ກອງປະຊຸມໃຫຍ່ ຄັ້ງທີ IV ຂອງໜ່ວຍພັກຮາກຖານ ກົມທາງລົດໄຟ

ກອງປະຊຸມໃຫຍ່ ຄັ້ງ​ທີ IVຂອງໜ່ວຍພັກຮາກຖານກົມທາງລົດໄຟ ໄດ້ເປີດຂຶ້ນໃນຕອນເຊົ້າຂອງ ວັນທີ 18/09/2019 ແລະ ດໍາເນີນໄປເປັນເວລາ​ເຄິ່ງວັນ, ໂດຍການເປັນປະທານຂອງ ສະຫາຍ ບຸນຈັນ ສິນທະວົງ ກຳມະການ​​ສູນ​ກາງ​ພັກ, ເລຂາຄະນະພັກ, ລັດຖະມົນຕີກະຊວງ ໂຍທາທິການ ແລະ ຂົນສົ່ງ; ສະຫາຍ ລັນ ແສງອາພອນ ຄະນະ​ປະຈຳ​ພັກ​ກະຊວງ, ຫົວໜ້າກົມຈັດຕັ້ງ ​ແລະ ພະນັກງານ ​ແລະ ສະຫາຍ ແສງທະວີໃສ ມະລີວັນ ຮອງເລຂາພັກກົມທາງລົດໄຟ, ຫົວໜ້າກົມທາງລົດໄຟ, ມີບັນດາສະຫາຍແຂກທີ່ຖືກເຊີນຈາກກົມ, ກອງ, ສະ​ຖາ​ບັນ, ລັດ​ວິ​ສາ​ຫະກິດອ້ອມຂ້າງກະຊວງກໍ່ໃຫ້ກຽດເຂົ້າຮ່ວມ, ມີຜູ້ແທນສົມບູນເຂົ້າຮ່ວມທັງໝົດ 09 ສະຫາຍ, ຍິງ 02 ສະຫາຍ.

ກອງປະຊຸມໄດ້ພ້ອມກັນຄົ້ນຄວ້າ ແລະ ປະກອບຄໍາຄິດຄໍາເຫັນໃສ່ຮ່າງລາຍງານການເມືອງ, ແລະ ບົດສຳຫຼວດການນຳພາລວມຂອງຄະນະໜ່ວຍພັກຊຸດເກົ່າ, ໃນນັ້ນໄດ້ຕີລາຄາດ້ານດີ, ດ້ານອ່ອນ, ຂໍ້ຄົງຄ້າງ, ສາເຫດ, ບົດຮຽນໃນການຊີ້​ນໍາ-ນຳພາ ແລະ ການຈັດຕັ້ງປະຕິບັດມະຕິກອງປະຊຸມໃຫຍ່ໃນ 5 ປີຜ່ານມາ, ພ້ອມນີ້ ກອງປະຊຸມຍັງໄດ້ເປັນເອກະສັນຮັບຮອງເອົາທິດທາງ, ແຜນການ 5 ປີ ນັບແຕ່ປີ 2019-2024, ເຊິ່ງມີເນື້ອໃນຕົ້ນຕໍ ດັ່ງນີ້:

