ຂ່າວ

ພິທີປະກາດ ຍົກຍ້າຍ ແລະ ແຕ່ງຕັ້ງພະນັກງານຂັ້ນຮອງລັດຖະຕີກະຊວງ ຍທຂ

ໃນຕອນເຊົ້າຂອງວັນທີ 12 ເມສາ 2021 ກະຊວງ ຍທຂ ໄດ້ຈັດພິທີປະກາດ ຍົກຍ້າຍ ແລະ ແຕ່ງຕັ້ງພະນັກງານຂັ້ນຮອງລັດຖະມົນຕີ, ໂດຍການເປັນປະທານຂອງທ່ານ ວຽງສະຫວັດ ສີພັນດອນ ລັດຖະມົນຕີກະຊວງ ຍທຂ, ມີຫ້ອງ ການ, ກົມ, ກອງ, ລັດວິສາຫະກິດ ອ້ອມຂ້າງກະຊວງ ຍທຂ ກໍ່ເຂົ້າຮ່ວມຢ່າງພ້ອມພຽງ.

ດໍາລັດຂອງນາຍົກລັດຖະມົນຕີ, ວ່າດ້ວຍການແຕ່ງຕັ້ງ ຮອງລັດຖະມົນຕີ ກະຊວງ ຍທຂ, ໂດຍອີງຕາມກົດ  ໝາຍວ່າດ້ວຍລັດຖະບານແຫ່ງ ສປປລາວ ສະບັບເລກທີ 04/ສພຊ, ລົງວັນທີ 19 ພະຈິກ 2016, ອີງຕາມການຕົກລົງໃນກອງປະຊຸມຄະນະເລຂາທິການສູນກາງພັກ ຄັ້ງວັນທີ 29 ມີນາ 2021 ແລະ ອີງຕາມໜັງສືສະເໜີຂອງຄະນະຈັດຕັ້ງສູນກາງພັກ ສະບັບເລກທີ 114/ຄຈສພ, ລົງວັນທີ 1 ເມສາ 2021, ໃນມາດຕາ 1 ແຕ່ງຕັ້ງ ທ່ານ ລັນ ແສງອາພອນ ເປັນຮອງລັດຖະມົນຕີ ກະຊວງ ຍທຂ.

ຄໍາສັ່ງ ຂອງຄະນະເລຂາທິການສູນກາງພັກ, ວ່າດ້ວຍການຍົກຍ້າຍ ພະນັກງານການນໍາໄປຮັບໜ້າທີ່ໃໝ່, ອີງຕາມມະຕິຂອງກົມການເມືອງສູນກາງພັກ ສະບັບເລກທີ 031/ກມສພ, ລົງວັນທີ 0 ມັງກອນ 2018 ວ່າດ້ວຍວຽກງານຄຸ້ມຄອງພະນັກງານ, ອີງຕາມການຕົກລົງໃນກອງປະຊຸມ ຄະນະເລຂາທິການສູນກາງພັກ ຄັ້ງວັນທີ 29 ມີນາ 2021 ແລະ ອີງຕາມໜັງສືສະເໜີຂອງ ຄະນະຈັດຕັ້ງສູນກາງພັກ ສະບັບເລກທີ 116/ຄຈສພ, ລົງວັນທີ 1 ເມສາ 2021, ຄະນະເລຂາທິການສູນກາງພັກ ອອກຄໍາສັ່ງ ຍົກຍ້າຍ ສະຫາຍ ສັນຕິສຸກ ສິມມາລາວົງ ກໍາມະການຄະນະພັກ ກະຊວງ ຍທຂ ໄປຮັບໜ້າທີ່ໃໝ່ຢູ່ ກະຊວງ ເຕັກໂນໂລຊີ ແລະ ການສື່ສານ.

