ພິທີເປີດໂຄງການກໍ່ສ້າງ, ປັບປຸງລະບົບນໍ້າປະປາ ແລະສຸຂາພິບານ ເມືອງໄຊຍະບູລີ ແຂວງໄຊຍະບູລີ

ຈາກຄວາມຮຽກຮ້ອງຕ້ອງການຊົມໃຊ້ນໍ້າປະປາ ຂອງປະຊາຊົນເມືອງໄຊຍະບູລີ, ແຂວງໄຊຍະບູລີ ທີ່ນັບມື້ນັບເພິ່ມຂື້ນ ໃນຂອບເຂດທົ່ວແຂວງ, ລັດຖະບານເຫັນໄດ້ເຖິງຄວາມສໍາຄັນ ແລະສຸຂາພິບານຂອງປະຊາຊົນ, ຈຶ່ງໄດ້ລົງທຶນຂະ ຫຍາຍ ແລະປັບປຸງລະບົບນໍ້າປະປາ ເພື່ອຮອງຮັບການຂະຫຍາຍຕົວຂອງຊຸມຊົນ ແລະຮັບປະກັນການສະໜອງນໍ້າ ໃຫ້ພຽງພໍ ກັບຄວາມຕ້ອງການຂອງພໍ່ແມ່ປະຊາຊົນໃນສະເພາະໜ້າ.

ເພື່ອເຮັດໃຫ້ໂຄງການກ້າວເຂົ້າສູ່ຂັ້ນຕອນການກໍ່ສ້າງທີ່ເປັນທາງການ, ໃນຕອນບ່າຍຂອງວັນທີ 21 ມັງກອນ 2019 ທີ່ກະຊວງ ຍທຂ ໄດ້້ມີພິທີເປີດໂຄງການກໍ່ສ້າງ ແລະປັບປຸງລະບົບນໍ້າປະປາ ເມືອງໄຊຍະບູລີ ແຂວງໄຊຍະບູລີ ຢ່າງເປັນທາງການ, ໂດຍພາຍໃຕ້ການເປັນປະທານຂອງທ່ານ ນາງ ວິໄລຄຳ ໂພສາລາດ ຮອງລັດຖະມົນຕີ ກະຊວງ ຍທຂ, ທ່ານ ນາງ ບຸນພັກ ອິນທະປັນຍາ ຮອງເຈົ້າແຂວງ ແຂວງໄຊຍະບູລີ, , ມີເຈົ້າເມືອງເມືອງໄຊຍະບູລີ, ຫົວໜ້າ ກົມນໍ້າປະປາ, ຫົວໜ້າຫ້ອງການກະຊວງ ຍທຂ, ຮອງຫົວ  ໜ້າພະແນກ ຍທຂ ແຂວງໄຊຍະບູລີ, ບໍລິສັດທີ່ຮັບເໝົາ ກໍ່ສ້າງ ແລະ ພາກສ່ວນອື່ນໆທີ່ກ່ຽວຂ້ອງເຂົ້າຮ່ວມ.

