ຊິວິດປອດໄພ ຜ່ອນຄວາມໄວການຂັບຂີ່ “Save Live and Slow Down”

 

  ຄະນະ​ກຳມະການ​ແຫ່ງ​ຊາດ ດ້ານ​ຄວາມ​ປອດ​ໄພ​ທາງ​ຖະໜົນ,   ກະຊວງ ​ໂຍທາ​ທິການ ​ແລະ ຂົນ​ສົ່ງ ໄດ້ຈັດ​ງານສັບປະດາຄວາມ​ປອດ​ໄພ​ທາງ​ຖະໜົນ​ສາກົນ​ຄັ້ງ​ທີ່ 4 ຂື້ນ​ໃນ​ວັນ​ທີ 13 ພຶດສະພາ 2017 ທີ່​ສູນ​ການ​ຄ້າ ລາວ-​ໄອ​ເຕັກ, ນະຄອນຫຼວງ​ວຽງ​ຈັນ ​ໂດຍ​ການ​ເຂົ້າ​ຮ່ວມ​ຂອງ​ທ່ານ ວຽງ​ສະຫວັດ ສີ​ພັນ​ດອນ ຮອງ​ລັດຖະມົນຕີກະຊວງ ​ໂຍທາ​ທິການ ​ແລະ ຂົນ​ສົ່ງ; ທ່ານ ພັນ​ເອກ ສັນ​ໄຊ ຮອງ​ຫົວໜ້າ​ຫ້ອງ​ວ່າການ ກະຊວງປ້ອງ​ກັນ​ຄວາມ​ສະຫງົບ; ທ່ານ ນາງ ​ພອນ​ສະຫວັນ ​ແພງ​ສີດາ ຫົວໜ້າ​ສະ​ຖາ​ບັນ​ຄົ້ນ​ຄ້ວາ​ໂຍທາ​ ​ແລະ ຂົນ​ສົ່ງ; ທ່ານ ພັນ​ໂທ ກົງສີ ສຸວັນນະ​ຕຸ່ມ ຫົວໜ້າ​ກົມ​ຕຳຫຼວດ​ຈາລະ​ຈອນ, ກະຊວງ ປ້ອງ​ກັນ​ຄວາມ​ສະຫງົບ; ທ່ານ ບົວ​ເພັດ ​ໄຊ​ຍະ​ສານ ຮັກສາ​ການຫົວໜ້າ​ກົມ​ຂົນ​ສົ່ງ, ມີ​ບັນດາ ຮອງ​ຫົວໜ້າ​ກົມ​ຂົນ​ສົ່ງ, ຮອງຫົວໜ້າພະ​ແນ​ກ ຍທຂ ນະຄອນຫຼວງ​ວຽງ​ຈັນ, ຜູ້ຕາງໜ້າຄະນະ​ກຳມະການ​ແຫ່ງ​ຊາດ ດ້ານ​ຄວາມ​ປອດ​ໄພ​ທາງ​ຖະໜົນ, ກະຊວງ ປ້ອງ​ກັນ​ຄວາມ​ສະຫງົບ ​ໂດຍສະ​ເພາະ​ພະ​ແນ​ກຕຳຫຼວດ​ຈາລະ​ຈອນ​ນະຄອນຫຼວງ​ວຽງ​ຈັນ, ອົງການ​ຈັດ​ຕັ້ງ​ສາກົນ, ຕາງໜ້າ​ຈາກມະຫາວິທະຍາ​ໄລ, ນ້ອງ​ນັກ​ຈາກ 4 ໂຮງຮຽນ​ມັດທະຍົມ ​ແລະ ຈາກພາກສ່ວນ​ກ່ຽວຂ້ອງ​ເຂົ້າ​ຮ່ວມ​ທັງ​ໝົດປະມານ 1,000 ຄົນ .

