ກອງປະຊຸມໄລຍະທ້າຍ ໂຄງການຊ່ວຍເຫຼືອດ້ານວິຊາການ ເພື່ອກະກຽມໂຄງການພັດທະນາຕົວເມືອງຕາມແລວທາງ ອະນຸພາກພື້ນແມ່ນ້ຳຂອງ 4

ໃນຕອນເຊົ້າວັນທີ 10 ເມສາ 2018 ຢູ່ທີ່ໂຮງແຮມລັດສະໝີ ໄດ້ມີພິທີເປີດ ກອງປະຊຸມໄລຍະທ້າຍ ໂຄງການຊ່ວຍ ເຫຼືອດ້ານວິຊາການ ເພື່ອກະກຽມໂຄງການພັດທະນາຕົວເມືອງຕາມແລວທາງ ອະນຸພາກພື້ນແມ່ນ້ຳຂອງ 4 ພາຍ ໃຕ້ການເປັນປະທານ ຂອງທ່ານ ນາງ ວິໄລຄຳ ໂພສາລາດ ຮອງລັດຖະມົນຕີ ກະຊວງ ຍທຂ,  ທ່ານ ບຸນເສັງ ປະທຳມະວົງ ຮອງເຈົ້າແຂວງ ແຂວງບໍລິຄຳໄຊ, ທ່ານ ຊາຊັງ ເວີມິວຣີ ຫົວໜ້າຄະນະສະເພາະກິດ ທະນາຄານ ພັດທະນາອາຊີ, ທ່ານ ຄຳທະວີ  ໄທພະຈັນ ຫົວໜ້າກົມເຄຫາ-ຜັງເມືອງ, ບັນດາເຈົ້າເມືອງ, ຄະນະກົມ, ຄະນະ ພະແນກ, ຜູ້ຕາງໜ້າຈາກ ທະນາຄານພັດທະນາອາຊີ, ຄະນະຮັບຜິດຊອບໂຄງການ ແລະ ພາກສ່ວນກ່ຽວຂ້ອງ ທີ່ມາ ຈາກສູນກາງ ແລະ ທ້ອງຖິ່ນ ທັງໝົດ  50 ທ່ານ.

   ໂຄງການດັ່ງກ່າວນີ້, ແມ່ນເພື່ອສົ່ງເສີມ ແລະ ພັດທະນາບັນດາຕົວເມືອງທີ່ນອນໃນໂຄງການ ໃຫ້ສາມາດແຂ່ງ ຂັນກັບຕົວເມືອງອື່ນໆ ຢູ່ລຽບຕາມແລວທາງເສດຖະກິດອະນຸພາກພື້ນແມ່ນ້ຳຂອງ ເຊິ່ງຈະຊ່ວຍ ປັບປຸງການບໍລິຫານ ຕົວເມືອງໃຫ້ດີຂຶ້ນເຊັ່ນ: ພັດທະນາພື້ນຖານໂຄງລ່າງ ແລະ ສະພາບແວດລ້ອມຕົວເມືອງ ລະບົບເສັ້ນທາງ, ກັນ ເຈື່ອນ, ລະບົບລະບາຍນ້ຳ, ການຄຸ້ມຄອງຂີ້ເຫຍື້ອ ແລະ ສວນສາທາລະນະ, ລວມທັງການເສີມສ້າງຂີດຄວາມ ສາມາດ ແລະ ຄວາມເຂັ້ມແຂງໃຫ້ແກ່ທ້ອງຖິ່ນ.

      ໃນກອງປະຊຸມ ໄດ້ຮັບຟັງການສະເໜີກ່ຽວກັບ ຮ່າງບົດລາຍງານໄລຍະທ້າຍຂອງໂຄງການ,  ປຶກສາຫາ ລືແລກ ປ່ຽນ ແລະ ປະກອບຄຳຄິດຄຳເຫັນໃສ່ຮ່າງບົດລາຍງານ ໃຫ້ຖືກຕ້ອງສອດຄ່ອງ ແລະ ສາມາດຈັດຕັ້ງປະຕິບັດໄດ້, ບັນດາກິດຈະການຍ່ອຍທີ່ສະເໜີສຳລັບຕົວເມືອງເຊັ່ນ: ຮອງລະບາຍນ້ຳຝົນ ລະບົບບຳບັດນ້ຳເປື້ອນ ການກໍ່ສ້າງຕາ ຝັ່ງເຈື່ອນ ການປົກປັກຮັກສາມໍລະດົກຕົວເມືອງ, ການແຕ່ງຕັ້ງຄະນະກຳມະການຊີ້ນຳຂັ້ນສູນກາງ ແລະ ຂັ້ນແຂວງ ຂຶ້ນ, ການຍົກຍ້າຍສິ່ງກີດຂວາງ, ຄ່າບໍລິການ, ບົດບາດຍິງຊາຍ, ການສະໜອງຂໍ້ມູນເພີ່ມເຕີມອື່ນໆອີກ.

Additional information