ກອງປະຊຸມໃຫຍ່ຄັ້ງທີ VII ຂອງຄະນະໜ່ວຍພັກຮາກຖານ ລັດວິສາຫະກິດ ກໍ່ສ້າງຄົມມະນາຄົມ

ກອງປະຊຸມໃຫຍ່ ຄັ້ງ​ທີ VII ຂອງຄະນະໜ່ວຍພັກຮາກຖານ ລັດວິສາຫະກິດ ກໍ່ສ້າງຄົມມະນາຄົມ ໄດ້ເປີດຂຶ້ນໃນຕອນບ່າຍຂອງ ວັນທີ 06/11/2019 ແລະ ດໍາເນີນເປັນເວລາ​ເຄິ່ງວັນ, ພາຍໃຕ້ການເປັນປະທານ ຂອງ ສະຫາຍ ອິນປັນ ຟອງແມ່ຂອງ, ເລຂາໜ່ວຍພັກຮາກຖານ ລັດວິສາຫະກິດ ກໍ່ສ້າງຄົມມະນາຄົມ, ອໍານວຍການ ລັດວິສາຫະກິດ ກໍ່ສ້າງຄົມມະນາຄົມ, ໃຫ້ກຽດເຂົ້າຮ່ວມໂອ້ລົມຕໍ່ກອງປະຊຸມຂອງ ສະຫາຍ ປອ ບຸນຈັນ ສິນທະວົງ ກໍາມະການສູນກາງພັກ, ເລຂາຄະນະພັກ, ລັດຖະມົນຕີກະຊວງໂຍທາທິການ ແລະ ຂົນສົ່ງ, ມີບັນດາສະຫາຍເລຂາ, ຮອງເລຂາຄະນະພັກຮາກຖານ, ໜ່ວຍພັກຮາກຖານ ແລະ ຜູ້ແທນກອງປະຊຸມເຂົ້າຮ່ວມຢ່າງພ້ອມພຽງ.

ບັນດາສະຫາຍທີ່ເຂົ້າຮ່ວມກອງປະຊຸມ ໄດ້ຍົກສູງຄວາມຮັບຜິດຊອບ ແລະ ສຸມສະຕິປັນຍາຂອງຕົນເຂົ້າໃນການຄົ້ນຄວ້າປະກອບຄຳຄິດຄຳເຫັນຕໍ່ກອງປະຊຸມຢ່າງກົງໄປກົງມາ ເຮັດໃຫ້ກອງປະຊຸມດໍາເນີນໄປດ້ວຍບັນຍາກາດຟົດຟື້ນ ແລະ ສຳເລັດຕາມຈຸດປະສົງຄາດໝາຍທີ່ວາງໄວ້.

ກອງປະຊຸມໃຫຍ່ຄັ້ງ​ທີ VII ຂອງໜ່ວຍພັກຮາກຖານ ລັດວິສາຫະກິດ ກໍ່ສ້າງຄົມມະນາຄົມ, ໄດ້ລົງປະຊາມະຕິເປັນເອກະສັນ ຮັບຮອງເອົາບັນດາເນື້ອໃນທີ່ສຳຄັນຄື: ກອງປະຊຸມໄດ້ພ້ອມກັນຄົ້ນຄວ້າ ແລະ ປະກອບຄໍາຄິດຄໍາເຫັນໃສ່ຮ່າງລາຍງານການເມືອງ ແລະ ບົດສໍາຫຼວດການນໍາພາລວມຂອງຄະນະພັກຊຸດເກົ່າ, ໃນນັ້ນໄດ້ຕີລາຄາດ້ານດີ, ດ້ານອ່ອນ, ຂໍ້ຄົງຄ້າງ, ສາເຫດ, ບົດຮຽນໃນການນຳພາຊີ້​ນໍາ ແລະ ການຈັດຕັ້ງປະຕິບັດມະຕິກອງປະຊຸມໃຫຍ່ໃນ 5 ປີຜ່ານມາ, ພ້ອມນີ້ກອງປະຊຸມຍັງໄດ້ເປັນເອກະສັນຮັບຮອງເອົາທິດທາງ, ແຜນການ 5 ປີ ນັບແຕ່ປີ 2019-2023.

ກອງປະຊຸມໄດ້ຟັງລາຍງານ ແລະ ປະກອບຄໍາຄິດເຫັນຈາກຜູ້ຕາງໜ້າ 3 ພາກສ່ວນ ເຊິ່ງແຕ່ລະພາກສ່ວນລ້ວນແລ້ວແຕ່ສະແດງໃຫ້ເຫັນເຖິງຄວາມເປັນເອກະພາບ ຕໍ່ລາຍງານການເມືອງ, ທິດທາງແຜນການ ແລະ ວຽກງານຮອບດ້ານຕໍ່ກອງປະຊຸມ, ການລາຍງານປະກອບຄໍາຄິດເຫັນ ໄດ້ລົງເລິກລາຍງານຜົນສຳເລັດການຜັນຂະຫຍາຍມະຕິກອງປະຊຸມໃຫຍ່ ເຂົ້າໃນວຽກ​ງານຂອງຕົນ ອັນໄດ້ເຮັດໃຫ້ກອງປະຊຸມມີເນື້ອໃນອຸດົມສົມບູນຂຶ້ນຕື່ມ.

