ຂ່າວພາຍໃນກະຊວງ

ກະຊວງໂຍທາທິການ ແລະ ຂົນສົ່ງ ໄດ້ຈັດກອງປະຊຸມຝຶກອົບຮົມສ້າງຄວາມເຂັ້ມແຂງໃຫ້ຄະນະປະສານງານເພື່ອສົ່ງຄວາມກ້າວໜ້າຂອງແມ່ຍິງ ຍທຂ ແຂວງ ແລະ ຍທຂ ເມືອງ

ກະຊວງໂຍທາທິການ ແລະ ຂົນສົ່ງ ໄດ້ຈັດກອງປະຊຸມຝຶກອົບຮົມສ້າງຄວາມເຂັ້ມແຂງໃຫ້ຄະນະປະສານງານເພື່ອສົ່ງຄວາມກ້າວໜ້າຂອງແມ່ຍິງ ຍທຂ ແຂວງ ແລະ ຍທຂ ເມືອງ ເພື່ອໃຫ້ກາຍເປັນຄູຝຶກ, ກອງປະຊຸມໃນຄັ້ງນີ້ໄດ້ຈັດຂື້ນທີ່ພະແນກ ຍທຂ ແຂວງໄຊຍະບູລີ, ໃນວັນທີ 11-12 ກຸມພາ 2020 ໂດຍການເປັນປະທານຂອງທ່ານ ນາງ ຈັນຖະໜອມ ສຸລິໂຍ ຮອງຫົວຫົວໜ້າຫ້ອງການ ແລະ ທ່ານ ພວງຄຳ ພີລະເກດ ຮອງຫົວໜ້າພະແນກ ຍທຂ ແຂວງໄຊຍະບູລີ ມີຜູ້ເຂົ້າຮ່ວມຝຶກອົບຮົມທັງໝົດ 45ທ່ານ ຍິງ 24ທ່ານ.

ໃນການຈັດກອງປະຊຸມຄັ້ງນີ້ເພື່ອຈັດຕັ້ງຜັນຂະຫຍາຍແຜນຍຸດທະສາດ ເພື່ອສົ່ງເສີມຄວາມກ້າວໜ້າຂອງແມ່ຍິງ   ແລະ ແມ່-ເດັກ ໃນຂະແໜງ ໂຍທາທິການ ແລະ ຂົນສົ່ງ ( 2014-2025 ) ໃຫ້ບັນລຸ ແລະ ປະກົດຜົນເປັນຈິງ, ດັ່ງນັ້ນ, ກະຊວງໂຍທາທິການ ແລະ ຂົນສົ່ງ ຈຶ່ງໄດ້ຈັດຝຶກອົບຮົມຂື້ນ ເພື່ອແນ່ໃສ່ການສ້າງຄວາມເຂັ້ມແຂງໃຫ້ຄະນະປະສານງານ ຂັ້ນແຂວງ ແລະ ຂັ້ນເມືອງໃຫ້ກາຍເປັນຄູຝຶກ, ນອກຈາກນັ້ນ, ກອງປະຊຸມໄດ້ນຳສະເໜີແຜນຍຸດທະສາດ ເພື່ອສົ່ງເສີມຄວາມກ້າວໜ້າຂອງແມ່ຍິງໃນຂະແໜງ ຍທຂ,  ການຮ່າງ, ການຄຸ້ມຄອງ ແລະ ບໍລິຫານເອກະສານ ແລະ ທັກສະໃນການນຳສະເໜີ ທັງນີ້ກໍ່ເພື່ອສ້າງຄວາມຮັບຮູ້,  ເຂົ້າໃຈ ແລະ ໄດ້ນຳພາຈັດຕັ້ງປະຕິບັດກ່ຽວກັບວຽກງານສົ່ງເສີມຄວາມກ້າວໜ້າຂອງແມ່ຍິງກໍ່ຄຶແຜນຍຸດທະສາດ ແລະ ປື້ມຄູ່ມື, ການວາງແຜນກວດກາ, ຕິດຕາມ ແລະ ປະເມີນຜົນໃນຂະແໜງ ໂຍທາທິການ ແລະ ຂົນສົ່ງ, ຖືໄດ້ວ່າເປັນບົດຮຽນທີ່ດີໃນການພັດທະນາແກ່ຄະນະປະສານງານຂັ້ນແຂວງ ແລະ ຂັ້ນເມືອງ ທີ່ຕ້ອງສູ້ຊົນປະຕິບັດໃຫ້ບັນລຸເປົ້າໝາຍ ຕັ້ງແຕ່ປີ 2014-2025 ຂອງແຜນຍຸດທະສາດ ໃຫ້ມີບຸກຄະລາກອນເພດຍິງໃຫ້ໄດ້ 30% ໃນທົ່ວຂະແໜງ ຍທຂ, ໃນການປະຊຸມໄດ້ມີການແລກປ່ຽນສົນທະນານຳກັນເພື່ອຕອບບັນຫາ ແລະ ຂໍ້ຂ້ອງໃຈຕ່າງໆ, ກອງປະຊຸມໄດ້ດຳເນີນດ້ວຍຜົນສຳເລັດຕາມແຜນທີ່ໄດ້ວາງໄວ້.

