ກອງປະຊຸມໃຫຍ່ ຄັ້ງທີ VIII ຂອງຄະນະພັກຮາກຖານ ລັດວິສາຫະກິດ ວິສະວະກໍາ ຄົມມະນາຄົມ

ກອງປະຊຸມໃຫຍ່ ຄັ້ງ​ທີ VIII ຂອງຄະນະພັກຮາກຖານລັດວິສາຫະກິດ ວິສະວະກໍາ ຄົມມະນາຄົມ ໄດ້ເປີດຂຶ້ນໃນຕອນເຊົ້າຂອງ ວັນທີ 04/11/2019 ແລະ ດໍາເນີນເປັນເວລາ​ເຄິ່ງວັນ, ພາຍໃຕ້ການເປັນປະທານ ຂອງ ສະຫາຍ ບຸນຕາ ເມກສະຫວັນ, ເລຂາຄະນະພັກຮາກຖານ ລັດວິສາຫະກິດ ວິສະວະກໍາ ຄົມມະນາຄົມ, ອໍານວຍການ ລັດວິສາຫະກິດ ວິສະວະກໍາ ຄົມມະນາຄົມ, ​ໂດຍໃຫ້ກຽດເຂົ້າຮ່ວມໂອ້ລົມຕໍ່ກອງປະຊຸມຂອງ ສະຫາຍ ປອ. ບຸນຈັນ ສິນທະວົງ ກໍາມະການສູນກາງພັກ, ເລຂາຄະນະພັກ, ລັດຖະມົນຕີກະຊວງໂຍທາທິການ ແລະ ຂົນສົ່ງ, ມີບັນດາສະຫາຍເລຂາ, ຮອງເລຂາຄະນະພັກຮາກຖານ, ໜ່ວຍພັກຮາກຖານ ແລະ ຜູ້ແທນກອງປະຊຸມເຂົ້າຮ່ວມຢ່າງພ້ອມພຽງ.

ບັນດາສະຫາຍທີ່ເຂົ້າຮ່ວມກອງປະຊຸມ ໄດ້ຍົກສູງຄວາມຮັບຜິດຊອບ ແລະ ສຸມສະຕິປັນຍາຂອງຕົນເຂົ້າໃນການຄົ້ນຄວ້າປະກອບຄຳຄິດຄຳເຫັນຕໍ່ກອງປະຊຸມຢ່າງກົງໄປກົງມາ ເຮັດໃຫ້ກອງປະຊຸມດໍາເນີນໄປດ້ວຍບັນຍາກາດຟົດຟື້ນ ແລະ ສຳເລັດຕາມຈຸດປະສົງຄາດໝາຍທີ່ວາງໄວ້.

ກອງປະຊຸມໃຫຍ່ ຄັ້ງ​ທີ VIII ຂອງຄະນະພັກຮາກຖານລັດວິສາຫະກິດ ວິສະວະກໍາ ຄົມມະນາຄົມ ໄດ້ລົງປະຊາມະຕິເປັນເອກະສັນ ຮັບຮອງເອົາບັນດາເນື້ອໃນທີ່ສຳຄັນ ຄື: ກອງປະຊຸມໄດ້ພ້ອມກັນຄົ້ນຄວ້າ ແລະ ປະກອບຄໍາຄິດຄໍາເຫັນໃສ່ຮ່າງລາຍງານການເມືອງ, ແລະ ບົດສໍາຫຼວດການນໍາພາລວມຂອງຄະນະພັກຊຸດເກົ່າ, ໃນນັ້ນໄດ້ຕີລາຄາດ້ານດີ, ດ້ານອ່ອນ, ຂໍ້ຄົງຄ້າງ, ສາເຫດ, ບົດຮຽນໃນການນຳພາຊີ້​ນໍາ ແລະ ການຈັດຕັ້ງປະຕິບັດມະຕິກອງປະຊຸມໃຫຍ່ໃນ 5 ປີຜ່ານມາ, ພ້ອມນີ້ ກອງປະຊຸມຍັງໄດ້ເປັນເອກະສັນຮັບຮອງເອົາທິດທາງ, ແຜນການ 5 ປີ ນັບແຕ່ປີ 2019-2023.

ກອງປະຊຸມໄດ້ຟັງລາຍງານ ແລະ ປະກອບຄໍາຄິດເຫັນຈາກຜູ້ຕາງໜ້າ 3 ພາກສ່ວນ ເຊິ່ງແຕ່ລະພາກສ່ວນລ້ວນແລ້ວແຕ່ສະແດງໃຫ້ເຫັນເຖິງຄວາມເປັນເອກະພາບ ຕໍ່ລາຍງານການເມືອງ, ທິດທາງແຜນການ ແລະ ວຽກງານຮອບດ້ານຕໍ່ກອງປະຊຸມ, ການລາຍງານປະກອບຄໍາຄິດເຫັນ ໄດ້ລົງເລິກລາຍງານຜົນສຳເລັດການຜັນຂະຫຍາຍມະຕິກອງປະຊຸມໃຫຍ່ ເຂົ້າໃນວຽກ​ງານຂອງຕົນ ອັນໄດ້ເຮັດໃຫ້ກອງປະຊຸມມີເນື້ອໃນອຸດົມສົມບູນຂຶ້ນຕື່ມ.

