ກະຊວງ ຍທຂ ເປີດກອງປະຊຸມປະກອບຄໍາຄິດຄໍາເຫັນໃສ່ປື້ມຄູ່ມື ການອອກແບບຂົວທາງ (ສະບັບປັບປຸງ) ແລະ ປື້ມກຳນົດໝາຍເຕັກນິກ (ສະບັບປັບປຸງ)

    ໃນວັນທີ 31 ມັງກອນ 2018 ຢູ່ທີ່ຫ້ອງປະຊຸມໃຫຍ່ ກະຊວງໂຍທາທິການ ແລະ ຂົນສົ່ງ ໄດ້ຈັດກອງປະຊຸມ ປຶກສາຫາລືເພື່ອປະກອບຄຳຄິດຄຳເຫັນໃສ່ປື້ມຄູ່ມື ການອອແບບຂົວທາງ(ສະບັບປັບປຸງ) ແລະ ປື້ມກຳນົດໝາຍເຕັກ ນິກ(ສະບັບປັບປຸງ) ກອງປະຊຸມຄັ້ງນີ້ໃຫ້ກຽດເປັນປະທານໂດຍ ທ່ານ ວຽງສະຫວັດ ສີພັນດອນ ຄະນະພັກ, ຮອງ ລັດຖະມົນຕີກະຊວງ ຍທຂ, ມີບັນດາທ່ານຫົວໜ້າກົມ, ຮອງຫົວໜ້າກົມ ອ້ອມຂ້າງກະຊວງ, ບັນດາທ່ານຫົວໜ້າ ພະແນກ, ຮອງຫົວໜ້າພະແນກ ຍທຂ ປະຈຳແຂວງ ທົ່ວປະເທດ ແລະ ຊ່ຽວຊານປະຈຳຂະແໜງຂົວທາງເຂົ້າຮ່ວມ.

      ການປັບປຸງປື້ມຄູ່ມືການອອກແບບຂົວທາງ ແລະ ປື້ມກຳນົດໝາຍເຕັກນິກ ສະບັບປັບປຸງຄືນໃໝ່ນີ້ ແມ່ນອີງໃສ່ ພື້ນຖານກົດໝາຍທາງຫລວງຂອງລາວ ແລະຫລັກການສາກົນ ໂດຍສະເພາະແມ່ນໄດ້ຄົ້ນຄ້ວາ ຈາກບັນດາເອກະສານ ທີ່ກ່ຽວກັບວຽກຂົວທາງ ຂອງປະເທດຍີ່ປຸ່ນ, ຫວຽດນາມ, ກຳປູເຈຍ, ມຽນມາ, ປະເທດໄທ ແລະ ປະເທດອື່ນໆ ເພື່ອເປັນບ່ອນອີງໃນການກຳນົດມາດຕະຖານເຕັກນິກຂົວທາງ ແລະ ກຳນົດໝາຍເຕັກນິກ ຂອງ ສປປ ລາວ ໃຫ້ ສອດຄ່ອງທັງມີລັກສະນະພິເສດແທດເໝາະກັບເງື່ອນໄຂຕົວຈິງຂອງບ້ານເຮົາ ແລະ ທັງເປັນບ່ອນອີງໃຫ້ແກ່ບັນດາ ອົງການຈັດຕັ້ງສາກົນ ທັງພາກລັດ ແລະ ເອກະຊົນ, ທັງພາຍໃນ ແລະຕ່າງປະເທດ ທີ່ເຮັດໜ້າທີ່ສຶກສາຄົ້ນຄວ້າ, ສຳຫລວດອອກແບບ ວາງແຜນກໍ່ສ້າງ ແລະ ສ້ອມແປງ ພ້ອມທັງຄວບຄຸມກວດກາເຕັກນິກ ບັນດາກິດຈະການກໍ່ສ້າງ ເສັ້ນທາງຢູ່ປະເທດເຮົາ.

      ທ່ານປະທານກອງປະຊຸມ ໄດ້ກ່າວວ່າ ກ່ອນປື້ມຄູ່ມືການອອກແບບຂົວທາງ ແລະ ປື້ມກຳນົດ ໝາຍເຕັກນິກ ສະບັບນີ້ ຈະມີຄວາມສຳຄັນ ແລະ ເປັນປະໂຫຍດໃຫ້ແກ່ວຽກງານສຳຫລວດ-ອອແບບ, ການວາງແຜນໃນການຄັດ ເລືອກແລວທາງ ແລະ ລວມໄປເຖິງການຕິດຕາມຄວບຄຸມງານໃນພາກສະໜາມ ກໍ່ສ້າງນັ້ນ ບັນດາທ່ານຜູ້ເຂົ້າຮ່ວມ ກອງປະຊຸມ ຈົ່ງພ້ອມກັນເຊີດຊູສະຕິເປັນເຈົ້າປະກອບຄຳຄິດເຫັນ, ຕໍ່ບັນຫາທີ່ຍັງຂາດ ຕົກບົກຜ່ອງ, ບາງຄຳສັບ ແລະ ປະໂຫຍກໃດທີ່ຍັງບໍ່ທັນແຈ້ງ ເພື່ອໃຫ້ປື້ມຄູ່ມື ແລະ ປື້ມກຳນົດໝາຍ ເຕັກນິກສະບັບນີ້ມີຄວາມສົມບູນ ເປັນບ່ອນອີງ ໃຫ້ແກ່ການ ຈັດຕັ້ງປະຕິບັດວຽກງານການກໍ່ສ້າງ ແລະ ສ້ອມແປງຂົວ-ທາງຢູ່ບ້ານເຮົາມີຄວາມເປັນເອກະພາບ ແລະ ມີມາດຕະຖານ.

ຮຽບຮຽງບົດຂ່າວໂດຍ: ວຽງຄອນ ວົງຄຳຈັນ

Additional information