ຂ່າວ

ກອງປະຊຸມຄະນະວິຊາການຂົນສົ່ງທາງອາກາດອາຊຽນ ຄັ້ງທີ່ 35

 

 ກອງປະຊຸມຄະນະວິຊາການຂົນສົ່ງທາງອາກາດອາຊຽນ ຄັ້ງທີ່ 35 ແລະ ກອງປະຊຸມຍ່ອຍທີ່ກ່ຽວຂ້ອງ (35 ASEAN Air Transport Working Group Meeting and Related Meetings) ໄດ້ຈັດຂຶ້ນໃນວັນທີ 6 ມີນາ 2017 ທີ່ໂຮງແຮມ Lao Plaza Hotel, ນະຄອນຫຼວງວຽງຈັນ ພາຍໃຕ້ການເປັນປະທານຂອງ ທ່ານ ວັນເພັງ ຈັນທະພອນ ຫົວໜ້າກົມການບິນພົນລະເຮືອນ ກະຊວງໂຍທາທິການ ແລະ ຂົນສົ່ງ, ໂດຍມີຜູ້ເຂົ້າຮ່ວມ ຈາກເຈົ້າໜ້າທີ່ການບິນພົນລະເຮືອນ ແລະ ສາຍການບິນຂອງບັນດາປະເທດສະມາຊິກອາຊຽນ ພ້ອມດ້ວຍ ປະເທດຄູ່ເຈລະຈາ ກອງປະຊຸມຈະດຳເນີນໄປເປັນເວລາ 5 ວັນ

 ໂດຍປະກອບມີ 5 ກອງປະຊຸມຍ່ອຍທີ່ກ່ຽວຂ້ອງ ຄື: ກອງປະຊຸມຄະນະເຈລະຈາຂົນສົ່ງ ທາງອາກາດອາຊຽນ ຄັ້ງທີ 2 ຮອບທີ 9, ກອງປະຊຸມຍ່ອຍຄະນະວິຊາການຮ່ວມ ມືດ້ານເສດຖະກິດຂົນສົ່ງທາງອາກາດອາຊຽນ ຄັ້ງທີ 14, ກອງປະຊຸມສາຍການບິນອາຊຽນຄັ້ງທີ 31 ແລະ ກອງປະຊຸມຍ່ອຍຄະນະວິຊາການຮ່ວມມື ວາງແຜນຍຸດທະສາດວຽກງານຄຸ້ມຄອງ ການຈະລາຈອນທາງອາກາດອາຊຽນ ຄັ້ງທີ 2.

 ກອງປະຊຸມດັ່ງກ່າວແມ່ນກອງປະຊຸມລະດັບວິຊາການຂອງເຈົ້າໜ້າທີ່ການບິນພົນລະເຮືອນອາຊຽນ ເຊິ່ງ ສປປ ລາວ ໄດ້ຮັບກຽດເປັນເຈົ້າພາບ ໃນໄລຍະເວລາ 2 ປີ (2016-2017) ລວມທັງໝົດໄດ້ຈັດກອງປະຊຸມ 4 ຄັ້ງ. ກອງປະຊຸມຄັ້ງນີ້ເປັນຄັ້ງທີ 3 ເຊີ່ງມີຄວາມໝາຍຄວາມ ສຳຄັນສຳລັບປະເທດສະມາຊິກອາຊຽນ ຕໍ່ກັບ ການຈັດຕັ້ງປະຕິບັດການເປີດຕະຫຼາດການບິນ ດຽວອາຊຽນ ທີ່ເປັນໜຶ່ງໃນເປົ້າໝາຍອັນສຳຄັນ ເພື່ອບັນລຸຕາມແຜນດຳເນີນງານການ ເປີດປະຊາຄົມເສດຖະກິດອາຊຽນ (ASEAN Economic Community) ເວົ້າ ລວມ, ເວົ້າສະເພາະ ແມ່ນເປັນການຜັນຂະຫຍາຍນະໂຍບາຍເປີດກວ້າງຂອງລັດຖະບານ ສປປ ລາວ ໂດຍ ຫັນເອົາປະເທດເປັນປະເທດບໍລິການທາງຜ່ານ. ເຊິ່ງໃນນີ້ຜູ້ເຂົ້າຮ່ວມກອງປະຊຸມຈະໄດ້ຄົ້ນຄວ້າ ແລະ ປຶກສາຫາລືກັນກ່ຽວກັບຂໍ້ຄົງຄ້າງ ແລະ ສິ່ງທ້າທາຍຕໍ່ການຈັດຕັ້ງປະຕິບັດ ການເປີດຕະຫຼາດ ການບິນ ດຽວອາຊຽນ ກໍ່ຄືນະໂຍບາຍການເປີດນານຟ້າເສລີອາຊຽນສະເພາະ ແມ່ນອົງປະກອບດ້ານເສດຖະກິດ ແລະ ເຕັກນິກ ສຳລັບການຂົນສົ່ງທາງອາກາດ ລະຫວ່າງປະເທດສະມາຊິກອາຊຽນດ້ວຍກັນ ແລະ ກັບບັນດາຄູ່ ເຈລະຈາ ເຊັ່ນ: ສປ ຈິນ, ສ ເກົາຫຼີ, ສະຫະພາບເອີລົບ, ຍີ່ປຸ່ນ, ອິນເດຍ, ເຂດປົກຄອງພິເສດຫົງກົງ ສປ ຈີນ, ສະຫະລັດອາເມລິກາ ແລະ ລັດເຊຍ.