ພິທີ ມອບ-ຮັບ ຍານພາຫະນະເພື່ອຮັບໃຊ້ວຽກງານໂຄສະນາ ເຜີຍແຜ່ ປູກຈິດສໍານຶກ ແລະ ການບັງຄັບໃຊ້ກົດໝາຍ ດ້ານຄວາມປອດໄພທາງຫຼວງ

ໃນຕອນບ່າຍຂອງວັນທີ 07 ເມສາ 2021 ກົມຂົນສົ່ງ ກະຊວງ ຍທຂ, ພ້ອມດ້ວຍກົມຕໍາຫຼວດຈາລະຈອນ ກະຊວງ ປກສ ໄດ້ມອບ-ຮັບ ຍານພາຫະນະ ເພື່ອຮັບໃຊ້ວຽກງານ ໂຄສະນາ, ເຜີຍແຜ່, ປູກຈິດສໍານຶກ ແລະ ການບັງຄັບໃຊ້ກົດໝາຍ ດ້ານຄວາມປອດໄພທາງຫຼວງ ໃຫ້ກັບສອງເມືອງຄື: ເມືອງໂພນໂຮງ ແຂວງວຽງຈັນ ແລະ ເມືອງນາຊາຍທອງ ນະຄອນຫຼວງວຽງຈັນ.

          ໃຫ້ກຽດມອບເຄື່ອງໃນຄັ້ງນີ້ໂດຍ ທ່ານ ປອ ບຸນຕາ ອ່ອນນາວົງ ຫົວໜ້າກົມຂົນສົ່ງ ກະຊວງ ຍທຂ ແລະ ທ່ານ ພັອ ກົງສີ ສຸວັນນະຕູ້ມ ຫົວໜ້ສກົມຕໍາຫຼວດຈາລະຈອນ, ກະຊວງ ປກສ, ມອບໃຫ້ເຈົ້າໜ້າທີ່ຕໍາຫຼວດຈາລະຈອນ ເມືອງນາຊາຍທອງ ນະຄອນຫຼວງວຽງຈັນ ແລະ ເຈົ້າໜ້າທີ່ເມືອງໂພນໂຮງ ແຂວງວຽງຈັນ, ເຄື່ອງທີ່ນໍາໄປມອບໃນຄັ້ງນີ້ມີ: ລົດບັນທຸກ Truck K/CAB 4x2 ຂັບເຂື່ອນ 2 ລໍ້ (ປະເພດລົດບັນທຸກ ຍີ່ຫໍ້ ຮຸນໄດ H-100), ຈໍານວນສອງຄັນ (ມອບໃຫ້ເມືອງລະຄັນ), ໝວກກັນກະທົບ 40 ໜ່ວຍ (ເມືອງລະ 20 ໜ່ວຍ), ເສື້ອຢືດ 100 ຜືນ (ເມືອງລະ 50 ຜືນ), ແຜ່ນພັບ, ເຈ້ຍໂຄສະນາ, ປື້ມຄູ່ມືການໃຊ້ກົດຈາລະຈອນ, ລວມມູນຄ່າປະມານ ເມືອງລະປະມານ 230 ກວ່າລ້ານກີບ, ລວມທັງໝົດ 460 ກວ່າກີບ.