  1. ສືບຕໍ່ນໍາພາ​ພະນັກງານ-ສະມາຊິກ​ພັກ ​ເຂົ້າ​ຮ່ວມ​ການຈັດຕັ້ງເຊື່ອມຊຶມບັນດາມະຕິ, ຄໍາ​ສັ່ງຂອງພັກ ແລະ ເອກະສານການເມືອງອື່ນໆ ທີ່​ກະຊວງ​ຈັດ​ຂຶ້ນ ​ແລະ ນໍາມາ​ຈັດ​ຕັ້ງ​ເຜີຍ​ແຜ່ໃຫ້ທົ່ວເຖິງ; ສຶກສາອົບຮົມນຳພາແນວຄິດພະນັກງານ, ສະມາຊິກພັກ ຢ່າງເປັນປະຈຳ.
  2. ເອົາ​ໃຈ​ໃສ່ຊີ້​ນໍາ​ການຄົ້ນຄວ້າ​ນໍາສະ​ເໜີ​ວຽກ​ງານ​ຂະຫຍາຍ​ພັກ​​​ໃຫ້​ວ່ອງ​ໄວ​ທັນ​ເວລາ, ເອົາ​ໃຈ​ໃສ່​ຕິດຕາມ, ຊຸກຍູ້ການຕີລາຄາ​ປະ​ເມີນ​ຜົນວຽກ​ງານກໍ່ສ້າງໜ່ວຍ​ພັກປອດ​ໃສ, ເຂັ້ມແຂງ, ໜັກ​ແໜ້ນ​​​ ໃຫ້ໄດ້ຕາມແຜນການ;
  3. ສືບ​ຕໍ່ຈັດຕັ້ງປະຕິບັດວຽກງານການລົດໄຟ ໃຫ້ຖືກຕ້ອງ, ສອດຄ່ອງ  ແລະ ທັນເວລາກັບສະພາບການພັດທະນາ;
  4. ເອົາໃຈໃສ່ຂຽນແຜນ​ຍຸດ​ທະ​ສາດ​ການ​ພັດທະນາເສັ້ນທາງລົດໄຟ ຂອງ​ຂະ​ແໜງ ຍທຂ ໃຫ້ສໍາເລັດ;
  5. ຄົ້ນຄວ້າການ​ບັນຈຸ​ຊັບຊ້ອນ​ພະນັກງານ ແລະ ປັບປຸງການກຳນົດ​ຕຳ​ແໜ່ງ​ງານ ​ແລະ ຄົ້ນຄວ້າປັບປຸງກົງຈັກ​ການຈັດ​ຕັ້ງ​ບັນດາພະແນກການຕ່າງໆພາຍໃນກົມ ​ ໃຫ້​ທັນກັບສະພາບການ, ກະທັດຮັດ, ​ເຂັ້ມ​ແຂງ ສັກສິດ; ສືບ​ຕໍ່ນໍາພາ​ຄົ້ນຄວ້າ​ການປະຕິບັດນະໂຍບາຍ, ສະຫວັດດີ​ການ​ສັງຄົມຕ່າງໆ ຕໍ່ພະນັກງານບຳນານ ແລະ ພະນັກງານປະຈຳການ ໃຫ້ເປັນ​ປົກກະຕິ; ຄົ້ນຄວ້າສະເໜີຍ້ອງຍໍສັນລະເສີນ ຖັນແຖວພະນັກງານ-ສະມາຊິກພັກ, ພາຍໃນກົມ ໃຫ້​ເໝາະ​ສົມ ​ແລະ ທັນກັບສະພາບການຕົວຈິງຂອງວຽກງານ;
  6. ເອົາໃຈໃສ່ນໍາພາຊຸກຍູ້ສາມອົງການຈັດຕັ້ງມະຫາຊົນຂອງກົມໃຫ້ມີການເຄື່ອນໄຫວຕາມພາລະບົດ ບາດ, ສິດ ແລະ ໜ້າທີ່ຂອງຕົນ;
  7. ​​ເອົາ​ໃຈ​ໃສ່​ຮັກສາຄວາມສະຫງົບປອດໄພພາຍໃນກົມພ້ອມທັງປົກ​ປັກ​ຮັກສາວັດຖຸສີ່ງຂອງສ່ວນລວມຕ່າງໆບໍ່ໃຫ້ຕົກເຮ່ຍເສຍຫາຍ​;
  8. ສູ້​ຊົນ​ສ້າງ​ໜ່ວຍ​ພັກ​ກົມ​ທາງລົດໄຟ​ ໃຫ້​ເປັນ​ໜ່ວຍ​ພັກປອດ​ໃສ, ​ເຂັ້ມ​ແຂງ, ໜັກ​ແໜ້ນ; ປະຕິບັດຫຼັກການລວມສູນປະຊາທິປະໄຕ ຢ່າງເຂັ້ມງວດ, ມີການແບ່ງງານໃຫ້ຄະນະໜ່ວຍພັກ ແລະ ສະມາຊິກພັກຢ່າງຈະແຈ້ງ; ນໍາພາບໍາລຸງສ້າງພະນັກງານຂອງກົມທາງລົດໄຟ ໃນດ້ານຕ່າງໆ ເທົ່າທີ່ມີເງື່ອນໄຂ ຕາມ​ແຜນການ​ກຳນົດ​ພະນັກງານ ນຳພາ-ຄຸ້ມ​ຄອງ​ຂອງ​ກົມ.

