ກະຊວງໂຍທາທິການ ແລະ ຂົນສົ່ງ ຈັດປາຖະກະຖາວັນເຊັນສົນທິສັນຍາມິດຕະພາບ ແລະ ການຮ່ວມມືລາວ-ຫວຽດນາມ ຄົບຮອບ 40 ປີ ແລະ ວັນສ້າງຕັ້ງສາຍພົວພັນການທູດລາວ-ຫວຽດນາມ ຄົບຮອບ 55 ປີ ແລະ ວັນສ້າງຕັ້ງອາຊຽນຄົບຮອບ 55 ປີ.

  ກະຊວງໂຍທາທິການ ແລະ ຂົນສົ່ງ ໄດ້ຈັດປາຖະກະຖາວັນເຊັນສົນທິສັນຍາມິດຕະພາບ ແລະ ການຮ່ວມມືລາວ-ຫວຽດນາມ ຄົບຮອບ 40 ປີ ແລະ ວັນສ້າງຕັ້ງສາຍພົວພັນການທູດລາວ-ຫວຽດນາມ ຄົບຮອບ 55 ປີ ແລະ ວັນສ້າງຕັ້ງອາຊຽນຄົບຮອບ 55 ປີ ໃນວັນທີ 31 ສິງຫາ 2017, ທີ່ກະຊວງ ຍທຂ ໃຫ້ກຽດປາຖະກະຖາຂອງ ທ່ານ ສົມສະຫວາດ ເລັ່ງສະຫວັດ ທີ່ປຶກສາຄະນະບໍລິຫານງານສູນກາງພັກ ຊື່ງມີ່ ທ່ານ ປອ ສັນຕິສຸກ ສິມມະລາວົງ ຄະນະ​ປະຈຳ​ພັກ​ກະຊວງ, ຮອງລັດທະມົນຕີກະຊວງ ຍທຂ, ບັນດາສະຫາຍຄະນະພັກກະຊວງ, ຜູ້​ຊ່ວຍລັດຖະມົນຕີ, ທີ່​ປຶກສາ​ລັດຖະມົນຕີ, ບັນດາສະຫາຍເລຂາ, ຮອງ​ເລຂາ, ກຳມະການ​ຄະນະ​ພັກຮາກຖານ ​ແລະ ​ເລຂາ, ຮອງ​ເລຂາ ໜ່ວຍ​ພັກ​ທີ່​ຂື້ນ​ກັບ​ຄະນະ​ພັກ​ຮາກ​ຖານ; ບັນດາສະຫາຍເລຂາ, ຮອງ​ເລຂາ, ກຳມະການ​ໜ່ວຍພັກຮາກຖານ, ບັນດາ​ຫົວໜ້າ​ກົມ, ຮອງ​ຫົວໜ້າກົມ ,ຫ້ອງການ, ສະ​ຖາ​ບັນ; ຫົວໜ້າ, ຮອງ​ຫົວໜ້າ ກອງ​ວິຊາ​ການ, ​ໂຄງການ​ທາງ​ລົດ​ໄຟ​ລາວ-ຈີນ, ຜູ້ອຳນວຍການ​ພ້ອມ​ດ້ວຍ​ຄະນະ​ອຳນວຍ​ການ​ລັດ​ວິ​ສາ​ຫະກິດ​ອ້ອມ​ຂ້າງ​ກະຊວງ; ປະທານ, ຮອງ​ປະທານ; ​ເລຂາ, ຮອງ​ເລຂາ ພ້ອມ​ດ້ວຍ​ຄະນະຂອງ​ສາມ​ອົງການ​ຈັດ​ຕັ້ງ​ມະຫາຊົນ​ຂັ້ນ​ກະຊວງ, ພະນັກງານ​ຂັ້ນ​ຫົວໜ້າ​ພະ​ແນ​ກຂອງ​ກົມ ເຂົ້າຮ່ວມ.

