ຂ່າວພາຍໃນກະຊວງ

ກອງປະຊຸມໃຫຍ່ຜູ້ແທນ ອົງຄະນະພັກ ກະຊວງ ຍທຂ ຄັ້ງທີ V ອັດລົງດ້ວຍຜົນສຳເລັດຢ່າງສະຫງ່່າງາມ

ກອງປະຊຸມໃຫຍ່ຜູ້ແທນ ອົງຄະນະພັກ ກະຊວງໂຍທາທິການ ແລະ ຂົນສົ່ງ (ຍທຂ) ຄັ້ງທີ V ໄດ້ອັດລົງດ້ວຍຜົນສໍາເລັດຢ່າງສະຫງ່່າງາມຕາມຈຸດປະສົງ ໃນວັນທີ 20 ພະຈິກ 2020. ກອງປະຊຸມໃຫຍ່ຄັ້ງນີ້, ໄດ້ຄົ້ນຄວ້າປະກອບຄຳເຫັນ ແລະ ໄດ້ຮັບຮອງເອົາຮ່າງບົດລາຍງານເມືອງ ຂອງຄະນະບໍລິຫານງານພັກກະຊວງ ຍທຂ ໂດຍມີຄວາມເປັນເອກະພາບ ຕໍ່ທັດສະນະການສະຫຼຸບຕີລາຄາ ການຈັດຕັ້ງປະຕິບັດມະຕິຂອງກອງປະຊຸມໃຫຍ່ ອົງຄະນະພັກກະຊວງ ຍທຂ ຄັ້ງທີ IV, ການຈັດຕັ້ງປະຕິບັດແຜນການ 5 ປີຜ່ານ​ມາ, ຊຶ່ງສະແດງອອ​ກ​ດ້ວຍຜົນງານອັນໃຫຍ່ຫຼວງທີ່ພວກເຮົາຍາດມາໄດ້ ອັນໄດ້ຢັ້ງຢືນຢ່າງຈະແຈ້ງວ່າການປະຕິບັດຕາມແນວທາງປ່ຽນແປງໃໝ່ຢ່າງ​ມີຫຼັກ​ການຂອງພັກ ໃນຂະແໜງ ການໂຍທາທິການ ແລະ ຂົນສົ່ງ ສອດຄ່ອງກັບສະພາບຄວາມເປັນຈິງຂອງປະເທດເຮົາ ໃນການປະຕິບັດຍຸດທະສາດການເຊື່ອມໂຍງ ແລະ ເຊື່ອມຈອດ ກັບພາກພື້ນ ແລະ ສາກົນ ແມ່ນຖືກຕ້ອງ, ຊຶ່ງໄດ້ສ້າງບາດກ້າວບຸກທະລຸໃໝ່ ໃຫ້ຂະແໜງການໂຍທາທິການ ແລະ ຂົນສົ່ງ ທີ່​ເປັນ​ຂະ​ແໜງ​ການ​ປາຍ​ແຫຼມຂອງ​ເສດ​ຖະ​ກິດ​ແຫ່ງ​ຊາດ ກ້າວຂຶ້ນສຳເລັດໜ້າທີ່ອັນສູງສົ່ງ ແລະ ມີກຽດ ທີ່ພັກ ແລະ ລັດຖະບານ ມອບໝາຍໃຫ້.

ຜູ້ແທນສົມບູນຈຳນວນ ຈຳນວນ 236 ສະຫາຍ, ຍິງ 53 ສະຫາຍ ທີ່ເປັນຕົວແທນໃຫ້ແກ່ສະມາຊິກພັກທັງໝົດ ຈຳນວນ 686 ສະຫາຍ ໄດ້ເລືອກຕັ້ງເອົາຄະນະບໍລິຫານງານພັກກະຊວງ ສະໄໝທີ V (ຊຸດ ໃໝ່) ຈຳນວນ 19 ສະຫາຍ, ຍິງ 2 ສະຫາຍ ຢ່າງມີປະຊາທິປະໄຕ, ມີຄວາມຮັບຜິດຊອບສູງ, ຖືກຕ້ອງຕາມກົດລະບຽບຂອງພັກ ແລະ ຄວາມຮຽກຮ້ອງຕ້ອງການຂອງໜ້າທີ່ການເມືອງໃນໄລຍະໃໝ່ ເພື່ອເປັນຫລັກແຫລ່ງແກ່ນສານ ໃນການນຳພາ-ຊີ້ນຳວຽກງານຂະແໜງການໂຍທາທິການ ແລະ ຂົນສົ່ງ ຢ່າງຮອບ ດ້ານໃນໄລຍະ 5 ປີຕໍ່ໜ້າດັ່ງລາຍລຸ່ມນີ້:

  1. ສະຫາຍ ວຽງສະຫວັດ ສີພັນດອນ
  2. ສະຫາຍ ລັນ ແສງອາພອນ
  3. ສະຫາຍ ນາງ ວິໄລຄຳ ໂພສາລາດ
  4. ສະຫາຍ ປອ. ສັນຕິສຸກ ສິມມາລາວົງ
  5. ສະຫາຍ ນາງ ພອນສະຫວັນ ແພງສີດາ
  6. ສະຫາຍ ແສງດາລິດ ກັດຕິຍະສັກ
  7. ສະຫາຍ ລິດຕາ ຂັດທິຍະ
  8. ສະຫາຍ ປອ. ວຽງນາມ ດວງພະຈັນ
  9. ສະຫາຍ ວັນທອງ ບຸດຕະນະວົງ
  10. ສະຫາຍ ໄຊສົງຄາມ ມະໂນທັມ
  11. ສະຫາຍ ງາມປະສົງ ເມືອງມະນີ
  12. ສະຫາຍ ປອ. ບຸນຕາ ອ່ອນນາວົງ
  13. ສະຫາຍ ສົມປອງ ສິດທິວົງ
  14. ສະຫາຍ ວຽງໄຊ ສິງຄຳ
  15. ສະຫາຍ ດາວຈິນດາ ສີຫາລາດ
  16. ສະຫາຍ ສີລິພອນ ອິນທິລາດ
  17. ສະຫາຍ ຄຳຫລ້າ ພົມມະວັນ
  18. ສະຫາຍ ຈັນທະລາ ພິມມະຈັກ
  19. ສະຫາຍ ບຸນມາ ຫຼວງບັນດິດ

ກອງປະຊຸມຄັ້ງປະຖົມມະລືກຂອງຄະນະບໍລິຫານ​ງານພັກກະຊວງ​ໂຍ​ທາ​ທິ​ການ ​ແລະ ​ຂົນ​ສົ່ງ ສະໄໝທີ V ໄດ້ເປັນເອກະສັນເລືອກຕັ້ງເອົາຄະນະປະຈຳ​ພັກ, ເລຂາ, ຮອງເລຂາ ​ແລະ ປະທານ, ຮອງປະທານກວດກາ​ພັກ ດັ່ງນີ້:

    ເລືອກຕັ້ງຄະນະປະຈຳພັກ ປະກອບມີ 5 ສະຫາຍ ຄື:

  1. ສະຫາຍ ວຽງສະຫວັດ ສີພັນດອນ
  2. ສະຫາຍ ລັນ ແສງອາພອນ
  3. ສະຫາຍ ນາງ ວິໄລຄຳ ໂພສາລາດ
  4. ສະຫາຍ ລິດຕາ ຂັດທິຍະ
  5. ສະຫາຍ ໄຊສົງຄາມ ມະໂນທັມ

    ເລືອກຕັ້ງເອົາເລຂາ, ຮອງເລຂາແລະ ປະທານ, ຮອງປະທານກວດກາ​ພັກ ຄື:

  1. ສະຫາຍ ວຽງສະຫວັດ ສີພັນດອນ ເປັນ​ເລ​ຂາ
  2. ສະຫາຍ ລັນ ແສງອາພອນ      ເປັນຮອງເລຂາ
  3. ສະຫາຍ ໄຊສົງຄາມ ມະໂນທັມ   ເປັນ​ປະ​ທານກວດ​ກາ​ພັກ
  4. ສະຫາຍ ສີພັນດອນ ສຸພັນທອນ   ເປັນຮອງ​ປະ​ທານກວດ​ກາ​ພັກ
  5. ສະຫາຍ ພອນພະນາ ພົຣມມາລາ ເປັນຮອງປະທານກວດກາພັກ

ກອງ​ປະຊຸມ​​ໃຫຍ່ຄັ້ງນີ້ ​ໄດ້ເລືອກເອົາຜູ້ແທນສົມບູນ ແລະ ຜູ້​ແທນສຳຮອງ ໄປຮ່ວມກອງປະຊຸມ​ໃຫຍ່ ຄັ້ງທີ XI ຂອງພັກ ຄື:

  1. ສະຫາຍ ວຽງສະຫວັດ ສີພັນດອນ        ເປັນ​ຜູ້​ແທນສົມບູນ
  2. ສະຫາຍ ລັນ ແສງອາພອນ             ເປັນ​ຜູ້​ແທນສົມບູນ
  3. ສະຫາຍ ນາງ ວິໄລຄຳ ໂພສາລາດ       ເປັນ​ຜູ້​ແທນສົມບູນ
  4. ສະຫາຍ ປອ. ສັນຕິສຸກ ສິມມາລາວົງ      ເປັນ​ຜູ້​ແທນສົມບູນ
  5. ສະຫາຍ ໄຊສົງຄາມ ມະໂນທັມ          ເປັນ​ຜູ້​ແທນສົມບູນ
  6. ສະຫາຍ ລິດຕາ ຂັດທິຍະ              ເປັນ​ຜູ້​ແທນສົມບູນ
  7. ສະຫາຍ ປອ. ບຸນຕາ ອ່ອນນາວົງ        ເປັນ​ຜູ້​ແທນສົມບູນ
  8. ສະຫາຍ ປອ. ວຽງນາມ ດວງພະຈັນ      ເປັນ​ຜູ້​ແທນສຳຮອງ
  9. ສະຫາຍ ນາງ ພອນສະຫວັນ ແພງສີດາ                    ເປັນ​ຜູ້​ແທນສຳຮອງ

   ຊຶ່ງບັນດາສະຫາຍ ທີ່ໄດ້ຮັບການເລືອກຕັ້ງທັງໝົດຄັ້ງນີ້, ລ້ວນແຕ່ແມ່ນຜູ້ທີ່ມີຄວາມຮູ້ຄວາມສາມາດ, ມີບົດຮຽນໃນການນຳພາ-ຊີ້ນຳວຽກງານໂຍທາທິການ ແລະ ຂົນສົ່ງ ໃນໄລຍະຜ່ານມາ, ທັງເປັນຜູ້ທີ່ຊື່ສັດ ແລະ ຈົ່ງຮັກພັກດີຕໍ່ພາລະກິດປະຕິວັດຂອງພັກ.

ໂອກາດນີ້, ກອງປະຊຸມໃຫຍ່ຖືເປັນກຽດຢ່າງສູງ ທີ່ໄດ້ຮັບຟັງຄຳໂອ້ລົມອັນມີຄວາມໝາຍໜັກ​ແໜ້ນເລິກເຊິ່ງ ແລະ ມີຊີວິດຊີວາຈາກ ສະຫາຍ ສອນໄຊ ສີພັນດອນ ກຳມະການກົມການເມືອງສູນກາງພັກ, ຮອງນາຍົກລັດຖະມົນຕີ, ລັດຖະມົນຕີ ກະຊວງແຜນການ ແລະ ການລົງທຶນ ໂດຍຕາງໜ້າໃຫ້ ກົມການເມືອງສູນກາງພັກ ແລະ ລັດຖະບານ ຕີລາຄາສູງຕໍ່ໝາກຜົນ, ຜົນງານແຫ່ງການນຳພາ-ຊີ້ນໍາ ແລະ ຈິດໃຈບຸກບືນສູ້ຊົນຂອງຄະນະພັກ, ສະມາຊິກພັກ-ພະນັກງານ ຂອງກະຊວງ ຍທຂ ໃນການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ IV ຂອງອົງຄະນະພັກຂອງຕົນ ໃນໄລຍະ 5 ປີທີ່ຜ່ານມາ ເຊິ່ງມີຜົນງານທີ່ພົ້ນເດັ່ນຫລາຍດ້ານ ເປັນຕົ້ນ: ການປົກປັກຮັກສາສະຖຽນລະພາບ ທາງດ້ານການເມືອງທີ່ໜັກແໜ້ນໝັ້ນຄົງ, ລະບົບການເມືອງນັບແຕ່ຂັ້ນໜ່ວຍພັກຮາກຖານຂຶ້ນມາ ແມ່ນໄດ້ຮັບການປັບປຸງປົວແປງໃຫ້ດີຂຶ້ນກວ່າເກົ່າ ແລະ ລະບົບການຈັດຕັ້ງໄດ້ຮັບການປັບປຸງເປັນແຕ່ລະໄລຍະຕະຫລອດມາ. ກອງປະຊຸມໃຫຍ່ຄັ້ງນີ້, ເປັນເຫດການທີ່ມີຄວາມໝາຍສໍາຄັນໃນຊີວິດການເມືອງ ທີ່ສ່ອງແສງໃຫ້ເຫັນເຖິງການເຕີບໃຫຍ່ຂະຫຍາຍ ຕົວຂອງສະມາຊິກພັກ, ພະນັກງານໃນທົ່ວກະຊວງໂຍທາທິການ ແລະຂົນສົ່ງ.

