ກອງປະຊຸມແລກປ່ຽນບົດຮຽນ ຫລື ວິທີການກໍ່ສ້າງອາຄານແບບ ປະສົມປະສານທີ່ງ່າຍດາຍ, ຮັກສາສະ ພາບແວດລ້ອມ ແລະ ປະຢັດງົບປະມານ

ໃນວັນທີ 21 ມີນາ 2013 ຢູ່ທີ່ຫ້ອງປະຊຸມເບີ 3 ກະຊວງ ຍທຂ ໄດ້ຈັດກອງປະຊຸມແລກປ່ຽນບົດຮຽນ ຫຼື ວິທີ ການກໍ່ສ້າງອາຄານ ແບບປະສົມປະສານທີ່ງ່າຍດາຍ, ຮັກສາສະພາບແວດລ້ອມ ແລະ ປະຢັດງົບປະມານ, ໂດຍການ ເປັນປະທານຂອງ ທ່ານ ລັດຕະນະມະນີ ຄູນນີວົງ ລັດຖະມົນຕີຊ່ວຍວ່າການກະຊວງ ຍທຂ ແລະ ທ່ານ ດາໂຕ ທັນໄຕຮິນ ເອກອັກຄະລັດຖະທູດ ປະເທດສາທາລະນະລັດ ມາເລເຊຍ ປະຈຳ ລາວ ພ້ອມດ້ວຍພະນັກງານ ວິຊາການ ທີ່ກ່ຽວຂ້ອງເຂົ້າຮ່ວມຢ່າງພ້ອມພຽງ. ບໍລິສັດ PK Syneregies BHD ຈາກປະເທດມາເລເຊຍ ໄດ້ນຳສະເໜີວິທີການ ກໍ່ສ້າງອາຄານ ແບບປະສົມປະສານທີ່ງ່າຍດາຍ, ທັງເປັນການຮັກສາ ສະພາບແວດລ້ອມ ແລະ ປະຢັດ ຊຶ່ງເຫັນວ່າ ມີປະໂຫຍດ ແລະ ມີຄວາມເໝາະສົມ ໃນຫລາຍດ້ານທີ່ສາມດນຳໄປໝູນໃຊ້ ເຂົ້າໃນວຽກງານການກໍ່ສ້າງ ຢູ່ປະເທດ ຂອງພວກເຮົາ. ຄະນະຜູ້ເທນທັງສອງຝ່າຍ ທີ່ເຂົ້າຮ່ວມກອງປະຊຸມກໍໄດ້ເອົາໃຈໃສ່ ປຶກສາຫາລືກັນ, ຈາກນັ້ນ ທ່ານ ລັດຕະນະມະນີ ຄູນນີວົງ ລັດຖະມົນຕີຊ່ວຍວ່າການ ກະຊວງ ຍທຂ ຕາງໜ້າໃຫ້ຄະນະນຳກະຊວງ ຂໍສະແດງຄວາມ ຂອບໃຈມາຍັງ ທ່ານເອກອັກຄະລັດຖະທູດ ມາເລເຊຍ ປະຈຳລາວ ແລະ ບໍລິສັດ PK Syneregies BHD ຈາກປະເທດ ມາເລເຊຍ ທີ່ໄດ້ເດີນທາງມາ ຖອດຖອນບົດຮຽນອັນມີຄ່າໃນຄັ້ງນີ້, ທ່ານໄດ້ກ່າວອີກວ່າ ຫວັງຢ່າງຍິ່ງວ່າໃນອະນາຄົດ ທ່ານທູດຈະໃຫ້ການຮ່ວມມື ແລະຊ່ວຍເຫຼືອຈັດກອງປະຊຸມໃນລັກສະນະນີ້ອີກ ແລະ ກອງປະຊຸມເທື່ອນີ້ ແມ່ນບັນລຸ ໝາກຜົນຕາມເປົ້າໝາຍທີ່ວາງໄວ້ ແລະສຸດທ້າຍ ທ່ານໄດ້ສະເໜີໃຫ້ບັນດາຜູ້ທີ່ເຂົ້າຮ່ວມກອງປະຊຸມຈົ່ງນຳເອົາເຕັກນິກ ວິທີການນີ້ ໄປຄົ້ນຄ້ວາຖອດຖອນບົດຮຽນ ແລະ ໜູນໃຊ້ເຂົ້າໃນການປະຕິບັດວຽກງານການກໍ່ສ້າງ ຢູ່ ສປປ ລາວ.

Additional information