ຂ່າວພາຍໃນກະຊວງ

ພິທີມອບ-ຮັບ ແລະ ເປີດການນຳໃຊ້ເສັ້ນທາງເລກທີ 2.6313 ແຕ່ ເຊບັງນວນ ຫາ ເມືອງທ່າປາງທອງ ແຂວງສະຫວັນນະເຂດ ຫາ ເມືອງຕຸ້ມລານ ແຂວງສາລະວັນ

 

ໃນຕອນເຊົ້າຂອງວັນທີ 5 ກຸມພາ 2021 ທີ່ເມືອງທ່າປາງທອງ ແຂວງສະຫວັນນະເຂດ ໄດ້ຈັດພິທີມອບ-ຮັບ ແລະເປີດການນຳໃຊ້ເສັ້ນທາງຢ່າງເປັນທາງການ ໂດຍການເຂົ້າຮ່ວມຂອງ ທ່ານ ປອ ບຸນຈັນ ສິນທະວົງ ລັດຖະມົນຕີ ກະຊວງ ໂຍທາທິການ ແລະ ຂົນສົ່ງ; ທ່ານ ສັນຕິພາບ ພົມວິຫານ ເຈົ້າແຂວງ ສະຫວັນນະເຂດ;  ທ່ານ ປອ ໂພໄຊ ໄຊຍະສອນ ເຈົ້າແຂວງສາລະວັນ, ມີບັນດາທ່ານເຈົ້າເມືອງອ້ອມຂ້າງ, ທ່ານຫົວໜ້າ-ຮອງຫົວໜ້າ ອຫອ້ງການ, ກົມ, ກອງ, ຫົວໜ້າ-ຮອງຫົວໜ້າພະແນກ ຍທຂ ແຂວງ, ຍທຂ ເມືອງ ແລະ ແຂກທີ່ຖືກເຊີນ.

ໂຄງການກໍ່ສ້າງທາງເລກທີ 2.6313 ແຕ່ເຊບັງນວນ-ທ່າປາງທອງ ແຂວງສະຫວັນນະເຂດ ຫາ ເມືອງຕຸ້ມລານ ແຂວງສາລະວັນ ເປັນອີກໂຄງການໜຶ່ງທີ່ມີຄວາມໝາຍຄວາມສຳຄັນຊຶ່ງບໍ່ສະເພາະແຕ່ທາງເຂົ້າເມືອງທ່າປາງທອງເທົ່ານັ້ນ, ແຕ່ຍັງເປັນເສັ້ນທາງເສື່ອມຕໍ່ຫາແຂວງສາລະວັນອີກດ້ວຍ ແລະ ເປັນໂຄງການສຳຄັນທາງດ້ານເສດຖະກິດ-ສັງຄົມ ໃນການຈັດຕັ້ງຜັນຂະຫຍາຍ ແຜນພັດທະນາເສດຖະກິດ-ສັງຄົມ 5 ປີ ເທື່ອທີ IX ຂອງລັດຖະບານເວົ້າລວມ ເວົ້າສະເພາະ ແມ່ນແຜນພັດທະນາເສດຖະກິດ-ສັງຄົມ ຂອງແຂວງສະຫວັນນະເຂດ ແລະ ແຂວງສາລະວັນ, ເພື່ອແນໃສ່ອຳນວຍຄວາມສະດວກ ໃຫ້ແກ່ການຂົນສົ່ງສິນຄ້າ ແລະ ໂດຍສານ; ການຊຸກຍູ້ສົ່ງເສີມການຜະລິດຈໍລະຈອນສິນຄ້າ, ສ້າງເງື່ອນໄຂອຳນວນຄວາມສະດວກໃຫ້ແກ່ການລົງທຶນ, ການຄ້າ, ການທ່ອງທ່ຽວ, ການບໍລິການຕ່າງໆ ຕະຫລອດຮອດການໄປມາຫາສູ່ ຂອງພໍ່ແມ່ປະຊາຊົນທີ່ຢູ່ລຽບຕາມເສັ້ນທາງ, ຊຶ່ງຈະຊ່ວຍເຮັດໃຫ້ຊີວິດການເປັນຢູ່ ຂອງພໍ່ແມ່ປະຊາຊົນບັນດາເຜົ່າໃນຂົງເຂດນີ້ ດີຂື້ນເທື່ອລະກ້າວ.

ການສູ້ຊົນຈັດຕັ້ງປະຕິບັດໂຄງການດັ່ງກ່າວ ໃຫ້ສຳເລັດຕາມແຜນການທີ່ກຳນົດໄວ້, ເຖິງຈະມີການແຜລະບາດຂອງພະຍາດ COVID-19 ໃນຊ້ວງປີສຸດທ້າຍຂອງການຈັດຕັ້ງປະຕິບັດໂຄງການກໍ່ຕາມ, ແຕ່ໂຄງການກໍ່ໄດ້ມີຄວາມພະຍາຍາມສູ້ຊົນຈັດຕັ້ງປະຕິບັດ ດ້ວຍຄວາມຮັບຜິດຊອບສູງ,  ຜົນສຳເລັດທັງໝົດນີ້ແມ່ນເກີດຈາກຄວາມຮັບຜິດຊອບສູງ ໃນການປະຕິບັດໜ້າທີ່ຂອງເຈົ້າຂອງໂຄງການ, ບໍລິສັດທີ່ປຶກສາ, ບໍລິສັດຮັບເໝົາກໍ່ສ້າງນໍລິນໂກ ແລະທຸກພາກສ່ວນທີ່ກ່ຽວຂ້ອງ ທີ່ໃຫ້ການສະໜັບສະໜູນ, ໂດຍສະເພາະແມ່ນປະຊາຊົນ, ອົງການປົກຄອງທ້ອງຖີ່ນແຂວງສະຫວັນນະເຂດ, ແຂວງສາລະວັນ ແລະ ການຈັດຕັ້ງທຸກພາກສ່ວນ ຊຶ່ງເຮັດໃຫ້ໂຄງການນີ້ມີຜົນສຳເລັດຢ່າງຈົບງານ.