 ຄຽງຄູ່ນີ້ ກອງປະຊຸມຍັງຈະໄດ້ປຶກສາຫາລືກັນກ່ຽວກັບການຈັດຕັ້ງປະຕິບັດແຜນວຽກ ຄະນະ ວິຊາການ ຂົນສົ່ງທາງອາກາດອາຊຽນ ສົກປີ 2016-2017, ຜົນຂອງກອງປະຊຸມເຈົ້າໜ້າ ທີ່ອາວຸໂສຂົນສົງອາຊຽນ ຄັ້ງທີ 42 ແລະ ກອງປະຊຸມລະດັບລັດຖະມົນຕີອາຊຽນ ຄັ້ງທີ 22, ເຊິ່ງຈັດຂຶ້ນໃນວັນທີ່ 14-17 ພະຈິກ 2016 ທີ່ປະເທດຟີລິບປິນ. ພ້ອມນີ້, ຜູ້ເຂົ້າຮ່ວມກອງປະຊຸມ ຍັງຈະໄດ້ສະເໜີຂະແໜງການບໍລິການຍ່ອຍດ້ານການຂົນສົ່ງທາງອາກາດຂອງຕົນ ເພື່ອບັນຈຸ ເຂົ້າໃນໝວດທີ 10 (Tenth packages of commitment on Air Transport Services under ASEAN Agreement Frameworks on services) ພາຍໃຕ້ຂອບສັນຍາອາຊຽນ ວ່າດ້ວຍການບໍລິການ, ລວມທັງຂັ້ນຕອນ ແລະ ມາດຕະຖານການອອກໃບອະນຸຍາດ ສຳລັບຖ້ຽວບິນ ປົກກະຕິ ແລະ ຖ້ຽວບິນຜ່ານ. ສະນັ້ນ, ເພື່ອບັນລຸເງື່ອນໄຂຂ້າງເທິງ ປະເທດສະມາຊິກອາຊຽນ ຕ້ອງໄດ້ ກະກຽມຄວາມພ້ອມຂອງຕົນ ບໍ່ວ່າຈະເປັນທາງດ້ານ ກົດໝາຍ, ລະບຽບການ ແລະ ມາດຕະຖານທາງດ້ານ ເສດຖະກິດ ແລະ ເຕັກນິກການບິນ.

 ສຳລັບຜົນຂອງກອງປະຊຸມໃນຄັ້ງນີ້ ຈະໄດ້ສະເໜີຕໍ່ກອງປະຊຸມເຈົ້າໜ້າທີ່ອາວຸໂສຂົນສົ່ງອາຊຽນ ແລະ ກອງປະຊຸມລະດັບລັດຖະມົນຕີຂົນສົ່ງອາຊຽນ ເພື່ອພິຈາລະນາຮັບຮອງໃນຄັ້ງຕໍ່ໄປ.

