ກະຊວງ ຍທຂ ດຳເນີນຊີວິດການເມືອງປັບປຸງປົວແປງພັກ ທົ່ວອົງຄະນະພັກ

   ອົງຄະ​ນະ​ພັກ​ກະ​ຊວງ​ ໂຍທາທິການ ແລະ ຂົນສົ່ງ ໄດ້​ຈັດ​ກອງ​ປະ​ຊຸມ​ເປີດບັ້ນ​ດຳ​ເນີນ​ຊີ​ວິດ​ການ​ເມືອງ ປັບ​ປຸງ​ປົວ​ແປງ ທົ່ວ​ອົງ​ຄະ​ນະ​ພັກກະຊວງ ​ປີ 2017 ຂື້ນຢາງເປັນທາງການ ​ໃນ​ວັນ​ທີ 15 ມີ​ຖຸນາ 2017 ທີ​ຫ້ອງ​ປະຊຸມ​ໃຫຍ່ ກະຊວງ ​ໂຍທາ​ທິການ ​ແລະ ຂົນ​ສົ່ງ ໂດຍເປັນກຽດເຂົ້າຮ່ວມຂອງ ສະ​ຫາຍ ປອ ບຸນທອງ​ ຈິດ​ມະ​ນີ, ກໍາມະການ​ກົມ​ການ​ເມືອງ​ສູນ​ກາງ​ພັກ,  ​ເລຂາທິການ​ສູນ​ກາງ​ພັກ, ຮອງ​ນາຍົກ​ລັດ​ຖະ​ມົນ​ຕີ, ປະ​ທານຄະນະ​​ກວດ​ກາ​ສູນ​ກາງພັກ, ປະທານອົງການກວດກາລັດຖະບານ, ຫົວໜ້າ​ອົງການ​ຕ້ານ​ການ​ສໍ້​ລາດ​ບັງ​ຫລວງຂັ້ນ​ສູນ​ກາງ; ຊຶ່ງ​ມີ ສະ​ຫາຍ ປອ ບຸນຈັນ ສິນທະວົງ, ກຳມະການ​ສູນ​ກາງ​ພັກ, ເລ​ຂາ​ຄະ​ນະ​ພັກ​ກະ​ຊວງ ໂຍທາທິການ ແລະ ຂົນສົ່ງ;  ບັນດາ ​ສະ​ຫາຍ ຄະນະປະຈຳພັກ​ກະຊວງ, ສະຫາຍຄະນະ​ພັກ​ກະຊວງ, ບັນດາສະຫາຍ ຄະ​ນະ​ຮັບ​ຜິດ​ຊອບບັ້ນ​ດຳ​ເນີນ​ຊີ​ວິດ​ການ​ເມືອງປົວ​ແປງ​ພັກຂັ້ນ​ສູນ​ກາງ, ບັນ​ດາ​ສະ​ຫາຍ ເລ​ຂາ​ຄະ​ນະ​ພັກ​ຮາກ​ຖານ, ​ເລ​ຂາໜ່ວຍ​​ພັກຮາກ​ຖານ, ສະ​ມາ​ຊິກ​ພັກ​ອາ​ວຸ​ໂສ, ແລະ ບັນດາສະຫາຍສະ​ມາ​ຊິກ​ພັກ-ພະ​ນັກ​ງານຫຼັກ​ແຫຼ່ງ ອ້ອມ​ຂ້າງ​ກະຊວງ ຍທຂ​ ເຂົ້າ ຮ່ວ​ມ.