ທ່ານ ວຽງວິໄລ ສຸລິນທອນ ຫົວໜ້າໂຄງການ ເນື່ອງໃນໂອກາດ ອັນສະງ່າລາສີນີ້ ຂ້າພະເຈົ້າ ມີຄວາມຮູ້ສຶກພາກພູມໃຈເປັນຢ່າງຍິ່ງ ທີ່ໄດ້ຮັບເປັນກຽດໂດຍຕາງໜ້າຄະນະຮັບຜິດຊອບໂຄງການ ຂື້ນລາຍງານກ່ຽວກັບຄວາມເປັນມາ ແລະ ການຈັດຕັ້ງປະຕິບັດໂຄງການກໍ່ສ້າງທາງ ເລກທີ 2.6313 ແຕ່ ເຊບັງນວນ ຫາ ເມືອງທ່າປາງທອງ ຫາ ເມືອງຕຸ້ມລານ, ຊື່ງໂຄງການດັ່ງກ່າວໄດ້ຮັບການສ້າງຕັ້ງຂື້ນພາຍໃຕ້ການຕົກລົງຂອງລັດຖະມົນຕີກະຊວງໂຍທາທິການ ແລະ ຂົນສົ່ງ,  ຊື່ງປະກອບມີ: ຄະນະຮັບຜິດຊອບໂຄງການ ຈາກກະຊວງ ຍທຂ, ພະແນກ ຍທຂ ແຂວງສະຫວັນນະເຂດ ແລະ ຫ້ອງການ ຍທຂ ເມືອງກ່ຽວຂ້ອງ; ບໍລິສັດອາກຄີເນຍ ອາສໂຊຊີເອສ ເປັນທີ່ປຶກສາໂຄງການ; ບໍລິສັດນໍລິນໂກ ສປ ຈີນ ເປັນຜູ້ຮັບເໝົາກໍ່ສ້າງ; ຊຶ່ງປະກອບອມີບັນໜ້າວຽກດັ່ງນີ້: ກໍ່ສ້າງທາງປູຢາງ ມີລວງຍາວ 88,2 ກມ  ແລະ ກໍ່ສ້າງທາງເພີ່ມອີກ 02 ກມ; ຄວາມໄວຂອງການອອກແບບ 80 km/h; ນໍ້າໜັກຂອງການອອກແບບ 9,1ໂຕນ/ເພົາ; ໂດຍທົ່ວໄປໜ້າທາງລົດແລ່ນ ປູຢາງກ້ວາງ 7 ແມັດ, ສະເພາະທາງໃນເຂດເທດສະບານເມືອງທ່າປ່າງທອງ 3 ກິໂລແມັດ ມີໜ້າທາງລົດແລ່ນ ປູຢາງ ກ້ວາງ 9 ແມັດ ປະກອບ ດ້ວຍທາງຄົນຍ່າງ ແລະ ໄຟເຍືອງທາງ;  ວຽກກໍ່ສ້າງຂົວເບຕົງ 19 ແຫ່ງ ມີລວງຍາວ 470 ແມັດ ແລະ ວຽກກໍ່ສ້າງພື້ນຖານໂຄງລ່າງເມືອງທ່າປາງທອງ ປະກອບມີ: (ສ້າງສູນຝຶກອົບຮົມເຕັກນິກກະສິກໍາ ແລະ ສະໜອງລົດຂົນສົ່ງຂີ້ເຫຍື້ອ) ມີມູນຄ່າກໍ່ສ້າງທັງໝົດ 59.788.446 ໂດລາສະຫະລັດ ທີ່ໄດ້ຮັບການສະໜັບສະໜູນກູ້ຢືມທືນຈາກບໍລິສັດນໍລິນໂກ  ສປ ຈີນ ເປັນເວລາ 14 ປີ. ຊຶ່ງໄດ້ເຊັນສັນຍາຮັບເໝົາກໍ່ສ້າງ ໃນວັນທີ 03/05/2017, ມີໄລຍະເວລາກໍ່ສ້າງ 36 ເດືອນຊື່ງໄດ້ເລີ່ມລົງມືກໍ່ສ້າງວັນທີ 01/10/2017 ແລະ ສໍາເລັດໂດຍພື້ນຖານ ວັນທີ 01/10/2020.

ເສັ້ນທາງ ເລກທີ 2.6313 ແຕ່ ເຊບັງນວນ-ເມືອງທ່າປາງທອງ-ເມືອງຕຸ້ມລານ ໃນເມື່ອກ່ອນເປັນທາງດີນທໍາມະຊາດ ມີສະພາບເປ່ເພຊຸດໂຊມຫລາຍ ເປັນບວກເປັນຂຸມ ບາງບ່ອນກໍ່ຖືກນໍ້າກັດເຊາະຂາດ ເຮັດໃຫ້ການສັນຈອນໄປ-ມາ ຂອງປະຊາຊົນບັນດາເຜົ່າ ພົບຄວາມຫຍຸ້ງຍາກ ໃຊ້ເວລາການເດີນທາງຫລາຍຊົ່ວໂມງ ໂດຍສະເພາະໃນໄລຍະລະດູຝົນ, ສະນັ້ນ ພັກ-ລັດຖະບານ ກໍ່ຄືຄະນະນໍາຂອງກະຊວງໂຍທາທິການ ແລະ ຂົນສົ່ງ, ອໍານາດການປົກຄອງແຂວງ ເຫັນໄດ້ຄວາມສໍາຄັນຂອງວຽກງານຄົມມະນາຄົມຂົນສົ່ງທີ່ເປັນປາຍແຫລມ ແລະ ເປັນວຽກງານທີ່ຕິດພັນກັບການພັດທະນາເສດຖະກິດ-ສັງຄົມ, ເຮັດໃຫ້ປະຊາຊົນບັນດາເຜົ່າຫລຸດພົ້ນອອກຈາກຄວາມທຸກຍາກເທື່ອລະກ້າວ, ຈື່ງໄດ້ຈັດຕັ້ງໂຄງການດັ່ງກ່າວ, ຫຼັງຈາກໄດ້ຮັບການກໍ່ສ້າງເປັນທາງປູຢາງສໍາເລັດ, ໄດ້ເຮັດໃຫ້ການສັນຈອນໄປ-ມາຂອງປະຊາຊົນບັນດາເຜົ່າ ມີຄວາມສະດວກ-ສະບາຍ ຫລາຍຂື້ນ, ທັງປະຢັດເວລາໃນການເດີນທາງ ແລະ ອີກດ້ານໜື່ງກໍ່ເປັນພື້ນຖານໃຫ້ແກ່ການພັດທະນາວຽກງານອື່ນໆ, ເຮັດໃຫ້ເມືອງທ່າປາງທອງມີໃບໜ້າໃໝ່ ແລະ ສະຫວ່າງສະໄຫວ ໂດຍສະເພາະໃນເວລາກາງຄືນ.

