ທ່ານ ວຽງສະຫວັດ ສີພັນດອນ ຮອງລັດຖະມົນຕີ ກະຊວງໂຍທາທິການ ແລະ ຂົນສົ່ງ ເຂົ້າຮ່ວມກອງປະຊຸມປຶກສາຫາລື ກ່ຽວກັບການພັດທະນາ ແລະບໍລິການທ່າບົກ ຢູ່ແຂວງຈຳປາສັກ

ໃນວັນທີ 18 ມິຖຸນາ 2018 ທ່ານ ວຽງສະຫວັດ ສີພັນດອນ ຮອງລັດຖະມົນຕີ ກະຊວງໂຍທາທິການ ແລະ ຂົນສົ່ງ ເຂົ້າຮ່ວມກອງປະຊຸມປຶກສາຫາລື ກ່ຽວກັບການພັດທະນາ ແລະ ບໍລິການທ່າບົກ ຢູ່ແຂວງຈຳປາສັກ, ໃຫ້ກຽດເຂົ້າ ກອງປະຊຸມໂດຍ ທ່ານ ປອ ບຸນຖອງ ດີວິໄຊ ເຈົ້າແຂວງໆຈຳປາສັກ, ບັນດາທ່ານ ຫົວໜ້າກົມ, ຮອງຫົວໜ້າກົມ, ຄະນະພະແນກ ຈາກບັນດາກະຊວງທີ່ກ່ຽວຂ້ອງ ຂັ້ນສູນກາງ ແລະ ຂະແໜງການທີ່ກ່ຽວຂ້ອງຂອງແຂວງຈຳປາສັກ, ທ່ານ ເຈົ້າເມືອງໆໂພນທອງ ແລະ ອຳນວຍການ ບໍລິສັດ ດວງດີກໍ່ສ້າງຂົວທາງ ຈຳກັດຜູ້ດຽວ.

ກອງປະຊຸມໄດ້ຍົກໃຫ້ເຫັນກ່ຽວກັບ ກະຊວງ ໂຍທາທິການ  ແລະຂົນສົ່ງ ໄດ້ສ້າງຍຸດທະສາດການພັດທະນາໂລຈິດ ສະຕິກຂົນສົ່ງສິນຄ້າ ຊຶ່ງລັດຖະບານໄດ້ຮັບຮອງ ແລະ ປະກາດໃຊ້ໃນປີ 2015 ໄດ້ກຳນົດຈຸດທີ່ຕັ້ງທ່າບົກ 09 ແຫ່ງ, ອີງໃສ່ຈຸດຄວາມຮຽກຮ້ອງຕ້ອງການຂອງປະຊາຊົນທ່າບົກແຕ່ລະແຫ່ງຮອດປະຈຸບັນມີໜໍ່  ແໜງເຕີບໂຕຄື: 1). ທ່າບົກ ສະຫວັນນະເຂດ  ເປັນທ່າບົກແຫ່ງທໍາອິດຂອງ  ສປປ ລາວ  ທີ່ໄດ້ເປີດນໍາໃຊ້ແລ້ວ ໄດ້ຮັບຮອງຈາກລັດຖະບານ ຕາມ ແຈ້ງການຂອງຫ້ອງວ່າການສໍານັກງານນາຍົກລັດຖະມົນຕີ ສະບັບເລກທີ 1882/ ຫສນຍ.ກສສ, ລົງວັນທີ 30 ພະຈິກ 2016; 2). ທ່າບົກທ່ານາແລ້ງ  ປະຈຸບັນກໍາລັງດໍາເນີນການເຈລະຈາກັບຍີ່ປຸ່ນເພື່ອຕົກລົງເອກະພາບ; 3). ທ່າບົກ ທ່າແຂກ ກໍາລັງສຶກສາຄວາມເປັນໄປໄດ້; 4). ທ່າບົກນາເຕີຍ  ກຳລັງສຶກສາຄວາມເປັນໄປໄດ້; 5). ທ່າບົກຈຳປາສັກ ຊຶ່ງເປັນທີ່ຕັ້ງຍຸດທະສາດ ຊຶ່ງພວກເຮົາຈະປຶກສາຫາລືກັນ ແລະ ສະເໜີລັດຖະບານພິຈາລະນາຕໍ່ໄປລ້ວນແຕ່ມີການ ຮ່ວມມືລະຫວ່າງລັດ ແລະ ເອກະຊົນ, ລະຫວ່າງພາຍໃນ ແລະ ຕ່າງປະເທດ.