ເພື່ອນຳໃຊ້ຍານພາຫະນະ ດັ່ງກ່າວ ໃນການຈັດຕັ້ງປະຕິວັດ ວຽກງານການລົງ ໂຄສະນາ ເຜີຍແຜ່, ປູກຈິດສຳນຶກ ແລະ ບັງຄັບໃຊ້ກົດໝາຍ ດ້ານຄວາມປອດໄພທາງຫຼວງ, ພາຍໃຕ້ໂຄງການປັບປຸງ ແລະ ສ້ອມແປງເສັ້ນທາງເລກທີ 13 ເໜືອ (ສີເກີດ-ໂພນໂຮງ), ພາຍໃຕ້ໂຄງ​ການ​ປັບ​ປຸງ ແລະ ສ້ອມ​ແປງ​ເສັ້ນ​ທາງ ​ເລກ 13 ເໜືອ (ສີເກີດ-ໂພນໂຮງ), ກົມຂົນສົ່ງ ໄດ້ຮັບງົບປະມານ ຈາກທະນາຄານໂລກ  ຕາມສັນຍາກູ້ຢືມ ເລກທີ 6226-LA, ເລກທີໂຄງການ P163730, ໃນການຈັດຕັ້ງປະຕິບັດ 02 ໜ້າ​ວຽກ​ຫຼັກ ເຊັ່ນ: (1) ວ່າ​ຈ້າງ​ຊ່ຽວ​ຊານ​ທີ່​ປຶກ​ສາ ກວດ​ສອບ​ຄວາມ​ປອດ​ໄພ​ຂອງ​ເສັ້ນ​ທາງ​ເລກ​ທີ 13 ເໜືອ (ສີ​ເກີດ-ໂພນ​ໂຮງ) ແລະ 13ໃຕ້ (ກມ 21-ກມ 346); (2) ໂຄ​ສະ​ນາ ເຜີຍ​ແຜ່, ປູກ​ຈິດ​ສຳ​ນຶກ ​ແລະ ບັງ​ຄັບ​ໃຊ້​ກົດ​ໝາຍ ດ້ານ​ຄວາມ​ປອດ​ໄພ​ທາງ​ຫຼວງ, ພ້ອມ​ດຽວ​ກັນ​ນັ້ນ ກໍ່​ໄດ້​ເຮັດ​ວຽກ​ຮ່ວມ​ກັບ ຊ່ຽວ​ຊານ​ທີ່​ປຶກ​ສາ ຈາກ​ທະ​ນາ​ຄານ​ໂລກ Global Road Safety Facility (GRSF) ໃນ​ການ​ຈັດ​ຕັ້ງ​ປະ​ຕິ​ບັດ​ບັນ​ດາ​ໜ້າ​ວຽກ​ສຳ​ຄັນ ເຊັ່ນ: (1) ປະ​ເມີນ​ຜົນ​ດ້ານ​ນະ​ໂຍ​ບາຍ, ຄວາມ​ອາດ​ສາ​ມາດ, ຊ່ອງ​ຫວ່າງ​ໃນ​ການ​ຈັດ​ຕັ້ງ​ປະ​ຕິ​ບັດ, ຝຶກ​ອົບ​ຮົມ ດ້ານ​ຄວາມ​ປອດ​ໄພ​ທາງ​ຫຼວງ ແລະ ຄົ້ນຄ້ວາບັນດາປັດໄຈທີ່ກໍ່ໃຫ້ເກີດອຸບປະຕິເຫດ ຕາມເສັ້ນທາງໃນຕົວເມືອງ ນະຄອນຫຼວງວຽງຈັນ ເຊັ່ນ: ດື່ມແລ້ວຂັບ ແລະ ຄວາມໄວ; (2) ການ​ນຳ​ໃຊ້​ລະ​ບົບ ຂໍ້​ມູນສຳ​ລັບ​ການ​ປະ​ເມີນຜົນ ເຫດ​ການ​ທີ່​ເກີດ​ຂຶ້ນ ຕາມ​ເສັ້ນທາງ ແລະ ​ການລາຍ​ງານ Data for Road Incident Visualization Evaluation and Reporting (DRIVER).

 

ກະຊວງ ຍທຂ ຫວນຄືນມູນເຊື້ອວັນສ້າງຕັ້ງກຳລັງ ປກສ ຄົບຮອບ 60 ປີ

   ກະຊວງໂຍທາທິການ ແລະ ຂົນສົ່ງ (ຍທຂ) ຈັດພິທີປາຖະກະຖາວັນສ້າງຕັ້ງກໍາລັງປ້ອງກັນຄວາມສະຫງົບ ຄົບຮອບ 60 ປີ ( 5 ເມສາ 1961-5 ເມສາ 2021) ໃນວັນທີ 9 ເມສາ 2021 ທີ່ຫ້ອງປະຊຸມໃຫຍ່ກະຊວງ ຍທຂ ເປັນກຽດປາຖະກະຖາໂດຍທ່ານ ພົນຕີ ບົວວັນ ວົງສາວັນທອງ ຫົວໜ້າກົມໃຫຍ່ສັນຕິບານ ກະຊວງປ້ອງກັນຄວາມສະຫງົບ (ປກສ), ມີບັນດາຄະນະປະຈຳ, ກຳມະການພັກກະຊວງ, ຄະນະພັກຮາກຖານ, ຄະນະຫນ່ວຍພັກຮາກຖານ, ບັນດາທ່ານຫົວໜ້າກົມ, ຮອງກົມ, ຫ້ອງການ, ສະຖາບັນ, ຜູ້ອຳນວຍການ, ຮອງຜູ້ອຳນວຍການ ແລະ ພະນັກງານ-ລັດຖະກອນອ້ອມຂ້າງກະຊວງເຂົ້າຮ່ວມ.