ພ້ອມດຽວກັນ, ກໍໄດ້ຮັບຟັງການໂອ້ລົມເພື່ອເປັນເຂັມຊີ້ທິດເຍືອງທາງ ເຂົ້າໃນຂະບວນການຈັດຕັ້ງປະຕິບັດວຽກງານຕ່າງໆ ໂດຍໄດ້ເນັ້ນໃຫ້ຄະນະພັກຊຸດໃໝ່ ເອົາໃຈໃສ່ໃນການຄົ້ນຄວ້າ ແລະ ຕົກລົງ ກ່ຽວກັບການແບ່ງວຽກ, ແບ່ງຄວາມຮັບຜິດຊອບໃຫ້ບັນດາສະຫາຍ ໃນຄະນະບໍລິຫານງານພັກກະຊວງຄືນໃໝ່ ໃຫ້ແທດເໝາະກັບຄວາມຮູ້, ຄວາມສາມາດ ແລະ ປະສົບການຂອງແຕ່ລະສະຫາຍ. ໃຫ້ຮີບຮ້ອນຫັນເອົາມະຕິກອງປະຊຸມໃຫຍ່ ກໍຄື ທິດທາງແຜນການ ໃຫ້ເປັນແຜນດໍາເນີນງານຕະຫລອດສະໄໝ, ແຜນງານໂຄງການ ແລະ ສ້າງເປັນນິຕິກໍາລະອຽດ ເພື່ອຈັດຕັ້ງການເຜີຍແຜ່ເຊື່ອມຊຶມ ໂດຍເລີ່ມແຕ່ຄະນະບໍລິຫານງານພັກກະຊວງ, ຮາກຖານພັກບັນດາກົມ, ສະຖາບັນ ແລະ ກອງວິຊາການ ຈົນເຖິງບັນດາໜ່ວຍພັກຂຶ້ນກັບຄະນະພັກຮາກຖານຕ່າງໆ ໃຫ້ທົ່ວເຖິງ. ພ້ອມກັນນັ້ນ, ກໍເນັ້ນໃຫ້ເຊີດຊູຄວາມເປັນເຈົ້າການ ແລະ ຄວາມຮັບຜິດຊອບການເມືອງໃຫ້ສູງຂຶ້ນ, ບໍ່ວ່າວຽກນັ້ນຈະໜັກ ຫລືເບົາ, ແມ່ນຂະແໜງການໃດ, ຂົງເຂດ ຫລື ທ້ອງຖິ່ນໃດ ແລະ ບໍ່ຈໍາແນກວຽກນັ້ນ ວ່າເຄີຍເຮັດຜ່ານມາ ຫລື ບໍ່, ຈະຍົກຍ້າຍບ່ອນໃໝ່ ຫລື ບໍ່, ຕ້ອງມີຄວາມຮັບຜິດຊອບຢ່າງແຂງແຮງເຖິງຜົນໄດ້ຜົນເສຍ, ຕ້ອງທຸ້ມເທເຫື່ອແຮງ, ສະຕິປັນຍາ, ຄວາມຮູ້, ຄວາມສາມາດ, ຄວາມເສຍສະຫລະ ເພື່ອເຮັດສໍາເລັດໜ້າທີ່ ທີ່ໄດ້ຮັບມອບໝາຍ.

ປະຕິບັດຢ່າງຖືກຕ້ອງຫລັກການເຮັດວຽກ ແລະ ນໍາພາຂອງພັກ ໂດຍສະເພາະແມ່ນຫລັກການ ລວມສູນປະຊາທິປະໄຕ, ນໍາພາເປັນໝູ່ຄະນະ, ບຸກຄົນຮັບຜິດຊອບ, ໝູນໃຊ້ສະຕິປັນຍາລວມໝູ່ ເພີ່ມທະວີຄວາມເປັນເອກະພາບປະຊາທິປະໄຕພາຍໃນພັກ ທີ່ແມ່ນກໍາລັງແຮງ ແລະ ຜົນສໍາເລັດ ຂອງທຸກວຽກງານ. ມີທັດສະນະມະຫາຊົນຢ່າງແທ້ຈິງ ໂດຍເລີ່ມຈາກຄວາມຮຽກຮ້ອງຕ້ອງການ ແລະ ຜົນປະໂຫຍດລວມຂອງມະຫາຊົນ, ໃຫ້ມະຫາຊົນ ແລະ ປະຊາຊົນມີສ່ວນຮ່ວມ ໃນວຽກງານຕ່າງໆ, ທຸກວຽກງານຈະໃຫຍ່ຫລວງ ແລະ ຫຍຸ້ງຍາກສັບສົນ ແຕ່ຖ້າມີຄວາມສາມັກຄີເປັນເອກະພາບ ແລະ ປະຊາຊົນເຂົ້າຮ່ວມແລ້ວ ຈະຕ້ອງມີຜົນສໍາເລັດຢ່າງແນ່ນອນ. ຄຽງຄູ່ກັນັ້ນ, ຕ້ອງເອົາໃຈໃສ່ຕັ້ງໜ້າຝຶກຝົນຕົນເອງໃນຂະບວນການວຽກງານວິຊາສະເພາະຕົວຈິງ, ເຊື່ອມຊຶມກໍາແໜ້ນ ແລະ ເປັນເຈົ້າການນໍາພາປະຕິບັດບັນດາແນວທາງນະໂຍບາຍ, ກົດລະບຽບຂອງພັກ, ກົດໝາຍຂອງລັດ, ຊອກຮູ້ຮໍ່າຮຽນນໍາມະຫາຊົນ, ລົງເລິກໃກ້ຊິດຕິດແທດ ແລະ ນໍາພາເຮັດວຽກຕົວຈິງ, ເພີ່ມຄວາມຮັບຜິດຊອບ, ຄວາມເປັນແບບຢ່າງໃນແບບແຜນວິທີນໍາພາ, ວິທີເຮັດວຽກ ແລະ ແບບແຜນການດໍາລົງຊີວິດ, ສຶກສາອົບຮົມສະມາຊິກໃນຄອບຄົວ, ລູກຫລານ, ຍາດພີ່ນ້ອງຂອງຕົນໃຫ້ເປັນແບບຢ່າງໃນສັງຄົມ.