 

 

 

ການຂົນສົ່ງແບບຍືນຍົງໃນຕົວເມືອງ ນະຄອນຫຼວງວຽງຈັນໄດ້ຮັບທຶນຊ່ວຍເຫຼືອ 800 ຕື້ກີບ

  ກອງ​ປະຊຸມ​ຂົນສົ່ງ​ແບບ​ຍືນຍົງ ແລະ ເປັນ​ມິດ​ຕໍ່​ສິ່ງ​ແວດລ້ອມ ໄດ້​ດຳເນີນ​ມາ​ຮອດ​ວັນ​ທີ 15 ມີນາ 2017 ເປັນ​ມື້​ທີ 2 ສືບຕໍ່​ຈັດ​ກອງ​ປະຊຸມ​ປິ່ນ​ອ້ອມຄື: ກອງ​ປະຊຸມ​ນະໂຍບາຍ​ເພື່ອ​ບັນລຸຕົວ​ເມືອງ​ທີ່​ມີ​ມົນ​ລະ​ພິດ​ຕ່ຳ, ກອງປະຊຸມ​ທົບ​ທວນຄືນ ແລະ ຕີ​ລາຄາ​ປະ​ເມີນ​ຜົນ​ຄວາມ​ຄືບ​ໜ້າ ແລະ ບົດຮຽນ​ດີເລີດ​ຂອງ​ການຈັດ​ຕັ້ງ​ປະຕິບັດ​ຖະແຫຼງການ​ບາງກອກ 2020 ກອງ​ປະຊຸມ​ນະ​ໂຍບາຍ ແລະ ສິ່ງ​ທ້າ​ທາຍ ກາລະໂອກາດ​ໃນ​ການຈັດຕັ້ງ​ປະຕິບັດຂົນສົ່ງ​ໃນ​ຕົວ​ເມືອງ ແລະ ພ້ອມນັ້ນ ໄດ້​ມີ​ພິທີ​ເຊັນ​ສັນຍາ​ບົດ​ບັນທຶກ​ເພີ່ມ​ເຕີມ​ຖະແຫຼງ​ຂ່າວ​ກຽວໂຕ.