ນອກນັ້ນຍັງມີຢູ່ 6). ຫ້ວຍຊາຍ; 7). ເມືອງໄຊ; 8). ຫຼວງພະບາງ ແລະ 9). ຫລັກຊາວ   ຊຶ່ງໃນອະນາຄົດພວກເຮົາ ກໍຈະສຶບຕໍ່ດໍາເນີນການພັດທະນາໃຫ້ສໍາເລັດຕາມທີ່ກໍານົດຢູ່ໃນຍຸດທະສາດ.

ຄຽງຄູ່ກັບການພັດທະນາທ່າບົກຈໍາປາສັກ ນີ້, ກະຊວງໂຍທາທິການ ແລະ ຂົນສົ່ງ ກໍຍັງໄດ້ຖືເອົາເປັນບັນຫາສຳຄັນໃນ ການຈັດຕັ້ງປະຕິບັດເຂດກວດກາສິນຄ້າຮ່ວມກັນ (Common Control Area “CCA”) ກໍ່ຄືການກວດກາຈຸດດຽວ- ປ່ອງດຽວ ຢູ່ດ່ານວັດເຕົ່າ-ຊ່ອງເມັກ ລະຫວ່າງລາວ-ໄທ ຕາມການຕົກລົງ ແລະ ການກໍານົດຢູ່ໃນມາດຕາ 4 ໃນພາກທິ່ II ຂອງສັນຍາວ່າດ້ວຍ ການຂົນສົ່ງຂ້າມແດນຂອງອະນຸພາກພື້ນແມ່ນໍ້າຂອງ (GMS CBTA) ຊືຶ່ງຝ່າຍລາວແມ່ນ ທ່ານ ເພົ້າ ບຸນນະຜົນ ອະດີດລັດຖະມົນຕີ ກະຊວງຄົມມະນາຄົມຂົນນສົ່ງ ໄປສະນີ ແລະ ກໍ່ສ້າງ ເປັນຜູ້ລົງນາມ ໃນວັນທີ 26/11/1999 ທີ່ນະຄອນຫລວງວຽງຈັນ.

ມາຮອດປັດຈຸບັນ, ຖືວ່າມີ CCA ໃນການກວດກາຈຸດດຽວ-ປ່ອງດຽວ ຢູ່ດ່ານຊາຍແດນສະຫວັນ-ລາວບາວ ແລ້ວ ຊຶ່ງ ເລີ່ມແຕ່ວັນທີ 6/2/2015 ເປັນຕົ້ນມາ ແລະພວກເຮົາກຳລໍັງເຈລະຈາ ເພື່ອຈັດຕັ້ງປະຕິບັດ ຢູ່ສະຫັວນນະເຂດ-ມຸກດາ ຫານ  ແຕ່ວ່າຢູ່ດານສະຫັວນນະເຂດ ແມ່ນມີເນື້ອທີ່ຈຳກັດ ໃນການກວດກາຮ່ວມກັນຂອງເຈົ້າໜ້າທີ່ 2 ປະເທດ ຈຶ່ງ ກະລັງຢູ່ໃນຂັ້ນຕອນພິຈາລະນາຈະຍ້າຍຈຸດກວດກາດັ່ງກ່າວ ໄປຢູ່ທ່າບົກສະຫວັນນະເຂດ. ພ້ອມກັນນັ້ນທັງ 2 ຝ່າຍ ລາວ-ໄທ ຍັງມີແຜນຈະຂະຫຍາຍການຈັດຕັ້ງປະຕິບັດການກວດກາຈຸດດຽວ-ປ່ອງດຽວ ຢູ່ດ່ານອື່ນໆອີກໃນອະນາຄົດ.

ທ່ານຮອງລັດຖະມົນຕີ ຍັງໄດ້ສະເໜີໃຫ້ອຳນາດປົກຄອງແຂວງ ແລະ ບັນດາພະແນກກ່ຽວຂ້ອງພິຈາລະນາຄວາມ ເປັນໄປໄດ້ ໃນການຈັດຕັ້ງທ່າບົກຈຳປາສັກ ໃຫ້ມີເນື້ອທີ່ຈັດສັນທີ່ເໝາະສົມ ແລະ ພຽງພໍ,  ກໍານົດສິ່ງອຳນວຍຄວາມ ສະດວກ, ລະບົບການຄຸ້ມຄອງ, ຄວາມປອດໄພ ແລະ ຄວາມໝັ້ນຄົງຂອງຊາດ ເພື່ອຮອງຮັບການກວດກາຈຸດດຽວ- ປ່ອງດຽວ ລະຫວ່າງລາວ-ໄທ ທີ່ຈະເກີດຂື້ນ ໃນອະນາຄົດນີ້ດ້ວຍ.

Additional information