ກອງປະຊຸມເຜີຍແຜ່ ກົດໝາຍວ່າດ້ວຍການຜັງເມືອງ (ສະບັບປັບປຸງ), ກົດໝາຍວ່າດ້ວຍການບິນພົນລະເຮືອນ (ສະບັບປັບປຸງ) ແລະບັນດານິຕິກໍາທີ່ກ່ຽວຂ້ອງ

ກອງ​ປະຊຸມ​​ເຜີຍ​ແຜ່​ກົດໝາຍວ່າ​ດ້ວຍການ​ຜັງ​ເມືອງ(ສະບັບ​ປັບປຸງ), ກົດໝາຍວ່າ​ດ້ວຍ​ການບິນ​ພົນລະ​ເຮືອນ (ສະບັບ ​ປັບປຸງ) ​ແລະ ​ບັນດາ​ນິຕິ​ກໍາ​ທີ່​ກ່ຽວຂ້ອງ, ສໍາລັບ​ເຂດ​ພາກ​ໃຕ້​ໄດ້​ຈັດ​ຂື້ນ​ໃນ​ວັນ​ທີ 28-29 ມັງກອນ 2019 ຢູ່​ຫ້ອງ​ປະຊຸມ​ໃຫຍ່​ຂອງ​ພະ​ແນ​ກ ຍທຂ ​ແຂວງ​ສະຫວັນ​ນະ​ເຂ​ດ, ​ໂດຍ​ພາຍ​ໃຕ້​ການ​ເປັນ​ປະທານ​ຂອງ​ ທ່ານ ທ່ອນ​ແກ້ວ ພຸດທະ​ໄກ​ຍະ​ລາດ, ຮອງ​ເຈົ້າ​ແຂວງ ​ແຂວງ​ສະຫວັນ​ນະ​ເຂດ, ທ່ານ ປອ ສັນຕິ​ສຸກ ສິມ​ມາລາ​ວົງ, ຮອງ​ລັດຖະມົນຕີ ກະຊວງ ຍທຂ, ມີ​ບັນດາພະ​ແນ​ກການ, ​ພາກສ່ວນ​ທີ່​ກ່ຽວຂ້ອງຈາກ 5 ​ແຂວງ​ພາກ​ໃຕ້ ​ເຂົ້າ​ຮ່ວມ​ຢ່າງ​ພ້ອມພຽງ.​  

ກອງປະຊຸມແມ່ນໄດ້ເອົາຜົນສໍາເລັດໃນການປັບປຸງ 02 ກົດໝາຍ ຄື: ກົດໝາຍວ່າດ້ວຍການຜັງເມືອງ(ສະບັບປັບປຸງ) ປີ 2017 ແລະ ກົດໝາຍວ່າດ້ວຍການບິນພົນລະເຮືອນ(ສະບັບປັບປຸງ) ປີ 2018 ຊຶ່ງສະພາແຫ່ງຊາດ ໄດ້ຮັບຮອງ, ປະກາດນຳໃຊ້ແລ້ວ  ມາເຜີຍແຜ່ຢູ່ແຂວງສະຫວັນນະເຂດ ເຊີ່ງ​ເປັນ​ໃຈກາງເຕົ້າໂຮມ ​ ​ບັນດາ​ທ່ານທັງພາກລັດ ແລະ ເອກະຊົນ ທີ່ກ່ຽວຂ້ອງຈາກ 5 ​ແຂວງ​ພາກ​ໃຕ້ ​ເຂົ້າຮ່ວມຮັບຟັງການເຜີຍແຜ່ ກົດໝາຍດັ່ງກ່າວ ແລະ ນິຕິກຳຕ່າງໆ ທີ່ກ່ຽວຂ້ອງ ຢ່າງ​​ເປັນ​ຂະ​ບວນຟົດຟື້ນ, ​ນ​ອກຈາກ​ນັ້ນກໍ​ຍັງ​ມີບັນດາທ່ານ ນັກຄົ້ນຄວ້າ, ນັກວິຊາການ, ຊ່ຽວຊານ​ອະ​ວຸ​ໂສ ດ້ານລະບຽບ​ກົດໝາຍຂ​ະ​ແໜງ​ການ ໂຍທາທິການ ແລະ ຂົນສົ່ງ ​ມາ​ເປັນ​ວິທະ​ຍາກ​ອນ ​ເພື່ອຖ່າຍ​ທອດ​ຄວາມ​ຮູ້ກ່ຽວ​ກັບນິຕິ​ກຳ​ກ່ຽວຂ້ອງ ທີ່ໄດ້ທຳ​ການ​ປັບປຸງໃໝ່ນີ້.

ກອງ​ປະຊຸມ​ເຜີຍ​ແຜ່​ໃນ​ຄັ້ງ​ນີ້, ​ເປັນ​ໂອ​ກາດ​ດີ, ທີ່​ໄດ້​ເຮັດ​ໃຫ້​ນັກ​ສໍາ​ມະ​ນາກ​ອນ, ນັກ​ຄົ້ນຄວ້າ, ​ໄດ້​ມີ​ການ​ສົນທະນາ, ປຶກສາ​ຫາລື, ຊອກ​ໃຫ້​ເຫັນ​ຈຸດ​ດີ, ຈຸດ​ອ່ອນ ​ແລະ​ສິ່ງ​ທ້າ​ທ້າຍ ​ໃນ​ການຈັດ​ຕັ້ງ​ປະຕິບັດ ກົດໝາຍ ​ແລະ ​ນິຕິ​ກໍາ​ຕ່າງໆ, ທີ່​ກ່ຽວພັນ​ກັບ​ວຽກງານ​ຂະ​ແໜງການ​ຂອງ​ຕົນ, ສາມາດ​ສະຫລຸບຖອດ​ຖອນ​ເປັນ​ບົດ​ຮຽນ ​ເພື່ອ​ນໍາ​ໄປໝູນໃຊ້, ​ເສີມ​ຂະຫຍາຍ, ປັບປຸງ, ​ແກ້​ໄຂ ​ແລະ ​ສຶບຕໍ່ພັດທະນາ​ຂະ​ແໜງການ​ຂອງ​ຕົນ​ໃຫ້​ກ້າວ​ໄປ​ສູ່ເປົ້າໝາຍທີ່​ວາງ​ໄວ້, ຊຶ່ງ​ເປັນ​ການ​ປະກອບ​ສ່ວນ​ອັນ​ແຂງ​ແຮງ​ໃຫ້​ແກ່ ການ​ພັດທະນາ ​ເສດຖະກິດ-ສັງ​ຄົມຂອງ​ປະ​ເທດ​ເຮົາ​ໃນ​ອານາ​ຄົດ.

Additional information