ພິທີເຊັນບົດບັນທຶກຄວາມເຂົ້າໃຈ (MOU)

ໃນຕອນບ່າຍ ວັນທີ 3 ພະຈິກ 2017 ຢູ່ທີ່ຫ້ອງປະຊຸມ ກົມຂົນສົ່ງ ໄດ້ມີພິທີເຊັນບົດບັນທຶກຄວາມເຂົ້າໃຈ (MOU) ເພື່ອສຶກສາຄວາມເປັນໄປໄດ້ໃນການສ້າງທ່າບົກ (Dry port) ຢູ່ເມືອງທ່ານແຂກ, ແຂວງຄຳມ່ວນ ລະຫວ່າງ ກົມຂົນສົ່ງ ກັບ ບໍລິສັດ ຂົນສົ່ງສາກົນ ຈຳກັດ ໃຫ້ກຽດເຂົ້າຮ່ວມໃນພິທີມີ ທ່ານ ວຽງສະຫວັດ ສີພັນດອນ ຮອງລັດຖະມົນຕີ ກະຊວງ ຍທຂ ຕາງໜ້າໃຫ້ກະຊວງ ໂຍທາທິການ ແລະ ຂົນສົ່ງ ໂດຍ ທ່ານ ປອ. ບຸນຕາ ອ່ອນນາວົງ ຮອງກົມຂົນສົ່ງ ແລະ ຕາງໜ້າໃຫ້ ບໍລິສັດຂົນສົ່ງສາກົນ ຈຳກັດ ໂດຍ ທ່ານ ນາງ ທູນສະຫວັນ ສີຈັນທອງທິບ ອຳນວຍການ ບໍລິສັດ ຂົນສົ່ງສາກົນ ຈຳກັດ ພ້ອມທັງພະນັກງານທັງສອງ ຝ່າຍເຂົ້າຮ່ວມ.

ບົດບັນທຶກຄວາມເຂົ້າໃຈການຮ່ວມມືສະບັບນີ້ຈະໄດ້ດຳເນີນໄປເປັນເວລາ 18 ເດືອນ ເຊິ່ງທັງສອງຝ່າຍ ເຫັນດີ ເປັນເອກະພາບກັນ. ເພື່ອສຶກສາຄວາມເປັນໄປໄດ້ ໃນການພັດທະນາທ່າບົກ ຢູ່ເມືອງທ່າແຂກ, ແຂວງຄຳມ່ວນ ຊຶ່ງແມ່ນ 1 ໃນ 9 ຈຸດ ທ່າບົກທີ່ນອນຢູ່ໃນສົນທິສັນຍາສະຫະປະຊາຊາດ ວ່າດ້ວຍທ່າບົກ (UNESCAP Intergovernmental Agreement on Dry Port), ເພື່ອປະກອບສ່ວນເຂົ້າໃນການຈັດ ຕັ້ງປະຕິບັດ ຍຸດທະສາດ ຂອງຂະແໜງ ໂຍທາທິການ ແລະ ຂົນສົ່ງ ໃຫ້ເປັນປາຍແຫຼມ, ມີຈຸດສຸມ, ປະສິດ ທິຜົນສູງ, ທັນສະໄໝ, ປອດໄພ, ເຊື່ອມໂຍງ-ເຊື່ອມຈອດ ແລະ ຍືນຍົງ ແລະ ປະຕິບັດນະໂຍບາຍ ຂອງ ສປປ ລາວ ໃນການຫັນ ສປປ ລາວ ຈາກປະເທດທີ່ບໍ່ມີຊາຍແດນຕິດກັບທະເລໃຫ້ເປັນປະເທດ ທາງຜ່ານດ້ານຄົມມະນາຄົມ-ຂົນສົ່ງ ຂອງພາກພື້ນ ແລະ ສາກົນ.

Additional information