ກະຊວງໂຍທາທິການ ແລະ ຂົນສົ່ງ ສະເຫລີມສະຫລອງປີໃໝ່ລາວ ພສ 2561

ໂດຍປະຕິບັດຕາມຮີດຄອງປະເພນີທີ່ປະຊາຊົນລາວບັນດາເຜົ່າພວກເຮົາເຄີຍໄດ້ປະຕິບັດກັນມາ, ໃນວັນທີ 12 ເມສາ 2018 ທີ່ຜ່ານມານີ້, ກະຊວງໂຍທາທິການ ແລະ ຂົນສົ່ງ ນຳໂດຍຄະນະພັກຄະນະນຳ ກະຊວງ ໄດ້ນຳພາ ພະນັກງານ-ລັດຖະກອນ ທັງຜູ້ຢູ່ໃນກະສຽນປະຕິບັດໜ້າທີ່ວຽກງານ ແລະ ຜູ້ກະສຽນຮັບບຳນານ ເຂົ້າຮ່ວມ ສະເຫລີມສະຫລອງປີໃໝ່ລາວ ພສ 2561 ຢູ່ທີ່ຫ້ອງປະຊຸມໃຫຍ່ຂອງກະຊວງຢ່າງເບີກບານ ມ່ວນຊື່ນ.

ເພື່ອສະແດງເຖິງຄວາມເຄົາລົບນັບຖືຮີດຄອງປະເພນີອັນດີງາມຂອງຊາດ, ຄວາມກະຕັນຍູຮູ້ບຸນຄຸນ ຕໍ່ພະນັກງານ ອາວຸດໂສບຳນານກໍຄືພະນັກງານການນຳຂອງກະຊວງ ແລະ ເພື່ອຮັດແໜ້ນຄວາມສາມັກຄີ, ຄວາມຮັກຄວາມແພງ ລະຫວ່າງພະນັກງານໃນທົ່ວຂະແໜງ ຍທຂ ດ້ວຍກັນ, ໃນຕອນເຊົ້າຂອງວັນທີ 12 ເມສາ 2018 ເວລາ 06 ໂມງ 30 ຄະນະພັກຄະນະນຳ ໂດຍແມ່ນ ທ່ານ ບຸນຈັນ ສິນທະວົງ, ລັດຖະມົນຕີ ກະຊວງ ຍທຂ ໄດ້ນຳພາຄອບຄົວການນຳ ຂອງກະຊວງ ກໍຄືຄອບຄົວພະນັກງານ ອາວຸດໂສບຳນານ ແລະ ພະນັກງານລັດຖະກອນພາຍໃນຂະແໜງການໂຍທາ ທິການ ແລະ ຂົນສົ່ງ ທັງຢູ່ສູນກາງ ແລະ ທ້ອງຖິ່ນຜູ້ທີ່ ມີເງື່ອນໄຂ, ເຂົ້າຮ່ວມພິທີທາງສາດສະໜາຖະຫວາຍພາເຂົ້າ ແກ່ພະສົ່ງສຳມະເນນ ເພື່ອອຸດທິດຜົນ ບຸນສວ່ນກຸສົນໃຫ້ແກ່ເຈົ້າກຳນາຍເວນ, ເຈົ້າທີ່ ເຈົ້າຖານ ແລະ ຄະນະນຳ ຂອງກະຊວງຮຸ້ນກ່ອນທີ່ພວກເພິ່ນ ໄດ້ເສັຍຊີວິດໄປແລ້ວນັ້ນ. ຈາກນັ້ນ ກໍໄດ້ມີພິທີບາສີສູ່ຂັວນ ເພື່ອເປັນກຳລັງໃຈ ແລະ ເປັນສີລິມົງຄຸນແກ່ ພະນັກງານ-ລັດຖະກອນ, ອວຍພອນໄຊເຊິ່ງກັນ ແລະ ກັນ ຂອງບັນດາຄອບຄົວການນຳ, ເພີ່ມຄວາມຮັກ ຄວາມສາມັກຄີ, ພ້ອມທັງ ໃຫ້ອາໄພເຊິ່ງກັນ ແລະ ກັນ ຕໍ່ຈຸດອອ່ນຂໍ້ຄົງຄ້າງໃນປີທີ່ຜ່ານມາ. ຈາກນັ້ນ ໄດ້ເຂົ້າຮ່ວມພາເຂົ້າສາມັກຄີ, ຫົດສົ່ງເຊິ່ງກັນ ແລະ ກັນ ແລະ ພ້ອມກັນຟ້ອນລຳວົງລາວຢ່າງມ່ວນຊື່ນ.

Additional information