ກອງປະຊຸມເຜີຍແຜ່ແຜນຂໍ້ຕົກລົງວ່າດ້ວຍການຄຸ້ມຄອງການປຸງສ້າງ

ກະຊວງໂຍທາທິການ ແລະ ຂົນສົ່ງ ຮ່ວມກັບຫ້ອງວ່າການນະຄອນຫຼວງວຽງຈັນ ໄດ້ຈັດກອງປະຊຸມເຜີຍແຜ່ຂໍ້ຕົກລົງວ່າດ້ວຍ ການຄຸ້ມຄອງການປຸງສ້າງ (ສະບັບປັບປຸງ)  ດ້ານກົດລະບຽບໃນການຄຸ້ມຄອງ ການປຸງສ້າງໃຫ້ແກ່ບັນດາເຈົ້າໜ້າທີ່ຂັ້ນທ້ອງຖິ່ນ ແລະ ຂັ້ນທຸລະກິດທີ່ເຄື່ອນໄຫວ ໃນ 4 ເມືອງໃນຂອງນະຄອນຫຼວງວຽງຈັນ, ເພື່ອສ້າງຄວາມຮັບຮູ້ກ່ຽວກັບບັນດາລະບຽບ ແລະ ຂັ້ນຕອນໃນການຂໍອະນຸຍາດ ປຸກສ້າງໃໝ່ ແລະ ຮັບປະກັນການຈັດຕັ້ງປະຕິບັດໃຫ້ມີຄວາມສອດຄ່ອງກັນ, ກອງປະຊຸມໄດ້ຈັດຂື້ນໃນວັນທີ 7 ກຸມພາ 2020 ທີ່​ໂຮງ​ແຮມດອນຈັນພາເລດ, ໂດຍການເປັນປະທານ ຂອງທ່ານ ນາງ ວິໄລຄຳ ໂພສາລາດ ຮອງລັດຖະມົນຕີ ກະຊວງ ຍທຂ; ທ່ານ ພູຂົງ ບັນນາວົງ ຮອງເຈົ້າຄອນ ນະຄອນຫຼວງວຽງຈັນ ​ແລະ ທ່ານ ພົງສະຫວັນ ພົມກອງ ຫົວໜ້າຫ້ອງການ ອົງການການເງິນສາກົນ, ມີບັນດາເອກອັກຄະລັກຖະທູດ ຍີ່ປຸ່ນ ປະຈໍາລາວ, ມີບັນດາຫົວໜ້າກົມ, ຮອງກົມເຄຫາ ແລະຜັງເມືອງ, ຫົວໜ້າສະຖາບັນ, ຮອງສະຖາບັນຄົ້ນຄວ້າ ຍທຂ, ຫົວໜ້າພະແນກ, ຮອງພະແນກ ຍທຂ ແລະຜູ້ຕາງໜ້າ ພະແນກອ້ອມຂ້າງ ລວມທັງລັດວິສາຫະກິດຕິດຕັ້ງໄຟຟ້າ, ຕິດຕັ້ງນໍ້າປະປານະຄອນຫຼວງວຽງຈັນ, ບັນດາທ່ານເຈົ້າເມືອງ, ຮອງເຈົ້າເມືອງ, ຫ້ອງການອ້ອມຂ້າງ, ນາຍບ້ານ ແລະຫົວໜ່ວຍທຸລະກິດ ພາຍໃນ 4 ຕົວເມືອງໃນນະຄອນຫຼວງວຽງຈັນ ກໍ່ໄດ້ໃຫ້ກຽດເຂົ້າຮ່ວມຢ່າງພ້ອມພຽງ.

ກອງປະຊຸມໃນຄັ້ງນີ້ແມ່ນເພື່ອຈັດຕັ້ງປະຕິບັດ ຜັນຂະຫຍາຍ ແລະໂຄສະນາເຜີຍແຜ່ ນິຕິກໍາລຸ່ມກົດໝາຍ, ບົດແນະນຳຕ່າງໆ ທີ່ຕິດພັນກັບວຽກງານ, ການວາງແຜນຂະຫຍາຍຜັງເມືອງ, ການຄຸ້ມຄອງ, ກວດກາ, ຕິດຕາມການປຸກສ້າງ ແລະການສະໜອງຂໍ້ມູນຂ່າວສານທີ່ຈໍາເປັນໃຫ້ແກ່ສັງຄົມ, ບັນດາພະແນກການ, ເມືອງ, ບ້ານ ແລະບັນດາຫົວໜ່ວຍທຸລະກິດທີ່ກ່ຽວຂ້ອງ ໃນຂອບເຂດ 4 ຕົວເມືອງໃນນະຄອນຫຼວງວຽງຈັນ, ໃຫ້ກ້າວເຂົ້າສູ່ລວງເລີກ ແລະມີຄວາມເຂົ້າໃຈຕໍ່ວຽກງານການຄຸ້ມຄອງຜັງເມືອງໃຫ້ ກ້ວາງຂວາງກວ່າເກົ່າ, ກອງປະຊຸມໃນຄັ້ງນີ້ຈະມີການນຳສະເໜີຢູ່ 5 ຫົວຂໍ້ຄື: ແຜນຜັງການນໍາໃຊ້ທີ່ດິນນະຄອນຫຼວງວຽງຈັນ (ເງື່ອນໄຂການອະນຸຍາດປຸກສ້າງ); ຂໍ້ຕົກລົງວ່າດ້ວຍການຄຸ້ມຄອງການປຸກສ້າງ (ສະບັບປັບປຸງ); ຕົວຢ່າງການອອກອະນຸຍາດປຸງສ້າງຢູ່ໃນນະຄອນຫຼວງວຽງຈັນ; ຂໍ້ຕົກລົງວ່າດ້ວຍມາດຕະ ຖານເຕັກນິກການປຸງສ້າງ ແລະປໍ້ານໍ້າມັນເຊື້ອໄຟ ແລະວິທີການປະເມີນການປຸກສ້າງຂອງທະນາຄານໂລກ, ຫຼັງຈາກໄດ້ຮັບຟັງການນໍາສະເໜີຫົວຂໍ້ຕ່າງໆ, ບັນດາແຂກຜູ້ເຂົ້າຮ່ວມກອງປະຊຸມ ໄດ້ມີໂອກາດສະເໜີ ຄໍາຖາມ ທີ່ເປັນຂໍ້ຫຍ້ງຍາກ ເພື່ອແລກປ່ຽນຄໍາຄິດເຫັນ ໃນການປັບປຸງການຂໍອະນຸຍາດປຸກສ້າງ ໃນນະຄອນຫຼວງວຽງຈັນ ແລະດໍາເນີນທຸລະກິດ ໃນຂະແໜງການກໍ່ສ້າງ ເພື່ອຄວາມກະຈ່າງແຈ້ງແກ້ທຸກບັນຫາ ແລະທຸກຄຳຖາມ ເພື່ອການປະຕິບັດຕົວຈິງໃຫ້ມີປະສິດທິຜົນດີ, ກອງປະຊົມໄດ້ດໍາເນີນເປັນເວລາ 1 ວັນເຕັ້ມ, ແລະໄດ້ອັດລົງດ້ວຍໝາກຜົນອັນຈົບງາມ.

ກະຊວງ ຍທຂ ຈັດປາຖະກະຖາ ມູນເຊື້ອການກຳເນີດ ແລະ ເຕີບໃຫຍ່ຂະຫຍາຍຕົວຂອງສະຫະພັນກຳມະບານລາວ ຄົບຮອບ 64 ປິ

ເພື່ອເປັນການສະເຫຼີມສະຫຼອງ 64 ປີ ແຫ່ງການເຕີບໃຫຍ່ຂະຫຍາຍຕົວ ຂອງອົງການຈັດຕັ້ງກຳມະບານລາວ, ໃຫ້ມີເນື້ອໃນມີຄວາມໝາຍສຳຄັນຢ່າງເລີກເຊິ່ງ, ກ້ວາງຂວາງ ທົ່ວສະມາຊິກກຳມະບານ, ຊົນຊັ້ນກຳມະກອນ ແລະ ຊາວຜູ້ອອກແຮງງານລາວບັນດາເຜົ່າ. ຍ້ອນເຫັນໄດ້ເຖິງວັນສໍາຄັນດັ່ງກ່າວ, ໃນຕອນເຊົ້າຂອງວັນທີ 12 ກຸມພາ 2020, ຢູ່ທີ່ຫ້ອງປະຊຸມໃຫຍ່ກະຊວງ ຍທຂ ໄດ້ຈັດປາຖະກະຖາວັນສ້າງຕັ້ງອົງການກຳມະບານລາວ ຄົບຮອບ 64 ປິ ຂຶ້ນ, ໂດຍໃຫ້ກຽດປາຖະກະຖາໂດຍ ສະຫາຍ ​ແສງ​ດາວ​ວີ ກັດຕິ​ຍະ​ສັກ, ຄະນະ​ບໍລິຫານ​ງານ​ສູນ​ກາງສະຫະພັນກຳມະບານລາວ, ປະທານສະຫະພັນກຳມະບານກະຊວງ, ຮອງ​ຫົວໜ້າ​ກົມ​ຈັດ​ຕັ້ງ ​ແລະ ພະນັກງານ; ເປັນກຽດເຂົ້າຮ່ວມມີບັນດາສະຫາຍຄະນະພັກ, ຜູ້ຊີ້ນຳອົງການຈັດຕັ້ງມະຫາຊົນ, ບັນນດາສະຫາຍປະທານ, ຮອງປະທານ, ຄະນະບໍລິຫານງານສະຫະພັນກຳມະບານກະຊວງ, ສະຫາຍປະທານ, ຮອງປະທານຫນ່ວຍກຳມະບານຮາກຖານ, ທ່ານຮອງຫົວໜ້າກົມ, ສະຖາບັນ, ກອງວິຊາການ, ຫົວຫນ້າພະແນກ, ຮອງຫົວຫນ້າພະແນກ, ພະນັກງານ-ປະລິນຍາເອກ, ບັນດາ​ຄະນະລັດວິສາຫະກິດອ້ອມ​ຂ້າງກະຊວງ ຍທຂ ແລະ ສະມາຊິກກຳມະບານ.

