ກອງປະຊຸມເປີດກວ້າງທາບທາມຄຳເຫັນໃສ່ເນື້ອໃນຮ່າງກົດໝາຍວ່າດ້ວຍການລົດໄຟ

ໃນວັນທີ 12-15 ມິຖຸນາ 2018 ຢູ່ທີ່ຣີສອດນາປາກວາງ, ແຂວງວຽງຈັນ ໄດ້ເປີດກອງປະຊຸມເປີດກວ້າງທາບທາມ ຄຳເຫັນໃສ່ເນື້ອໃນຮ່າງກົດໝາຍວ່າດ້ວຍການລົດໄຟ ໃຫ້ກຽດການເປັນປະທານຂອງ ທ່ານ ວຽງສະຫວັດ ສີພັນດອນ ຮອງລັດຖະມົນຕີ ກະຊວງ ຍທຂ,​ ທ່ານ ສຈ ປອ. ບຸນເຫລື່ອມ ສີສຸລາດ ຜູ້ຊ່ວຍລັດຖະມົນຕີ. ເຂົ້າຮ່ວມມີບັນດາ ທ່ານຫົວໜ້າກົມ, ທ່ານ ຮອງຫົວໜ້າກົມ, ພະແນກ ຍທຂ ແຂວງ, ບັນດາທ່ານທີ່ມາຈາກສຳນັກງານອົງການ, ກະຊວງກ່ຽວຂ້ອງ, ພະນັກງານຫຼັກແຫຼ່ງ, ພະນັກງານວິຊາການ ເຂົ້າຮ່ວມຢ່າງພ້ອມພຽງ ຈຳນວນ 70 ທ່ານ.

ກອງ​ປະຊຸມ​​ໃນ​ຄັ້ງນີ້​ແມ່ນ​ເພື່ອ​ຄົ້ນຄ້ວາ ​ແລະ ປະກອບ​ຄຳ​ຄິດ​ເຫັນ​ຢ່າງ​ເປີດ​ກ້ວາງ, ສ້າງສັນ ​ແລະ ຫຼາກ​ຫຼາຍ​ເຂົ້າ​ໃຊ້​ເນື້ອ​ໃນ​ຮ່າງກົດໝາຍວ່າ​ດ້ວຍ ການ​ລົດ​ໄຟ (ສະບັບ​ສ້າງ​ໃໝ່), ​ແນ​ໃສ່​ຮັບປະກັນ​ໃນ​ການຈັດຕັ້ງປະຕິບັດ​ກົດໝາຍ​ດັ່ງກ່າວ​ໃນ​ຕໍ່ໜ້າ​ໃຫ້​ມີ​ປະສິດທິ​ຜົນ. ກົດໝາຍ​ສະບັບ​ນີ້ ກະຊວງ ຍທຂ ​ໄດ້​ສະ​ເໜີ​ເຂົ້າ​ໃນ​ແຜນການ​ສ້າງ ​ແລະ ປັບປຸງ​ກົດໝາຍ​ຂອງ​ສະພາ​ແຫ່ງ​ຊາດ​ໃນ​ປີ 2018 ​ແລ້ວ.

​ເນື່ອງ​ຈາກ​ວ່າ ວຽກ​ງານ​ການ​ລົດ​ໄຟ​ມີ​ການ​ຂະຫຍາຍຕົວ ນັບ​ຕັ້ງ​ແຕ່​ປີ 2005-2008 ກໍ່​ໄດ້​ມີ​ເສັ້ນທາງ​ລົດ​ໄຟທຳ​ອິດ 3,5 ກິ​ໂລ​ແມັດ ​ຊຶ່ງ​ເປັນ​ເສັ້ນທາງ​ລົດ​ໄຟ​ເຊື່ອມ​ຕໍ່​ຊາຍ​ແດນ​ລະ​ຫ່ວາງລາວ-​​ໄທ  (ທ່າ​ນາ​ແລ້ງ-​ໜອງ​ຄາຍ) ຕໍ່​ມາ​ປີ 2017 ກໍ່​ໄດ້​ມີ​ໂຄງການ​ກໍ່ສ້າງ​ທາງ​ລົດ​ໄຟ​ລາວ-​ຈີນ ນັບ​ຕັ້ງ​ແຕ່​ຊາຍ​ແດນ​ລາວຈີນ(ດານ​ສາກົນ​ບໍ​ເຕັນ) ຮອດ​ນະຄອນ ຫຼວງ​ວຽງ​ຈັນ ມີ​ຄວາມ​ຍາວ 409 ກິ​ໂລ​ແມັດ ​ແລະ ວຽກ​ງານ​ການ​ລົດ​ໄຟ​ນີ້ ຍັງ​ຈະ​ມີ ການ​ຂະ​ຫຍາ​ຍຕາ​ໜ່າ​ງ​ເສັ້ນທາງ, ການ​ພັດທະນາ​ດ້ານ​ອື່ນໆ​ໃນ​ອານາ​ຄົດ​ອັນ​ໃກ້​ນີ ສະນັ້ນ, ​ເພື່ອ​ຮັບປະກັນ​ການ​ຄຸ້ມ​ຄອງ​ບໍລິຫານ​ດ້ວຍ​ກົດໝາ​ຍ​ໃນ​ຂົງ​ເຂດ​ວຽກ​ງານ​ການ​ລົດ​ໄຟ​ທີ່​ໄດ້​ກ່າວ​ມາ​ຂ້າງ​ເທິງ​ນັ້ນ​ໃຫ້​ມີ​ປະສິ​ດທິພາ​ບ ​ແລະ ມີ​ປະສິດທິ​ຜົນ​ສູງ ຈຳ​ເປັນ​ຕ້ອງ​ໄດ້​ມີ​ນິຕິ​ກຳ​ທີ່​ຮັດກຸມ, ກຳນົດ ​ແລະ ວາງຫຼັກການ​ລະອຽດ​ໃສ່​ເນື້ອ​ໃນ​ກົດໝາຍ​ຢ່າງ​ຈະ​ແຈ້ງ​ເພື່ອ​​ໃຫ້​ແທດ​ເໝາະ ​ແລະ ສອດ ຄ່ອງ​ກັບ​ສະພາບ​ການ​ພັດ​ທະນາ​ເສດຖະກິດ-​ສັງຄົມ ພ້ອມ​ທັງ​ເປັນ​ເຄື່ອງມື​ໃນ​ການ​ຮອງ​ຮັບ​ການ​ຂະຫຍາຍຕົວ​ຂອງ​ເສດຖະກິດ​ຂອງ​ປະ​ເທດ ຮັບປະກັນ​ການ​ເຊື່ອມ​ຈອດ, ​ເຊື່ອມ​ໂຍງ​ໃນ​ພາກ​ພື້ນ ​ແລະ ສາກົນ.

  ໃນໂອກາດນີ້ທ່ານ ຮອງລັດຖະມົນຕີ ກະຊວງ ຍທຂ ໄດ້ເໜັ້ນໜັກໃຫ້ບັນດາແຂກເຂົ້າຮ່ວມພ້ອມກັນເອົາໃຈໃສ່ ຄົ້ນຄວ້າແລກປ່ຽນຄຳຄິດຄຳເຫັນໃສ່ຮ່າງກົດໝາຍວ່າດ້ວຍການລົດໄຟ (ສະບັບສ້າງໃໝ່) ເພື່ອເຮັດໃຫ້ກົດໝາຍດັ່ງ ກ່າວຮັບປະກັນໃຫ້ມີປະສິດທິຜົນ ແລະ ທັນ​ສະ​ເໜີ​ຕໍ່​ກອງ​ປະຊຸມ​ສະພາ​ແຫ່ງ​ຊາດ ປີ 218 ຕາມ​ແຜນການ​ທີ່​ຄາດ​ໄວ້.

 

 ກວດແກ້ໂດຍ ທ່ານ ວຽງຄອນ ວົງຄຳຈັນ

ຂຽນຂ່າວໂດຍ ທ່ານ ຈັນທະລາ ຂັນທະວີໄຊ

 

 

 

 

 

 

Additional information