ຂ່າວພາຍໃນກະຊວງ

ຜົນສຳເລັດຂອງບັ້ນຝຶກອົບຮົມຫຼັກສູດທິດສະດີການເມືອງ-ການປົກຄອງ ໄລຍະສັ້ນ 50 ວັນ, ຊຸດທີ XXI

ພິທີປິດຊຸດຝຶກອົບຮົມທິດສະດີການເມືອງ ແລະ ການປົກຄອງ ໄລຍະສັ້ນ 50 ວັນ ຊຸດທີ XXI ໃຫ້ແກ່ ພະນັກງານຫລັກ ແຫລ່ງ ຂອງ ກະຊວງໂຍທາທິການ ແລະ ຂົນສົ່ງ ​ໄດ້​ສຳເລັດການຝຶກອົບຮົມ ໃນວັນ​ທີ 04  ຕຸລາ 2018 ທີ່ສະຖາບັນ ຝຶກອົບຮົບ ໂຍທາທິການ ແລະ ຂົນສົ່ງ (ຫລັກ 19 ທ່າ​ນາ​ແລ້ງ) ​ໂດຍ​​ການເປັນປະທານ​ຂອງ ສະຫາຍ ວຽງສະຫວັດ ສີພັນດອນ, ຮອງລັດຖະມົນຕີ ກະຊວງ ໂຍທາທິການ ແລະ ຂົນສົ່ງ ເຂົ້າຮ່ວມມີບັນດາຄະນະກົມ, ຮອງກົມ ຂອງສະຖາບັນການເມືອງ ແລະ ການປົກຄອງແຫ່ງຊາດ, ສະຖາບັນຝຶກອົບຮົມ ຍທຂ, ກົມຈັດຕັ້ງ ແລະ ພະນັກງານ ກະຊວງ ຍທຂ, ຄູອາຈານ ແລະ ນັກສຳມະນາກອນ.

ການຝຶກອົມຮົມທິດສະດີການເມືອງ-ການປົກຄອງ ຊຸດທີ່ XXI ຈະໄດ້ເລີ່ມດຳເນີນການຝຶກ ແຕ່ວັນທີ 27 ກໍລະກົດ ແລະ ສໍາເລັດ ວັນທີ 04 ຕຸລາ 2018, ເຊີ່ງມີນັກສຳມະນາກອນເຂົ້າຮ່ວມທັງໝົດ 30 ສະຫາຍ, ຍິງ 11 ສະຫາຍ ແລະ ມີບັນດາອາຈານເຂົ້າຮ່ວມສິດສອນທັງໝົດແມ່ນມາຈາກສະຖາບັນການເມືອງ ແລະ ການປົກຄອງແຫ່ງຊາດ, ນອກ ຈາກນີ້ຍັງມີ​ບັນດາຄູຮັບເຊີນຈາກບັນດາກົມ, ກອງໃນກະຊວງ ຍທຂ, ກະຊວງປ້ອງກັນປະເທດ ແລະ ກະຊວງປ້ອງ ກັນຄວາມສະຫງົບ.

