ກະຊວງ ຍທຂ ສໍາມະນາການຮັບມືຕໍ່ການປ່ຽນແປງສະພາບ ດິນຟ້າອາກາດ ສຳລັບໂຄງລ່າງທາງຊົນນະບົດ

ໃນວັນທີ 24 ມັງກອນ 2017 ຢູ່ທີ່ສະຖາບັນຝຶກອົບຮົມ ຍທຂ ຫຼັກ 19 ໄດ້ເປີດກອງປະຊຸມສໍາມະນາ  ກ່ຽວກັບການຮັບ ມືຕໍ່ການປ່ຽນແປງສະພາບດິນຟ້າອາກາດສຳລັບໂຄງລ່າງທາງຊົນນະບົດ, ໂດຍການ​ເປັນ​ປະ​ທານ ຂອງທ່ານ ປອ ສັນຕິສຸກ ສິມມາລາວົງ ຮອງລັດຖະມົນຕີ ກະຊວງ ຍທຂ, ມີທ່ານ ແພງ ດວງເງິນ ຫົວໜ້າກົມຂົວທາງ, ທ່ານ ແທນຄໍາ ທອງບົນ ຫົວໜ້າສະຖາບັນຝຶກອົບຮົມໂຍທາທິການ ແລະ ຂົນສົ່ງ; ທ່ານ Lorenz Gessner, KfW Country Director.  ມີບັນດາທ່ານ ຮອງຫົວໜ້າກົມ, ຫົວໜ້າພະແນກ, ຊ່ຽວຊານຈາກອົງການຈັດຕັ້ງສາກົນ World Bank, ADB, JICA, KfW ພ້ອມດ້ວຍພະນັກງານວິຊາການ ຈາກສະຖາບັນຝຶກອົບຮົມໂຍທາທິການ ແລະ ຂົນສົ່ງ ເຂົ້າຮ່ວມ.

ກອງປະຊຸມສຳມະນາຄັ້ງນີ້ ແມ່ນເພື່ອຍົກລະດັບຄວາມຮູ້ຄວາມສາມາດໃຫ້ແກ່ພະນັກງານວິຊາການຂັ້ນພະແນກ, ຂັ້ນ ຫົວໜ້າໂຄງການ ໃນຂະແໜງ ຍທຂ ໄດ້ຮັບຮູ້ ແລະ ເຂົ້າໃຈຄວາມຮູ້ພື້ນຖານ ກ່ຽວກັບຄວາມສ່ຽງຈາກໄພພິບັດທຳມະ ຊາດ ແລະ ການປ່ຽນແປງຂອງດິນຟ້າອາກາດ, ທີ່ມີຜົນກະທົບຕໍ່ເສັ້ນທາງ, ການວາງແຜນຮັບມືຕໍ່ການປ່ຽນແປງຂອງດິນ ຟ້າອາກາດ ທາງດ້ານເຕັກນິກ ແລະ ວິທີການ ແກ້ໄຂທາງດ້ານວິສະວະກຳ. ແນ່ໃສ່ສ້າງຄວາມເຂັ້ມແຂງ ແລະ ສ້າງຂີດ ຄວາມສາມາດໃຫ້ແກ່ພະນັກງານ ວິຊາການຂອງກະຊວງ ຍທຂ ໃຫ້ສາມາດແກ້ໄຂຜົນກະທົບຈາກການປ່ຽນແປງ ດິນຟ້າ ອາກາດ ທັງໃນປັດຈຸບັນ ແລະ ໃນອະນາຄົດໄດ້ຢ່າງມີປະສິດທິພາບ. ໂດຍສະເພາະແມ່ນຈະໄດ້ປຶກສາຫາລືກ່ຽວກັບ ຫຼັກ ການໃນການຮັບມືຕໍ່ການປ່ຽນແປງສະພາບດິນຟ້າອາກາດ, ການຄຸ້ມຄອງເຫດການຕ່າງໆ ຈາກສະພາບດິນຟ້າອາກາດຕໍ່ ການກໍ່ສ້າງ ແລະ ສ້ອມແປງເສັ້ນທາງ, ການຕີລາຄາ ແລະ ສຶກສາວິທີທາງ ເລືອກໃນການປ້ອງກັນຕໍ່ການປ່ຽນແປງດິນ ຟ້າອາກາດສຳລັບການກໍ່ສ້າງ ແລະ ສ້ອມແປງເສັ້ນທາງ ເຫລົ່ານີ້ເປັນຕົ້ນ.

Additional information