 ສຳລັບ ​ສປປ ລາວ ເຂົ້າ​ຮ່ວມ ແລະ ເລີ່ມ​ຮ່າງ​ຍຸດ​ທະສາດ​ການ​ຂົນສົ່ງ​ແບບ​ຍືນ​ຍົງ​ຕໍ່ສິ່ງແວດລ້ອມ​ແຕ່​ປີ 2006, ປັດຈຸ​ບັນ ໄດ້​ສຳເລັດ​ຮ່າງ​ສຸດ​ທ້າຍ ໄດ້​ຜ່ານ​ລັດຖະບານ​ໃນ​ເດືອນ​ກຸມພາ 2017 ແລະ ຄາດ​ວ່າ​ຈະ​ຖືກຮັບຮອງ​ອັນ​ໃກ້​ນີ້ ຄຽງ​ຄູ່​ກັບ​ຮ່າງຍຸດ​ທະ​ສາດ​ດັ່ງກ່າວ​ ສປປ ລາວ ​ໄດ້​ຮັບການ​ຊ່ວຍເຫຼືອ​ຈາກ​ອົງການ​ສາກົນ​ຫຼາຍ​ໂຄງການ ໃນ​ຂອບ​ການຮ່ວມ​ມື ເຊັ່ນ: ອົງການ​ໄຈ​ກາ​ຍີ່ປຸ່ນ ຊ່ວຍ​ສ້າງ​ແຜນ​ແມ່​ບົດ​ການຂົນສົ່ງ​ໃນ​ຕົວ​ເມືອງ​ນະຄອນຫຼວງວຽງ​ຈັນ ປີ 2008, ຊ່ວຍເຫຼືອ​ລົດເມ​ໃໝ່ 42 ຄັນ, ລົດໄຟ​ຟ້າ 14 ຄັນ ໃຫ້​ແຂວງ​ຫຼວງ​ພະ​ບາງ ແລະ ປັດຈຸບັນ ສືບຕໍ່​ໃຫ້ການ​ຊ່ວຍເຫຼືອທາງ​ວິຊາ​ການ​ຫຼາຍ​ໂຄງການ; ນອກ​ນີ້ ສ ເກົາຫຼີ ຊ່ວຍ​ສຶກ​ສາເບື້ອງ​ຕົ້ນ​ການ​ຂົນສົ່ງ​ໃນ​ຕົວເມືອງປາກ​ເຊ, ​ແຂວງ​ຈຳປາ​ສັກ ​ແລະ ​​ຂໍ​​​ໃຫ້ຊ່ວຍເຫຼືອ​​ໃນ​ການສຳຫຼວດ ​ອອກ​ແບບ​ລະອຽດ. ທະ​ນາຄານ​ພັດທະນາ​ອາຊີ ຮ່ວມ​ກັບອົງການ​ຜູ້ໃຫ້​ທຶນ​ອື່ນໆ ​ໄດ້​ຕົກລົງ​ໃຫ້ການ​ຊ່ວຍເຫຼືອ ມູນ​ຄ່າ 99,7 ລ້ານ​ໂດ​ລາ ຫຼື ປະມານ 800 ຕື້ກີບ ເພື່ອ​ຈັດ​ຕັ້ງ​ປະຕິບັດ​ໂຄງການ​ຂົນສົ່ງ​ແບບ​ຍືນ​ຍົງ​ໃນ​ຕົວເມືອງ ນະຄອນຫຼວງ​ວຽງ​ຈັນ, ປັດຈຸບັນ ກຳລັງ​ຈັດຕັ້ງ​ປະຕິບັດ. ນອກ​ນີ້ ຍັງ​ມີ​ຫຼາຍໂຄງການ​ທີ່​ກຳລັງ​ສຶກ​ສາ.

ກອງປະຊຸມຂົນສົ່ງແບບຍືນຍົງຕໍ່ສິ່ງແວດລ້ອມ ຄັ້ງທີ 10 ໄດ້ປິດລົງຢ່າງຈົບງາມ

  ກອງປະຊຸມ​ຂົນ​ສົ່ງ​ແບບ​ຍືນ​ຍົງ ​ແລະ ​ເປັນ​ມິດ​ຕໍ່​ສິ່ງ​ແວດ​ລ້ອມ ​ຄັ້ງທີ 10 ​ໄດ້​ດຳ​ເນີນ​ມາ 3 ວັນ ຮອດ​ວັນ​ທີ 16 ມີນາ 2017 ​ໄດ້​ປິດ​ລົງ​ຢ່າງ​ຈົບງາມ, ​​ໂດຍ​ການ​ເປັນ​ປະທານຂອງ​ ທ່ານ ບຸນ​ຈັນ ສິນ​ທະ​ວົງ ລັດ​ຖະມົນຕີ​ກະຊວງ ​ໂຍທາ​ທິການ ​ແລະ ຂົນ​ສົ່ງ, ມີ​ບັນດາ​ຜູ້ນຳ​ລະດັບ​ສູງ​ຈາກ​ກະຊວງ​ຂົນ​ສົ່ງ, ກະຊວງ​ສິ່ງ​ແວດ​ລ້ອມ, ກະຊວງ​ພັດທະນາ​ຕົວ​ເມືອງ, ກະຊວງສາທາລະນະ​ສຸກ ​ແລະ ຕາງໜ້າ​ພາກສ່ວນ​ລັດຖະບານ​ຈາກ​ບັນດາ​ປະ​ເທດ​ໃນ​ອາຊີ ​ແລະ ປາຊີ​ຟິກທັງ​ໝົດ 38 ປະ​ເທດ ​ແລະ ຕາງໜ້າ​ອົງການ​ຈັດ​ຕັ້ງ​ສາກົນ, ບັນດາ​ພາກ​ທຸລະ​ກິດ ​ແລະ ​ພາກສ່ວນ​ທີ່​ກ່ຽວຂ້ອງ​ເຂົ້າ​ຮ່ວມ.