ພ້ອມນີ້, ສະຫາຍ ສອນໄຊ ສີພັນດອນ ຍັງໄດ້ສະແດງຄວາມເຊື່ອໝັ້ນວ່າ: ພາຍໃຕ້ການນຳ ພາ-ຊີ້ນຳ ຂອງຄະນະພັກຊຸດໃໝ່ ຈະສືບຕໍ່ເຮັດໃຫ້ມະຕິກອງປະຊຸມໃຫຍ່ ຄັ້ງທີ V ຂອງອົງຄະນະພັກກະຊວງ ສາມາດປະກົດຜົນເປັນຈິງ, ເຮັດໃຫ້ກະຊວງ ຍທຂ ມີຄວາມໜັກແໜ້ນທາງດ້ານການເມືອງ ສືບ ຕໍ່ເປັນປາຍແຫລມຂອງເສດຖະກິດແຫ່ງຊາດ ແລະ ມີບາດກ້າວບຸກທະລຸໃໝ່ຮອບດ້ານ ຕາມຄໍາຂວັນຂອງຂະແໜງການ ຍທຂ ທີ່ວ່າ: “ພັດທະນາໂຍທາທິການ ແລະ ຂົນສົ່ງ ໃຫ້ເປັນປາຍແຫລມ, ມີຈຸດສຸມ, ມີປະສິດທິຜົນສູງ, ທັນສະໄໝ, ປອດໄພ, ມີຄວາມທົນທານຕໍ່ການປ່ຽນແປງດິນຟ້າອາກາດ, ເຊື່ອມຈອດ ແລະ  ຍືນຍົງ”.

ກອງປະຊຸມ ເປີດກວ້າງ ແລະ ທາບທາມຄຳເຫັນ ໃສ່ຮ່າງຂໍ້ຕົກລົງວ່າດ້ວຍການຄຸ້ມຄອງທາງດ່ວນສຳປະທານ ນະຄອນຫຼວງວຽງຈັນ-ວັງວຽງ (ລາວ-ຈີນ)

 

ກອງປະຊຸມ ເປີດກວ້າງ ແລະ ທາບທາມຄຳເຫັນ ໃສ່ຮ່າງຂໍ້ຕົກລົງວ່າດ້ວຍການຄຸ້ມຄອງທາງດ່ວນສຳປະທານ ນະຄອນຫຼວງວຽງຈັນ-ວັງວຽງ (ລາວ-ຈີນ) ແຂວງວຽງຈັນ, ໄດ້ຈັດຂື້ນໃນວັນທີ 3-5 ພະຈິກ 2020 ທີ່ໂຮງແຮມອາມາລິນ, ເມືອງວັງວຽງ ແຂວງວຽງຈັນ, ພາຍໃຕ້ການເປັນປະທານຂອງ ທ່ານ ວຽງສະຫວັດ ສີພັນດອນ, ຮອງລັດຖະມົນຕີ ກະຊວງ ຍທຂ, ມີຫ້ອງການ, ບັນດາກົມ, ກອງອ້ອມຂ້າງກະຊວງ ຍທຂ, ຫ້ອງວ່າການສຳນັກງານນາຍົກລັດຖະມົນຕີ, ກະຊວງຍຸຕິທຳ, ກະຊວງປ້ອງກັນຄວາມສະຫງົບ, ກະຊວງ ສາທາລະນະສຸກ, ຫ້ອງວ່າການປົກຄອງນະຄອນຫຼວງວຽງຈັນ, ຫ້ອງວ່າການປົກຄອງ ແຂວງວຽງຈັນ, ພະແນກ ຍທຂ ນະຄອນຫຼວງວຽງຈັນ, ພະແນກ ຍທຂ ແຂວງວຽງຈັນ, ພະແນກ ຊັບພະຍາກອນທຳມະຊາດ ແລະ ສິ່ງແວດລ້ອມ ນະຄອນຫຼວງວຽງຈັນ ແລະ ແຂວງວຽງຈັນ, ຫ້ອງການ ຍທຂ 5 ເມືອງ ຕາມແລວທາງດ່ວນ ແລະ ຫ້ອງການ ຊັບພະຍາກອນທຳມະຊາດ ແລະ ສິ່ງແວດລ້ອມ 5 ເມືອງຕາມແລວທາງດ່ວນ ແລະ ພາກສ່ວນຕ່າງໆທີ່ກ່ຽວຂ້ອງກໍ່ໄດ້ເຂົ້າຮ່ວມ.

ປະຈຸບັນການພັດທະນາຕາໜ່າງເສັ້ນທາງ ນັບມື້ມີການຂະຫຍາຍຕົວຢ່າງຕໍ່ເນື່ອງ, ພ້ອມນີ້ທາງດ່ວນ ແຕ່ນະຄອນຫຼວງວຽງຈັນ-ເມືອງວັງວຽງ (ລາວ-ຈີນ) ແຂວງວຽງຈັນ ທີມີຄວາມຍາວ 109 ກມ, ແມ່ນເປັນທາງດ່ວນສຳປະທານ ເສັ້ນທຳອິດໃນ ສປປ ລາວ, ໄດ້ເລີ່ມຕົ້ນກໍ່ສ້າງໃນປີ 2018 ແລະ ຈະເປີດນຳໃຊ້ໃນເດືອນ ທັນວາ 2020 ນີ້, ດັ່ງນັ້ນ, ນິຕິກຳເພື່ອຄຸ້ມຄອງການນຳໃຊ້ທາງດ່ວນດັ່ງກ່າວ ຈຶ່ງມີຄວາມຈໍາເປັນເພື່ອກຳນົດຫຼັກການ, ລະບຽບການ ແລະ ມາດຕະການກ່ຽວກັບການຄຸ້ມຄອງ ແລະ ຕິດຕາມກວດກາ ວຽກງານທາງດ່ວນ, ເພື່ອອຳນວຍຄວາມສະດວກໃຫ້ແກ່ຜູ້ຊົມໃຊ້, ຄວບຄຸມການຈາລະຈອນ ລວມທັງການນຳໃຊ້ຍານພາຫະນະຕາມທາງດ່ວນ ເພື່ອຮັບປະກັນໃຫ້ຄວາມສະດວກ, ວ່ອງໄວ, ປອດໄພ ແລະ ເປັນລະບຽບຮຽບຮ້ອຍ, ພ້ອມທັງຫຼຸດຜ່ອນອຸປະຕິເຫດ, ປົກປ້ອງຊີວິດ ແລະ ຊັບສິນ. ພ້ອມນີ້, ກໍ່ເຮັດໃຫ້ການນຳໃຊ້ທາງໃນນະຄອນຫຼວງວຽຈັນ ແລະ ແຂວງວຽງຈັນໄດ້ກົມກຽວກັນ.