   ທ່ານ ພົນຕີ ບົວວັນ ວົງສາວັນທອງ ໄດ້ຍົກໃຫ້ເຫັນວ່າ ປະຫວັດຄວາມເປັນມາ ແລະ ຄວາມໝາຍຄວາມສໍາຄັນຂອງວັນດັ່ງກ່າວ ເຊິ່ງກໍາລັງປ້ອງກັນຄວາມສະຫງົບປະຊາຊົນ ແມ່ນກໍາລັງປະກອບອາວຸດປະຕິວັດອັນແຫຼມຄົມ ໂດຍແມ່ນພັກປະຊາຊົນປະຕິວັດລາວ ເປັນຜູ້ສ້າງຕັ້ງ ນຳພາເດັດຂາດ ໂດຍກົງຮອບດ້ານ ເປັນກໍາລັງທີ່ມາຈາກປະຊາຊົນ ແລະ ເພື່ອຮັບໃຊ້ຜົນປະໂຫຍດຂອງປະຊາຊົນລາວ ບັນດາເຜົ່າ; ກຳລັງປ້ອງກັນຄວາມສະຫງົບປະຊາຊົນ ໄດ້ກໍາເນີດ ແລະ ເຕີບໃຫຍ່ຂະຫຍາຍຕົວໃນຂະບວນການຕໍ່ສູ້ປົດປ່ອຍຊາດ ຕ້ານຈັກກະພັດຜູ້ຮຸກຮານ ປົກປັກຮັກສາ ແລະ ສ້າງສາພັດທະນາປະເທດຊາດ, ເວລາໃດກໍ່ມີມູນເຊື້ອການຕໍ່ສູ້ອັນອົງອາດກ້າຫານ ມີນ້ຳໃຈເສຍສະຫຼະເດັດດ່ຽວບໍ່ຍອມຈໍານົນ ມີຄວາມຊື່ສັດບໍລິສຸດ ແລະ ມີຄວາມສາມັກຄີເປັນປຶກແຜ່ນ ນັບແຕ່ມື້ກໍາເນີດເກີດຂື້ນ ກໍາລັງປ້ອງກັນຄວາມສະຫງົບ ທັງມີມູນເຊື້ອຕໍ່ສູ້ ທັງປັບປຸງກໍ່ສ້າງຕົນເອງ ໂດຍໄດ້ຮັບການອົບຮົມສັ່ງສອນຈາກພັກປະຊາຊົນປະຕິວັດລາວ ແລະ ການອຸ້ມຊູຊ່ວຍເຫຼືອປະຊາຊົນລາວບັນດາເຜົ່າ ກຳລັງປ້ອງກັນຄວາມສະຫງົບ ສາມາດເສີມຂະຫຍາຍມູນເຊື້ອຕໍ່ສູ້ພິລະ ອາດຫານຂອງຊາດຂຶ້ນສູ່ບາດກ້າວໃໝ່ ແລະ ຄຸນນະພາບໃໝ່ ສ້າງໄດ້ມູນເຊື້ອອັນສະຫງ່າງາມ.

   ພາຍຫຼັງປະເທດຊາດໄດ້ຮັບການປົດປ່ອຍ ກຳລັງ ປກສ ກໍຍັງສືບຕໍ່ປະກອບສ່ວນເຂົ້າໃນການພັດທະນາສ້າງສາປະເທດຊາດ ເປັນຕົ້ນແມ່ນເປັນເຈົ້າການຮຽນຮູ້ ກໍາແໜ້ນສະພາບກົນອຸບາຍຂອງສັດຕູ ມີວິທີການ ແລະ ມາດຕະການອັນເດັດຂາດ ໃນການແກ້ໄຂ ບັນດາປັດໄຈ ໜໍ່ແໜງທີ່ກໍ່ຄວາມບໍ່ສະຫງົບ ວຸ່ນວາຍ ເລີກຮື້ກຳລັງໃຕ້ດິນ ນັກສອດແນມ ພວກກອງປຸ້ນ ແກ້ໄຂນັກເລງອັນຕະພານຕ່າງໆ ແລະ ເປັນກໍາລັງຫຼັກແຫຼ່ງໃນການແກ້ໄຂປາກົດການຫຍໍ້ທໍ້ທີ່ເກີດຂື້ນໃນສັງຄົມ ດ້ວຍຜົນ ແລະ ຄຸນງາມຄວາມດີຂອງກຳລັງ ປກສ ພັກ-ລັດຖະບານ ແລະ ປະຊາຊົນຈຶ່ງໄດ້ຍ້ອງຍໍສັນລະເສີນຢ່າງສົມກຽດ ແລະ ມອບນາມມະຍົດໃຫ້ກໍາລັງ ປກສ ວ່າ ກໍາລັງ ປະກອບອາວຸດທີ່ໜັກແໜ້ນ ແຫຼມຄົມ ແລະ ໄວ້ເນື້ອເຊື່ອໃຈທີ່ສຸດຂອງພັກ ຈົງຮັກພັກດີຕໍ່ພັກ ຕໍ່ປະຊາຊົນບັນດາເຜົ່າ ສົມແລ້ວທີ່ ເປັນກໍາລັງປະກອບອາວຸດວິລະຊົນ.