 ກອງ​ປະຊຸມ​ຄັ້ງ​ນີ້ ​ໄດ້​ຮັບຮອງ​ຮ່າງ​ຖະ​ແຫຼ່ງການ​ວຽງ​ຈັນ ​ກ່ຽວ​ກັບ​ການ​ຂົນ​ສົ່ງ​ຊົນນະ​ບົດ​​ແບບຍືນຍົງ ​ແລະ ​ເພື່ອ​ບັນລຸ​ເປົ້າໝາຍຂອງ​ການ​ພັດທະນາ​ແບບ​ຍືນ​ຍົງຮອດ​ປີ 2030, ຊຶ່ງ​ຖະ​ແຫຼ່ງການດັ່ງກ່າວເປັນ​ຖະ​ແຫຼ່ງການ​ທີ່ສຳຄັນ​ໃນ​ການຈັດ​ຕັ້ງ​ປະຕິບັດ​ຂົນ​ສົ່ງ​ແບບ​ຍືນຍົງ  ​ແລະ ​ເປັນ​ມິດ​ຕໍ່​ສິ່ງ​ແວດ​ລ້ອມ ​ແລະ ມີ​ຄວາມ​ໝາຍ​ສຳຄັນ​ຕໍ່​ການ​ພັດທະນາ​ນະ​ໂຍບາຍ​ແຜນການ-ການ​ເງິນ ​ແລະ ການ​ພັດທະນາ​ພື້ນຖານ​ໂຄງ​ລ່າງ​ການ​ຂົນ​ສົ່ງ​ຊົນນະ​ບົດ ​​ແລ​ະ ຫວັງ​ວ່າ​ປະ​ເທດ​ສະມາຊິກ​ຈະ​ນຳ​ເອົາ​ຂອບ​ຖະ​ແຫຼ່ງການ​ສະບັບ​ນີ້​ໄປ​ຈັດ​ຕັ້ງ​ປະຕິບັດ​ໃຫ້​ເກີດ​ດອກ​ອອກ​ຜົນ ​ແລະ ​ໄດ້​ຮັບ​ຜົນສຳ​ເລັດ. ນອກ​ນີ້ ​ກອງ​ປະ​ຊຸມ​ຍັງ​ໄດ້​ລົງທະບຽນ​ເພີ້​ມ​ເຕີມ​ຂອງ​ຖະ​ແຫຼ່ງການ​ກຽວ​ໂຕ ຊຶ່ງ​ຖະ​ແຫຼ່ງການ​ນີ້ ​ເປັນ​ການ​ສົ່ງ​ເສີມ​ການ​ຂົນ​ສົ່ງ​ແບບ​ຍືນ​ຍົງ​ເປັນ​ມິດ​ຕໍ່​ສິ່ງ​ແວດ​ລ້ອມ ​ເພື່ອ​ບັນລຸ​ເປົ້າ​ໝາຍ​ເຮັດ​ໃຫ້​ຕົວ​ເມືອງ​ໜ້າ​ຢູ່ ​ໃນ​ການ​ລົງທະບຽນ​ຄັ້ງນີ້​ມີ 29 ນະຄອນ​ເຂົ້າ​ຮ່ວມ​ລົງທະບຽນ​ເພີ້​ມ​ຕື່ມ, ປັດຈຸ​ບັນ​ມີ​ທັງ​ໝົດ 51 ນະຄອນ​ທີ່​ຮ່ວມ​ລົງທະບຽນ​ໃນຖະ​ແຫຼ່ງການ​ກຽວ​ໂຕ. ສຳລັບກອງປະຊຸມ​ຂົນ​ສົ່ງ​ແບບ​ຍືນ​ຍົງ ​ແລະ ​ເປັນ​ມິດ​ຕໍ່​ສິ່ງ​ແວດ​ລ້ອມ​ຄັ້ງທີ 11 ​ແມ່ນ​ປະ​ເທດ​ມົງ​ໂກ​ລີ ​ໄດ້​ຮັບ​ກຽດ​ເປັນ​ເຈົ້າພາບ.