ການຝຶກອົບຮົມໃນຄັ້ງນີ້ ເນື້ອໃນຕົ້ນຕໍຂອງການຝຶກອົບຮົມແມ່ນບັນຫາພື້ນຖານທາງດ້ານຫຼັກມູນທິດສະດີມາກ-ເລນິນ, ທິດສະດີ ການບໍລິຫານ, ການປົກຄອງ ແລະ ແນວທາງນະໂຍບາຍການປ່ຽນແປງໃໝ່ຂອງພັກ ໂດຍໄດ້ແບ່ງອອກ ເປັນ 5 ກຸ່ມວິຊາຮຽນ ລວມທັງໝົດມີ 39 ບົດລະອຽດຄື: ພາກທີ່ I ພາກປັດສະຍາ ປະກອບມີບົດຮຽນ 8 ບົດ; ພາກທີ່ II ພາກເສດຖະກິດການເມືອງ ປະກອບມີບົດຮຽນ 10 ບົດ; ພາກທີ່ III ພາກລັດທິສັງຄົມນິຍົມວິທະຍາສາດ ປະກອບມີບົດຮຽນ 8 ບົດ; ພາກທີ່ IV ພາກບໍລິຫານສາດ ປະກອບມີບົດຮຽນ 8 ບົດ ​ແລະ ພາກທີ່ V ພາກກໍ່ສ້າງພັກ ປະກອບມີບົດຮຽນ 5 ບົດ. ຊຶ່ງ​ການ​ຮຽນ​ການ​ສອນ​ແມ່ນໄດ້ມີການ ແຕ່ງຕັ້ງຄະນະບໍລິຫານຫຼັກສູດເພື່ອຊີ້ນຳ, ຄະນະປະສານງານລະຫວ່າງສອງສະຖາບັນ ​ແລະ ນັກ​ສຳ​ມະ​ນາກ​ອນຍັງໄດ້ແຕ່ງຕັ້ງຄະນະຫ້ອງ, ຄະນະໜ່ວຍ ແລະ ໜ່ວຍງານຕ່າງໆ ເພື່ອຮັບປະກັນການສ່ອງແສງລາຍງານ ແລະ ການເຄື່ອນໄຫວກິດຈະກຳໃຫ້ເປັນປົກກະຕິ, ຄ່ຽງຄູ່ກັບ ການຂື້ນຫ້ອງຮຽນ, ຄົ້ນຄວ້າຮ່ຳຮຽນ. ນັກສຳມະນາກອນ ກໍ່ຍັງໄດ້ມີການເຄື່ອນໄຫວ ວຽກງານຕ່າງໆ ເຊັ່ນ: ໄປຢ້ຽມຍາມຊົມ ຫໍພິພິທະພັນ ປະທານສຸພານຸວົງ;   ຫໍພິພິທະພັນ ກຳລັງປ້ອງກັນຄວາມສະຫງົບ ແລະ ຫໍພິພິທະພັນ ປະທານ ໄກສອນ ພົມ ວິຫານ.

ນອກຈາກນັ້ນ ນັກສໍາມະນາກອນໃນຊຸດນີ້ ກໍຍັງໄດ້ມີໂອກາດໄປຢ້ຽມສະຖາບັນການເມືອງ ແລະ ການປົກຄອງ ແຫ່ງຊາດ ຢູ່ທ່າງອນ, ໄດ້ຂື້ນຫ້ອງຮັບຟັງການບັນຍາຍກ່ຽວກັບປະຫວັດຄວາມເປັນມາ,  ສະພາບ ການຈັດຕັ້ງ ແລະ ການເຄື່ອນໄຫວທາງດ້ານວິຊາສະເພາະ ຂອງສະຖາບັນດັ່ງກ່າວ.