ຜູ້ແທນກອງປະຊຸມ ໄດ້ພ້ອມກັນໃຊ້ສິດປະຊາທິປະໄຕຂອງຕົນ ປ່ອນບັດຂັດເລືອກເອົາຄະນະໜ່ວຍພັກຊຸດໃໝ່ ບົດພື້ນຖານຫຼັກການລວມສູນປະຊາທິປະໄຕ ທັງຖືກຕ້ອງສອດຄ່ອງກັບມາດຖານເງື່ອນໄຂທີ່ກຳນົດໄວ້, ເຊິ່ງມີຜູ້ອອກຮັບສະໝັກເລືອກຕັ້ງ 5 ສະຫາຍ, ຍິງ 2 ສະຫາຍ ແລະ ເລືອກຕັ້ງໄດ້ 3 ສະຫາຍ, ຍິງ 1 ສະຫາຍ ຄື:

1)   ສະຫາຍ ອິນປັນ ຟອງແມ່ຂອງ

2)   ສະຫາຍ ແກ້ວອຸດອນ ຈັນທະວົງ

3)   ສະຫາຍ ນາງ ໄຜ່ທອງ ເຮືອງມະນີພັນ

ກອງປະຊຸມຄັ້ງປະຖົມມະລຶກຂອງໜ່ວຍພັກຮາກຖານລັດວິສາຫະກິດ ວິສະວະກໍາ ຄົມມະນາຄົມ ຄັ້ງ​ທີ VII ໄດ້ເປັນເອກະສັນເລືອກເອົາ ເລຂາ, ຮອງເລຂາ, ປະທານກວດກາ ຂອງ​ໜ່ວຍ​ພັກ ດັ່ງນີ້:

1)  ສະຫາຍ ອິນປັນ ຟອງແມ່ຂອງ ເປັນເລຂາ.

2)  ສະຫາຍ ແກ້ວອຸດອນ ຈັນທະວົງ ເປັນຮອງເລຂາ

3)  ສະຫາຍ ນາງ ໄຜ່ທອງ ເຮືອງມະນີພັນ ເປັນກໍາມະການ, ທັງ​ເປັນ​ຜູ້​ກວດກາ.

 ກອງປະຊຸມໄດ້ເລືອກຕັ້ງເອົາຜູ້ແທນສົມບູນ ແລະ ຜູ້ແທນສໍາຮອງ ໄປຮ່ວມກອງປະຊຸມໃຫຍ່ ຄັ້ງທີ V ຂອງອົງຄະນະພັກກະຊວງ ໂຍທາທິການ ແລະ ຂົນສົ່ງ, ເຊິ່ງມີຜູ້ອອກຮັບສະໝັກເລືອກຕັ້ງ 8 ສະຫາຍ, ຍິງ 2 ສະຫາຍ ແລະ ເລືອກຕັ້ງໄດ້ 6 ສະຫາຍ, ຍິງ 2 ສະຫາຍ ແລະ ຜູ້ແທນສໍາຮອງ 2 ສະຫາຍ.

ກອງປະຊຸມໃຫຍ່ໄດ້ຮັບຟັງການໂອ້ລົມຈາກ ສະ​ຫາຍ ປອ. ບຸນຈັນ ສິນທະວົງ, ກຳມະການ​​ສູນ​ກາງ​ພັກ, ເລຂາຄະນະພັກ, ລັດຖະມົນຕີກະຊວງ ໂຍທາທິການ ແລະ ຂົນສົ່ງ ເຊິ່ງສະຫາຍ​ເລຂາ​ຄະນະ​ພັກ​ກະຊວງ ໄດ້ສະແດງຄວາມຍ້ອງຍໍຊົມເຊີຍຕໍ່ການນຳພາຊີ້​ນໍາຂອງຄະນະພັກຊຸດເກົ່າ ທີ່ໄດ້ນຳພາຊີ້​ນໍາສະມາຊິກພັກ, ພະນັກງານ ປະຕິບັດໜ້າທີ່ການເມືອງຂອງຕົນ, ຍາດໄດ້ຜົນສຳເລັດຫຼາຍດ້ານ. ພ້ອມກັນນັ້ນ, ສະຫາຍຍັງໄດ້ສະແດງຄວາມເປັນຫ່ວງເປັນໄຍຕໍ່ດ້ານອ່ອນ, ຂໍ້ຄົງຄ້າງ ເຊິ່ງໄດ້ຮຽກຮ້ອງໃຫ້ຄະນະພັກຊຸດໃໝ່ ຈະຕ້ອງໄດ້ສືບຕໍ່ປັບປຸງ, ແກ້ໄຂ ຈາກນັ້ນສະຫາຍຄະນະ​ພັກ​ກະຊວງ​ໄດ້ໃຫ້ທິດ​ຊີ້ນຳວຽກງານແຕ່ລະດ້ານ, ສະຫາຍມີຄວາມເຊື່ອໝັ້ນວ່າຕໍ່ຄະນະພັກຊຸດໃໝ່ ທີ່ຈະສືບຕໍ່ນຳພາຊີ້​ນໍາຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງ​ທີ VII ຂອງ   ໜ່ວຍພັກຮາກຖານ ລັດວິສາຫະກິດ ກໍ່ສ້າງຄົມມະນາຄົມໃຫ້ຍາດໄດ້ຜົນງານ ແລະ ມີຜົນສໍາເລັດຍິ່ງ ໃຫຍ່ກວ່າເກົ່າ.

Additional information