ທ່ານຮອງລັດຖະມົນຕີ ເຂົ້າຮ່ວມກອງປະຊຸມການຮ່ວມມືເສດຖະກິດ ອ່າວເປີຍປູ້ ຄັ້ງທີ 10 ແລະ ກອງປະຊຸມການພັດທະນາແລວທາງເສດຖະກິດຈີນ ແລະແຫຼມອິນໂດຈີນ ຄັ້ງທີ 2

ກອງການ​ຮ່ວມ​ມື​ເສດ​ຖະ​ກິດ ​ອ່າວ​ເປີຍ​ປູ້ ​ຄັ້ງ​ທີ 10 ແລະ ກອງປະຊຸມການ​ພັດ​ທະ​ນາ​ແລວ​ທາງ​ເສດ​ຖະ​ກິດ​ຈີນ ​ແລະ ແຫຼມ​ອິນ​ໂດຈີນ​ ຄັ້ງ​ທີ 2, ຢູ່​ນະ​ຄອນ​ນານ​ນິງ, ​ເຂດປົກຄອງຕົນເອງກວາງ​ຊີ​ ສ​ປ ຈີນ​, ໃນ​ວັນ​ທີ 22-25 ພຶດ​ສະ​ພາ​ 2018 (The 10th Pan-Beibu Gulf Economic Cooperation Forum & The Second China-Indochina Peninsula Economic Cooperation Corridor Development Forum):  ກອງປະຊຸມດັ່ງກ່າວຈັດຂື້ນໂດຍການ ເປັນປະທ່ານຮ່ວມ ແລະ ເປັນຜູ້ກ່າວເປີດກອງປະຊຸມ ຂອງທ່ານ​ Ma Biao, ຮອງປະທານທີ່ປືກສາການເມືອງແຫ່ງ ຊາດ ສປ ຈີນ   ແລະ ທ່ານ Lu Xinshe, ເລຂາພັກເຂດປົກຄອງຕົນເອງເຜົ່າຈ່ວງກວາງຊີ , ນອກຈາກນັ້ນຍັງມີ, ທ່ານ ນາງ  Gao Yan, ຮອງລັດຖະມົນຕີກະຊວງການຄ້າ ສປ ຈີນ, ບັນດາທ່ານລັດຖະມົນຕີ, ຮອງລັດຖະມົນຕີ ແລະ ຜູ້ ຕາງໜ້າຈາກບັນດາປະເທດອາຊຽນ (ນອກຈາກປະເທດ ອິນໂດເນເຊຍ), ບັນດາປະເທດທີ່ນອນໃນໜຶື່ງແລວ, ໜື່ງ ເສັ້ນທາງຈໍານວນໜື່ງ ແລະ ແຂກທີ່ຖືກເຊີນຈາກພາກສ່ວນລັດ-ທຸລະກິດຈາກສູນກາງ ແລະ ທ້ອງຖິນຂອງ ສປ ຈີນ ແລະ ນັກວິຊາການຈາກ ບັນດາປະເທດທີ່ກ່າວມາຂ້າງເທິງ ລວມທັງໝົດປະມານ  500 ກວ່າທ່ານ.

ກອງປະຊຸມດັ່ງກ່າວແມ່ນກອງປະຊຸມເວທີປືກສາຫາລືລະດັບສູງ, ຈຸດປະສົງກອງປະຊຸມແມ່ນເພື່ອປືກສາຫາລືກ່ຽວກັບ ຂົ້ວການເຕີບໂຕໃໝ່ລະຫວ່າງຈີນ-ອາຊຽນ  ເພື່ອບັນລຸເປົ້າໝາຍການພັດທະນາແບບຍືນຍົງໃນເຂດອ່າວເປີຍປູ້, ສ້າງ ເວທີປືກສາຫາລືແບບປົກກະຕິເປີດກ້ວາງ ແລະມີປະສິດທິຜົນ ເພື່ອສົ່ງເສີມຄວາມເຂົ້າອົກເຂົ້າໃຈ  ແລະ ເຊື່ອໝັ້ນເຊິ່ງ ກັນ ແລະ ກັນ, ລົງເລິກການຄ້າ-ການລົງທຶນ, ຊຸກຍູ້ແລກປ່ຽນດ້ານເສດຖະກິດລະຫວ່າງບັນດາປະເທດໃນຂົງເຂດ, ພົວພັນຮ່ວມມືກັນພັດທະນາແບບຕ່າງຝ່າຍໄດ້ຮັບຜົນປະໂຫຍດ,  ສ້າງຮູບແບບການພັດທະນາໃໝ່ລະຫວ່າງຈີນ-ອາ ຊຽນ.  ກອງປະຊຸມໃນຄັ້ງນີ້ໄດ້ຮ່ວມກັນປືກສາຫາລືພາຍ ໃຕ້ຫົວຂໍ້ “ ແລວທາງຂົນສົ່ງທິດໃຕ້ ແລະ ເສັ້ນທາງການຄ້າ ສາກົນສາຍໃໝ່ທາງບົກ ແລະ ທາງທະເລ” (The Southern Transport Corridor & A New International Trade Route Across Land and  Over sea).

