ພິທີມອບ-ຮັບ ໂຄງການນໍ້າປະປາ ເມືອງສອງຄອນ ແຂວງສະຫວັນນະເຂດ, ເມືອງຫ້ວຍຊາຍ ແຂວງບໍ່ແກ້ວ ແລະ ເມືອງວຽງພູຄາ ແຂວງຫຼວງນ້ຳທາ

 

   ພິທີ​ມອບ​-ຮັບ ໂຄງການ​ນໍ້າປະປາ ເມືອງສອງຄອນ ແຂວງສະຫວັນນະເຂດ,  ​ເມືອງ​ຫ້ວຍ​ຊາຍ ​ແຂວງ​ບໍ່​ແກ້ວ ​ແລະ ​ເມືອງ​ວຽງ​ພູ​ຄາ ​ແຂວງ​ຫຼວງ​ນ້ຳ​ທາ ​ໄດ້​ຈັດຂື້ນ​ໃນ​ວັນ​ທີ 23 ມັງກອນ 2017 ທີ ​ໂຮງງານຜະລິດ​ນ້ຳ​ປະປາ ເມືອງສອງຄອນ ແຂວງສະຫວັນນະເຂດ, ​ໂດຍ​ການ​ເຂົ້າ​ຮ່ວມ​ຂອງ ​ທ່ານ ນາງ ວິໄລຄໍາ ໂພສາລາດ ຮອງລັດຖະມົນຕີ​ການ​ກະຊວງ ​ໂຍທາ​ທິການ ​ແລະ ຂົນ​ສົ່ງ; ທ່ານ​ ທ່ອນແກ້ວ ພຸດທະໄກຍະລາດ ຮອງເຈົ້າແຂວງ ແຂວງສະຫວັນນະເຂດ; ທ່ານ  ປອ ເພັງພາວັນ ດາວພອນຈະເລີນ ຮອງເຈົ້າແຂວງ ແຂວງຫຼວງນໍ້າທາ; ບັນດາ ຄະນະ​ພະ​ແນ​ກຫົວໜ້າ​ກົມ-ຄະນະ​ກົມ, ຫົວໜ້າ​ພະ​ແນ​ກ-ຄະນະ​ພະ​ແນ​ກ ຍທຂ ​ແຂວງ ສະຫວັນ​ນະ​ເຂດ, ​ແຂວງ​ບໍ່​ແກ້ວ, ​ແຂງຫຼວງ​ນ້ຳ​ທາ, ບັນດາ​ຄະນະ​ພະ​ແນ​ກທີ່​ກ່ຽວຂ້ອງ​ທັງ 3 ​ແຂວງ, ບັນດາ​ເຈົ້າເມືອງ,ຮອງ​ເຈົ້າ​ເມືອງ​ທັງ 3 ​ເມືອງ, ຕາງໜ້າ​ຈາກ​ກະຊວງ​ແຜນການ ​ແລະ ການ​ລົງທຶນ, ກະຊວງ​ການ​ເງິນ, ແຂກທີ່ມາຈາກສູນກາງ, ທ້ອງຖິ່ນ ແລະ ພໍ່​ແມ່​ປະຊາຊົນ​ ​ເມືອງສອງ​ຄອນ ​ແລະ ​ເມືອງອ້ອມ​ຂ້າງໂຄງການ​ເຂົ້າ​ຮ່ວມ.

​     ​ໂຄງການ​ກໍ່ສ້າງນ້ຳ​ປະປາ ​ແລະ ​ສຸຂາພິບານ​ຕົວ​ເມືອງ​ນ້ອຍ ເມືອງສອງຄອນ ແຂວງສະຫວັນ ນະເຂດ,  ​ເມືອງ​ຫ້ວຍ​ຊາຍ ​ແຂວງ​ບໍ່​ແກ້ວ ​ແລະ ​ເມືອງ​ວຽງ​ພູ​ຄາ ​ແຂວງ​ຫຼວງ​ນ້ຳ​ທາ ​ເປັນ​ໂຄງການຮ່ວ​ມມື​ລະຫວ່າງຂອງ​ລັດຖະບານ ​ແຫ່ງ ສປປ ລາວ ​ແລະ ທະນາຄານ​ພັດທະນາ​ອາຊີ ​ໃນ​ການ​ກໍ່ສ້າງ​ໂຮງງານ​ຜະລິດ​ນ້ຳ​ປະປາ ​ແລະ ສະໜອງນ້ຳປະປາ ​ໃຫ້​ປະຊາຊົນ​ໃນ​ຕົວ​ເມືອງ​ນ້ອຍ, ເພື່ອປັບປຸງຊິວິດການເປັນຢູ່ຂອງປະຊາຊົນ ຢູ່ຕົວເມືອງນ້ອຍ ໂດຍການສະໜອງນ້ຳປະປາ ທີ່ສະອາດ ປອດ​ໄພ ​​ແລະ ນຳ​ໃຊ້ໃນ​ການ​ບໍລິ​ໂພ​ກ ​ໃຫ້​ຖຶກລັກ​ອານາ​ໄມ. ນ້ຳປະປາ ແມ່ນປັດ ໃຈໜຶ່ງທີ່ຈຳເປັນທີ່ສຸດ ເພື່ອຊ່ວຍຍົກລະດັບຄຸນນະພາບຊີວິດ ຂອງປະຊາຊົນໃຫ້ດີຂຶ້ນ ເຊິ່ງອັດຕາ ສ່ວນການຊົມໃຊ້ນໍ້າປະປາ ໃນຕົວເມືອງ ແລະ ຊົນນະບົດ ຍັງແມ່ນຕົວຊີ້ບອກພື້ນຖານອັນໜຶ່ງ ຂອງ ການພັດທະນາຮອບດ້ານ. ສະນັ້ນ, ລັດຖະບານ ຍາມໃດກໍໄດ້ເອົາໃຈໃສ່ພັດທະນາ, ປັບປຸງ ແລະຂະຫຍາຍ ລະບົບນໍ້າປະປາໃຫ້ທົ່ວເຖິງທັງໃນຕົວເມືອງ ແລະ ຊົນນະບົດ ໃນທົ່ວປະເທດ. ໂດຍປະຕິບັດຕາມ ມະຕິຂອງກອງປະຊຸມໃຫຍ່ຄັ້ງທີ່ VIII ຂອງພັກ ທີ່ຈະລົບລ້າງ ສປປ ລາວ ອອກຈາກບັນຊີ ລາຍຊື່ ປະເທດດອ້ຍພັດທະນາ ໃນປີ 2020 ແລະ ປະຕິບັດຍຸດທະສາດແຫ່ງການ ເຕີບໂຕ ແລະ ລົບລ້າງຄວາມທຸກຍາກແຫ່ງຊາດ, ກະຊວງໂຍທາທິການ ແລະ ຂົນສົ່ງ ຈຶ່ງໄດ້ມີ ແຜນການພັດທະນາຂະແໜງການນ້ຳປະປາເພື່ອຕອບສະໜອງໄດ້ຕາມຄວາມຮຽກຮອ້ງຕອ້ງການຂອງ ສັງຄົມ ແລະ ແຜນການທີ່ໄດ້ວາງໄວ້ ຄື ໃນປີ 2015 ປະຊາກອນໃນຕົວເມືອງທົ່ວປະເທດ ສາມາດເຂົ້າເຖິງນໍ້າປະປາ ໃຫ້ໄດ້ 67%, ປີ 2020 ໃຫ້ໄດ້ 80% ແລະ ປີ 2030 ໃຫ້ໄດ້ 90% ແລະ ໂຄງການນໍ້າປະປາ ແລະ ສຸຂະພິບານຕົວເມືອງນ້ອຍ ກໍ່ແມ່ນໜຶ່ງໃນໂຄງການທີ່ນອນຢູ່ໃນ ແຜນການດັ່ງກ່າວ; ເຊິ່ງເປັນໂຄງການທີ່ໄດ້ຮັບທຶນກູ້ຢຶມຈາກ ທະນາຄານພັດທະນາອາຊີ ໂດຍມີເປົ້າໝາຍນໍາໃຊ້ເຂົ້າໃນການກໍ່ສ້າງລະບົບນໍ້າປະປາ, ພ້ອມທັງ ປັບປຸງຍົກລະດັບໂຄງລ່າງ ແລະ ສະພາບແວດລ້ອມຄຸ້ມບ້ານຂອງເທດສະບານໃນ 3 ເມືຶອງໂຄງການ ແນ່ໃສສ້າງໃຫ້ກາຍເປັນຕົວເມືອງໃນຊົນນະບົດ.

 

 

 

 

 

 

 

 

Additional information