ກອງປະຊຸມ ເຜີຍແຜ່ເນື້ອໃນກົດໝາຍ ແລະ ນິຕິກຳໃຕ້ກົດໝາຍ ຂອງຂະແໜງການ ໂຍທາທິການ ແລະ ຂົນສົ່ງ

ໃນຕອນເຊົ້າວັນທີ 13 ພະຈິກ 2017 ຢູ່ທີ່ຫ້ອງວ່າການແຂວງ ບໍລິຄຳໄຊ ໄດ້ເປີດກອງປະຊຸມ ເຜີຍແຜ່ ເນື້ອໃນກົດໝາຍ ແລະ ນິຕິກຳໃຕ້ກົດໝາຍ ຂອງຂະແໜງການ ຍທຂ ໂດຍການເປັນປະທານຮ່ວມ ມີທ່ານ ສຈ ປອ ບຸນເຫລື່ອມ ສີສຸລາດ ຜູ້ຊ່ວຍລັດຖະມົນຕີ ກະຊວງ ຍທຂ, ທ່ານ ພັນເອກ ຈວງຈັນ ລາດຊະວົງ ຄະນະປະຈຳພັກແຂວງ ຫົວໜ້າກອງບັນຊາການທະຫານ ແຂວງບໍລິຄຳໄຊ. ຜູ້ເຂົ້າຮ່ວມມີຫົວ ໜ້າກົມ, ຮອງກົມ, ຫົວໜ້າພະແນກທີ່ມາຈາກ ກະຊວງ ຍທຂ, ມີບັນດາພະແນກ ຍທຂ ແຂວງ, ພະແນກ ຍທຂ ເມືອງ, ແລະ ກະຊວງ ກ່ຽວຂ້ອງເຂົ້າຮ່ວມທັງໝົດ 125 ທ່ານ, ກອງປະຊຸມໄດ້ດຳເນີນ ແຕ່ວັນທີ 13-17 ພະຈິກ 2017 ລວມ 5 ວັນ.

ກອງປະຊຸມໄດ້ຮັບຟັງການເຜີຍແຜ່ເນື້ອໃນກົດໝາຍ ແລະ ນິຕິກຳໃຕ້ກົດໝາຍ ຂອງຂະແໜງການໂຍທາ ທິການ ແລະ ຂົນສົ່ງ  ເຊິ່ງມີບັນດາເອກະສານຕ່າງໆ ຄື ດຳລັດວ່າດ້ວຍການຈັດຕັ້ງ ແລະ ການເຄື່ອນໄຫວ, ບົດຮຽນໃນການສ້າງກົດໝາຍ ແລະ ນິຕິກຳໃຕ້ກົດໝາຍ, ເນື້ອໃນກົດໝາຍວ່າດ້ວຍທາງຫຼວງ, ກົດໝາຍ ວ່າດ້ວຍການຂົນສົ່ງທາງບົກ, ສັນຍາວ່າດ້ວຍການອຳນວຍຄວາມສະດວກໃຫ້ແກ່ຍານພາຫະນະ ຂົນສົ່ງ ທາງບົກ ລະຫວ່າງລາວ-ຫວຽດນາມ, ສັນຍາວ່າດ້ວຍການຂົນສົ່ງທາງບົກ ລະຫວ່າງລາວ-ໄທ, ກົດໝາຍວ່າ ດ້ວຍການຂົນສົ່ງຫຼາຍຮູບແບບ, ກົດໝາຍວ່າດ້ວຍການຈະລາຈອນທາງບົກ. ພ້ອມກັນນີ້ຜູ້ເຂົ້າຮ່ວມຍັງ ໄດ້້ປຶກສາຫາລື ປະກອບຄຳຄິດຄຳເຫັນ ສົນທະນາຖາມຕອບຂໍ້ຂ້ອງໃຈ.

ຜ່ານການຮັບຟັງ ແລະ ປະກອບຄຳຄິດຄຳເຫັນ ໄດ້ເຮັດໃຫ້ບັນດາຜູ້ເຂົ້າຮ່ວມ ເຂົ້າໃຈໃນລະບຽບກົດໝາຍ ເພີ່ມຂຶ້ນ ແລະ ນຳເອົາເນື້ອໃນຈິດໃຈຂອງກອງປະຊຸມ ໄປເຜີຍແຜ່ຜັນຂະຫຍາຍໃຫ້ແກ່ສຳນັກງານ ອົງການ ທີ່ຕົນສັງກັດຢູ່ ແລະ ປະຊາຊົນໃນທ້ອງຖິ່ນໄດ້ເຂົ້າໃຈໃນລະບຽບກົດໝາຍຫຼາຍຂຶ້ນ ເພື່ອເພີ່ມທະວີຄວາມ ເປັນເຈົ້າການໃນການປົກປັກຮັກສາເຂດສະຫງວນຂອງທາງຫຼວງປະເພດຕ່າງໆ ແລະ ການນຳໃຊ້ທີ່ດິນຜັງ ເມືອງ ໃຫ້ສອດຄ່ອງກັບລະບຽບກົດໝາຍຢ່າງເຂັ້ມງວດ. 

 

 

 

 

 

Additional information