       ກອງ​ປະ​ຊຸມ​​ເວ​ທີ​ປຶກ​ສາ​ຫາ​ລື​ຮ່ວມ​ມື​ເສດ​ຖະ​ກິດອ່າວ​ເປີຍ​ປູ້​ຖືກສ້າງ​ຕັ້ງ​ຂຶ້ນ​ແຕ່​ປີ 2006 ເປັນຕົ້ນມາ, ກອງປະຊຸມ ຄັ້ງນີ້ໄດ້ທົບທວນຄືນ ຜົນຂອງກອງປະຊຸມ ຄັ້ງທີ 9 ທີ່ຜ່ານມາ ເຊີ່ງໄດ້ຕີລາຄາສູງຕໍ່ຄວາມຄືບໜ້າໃນການຈັດຕັ້ງປະຕິ ບັດ,ໃນ 12 ປີ ທີ່ຜ່ານມາກອງປະຊຸມດັ່ງກ່າວ ໄດ້ເອົາໃຈໃສຈັດຕັ້ງປະຕິບັດພາລະກິດໃນການສົ່ງເສີມຄວາມຮ່ວມມື ທາງດ້ານເສດຖະກິດຂອງອ່າວ​ເປີຍ​ປູ້  ( Pan-Beibu Gulf ), ໂດຍໄດ້​ຍຶດ​ໝັ້ນອຸ​ດົມ​ການ​​ທີ່​ຊຸກ​ຍູ້​ການ​ພັດ​ທະ​ນາ ​ແລະ ​ຮ່ວມ​ມື​ຂອງ​ພາ​ກ​ພື້ນ​ອ່າວ​ເປີຍ​ປູ້, ຍຶດ​ໝັ້ນ​ຫຼັກ​ການ  " ທ່າ​ແຮງ​ຊວ່ຍ​ຊູ​ຍູ້​ໜູນ​ກັນ, ການ​ຮ່ວມ​ມື​ຕ່າງ​ຝ່າຍ​ຕ່າງ​ມີ​ຜົນ​ປະ​ໂຫຍດ ​ແລະ ​ພັດ​ທະ​ນາ​ຈະ​ເລີນ​ຮຸ່ງ​ເຮືອງ​ຮ່ວມ​ກັນ ",    ຕັ້ງ​ໜ້າ​ຊຸກ​ຍູ້​ໃຫ້​ການ​ຮ່ວມ​ມື​ພາ​ກ​ພື້ນ​ອ່າວ​ເປີຍ​ປູ້​ຈາກ​ຂໍ້​ລິ​ເລີ່ມ​ ແລະ ຈາກຄວາມ​ເປັນ​ເອ​ກະ​ພາບ​ກ້າວ​ໄປ​​ສູ່​ການ​ປະ​ຕິ​ບັດ​ຕົວ​ຈິງ, ຈາກ​ການ​ຮ່ວມ​ມື​ກ້າວ​ໄປ​ສູ່​ຕ່າງ​ຝ່າຍ​ຕ່າງ​ມີ​ຜົນ​ປະ​ໂຫຍດ, ໄດ້​ຮັບ​ໝາກ​ຜົນ​ອຸ​ດົມ​ສົມ​ບູນ, ສ້າງ​ຜົນ​ປະ​ໂຫຍດ​ໃຫ້​ແກ່​ປະ​ຊາ​ຊົນ​ຂອງ​ປະ​ເທດ​ຕ່າງໆ​ໃນ​ພາກ​ພື້ນແຫ່ງນີ້.

ກອງປະຊຸມໄດ້ຕົກລົງເປັນເອກະພາບກັນວ່າປີ 2018 ແມ່ນປີທຳອິດຄົບຮອບການກ່າວສູນທອນຟົດຂອງ  ທ່ານ  ສີຈິງພີງ ປະທານປະເທດ ສປ ຈີນ ໃນກອງປະຊຸມເວທີເສດຖະກິດພາຍໃຕ້ຫົວຂໍ້ສຳຄັນ “ໜື່ງແລວ-ໜື່ງເສັ້ນທາງ”  ສຳລັບການຮ່ວມມືສາກົນ ແລະ ແມ່ນຄົບຮອບ 15 ປີຂອງການເປັນຫຸ້ນສ່ວນທາງຍຸດທະສາດຈີນ-ອາຊຽນ.  

