ພິທີເຊັນສັນຍາໂຄງການສ້ອມແປງເສັ້ນທາງ ບ້ານນາພຶງ-ບ້ານນ້ຳໄຮ ເມືອງເຟືອງ, ແຂວງ ວຽງຈັນ ແລະ ໂຄງການກໍ່ສ້າງຂົວ ຢູ່ ບ້ານບຶງຕະຫຼຸງ, ແຂວງ ສະຫວັນນະເຂດ

ໃນຕອນບ່າຍເວລາ 15:30 ໂມງ ຂອງວັນທີ 16 ມີນາ 2018 ຢູ່ທີ່ຫ້ອງປະຊຸມກົມຂົນສົ່ງ, ກະຊວງໂຍທາທິການ ແລະ ຂົນສົ່ງ ໄດ້ມີພິທີເຊັນສັນຍາໂຄງການເສີມສ້າງຄວາມໝັ້ນຄົງຂອງມະນຸດຂັ້ນ ຮາກຖານ ຂອງລັດຖະບານ ແລະ ປະຊາຊົນຍີ່ປຸ່ນ ໂຄງການສ້ອມແປງເສັ້ນທາງ ບ້ານນາພຶງ-ບ້ານນ້ຳໄຮ ເມືອງເຟືອງ, ແຂວງ ວຽງຈັນ ແລະ ໂຄງການ ກໍ່ສ້າງຂົວ ຢູ່ ບ້ານບຶງຕະຫຼຸງ, ແຂວງ ສະຫວັນນະເຂດ ໃຫ້ກຽດເຂົ້າຮ່ວມໃນພິທີນຳໂດຍ ທ່ານ ປອ. ບຸນຈັນ ສິນທະວົງ ລັດຖະມົນຕີ ກະຊວງ ຍທຂ, ທ່ານ ທາເຄຊິ ຮິຄິຮາຣາ ເອກອັກຄະລັດຖະທູດຜູ້ມີອຳນາດເຕັມ ແຫ່ງ ປະເທດຍີ່ປຸ່ນ ປະຈຳ ສ ປປ ລາວ, ມີ ທ່ານ ບຸນແທນ ແກ້ວອຸໄທ, ຫົວໜ້າຫ້ອງການໂຍທາທິການ ແລະ ຂົນສົ່ງ ເມືອງເຟືອງ, ແຂວງ ວຽງຈັນ, ທ່ານ ພອນສະຫວັດ ລາດຈຳພອນ,​ ຫົວໜ້າຫ້ອງການໂຍທາທິການ ແລະ ຂົນສົ່ງ ເມືອງຈຳພອນ, ແຂວງສະຫວັນນະເຂດ, ມີທ່ານຫົວໜ້າຫ້ອງການ,​ ທ່ານຮອງຫົວໜ້າກົມຂົວທາງ ແລະ ພະນັກງານທີ່ກ່ຽວຂ້ອງທັງສອງ ຝ່າຍເຂົ້າຮ່ວມຈຳນວນ 14 ທ່ານ.

ໃນໄລຍະຜ່ານມາລັດຖະບານຍີ່ປຸ່ນ ໄດ້ໃຫ້ການຊ່ວຍເຫຼືອປັບປຸງພຶ້ນຖານໂຄງລ່າງໃຫ້ ແກ່ຊຸມຊົນຂະໜາດນ້ອຍມາ ແລ້ວ 38 ໂຄງການ ໂດຍເປັນການກໍ່ສ້າງທາງໃນໝູ່ບ້ານ 18 ເສັ້ນ ແລະ ຂົວຂ້າມແມ່ນ້ຳ 16 ແຫ່ງ ພາຍໃນໂຄງ ການ GGP, ໂຄງການສ້ອມແປງເສັ້ນທາງ ບ້ານນາພຶງ-ບ້ານນ້ຳໄຮ ເມືອງ ເຟືອງ, ແຂວງ ວຽງຈັນ ແລະ ໂຄງການກໍ່ສ້າງຂົວ ຢູ່ ບ້ານບຶງຕະຫຼຸງ, ແຂວງ ສະຫວັນນະເຂດ ກໍ່ເປັນອີກໂຄງການທີ່ ສຳຄັນໃນການພັດທະນາພື້ນຖານໂຄງລ່າງ ແລະ ການພັດທະນາເສດຖະກິດ-ສັງຄົມ, ການຄົມມະນາຄົມຂົນສົ່ງສິນຄ້າ,​ ການໄປມາຫາສູ່ມີຄວາມສະດວກສະບາຍ ວ່ອງໄວຂຶ້ນກວ່າເກົ່າ.

ພິທີໄດ້ດຳເນີນໄປແຕ່ເວລາ 15:30 ໂມງ ແລະ ໄດ້ປິດລົງໃນເວລາ 16:30 ໂມງ ຂອງວັນດຽວກັນ.

 

ກວດແກ້ໂດຍ ທ່ານ ແສງຈັນ ຫອມສີລາຮັກ

ຂຽນຂ່າວໂດຍ ທ່ານ ຈັນທະລາ ຂັນທະວີໄຊ

 

 

 

 

Additional information