ໃນການປາຖະກະຖາຄັ້ງນີ້ ສະຫາຍ ແສງ​ດາວ​ວີ ກັດຕິ​ຍະ​ສັກ ຄະນະ​ບໍລິຫານ​ງານ​ສູນ​ກາງສະຫະພັນກຳມະບານລາວ, ປະທານສະຫະພັນກຳມະບານກະຊວງ, ຮອງ​ຫົວໜ້າ​ກົມ​ຈັດ​ຕັ້ງ ​ແລະ ພະນັກງານ ໄດ້ຍົກໃຫ້ເຫັນເຖິງປະວັດການກຳເນີດ ແລະ ເຕີບໃຫຍ່ຂະຫຍາຍຕົວຂອງສະຫະພັນກຳມະ ບານລາວ ຄົບຮອບ 64 ປີ (1 ກຸມພາ 1956 - 1 ກຸມພາ 2020) ແລະ ການເຄື່ອນໄຫວຂອງສະຫະພັນກຳມະບານລາວ ໃນແຕ່ລະໄລຍະທີ່ຜ່ານມາ, ໂດຍສະເພາະແມ່ນຜົນງານ​ຂອງ​ສູນ​ກາງສະຫະພັນກຳມະບານລາວ ທີ່​ຍາດ​ມາ​ໄດ້​ໃນ​ແຕ່ລະ​ໄລຍະ​ເຊິ່ງ​ເຫັນ​ວ່າ ຊົນ​ຊັ້ນ​ກຳມະກອນ ​ແລະ ຊາວ​ຜູ້​ອອກ​ແຮງ​ງານ​ລາວ​ໄດ້​ເຕີບ​ໃຫຍ່​ຂະຫຍາຍຕົວ​ ແລະ ​ເປັນ​ກຳລັງ​ແຮງ​ຫຼັກ​ແຫຼ່ງຕົ້ນຕໍ​ແຫ່ງ​ການ​ຜະລິດ​ຂອງ​ລະບອບ​ໃໝ່, ສະຫະພັນ​ກຳມະບານ​ລາວ​ທົ່ວ​ປະ​ເທດ​, ໄດ້​ເຄື່ອນໄຫວ​ປະກອບສ່ວນ​ໃນ​ການຈັດ​ຕັ້ງ​ຜັນ​ຂະຫຍາຍ​ມະຕິ​ກອງ​ປະ​ຊຸມ​ໃຫຍ່ ຄັ້ງ​ທີ X  ຂອງ​ພັກ ​ແລະ ​ແຜນ​ພັດທະນາ​ເສດຖະກິດ-ສັງຄົມ 5 ປີ ​ແຫ່ງ​ລັດຄັ້ງ​ທີ VIII, ມະຕິກອງປະຊຸມ ຄົບຄະນະບໍລິຫານງານ ສູນກາງສະຫະພັນກຳມະບານລາວ ຄັ້ງທີ 4 ແລະ ຄັ້ງທີ 5ສະໄຫມທີ VII ແລະ ທິດທາງແຜນການ ປີ 2020 ​ໂດຍ​ມີ​ໝາກທີ່ຜົນພົ້ນເດັ່ນ​ໃນການຈັດຕັ້ງປະຕິບັດ​ຫຼາຍ​ດ້ານ​ເຊັ່ນ: ກົງຈັກ​ການຈັດ​ຕັ້ງ​ສະຫະພັນ​ກຳມະບານ​ລາວ​ທົ່ວ​ປະ​ເທດ​ໄດ້​ມີ​ການ​ຂະຫຍາຍຕົວຢ່າງ​ຕໍ່​ເນື່ອງ ​ແລະ ນັບ​ມື້​ເພີ່ມ​ຂື້ນ​ທາງ​ດ້ານ​ປະລິມານ ​ແລະ ຄຸນ​ນະພາ​ບ, ຊຶ່ງ​ມາ​ເຖີງປະຈຸ​ບັນ​ທົ່ວ​ປະ​ເທດ, ສະຫະພັນ​ກຳມະບານ​ແຕ່ລະ​ຂັ້ນ​ກໍ່​ໄດ້​ສຸມ​ໃສ່​ປັບປຸງ​ລະບົບ​ການຈັດ​ຕັ້ງ​ຂອງ​ຕົນຕິດ​ພັນ​ກັບ​ວຽກ​ງານ 3 ສ້າງ​, ຕິດ​ພັນ​ກັບ​ການ​ຂະຫຍາຍຕົວ​ຂອງ​ອົງການ​ຈັດ​ຕັ້ງ​ພັກ-ລັດ ​ແລະ ກັບ​ໜ່ວຍ​ແຮງ​ງານ​ຕ່າງໆ​ນັບ​ທັງ​ພາກ​ລັດ ​ແລະ ​ເອກະ​ຊົນ, ​ໄດ້​ເຮັດ​ໃຫ້​ລະບົບ​ການ​ຈັ້ດ​ຕັ້ງ ​ແລະ ການ​ຄຸ້ມ​ຄອງ​ວຽກ​ງານ​ກຳມະບານ​ເຂົ້າ​ສູ່​ລະບົບ​ດີ​ຂື້ນ​ເປັນ​ກ້າວໆ ​ເປັນ​ຕົ້ນ: 

