ພິທີມອບ-ຮັບ ໂຄງການນໍ້າປະປາເມືອງ ເມືອງທ່າແຕງ ແຂວງເຊກອງ, ເມືອງສາລະວັນ ແຂວງສາລະວັນ ແລະ ເມືອງໄຊເສດຖາ ແຂວງອັດຕະປື

 ພິທີ​ມອບ-​ຮັບ ໂຄງການນໍ້າປະປາ ເມືອງທ່າແຕງ ແຂວງເຊກອງ, ​ເມືອງສາລະວັນ ແຂວງສາລະ ວັນ ແລະ ເມືອງໄຊເສດຖາ ແຂວງອັດຕະປື ​ໄດ້​ຈັດຂື້ນ​ໃນ​ວັນ​ທີ 25 ມັງກອນ 2017 ທີ ​ໂຮງງານຜະລິດ​ນ້ຳ​ປະປາ ເມືອງທ່າ​ແຕງ ແຂວງ​ເຊ​ກອງ, ​ໂດຍ​ການ​ເຂົ້າ​ຮ່ວມ​ຂອງ ​ທ່ານ ນາງ ວິໄລຄໍາ ໂພສາລາດ ຮອງລັດຖະມົນຕີ​ການ​ກະຊວງ ​ໂຍທາ​ທິການ ​ແລະ ຂົນ​ສົ່ງ; ທ່ານ​ ພອນ​ເພັດ ຄີວລາ​ວົງ ປະທານ​ສະພາ​ປະຊາ​ຊົນ ແຂວງ​ເຊ​ກອງ; ທ່ານ  ສີດາ ສຸວັນນະ​ສາຍ  ຮອງເຈົ້າແຂວງ ແຂວງ​ເຊ​ກອງ; ທ່ານ ຖາວອນ ພົມມະ​ໄລ​ລຸນ ຮອງເຈົ້າແຂວງ ແຂວງ​ເຊ​ກອງ; ທ່ານ ວິຊຽນ ນະ​ວິ​ກຸນ ຮອງ​ເຈົ້າ​ແຂວງ ​ແຂວງ​ສາລະ​ວັນ ​ແລະ ທ່ານ ນາງ ມີນາ​ພອນ ​ໄຊ​ຊົມ​ພູ ຮອງ​ເລຂາ​ພັກ​ແຂວງ ​ແຂວງ​ອັດ​ຕະປື; ບັນດາ ຫົວໜ້າ​ກົມ-ຄະນະ​ກົມ, ທີ່​ປຶກສາ​ລັດຖະມົນຕີກະຊວງ ຍທຂ, ຫົວໜ້າ​ພະ​ແນ​ກ-ຄະນະ​ພະ​ແນ​ກ ຍທຂ ​ແຂວງເຊ​ກອງ, ​ແຂວງສາລະວັນ ​, ​ແຂງອັດຕະປື, ບັນດາ​ຄະນະ​ພະ​ແນ​ກທີ່​ກ່ຽວຂ້ອງ​ທັງ 3 ​ແຂວງ, ບັນດາ​ເຈົ້າເມືອງ,ຮອງ​ເຈົ້າ​ເມືອງ​ທັງ 3 ​ເມືອງ, ຕາງໜ້າ​ຈາກ​ກະຊວງ​ແຜນການ ​ແລະ ການ​ລົງທຶນ, ກະຊວງ​ການ​ເງິນ, ແຂກທີ່ມາຈາກສູນກາງ, ທ້ອງຖິ່ນ ແລະ ພໍ່​ແມ່​ປະຊາຊົນ​ ​ເມືອງທ່າ​ແຕງ ​ແລະ ​ເມືອງອ້ອມ​ຂ້າງໂຄງການ​ເຂົ້າ​ຮ່ວມ.

​ ໂຄງການ​ນ້ຳ​ປະປາ ​ແລະ ​ສຸຂາພິບານ​ຕົວ​ເມືອງ​ນ້ອຍ ​ແມ່ນ​ໂຄງການ​ໜື່ງທີ່ເກີດ​ຂື້ນບົນ​ພື້ນຖານ ຄວາມ​ຮຽກຮ້ອງ​ຕ້ອງການ​ຂອງ​ປະຊາ​ຊົນ ​ແລະ ທິດ​ທາງ​ນະ​ໂຍບາຍ​ຂອງ​ພັກ-ລັດ ຕໍ່​ການ​ສ້າງສາ​ພັດທະນາ​ປະ​ເທດ​ຊາດ ​ແລ​ະ ປັບປຸງ​ຊິ​ວິດ​ການ​ເປັນ​ຢູ່​ຂອງ​ປະຊາຊົນ​ບັນ​ດາ​​ເຜົາ​ໃນ​ທົ່ວປະ​ເທດ, ​ໂດຍ​ສະ​ເພາະ​​ແມ່ນ ປະຊາຊົນ ເມືອງທ່າແຕງ ແຂວງເຊກອງ, ​ເມືອງສາລະວັນ ແຂວງສາລະວັນ ແລະ ເມືອງໄຊເສດຖາ ແຂວງອັດຕະປື ​ໃຫ້​ດີ​ຂື້ນ. ​ໂຄງການ​ກໍ່ສ້າງ​ນີ້ຈະ​ສຳ​ເລັດ​ໄດ້​ກໍ່​ຍ້ອນ​ຫຼາຍ​ພາກສ່ວນ​ໃຫ້ການ​ສະໜັບສະໜູນ​ທາງ​ດ້ານ​ເຫື່ອ​ແຮງ, ສະຕິ​ປັນຍາ ​ແລະ ທຶນຮອນ​ເຂົ້າ​ໃນ​​ໂຄງການ​ກໍ່ສ້າງດັ່ງກ່າວ ​ເປັນ​ຕົ້ນ: ລັດຖະບານ ​ແຫ່ງ ສປປ ລາວ, ທະນາຄານ​ພັດທະນາອາຊີ, ​ແຂວງ, ​ເມືອງ ​ແລະ ອົງການ​ຈັດ​ຕັ້ງ​ບ້ານທີ່​ກ່ຽວຂ້ອງ.

