່ວມເປັນສັກຂີພິຍານຂອງພະນະ ທ່ານ ສົມສະຫວາດ ເລັ່ງສະຫວັດ ຮອງນາຍົກລັດຖະມົນຕີແຫ່ງ ສປປ ລາວ, ທ່ານ ສົມມາດ ພົລເສນາ ລັດຖະມົນຕີວ່າການກະຊວງ ໂຍທາທິການ ແລະ ຂົນສົ່ງ, ທ່ານ Francois Laval ປະທານຜູ້ອາວຸໂສຂອງບໍລິສັດ ຜະລິດເຮືອບີນແອຣບັສ໌, ທ່ານ ຝັ່ຣງຊົວ ເຊເນໂມ Francois Senemaud ເອກອັກຄະລັດຖະທູດຝັ່ຣງ ປະຈຳ ສປປ ລາວ ແລະ ບັນດາແຂກທີ່ຖືກເຊີນກໍໄດ້ເຂົ້າຮ່ວມຢ່າງພ້ອມພຽງ.
ຈຸດປະສົງການນຳເຂົ້າເຮືອບິນອາຍພົ່ນ ແມ່ນໂຄງການໜຶ່ງ ໃນແຜນພັດທະນາລັດວິສາຫະກິດການບິນລາວ ແຕ່ນີ້ຮອດປີ 2020, ຊີ່ງແມ່ນ ໂຄງການທີ່ສຳຄັນ ແລະ ມີຄວາມຈຳເປັນທາງດ້ານເຕັກນິກ-ເຕັກໂນໂລຊີ ເພື່ອສະໜັບສະໜູນ ແກ່ການຂະຫຍາຍຕົວທາງດ້ານເສດຖະກິດຂອງ ລັດວິສາຫະກິດການບິນລາວ ຊີ່ງເປັນສາຍການບິນແຫ່ງຊາດ, ໃຫ້ຈະເລີນເຕີບໂຕຂຶ້ນເລື້ອຍໆ ເພື່ອໃຫ້ໄດ້ມາດຖານສາກົນ, ທຽບທັນກັບສາຍ ການບິນນາໆຊາດສາມາດເຂົ້າເປັນສະມາຊິກຂອງກຸ່ມພັນທະມິດ ແລະ ກຽມພ້ອມໃສ່ການເປີດໜ່ານຟ້າເສລີ ໃນອະນາຄົດອັນໃກ້ນີ້.
ໂດຍຕອບສະໜອງຄວາມຮຽກຮ້ອງຕ້ອງການ, ໃນປະຈຸບັນ ແລະ ສະເພາະໜ້າ ຂອງການພັດທະນາສາຍການບິນນັ້ນ, ລັດຖະບານຈິ່ງ ໄດ້ຕົກລົງ ໃຫ້ລັດວິສາຫະກິດການບິນລາວ ຈັດຊື້ເຮືອບິນອາຍພົ່ນຊະນິດ ແອຣບັສ໌ A320 ຈຳນວນ 2 ລຳ ໂດຍໄດ້ຮັບການສະ ໜັບສະໜູນດ້ານການ ເງິນຈາກທະນາຄານພາຍໃນປະເທດ.
ນີ້ແມ່ນນິມີດໝາຍປະຫວັດການບິນທີ່ສຳຄັນຄັ້ງໜື່ງ, ຂອງລັດວິສາຫະກິດການບິນລາວ ທີ່ໄດ້ຈັດຊື້ແລະນຳເຂົ້າ ເຮືອບິນອາຍພົ່ນຂະໜາດ 150 ບ່ອນນັ່ງ, ຊຶ່ງກ້າວຂື້ນຈາກການນຳໃຊ້ເຮືອບິນໃບພັດ ໄປສູ່ການນຳໃຊ້ເຮືອບິນອາຍພົ່ນທີ່ທັນສະໄໜ ວ່ອງໄວ, ມີຄວາມປອດໄພສູງ ແລະ ສາມາດບິນໄປໄດ້ໄກກວ່າເກົ່າ, ການບິນລາວພວກເຮົາຈະນຳໃຊ້ເຮືອບິນຊະນິດນີ້ ໃນເສັ້ນບິນຕ່າງປະເທດ, ຕາມເສັ້ນບິນທ່ີມີຢູ່ແລ້ວຈຳນວນໜ່ືງ ແລະເປີດເສັ້ນບິນໃໝ່ ວຽງຈັນ - ສິງກະໂປ ຄາດກະໃສ່ ວັນທີ 24 ພະຈິກ ທີ່ຈະມາເຖິງນີ້ເປັນຖ້ຽວປະຖົມມະເລີກ ພ້ອມນັ້ນຍັງມີແຜນຈະ ຂະຫຍາຍເສັ້ນບິນໄປຍັງບັນດາປະເທດອາຊຽນ, ເກົາຫຼີ ແລະ ຍີ່ປຸ່ນ ໃນອານາຄົດ. ເຮືອບິນ A320 ພາຍໃຕ້ເຄື່ອງໝາຍ “ ການບິນລາວ” ແລະ ໂລໂກ “ ດອກຈຳປາ ” ຊື່ງແມ່ນສັນຍາລັກດອກໄມ້ປະຈຳຊາດຂອງລາວ, ໄດ້ມາເຖິງນະຄອນຫຼວງວຽງຈັນໂດຍບິນຜ່າໜ່ານຟ້າຂອງຫຼາຍ ປະເທດ ດ້ວຍຄວາມສະຫັວດດີພາບ ແລະ ປອດໄພທຸກປະການ, ເຮືອບິນ 02 ລຳ ທີ່ລັດວິສາຫະກິດການບິນລາວນຳ ເຂົ້າໃນຄັ້ງນີ້ເປັນເຮືອບິນ ທີ່ທັນສະໄໝ ປະຢັດນ້ຳມັນ, ປະກອບດ້ວຍເຕັກໂນໂລຊີການບິນລຸ້ນຫລ້າສຸດ, ມີເຄື່ອງບັນເທິງໃຫ້ຄວາມສະດວກສະບາຍ ແລະ ບໍລິການເທິງ ເຮືອບິນ ທີ່ດີເລີດ. ຄຽງຄູ່ກັບການ ນຳເຂົ້າເຮືອບິນ A320 ນີ້ ພວກເຮົາໄດ້ມີການພັດທະນາຫຼາຍດ້ານໄປພ້ອມໆກັນເຊັ່ນ: ການພັດທະນາບຸກຄະ ລາກອນ ສ້າງນັກບິນ 20 ຄົນ, ນາຍຊ່າງ16 ຄົນ ແລະ ວິຊາການອື່ນໆທີ່ຕິດພັນກັບການປະຕິບັດການບິນໃຫ້ພຽງພໍກັບຄວາມຕ້ອງການ ແລະ ມີແຜນ ບຳລຸງຮັກສາເຮືອບິນທີໄດ້ມາດຖານ, ຈັດລະບົບສາງອາໄຫຼ່ໃຫ້ເຂົ້າລະບົບ, ນຳໃຊ້ Program ແລະ Software ຕ່າງໆ ເຂົ້າໃນວຽກງານ ເພື່ອຮັບປະກັນປະຕິບັດການບິນ ໃຫ້ບັນລຸເປົ້າໜາຍ ມີຄວາມປອດໄພ, ໃນນີ້ພວກ ເຮົາກໍໄດ້ມີ ການເຊັນສັນຍາວ່າຈ້າງຊ່ຽວຊານຕ່າງປະເທດຄື: ນັກບິນຈຳນວນ 07 ຄົນ, ວິສະວະກອນ 02 ຄົນ, ນາຍຊ່າງ 04 ຄົນ, ຫົວໜ້າການຕະຫຼາດເພື່ອຊ່ວຍ ປັບປຸງວຽກງານ ລະບົບການ ບໍລິຫານສາມາດເຊື່ອມກັບສາກົນເທື່ອລະກ້າວ 01 ຄົນ ແລະ ບໍລິສັດແລະບໍລິສັດຜະ ລິດເຮືອບິນ ແອຣບັສ໌ໄດ້ຊ່ວຍສົ່ງຊ່ຽວຊານ ມາປະຈຳການ ຢູ່ນຳພວກເຮົາ ເພື່ອຕິດຕາມ ແລະ ແນະນຳການສ້ອມບຳລຸງເປັນເວລາ 03 ປີ ການນຳໄຊ້ ເຮືອບິນອາຍພົ່ນ ສອງລຳນີ້ເຂົ້າໃນ ແຜນທຸລະກິດໃນ ເວວລາອັນໃກ້ໆນີ້ຈະເປັນ ສ່ວນໜຶ່ງສ້າງສິ່ງ ເອື້ອອຳນວຍໃຫ້ແກ່ການ ພັດທະນາ ເສດຖະກິດ ສັງຄົມຂອງປະເທດ. ອີກປະການນຶ່ງ ແມ່ນການ ກຽມພ້ອມຮັບຕ້ອນປີທ່ອງທ່ຽວລາວໃນປີ 2012 ແລະ ຮັບໃຊ້ກອງປະຊຸມສຸດຍອດອາເຊັມ ປີ 2012 ນີ້, ແລະພິເສດໃນໂອກາດອັນສະຫງ່າລາສີນີ້ ທ່ານ ຮອງນາຍົກລັດຖະມົນ ຕີພ້ອມດ້ວຍ ແຂກກໍໄດ້ຂື້ນຊົມເຮືອບີນລຳໃໝ່ອີກດ້ວຍ.