ພິທີມອບ-ຮັບໃບຢັ້ງຢືນເປັນໜ່ວຍພັກເຂັ້ມແຂງ-ຮູ້ນຳພາຮອບດ້ານ ໜ່ວຍພັກຮາກຖານກົມຈັດຕັ້ງ ແລະ ພະນັກງານ, ໜ່ວຍພັກ ຮາກຖານ ສະຖາບັນໂຍທາ ແລະ ຂົນສົ່ງ, ໜ່ວຍພັກຮາກຖານ ກອງຄຸ້ມຄອງການ ຈະລາຈອນທາງອາກາດ ແລະ ຄະນະພັກຮາກຖານ ລັດວິາຫະກິດວິສະວະກຳ ຄົມມະນາຄົມ.

 

ໃນຕອນ​ບ່າຍ ວັນທີ 18 ມັງກອນ 2017 ກະຊວງ ​ໂຍທາ​ທິການ ​ແລະ ຂົນ​ສົ່ງ ໄດ້ຈັດ​ພິທີມອບ-ຮັບໃບຢັ້ງຢືນເປັນໜ່ວຍພັກ​ເຂັ້ມແຂງ-ຮູ້ນຳພາຮອບດ້ານ ໜ່ວຍ​ພັກ​ຮາກ​ຖານ​ກົມ​ຈັດ​ຕັ້ງ ​ແລະ​ ພະນັກງານຄັ້ງ​ທີ 6, ໜ່ວຍພັກ ຮາກຖານ ສະຖາບັນໂຍທາ ແລະ ຂົນສົ່ງ ຄັ້ງ​ທີ 7, ໜ່ວຍພັກຮາກຖານ ກອງຄຸ້ມຄອງການ ຈະລາຈອນທາງອາກາດ ຄັ້ງ​ທີ 2 ແລະ ຄະນະພັກຮາກຖານ ລັດວິາຫະກິດວິສະວະກຳ ຄົມມະນາຄົມ ຄັ້ງ​ທີ 12, ທີ່ຫ້ອງ​ປະຊຸມ ​ໃຫຍ່ກະຊວງ ​ໂຍທາ​ທິການ ​ແລະ ຂົນ​ສົ່ງ, ໂດຍໃຫ້ກຽດເຂົ້າຮ່ວມ ແລະ ມອບໃບຢັ້ງຢືນຂອງ ສະຫາຍ ປອ ບຸນ​ຈັນ ສິນ​ທະ​ວົງ  ​ກຳມະການ​ສູນ​ກາງ​ພັກ, ​ເລຂາ​ຄະນະ​ພັກ​ກະຊວງ, ລັດຖະມົນຕີ​ກະຊວງ ​ໂຍທາ​ທິການ ​ແລະ ຂົນ​ສົ່ງ; ມີ​ບັນດາຄະນະ​ປະຈຳ​ພັກ​ກະຊວງ, ກຳມະການພັກກະຊວງ, ​ຄະນະ​ຕິດຕາມ​​ຊຸກຍູ້ ແລະ ປະ​ເມີນ​ຜົນ ໜ່ວຍພັກເຂັ້ມແຂງ-ຮູ້ນໍາພາຮອບດ້ານ ຂອງ​ກະຊວງ; ມີບັນດາສະຫາຍເລຂາຄະນະ​ພັກ​ຮາກ​ຖານ, ບັນດາສະຫາຍເລຂາໜ່ວຍພັກ, ຮອງເລຂາໜ່ວຍພັກ, ບັນດາກຳມະການພັກ, ຄະນະພັກຮາກຖານ ແລະ ສະມາຊິກ​ພັກ​ພາຍ​ໃນສີ່ຮາ​ກຖານ​ພັກເຂົ້າຮ່ວມ.