  ໃນ​ການຈັດ​ງານສັບປະດາຄວາມ​ປອດ​ໄພ​ທາງ​ຖະໜົນ​ສາກົນ​ຄັ້ງ​ທີ່ 4 ໂດຍພາຍ​ໃຕ້​ຫົວ​ຂໍ້ “ ຊິວິດ​ປອດ​ໄພ ຜ່ອນ​ຄວາມ​ໄວ​ການ​ຂັບ​ຂີ່ ” (Save Live and Slow Down) ​ນີ້​ເພື່ອປູກ​ຈິດ​ສຳນຶກ ​ແລະ ​ປຸກ​ລະດົມມວນ​ຊົນ​ທົ່ວ​ສັງຄົມ​ ກໍ່​ຄື​ປະຊາຊົນ​ບັນດາ​ເຜົ່າ ​ໃນ​ຂອບ​ເຂດ​ທົ່ວ​ປະ​ເທດ ​ໃຫ້​ເຫັນ​ເຖິງຄວາມ​ໝາຍ​ຄວາມ​ສຳຄັນ ​ໃນ​ການ​ຫຼຸດຜ່ອນ, ປ້ອງ​ກັນການ​ເກີດ​ອຸປະຕິ​ເຫດ​ ​ແລະ ໃຫ້​ມີ​ສະຕີ​ລະວັງ​ຕົວ​ໃນ​​ເວລາ​ຂັບ​ຂີ່ຕາມ​ທ້ອງ​ຖະໜົນ, ​ໂດຍສະ​ເພາະ​ຢ່າງ​ຍິ່ງ​ແມ່ນ​ກຸ່ມ​ສ່ຽງທີ່​ອາດ​ຈະ​ກໍ່​ໃຫ້​ເກີດ​ອຸປະຕິ​ເຫດ​ເຊັ່ນ: ຊາວ​ໜຸ່ມ ​ແລະ ​ເຍົາວະ​ຊົນ, ນອກ​ຈາກນັ້ນ​ຍັງ​ເປັນ​ການປູກ​ຈິດ​ສຳນຶກ​ໃຫ້​ທຸກ​ຄົນ​ເຫັນ​ໄດ້​ຄວາມ​ສຳຄັນ ​ໃນ​ການ​ປ້ອງ​ກັນ  ​ແລ​ະ ຕີ​ຖອຍ​ບັນຫາການ​ເກີດ​ອຸປະຕິ​ເຫດຈາກການຂັບຂີ່ຍານພາຫະນະ ​ເຮັດ​ແນວ​ໃດ​ໃຫ້ການ​ສູນ​ເສັຍ​ເສຍ​​ຊິວິດ ​ແລະ ຊັບ​ສິນ ຍ້ອນ​ອຸປະຕິ​ເຫດ​ທາງ​ຖະໜົນ​ເປັນ​ຈຳນວນ​ຫຼວງ​ຫຼາຍ ​ໃຫ້​ນັບ​ມື້​ນັບ​ຫຼຸດ​ນ້ອຍ-ຖອຍລົງ​ເປັນ​ກ້າວໆ. ​​ໃນ​ຕອນ​ທ້າຍ ທ່ານ​ປະ​ທ່ານ​ຍັງ​ໄດ​ຮຽກຮ້ອງ​ໃຫ້​ພໍ່​ແມ່ນ​ພີ່ນ້ອງ ບັນດາ​ເຜົ່າ ​ໃນ​ຂອບ​ເຂດ​ທົ່ວ​ປະ​ເທດ ​ເວົ້າ​ລວມ ​ເວົ້າ​ສະ​ເພາະ ຊາວ​ນະຄອນຫຼວງ​ວຽງ​ຈັນ​ ຈົ່ງ​ເພີ້​ມສະຕິ​ລະວັງ​ຕົວ​ໃນ​ການ​ເດີນທາງ​ໄປ-ມາ, ພ້ອມ​ກັນ ປະຕິບັດ​ກົດ​ລະບຽບ​ກົດ​ຈາລະຈອນ ຢ່າງ​ເຂັ້ມ​ງວດ ​ເຮັດ​ແນວ​ໃດ ​ໃຫ້ການ​ເດີນທາງ​ໃນ​ຊິວິດ​ປະຈຳ​ວັນ​ມີ​ຄວາມ​ສະດວກ​ສະບາຍ ​ແລະ ປອດ​ໄພ. ຢາກ​ເຮັດ​ໄດ້​ຄີ​ແນວ​ນັ້ນ​ຕ້ອງ​ເອົາ​ໃຈ​ໃສ່​ສີ່​ປະການ​ຕັ້ນຕໍ​ດັ່ງ​ນີ້: ຫຼຸດ​ຜອນຄວາມ​ໄວ, ດື່ມບໍ່​ຂັບ, ​ໃສ່​ສາຍ​ແອວ​ນິລະ​ໄພ ​ແລະ​ ໃສ່​ໝວກ​ກັນ​ກະທົບ​ໃນ​ເວລາ​ຂັບ​ຂີ່​ລົດຈັກ.

  ນອກຈາກ​ນັ້ນ​ໃນ​ງານ​ດັ່ງກ່າວ ຍັງ​ມີ​ການ​ໂຕ້​ວ່າ​ທີ ກ່ຽວ​ກັບ​ບັນຫາ​ຄວາມ​ປອດ​ໄພ​ທາງ​ຖະໜົນ ​ໃນ​ຫົວ​ຂໍ້: ການ​ກໍ່ສ້າງ​ເສັ້ນ​ທາງ ​ແລະ ການ​ນຳ​ໃຊ້​ເສັ້ນ​ທາງ; ການ​ໃສ່​ໝວກ​ກັນ​ກະທົບ ​ແລະ ບໍ່ໃສ່​ໝວກ​ກັນ​ກະທົບ ​ໃນ​ເວລາ​ຂັບ​ຂີ່, ​ແລະ ການ​ຂັບ​ຂີ່ລົດ​ໄວ ​ແລະ ການ​ຂັບ​ຂີ່ລົດ​ຊ້າ. ພ້ອມ​ນັ້ນ​ຍັງ​ມີ​ບັນດາ​ຮ້ານ​ວາງສະ​ແດງ​ທັງ​ພາກ​ລັດ ​ແລະ ​ເອກະ​ຊົນ ​ມາໃຫ້​ຄວາມ​ຮູ້​ແກ່​ສັງຄົມກ່ຽວ​ກັບ ​ເຕັກນິກ​ການ​ຂັບ​ຂີ່​ລົດ​ປອດ​ໄພ, ການ​ປະຖົມພະຍາ​ເບື້ອງຕົ້ນ​ກໍລະນີ​ເກີດ​ອຸປະຕິ​ເຫດ ​ແລະ ກິດຈະກຳ​ຖາມ​ຕອບ​ມີ​ລາງ​ວັນ ​ແລະ ອື່ນໆ.

 

Additional information