ຜ່ານການຈັດຕັ້ງປະຕິບັດໂຄງການກໍ່ສ້າງເສັ້ນທາງດັ່ງກາວ ເປັນເວລາ 36 ເດືອນ ຄະນະຮັບຜິດຊອບໂຄງການ, ທີ່ປຶກສາໂຄງການ ແລະ ບໍລິສັດຮັບເໝົາ ພ້ອມດ້ວຍພະນັກງານວິຊາການ, ກໍາມະກອນທັງໝົດ ກໍ່ໄດ້ເອົາໃຈໃສ່ສຸມເຫື່ອແຮງ, ສຸມທຸກຄວາມຮູ້ຄວາມສາມາດ ເຂົ້າໃນວຽກງານທີ່ຖືກມອບໝາຍ ຈົນຮອດປະຈຸບັນກໍ່ໄດ້ສໍາເລັດໂດຍພື້ນຖານ, ຊຶ່ງມີຂໍ້ສະດວກ ແລະ ຂໍ້ຫຍຸ້ງຍາກ ໃນການຈັດຕັ້ງປະຕິບັດ ດັ່ງນີ້: ໂຄງການດັ່ງກ່າວໄດ້ຮັບການຊີ້ນໍາໆ ພາ ແລະ ໄກ້ສິດຕິດແທດ ຈາກຄະນະນໍາກະຊວງ ຍທຂ ແລະ ອໍານາດການປົກຄອງແຂວງ ຢ່າງເປັນປະຈໍາ, ມີແຫລ່ງທືນອັນແນ່ນອນ ເພື່ອສະໜອງໃຫ້ແກ່ການກໍ່ສ້າງ, ໄດ້ຮັບການຮ່ວມມືຈາກອໍານາດການປົກຄອງທ້ອງຖີ່ນ, ພະແນກການກ່ຽວຂ້ອງ ຕະລອດຮອດປະຊາຊົນບັນດາເຜົ່າ ເປັນຢ່າງດີ. ແຕ່ກໍ່ປັດສະຈາກບໍ່ໄດ້ຂໍ້ຍຸ້ງຍາກໃນການຈັດຕັ້ງປະຕິບັດໂຄງການເປັນຕົ້ນ: ຈຸດທີ່ຕັ້ງຂອງໂຄງການແມ່ນຢູ່ເຂດຫ່າງໄກສອກລີກ; ການຊອກຫາວັດສະດຸທີ່ມີຄຸນນະພາບດີ ເປັນຕົ້ນແມ່ນ ຫີນ, ດິນ, ຊາຍ ທີ່ຈະມາກໍ່ສ້າງແມ່ນຫາຍາກຫລາຍ ຈໍາເປັນຕ້ອງໄດ້ຂົນສົ່ງມາຈາກບ່ອນອື່ນໆ ທີ່ຢູ່ຫ່າງໄກ; ໂຄງການໄດ້ຮັບຜົນກະທົບໂດຍກົງຈາກການແຜ່ລະບາດຂອງພະຍາດໂຄວິດ-19, ເນື່ອງຈາກວ່າເປັນໂຄງການຮ່ວມມື ລາວ-ຈີນ, ຊື່ງເຮັດໃຫ້ວິສະວະກອນ ແລະ ແຮງງານຕ່າງປະເທດ ບໍ່ສາມາດເຂົ້າມາປະຈໍາການ ຊື່ງເຮັດໃຫ້ການປະຕິ ບັດວຽກບາງຄັ້ງບໍ່ໄດ້ຕາມແຜນການ.