ວຽກ​ງານ​ໂຄສະນາ​ສຶກສາ​ອົຍຮົມ​ການ​ເມືອງ-​ແນວ​ຄິດ, ວຽກ​ງານ​ຈັດ​ຕັ້ງ-ກໍ່ສ້າງ​ພະນັກງານ​ກຳມະບານ, ວຽກ​ງານ​ປົກ​ປ້ອງ​ແຮງ​ງານ, ວຽກ​ງານ​ຂະ​ບວນການ​ແຂ່ງຂັນ, ວຽກ​ງານ​ຊ່ວຍ​ເຫ​ລື່ອ​ເຊິ່ງກັນ ​ແລະ ກັນ ​ແລະ ​ເງິນ​ບຳລຸງ, ວຽກ​ງານ​ກວດກາ ​ແລະ ວຽກ​ງານ​ພົວພັນ​ຕ່າງປະ​ເທດ ​ເຊິ່ງ​ແຕ່​ລະ​ຫນ້າ​ວຽກ​ໄດ້​ມີ​ບາດກ້າວ​ຂະຫຍາຍຕົວ​ໃນ​ທິດ​ທາງ​ທີ່​ດີ​ຂື້ນ ​ແລ​ະ ເປັນ​ລະບົບ. ມີ​ຫົວໜ່ວຍ​ແຮງ​ງານທັງ​ໝົດ 20.444 ​ແຫ່ງ​ໃນ​ທົ່ວ​ປະ​ເທດ, ມີກຳມະກອນທັງຫມົດ 335.739 ຄົນ, ຍິງ 153.956 ຄົນ, ມີແຮງງານເຄື່ອນຍ້າຍໄປເຮັດຢູ່ຕ່າງປະເທດ ທີ່ຖືກຕ້ອງຕາມກົດຫມາຍ(ຜ່ານບໍລິສັດຈັດຫາງານ) ມີ 250.224 ຄົນ, ຍິງ 128.244 ຄົນ. ພ້ອມ​ດຽວ​ກັນ​ນັ້ນ ທ່ານປະທານ​ສະຫະພັນ​ກຳມະບານກະຊວງ​ ຍັງ​ໄດ້​ຍົກ​ໃຫ້​ເຫັນ ຜົນສຳ​ເລັດ​ຂອງ​ກອງ​ປະຊຸມ​ໃຫຍ່ ຜູ້​ແທນ​ສະຫະພັນ​ກຳມະບານ​ລາວ​ທົ່ວ​ປະ​ເທດ ຄັ້ງ​ທີ VII, ມະຕິ​ກອງ​ປະຊຸມ​ໃຫຍ່ ຜູ້​ແທນ​ສະຫະພັນ​ກຳມະບານ​ລາວ​ທົ່ວ​ປະ​ເທດ ຄັ້ງ​ທີ VII ວັນ​ທີ 14-16 ຕຸລາ 2015, ​ແຜນ​ຍຸດ​ທະ​ສາດ​ພັດ​ທະ​ນາ​ວຽກ​ງານ​ກຳ​ມະ​ບານ​ລາວ 10 ປີ 2016-2025 ​ແລະ ວິ​ໄສ​ທັດ ຮອດປີ 2030 ​ແລະ ​ແຜນ​ຍຸດ​ທະ​ສາດ​ພັດທະນາ​ວຽກ​ງານ​ກຳມະ​ບານ​ລາວ 5 ປີ ຄັ້ງ​ທີ III ປີ 2016-2020. ນອກຈາກ​ນັ້ນ, ຄະນະ​ບໍລິຫານ​ງານ​ສູນ​ກາງ​ສະຫະພັນ​ກຳ​ມະ​ບານ​ລາວ ​ໄດ້​ກຳນົດ​ທິດ​ທາງ​ແຜນການ​ປີ 2020 ​ໂດຍທິດ​ທາງ​ລວມ ​ແລະ ຄາດຫມາຍ​ສູ້​ຊົນ​ດັ່ງ​ນີ້: ​ເພີ່ມ​ທະວີ​ສຶກສາ​ອົບຮົມ​ການ​ເມືອງ​-ແນວຄິດ, ​ເຕົ້າ​ໂຮ​ມຄວາມ​ສະມາ​ຄີ​ພາຍ​ໃນ ​ໃຫ້​ສະມາຊິກ​ກຳມະ​ບານ, ກໍາມະກອນ ​ແລະ ຊາວ​ຜູ້​ອອກ​ແຮງ​ງານ ​ເປັນ​ພົນລະ​ເມືອງ​ດີ ​ແລະ ມີ​ລະບຽບ​ວິ​​ໄນ ​ໃນ​ການ​ອອກ​ແຮງ​ງານ; ຊູ້​ຊົນ ຊຸກຍູ້, ສຸມ​ໃສ່ກະກຽມ ​ແລະ ດຳ​ເນີນ​ກອງ​ປະຊຸມ​ສາມ​ຂັ້ນ​ຂອງສະຫະພັນ​ກຳມະບານລາວ​ໃຫ້​ສຳ​ເລັດ ​ແລະ ຟົດ​ຟື້ນ, ຕິດ​ພັນ​ກັບ​ການປັປປຸງກົງຈັກ​​ການຈັດ​ຕັ້ງກຳມະບານ​ແຕ່ລະ​ຂັ້ນ​ໃຫ້​ຫນັກ​ແຫນ້ນ​ເຂັ້ມ​ແຂງ; ຕີ​ລາຄາ ສະພາບ​​ການຈັດ​ຕັ້ງ​ປະຕິບັດ​ມະຕິ​ກອງ​ປະຊຸມ​ໃຫຍ່ ຜູ້​ແທນສະຫະພັນ​ກຳມະບານ​ລາວ ທົ່ວ​ປະ​ເທດ ຄັ້ງ​ທີ VII ຢ່າງ​ພາວະວິ​ໄສ; ປະຕິບັດ​ພາລະ​ບົດ​ບດ, ສິດ ​ແລະ ຫນ້າ​ທີ່​ ຂອງສະຫະພັນກຳມະບານ​ລາວ.​

ກອງປະຊຸມເປີດກວ້າງຄະນະຮັບຜິດຊອບຊີ້ນຳ ພັດທະນາເຂດຈຸດສຸມໃຈກາງແຂວງໄຊສົມບູນ