ຮ່າງຂໍ້ຕົກລົງວ່າດ້ວຍການຄຸ້ມຄອງທາງດ່ວນສຳປະທານ ນະຄອນຫຼວງວຽງຈັນ-ວັງວຽງ (ລາວ-ຈີນ) ແຂວງວຽງຈັນ, ແມ່ນຮ່າງຂໍ້ຕົກລົງສະບັບໃໝ່, ໂດຍກະຊວງ ຍທຂ ໄດ້ແຕ່ງຕັ້ງຄະນະຄົ້ນຄວ້າ ຮ່າງຂໍ້ຕົກລົງສະບັບດັ່ງກ່າວ ແລະ ໄດ້ຮ່າງສໍາເລັດໂດຍພື້ນຖານ, ໃນການຈັດກອງປະຊຸມຄັ້ງນີ້ ເພື່ອໃຫ້ຜູ້ເຂົ້າຮ່ວມໄດ້ປະກອບຄໍາຄິດເຫັນ ໃສ່ຮ່າງຂໍ້ຕົກລົງ, ເພື່ອໃຫ້ເນື້ອໃນລະອຽດ, ຄົບຖ້ວນ, ສົມເຫດສົມຜົນ ແລະ ເພື່ອໃຫ້ສອດຄ່ອງກັບສະພາບຕົວຈິງ. ຫຼັງຈາກນັ້ນ ຈະໄດ້ນຳເອົາຄຳສະເໜີ ແລະ ຄຳເຫັນ ຈາກບັນດາທ່ານ ໄປພິຈາລະນາ, ເພື່ອປັບປຸງໃຫ້ສົມບູນ ແລະ ນຳສະເໜີຄະນະນຳ ກະຊວງ ຍທຂ ພິຈາລະນາຮັບຮອງ, ພ້ອມທັງເປັນພື້ນຖານໃຫ້ແກ່ການສ້າງຮ່າງດຳລັດວ່າດ້ວຍ ທາງດ່ວນໃນຂັ້ນຕໍ່ໄປ.

ກອງປະຊຸມໃຫຍ່ຜູ້ແທນອົງຄະນະພັກ ກະຊວງໂຍທາທິການ ແລະ ຂົນສົ່ງ ຄັ້ງທີ V ໄຂຂື້ນຢ່າງເປັນທາງການ

   ກອງປະຊຸມໃຫຍ່ຜູ້ແທນອົງຄະນະພັກ ກະຊວງໂຍທາທິການ ແລະ ຂົນສົ່ງ ຄັ້ງທີ V ໄດ້ໄຂຂື້ນຢ່າງເປັນທາງການ ໃນວັນທີ 19 ພະຈິກ 2020 ທີ່ ສູນປະຊຸມ ICTC, ນະຄອນຫຼວງວຽງຈັນ ໂດຍເປັນກຽດເຂົ້າຮ່ວມເປັນປະທານຂອງ ສະຫາຍ ປອ. ສອນໄຊ ສີພັນດອນ ກໍາມະການກົມການເມືອງສູນກາງພັກ, ຮອງນາຍົກລັດຖະມົນຕີ, ລັດຖະມົນຕີ ກະຊວງແຜນການ ແລະການລົງທຶນ; ສະຫາຍ ປອ. ບຸນຈັນ ສິນທະວົງ, ກຳມະການສູນກາງພັກ, ເລຂາຄະນະພັກກະຊວງ, ລັດຖະມົນຕີກະຊວງ ໂຍທາທິການ ແລະ ຂົນສົ່ງ; ສະຫາຍ ສຸກຄຳເພັດ ເຮືອງບຸດສີ ຮອງປະທານຄະນະກວດກາສູນກາງພັກ; ສະຫາຍ ນາງ ວິໄລຄຳ ໂພສາລາດ ຄະນະປະຈຳພັກກະຊວງ, ປະທານຄະນະກວດກາພັກກະຊວງ, ຮອງລັດຖະມົນຕີ ກະຊວງ ຍທຂ; ສະຫາຍ ສັນຕິສຸກ ສິມມາລາວົງ ຄະນະປະຈຳພັກກະຊວງ, ຮອງລັດຖະມົນຕີ ກະຊວງ ຍທຂ; ສະຫາຍ ລັນ ແສງອາພອນ ຄະນະປະຈຳພັກກະຊວງ, ຫົວໜ້າກົມຈັດຕັ້ງ ແລະ ພະນັກງານ; ສະຫາຍ ວຽງສະຫວັດ ສີພັນດອນ ກຳມະການພັກກະຊວງ, ຮອງລັດຖະມົນຕີ ກະຊວງ ຍທຂ; ມີບັນດາສະຫາຍກຳມະການພັກກະຊວງ, ບັນດາສະຫາຍຜູ້ຕາງໜ້າຫ້ອງວ່າການສູນກາງພັກ, ຄະນະຈັດຕັ້ງສູນກາງພັກ, ຄະນະກວດກາສູນກາງພັກ, ຄະນະໂຄສະນາອົບຮົມສູນກາງພັກ, ບັນດາສະຫາຍສະມາຊິກພັກອາວຸໂສ, ພະນັກງານບຳນານ ແລະ ບັນດາສະຫາຍຄະນະພັກຮາກຖານ ພະແນກໂຍທາທິການ ແລະ ຂົນສົ່ງ ແຂວງ ແລະ ນະຄອນຫຼວງ ແລະ ຜູ້ແທນສົມບູນ ຈຳນວນ 238 ສະຫາຍ (ຍິງ 54 ສະຫາຍ), ຊຶ່ງເປັນຕົວແທນໃຫ້ແກ່ສະມາຊິກພັກທັງໝົດ ຈຳນວນ 686 ສະຫາຍ (ຍິງ 167 ສະຫາຍ), ຈາກທຸກຂົງເຂດວຽກງານ ທີ່ຂຶ້ນກັບ​ອົງ​ຄະ​ນະ​ພັກກະຊວງໂຍທາທິການ ແລະ ຂົນສົ່ງ ກໍ່ໄດ້ໃຫ້ກຽດເຂົ້າຮ່ວມຢ່າງພ້ອມພຽງ.