ໃນພິທີເປີດໂຄງການກໍ່ສ້າງ ແລະປັບປຸງລະບົບນໍ້າປະປາ ເມືອງໄຊຍະບູລີ ແຂວງໄຊຍະບູລີ ທ່ານ ສະເຫຼີມສັກ ຫົວໜ້າ ໂຄງການໄດ້ຂຶ້ນລາຍງານ ໂດຍຫຍໍ້ກ່ຽວກັບໂຄງການກໍ່ສ້າງປັບປຸງ ແລະຂະຫຍາຍລະບົບນໍ້າປະປາ ເມືອງໄຊຍະບູລີ, ແຂວງໄຊຍະບູລີ “ໂຄງການດັ່ງກ່າວແມ່ນໂຄງການໜຶ່ງທີ່ນອນໃນໂຄງການນໍ້າປະປາ ແລະ ສຸຂາພິບານ (ADB Loan 304-Lao) ທີ່ໄດ້ຮັບທຶນກູ້ຢືມຈາກ ທະນາຄານພັດທະນາອາຊີ, ໃນມູນຄ່າ 23 ລ້ານ SDR ປະມານ 35 ລ້ານໂດລາ ສະຫາລັດ, ເຊິ່ງປະຈຸບັນມີຄວາມຄືບໜ້າລວມຂອງໂຄງການປະມານ 45%, ກໍານົດໄລຍະເວລາ ໃນການຈັດຕັ້ງປະຕິ ບັດໂຄງການແມ່ນເລີ່ມ ແຕ່ວັນທີ 9 ຕຸລາ 2013-31 ມີນາ 2022, ເຊິ່ງລວມທັງມົດມີ 11 ຕົວເມືອງຂອງໂຄງການຄື: ເມືອງຜາອຸດົມ ແຂວງບໍ່ແກ້ວ, ເມືອງລອງ ແລະເມືອງນໍ້າທາ ແຂວງຫຼວງນໍ້າທາ, ເມືອງບໍ່ແຕນ ແລະເມືອງໄຊຍະບູລີ ແຂວງໄຊຍະບູລີ, ເມືອງປາກຊັນ ແລະເມືອງປາກກະດິງ ແຂວງບໍລິຄໍາໄຊ, ເມືອງລະມາມ ແລະເມືອງດາກຈຶງ ແຂວງ ເຊກອງ, ເມືອງສາມັກຄີໄຊ ແລະເມືອງສະໜາມໄຊ ແຂວງອັດຕະປື, ສໍາລັບເມືອງໄຊຍະບູລີ ແຂວງໄຊຍະບູລີ ແມ່ນ ໂຄງການໜຶ່ງທີ່ໄດ້ຮັບການປະມູນຖືກຕ້ອງຕາມລະບຽບຫຼັກການ ຂອງກະຊວງການເງິນ ແລະທະນາຄານພັດທະນາ ອາຊີ, ໂຄງການດັ່ງກ່າວ ໄດ້ເລີ່ມລົງມືກໍ່ສ້າງໃນວັນທີ 20 ສິງຫາ ແລະຈະໃຫ້ສໍາເລັດການກໍ່ສ້າງໃນວັນທີ 20 ສິງຫາ 2021 (ໄລຍະການກໍ່ສ້າງ 3 ປີ), ມາຮອດປະຈຸບັນມີຄວາມຄືບໜ້າ 6%, ໂຮງງານນໍ້າປະປາແມ່ນໄດ້ອອກແບບສໍາລັບ ການສະໜອງນໍ້າປະປາ ໃນຂອບເຂດຈໍານວນ 24 ບ້ານ ຂອງເມືອງໄຊຍະບູລີ, ເຊິ່ງມີປະຊາກອນທີ່ຊົມໃຊ້ນໍ້າທັງມົດ 30,618 ຄົນ, ມີ 6,541 ຄອບຄົວ, ກໍານົດຄວາມຕ້ອງການໃນການຊົມໃຊ້ນໍ້າແມ່ນ 120 ລິດ/ຄົນ/ວັນ, ບໍລິມາດ ໃນການຜະລິດຂອງໂຮງງານນໍ້າປະປາ ຈາກໂຮງງານເກົ່າທີ່ມີຢູ່ແລ້ວ 4,800 ແມັດກ້ອນ/ມື້ ເພີ່ມຂຶ້ນອີກ 8,500 ແມັດກ້ອນ/ມື້, ລວມທັງໝົດແມ່ນ 13,300 ແມັດກ້ອນ/ມື້, ໂຮງງານນໍ້າປະປາທີ່ສ້າງເພີ້ມເຕີມ 8,500 ແມັດ/ມື້, ເປັນ ໂຮງງານລະບົບຄົບຊຸດທີ່ໄດ້ມາດຖານລວມມີບັນດາ ອ່າງຜະລິດນໍ້າປະປາ, ເຮືອນປະສົມເຄມີ, ຫ້ອງທົດລອງ ແລະ ຫ້ອງພາຍໃນໂຮງງານ, ສໍາລັບໜ້າວຽກປັບປຸງສະພາບແວດລ້ອມບ້ານແມ່ນໄດ້ມີການສ້ອມແປງຫ້ອງການບ້ານ ມີຈໍ ານວນ 5 ຫຼັງ, ວຽກປັບປຸງເສັ້ນທາງພາຍໃນບ້ານມີຄວາມຍາວ 4,913 ແມັດ ແລະວຽກກໍ່ສ້າງຮ່ອງລະບາຍນໍ້າ ມີຄວາມຍາວ 1,367 ແມັດ”.

ໃນຕອນທ້າຍຂອງພິທີ ທ່ານ ພົມມາ ແວວລາວັນ, ຫົວໜ້າກົມນໍ້າປະປາ ໄດ້ຂຶ້ນມີຄໍາເຫັນ ແລະກ້າວຂອບໃຈຈາກ ພາກສ່ວນທີ່ກ່ຽວຂ້ອງທີ່ໃຫ້ການຮ່ວມມື ແລະ ສະໜັບສະໜູນໂຄງການດັ່ງກ່າວ ໃຫ້ປາກົດຜົນເປັນຈິງ.

Additional information