ໃນໂອກາດອັນສະຫງ່າລາສີ ທ່ານ ປອ ບຸນຈັນ ສິນທະວົງ ລັດຖະມົນຕີ ກະຊວງ ໂຍທາທິການ ແລະ ຂົນສົ່ງ  ໄດ້ປະກາດການນຳໃຊ້ເສັ້ນທາງເລກ 2.6313 ແຕ່ເຊບັ້ງນວນ ຫາ ເມືອງທ່າປາງທອງ ແຂວງສະຫວັນນະເຂດ ຫາ ເມືອງຕຸ້ມລານ ແຂວງສາລະວັນ ຢ່າງເປັນທາງການ ແລະ ເພື່ອເຮັດໃຫ້ການນຳໃຊ້ເສັ້ນທາງດັ່ງກ່າວໃຫ້ຍາວນານມີປະສິດທີຜົນສູງ  ໃນຕໍ່ໜ້າ. ສະນັ້ນຈິ່ງຂໍມອບເສັ້ນທາງດັ່ງກ່າວນີ້ໃຫ້ ອົງການປົກຄອງແຂວງ ສະຫວັນນະເຂດເປັນຜູ້ຄຸ້ມຄອງ ປົກປັກຮັກສາ ແລະ ນຳໃຊ້ຕໍ່ໄປ.

ພິທີເຊັນສັນຍາຢ່າງເປັນທາງການຂອງໂຄງການກໍ່ສ້າງລະບົບນໍ້າປະປາ ແລະ ສຸຂາພິບານ ເມືອງວຽງຄຳ ແຂວງຫຼວງພະບາງ

 

ພິທີເຊັນສັນຍາ ຢ່າງເປັນທາງການຂອງໂຄງການກໍ່ສ້າງ ລະບົບນໍ້າປະປາ ແລະ ສຸຂາພິບານ ເມືອງວຽງຄຳ ແຂວງຫຼວງພະບາງ, ໄດ້ຈັດຂື້ນໃນວັນທີ 30 ທັນວາ 2020 ທີ່ໂຮງແຮມແລນມາກ, ນະຄອນຫຼວງວຽງຈັນ, ໂດຍການເປັນປະທານຂອງທ່ານ ນາງ ວິໄລຄຳ ໂພສາລາດ, ຮອງລັດຖະມົນຕີກະຊວງ ຍທຂ, ມີຫົວໜ້າກົມນໍ້າປະປາ, ທ່ານ ຫົວໜ້າພະແນກ ຍທຂ ແຂວງຫຼວງພະບາງ, ຫົວໜ້າກົມກວດກາ, ຫົວໜ້າກົມນິຕິກຳ, ຫ້ອງວ່າການປົກຄອງແຂວງ, ກະຊວງການເງິນ, ກະຊວງແຜນການ ແລະ ການລົງທືນ, ຫົວໜ້າບໍລິສັດທີ່ຮັບເໝົາການກໍ່ສ້າງ, ຫົວໜ້າໂຄງການ, ພະນັກງານວິຊາການທີ່ກ່ຽວຂ້ອງເຂົ້າຮ່ວມເປັນສັກຂີພະຍານ.