ຜ່ານການຮ່ໍ່າຮຽນ ແລະ ພຶດຕິກໍາຕົວຈິງ ​ເຫັນ​ວ່າ​ນັກ​ສຳ​ມະ​ນາກ​ອນສາມາດ​ຮັບ​ຮູ້​​ໄດ້​ບັນຫາ​ພື້ນຖານ ຂອງ​ທິດ​ສະ​ດີ​ມາກ-​ເລ​ນິນ ​ໃນ​ເງື່ອ​ນໄຂ​ໃໝ່​ຢ່າງ​ເປັນ​ລະບົບ ​ແລະ ເຂົ້າໃຈແຈ້ງກວ່າເກົ່າ ເປັນຕົ້ນແມ່ນວິທີ ສັດຈະວິພາກວັດຖຸນິຍົມ,​ ບັນດາຄູ່ມືມາດຕາເກນ ແລະ ກົດເກນພື້ນຖານຈຳນວນໜຶ່ງ, ທິດສະດີວ່າດ້ວຍ ຮູບຖານເສດຖະກິດສັງຄົມ, ບັນດາ ຫຼັກມູນພື້ນຖານທາງດ້ານທິດສະດີເສດຖະສາດການເມືອງຂອງມາກ, ແນວທາງເສດຖະກິດ ແລະ ນະໂຍບາຍສັງຄົມ ຂອງພັກ, ທິດສະດີກໍ່ສ້າງພັກແບບໃໝ່ຂອງເລນິນ; ນອກ ຈາກ​ນັ້ນ, ນັກ​ສຳ​ມະ​ນາກ​ອນຍັງ​ກຳ​ໄດ້​ກ່ຽວ​ກັບ ບົດບາດ ການນຳພາຂອງພັກ ແລະ ການຄຸ້ມຄອງຂອງລັດ ຕໍ່ກົນໄກເສດຖະກິດການຕະຫຼາດ, ການພົວພັນເສດຖະກິດກັບຕ່າງ ປະເທດ ແລະ ການສູ້ຊົນເຮັດໃຫ້ປະ ເທດເຮົາຫຼຸດພົ້ນອອກຈາກຄວາມທຸກຍາກ; ພ້ອມກັນເຊື່ອມຊຶມຄືນໃໝ່ຕໍ່ແນວ ທາງປ່ຽນແປງໃໝ່ຂອງພັກຢ່າງຮອບດ້ານທີ່ມີຫຼັກການຂອງພັກ, ເປັນຕົ້ນແມ່ນຈຸດໝາຍເສັ້ນທາງກ້າວຂຶ້ນຂອງປະເທດ ເຮົາ, ຮັບຮູ້ບັນຫາແນວທາງເສດຖະກິດ ແລະ ນະໂຍບາຍສັງຄົມຈຳນວນໜຶ່ງທີ່ຈຳເປັນຂອງພັກເຮົາ; ສ້າງທັດສະນະ ຫຼັກໝັ້ນການເມືອງໃຫ້ມີຄວາມໜັກແໜ້ນຕື່ມອີກກ້າວໜຶ່ງ,ພ້ອມກັນນີ້ຍັງເປັນການຝຶກຝົນຫຼໍ່ຫຼອມຕົນເອງທາງດ້ານຄຸນສົມບັດ ສິນທຳປະຕິວັດ ເພີ່ມທະວີສະຕິລະວັງຕົວຕໍ່ກົນອຸບາຍຂອງສັດຕູ ແລະ ກຸ່ມຄົນບໍ່ດີ. ພ້ອມກັນນັ້ນຍັງເປັນການສ່ອງ ແສງ ໃຫ້ເຫັນດ້ານຕັ້ງໜ້າດ້ານຫຍໍ້ທໍ້ທີ່ເກີດຂຶ້ນໃນສັງຄົມ.

ກອງປະຊຸມຄັ້ງທີ II ຂອງຄະນະກຳມະການປ້ອງກັນ ຄວາມປອດໄພການບິນພົນລະເຮືອນແຫ່ງຊາດ

ຄະນະກໍາມະການປ້ອງກັນຄວາມປອດໄພການບິນພົນລະເຮືອນແຫ່ງຊາດ ໄດ້ຈັດກອງປະຊຸມຂື້ນ ໃນວັນທີ 09 ຕຸລາ 2018, ໂດຍການເປັນປະທານຂອງ ພົທ ຈັນສະໝອນ ຈັນຍາລາດ ລັດຖະມົນຕີກະຊວງປ້ອງກັນປະເທດ, ປະທານ ຄະນະກໍາມະການປ້ອງກັນຄວາມປອດໄພການບິນພົນລະເຮືອນແຫ່ງຊາດ, ເຂົ້າຮ່ວມມີທ່ານຮອງລັດຖະມົນຕີກະຊວງ ໂຍທາທິການ ແລະ ຂົນສົ່ງ, ທ່ານຮອງລັດຖະມົນຕີກະຊວງປ້ອງກັນຄວາມສະຫງົບ, ທ່ານຮອງເຈົ້າຄອງນະຄອນ ຫລວງວຽງຈັນ, ບັນດາທ່ານຮອງເຈົ້າແຂວງ ແລະ ພ້ອມດ້ວຍ ພະນັກງານຂັ້ນກົມ, ຮອງກົມ, ຫົວໜ້າພະແນກ, ຮອງ ພະແນກ ແລະ ພະນັກງານວິຊາການຈາກຂະແໜງ ການຕ່າງໆ ຈຳນວນ 54 ທ່ານ.