ຜູ້ແທນກອງປະຊຸມ ໄດ້ພ້ອມກັນໃຊ້ສິດປະຊາທິປະໄຕຂອງຕົນ ປ່ອນບັດຂັດເລືອກເອົາຄະນະໜ່ວຍພັກຊຸດໃໝ່ ບົດພື້ນຖານຫຼັກການລວມສູນປະຊາທິປະໄຕ ທັງຖືກຕ້ອງສອດຄ່ອງກັບມາດຖານເງື່ອນໄຂທີ່ກຳນົດໄວ້, ເຊິ່ງມີຜູ້ອອກຮັບສະໝັກເລືອກຕັ້ງ 7 ສະຫາຍ, ຍິງ 2 ສະຫາຍ ແລະ ເລືອກຕັ້ງໄດ້ 5 ສະຫາຍ, ຍິງ 1 ສະຫາຍ ຄື:

1)   ສະຫາຍ ສົມພິດ ບຸນນະຜົນ

2)   ສະຫາຍ ບຸນຕາ ເມກສະຫວັນ

3)   ສະຫາຍ ຄຳພອນ ສໍພາບມີໄຊ

4)   ສະຫາຍ ວັນດີ ວໍຣະສັກ

5)   ສະຫາຍ ນາງ ແຍທອງ ຈັນທະພອນ

ກອງປະຊຸມຄັ້ງປະຖົມມະລຶກຂອງຄະນະພັກຮາກຖານລັດວິສາຫະກິດ ວິສະວະກໍາ ຄົມມະນາຄົມ ຄັ້ງ​ທີ VIII ໄດ້ເປັນເອກະສັນເລືອກເອົາ ເລຂາ, ຮອງເລຂາ, ປະທານກວດກາ ຂອງ​ໜ່ວຍ​ພັກ ດັ່ງນີ້:

1)  ສະຫາຍ ບຸນຕາ ເມກສະຫວັນ ເປັນເລຂາ.

2)  ສະຫາຍ ສົມພິດ ບຸນນະຜົນ ເປັນຮອງເລຂາ

3)  ສະຫາຍ ຄຳພອນ ສໍພາບມີໄຊ ເປັນກໍາມະການ, ທັງ​ເປັນ​ຜູ້​ກວດກາ.

4)  ສະຫາຍ ວັນດີ ວໍຣະສັກ ເປັນຄະນະ

5)   ສະຫາຍ ນາງ ແຍທອງ ຈັນທະພອນ ເປັນຄະນະ

 ກອງປະຊຸມໄດ້ເລືອກຕັ້ງເອົາຜູ້ແທນສົມບູນ ແລະ ຜູ້ແທນສໍາຮອງ ໄປຮ່ວມກອງປະຊຸມໃຫຍ່ ຄັ້ງທີ V ຂອງອົງຄະນະພັກກະຊວງ ໂຍທາທິການ ແລະ ຂົນສົ່ງ, ເຊິ່ງມີຜູ້ອອກຮັບສະໝັກເລືອກຕັ້ງ 17 ສະຫາຍ, ຍິງ 2 ສະຫາຍ ແລະ ເລືອກຕັ້ງໄດ້ 14 ສະຫາຍ, ຍິງ 1 ສະຫາຍ ແລະ ຜູ້ແທນສໍາຮອງ 3 ສະຫາຍ, ຍິງ 1 ສະຫາຍ.

ກອງປະຊຸມໃຫຍ່ໄດ້ຮັບຟັງການໂອ້ລົມຈາກ ສະ​ຫາຍ ປອ. ບຸນຈັນ ສິນທະວົງ, ກຳມະການ​​ສູນ​ກາງ​ພັກ, ເລຂາຄະນະພັກ, ລັດຖະມົນຕີກະຊວງ ໂຍທາທິການ ແລະ ຂົນສົ່ງ ເຊິ່ງສະຫາຍໄດ້ສະແດງຄວາມຍ້ອງຍໍຊົມເຊີຍຕໍ່ການນຳພາຊີ້​ນໍາຂອງຄະນະພັກຮາກ​ຖານລັດວິສາຫະກິດ ວິສະວະກໍາ ຄົມມະນາຄົມຊຸດເກົ່າ ທີ່ໄດ້ນຳພາຊີ້​ນໍາພະນັກງານ, ສະມາຊິກພັກ, ລັດຖະກອນ ປະຕິບັດໜ້າທີ່ການເມືອງຂອງຕົນ, ຍາດໄດ້ຜົນສຳເລັດຫຼາຍດ້ານ. ພ້ອມກັນນັ້ນ, ສະຫາຍຍັງໄດ້ສະແດງຄວາມເປັນຫ່ວງເປັນໄຍຕໍ່ດ້ານອ່ອນ, ຂໍ້ຄົງຄ້າງ ເຊິ່ງໄດ້ຮຽກຮ້ອງໃຫ້ຄະນະພັກຊຸດ ໃໝ່ຈະຕ້ອງໄດ້ສືບຕໍ່ປັບປຸງ, ແກ້ໄຂ ຈາກນັ້ນສະຫາຍ​ໄດ້ໃຫ້ທິດ​ຊີ້ນຳວຽກງານແຕ່ລະດ້ານ, ສະຫາຍມີຄວາມເຊື່ອໝັ້ນຕໍ່ຄະນະພັກຮາກ​ຖານຊຸດໃໝ່ ທີ່ຈະສືບຕໍ່ນຳພາຊີ້​ນໍາຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງ​ທີ VIII ຂອງຄະນະພັກຮາກຖານລັດວິສາຫະກິດ ວິສະວະກໍາ ຄົມມະນາຄົມ ໃຫ້ຍາດໄດ້ຜົນງານ ແລະ ມີຜົນສໍາເລັດຍິ່ງ ໃຫຍ່ກວ່າເກົ່າ.

Additional information