 

ຄະນະຊາວໜຸ່ມ ປປລ ກະຊວງ ຍທຂ ປາຖະກະຖາເລົ່າມູນເຊື້ອວັນສ້າງຕັ້ງ ຄະນະຊາວໜຸ່ມ ປະຊາປະຕິວັດລາວ ຄົບຮອບ 66 ປີ (14 ເມສາ 1955-14 ເມສາ 2021)

 

 

 

 

ຄະນະຊາວໜຸ່ມ ປປລ ກະຊວງ ໂຍທາທິການ ແລະ ຂົນສົ່ງ ໄດ້ຈັດພິທີປາຖະກະຖາເລົ່າມູນເຊື້ອວັນສ້າງຕັ້ງ ຄະນະຊາວໜຸ່ມ ປະຊາປະຕິວັດລາວ ຄົບຮອບ 66 ປີ (14 ເມສາ 1955-14 ເມສາ 2021) ໃນຕອນບ່າຍຂອງວັນທີ 5 ເມສາ 2021 ຢູ່ທີ່ຫ້ອງປະຊຸມໃຫຍ່ກະຊວງ ໂຍທາທິການ ແລະ ຂົນສົ່ງ ໂດຍພາຍໃຕ້ການເປັນປະທານ ແລະ ເປັນກຽດຂຶ້ນປາຖະກະຖາໂດຍ ສະຫາຍ ທອງຈັນ ພູມີພັກ ຮອງເລຂາຄະນະບໍລິຫານງານສູນກາງຊາວໜຸ່ມປະຊາຊົນປະຕິວັດລາວ, ໃຫ້ກຽດເຂົ້າຮ່ວມຂອງສະຫາຍ ນາງ ວິໄລຄຳ ໂພສາລາດ ຄະນະປະຈໍາພັກກະຊວງ, ຮອງລັດຖະມົນຕີກະຊວງ ໂຍທາທິການ ແລະ ຂົນສົ່ງ; ມີບັນດາຄະນະປະຈຳພັກ, ກຳມະການພັກກະຊວງ, ຄະນະໜ່ວຍພັກຮາກຖານ, ຄະນະໜ່ວຍພັກທີ່ຂື້ນກັບຄະນະພັກຮາກຖານ, ຮອງຫົວໜ້າຫ້ອງການ, ກົມ, ກອງ, ສະຖາບັນ, ລັດວິສາຫະກິດ, ຫົວໜ້າພະແນກ, ຮອງຫົວໜ້າພະແນກ, ຄະນະບໍລິຫານງານຊາວໜຸ່ມກະຊວງ, ຄະນະໜ່ວຍຮາກຖານຊາວໜຸ່ມ ແລະ ສະມາຊິກຊາວໜຸ່ມພາຍໃນກະຊວງ ຍທຂ.