  ກອງ​ປະ​ຊຸມ​​ດຳ​ເນີນ​ຊີ​ວິດ​ການ​ເມືອງ ປັບ​ປຸງ​ປົວ​ແປງ ທົ່ວ​ອົງ​ຄະ​ນະ​ພັກກະຊວງ ຍທຂ ​ໃນ​ຄັ້ງ​ນີ້ ເພື່ອ​ເປັນ​ການ​ເສີມ​ຂະ​ຫຍາຍ​ມູນ​ເຊື້ອ ຜົນ​ງານດ້ານ​ດີ ຂອງ​ອົງ​ຄະ​ນະ​ພັກ​ກະຊວງ ຍທຂ, ສຸມໃສ່ແກ້​ໄຂ​ຈຸດ​ອ່ອນຂໍ້​ຄົງຄ້າງ​ຕາມມາດຕະການທີ່ໄດ້ ​ກຳ​ນົດ​ໄວ້ໃນ​ມະ​ຕິ​ກອງ​ປະ​ຊຸມ​ໃຫ່​ຍ​ຄັ້ງ​ທີ IV ຂອງອົງຄະນະ​ພັກກະຊວງ ໃຫ້​ມີ​ການ​ຫັນ​ປ່ຽນ​ຢ່າງ​ແທ້​ຈິງ, ຍົກ​ສູງ​ຄວາມ​ສາ​ມາດ​ນຳ​ພາ ແລະ ລັກ​ສະ​ນະ​ນຳ​ໜ້າ​ຂອງ​ຄະ​ນະ​ພັກ​ຂັ້ນຕ່າງໆ, ເພີ່ມ​ທະ​ວີ​ຄວາມ​ສາ​ມັກ​ຄີ​ເປັນ​ເອ​ກະ​ພາບ​ສູງ​ພາຍ​ໃນອົງ​ຄະ​ນະ​ພັກກະຊວງໃຫ້ສູງຂຶ້ນ, ເດັດ​ດ່ຽວ​ສູ້​ຊົນນຳ​ພາ​ແກ້​ໄຂ 19 ບັນຫາທີ່ເປັນປະກົດການຫຍໍ້ທໍ້ ແລະ ເປັນສິ່ງ​ທ້າ​ທ້າຍຂອງຂະແໜງ ຍທຂ, ຕັ້ງໜ້າແກ້ໄຂ ​ພະ​ຍາດ​ອາດ​ຍາ​ສິດ ແລະ ການ​ສໍ້​ລາດ​ບັງຫຼວງ​ທຸກຮູບແບບຢູ່ຂະແໜງ ຍທຂ ໃຫ້ໝົດໄປ, ​ສືບຕໍ່ຕັ້ງໜ້າຜັນຂະຫຍາຍແນວ​ທາງ​ປ່ຽນ​ແປງ​ໃໝ່​ຮອບ​ດ້ານ ແລະ ມີຫຼັກ​ການ​ຂອງ​ພັກໃຫ້ປະກົດຜົນເປັນຈິງ; ເພື່ອ​ໃຫ້​ຄະ​ນະ​ພັກ​ແຕ່​ລະ​ຂັ້ນ ສະ​ມາ​ຊິກ​ພັກ​ແຕ່​ລະ​ສະ​ຫາຍ ເຊື່ອມ​ຊຶມ​ກຳ​ແໜ້ນຢ່າງ​ເລິກ​ເຊິ່ງ​ຕໍ່​ແນວ​ທາງ ​ແລະ ມະ​ຕິ​, ຄໍາສັ່ງ ຂອງ​ພັກ, ຍົກ​ສູງ​ຄວາມ​ຮັບ​ຜິດ​ຊອບ​ການເມືອງຂອງ​ຄະ​ນະ​ພັກ ແລະ ສະ​ມາ​ຊິກ​ພັກ​ແຕ່​ລະ​ສະ​ຫາຍໃຫ້ສູງຂຶ້ນ, ແນ່ໃສ່ປັບ​ປຸງ​ຄຸນ​ທາດການ​ເມືອງ​ຄຸນ​ສົມ​ບັດ​ສິນ​ທຳ​ປະ​ຕິ​ວັດ, ປັບ​ປຸງ​ແບບ​ແຜນນຳ​ພາ ແລະ ວິ​ທີ​ເຮັດ​ວຽກ​ພາຍໃນອົງຄະນະພັກ ຍທຂ ໃຫ້ເຂັ້ມງວດ, ກໍາ​ແໜ້ນ​ວຽກ​ງານກໍ່​ສ້າງ​ພັກ, ຫຼັກ​ການ​ຕຳ​ນິ​ຕິ​ຊົມ​ຕົນ​ເອງ ຕິ​ຊົມ​ກັນ​ພາຍ​ໃນ​ພັກ ສ້າງ​ໃຫ້​ໄດ້​ຈິດ​ໃຈຮັກຊາດ ແລະ ເສຍສະລະເພື່ອຜົນສ່ວນລວມ ຖື​ເອົາ​ຜົນ​ປະ​ໂຫຍດສ່ວນ​ລວມ​ເປັນ​ສິ່ງ​ຊຸກ​ຍູ້ໃຫ້​ແກ່​ການ​ສ້າງ ແລະ ຍົກ​ສູງ​ຄວາມ​ສາ​ມາດ​ນຳ​ພາ​ຂອງ​ຄະ​ນະ​ພັກ​ແຕ່​ລະ​ຂັ້ນ,  ການ​ດຳ​ເນີນ​ຊີ​ວິດ​ການ​ເມືອງ​ຄັ້ງ​ນີ້ຕ້ອງ​ແກ້​ໄຂບັນຫາ​ຈຸດ​ອ່ອນ​ຂໍ້​ຄົງ​ຄ້າງ ທີ່ເກີດຂຶ້ນທັງໝົດຢູ່ອົງຄະນະພັກ ຍທຂ ໂດຍສືບຕໍ່ປຸກລະດົມສະມາຊິກພັກ  ​ໃຫ້​ມີ​ສະ​ຕິ​ເຄົາ​ລົບ ​ແລະ ປະ​ຕິ​ບັດ​ກົດ​ລະ​ບຽບ​ພັກ, ​ກົດ​ໝາຍຂອງ​ລັດໃຫ້ສູງຂຶ້ນກວ່າເກົ່າ, ຫຼີກ​ເວັ້ນ​ການ​ດຳ​ເນີນ​ຊີ​ວິດ​ການ​ເມືອງ​ແບບ​ໄດ້ແຕ່ຮູບ​ການ. ພາຍຫຼັງ​ດຳ​ເນີນ​ຊີ​ວິດ​ການ​ເມືອງ​ແລ້ວຄະ​ນະ​ພັກ​ທຸກ​ຂັ້ນ, ສະ​ມາ​ຊິກ​ພັກ​ທຸກ​ສະ​ຫາຍ ຕ້ອງ​ມີ​ການ​ຫັນ​ປ່ຽນ​ທີ່​ດີ​ຂຶ້ນ​ຢ່າງ​ແທ້​ຈິງ ​ພ້ອມ​ດຽວ​ກັນ​ນີ້ຄະນະພັກທຸກຂັ້ນສະມາຊິກພັກທຸກສະຫາຍ ພາຍໃນອົງຄະນະພັກກະຊວງ ຕ້ອງໄດ້ເປັນ​ເອ​ກະ​ພາບກັນດ້ານທັດສະນະ ແລະ ພ້ອມກັນຕັດສິນໃຈສູງ, ວາງ​ມາດ​ຕະ​ການ ແກ້​ໄຂ​ຈຸດອ່ອນ​ຄົງ​ຄ້າງທີ່ຕິດພັນກັບຄວາມຮັບຜິດຊອບຂອງຄະນະພັກພວກເຮົາໃຫ້ຖືກແກ້ໄຂໝົດໄປ.

  ກອງ​ປະຊຸມ ຍັງ​ຈະ​ໄດ້ຄົ້ນຄວ້າ​ເຊື່ອມ​ຊຶມ ຄຳ​ສັ່ງແນະນໍາ ເລກທີ 01/ກມສພ, ລົງວັນ01/02/2017. ​ຂອງ​ກົມ​ການ​ເມືອງ​ສູນ​ກາງ​ພັກ ວ່າ​ດ້ວຍ​ການ​ດຳ​ເນີນ​ຊີ​ວິດ​ການ​ເມືອງ ປັບ​ປຸງປົວ​ແປງ​ທົ່ວ​ພັກ ປີ 2017; ​ເຊື່ອມ​ຊຶມ ​ເອ​ກະ​ສານ​ເດັດດ່ຽວ​ປັບ​ປຸງປົວ​ແປງ​ທົ່ວ​ພັກໃຫ້​ປອດ​ໃສ ເຂັ້ມ​ແຂງ ແລະ ໜັກ   ແໜ້ນ ໂດຍຕິດພັນກັບ ມະຕິວ່າດ້ວຍການແກ້ໄຂພະຍາດອາດຍາສິດ, ສະກັດກັ້ນ ແລະ ຕ້ານການສໍ້ລາດບັງຫຼວງ ສະບັບເລກທີ 022/ຄບສພ, ລົງວັນທີ 13/01/2017; ​ຄົ້ນຄ້ວາປະກອບຄໍາເຫັນໃສ່ບົດ​ສະຫຼຸບ ຕີ​ລາ​ຄາ​ການຮັບຜິດຊອບນໍາພາ, ຊີ້ນໍາຂອງ​ຄະ​ນະ​ບໍ​ລິ​ຫານ​ງານ​ພັກ​ກະ​ຊວງ ໃນ​ການ​ຈັດ​ຕັ້ງປະ​ຕິ​ບັດວຽກງານ ຂອງກະຊວງໂຍທາທິການ ແລະ ຂົນສົ່ງ ໃນແຕ່ລະດ້ານ ແລະ ກວດກາຄືນຄວາມຮັບຜິດຊອບ ຂອງຄະນະພັກກະຊວງ ແລະ ຄະນະພັກຮາກຖານແຕ່ລະສະຫາຍ; ​ດຳ​ເນີນ​​ກອງປະຊຸມ​​ສຳຫຼວດກວດ​ກາບຸກ​ຄົນ​ໃນ​ຄະ​ນະ​ພັກແຕ່ລະຂັ້ນ ແລະ ສະມາຊິກພັກແຕ່ລະ ສະຫາຍ ໃຫ້ເຫັນໄດ້ດ້ານດີທີ່ຕັ້ງໜ້າ, ດ້ານອ່ອນ ແລະ ຂໍ້ບົກຜ່ອງຂອງແຕ່ລະສະຫາຍ ເພື່ອພ້ອມກັນຫັນປ່ຽນ, ແກ້ໄຂບັນດາຈຸດອ່ອນ, ຂໍ້ບົກຜ່ອງຜ່ານມານັ້ນໃຫ້ໝົດໄປ, ພ້ອມກັນຕັ້ງໜ້າ​ປັບປຸງ​ປ່ຽນແປງຕົນເອງ​ໃຫ້ດີ​ຂຶ້ນ​.

 ພິ​ເສດ ໃນ​ກອງ​ປະ​ຊຸມ​ເປີດບັ້ນ​ດຳ​ເນີນ​ຊີ​ວິດ​ການ​ເມືອງ ປັບປຸງປົວ​ແປງ​ທົ່ວອົງ​ຄະ​ນະ​ພັກກະຊວງ​ຄັ້ງ​ນີ້ ຍັງ​ໄດ້​ຮັບກຽດອັນສູງສົ່ງ, ໃນການມາ​​ຕິດ​ຕາມນໍາພາ, ​ຊີ້​ນຳ ແລະ ໃຫ້​ການ​ໂອ້​ລົມ ຊີ້​ທິດ​ເຍືອງ​ທາງ ໃຫ້​ແກ່ບັ້ນ​ປັບ​ປຸງ​ປົວ​ແປງ​ພັກ​ໃນ​ຄັ້ງ​ນີ້ ຈາກ ສະ​ຫາຍ ປອ ບຸນ​ທອງ ຈິດ​ມະ​ນີ ກຳ​ມະ​ການ​ກົມ​ການ​ເມືອງ​ສູນ​ກາງ​ພັກ, ​ເລຂາທິການ​ສູນ​ກາງ​ພັກ, ຮອງ​ນາ​ຍົກ​ລັດ​ຖະ​ມົນ​ຕີ, ປະ​ທານ​ຄະ​ນະ​ກວດກາ​ສູນ​ກາງພັກ, ຫົວໜ້າ​ອົງການ​ຕ້ານ​ການ​ສໍ້​ລາດ​ບັງ​ຫລວງຂັ້ນ​ສູນ​ກາງ, ຫົວໜ້າຄະນະຮັບຜິດຊອບຊີ້ນໍາ ກະຊວງ ຍທຂ ຊຶ່ງ​ສະຫາຍ ປອ ບຸນ​ທອງ ຈິດ​ມະ​ນີ ໄດ້​ຮຽກຮ້ອງໃຫ້ຄະນະພັກ ແລະ ສະມາຊິກພັກກະຊວງ ​ໂຍທາ​ທິການ ​ແລະ ຂົນ​ສົ່ງ ຈົ່ງຍົກສູງບົດບາດການຊີ້ນຳໆພາ, ການດຳຊິວິດ​ການ​ເມືອງ​ໃນ​ຄັ້ງ​ນີ້ ບັນດາ​ສະຫາຍ​ຕ້ອງ​ກ້າ​ເບິ່ງ​ຄວາມ​ເປັນ​ຈິງ​ແຕ່ລະ​ຂົງ​ເຂດ​ຕີ​ລາຄາ​ໃຫ້​ຖື​ກຕ້ອງ​ຊັດ​ເຈນ​ໃນ​ທົ່ວອົງຄະ​ນະ​ພັກ​, ບັນດາ​ກົມ, ສະ​ຖາ​ບັນ, ກອງ ​ແລະ ບັນດາຫົວໜ່ວຍ​ຮາກ​ຖານ ​ເອົາ​ການ​ດຳ​ເນີນ​ຊິວິດ​ການ​ເມືອງ​ໃນ​ຄັ້ງ​ນີ້ ​ເປັນ​ການ​ເສີມ​ຄະ​ຫຍ​ຍປະຊາທິປະ​ໄຕ​ພາຍ​ໃນ​ອົງຄະ​ນະ​ພັກ ​ແລະ ​ໃນ​ຖັນ​ແຖວ​ສະມາຊິກ​ພັກ ຂອງກະຊວງ ຍທຂ ຢ່າງ​ແຂງ​ແຮງ, ສະຫາຍ​ເລຂາ​ພັກ, ບັນດາ ​ສະ​ຫາຍ ຄະນະປະຈຳພັກ​, ສະຫາຍຄະນະ​ພັກ​, ບັນ​ດາ​ສະ​ຫາຍ ເລ​ຂາ​ຄະ​ນະ​ພັກ​ຮາກ​ຖານ, ​ເລ​ຂາໜ່ວຍ​​ພັກຮາກ​ຖານ, ສະ​ມາ​ຊິກ​ພັກ​ອາ​ວຸ​ໂສ, ແລະ ບັນດາສະຫາຍສະ​ມາ​ຊິກ​ພັກ-ພະ​ນັກ​ງານຫຼັກ​ແຫຼ່ງ ​ແຕ່​ລະສະ​ຫາຍຕ້ອງ​ເປັນ​ແບບຢ່າງ​ຈິງ​ໃຈ​ຍົກ ​ແລະ ​ໄຈ້​ແຍກ​ຈຸດ​ອອນ, ຂໍ້ຄົງຄ້າງ ​ແລະ ຄວາມ​ຂາດ​ຄົກ​ບົກ​ຜ່ອງ​ຂອງ​ຕົນ​ຜ່ານ​ມາ, ບັນດາ​ສະຫາຍ​ໃນ​ຄະນະ​ພັກ ​ແລະ ສະມາຊິກ​ພັກ​ທຸນສະຫາຍ​ຕ້ອງ​ກ້າຫານ​ປະກອບ​ຄຳຄິດ​ຄຳ​ເຫັນສົ່ງ​ຂ່າ​ວ​ເຊິ່ງກັນ ​ແລະ ກັນ ບົນ​ຈິດ​ໃຈ​ເພື່ອ​ສະຫາຍ​ຮ່ວມ​ອຸດົມ​ການ​ດຽວ​ກັນ, ມີ​ຄວາມ​ສາມັກຄີ​ຮັກ​ແພງ, ບໍ່​ອະຄະຕິ ​ແລະ ບໍ່​ໂຄ້ນ​ລົ້ມ​ໂຈມ​ຕີ​ກັນ ພ້ອມ​ທັງ​ເຮັດ​ໃຫ້​ບັນຍາກາດ ການ​ດຳ​ເນີນ​ຊິວິດ​ການ​ເມືອງ​ປັບປຸງ​ປົວ​ແປງ​ພັກ​ໃນ​ຄັ້ງ​ນີ້​ດຳ​ເນີນ​ໄປ​ດ້ວຍ​ຄວາມ​ຄິດ​ສ້າງສັນ ​ເຂົ້າ​ອົກ​ເຂົ້າ​ໃຈ​ເຊິ່ງກັນ ​ແລະ ກັນ ​ເພື່ອ​ພ້ອມ​ກັນ​ເຮັດສຳ​ເລັດໜ້າ​ທີ່​ວຽກ​ງານ​ທີ່​ພັກ-ລັດ  ​ແລະ ປະຊາຊົນ​ມອບ​ໝາຍ​ໃຫ້​ເທືອ​ລະ​ກ້າວ.

 


Additional information