 ໃນກອງປະຊຸມ ຄັ້ງນີ້ ທ່ານ  ສັນຕິສຸກ ສິມມາລາວົງ, ຮອງລັດຖະມົນຕີ  ໄດ້ມີຄໍາເຫັນໃນເວທີສົນທະນາພາຍໃຕ້ ຫົວຂໍ້ “ເສັ້ນທາງການຄ້າສາກົນສາຍໃໝ່ທາງບົກ ” (A New International Trade Route Across Land), ພາຍໃຕ້ສາຍພົວພັນມິດຕະພາບ ແລະການຮ່ວມມື ລະຫວ່າງ ສປປ ລາວ  ແລະ ສປ ຈີນ ໄດ້ມີມາແຕ່ດົນນານແລ້ວ ນັ້ນ, ບົນຈິດໃຈ 4 ດີທີ່ວ່າ: ເພື່ອນບ້ານທີ່ດີ, ຄູ່ຮ່ວມທີ່ດີ, ເພື່ອນທີ່ດີ ແລະ ສະຫາຍທີ່ດີ, ສປປ ລາວ  ແລະ ສປ ຈີນ ໄດ້ເພີ້ມທະວີການຮ່ວມມືກັນຫລາຍລະດັບ, ນັບທັງລະດັບສອງຝ່າຍ ແລະ ຫຼາຍຝ່າຍ, ໂດຍສະເພາະໃນການພັດທະ ນາໂຄງລ່າງພື້ນຖານເພື່ອສະຫນັບສະຫນູນນະໂຍບາຍແຫ່ງຊາດຂອງ ສປປ ລາວ ໃນການຫັນປ່ຽນຈາກປະເທດ ທີ່ບໍ່ ມີຊາຍແດນຕິດຈອດກັບທະເລ ໃຫ້ກາຍເປັນປະເທດເຊື່ອມໂຍງ-ເຊື່ອມຈອດ ແລະ ບໍລິການທາງຜ່ານທີ່ມີປະສິດທິຜົນ ຕາມແຜນພັດທະນາເສດຖະກິດ-ສັງຄົມແຫ່ງຊາດ. ໃນປັດຈຸບັນ, ພາຍໃຕ້ແນວຄິດລິເລີ້ມໜຶ່ງແລວ, ໜຶ່ງເສັ້ນທາງ ຂອງ ສປ ຈີນ (The Belt and Road  Initiative) ແລະ ແລວເສດຖະກິດ ລາວ-ຈີນ , ທີ່ປະທານ ສີຈິງພີງ ໄດ້ປະກາດ ໄວ້ໃນການຢຽ້ມຢາມລັດຖະກິດ ສປປ ລາວ ໃນເດືອນ ພະຈິກ 2017 ທີ່ມີຄວາມໝາຍຄວາມສຳຄັນໃນການເຊື່ອມ ໂຍງ-ເຊື່ອມຈອດລະຫວ່າງຈີນ-ອາຊຽນ ນັ້ນ,  ສປປ ລາວ ໄດ້ກະກຽມຄວາມພ້ອມ ແລະ ຈັດຕັ້ງປະຕິບັດການ ພັດທະນາໂຄງລ່າງພື້ນຖານຕາມນະໂຍບາຍດັ່ງກ່າວເປັນຕົ້ນແມ່ນ: ໂຄງການກໍ່ສ້າງທາງລົດໄຟລາວ-ຈີນ, ໂຄງການ ກໍ່ສ້າງທາງດ່ວນວຽງຈັນ-ວັງວຽງ-ຫລວງພະບາງ-ບໍ່ເຕັນ,  ທາງດ່ວນວຽງຈັນ-ປາກເຊ ແລະ ສິ່ງອຳນວຍຄວາມສະດວກ ຕ່າງໆຕາມເສັ້ນທາງ ເຊັ່ນ: Logistics, ການຄ້າ, ການທ່ອງທຽ່ວ, ດ້ວຍຮູບແບບການລົງທຶນສຳປະທານ (BOT) ແລະ ແບບມີສ່ວນຮ່ວມຂອງພາກລັດ ແລະ ພາກທຸລະກິດ (PPP), ບົນພື້ນຖານຕ່າງຝ່າຍຕ່າງມີຜົນປະໂຫຍດຮ່ວມກັນ ແລະ ນຳຜົນປະໂຫຍດສູງສຸດມາສູ່ ສປປ ລາວ.

ຂຽນບົດ ໂດຍ: ທອງປານ ອິນທະຈັກ, ຫົວໜ້າພະແນກສັງລວມ ແລະ ພິທີການ, ຫ້ອງການກະຊວງ ຍທຂ

Additional information