​     ​ໂຄງການ​ກໍ່ສ້າງນ້ຳ​ປະປາ ​ແລະ ​ສຸຂາພິບານ​ຕົວ​ເມືອງ​ນ້ອຍ ເມືອງທ່າແຕງ ແຂວງເຊກອງ, ​ເມືອງສາລະວັນ ແຂວງສາລະວັນ ແລະ ເມືອງໄຊເສດຖາ ແຂວງອັດຕະປື ​ເປັນ​ໂຄງການຮ່ວ​ມມື​ລະຫວ່າງຂອງ​ລັດຖະບານ ​ແຫ່ງ ສປປ ລາວ ​ແລະ ທະນາຄານ​ພັດທະນາ​ອາຊີ. ​ໃນ​ການ​ກໍ່ສ້າງ​ໂຮງງານ​ຜະລິດ​ນ້ຳ​ປະປາ ​ແລະ ສະໜອງນ້ຳປະປາ ​ໃຫ້​ປະຊາຊົນ​ໃນ​ຕົວ​ເມືອງ​ນ້ອຍ, ເພື່ອປັບປຸງ ຊິວິດການເປັນຢູ່ຂອງປະຊາຊົນ ຢູ່ຕົວເມືອງນ້ອຍ ໂດຍການສະໜອງນ້ຳປະປາ ທີ່ສະອາດ ປອດ​ໄພ ​​ແລະ ນຳ​ໃຊ້ໃນ​ການ​ບໍລິ​ໂພ​ກ ​ໃຫ້​ຖຶກລັກ​ອານາ​ໄມ. ນ້ຳປະປາ ແມ່ນປັດໃຈໜຶ່ງທີ່ຈຳເປັນທີ່ສຸດ ເພື່ອຊ່ວຍຍົກລະດັບຄຸນນະພາບຊີວິດ ຂອງປະຊາຊົນໃຫ້ດີຂຶ້ນ ເຊິ່ງອັດຕາສ່ວນການຊົມໃຊ້ນໍ້າ ປະປາ ໃນຕົວເມືອງ ແລະ ຊົນນະບົດ ຍັງແມ່ນຕົວຊີ້ບອກພື້ນຖານອັນໜຶ່ງ ຂອງ ການພັດທະນາ ຮອບດ້ານ. ສະນັ້ນ, ລັດຖະບານ ຍາມໃດກໍໄດ້ເອົາໃຈໃສ່ພັດທະນາ, ປັບປຸງ ແລະ ຂະຫຍາຍ ລະບົບນໍ້າປະປາໃຫ້ທົ່ວເຖິງທັງໃນຕົວເມືອງ ແລະ ຊົນນະບົດ ໃນທົ່ວປະເທດ. ໂດຍປະຕິບັດຕາມ ມະຕິຂອງກອງປະຊຸມໃຫຍ່ຄັ້ງທີ່ VIII ຂອງພັກ ທີ່ຈະລົບລ້າງ ສປປ ລາວ ອອກຈາກບັນຊີລາຍຊື່ ປະເທດດ້ອຍພັດທະນາ ໃນປີ 2020 ແລະ ປະຕິບັດຍຸດທະສາດແຫ່ງການເຕີບໂຕ ແລະ ລົບລ້າງຄວາມທຸກຍາກແຫ່ງຊາດ, ກະຊວງ ໂຍທາທິການ ແລະ ຂົນສົ່ງ ຈຶ່ງໄດ້ມີແຜນການພັດ ທະນາຂະແໜງການນ້ຳປະປາ ເພື່ອຕອບສະໜອງໄດ້ຕາມຄວາມຮຽກຮອ້ງຕອ້ງການຂອງສັງຄົມ ແລະ ແຜນການທີ່ໄດ້ວາງໄວ້ ຄື: ໃນປີ 2015 ປະຊາກອນໃນຕົວເມືອງທົ່ວປະເທດ ສາມາດເຂົ້າ ເຖິງນໍ້າປະປາ ໃຫ້ໄດ້ 67%, ປີ 2020 ໃຫ້ໄດ້ 80% ແລະ ປີ 2030 ໃຫ້ໄດ້ 90% ແລະ ໂຄງການນໍ້າປະປາ ແລະ ສຸຂະພິບານຕົວເມືອງນ້ອຍ ກໍ່ແມ່ນໜຶ່ງໃນໂຄງການທີ່ນອນຢູ່ໃນ ແຜນການດັ່ງກ່າວ; ເຊິ່ງເປັນໂຄງການທີ່ໄດ້ຮັບທຶນກູ້ຢຶມຈາກ ທະນາຄານພັດທະນາອາຊີ ໂດຍມີເປົ້າໝາຍນໍາໃຊ້ເຂົ້າໃນການກໍ່ສ້າງລະບົບນໍ້າປະປາ, ພ້ອມທັງ ປັບປຸງຍົກລະດັບໂຄງລ່າງ ແລະ ສະພາບແວດລ້ອມຄຸ້ມບ້ານຂອງເທດສະບານໃນ 3 ເມືຶອງໂຄງການ ແນ່ໃສສ້າງໃຫ້ກາຍ ເປັນຕົວເມືອງໃນຊົນນະບົດ.

 

 

 

 

 

 

 

 

 

Additional information