       ກອງປະຊຸມໄດ້ຟັງລາຍງານ ແລະ ປະກອບຄໍາຄິດເຫັນຈາກຜູ້ຕາງໜ້າຫຼາຍພາກສ່ວນ ເຊິ່ງແຕ່ລະພາກສ່ວນລ້ວນແລ້ວແຕ່ສະແດງໃຫ້ເຫັນເຖິງຄວາມເປັນເອກະພາບ ຕໍ່ບົດລາຍງານການເມືອງ, ທິດທາງແຜນການ ແລະ ວຽກງານຮອບດ້ານຕໍ່ກອງປະຊຸມ, ການລາຍງານ ແລະ ປະກອບຄໍາຄິດເຫັນ ໄດ້ລົງເລິກລາຍງານຜົນສຳເລັດການຜັນຂະຫຍາຍມະຕິກອງປະຊຸມໃຫຍ່ ເຂົ້າໃນວຽກ​ງານຂອງຕົນ ອັນໄດ້ເຮັດໃຫ້ກອງປະຊຸມມີເນື້ອໃນອຸດົມສົມບູນຂຶ້ນຕື່ມ.

ບັນດາຜູ້ແທນກອງປະຊຸມ ໄດ້ພ້ອມກັນໃຊ້ສິດປະຊາທິປະໄຕຂອງຕົນ ປ່ອນບັດຄັດເລືອກເອົາຄະນະໜ່ວຍພັກຊຸດໃໝ່ ບົດພື້ນຖານຫຼັກການລວມສູນປະຊາທິປະໄຕ ທັງຖືກຕ້ອງສອດຄ່ອງກັບມາດຖານເງື່ອນໄຂ ທີ່ກຳນົດໄວ້, ເຊິ່ງມີຜູ້ອອກຮັບສະໝັກເລືອກຕັ້ງ 05 ສະຫາຍ, ຍິງ 01 ສະຫາຍ ແລະ ເລືອກຕັ້ງໄດ້ 03 ສະຫາຍ:

1)   ສະຫາຍ ແສງທະວີໃສ ມະລີວັນ

2)   ສະຫາຍ ກິດສະໜາ ຈັນທະວຽງ

3)   ສະຫາຍ ຈັນທອນ ໄຊຍະກອນ

4)   ສະຫາຍ ຫິນເພັດ ຫຼ້າຄອນວົງ

5)   ສະຫາຍ ນາງ ແສງຈັນ ບຸດດາໄຊ

  • ກອງປະຊຸມຄັ້ງປະຖົມມະລຶກຂອງໜ່ວຍພັກຮາກຖານກົມ​ທາງລົດໄຟ ສະ​ໄໝທີ IV ໄດ້ເປັນເອກະສັນເລືອກເອົາ ເລຂາ, ຮອງເລຂາ, ປະທານກວດກາ ຂອງ​ໜ່ວຍ​ພັກດັ່ງນີ້:

1)  ສະຫາຍ ແສງທະວີໃສ ມະລີວັນ  ເປັນເລຂາ

2)  ສະຫາຍ ຈັນທອນ ໄຊຍະກອນ ເປັນຮອງເລຂາ

3)  ສະຫາຍ ຫິນເພັດ ຫຼ້າຄອນວົງ ເປັນກໍາມະການ, ທັງ​ເປັນ​ຜູ້​ກວດກາພັກ

     ນອກຈາກ​ນັ້ນ, ກອງປະຊຸມໄດ້ເລືອກຕັ້ງເອົາຜູ້ແທນສົມບູນ ແລະ ຜູ້ແທນສໍາຮອງ ໄປຮ່ວມກອງປະຊຸມໃຫຍ່ ຄັ້ງທີ V ຂອງອົງຄະນະພັກກະຊວງ ໂຍທາທິການ ແລະ ຂົນສົ່ງ, ເຊິ່ງມີຜູ້ອອກຮັບສະໝັກເລືອກຕັ້ງ 06 ສະຫາຍ (ຍິງ 01ສະຫາຍ )ຄື:

1)  ສະຫາຍ ແສງທະວີໃສ ມະລີວັນ

2)  ສະຫາຍ ກິດສະໜາ ຈັນທະວຽງ

3)  ສະຫາຍ ຈັນທອນ ໄຊຍະກອນ

4)  ສະຫາຍ ຫິນເພັດ ຫຼ້າຄອນວົງ

5)  ສະຫາຍ ນາງ ແສງຈັນ ບຸດດາໄຊ

6)  ສະຫາຍ ພາສຸກ ພຸດທະວົງ

     ຜ່ານການປ່ອນບັດເລືອກຕັ້ງຄັດເລືອກໄດ້ຜູ້ແທນສົມບູນ ຈໍານວນ 04 ສະຫາຍ ແລະ ຜູ້ແທນສໍາຮອງ 01 ສະຫາຍ ເພື່ອໄປເຂົ້າຮ່ວມກອງປະຊຸມໃຫຍ່ຂອງອົງຄະນະພັກກະຊວງໂຍທາທິການ ແລະ ຂົນສົ່ງຄັ້ງທີ V ຄື:

  1. ສະຫາຍ ແສງທະວີໃສ ມະລີວັນ
  2. ສະຫາຍ ຈັນທອນ ໄຊຍະກອນ
  3. ສະຫາຍ ກິດສະໜາ ຈັນທະວຽງ
  4. ສະຫາຍ ຫິນເພັດ ຫຼ້າຄອນວົງ

ຜູ້ແທນສໍາຮອງ 01 ສະຫາຍ ຄື:

           5.  ສະຫາຍ ນາງ ແສງຈັນ ບຸດດາໄຊ

       ກອງປະຊຸມໃຫຍ່ໄດ້ຮັບຟັງການໂອ້ລົມຈາກ ສະ​ຫາຍ ປອ. ບຸນຈັນ ສິນທະວົງ, ກຳມະການ​​ສູນ​ກາງ​ພັກ, ເລຂາຄະນະພັກ, ລັດຖະມົນຕີກະຊວງ ໂຍທາທິການ ແລະ ຂົນສົ່ງ ເຊິ່ງສະຫາຍໄດ້ສະແດງຄວາມຍ້ອງຍໍຊົມເຊີຍຕໍ່ການນໍາພາຊີ້​ນໍາຂອງຄະນະພັກຊຸດເກົ່າ ທີ່ໄດ້ຊີ້​ນໍາ-ນຳພາ ພະນັກງານ, ສະມາຊິກພັກ, ລັດຖະກອນ ປະຕິບັດໜ້າທີ່ການເມືອງຂອງຕົນ, ຍາດໄດ້ຜົນສຳເລັດຫຼາຍດ້ານ,  ພ້ອມກັນນັ້ນ ສະຫາຍຍັງໄດ້ສະແດງຄວາມເປັນຫ່ວງເປັນໄຍຕໍ່ຂໍ້ຄົງຄ້າງ ເຊິ່ງໄດ້ຮຽກຮ້ອງໃຫ້ ຄະນະໜ່ວຍພັກຊຸດໃໝ່ ຈະຕ້ອງໄດ້ສືບຕໍ່ປັບປຸງ, ແກ້ໄຂ. ຈາກນັ້ນ, ສະຫາຍ​ໄດ້ໃຫ້ທິດ​ຊີ້ນຳວຽກງານແຕ່ລະດ້ານ, ສຸດທ້າຍ ສະຫາຍຍັງມີຄວາມເຊື່ອໝັ້ນຕໍ່ຄະນະໜ່ວຍພັກຊຸດໃໝ່ ທີ່ຈະສືບຕໍ່ຊີ້​ນໍາ-ນໍາພາ ຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງ​ທີ IV ຂອງໜ່ວຍພັກຮາກຖານກົມ​ທາງລົດໄຟ ໃຫ້ຍາດໄດ້ຜົນງານອັນໃໝ່ ຍິ່ງໃຫຍ່ກວ່າເກົ່າ.

ກອງປະຊຸມຮຽກຮ້ອງມາຍັງສະມາຊິກພັກ, ພະນັກງານ ແລະ ລັດຖະກອນ ຂອງ​ກົມ​ທາງລົດໄຟ ຈົ່ງໄດ້ເຊີດຊູສະຕິ ແລະ ຄວາມຮັບຜິດຊອບການເມືອງຂອງຕົນໃຫ້ສູງຂຶ້ນເລື້ອຍໆ ນໍາເອົາມະຕິກອງປະຊຸມໃຫຍ່ ທີ່ໄດ້ຮັບຮອງເອົາແລ້ວນີ້, ໄປຄົ້ນຄວ້າຈັດຕັ້ງຜັນຂະຫຍາຍດ້ວຍຄວາມຮັບຜິດຊອບສູງ ເຂົ້າໃນວຽກງານຂອງຕົນໃຫ້ມີຜົນສຳເລັດຕາມຄາດໝາຍ ​ເພື່ອເຮັດໃຫ້ວຽກງານ, ກໍ່ສ້າງ​ພັກ-ພະນັກງານ ຫັນປ່ຽນໃໝ່ກ້າວເຂົ້າສູ່ເຮັດໃຫ້ໜ່ວຍພັກມີຄວາມປອດໃສ, ເຂັ້ມແຂງ, ໜັກແໜ້ນໃນຕໍ່ໜ້າ.

Additional information