ໂຄງການນໍ້າປະປາ ແລະ ສຸຂາພິບານ, ໄດ້ຮັບທືນຊ່ວຍເຫຼືອລ້າເພີ້ມ ຈາກທະນາຄານພັດທະນາອາຊີ ADB Grant 0604-Lao, ໃນການຈັດຕັ້ງປະຕິບັດແມ່ນກະຊວງ ຍທຂ, ກົມນໍ້າປະປາ ເປັນຜູ້ຮັບຜິດຊອບ, ຊຶ່ງຫ້ອງການຄະນະປະສານງານໂຄງການ ຈັດຕັ້ງປະຕິບັດກໍານົດເວລາ ໃນການຈັດຕັ້ງປະຕິບັດໂຄງການ ແມ່ນເລີ່ມແຕ່ວັນທີ 16 ຕຸລາ 2018 - 30 ກັນຍາ 2023 ມາຮອດປະຈຸບັນສາມາດປະຕິບັດວຽກສໍາເລັດລວມ 45.00 ຂອງແຜນການລວມ, ສໍາລັບມູນຄ່າຂອງສັນຍາເງິນຊ່ວຍເຫຼືອລ້າເພີ້ມທີ່ໄດ້ເຊັນຄັ້ງວັນທີ 16 ຕຸລາ 2018 ຈໍານວນ 35,930,000 ໂດຣາສະ ຫະຣັດ ມີລາຍລະອຽດດັ່ງນີ້: ເງິນກູ້ຢືມຈາກ ADB (ADB Grant 0604-Lao) 30,500.00 ໂດຣາສະຫາຣັດ, ເງິນສົມທົບຂອງລັດຖະບານ ສປປ ລາວ 3,380,000.00 ໂດຣາສະຫາຣັດ, ລັດວິສາຫະກິດນໍ້າປະປາແຂວງ 1.420,000.00 ໂດຣາສະຫາຣັດ, ຜູ້ໄດ້ຮັບຜົນປະໂຫຍດປະກອບສ່ວນ 630,000.00 ລວມທັງໝົດ 35,930,000.00 ໂດຣາສະຫາຣັດ.

ບັນດາກຸ່ມເປົ້າໝາຍຂອງໂຄງການຈັດຕັ້ງປະຕິບັດຢູ່ 4 ແຂວງ ໃນຈໍານວນ 6 ເມືອງຄື: ເມືອງຊໍາເໜືອແຂວງຫົວພັນ ກຳລັງກໍ່ສ້າງ, ເມືອງສົບເບົາ ແຂວງ ຫົວພັນ ກຳລັງກໍ່ສ້າງ, ເມືອງ ລະມາມ ແຂວງ ເຊກອງ ກໍາລັງກໍ່ສ້າງ, ເມືອງ ສາມັກຄີໄຊ ແຂວງ ອັດຕະປື ກໍາລັງກໍ່ສ້າງ, ເມືອງ ວຽງຄໍາ ແຂວງ ຫຼວງພະບາງ ໄດ້ຈັດພິທີເຊັນສັນຍາໃນວັນທີ 30 ທັນວາ 2020 ແລະ ເຂດຈຸດສຸມບ້ານພັດທະນານໍ້າຖ້ວມ ເມືອງ ນໍ້າບາກ ແຂວງ ຫຼວງພະບາງ ສໍາເລັດການເປີດຊອງປະມູນ, ກໍາລັງປະເມີນຜົນເອກະສານປະມູນ, ຄາດວ່າຈະໄດ້ເຊັນສັນຍາໃນໄຕມາດ 1 ປີ 2021.

          ສໍາລັບຂໍ້ມູນໂຄງການກໍ່ສ້າງລະບົບນໍ້າປະປາ ແລະ ສຸຂາພິບານ ເມືອງ ວຽງຄໍາ ແຂວງ ຫຼວງພະບາງ, ໃນການຈັດຕັ້ງປະຕິບັດໂຄງການ, ແຫຼ່ງທືນຂອງໂຄງການ ADB Grant 0604-Lao, ຊື່ສັນຍາເລກທີ WS-CW-40 ວຽກກໍ່ສ້າງລະບົບນໍ້າປະປາ ແລະ ສຸຂາພິບານ, ມື້ປະກາດປະມູນໂຄງການແມ່ນວັນທີ 07 ກັນຍາ 2020 ແມ່ນການ ເປີດປະມູນເປີດກວ້າງພາຍໃນ, ມື້ເປີດຊອງປະມູນແມ່ນວັນທີ 6 ຕຸລາ 2020, ກະຊວງ ຍທຂ ໄດ້ອະນຸມັດອອກຂໍ້ຕົກລົງຮັບຮອງເອົາຜົນການຕີລາຄາເອກະສານປະມູນ ແລະ ໃຫ້ເຊັນສັນຍາ ເລກທີ 31124/ຍທຂ, ລົງວັນທີ 29 ທັນວາ 2020, ມື້ເຊັນສັນຍາແມ່ນວັນທີ 30 ທັນວາ 2020, ຈະໄດ້ເລີ່ມລົງມືການກໍ່ສ້າງໃນວັນທີ 29 ມັງກອນ 2021, ຄາດຕະເນໃຫ້ສໍາເລັດ 100% ຕາມແຜນການແມ່ນວັນທີ 29 ກໍລະກົດ 2022, ມື້ສິ້ນສຸດໄລຍະຄໍ້າປະກັນ 1 ປີພາຍຫຼັງສໍາເລັດການກໍ່ສ້າງ, ກໍານົດເວລາການກໍ່ສ້າງທັງໝົດ 18 ເດືອນ, ມີມູນຄ່າການກໍ່ສ້າງທັງໝົດ 14,155,038,060 ກີບ (ໃນນີ້ບໍ່ລວມພາສີ-ອາກອນນໍາເຂົ້າ ແຕ່ລວມພາສີມູນຄ່າເພີ້ມ 10%), ສໍາລັບບໍລິສັດທີ່ຮັບ  ເໝົາການກໍ່ສ້າງແມ່ນບໍລິສັດ ສະເປັກໄອລາວ ຈໍາກັດຜູ້ດຽວ ແລະ ບໍລິສັດ ພາວເວີໄຊນາຄຸນມິງ ເອັນຈີເນຍຣິງ ຄັອບໂປເລເຊິນ ຈໍາກັດ.

ສໍາລັບຈໍານວນບ້ານເປົ້າໝາຍຂອງໂຄງການກໍ່ສ້າງມີທັງໝົດ 7 ບ້ານ, ມີປະຊາກອນທັງໝົດ 3528 ຄົນ, 681 ຄົວເຮືອນ, ກໍາກົດເອົາການຊົມໃຊ້ນໍ້າໃນໄລຍະເລີ້ມຕົ້ນປີ 2024 ແມ່ນ 80 ລິດ/ຄົນ/ວັນ, ຮອດປີ 2039 ປະມານ 86 ລິດ/ຄົນ/ວັນ, ກໍາລັງການຜະລິດຂອງໂຮງງານນໍ້າປະປາແມ່ນ 1,000 ແມັດກ້ອນ/ມື້, ໂຮງງານນໍ້າປະປາທີ່ສ້າງຂຶ້ນໃໝ່ເປັນໂຮງງານລະບົບຄົບຊຸດ, ເຮືອນປະສົມເຄມີ, ຫ້ອງທົດລອງ ແລະ ຫ້ອງການພາຍໃນໂຮງງານ, ມີອ່າງເກັບນໍ້າຈໍານວນ 1 ອ່າງ, ອ່າງເກັບນໍ້າສູງ 1 ອ່າງ, ທີ່ມີຂະໜາດບັນຈຸ 200 ແມັດກ້ອນ ຢູ່ບໍລິເວນໂຮງງານ, ຕິດຕັ້ງລະບົບ SCADA ປະກອບລະບົບການຄຸ້ມຄອງ ແລະ ບັນທຶກຂໍ້ມູນ ແລະ ປະກອບລະບົບກ້ອງວົງຈອນປິດ, ເພື່ອການຕິດຕາມຄວາມປອດໄພ, ໄດ້ມີການກໍ່ສ້າງຫ້ອງການບໍລິການໃໝ່ 1 ຫຼັງພ້ອມດ້ວຍສາງມ້ຽນເຄື່ອງ, ວາງລະບົບທໍ່ແມ່ປະເພດ HDPE ແລະ DIC ທີ່ມີຂະໜາດແຕ່ DN110-DN400 ທີ່ມີຄວາມຍາວທັງໝົດ ຂອງສາຍທໍ່ແມ່ນ 14,747 ແມັດ, ວາງລະບົບສາຍທໍ່ແຈກປະເພດ HDPE ທີ່ມີຂະໜາດ DN25- DN90 ທີ່ມີຄວາມຍາວທັງໝົດຂອງສາຍທໍ່ແມ່ນ 17,817 ແມັດ, ຕິດຕັ້ງໝໍ້ແທກນໍ້າຈໍານວນ 632 ໜ່ວຍ, ຕິດຕັ້ງກ໊ອກດັບເພີງຈໍານວນ 7 ຈຸດ, ຕິດຕັ້ງປະຕູລົມຈໍານວນ 31 ຈຸດ ແລະຕິດຕັ້ງປະຕູລະບາຍລົມຈໍານວນ 24ຈຸດ.