ກອງປະຊຸມຂົນສົ່ງແບບຍືນຍົງ ແລະ ເປັນມິດຕໍ່ສິ່ງແວດລ້ອມ (EST) ຂອງອາຊີ ຄັ້ງທີ X

 ກອງປະຊຸມຂົນສົ່ງແບບຍືນຍົງ ແລະ ເປັນມິດຕໍ່ສິ່ງແວດລ້ອມ (Environmentally Sustainable Transport Forum) ຄັ້ງທີ 10 ໄດ້ໄຂຂື້ນຢ່າງເປັນທາງການທີ່ໂຮງແຮມດອນຈັນພາເລດ ນະຄອນຫຼວງວຽງຈັນ ໃນຕອນເຊົ້າຂອງວັນທີ 14 ມີນາ 2017 ໂດຍການເປັນເຈົ້າພາບຮ່ວມຂອງ ກະຊວງໂຍທາທິການ ແລະ ຂົນສົ່ງ ແຫ່ງ ສປປ ລາວ, ແລະ UNCRD. ກອງປະຊຸມຄັ້ງ​ນີ້ໄດ້ຮັບກຽດ ໃນພິທີເປີດກອງປະຊຸມຢ່າງເປັນທາງການ ໂດຍການເຂົ້າຮ່ວມຂອງ ທ່ານ ສົມດີ ດວງດີ, ຮອງນາຍົກລັດຖະມົນຕີ, ລັດຖະມົນຕີກະຊວງການເງິນ ແຫ່ງ ສປປ ລາວ; ມີຜູ້ບັນດາຜູ້ແທນລະດັບສູງຈາກກະຊວງຂົນສົ່ງ, ກະຊວງສິ່ງແວດລ້ອມ, ກະຊວງພັດທະນາຕົວເມືອງ, ກະຊວງສາທາລະນະສຸກ ແລະ ຕາງໜ້າໃຫ້ພາກສ່ວນລັດຖະບານຈາກບັນດາປະເທດໃນອາຊີ ແລະ ປາຊິຟິກ ທັງໝົດ 46 ປະເທດ ເຂົ້າຮ່ວມ; ພ້ອມນີ້ ຍັງມີບັນດາແຂກຈາກສູນກາງ ແລະ ທ້ອງຖິ່ນ ພາຍໃນປະເທດ, ບັນດານັກຊ່ຽວຊານຕ່າງປະເທດ, ບັນດາແຂກຈາກອົງການຈັດຕັ້ງສາກົນຕ່າງໆ ແລະ ບັນດາແຂກຈາກພາກທຸລະກິດ, NGOs ເຂົ້າຮ່ວມ ລວມທັງໝົດຫຼາຍກ່ວາ 300 ທ່ານ.