  ໃນໂອກາດດັ່ງກ່າວ, ບັນດາສະຫາຍຕາງໜ້າ​ທັງສີ່ຄະນະພັກບັນດາຮາກຖານ ໄດ້ຜ່ານບົດສະຫຼຸບຕີລາຄາຜົນການຕິດຕາມ ປະເມີນໜ່ວຍພັກແຂງ-ຮູ້ນຳພາຮອບດ້ານຂອງ ຄະນະ​ພັກ​ຮາກ​ຖານ ​ແລະ ໜ່ວຍ​ພັກ​ຮາກ​ຖານ​ ທີ່ຂຶ້ນກັບອົງຄະນະພັກ ກະຊວງ ຍທຂ ສົກປີ 2014-2015 ​ ແລະ ທິດທາງ​ແຜນການ​ປີ 2016 ໃຫ້ຮູ້ວ່າ: ໜ່ວຍ​ພັກ​ຮາກ​ຖານ​ກົມ​ຈັດ​ຕັ້ງ ​ແລະ​ ພະນັກງານ, ໜ່ວຍພັກ ຮາກຖານ ສະຖາບັນໂຍທາ ແລະ ຂົນສົ່ງ, ໜ່ວຍພັກຮາກຖານ ກອງຄຸ້ມຄອງການ ຈະລາຈອນທາງອາກາດ ແລະ ຄະນະພັກຮາກຖານ ລັດວິາຫະກິດວິສະວະກຳ ຄົມມະນາຄົມ ແມ່ນ​ບັນດາຮາກ​ຖານ​ພັກ​​ທີ່​ຂຶ້ນ​ກັບ​ອົງຄະ​ນະ​ພັກ​ກະຊວງ ຍທຂ ​ໄດ້ຕັ້ງໜ້າ​ຈັດຕັ້ງປະຕິບັດ ​ຜັນຂ​ະຫຍາຍແຜນ​ການ, ເຮັດ​ໜ້າ​ທີ່​ຂອງ​ຕົນ​ຢ່າງ​ຫ້າວ​ຫັນ, ໄດ້​ຕັ້ງ​ໜ້າ​ສຸມ​ທຸກ​ເຫື່ອ​ແຮງ ເຂົ້າ​ໃນ​ການ​ຈັດ​ຕັ້ງ​ປະ​ຕິ​ບັດ ແຜນ​ການ​ສ້າງ​ໜ່ວຍ​ພັກ​ເຂັ້ມ​ແຂ​ງ-ຮູ້​ນຳ​ພາ​ຮອບ​ດ້ານ ຂອງ​ຕົນຢ່າງ​ເປັນ​ເຈົ້າ​ການ. ບັນ​ດາ​ສະ​ຫາຍ​ສະ​ມາ​ຊິກ​ພັກພາຍ​ໃນຄະນະພັກບັນດາຮາກຖານ ​ໄດ້​ຈັດຕັ້ງຜັນ​ຂະຫຍາຍ​ ມະຕິ​ກອງ​ປະຊຸມ​ໃຫຍ່​  ຂ​ອງສູນ​ກາງ​ພັກຄັ້ງທີ IX ​ແລະ ​ມະຕິ​ກອງ​ປະຊຸມ​ໃຫຍ່​ຄັ້ງ​ທີ III ຂອງ​ອົງ ຄະ​ນະ​ພັກ​ກະຊວງ ຍທຂ ​​ເຂົ້າ​ໃນ​ວຽກ​ງານ​ຕ່າງໆ​​ຂອງ​ຕົນ​ຢ່າງ​ຮອບ​​ດ້ານ. ຜ່ານການເຄື່ອນໄຫວຈັດຕັ້ງປະຕິບັດແຜນການສ້າງໜ່ວຍພັກເຂັ້ມແຂ-ຮູ້ນຳພາຮອບດ້ານ ສົກປີ 2014-2015 ສາມາດຕີລາຄາໃນແຕ່ລະດ້ານໄດ້ດັ່ງນີ້: ວຽກການ​ເມືອງແນວຄິດ ເປັນວຽກໜຶ່ງທີ່ສຳຄັນ ແລະ ລະອຽດອ່ອນ ທີ່ຄະນະພັກຮາກຖານ, ຄະນະໜ່ວຍພັກ ໄດ້ເອົາໃຈໃສ່ຊີ້ນໍານໍາພາຢ່າງໃກ້ຊິດແທດເຖິງ, ຈຶ່ງ​ເຮັດ​ໃຫ້​ບັນ​ດາ​ສະ​ຫາຍ​ສະ​ມາ​ຊິກ​ພັກ​ເຂົ້າ​ໃຈ ເຊື່ອມ​ຊຶມ ກຳແໜ້ນ ແລະ ​ເຊື່ອ​ໝັ້ນ​ຕໍ່​ການ​ນຳ​ພາ​ຂອງ​ພັກ​ຢ່າງ​ໜັກ​ແໜ້ນ; ພ້ອມ​ດຽວ​ກັນນັ້ນຄະນະພັກບັນດາຮາກຖານ ​ໄດ້​ເອົາ​ໃຈ​ໃສ່​ນຳພາປັບປຸງ​ແບບ​ແຜນ ​ແລະ ​ວິທີ​ການຈັດ​ຕັ້ງ​ປະຕິບັດ​ວຽກ​ງານ​ວິຊາ​ສະ​ເພາະ​ແຕ່​ລະ​ດ້ານ​ ເຮັດ​ໃຫ້​ວຽກ​ງານຂອງ ​ກົມ​ຈັດ​ຕັ້ງ ​ແລະ​ ພະນັກງານ, ສະຖາບັນໂຍທາ ແລະ ຂົນສົ່ງ, ກອງຄຸ້ມຄອງການ ຈະລາຈອນທາງອາກາດ ແລະ ລັດວິາຫະກິດວິສະວະກຳ ຄົມມະນາຄົມ ​ໄດ້​ດີ​ຂຶ້ນ​ເທື່ອ​ລະກ້າວ.