   ນັບແຕ່ກອງປະຊຸມໃຫຍ່ຜູ້ແທນອົງຄະນະພັກ ກະຊວງໂຍທາທິການ ແລະ ຂົນສົ່ງ ຄັ້ງທີ IV ໃນວັນທີ 16-17/07/2015 ເປັນຕົ້ນມາ, ອົງຄະນະພັກກະຊວງ ຍທຂ ໄດ້ນຳພາ-ຊີ້ນຳ ທົ່ວຂະ ແໜງການ, ໂດຍໄດ້ຈັດຕັ້ງຜັນຂະຫຍາຍແນວທາງນະໂຍບາຍຂອງພັກ ທີ່ຖືເອົາຂະແໜງ ໂຍທາທິການ ແລະ ຂົນສົ່ງ ເປັນປາຍແຫຼມຂອງເສດຖະກິດແຫ່ງຊາດ, ຊຶ່ງສາມາດສ້າງຜົນງານອັນໃຫຍ່ຫຼວງ ຫຼາຍດ້ານ, ເປັນປັດໄຈພື້ນຖານກະຕຸກຊຸກຍູ້ ໃຫ້ແກ່ການເຕີບໂຕຂອງເສດຖະກິດຂອງຊາດ, ປະກອບສ່ວນອັນຕັ້ງໜ້າເຂົ້າໃນການພັດທະນາຊົນນະບົດ ແລະ ລຶບລ້າງຄວາມທຸກຍາກ, ເພື່ອການກຽມຄວາມພ້ອມໃຫ້ປະເທດຊາດ ຫຼຸດພົ້ນອອກຈາກສະຖານະ ປະເທດດ້ອຍພັດທະນາ ຢ່າງຖາວອນ ໃນປີ 2024 ແລະ ກ້າວສູ່ປະເທດ ທີ່ມີລາຍຮັບປານກາງສູງ ໃນປີ 2030. ໃນຂະບວນການກະກຽມ ໃຫ້ແກ່ກອງປະຊຸມໃຫຍ່ຜູ້ແທນອົງຄະນະພັກ ກະຊວງ ຍທຂ ໃນຄັ້ງນີ້, ໄດ້ສຳເລັດການຈັດກອງປະຊຸມໃຫຍ່ ຂອງບັນດາຮາກຖານພັກທັງໝົດ 25 ຮາກຖານ​ພັກ ແລະ ​ສາມອົງການຈັດຕັ້ງມະຫາຊົນ; ໄດ້ສ້າງຂະບວນການແຂ່ງຂັນ ຮັກຊາດ ແລະ ພັດທະນາ ຕິດພັນກັບຂະບວນການສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ; ສ້າງຂະບວນການອະນາໄມ ແລະ ຂະບວນການແຂ່ງຂັນກິລາຢ່າງເປັນຂະບວນ; ອັນພົ້ນເດັ່ນ ແມ່ນໄດ້ເສີມຂະຫຍາຍປະຊາທິປະໄຕພາຍໃນພັກ, ຖັນແຖວສະມາຊິກພັກ-ພະນັກງານ ໃນທົ່ວກະຊວງ ຍທຂ ຊຶ່ງສະແດງອອກໃນການປະກອບຄຳຄິດຄຳເຫັນ ຕໍ່ຮ່າງບົດລາຍງານການເມືອງ, ຮ່າງບົດສຳຫຼວດການນຳພາລວມຂອງຄະນະພັກກະຊວງ ແລະ ຮ່າງແຜນພັດທະນາ 5 ປີ 2021-2025 ຂອງກະຊວງ ຍທຂ ແລະ ການທາບທາມບຸກຄະລາກອນຮອບທີ 1, 2 ແລະ 3 ເພື່ອອອກສະ ໝັກເປັນຄະນະພັກກະຊວງ ຍທຂ ສະໄໝທີ V ຢ່າງກວ້າງຂວາງ ແລະ ເລິກເຊິ່ງ.

   ກອງປະຊຸມໃຫຍ່ຜູ້ແທນອົງຄະນະພັກ ກະຊວງ ຍທຂ ໃນຄັ້ງນີ້ ແມ່ນມີຄວາມໝາຍສຳຄັນຢ່າງຍິ່ງ ເພາະໄດ້ໄຂຂຶ້ນໃນປີມ້ວນທ້າຍການຈັດຕັ້ງປະຕິບັດແຜນການ 5 ປີ ​ຄັ້ງ​ທີ 8; ຊຶ່ງຈະໄດ້ພ້ອມກັນສັງເກດຕີລາຄາ ຜົນການຈັດຕັ້ງປະຕິບັດ ໃນຂະແໜງການໂຍທາທິການ ແລະຂົນສົ່ງ ທີ່ກອງປະຊຸມໃຫຍ່ຄັ້ງທີ X ຂອງພັກໄດ້ກຳນົດ, ຕິດພັນກັບການຈັດຕັ້ງຜັນຂະຫຍາຍມະຕິຂອງກອງປະຊຸມໃຫຍ່ຄັ້ງທີ IV ຂອງອົງຄະນະພັກກະຊວງ ຍທຂ, ພ້ອມທັງຄົ້ນຄວ້າຖອດຖອນບົດຮຽນ ເພື່ອເສີມຂະຫຍາຍດ້ານຕັ້ງໜ້າ, ແກ້ໄຂບັນຫາທີ່ຍັງຄົງຄ້າງ ແລະ ກຳນົດທິດທາງແຜນການ ໃນໄລຍະ 5 ປີ 2021-2025 ຕໍ່ໜ້າ ເພື່ອສືບຕໍ່ປະຕິບັດວຽກງານ ຂອງຂະແໜງການໂຍທາທິການ ແລະ ຂົນສົ່ງ ໃຫ້ປະສົບຜົນສຳເລັດອັນໃຫຍ່ຫຼວງກວ່າເກົ່າ, ສືບຕໍ່ສ້າງປະຖົມປັດໄຈໃຫ້ແກ່ການຫັນເປັນອຸດສະຫະກຳ ແລະ ທັນສະໄໝ ເພື່ອໃຫ້ປະເທດເຮົາກ້າວຂຶ້ນສັງຄົມນິຍົມ ຕາມຈຸດໝາຍທີ່ພັກເຮົາໄດ້ກຳນົດໄວ້.