 ກອງປະຊຸມຂົນສົ່ງແບບຍືນຍົງ ແລະ ເປັນມິດຕໍ່ສິ່ງແວດລ້ອມ ຫຼື EST Forum ຄັ້ງທີ 10 ທີ່ນະຄອນຫຼວງວຽງຈັນ ໃນຄັ້ງນີ້ ແມ່ນຈະດໍາເນີນໄປ ເປັນເວລາ 3 ວັນ, 14-16 ມີນາ 2017 ພາຍໃຕ້ຄໍາຂັວນ2030 Roadmap for Sustainable Transport ~ Aligning with Sustainable Development Goals (SDGs)” ຫຼື ‘ແຜນດໍາເນີນການວ່າດ້ວຍການຂົນສົ່ງແບບຍືນຍົງ ຮອດປີ 2030 ທີ່ສອດຄ່ອງກັບເປົ້າໝາຍພັດທະນາແບບຍືນຍົງ’. ກອງປະຊຸມຂົນສົ່ງແບບຍືນຍົງຕໍ່ສິ່ງແວດລ້ອມ (EST) ຄັ້ງທີ 10 ແມ່ນ​ເພື່ອປຶກສາຫາລື ກ່ຽວກັບວິທີການມີສ່ວນຮ່ວມຂອງບັນດາປະເທດອາຊີ ທີ່ເປັນສະມາຊິກຂອງ EST ໃນການເພື່ອບັນລຸເປົ້າໝາຍຮອດປີ 2030 ຂອງການພັດທະນາແບບຍືນຍົງ ຫຼື SDGs ໂດຍການຈັດຕັ້ງປະຕິບັດການຂົນສົ່ງແບບຍືນຍົງຂອງບັນດາປະເທດດັ່ງກ່າວ; ປຶກສາຫາລື ກ່ຽວກັບບັນຫາຕ່າງໆ ທາງດ້ານນະໂຍບາຍ, ມາດຕະການ, ກົນໄກທາງດ້ານເຕັກໂນໂລຊີ ແລະ ການເງິນ ຕະຫຼອດຮອດ ຄູ່ຮ່ວມມືດ້ານວຽກງານການຂົນສົ່ງ ເພື່ອໃຫ້ບັນລຸເປົ້າໝາຍການພັດທະນາແບບຍືນຍົງ SDGs; ເພີ່ມທະວີການປຶກສາຫາລືດ້ານນະໂຍບາຍ ກ່ຽວກັບເຂົ້າເຖິງຊົນນະບົດ ແລະ ເຊື່ອມຈອດກັບຊົນນະບົດ ໃນດ້ານຄວາມປອດໄພດ້ານອາຫານ, ລຶບລ້າງການອຶດຫິວ, ການຮ່ວມມືຂອງພາກພື້ນ ແລະ ການພັດທະນາພາກພື້ນແບບຍືນຍົງ; ສະເໜີກ່ຽວກັບພາລະບົດບາດຂອງການຂົນສົ່ງທາງລົດໄຟ ໃນການບັນລຸເປົ້າໝາຍປີ 2030 ຂອງການພັດທະນາແບບຍືນຍົງ; ປຶກສາຫາລື ແລະ ສະເໜີກ່ຽວກັບ ວິທີການໃຫ້ການຂົນສົ່ງແບບຍືນຍົງ ສາມາດປະກອບສ່ວນໃນວຽກງານ ສົ່ງເສີມຄວາມເທົ່າທຽມຂອງຍິງຊາຍ ແລະ ວຽກງານຍົກສູງບົດບາດຂອງເພດຍິງ ແລະ ເດັກຍິງ; ທົບທວນຄືນ ແລະ ຕີລາຄາຄວາມຄືບໜ້າ ແລະ ບົດຮຽນອັນດີເລີດ ຂອງການຈັດຕັ້ງປະຕິບັດ ຖະແຫຼ່ງການບາງກອກ 2010 (Bangkok Declaration 2010-2020) ແລະຖອດຖອນບາງບົດຮຽນອັນຈໍາເປັນທີ່ໄດ້ຮັບ ເພື່ອເປັນທິດທາງໃຫ້ບັນດາປະເທດສະມາຊິກ EST ໃນການກ້າວໄປທາງໜ້າສູ້ເປົ້າໝາຍການພັດທະນາແບບຍືນຍົງ ໂດຍການຈັດຕັ້ງປະຕິບັດການຂົນສົ່ງແບບຍືນຍົງຂອງປະເທດດັ່ງກ່າວ. ໃນ​ມື້​ສຸດ​ທ້າຍ​ຂອງ​ກອງ​ປະຊຸມຈະໄດ້ພິຈາລະນາ ຮ່າງຖະແຫຼ່ງການວຽງຈັນ ກ່ຽວກັບການຂົນສົ່ງຊົນນະບົດແບບຍືນຍົງ ເພື່ອບັນລຸເປົ້າໝາຍປີ 2030 ຂອງການພັດທະນາແບບຍືນຍົງ (Vientiane Declaration on Sustainable Rural Transport towards achieving  the 2030 Agenda for Sustainable Development).

Additional information