​ໃນ​ພິທີ​ດັ່ງກ່າວກໍ່​ໄດ້​ຮັບ​ຟັງ​ການ​ໂອ້​ລົມ​ຂອງສະຫາຍ ປອ ບຸນ​ຈັນ ສິນ​ທະ​ວົງ  ​ກຳມະການ​ສູນ​ກາງ​ພັກ, ​ເລຂາ​ຄະນະ​ພັກ​ກະຊວງ, ລັດຖະມົນຕີ​ກະຊວງ ​ໂຍທາ​ທິການ ​ແລະ ຂົນ​ສົ່ງ, ຊຶ່ງ ສະຫາຍ ​ໄດ້​ສະ​ແດງ​ຄວາມ​ຊົມ​ເຊີຍ ຕໍ່ຄະນະພັກບັນດາຮາກຖານ ກໍໄດ້ນຳພາ-ຊີ້ນຳກໍ່ສ້າງ ຮາກຖານພັກຕົນ ມີຜົນສຳເລັດ ແລະ ມີຜົນງານອັນພົ້ນເດັ່ນຫຼາຍດ້ານ ເປັນຕົ້ນ ໄດ້ເອົາໃຈໃສ່ສຶກສາອົບຮົມການເມືອງ-ແນວຄິດ, ຈັດຕັ້ງເຊື່ອມຊຶມແນວທາງ, ແຜນນະໂຍບາຍ, ມະຕິ, ຄຳສັ່ງ, ກົດລະບຽບຂອງພັກ ແລະ ກົດໝາຍຂອງລັດ ເຮັດໃຫ້ຖັນແຖວພະນັກງານ-ສະມາຊິກພັກ ຢູ່ບັນດາຮາກຖານ ມີຄຸນທາດການ ເມືອງ, ຄຸນສົມບັດສິນທຳປະຕິວັດ, ທັດສະນະຫຼັກໝັ້ນຊົນຊັ້ນທີ່ໜັກແໜ້ນ, ມີຄວາມສະຫງົບອຸ່ນອ່ຽນ ແລະ ບຸກບືນຫ້າວຫັນປະຕິບັດໜ້າທີ່ວຽກງານ; ເອົາໃຈໃສ່ຊີ້ນຳພະນັກງານ-ສະມາຊິກພັກຂອງຕົນ ປະຕິບັດໜ້າທີ່ວິຊາສະເພາະ ຕາມໜ້າທີ່ຄວາມຮັບຜິດຊອບ ຢ່າງຕັ້ງໜ້າ, ເຮັດໃຫ້ວຽກງານວິຊາສະເພາະ ມີຜົນສຳເລັດຕາມຄາດໝາຍທີ່ວາງໄວ້; ຊີ້ນຳປັບປຸງການຈັດຕັ້ງຂອງກົມກອງຕົນ ຕາມທິດກະທັດຮັດ ແລະ ເຂັ້ມແຂງ, ຊຶ່ງໄດ້ຄົ້ນຄວ້າປັບປຸງພາລະບົດບາດ, ຈັດວາງຊັບຊ້ອນຕຳແໜ່ງງານຄືນໃໝ່ ຈຳນວນໜຶ່ງ ເພື່ອໃຫ້ສອດຄ່ອງກັບການຂະຫຍາຍຕົວຂອງວຽກງານ. ພ້ອມທັງ   ເອົາໃຈໃສ່ຊຸກຍູ້ບັນດາອົງການຈັດຕັ້ງມະຫາຊົນ ເຄື່ອນໄຫວຕາມພາລະບົດບາດ ຂອງຕົນ ເປັນກຳລັງສຳຄັນໃນການປະຕິບັດໜ້າທີ່ ຢູ່ແຕ່ລະຂົງເຂດວຽກງານ; ໄດ້ເອົາໃຈໃສ່ຮັກສາຄວາມສະຫງົບ ໂດຍຈັດຕັ້ງການເວນຍາມເປັນປະຈໍາ ໂດຍ ສະເພາະ ໃນວັນສຳຄັນຕ່າງໆ ເຮັດໃຫ້ແຕ່ລະຮາກຖານພັກມີຄວາມສະຫງົບ ປົກກະຕິ, ພະນັກງານ-ສະມາຊິກພັກ ມີສະຕິເປັນເຈົ້າຕໍ່ວຽກງານຮັກສາຄວາມ ສະຫງົບສູງຂຶ້ນ ​ແລະ ໄດ້ຂະຫຍາຍພັກເປັນປົກກະຕິ ໂດຍຖືເອົາຄຸນນະພາບເປັນກົກ ເຮັດໃຫ້ຫຼາຍ ຮາກຖານພັກມີຈຳນວນສະມາຊິກພັກເພີ່ມຂຶ້ນທາງດ້ານປະລິມານ ແລະ ຄຸນ ນະພາບ. ພ້ອມກັນນັ້ນ, ຄະນະພັກແຕ່ລະຮາກຖານ ກໍໄດ້ສົ່ງເສີມປະຊາທິປະໄຕ ພາຍໃນພັກ ໃນການຕົກລົງບັນຫາສຳຄັນຕ່າງໆ ແລະ ໄດ້ບຳລຸງຍົກລະດັບ ພະນັກງານ-ສະມາຊິກພັກເປັນປົກກະຕິ ນັບທັງດ້ານທິດສະດີການເມືອງ, ວິຊາສະເພາະ ແລະ ວິທະຍາສາດ-ເຕັກນິກຕ່າງໆ. ເວົ້າລວມແລ້ວ, ຜົນງານທີ່ບັນດາສະຫາຍຍາດມາໄດ້ ໃນໄລຍະຜ່ານມາ ແມ່ນ ຫຼວງຫຼາຍ, ຜົນງານດັ່ງກ່າວສ້າງໄດ້ກໍ່ຍ້ອນຄວາມບຸກບືນຂອງຄະນະພັກ, ຄວາມຮັບ ຜິດຊອບຂອງພະນັກງານ-ສະມາຊິກພັກແຕ່ລະຮາກຖານ ທີ່ໄດ້ສຸມເຫື່ອແຮງ, ສະຕິ ປັນຍາຂອງຕົນ ເຂົ້າໃສ່ຢ່າງຕັ້ງໜ້າ. ໄປຄຽງຄູ່ກັບຜົນງານທີ່ຍາດມາໄດ້, ແຕ່ຍັງມີບາງດ້ານຈະ​ໄດ້ປັບປຸງແກ້ໄຂ ເພື່ອໃຫ້ສົມຄູ່ກັບຄວາມຮຽກຮ້ອງຕ້ອງການຂອງໄລຍະໃໝ່ ດັ່ງນີ້: ການຈັດຕັ້ງເຊື່ອມຊຶມບັນດາມະຕິ, ຄຳສັ່ງຂອງຂັ້ນເທິງ ຢູ່ຮາກຖານບາງຄັ້ງຍັງ ບໍ່ທັນກັບສະພາບການ; ພະນັກງານ-ສະມາຊິກພັກບາງສະຫາຍແນວຄິດຍັງບໍ່ອຸ່ນອ່ຽນ ໄດ້ຍົກຍ້າຍໄປ  ເຮັດວຽກຢູ່ບ່ອນອື່ນ; ການປະຕິບັດວຽກງານວິຊາສະເພາະ  ບາງຄັ້ງຍັງມີລັກສະນະຊັກຊ້າ; ການຊີ້ນໍາອົງການຈັດຕັ້ງມະຫາຊົນ ເຫັນວ່າຍັງບໍ່ທັນມີຂະບວນການທີ່ຟົດຟື້ນ ເທົ່າທີ່ຄວນ ​ແລະ ການຂະຫຍາຍພັກ ແລະ ການກໍ່ສ້າງພະນັກງານ ຍັງບໍ່ທັນມີແຜນກໍ່ສ້າງລະອຽດ.   ເພື່ອສືບຕໍ່ຈັດຕັ້ງປະຕິ ບັດແຜນການກໍ່ສ້າງໜ່ວຍພັກເຂັ້ມແຂງ-ຮູ້ນຳພາຮອບດ້ານ ຂອງບັນດາສະຫາຍ ໃຫ້ສຳເລັດຕາມຄາດ  ໝາຍທີ່ວາງໄວ້, ກໍຄືການຜັນຂະຫຍາຍມະຕິ ກອງປະຊຸມໃຫຍ່ ຄັ້ງທີ IV ຂອງ​ອົງຄະ​ນະ​ພັກ​ກະຊວງ ​ໂຍທາ​ທິການ​ ແລະ ຂົນ​ສົ່ງ​,  ຄະນະພັກບັນດາຮາກຖານ ຕ້ອງ​ເພີ່ມ​ທະວີວຽກງານການເມືອງ-ແນວຄິດໃຫ້-ເລິກເຊິ່ງ-, ສຶກສາອົບຮົມພະນັກງານ-ສະມາຊິກພັກ ຢ່າງເປັນປະຈຳ, ​ແນ​ໃສ່​ສ້າງ​ໃຫ້​ເຂົາ​ເຈົ້າມີ​ທັດສະນະຫຼັກ​ໝັ້ນການ​ເມືອງໜັກແໜ້ນ, ມີ​ຄຸນສົມບັດ​ສິນ​ທຳ​ປະຕິວັດ​ອັນ​ສູງ​ສົ່ງ, ມີສະຕິເປັນເຈົ້າການ, ມີຈັນຍາບັນ ໃນການປະຕິບັດໜ້າທີ່; ກຳໃຫ້ໄດ້ສະພາບແນວຄິດຂອງພະນັກງານ-ສະມາຊິກພັກ ແລະ ຫາວິທີແກ້​ໄຂໃຫ້ທັນການ; ສືບຕໍ່ນຳພາວຽກງານວິຊາສະເພາະຂອງແຕ່ລະຮາກຖານພັກ ໃຫ້ສຳເລັດຕາມ ແຜນການ ໂດຍສະເພາະ ສືບຕໍ່ປັບປຸງພາລະບົດບາດຂອງບັນດາກົມໃຫ້ສຳເລັດ, ສືບຕໍ່ບຸກບືນສ້າງສະຖາບັນໂຍທາ ແລະ ຂົນສົ່ງ ໃຫ້ກາຍເປັນສະຖາບັນຄົ້ນຄວ້າ ຂອງຂະແໜງການ ຍທຂ, ຄຸ້ມຄອງການຈະລາຈອນທາງອາກາດໃຫ້ມີຄວາມ ປອດໄພ ແລະ ສືບຕໍ່ສຳຫຼວດ-ອອກແບບບັນດາໂຄງການໃຫ້ສຳເລັດ; ​ເອົາ​ໃຈ​ໃສ່ວຽກງານອົງການ​ຈັດ​ຕັ້ງ​ມະຫາຊົນ, ເສີມຂະຫຍາຍຫົວຄິດປະດິດ ສ້າງຂອງອົງການ ຈັດຕັ້ງມະຫາຊົນ ເຂົ້າໃນການຈັດຕັ້ງຜັນຂະຫຍາຍແນວທາງ ຂອງພັກ, ແຜນພັດທະນາເສດຖະກິດ-ສັງຄົມຂອງລັດ ຢ່າງເປັນຂະບວນຟົດຟື້ນ, ເປັນເຈົ້າການສ້າງຂະບວນການວຽກ​ດີ​ຄົນ​ເດັ່ນ; ເພີ່ມທະວີການສ້າງແຜນການກໍ່ສ້າງໜ່ວຍພັກເຂັ້ມແຂງ-ຮູ້ນຳພາຮອບດ້ານ ໃຫ້ເປັນແຜນລະອຽດ, ມີລະດັບຄາດໝາຍທີ່ແນ່ນອນ ແລະ ສາມາດຈັດຕັ້ງ ປະຕິບັດໄດ້ຢ່າງແທ້ຈິງ; ຖືເອົາການກໍ່ສ້າງໜ່ວຍພັກເຂັ້ມແຂງ-ຮູ້ນຳພາຮອບດ້ານ ເປັນການປັບປຸງກົມກອງຂອງຕົນ; ເອົາໃຈໃສ່ການ​ຂະຫຍາຍ​ພັກ​​ຕິດ​ພັນ​ກັບ​ການ​ຍົກ​ສູງຄວາມ​ຮັບຜິດຊອບ​ການ​ເມືອງ ເພື່ອ​ເປັນ​ກຳລັງ​ແກ່ນສານ​ນຳພາ ​ຢູ່​ຂົງ​ເຂດ​ວຽກ​ງານ​ຕ່າງໆ; ເສີມຂະຫຍາຍປະຊາທິປະ​ໄຕພາຍໃນພັກ, ປະຕິບັດ​ລະບອບ​ປຶກສາ​ຫາລື​ ເປັນ​ໝູ່​ຄະນະ, ແບ່ງ​ຄວາມ​ຮັບຜິດຊອບ​ໃຫ້​ບຸກຄົນ​ຢ່າງຈະແຈ້ງ; ເພີ່ມ​ທະວີ​ຄວາມ​ສາມັກຄີ​ພາຍ​ໃນ​ຄະນະ​ພັກ​ ແລະ ເຊີດ​ຊູ​ຄວາມ​ເປັນ​ແບບຢ່າງ​ນໍາ​ໜ້າທີ່​ດີ​ຂອງ​ສະມາຊິກ​ພັກ ​ແລະ ເອົາ​ໃຈ​ໃສ່​ບຳລຸງ​ກໍ່ສ້າງ​ພະນັກງານຢ່າງຮອບດ້ານ ໃຫ້​ມີ​ລະດັບຄວາມ​ຮູ້, ຄວາມ ສາມາດທີ່ສົມຄູ່ກັບໜ້າ​ທີ່​ວຽກງານ ທີ່ນັບມື້ນັບຫັນເປັນທັນສະໄໝ.

 

 

 

 

 

 

 

 

Additional information