ກະຊວງ ຍທຂ ເຜີຍແຜ່ຜົນສຳເລັດ ກອງປະຊຸມສະໄໝສາມັນ ເທື່ອທີ 03 ຂອງສະພາແຫ່ງຊາດ ຊຸດທີ VIII ແລະ ສະພາປະຊາຊົນນະຄອນຫຼວງວຽງຈັນ ຊຸດທີ I

 

  ໃນຕອນເຊົ້າວັນທີ 6/9/2017 ຢູ່ທີ່ຫ້ອງປະຊຸມໃຫຍ່ຂອງກະຊວງ ໂຍທາທິການ ແລະ ຂົນສົ່ງ ໄດ້ມີພິທີ ພົບປະຂອງສະມາຊິກສະພາແຫ່ງຊາດ ຊຸດທີ VIII ປະຈຳເຂດເລືອກຕັ້ງທີ 1 ນະຄອນຫລວງວຽງຈັນ ນຳໂດຍ ທ່ານ ປອ ໄຊສົມພອນ ພົມວິຫານ, ກຳມະການກົມການເມືອງສູນກາງພັກ, ປະທານສູນກາງ ແນວລາວ ສ້າງຊາດ ພ້ອມດ້ວຍຄະນະຈຳນວນ 4 ທ່ານ ໄດ້ມາພົບປະໂອ້ລົມພະນັກງານຫລັກແຫລ່ງ ຂອງກະຊວງ ໂຍທາທິການ ແລະ ຂົນສົ່ງ. ເປັນກຽດເຂົ້າຮ່ວມໃນພິທີດັ່ງກ່າວ ມີທ່ານ ປອ ບຸນຈັນ ສິນທະວົງ, ກຳມະການສູນກາງພັກ, ລັດຖະມົນຕີກະຊວງໂຍທາທິການ ແລະ ຂົນສົ່ງ, ມີບັນດາທ່ານຮອງລັດຖະມົນຕີ, ທ່ານ ຜູ້ຊ່ວຍລັດຖະມົນຕີ, ທ່ານ ທີ່ປຶກສາລັດຖະມົນຕີ, ບັນດາທ່ານຫົວໜ້າກົມ, ຮອງກົມ ແລະ ບັນດາທ່ານຫົວໜ້າພະແນກ, ຮອງຫົວໜ້າພະແນກ ພ້ອມດ້ວຍພະນັກງານວິຊາການ ຂອງກະຊວງ ຍທຂ ເຂົ້າຮ່ວມທັງໝົດ 171 ທ່ານ, ຍິງ 41 ທ່ານ.

ໃນພິທີດັ່ງກ່າວ ບັນດາທ່ານສະມາຊິກສະພາແຫ່ງຊາດ ຊຸດທີ VIII ປະຈຳເຂດເລືອກຕັ້ງທີ 1 ນະຄອນ ຫລວງວຽງຈັນ ໄດ້ພັດປ່ຽນກັນຂຶ້ນເຜີຍແຜ່ຜົນສຳເລັດ ຂອງກອງປະຊຸມສະໄໝສາມັນ ເທື່ອທີ 03 ຂອງສະພາແຫ່ງຊາດ ຊຸດທີ VIII ແລະ ສະພາປະຊາຊົນ ນະຄອນຫຼວງວຽງຈັນ ຊຸດທີ I ເຊິ່ງບັນດາ ທ່ານໄດ້ຍົກໃຫ້ເຫັນເຖິ່ງຄວາມສຳຄັນໃນການພັດທະນາລະບົບໂຄງລ່າງພື້ນຖານທີ່ຢູ່ໃນຂອບເຂດຄວາມຮັບຜິດຊອບຂອງກະຊວງ ຍທຂ ໂດຍສະເພາະແມ່ນລະບົບເສັ້ນທາງຄົມມະນາຄົມໃນຂອບ ເຂດທົ່ວປະເທດ, ມີເສັ້ນທາງບົກ, ທາງ ລົດໄຟ, ທາງນ້ຳ ແລະ ທາງອາກາດ.

ໃນໂອກາດນີ້ ທ່ານ ລັດຖະມົນຕີ ປອ ບຸນຈັນ ສິນທະວົງ, ໄດ້ຕາງໜ້າໃຫ້ ກະຊວງ ຍທຂ ລາຍງານ ສະພາບການພັດທະນາຂະແໜງ ຍທຂ ໃນໄລຍະຜ່ານມາໂດຍຫຍໍ້ ໃຫ້ບັນດາທ່ານ ສະມາຊິກ ສະພາ ແຫ່ງຊາດໄດ້ຮັບຊາບ, ໃນນີ້ ທ່ານໄດ້ສະເໜີແຜນຈຸດສຸມ 6 ເດືອນທ້າຍປີ 2017, ພ້ອມນີ້ທ່ານ ກໍໄດ້ສະເໜີ ຄະນະສະມາຊິກສະພາແຫ່ງຊາດ ຊຸກຍູ້ເພີ່ມງົບປະມານເພື່ອແກ້ໄຂໜີ້ສິນຄົງຄ້າງ ທີ່ຢູ່ໃນແຜນຂອງສະພາ ທີ່ສຳເລັດແລ້ວ ແລະ ໂຄງການທີ່ເກີດຈາກໄພພິບັດ ທີ່ລັດຖະບານຮັບຜິດຊອບ ເປັນຕົ້ນແມ່ນ ທາງ ຫລວງທ້ອງຖິ່ນ ແລະ ບັນດາສຳນັກງານຫ້ອງການຂອງບັນດາກະຊວງ ແລະ ແຂວງຄຸ້ມຄອງ.

 

Additional information