   ກອງປະຊຸມໃຫຍ່ ໄດ້ຜ່ານຮ່າງ​ລາຍ​ງານ​ການ​ເມືອງ ແລະ ຮ່າງ​ບົດ​ສຳຫຼວດ​ການ​ນຳພາ​ລວມ​ ຂອງຄະນະບໍລິຫານງານພັກກະຊວງ ຍທຂ ຊຶ່ງຜູ້ແທນກອງປະຊຸມທັງໝົດ ໄດ້ເຊີດຊູຄວາມຮັບຜິດຊອບ, ເສີມຂະຫຍາຍສິດປະຊາທິປະໄຕ, ສຸມຈິດໃຈ ສະຕິປັນຍາ ແລະ ຄວາມຮູ້ຄວາມສາມາດຂອງຕົນ ເຂົ້າໃນການຄົ້ນຄວ້າປະກອບຄຳເຫັນ ໂດຍມີຄວາມເປັນເອກະພາບ ຕໍ່ທັດສະນະການສະຫຼຸບຕີລາຄາ ການຈັດຕັ້ງປະຕິບັດມະຕິຂອງກອງປະຊຸມໃຫຍ່ ອົງຄະນະພັກກະຊວງ ຍທຂ ຄັ້ງທີ IV, ການຈັດຕັ້ງປະຕິບັດແຜນການ 5 ປີຜ່ານ​ມາ, ຊຶ່ງສະແດງອອ​ກ​ດ້ວຍຜົນງານອັນໃຫຍ່ຫຼວງທີ່ຍາດມາໄດ້ ອັນໄດ້ຢັ້ງຢືນຢ່າງຈະແຈ້ງວ່າການປະຕິບັດຕາມແນວທາງປ່ຽນແປງໃໝ່ຢ່າງ​ມີຫຼັກ​ການຂອງພັກ ໃນຂະແໜງການໂຍທາທິການ ແລະ ຂົນສົ່ງ ສອດຄ່ອງກັບສະພາບຄວາມເປັນຈິງຂອງປະເທດເຮົາ ໃນການປະຕິບັດຍຸດທະສາດການເຊື່ອມໂຍງ ແລະ ເຊື່ອມຈອດ ກັບພາກພື້ນ ແລະ ສາກົນ ແມ່ນຖືກຕ້ອງ, ຊຶ່ງໄດ້ສ້າງບາດກ້າວບຸກທະລຸໃໝ່ ໃຫ້ຂະແໜງການໂຍທາທິການ ແລະ ຂົນສົ່ງ ທີ່​ເປັນ​ຂະ​ແໜງ​ການ​ປາຍ​ແຫຼມຂອງ​ເສດ​ຖະ​ກິດ​ແຫ່ງ​ຊາດ ກ້າວຂຶ້ນສຳເລັດໜ້າທີ່ອັນສູງສົ່ງ ແລະ ມີກຽດ ທີ່ພັກ ແລະ ລັດຖະບານ ມອບໝາຍໃຫ້.

   ໜ້າທີ່ສຳຄັນອີກອັນໜຶ່ງຂອງກອງປະຊຸມໃຫຍ່ໃນຄັ້ງນີ້ ແມ່ນຈະໄດ້ດຳເນີນການປ່ອນບັດຄັດເລືອກເອົາຄະນະພັກ ກະຊວງໂຍທາທິການ ແລະຂົນສົ່ງ ສະໄໝທີ ​​​V ທີ່ສະແດງເຖິງຄວາມສາມັກຄີເປັນຈິດໜຶ່ງໃຈດຽວ, ຮັບປະກັນລັກສະນະສືບທອດປ່ຽນແທນ ແລະ ເຮັດໃຫ້ຖັນແຖວພະນັກງານການນຳຂອງກະຊວງ ຍທຂ ນັບມື້ນັບໜຸ່ມແໜ້ນ, ເພື່ອສືບຕໍ່ນຳພາ-ຊີ້ນຳ ຂະແໜງການໂຍທາທິການ ແລະ ຂົນສົ່ງ ໃນຊຸມປີຕໍ່ໜ້າ. ພິເສດ, ກອງປະຊຸມໃຫຍ່ຄັ້ງນີ້ ຈະໄດ້ຮັບຟັງການໂອ້ລົມ ແລະ ຊີ້ນຳ ຂອງສະຫາຍ ປອ. ສອນໄຊ ສີພັນດອນ ກໍາມະການກົມການເມືອງສູນກາງພັກ, ຮອງນາຍົກລັດຖະມົນຕີ, ລັດຖະມົນຕີ ກະຊວງ ແຜນການ ແລະ ການລົງທຶນ, ຜູ້ຊີ້ນຳກອງປະຊຸມໃຫຍ່ຂອງຂະແໜງ ຍທຂ.

   

 

ພິທີເຊັນສັນຍາ ໂຄງການກໍ່ສ້າງນໍ້າປະປາ ແລະສຸຂາພິບານ ເມືອງສະໜາມໄຊແຂວງອັດຕະປື ແລະໂຄງການກໍ່ສ້າງ ປັບປຸງ ແລະຂະຫຍາຍລະບົບນໍ້າປະປາ ເຂດເຊໂນ ເມືອງອຸທຸມພອນ ແຂວງ ສະຫວັນນະເຂດ

ພິທີເຊັນສັນຍາ ໂຄງການກໍ່ສ້າງນໍ້າປະປາ ແລະສຸຂາພິບານ ເມືອງສະໜາມໄຊແຂວງອັດຕະປື ແລະໂຄງການກໍ່ສ້າງ ປັບປຸງ ແລະຂະຫຍາຍລະບົບນໍ້າປະປາ ເຂດເຊໂນ ເມືອງອຸທຸມພອນ ແຂວງ ສະຫວັນນະເຂດ, ໄດ້ຈັດຂື້ນໃນວັນທີ 26 ຕຸລາ 2020 ໃນເວລາ 15 : 00 ໂມງ, ທີ່ໂຮງແຮມ ແລນມາກ, ນະຄອນຫຼວງວຽງຈັນ, ໃຫ້ກຽດເຂົ້າຮ່ວມໂດຍ ທ່ານ ປອ ບຸນຈັນ ສິນທະວົງ ລັດຖະມົນຕີກະຊວງ ຍທຂ, ທ່ານ ທະນູໄຊ ບັນຊາລິດ, ຮອງເຈົ້າແຂວງ ແຂວງອັດຕະປື, ມີຫົວໜ້າຫ້ອງການ, ຫົວໜ້າກົມນໍ້າປະປາ, ບັນດາຫົວໜ້າກົມທີ່ກ່ຽວຂ້ອງ, ຫົວໜ້າພະແນກ ຍທຂ ແຂວງອັດຕະປື, ຫົວໜ້າ ຍທຂ ແຂວງສະຫວັນນະເຂດ, ຮອງເຈົ້າເມືອງສະໜາມໄຊ ແຂວງອັດຕະປື, ພ້ອມນີ້ກໍ່ຍັງມີບັນດາທ່ານຈາກກົມນໍ້າປະປາ, ຍທຂ ແຂວງສະຫວັນນະເຂດ, ຍທຂ ແຂວງອັດຕະປື, ຂາກກະຊວງ ແຜນການ ແລະການລົງທືນ, ກະຊວງການເງິນ, ກະຊວງສາທາລະນະສຸກ, ພ້ອມດ້ວຍອ້າຍນ້ອງພະນັກງານທີ່ກ້ຽວຂ້ອງເຂົ້າຮ່ວມ.