ກອງປະຊຸມເປີດກ້ວາງຄະນະຮັບຜິດຊອບຊີ້ນຳພັດທະນາເຂດຈຸດສຸມໃຈກາງຢູ່ ແຂວງໄຊສົມບູນເພື່ອຜັນຂະຫຍາຍດຳລັດວ່າດ້ວຍນະໂຍບາຍການພັດທະນາເສດຖະກິດຂອງແຂວງໄຊສົມບູນ ໄດ້ຈັດຂຶ້ນໃນວັນທີ 3 ກຸມພາ 2020 ນີ້, ໂດຍການເປັນປະທານຂອງ ສະຫາຍ ພັນຄຳ ວິພາວັນ ກໍາມະການກົມການເມືອງສູນກາງພັກ ຮອງປະທານປະເທດ ຜູ້ປະຈຳການຄະນະເລຂາທິການສູນກາງພັກ ຫົວໜ້າຄະນະຊີ້ນຳ ພັດທະນາເຂດຈຸດສຸມໃຈກາງ; ສະຫາຍ ພົນເອກ ຈັນສະໝອນ ຈັນຍາລາດ ກໍາມະການກົມການເມືອງສູນກາງພັກ ລັດຖະມົນຕີກະຊວງປ້ອງກັນປະເທດ ຮອງຫົວໜ້າຄະນະຊີ້ນໍາພັດທະນາເຂດຈຸດສຸມໃຈກາງ, ມີສະຫາຍ ເລຂາທິການສູນກາງພັກ, ກຳມະການສູນກາງພັກ, ລັດຖະມົນຕີ, ຮອງລັດຖະມົນຕີ, ຫ້ອງວ່າການສູນກາງພັກ, ຄະນະຮັບຜິດຊອບເຂດຈຸດສຸມໃຈກາງແຂວງໄຊສົມບູນ, ພະແນກການທີ່ກ່ຽວຂ້ອງ, ຕະຫຼອດຮອດອະນຸກຳມະການ ແລະ ບັນດາຫົວໜ່ວຍທຸລະກິດ ເຂົ້າຮ່ວມ.

ຈຸດປະສົງຂອງກອງປະຊຸມໃນ ຄັ້ງນີ້ແມ່ນປະຕິບັດຕາມດຳລັດ ເລກທີ 414 ຂອງລັດຖະບານ ວ່າດ້ວຍການຮັບຮອງເອົາຍຸດທະສາດການພັດ ທະນາຈຸດສຸມໃຈກາງແຂວງ ໄຊສົມບູນ ເພື່ອການຈັດຕັ້ງຜັນຂະຫຍາຍ ແລະ ປະຕິບັດມະຕິຂອງ ກົມການເມືອງສູນກາງພັກ ສະບັບເລກທີ 055/ກມສພ ໃຫ້ເຂົ້າສູ່ການກະທຳຕົວຈິງ, ກຳນົດຫຼັກການ, ລະບຽບການ ແລະ ມາດຕະການກ່ຽວກັບການຈັດຕັ້ງປະຕິບັດນະໂຍບາຍພິເສດເພື່ອຊຸກຍູ້ສົ່ງເສີມ ແລະ ດຶງດູູດນັກລົງທຶນທັງພາຍໃນ ແລະ ຕ່າງປະເທດ, ຜູ້ປະກອບການທີ່ມີຄຸນນະພາບເຂົ້າມາລົງທຶນ ແລະ ພັດທະນາ ຢູ່ແຂວງໄຊສົມບູນ ໃຫ້ມີລະດັບການພັດທະນາເສດຖະກິດ-ສັງຄົມທຽບທັນກັບບັນດາເເຂວງ ອື່ນໆໄປຄວບຄູ່ກັບການທົດລອງ ແບ່ງຂັ້ນຄຸ້ມຄອງດ້ານງົບປະມານ, ການເງິນລະຫວ່າງສູນກາງ ແລະ ທ້ອງຖິ່ນໃຫ້ກົມກຽວສອດຄ່ອງໃນການແກ້ໄຂຄວາມທຸກຍາກສ້າງພື້ນຖານເສດຖະກິດ-ສັງຄົມໃຫ້ໝັ້ນທ່ຽງເປັນມິດກັບສິ່ງແວດລ້ອມຕາມທິດສີຂຽວ ແລະ ຍືນຍົງ, ນອກນັ້ນ ກໍຕ້ອງຍົກສູງປະສິດທິພາບຂອງການ ຄຸ້ມຄອງລັດ-ຄຸ້ມຄອງສັງຄົມ ດ້ວຍກົດໝາຍຢູ່ແຂວງໄຊສົມບູນ ໃຫ້ມີປະສິດທິພາບໃນການບໍລິຫານຂັ້ນທ້ອງຖິ່ນ, ສ້າງສະພາບແວດລ້ອມທີ່ເອື້ອອຳນວຍໃຫ້ແກ່ການພັດທະນາຢ່າງຍຸຕິທຳ ແລະ ທົ່ວເຖິງທັງຮັບປະກັນສິດເປັນເຈົ້າຂອງປະຊາຊົນບັນດາເຜົ່າ ຕາມລັດຖະທຳມະນູນ ແລະ ກົດໝາຍ. ໂອກາດນີ້, ສະຫາຍ ພົນຕີ ຄຳລຽງ ອຸທະໄກສອນ ເລຂາພັກແຂວງເຈົ້າແຂວງໆໄຊສົມບູນໄດ້ ຂຶ້ນຜ່ານແຜນການຈັດຕັ້ງປະຕິບັດການຊີ້ນຳພັດທະນາເຂດຈຸດສຸມໃຈກາງແຂວງໄຊສົມບູນ ໃຫ້ກອງປະຊຸມຮັບຊາບວ່າ: ໂດຍ ປະຕິບັດຕາມມະຕິຂອງກົມການເມືອງສູນກາງພັກວ່າດ້ວຍການຈັດຕັ້ງວຽກງານ 3 ສ້າງ, ພັດທະນາເຂດໃຈກາງຢູ່ແຂວງໄຊສົມບູນໄດ້ສຸມໃສ່ນຳພາການເມືອງ-ນຳພາແນວຄິດເຮັດໃຫ້ປະຊາຊົນບັນດາເຜົ່າມີຄວາມເຊື່ອໝັ້ນຕໍ່ການນຳພາຂອງພັກປະຕິບັດກົດໝາຍຂອງລັດ, ເປັນເຈົ້າຕົນເອງຕີຖອຍແນວຄິດຄອງເດີມ ໃຫ້ໝົດໄປ. ໄດ້ເຂົ້າຮ່ວມຂະບວນການແຂ່ງຂັນຮັກຊາດ ແລະ ພັດທະນາ, ຂົງເຂດວຽກງານປ້ອງ ກັນຊາດ-ປ້ອງກັນຄວາມສະຫງົບ ໄດ້ຫັນເອົາກຳລັງ ປກຊ-ປກສ ແຂວງ ແລະ ພະນັກງານລົງ ກໍ່ສ້າງຮາກຖານການເມືອງຕາມ 4 ເນື້ອໃນ 4 ຄາດໝາຍ ຮັບປະກັນເຮັດໃຫ້ແຂວງມີຄວາມສະຫງົບປອດໄພໜັກ     ແໜ້ນຂຶ້ນ, ວຽກງານເສດຖະກິດມະຫາພາກໄດ້ຂະຫຍາຍຕົວບໍ່ຫຼຸດ 7% ລວມຍອດຜະລິດຕະພັນພາຍໃນປະຕິບັດໄດ້ 1.050,18 ຕື້ກີບເທົ່າກັບ 11 ລ້ານກວ່າກີບ ຫຼື ປະມານ 1.330 ໂດລາຕໍ່ຄົນຕໍ່ປີ, ໃນນັ້ນ ຂະແໜງກະສິກຳຂະຫຍາຍຕົວ 7,7% ກວມເອົາ 55,4% ຂອງ GDP, ຂະແໜງອຸດສາຫະກຳ ຂະຫຍາຍຕົວ 5,6% ກວມເອົາ 18,2% ຂອງ GDP, ຂະແໜງບໍລິການຂະຫຍາຍຕົວ 7,1% ກວມເອົາ 26,4% ຂອງ GDP, ມາຮອດປັດຈຸບັນລວມມີ 183 ໂຄງການ ມູນຄ່າ 3.523,42 ຕື້ກີບ ແຕ່ໄດ້ຮັບອະນຸມັດທຶນໃນປີ 2019 ຈຳນວນ 123,49 ຕື້ກີບ, ການຈັດເກັບລາຍຮັບຕາມການມອບໝາຍຂອງລັດໃນປີ 2019 ຈຳນວນ 75 ຕື້ກີບ, ຜ່ານການຈັດຕັ້ງປະຕິບັດຕົວຈິງປະຕິບັດໄດ້ 79,21 ຕື້ກີບ, ຂະແໜງການເງິນໄດ້ເກັບລາຍຮັບເຂົ້າງົບປະມານຂອງແຂວງຕາມຄາດໝາຍສູ້ຊົນຂອງແຂວງຢ່າງຮັດກຸມ ແລະ ສອດ ຄ່ອງ, ອຸດຕັນຈຸດທີ່ຮົ່ວໄຫຼ ເຂົ້າ-ອອກປະຕູດຽວ, ຂົງເຂດວຽກງານວັດທະນະທຳ-ສັງຄົມ ແລະ ຍຸຕິທໍາກວມເອົາ 59%, ມີໂຮງຮຽນປະຖົມສົມບູນ, ໂຮງໝໍແຂວງ, ເມືອງ, ສຸກສາລາ, ເຮັດໃຫ້ປະຊາຊົນເຂົ້າເຖິງການບໍລິການ, ຂະແໜງການພະລັງງານ ແລະ ບໍ່ແຮ່ໄດ້ປະຕິບັດຕາມແນວທາງນະໂຍບາຍຂອງພັກ-ລັດກໍຄືຂະ ແໜງການທີ່ກ່ຽວຂ້ອງເຮັດໃຫ້ ສາມາດດຶງດູດນັກລົງທຶນທັງພາຍໃນ ແລະ ຕ່າງປະເທດ ນັບມື້ນັບຫຼາຍຂຶ້ນ, ວຽກງານການພົວພັນຮ່ວມມືກັບຕ່າງປະເທດໄດ້ປະຕິບັດຕາມແນວທາງນະໂຍບາຍການຕ່າງປະເທດຂອງພັກ ໂດຍສະເພາະແມ່ນປະເທດຮ່ວມມືທາງດ້ານຍຸດທະສາດເຊັ່ນ: ສສ ຫວຽດນາມ, ສປ ຈີນ. ຈາກນັ້ນບັນດາອະນຸກຳມະການ, ພະແນກການທີ່ກ່ຽວຂ້ອງກໍໄດ້ຂຶ້ນປະກອບຄຳຄິດຄຳເຫັນ ໃສ່ວຽກງານພັດທະນາຈຸດສຸມເຂດໃຈກາງແຂວງໄຊສົມບູນ ຢ່າງກົງໄປກົງມາ ແລະ ມີເນື້ອ ໃນຄົບຖ້ວນ ແລະ ສະຫາຍ ປະທານ ກອງປະຊຸມ ກໍໄດ້ມີຄຳເຫັນເຈາະຈິ້ມແຕ່ລະອະນຸກຳມະການ ຮັບຜິດຊອບບັນດາໜ້າວຽກ, ພ້ອມທັງເນັ້ນໃຫ້ຄະນະຮັບຜິດຊອບຂັ້ນສູນກາງ ແລະ ທ້ອງຖິ່ນຕະຫຼອດຮອດຫົວໜ່ວຍທຸລະກິດ ຈົ່ງພ້ອມກັນສຸມເຫື່ອແຮງ, ສະຕິປັນຍາເຂົ້າໃນການບໍລິຫານຄຸ້ມຄອງແຜນພັດທະນາແຕ່ລະໜ້າວຽກງານໃຫ້ດຳເນີນໄປຖືກຕ້ອງ ຕາມທິດນຳທີ່ຄະນະຊີ້ນຳຈຸດສຸມກໍານົດໂດຍຖືເອົາແນວທາງປ້ອງກັນຊາດ-ປ້ອງກັນຄວາມສະຫງົບ ທົ່ວປວງຊົນຮອບດ້ານຂອງພັກວາງອອກເປັນຫນ້າທີ່ຂອງໝົດທຸກຄົນ, ຫັນເອົາກຳລັງລົງກໍ່ສ້າງຮາກຖານການເມືອງພັດທະນາຊົນນະບົດຮອບດ້ານ, ໄປຄວບຄູ່ກັບການຍາດແຍ່ງເອົາການລົງທຶນຈາກພາຍໃນ ແລະ ຕ່າງປະ ເທດ  ໃຫ້ນັບມື້ຫຼາຍຂຶ້ນ, ຂົງເຂດວຽກງານຄົມມະນາຄົມຂົນສົ່ງ, ການສຶກສາ, ສາທາລະນະສຸກ, ຍຸຕິທຳ, ການເງິນ, ການທ່ອງທ່ຽວ, ກະສິກຳສົ່ງເສີມການຜະລິດ ແລະ ຂົງເຂດອື່ນ, ຂະແໜງການທີ່ກ່ຽວຂ້ອງຕ້ອງເປັນເສນາທິການໃຫ້ຂັ້ນເທິງກໍຄືອຳນາດການປົກຄອງທ້ອງຖິ່ນ ແຂວງໃນການປະກອບສ່ວນພັດທະນາ ເສດຖະກິດເຮັດໃຫ້ຊີວິດການເປັນຢູ່ຂອງປະຊາຊົນບັນດາເຜົ່າຮັ່ງມີ ແລະ ສີວິໄລຢ່າງແທ້ຈິງ, ສະນັ້ນຮຽກຮ້ອງໃຫ້ທຸກຄົນຕ້ອງໄດ້ ບຸກບືນສູ້ຊົນ ແລະ ຍົກສູງຄວາມເປັນເຈົ້າຕົນເອງໃຫ້ຫຼາຍຂຶ້ນ, ຍຶດໝັ້ນການພັດທະນາແບບສີຂຽວ ແລະ ຍືນຍົງຖືເອົາການພັດທະນາເສດຖະກິດເປັນໃຈກາງ ເອົາສິ່ງແວດລ້ອມເປັນສຳຄັນຮັບປະກັນ 3 ຜົນປະໂຫຍດຄື: ປະຊາຊົນ, ປະເທດຊາດ ແລະ ຜູ້ລົງທຶນ ຢ່າງກົມກຽວ, ໄປຄຽງຄູ່ກັບການເພີ່ມທະວີຄວາມສາມັກຄີພາຍໃນເປັນປຶກແຜ່ນແໜ້ນໜາເຊີດຊູນ້ຳໃຈຮັກຊາດຮັກລະບອບໃໝ່ເປັນເຈົ້າຕົນເອງພັດທະນາ ແຂວງໄຊສົມບູນ ໃຫ້ກ້າວຂຶ້ນສູ່ຈຸດໝາຍທີ່ພັກວາງອອກ.

Additional information