ກອງປະຊຸມໃຫຍ່ ຄັ້ງທີ III ຂອງກຳມະບານຮາກຖານຫ້ອງການ ກະຊວງໂຍທາທິການ ແລະຂົນສົ່ງ

ກອງປະຊຸມໃຫຍ່ ຄັ້ງທີ III ຂອງກຳມະບານຮາກຖານຫ້ອງການ ກະຊວງໂຍທາທິການ ແລະ ຂົນສົ່ງ ໄດ້ຈັດຂຶ້ນໃນວັນທີ 30 ສິງຫາ 2019 ຜ່ານມາ ທີ່ກະຊວງ ຍທຂ ພາຍໃຕ້ການເປັນປະທານຂອງ ສະຫາຍ ທອງປານ ອິນທະຈັກ, ປະທານກຳມະບານຮາກ​ຖານ ຫ້ອງການກະຊວງ ຍທຂ ໂດຍໃຫ້ກຽດເຂົ້າຮ່ວມກອງປະຊຸມຂອງສະຫາຍ ບຸນຈັນ ສິນຣາຊະວົງ ເລຂາຄະນະພັກຮາກຖານຫ້ອງການ, ສະຫາຍ ແສງດາວວີ ກັດຕິຍະສັກ ປະທານສະຫະພັນ ກຳມະບານກະຊວງ ຍທຂ, ມີບັນດາສະຫາຍປະທານ, ຮອງປະທານກຳມະບານຮາກຖານອ້ອມຂ້າງກະຊວງ ແລະ ບັນດາສະມາຊິກກຳມະບານຮາກຖານຫ້ອງການທັງໝົດເຂົ້າຮ່ວມ.
ກອງປະຊຸມຄັ້ງນີ້, ບັນດາຜູ້ແທນເຂົ້າຮ່ວມໄດ້ພ້ອມກັນຄົ້ນຄວ້າ ແລະ ປະກອບຄໍາຄິດຄໍາເຫັນໃສ່ຮ່າງລາຍງານການເມືອງ ແລະ ບົດສຳຫຼວດການນຳພາລວມຂອງກຳມະບານຮາກຖານຫ້ອງການຊຸດເກົ່າ, ໃນນັ້ນໄດ້ຕີລາຄາດ້ານດີ, ດ້ານອ່ອນ, ຂໍ້ຄົງຄ້າງ, ສາເຫດ, ບົດຮຽນທີ່​ຖອດ​ຖອນ​ໄດ້ ໃນການຊີ້ນຳ-ນຳພາ ແລະ ການຈັດຕັ້ງປະຕິບັດວຽກ​ງານ ໃນໄລ​ຍະຜ່ານມາ. ພ້ອມນີ້, ກອງປະຊຸມຍັງໄດ້ເປັນເອກະສັນຮັບຮອງເອົາທິດທາງ, ແຜນການ 5 ປີ ນັບແຕ່ປີ 2019-2023 ຜູ້ແທນກອງປະຊຸມ ໄດ້ພ້ອມກັນໃຊ້ສິດປະຊາທິປະໄຕຂອງຕົນປ່ອນບັດຄັດເລືອກເອົາຄະນະບໍລິຫານງານກຳມະບານຮາກຖານຫ້ອງການຊຸດໃໝ່ ບົນພື້ນຖານຫລັກການລວມສູນປະຊາທິປະໄຕ ແລະ ຖືກ ຕ້ອງສອດຄ່ອງກັບມາດຖານເງື່ອນໄຂທີ່ກຳນົດໄວ້. ຊຶ່ງມີຜູ້ລົງສະໝັກເລືອກຕັ້ງ 7 ສະຫາຍ, ຍິງ 3 ສະຫາຍ ແລະ ເລືອກຕັ້ງໄດ້ 5 ສະຫາຍ, ຍິງ 1 ສະ​ຫາຍ. ກອງປະຊຸມຄັ້ງປະຖົມມະລືກໄດ້ເປັນເອກະສັນເລືອກເອົາສະຫາຍ ທອງປານ ອິນທະຈັກ ເປັນປະທານ, ສະຫາຍ ນາງ ວະນິດາ ວໍລະສານ ເປັນຮອງປະທານ, ສະຫາຍ ວຽງຄອນ ວົງຄຳຈັນ ເປັນຄະນະທັງເປັນຜູ້ກວດກາ, ສະຫາຍ ບຸນລັບ ເຄນກິດຕິສັກ ເປັນຄະນະ ແລະ ສະຫາຍ ວົງຈັນ ສີສະຫວັດ ເປັນຄະນະ. 

ກອງປະຊຸມໄດ້ເລືອກຕັ້ງເອົາຜູ້ແທນສົມບູນ ແລະ ຜູ້ແທນສໍາຮອງ ໄປຮ່ວມກອງປະຊຸມໃຫຍ່ ຄັ້ງທີ VII ຊຶ່ງມີຜູ້ລົງສະໝັກເລືອກຕັ້ງ 7 ສະຫາຍ, ຍິງ 3 ສະຫາຍ ແລະ ເລືອກຕັ້ງໄດ້ 5 ສະຫາຍ, ຍິງ 1 ສະຫາຍ ແລະ ຜູ້ແທນສໍາຮອງ 2 ສະຫາຍ, ຍິງ 2 ສະຫາຍ.
ໃນໂອກາດນີ້, ສະຫາຍ ແສງດາວວີ ກັດຕິຍະສັກ ປະທານສະຫະພັນກຳມະບານກະຊວງ ຍທຂ ໄດ້ໂອ້ລົມຕໍ່ກອງປະຊຸມ ກ່ອນອື່ນສະຫາຍໄດ້ສະແດງຄວາມຍ້ອງຍໍຊົມເຊີຍຕໍ່ການຊີ້ນໍາ-ນໍາພາຂອງຄະນະບໍລິຫານງານກຳມະບານຮາກຖານຫ້ອງການຊຸດເກົ່າ ທີ່ໄດ້ນຳພາສະມາຊິກກຳມະບານປະຕິບັດໜ້າທີ່ ການເມືອງຂອງຕົນ, ຍາດໄດ້ຜົນສຳເລັດຫຼາຍດ້ານ ພ້ອມກັນນັ້ນ, ສະຫາຍຍັງໄດ້ສະແດງຄວາມເປັນຫ່ວງເປັນໄຍຕໍ່ດ້ານອ່ອນ, ຂໍ້ຄົງຄ້າງ ຊຶ່ງໄດ້ຮຽກຮ້ອງໃຫ້ຄະນະກຳມະບານຮາກຖານຫ້ອງການຊຸດໃໝ່ຈະຕ້ອງໄດ້ສືບຕໍ່ປັບປຸງ, ແກ້ໄຂ ຈາກນັ້ນ ສະຫາຍໄດ້ໃຫ້ທິດຊີ້ນຳວຽກງານແຕ່ລະດ້ານ, ຄະນະກຳມະບານຮາກຖານຫ້ອງການຊຸດໃໝ່ ສືບຕໍ່ຊີ້ນໍາ-ນໍາພາຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ III ຂອງກຳມະບານຮາກຖານຫ້ອງການ ໃຫ້ຍາດໄດ້ຜົນງານ ແລະ ມີຜົນສໍາເລັດກວ່າເກົ່າ.

Additional information