ຈຸດປະສົງໃນການເຊັນສັນຍາ ໂຄງການກໍ່ສ້າງນໍ້າປະປາ ແລະສຸຂາພິບານ ເມືອງສະໜາມໄຊແຂວງອັດຕະປື (ພາຍໃຕ້ໂຄງການ ນໍ້າປະປາ ແລະສຸຂະພິບານ ADB Loan 3041-Lao) ເຊັນສັນຍາໂຄງການກໍ່ສ້າງ ປັບປຸງ ແລະຂະຫຍາຍລະບົບນໍ້າປະປາ ເຂດເຊໂນ ເມືອງອຸທຸມພອນ ແຂວງ ສະຫວັນນະເຂດ (ພາຍໃຕ້ໂຄງການຂະຫຍາຍໂຄງລ່າງນໍ້າສະອາດ ແລະໂພຊະນາການ SUNWIP)

          ສຳລັບຄວາມເປັນມາຂອງໂຄງການສຸຂາພິບານຕົວເມືອງນ້ອຍ, ແຫຼ່ງເງິນກູ້ຢືມຈາກທະນາຄານພັດທະນາອາຊີ ADB Loan 3041-Lao, ທະນາຄານດັ່ງກ່າວໄດ້ອານຸມັດເງິນກູ້ຢືມຈໍານວນ 35 00 ລ້ານໂດລາສະຫະລັດ, ເຊິ່ງໄດ້ເຊັນສັນຍາກັນໃນວັນທີ 11 ຕຸລາ 2013, ໂຄງການດັ່ງກ່າວໄດ້ເລີ່ມເຊັນສັນຍາໃນວັນທີ 26 ຕຸລາ 2020, ມື້ເລີ່ມຕົ້ນລົງມືການກໍ່ສ້າງໃນວັນທີ 25 ພະຈິກ 2020, ໄລຍະການກໍ່ສ້າງ 24 ເດືອນ, ຄາດຄະແນມື້ສໍາເລັດວຽກ 100% ຕາມແຜນການທີ່ກຳນົດໄວ້ ໃນວັນທີ 25 ພະຈິກ 2022, ມື້ສິ້ນສຸດໄລຍະຄໍ້າປະກັນ 1 ປີ ໃນວັນທີ 25 ພະຈິກ 2023, ມູນຄ່າຂອງການກໍ່ສ້າງທັງໝົດ 2.556.848,14 ໂດລາສະຫະລັດ (ລາຄານີ້ບໍ່ລວມພາສີ ແລະອາກອນ ນໍ່ເຂົ້າວັດສະດຸກໍ່ສ້າງ, ແຕ່ລວມມູນຄ່າເພີ້ມ VAT 10%), ບໍລິສັດຮັບເໝົາກໍ່ສ້າງແມ່ນບໍລິສັດ ໄຊຍາກໍ່ສ້າງ ແລະສ້ອມແປງ ຄົບວົງຈອນ ຈໍາກັດຜູ້ດຽວ.

ສຳລັບການຈັດຕັ້ງປະຕິບັດວຽກກໍ່ສ້າງລະບົບນໍ້າປະປາ ສໍາລັບໂຄງການຂະຫຍາຍໂຄງລ່າງນໍ້າສະອາດ ແລະໂພສະນາການມີ 4 ເມືອງ, ຢູ່ແຂວງສະຫວັນນະເຂດຄື: ເມືອງນອງ, ເມືອງເຊໂປນ, ເມືອງອາດສະພອນ ແລະອຸທຸມພອນ ແລະ 2 ເມືອງ ຢູ່ແຂວງຄຳມ່ວນຄື: ເມືອງຫີນບູນ ແລະເມືອງຍົມມະລາດ, ແຫຼ່ງທືນ: EU-KFW: ໂຄງການຂະຫຍາຍໂຄງລ່າງນໍ້າສະອາດ ແລະໂພສະນາການ ແມ່ນໄດ້ຮັບທືນຊ່ວຍເຫຼືອລ້າຈາກ ສະຫະພາບເອີຣົບ, ໂດຍຜ່ານທະນາຄານພັດທະນາເຢຍລະມັນ KFW, ໂຄງການ SUNWIP ໄດ້ເຊັນສັນຍາທາງດ້ານການເງິນລະຫວ່າງ KFW ແລະກະຊວງ ການເງິນ ແລະສັນຍາມອບໝາຍໜ້າວຽກລະຫວ່າງ ກະຊວງ ການເງິນ, ກະຊວງ ຍທຂ ໂດຍເປັນພະຍານຂອງ KFW ໃນວັນທີ 9 ມີນາ 2018, ໂຄງການ SUNWIP ໄດ້ເຊັນສັນຍາ ທີ່ປຶກສາໃນວັນທີ 25 ເມສາ 2018, ບໍລິສັດທີ່ປຶກສາແມ່ນ ບໍລິສັດ SCE, ການກໍ່ສ້າງຂອງໂຄງການໄດ້ແບ່ງອອກເປັນ 3 ໄລຍະຄື: ໄລຍະ 1 ແລະ 2 ໄດ້ສໍາເລັດການເຊັນສັນຍາໃນວັນທີ 31 ທັນວາ 2019, ໄລຍະ 3 ໄດ້ເຊັນສັນຍາໃນວັນທີ 26 ຕຸລາ 2020 ແມ່ນຢູ່ເຂດ ເຊໂນ, ເມືອງອຸທຸມພອນ ແຂວງສະຫວັນນະເຂດ ຊຶ່ງມີ 2 Lots ຄື: SVK 03 Lo13: ກໍ່ສ້າງ ແລະປັບປຸງລະບົບບໍ່ບາດານເຂດເຊໂນ ເທດສະບານເມືອງອຸທຸມພອນ, SVK 03 Lo14: ການກໍ່ສ້າງປັບປຸງລະບົບນໍ້າປະປາ, ພ້ອມກັບການວາງລະບົບທໍ່ນໍ້າປະປາຢູ່ເທດສະບານ ເມືອງອຸທຸມພອນ ເຂດເຊໂນ, ພາຍຫຼັງເຊັນສັນຍາແມ່ນຈະເລີ່ມລົງມືກໍ່ສ້າງ ແລະອອກແຈ້ງການສັ່ງວຽກ ພາຍໃນ 28 ວັນ, ກຳນົດເວລາກໍ່ສ້າງແມ່ນ 10 ເດືອນ, ໄລຍະຄໍ້າປະກັນ 1 ປີ (ພາຍຫຼັງມອບຮັບໂຄງການ), ມູນຄ່າການກໍ່ສ້າງທັງໝົດ (ບໍ່ລວມພາສີນໍາເຂົ້າ ແລະອາກອນມູນຄ່າເພີ່ມ), Lot 13, ມູນຄ່າການກໍ່ສ້າງ8.064.052.500 ກີບ, ບໍລິສັດຮັບເໝົາກໍ່ສ້າງແມ່ນບໍລິສັດ ພູນທະວີກໍ່ສ້າງ + SMS ບາດານ + ຕ່າຍ ບາດານ, Lot 14 ມູນຄ່າການກໍ່ສ້າງ 15.165.257.435 ກີບ, ບໍລິສັດຮັບເໝົາກໍ່ສ້າງ ບໍລິສັດຈະເລີນໄຊ + ບໍລິສັດ ສະຫວັນຄໍາ ກໍ່ສ້າງ.

Additional information