ໃນພິທີທ່ານປະທານໄດ້ເລົ່າເຫດການຕົວຈິງ ແລະ ຍົກໃຫ້ເຫັນຜົນງານອັນອົງອາດກ້າຫານຂອງຊາວໜຸ່ມແຕ່ລະຮຸ່ນມາສະເໜີເຊັ່ນ ຕົ້ນກໍາເນີດ ແລະ ທາດແທ້ຂອງຊາວໜຸ່ມ ຮຸ່ນໄລຍະທີ່ເຈົ້າຟ້າງຸ່ມທ້ອນໂຮມອານາຈັກລາວລ້ານຊ້າງ ແລະ ຕໍ່ສູ້ກັບສັກດີນາຜູ້ຮຸກຮານ ເຊິ່ງຊາວໜຸ່ມຮຸ່ນກ່ອນກໍ່ໄດ້ມີບົດບາດສໍາຄັນໃນການຕໍ່ສູ້ຢ່າງອົງອາດກ້າຫານເຖິງບໍ່ມີພັກນຳພາ ປະຊາຊົນລາວຈະຖືກຈັກກະພັດຝະລັ່ງກົດຂີ່ຂູດຮີດຢ່າງ  ໜັກໜ່ວງ ເກນແຮງງານຊາວໜຸ່ມໄປເປັນທະຫານ ເປັນກຸລີໂດຍບໍ່ໄດ້ຮັບຄ່າແຮງງານ ແຕ່ຊາວໜຸ່ມລາວກໍ່ບໍ່ຍອມກົ້ມຫົວຕໍ່ຄວາມໂຫດ ຮ້າຍປ່າເຖື່ອນຂອງສັກດີນາ ແລະ ຈັກກະພັດຕ່າງດ້າວ ເມື່ອເຫັນຄວາມໂຫດຮ້າຍຄືແນວນັ້ນ ຊາວໜຸ່ມລາວກໍ່ໄດ້ຫາທາງເພື່ອຕໍ່ສູ້ກູ້ຊາດ ເປັນຕົ້ນຂະບວນຕໍ່ສູ້ນຳພາໂດຍອົງແກ້ວ ອົງກົມມະດໍາ ພໍ່ກະດວດ ແລະ ອື່ນໆ ແຕ່ເປັນການຕໍ່ສູ້ພໍໃຜພໍລາວບໍ່ມີພັກນຳພາຈຶ່ງເຮັດໃຫ້ຂະບວນດັ່ງກ່າວປະລາໄຊລົງ. ພາຍຫຼັງທີ່ພັກປະຊາຊົນລາວຖືກສ້າງຕັ້ງຂຶ້ນ ໃນວັນທີ 22 ມີນາ 1955 ດ້ວຍຄວາມເຊື່ອໝັ້ນໃນກໍາລັງແຮງ ຄວາມສາມາດ ແລະ ນໍ້າໃຈອົງອາດກ້າຫານຂອງຊາວໜຸ່ມໃນພາລະກິດຕໍ່ສູ້ຕ້ານຈັກກະພັດຜູ້ຮຸກຮານ ພັກໄດ້ສ້າງຕັ້ງຊາວໜຸ່ມຕະລຸມບອນຂຶ້ນໃນວັນທີ 14 ເມສາ 1955 ເປັນໃຈກາງເຕົ້າໂຮມ ແລະ ສຶກສາອົບຮົມຊາວໜຸ່ມໃຫ້ມີບົດບາດປະຈັນບານໃນທຸກສະໜາມຮົບ ດ້ວຍມານະຈິດທີ່ວ່າ: ຍອມຕາຍດີກ່ວາຍອມເສຍເອກະລາດ ເດັດຂາດບໍ່ໃຫ້ປະເທດຊາດຖືກຕັດແບ່ງ ແລະ ຄວາມປອງດອງຊາດຖືກທຳລາຍ, ມາໄລຍະປົກປັກຮັກສາ ແລະ ສ້າງສາພັດທະນາປະເທດຊາດ ເຊິ່ງການຈັດຕັ້ງຊາວໜຸ່ມໄດ້ຮັບການສ້າງຕັ້ງຂຶ້ນ ແລະ ເຕົ້າໂຮມເອົາຄວາມສາມັກຄີຊາວໜຸ່ມລາວແຕ່ເໜືອຮອດໃຕ້ ເຂົ້າມາຢູ່ໃຕ້ຮົ່ມທຸງອັນດຽວກັນ ພາຍໃຕ້ການນຳພາຂອງພັກ ປະຊາຊົນປະຕິວັດລາວຢ່າງສົມກຽດ.

Additional information