ກອງປະຊຸມຄັ້ງນີ້ ແມ່ນເພື່ອປຶກສາຫາລືແລກປ່ຽນບົດຮຽນກ່ຽວກັບສິ່ງທ້າທາຍ ແລະ ໄພຂົ່ມຂູ່ຕໍ່ຄວາມປອດໄພຂອງ ຂະແໜງການບິນພົນລະເຮືອນ ເພື່ອຫາວິທີແກ້ໄຂ ແລະ ການກຳນົດນະໂຍບາຍຍຸດທະສາດ ຮ່ວມກັນໃນຄະນະ ກຳມະການປ້ອງກັນຄວາມປອດໄພການບິນພົນລະເຮືອນແຫ່ງຊາດ ໃນການເພີ່ມທະວີຍົກລະດັບມາດຕະການປ້ອງ ກັນຄວາມປອດໄພການບິນໃນທົ່ວປະເທດໃຫ້ທຽບເທົ່າກັບສາກົນ ຫລື ບັນລຸ ໄດ້ຕາມມາດຕະຖານຕ່ຳສຸດ ທີ່ອົງການ ການບິນພົນລະເຮືອນສາກົນໄດ້ວາງອອກ, ຊຶ່ງ ສປປ ລາວ ຈະໄດ້ຖືກກວດສອບດ້ານການປ້ອງກັນຄວາມປອດໄພ ການບິນຈາກອົງການການບິນພົນລະເຮືອນສາກົນໃນທ້າຍປີນີ້, ໂດຍການກວດສອບຄັ້ງນີ້ ອົງການການບບິນພົນລະ ເຮືອນສາກົນ ຈະໄດ້ກວດກາບັນດານິຕິກຳ, ລະບົບປ້ອງກັນຄວາມປອດໄພສະໜາມບິນ, ການຈະລາຈອນທາງອາ ກາດ, ສາຍການບິນ ແລະ ລະບົບ ຕອບໂຕ້ກໍລະນີທີ່ມີເຫດສຸກເສີນໂດຍຜູ້ກໍ່ການຮ້າຍ ເຊີ່ງກົມການບິນພົນລະເຮືອນ ກໍ່ໄດ້ມີການກະກຽມຄວາມພ້ອມໃນຫລາຍດ້ານ, ພ້ອມກັນນັ້ນ ກໍ່ໄດ້ຊຸກຍູ້ໃຫ້ບັນດາຜູ້ໃຫ້ບໍລິການໃນຂະແໜງການບິນ ແລະ ໜ່ວຍງານທີ່ກ່ຽວຂ້ອງ ເປັນເຈົ້າການຮ່ວມກັນໃນການເອົາໃຈໃສ່ຈັດຕັ້ງປະຕິບັດມາດຕະການປ້ອງກັນຄວາມ ປອດໄພ ແລະ ການແກ້ໄຂຂໍ້ຄົງຄ້າງທີ່ມີຢູ່ໃຫ້ສຳເລັດຕາມແຜນໄລຍະສັ້ນ ແລະ ໄລຍະຍາວຕາມທີ່ ໄດ້ກຳນົດໄວ້, ກອງປະຊຸມຄັ້ງນີ້ ຍັງເປັນການກຳນົດຂີດໝາຍ ແລະ ການກຳນົດທິດທາງອັນສຳຄັນ ທີ່ຈະເຮັດໃຫ້ວຽກງານການປ້ອງ ກັນການບິນພົນລະເຮືອນ ໃນ ສປປ ລາວ ມີປະສິດທິພາບ ແລະ ມີຄວາມຍືນຍົງໃນອານາຄົດ.

Additional information