ກະຊວງ ໂຍທາທິການ ແລະ ຂົນສົ່ງ ປຶກສາຫາລື ແຜນແມ່ບົດການຂົນສົ່ງທາງນ້ຳ.

ໃນຕອນເຊົ້າຂອງວັນທີ 13/10/2017 ຢູ່ທີ່ຫ້ອງປະຊຸມໃຫຍ່ກະຊວງ ຍທຂ, ກົມທາງນ້ຳໄດ້ຈັດກອງປະຊຸມ ປຶກສາຫາລື ແຜນແມ່ບົດການຂົນສົ່ງທາງນ້ຳໃນພາກພື້ນອ່າງແມ່ນ້ຳຂອງ, ໃຫ້ກຽດເປັນປະທານໂດຍ ທ່ານ ວຽງສະຫວັດ ສີພັນດອນ, ຮອງລັດຖະມົນຕີກະຊວງໂຍທາທິການ ແລະ ຂົນສົ່ງ, ມີບັນດາທ່ານ ຜູ້ຊ່ວຍ ລັດຖະມົນຕີ, ທ່ານທີ່ປຶກສາລັດຖະມົນຕີ, ທ່ານຮອງຫົວໜ້າຫ້ອງການ, ບັນດາທ່ານຫົວໜ້າກົມຮອງກົມທີ່ ມາຈາກ ກົມແຜນການ ແລະ ການຮ່ວມມື, ຈາກກົມນິຕິກຳ. ບັນດາທ່ານຫົວໜ້າ ຫ້ອງວ່າການແຂວງ ແລະ ຫົວໜ້າພະແນກ ຍທຂ ແຂວງ ທີ່ມາຈາກແຂວງຫລວງນ້ຳທາ, ແຂວງບໍ່ແກ້ວ, ແຂວງ ຫລວງ ພະບາງ, ແຂວງບໍລິຄຳໄຊ, ແຂວງຈຳປາສັກ ແລະ ນະຄອນຫລວງວຽງຈັນ ເຂົ້າຮ່ວມ. ພ້ອມນີ້ຍັງມີບັນ ດາທ່ານແຂກທີ່ມີກຽດທີ່ຖືກເຊີນມາຈາກກະຊວງຊັບພະຍາກອນທຳມະຊາດ ແລະ ສິ່ງແວດ ລ້ອມ, ກະຊວງ ພະລັງງານ ແລະ ບໍ່ແຮ່, ກະຊວງການຕ່າງປະເທດ, ກະຊວງວັດທະນະທຳ ແລະ ທ່ອງທ່ຽວ, ກະຊວງ ແຜນການ ແລະການລົງທຶນ, ກະຊວງປ້ອງກັນປະເທດ ແລະ  ກະຊວງປ້ອງກັນຄວາມສະຫງົບເຂົ້າຮ່ວມ ທັງໝົດ 45 ທ່ານ.

ການພັດທະນາການເດີນເຮືອລະຫວ່າງປະເທດຕາມລຳແມ່ນ້ຳຂອງແມ່ນມີຄວາມສຳຄັນຫລາຍ, ກອງເລຂາ ຄະນະກຳມາທິການແມ່ນ້ຳຂອງສາກົນ ໄດ້ສົມທົບກັບບັນດາປະເທດສະມະຊິກແມ່ນ້ຳຂອງຕອນລຸ່ມ ປະ ກອບມີ ສປ ຈີນ, ສສ ຫວຽດນາມ, ສປປ ລາວ, ສະຫະພາບມຽນມາ, ກຳປູເຈັຍ ແລະ ໄທ ໄດ້ພ້ອມ ກັນສ້າງແຜນແມ່ບົດການເດີນເຮືອໃນພາກພື້ນອ່າງແມ່ນ້ຳຂອງ ເພື່ອສົ່ງເສີມການຂົນສົ່ງສິນຄ້າ, ການ ຄົມ ມະນາຄົມທາງນ້ຳ, ການຮ່ວມມືລະຫວ່າງປະເທດໃຫ້ມີຄວາມເຂັ້ມແຂງ ໄປຄຽງຄູ່ກັນກັບການພັດທະ ນາ ການຂົນສົ່ງຂະແໜງອື່ນໆ. ເຮັດໃຫ້ແມ່ນ້ຳຂອງເປັນແລວທາງເສດຖະກິດການຂົນສົ່ງ ຂອງອານຸ ພາກພື້ນ ເຊື່ອມຈອດກັບຮູບການຂົນສົ່ງປະເພດອື່ນ. ໃນໄລຍະຜ່ານມາຮ່າງແຜນແມ່ບົດດັ່ງກ່າວນີ້ແມ່ນ ໄດ້ຖືກຮັບຮອງເອົາຈາກ 3 ປະເທດແລ້ວເຊັ່ນ: ສສ ຫວຽດນາມ, ກຳປູເຈັຍ ແລະ ໄທ. ກອງປະຊຸມ ຈະໄດ້ພ້ອມກັນຮັບຟັງການລາຍງານໂດຍຫຍໍ້ ກ່ຽວກັບ ຜົນການຄົ້ນຄ້ວາຮ່າງແຜນແມ່ບົດການຂົນສົ່ງ ທາງນ້ຳໃນພາກພື້ນອ່າງແມ່ນ້ຳຂອງ, ແຜນຄາດຄະເນໄລຍະ ສັ້ນ, ໄລຍະຍາວ ແລະ ໂຄງການຂ້າມຜ່ານ ຊາຍແດນ, ຈາກນັ້ນກອງປະຊຸມຈະໄດ້ພ້ອມກັນປະກອບ ຄຳຄິດເຫັນເພື່ອໃຫ້ການຄົ້ນຄ້ວາ ດັ່ງກ່າວຄົບ ຖ້ວນສົມບູນ ແລະ ເປັນປະໂຫຍດຕໍ່ການຮ່ວມມື. ກອງປະຊຸມ ໄດ້ປິດລົງໃນເວລາ 16 ໂມງ 00 ຂອງ ວັນດຽວກັນ.

.

 

 

 

Additional information