 ໃນການປາຖະກະຖາຄັ້ງນີ້, ທ່ານ ສົມສະຫວາດ ເລັ່ງສະຫວັດ ໄດ້ຍົກໃຫ້ເຫັນສະພາບແວດລ້ອມແຫ່ງ ການກຳເນີດ ແລະ ການເຕີບໃຫ່ຍຂະຫຍາຍຕົວຂອງຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ລາວ-ຫວຽດນາມ ຊື່ງສອງປະເທດເປັນປະເທດບ້ານໃກ້ເຮືອນຄຽງ, ມີຊາຍແດນຮ່ວມກັນຍາວ 2​.000 ກວ່າກິໂລແມັດ ພ້ອມກັນ ອີງຫຼັງໃສ່ສາຍພູຫຼວງ ພ້ອມກັນຊົມໃຊ້ແມ່ນໍ້າລຳເຊ, ພູຜາປ່າດົງ, ດິນດອນຕອນຫຍ້າ ເພື່ອດຳລົງຊີວິດ ແລະ ດຳເນີນການຕໍ່ສູ້ຕ້ານສັດຕູຜູ້ຮຸກຮານ. ປະຊາຊົນ 2 ຊາດ ລາວ-ຫວຽດນາມ ມີມູນເຊື້ອໄປມາຫາສູ່ແລກປ່ຽນສິນຄ້າ, ແລກປ່ຽນວັດທະນາທຳນຳກັນຢູ່ຫຼາຍທ້ອງຖິ່ນ, ປະຊາຊົນ 2 ຊາດມີມູນເຊື້ອຊ່ວຍເຫຼືອຊື່ງກັນ ແລະ ກັນ ມາເປັນພັນໆປີ ໃນການກໍ່ຕັ້ງ ແລະ ປົກປັກຮັກສາປະເທດຊາດຂອງໃຜລາວ. ນອກຈາກນີ້ຍັງຍົກໃຫ້ເຫັນໝາກຜົນອັນພົ້ນເດັ່ນຂອງການພົວພົນມິດຕະພາບ ແລະ ການຮ່ວມມືຮອບດ້ານ ລະຫວ່າງ ລາວ-ຫວຽດນາມ ແລະ ການສຶບຕໍ່ເສີມຂະຫຍາຍ ສາຍພົວພັນມິດຕະພາບອັນຍິ່ງໃຫ່ຍຄວາມສາມັກຄີພິເສດ ແລະ ການຮ່ວມມືຮອບດ້ານລະຫວ່າງ ລາວ-ຫວຽກນາມ.

 ພ້ອມດຽວກັນນີ້ຍັງຍົກໃຫ້ເຫັນປະຫວັດຄວາມເປັນມາຂອງວັນສ້າງຕັ້ງອາຊຽນຄວາມໝາຍຄວາມສຳຄັນ,ຈຸດປະສົງຂອງອາຊຽນ ຊື່ງສະມາຄົມປະຊາຊາດອາຊີຕາເວັນອອກສ່ຽງໃຕ້ (ອາຊຽນ) ເປັນອົງການລະຫວ່າງປະເທດຂົງເຂດຕາເວັນອອກສ່ຽງໃຕ້ ອາຊຽນໄດ້ຮັບການສ້າງຕັ້ງຂື້ນໃນວັນທີ 8 ສິງຫາ ປີ 1967 ໂດຍທຳອິດ ມີ 5 ປະເທດຄື: ອິນໂດເນເຊຍ, ມະເລເຊຍ, ຟີລິບປິນ, ສິງກະໂປ ແລະ ໄທ, ປັດຈຸບັນອາຊຽນມີທັງໝົດ 10 ປະເທດໂດຍມີ 5 ປະເທດເຂົ້າຮ່ວມຕື່ມອີກຄື: ບຣູໄນ, ຫວຽດນາມ, ລາວ, ກຳປູເຈຍ ແລະ ມຽນມາ.

Additional information