ໃນການກໍ່ສ້າງລະບົບນໍ້າປະປາ ແລະ ສຸຂາພິບານ ເມືອງວຽງຄໍາ ແຂວງຫຼວງພະບາງນີ້ ໄດ້ສະແດງໃຫ້ເຫັນເຖິງຄວາມເອົາໃຈໃສ່ຂອງ ພັກ-ລັດຖະບານ ແຫ່ງ ສປປ ລາວ, ຍາມໃດກໍ່ເລັ່ງເຫັນຄວາມສໍາຄັນຂອງປະຊາຊົນ ໃນເຂດທ້ອງຖິ່ນທຸລະກັນດານ, ເພື່ອໃຫ້ປະຊາຊົນໄດ້ຊົມໃຊ້ນໍ້າທີ່ສະອາດ, ຖືກຫຼັກອານາໄມ ແລະ ເຮັດໃຫ້ປະຊາຊົນໄດ້ຢູ່ດີກິນດີຂື້ນ, ຊ່ວຍໃຫ້ປະຊາຊົນລຸດພົ້ນອອກຈາກຄວາມດ້ວຍພັດທະນາ.

ກອງປະຊຸມສຳມະນາວຽກງານປະເມີນຂໍ້ແຂ່ງຂັນ 4 ບຸກຂອງຄະນະບໍລິຫານງານຊາວໜຸ່ມກະຊວງ ຍທຂ

 

ໂດຍປະຕິບັດຕາມ ຂໍ້ຕົກລົງຂອງລັດຖະມົນຕີ ກະຊວງ ຍທຂ ສະບັບເລກທີ 29727/ຍທຂ ລົງວັນທີ 11/12/2020 ວ່າດ້ວຍການອະນຸມັດຈັດກອງປະຊຸມ ວຽກງານປະເມີນຂໍ້ແຂ່ງຂັນ 4 ບຸກ ຂອງຄະນະບໍລິຫານງານຊາວໜຸ່ມ ກະຊວງ ໂຍທາທິການ ແລະ ຂົນສົ່ງ ແລະ ບົດແນະນຳຂອງສູນກາງ ຊປປລ ສະບັບເລກທີ 421/ລຂ ລົງວັນທີ 28/07/2016 ວ່າດ້ວຍການຈັດຕັ້ງປະຕິບັດຂໍ້ແຂ່ງຂັນ 4ບຸກຂອງຊາວໜຸ່ມລາວ, ທາງຄະນະບໍລິຫານງານຊາວໜູ່ມກະຊວງ ຍທຂ ຈຶ່ງເຫັນດີເປັນເອກະພາບກັນຈັດ ກອງປະຊຸມສຳມະນາວຽກງານປະເມີນຂໍ້ແຂ່ງຂັນ 4 ບຸກຂອງຄະນະບໍລິຫານງານຊາວໜຸ່ມກະຊວງ ຍທຂ ຂື້ນໃນວັນທີ 13 ມັງກອນ 2021, ທີ່ຫ້ອງປະຊຸມໃຫຍ່ຂອງກະຊວງ ຍທຂ, ໂດຍການເປັນປະທານຂອງ ສະຫາຍ ບຸນມາ ຫຼວງບັນດິດ ເລຂາຊາວໜຸ່ມກະຊວງ ຍທຂ, ຮອງຫົວໜ້າກົມຈັດຕັ້ງ-ພະນັກງານ, ສະຫາຍ ມານຸ ເມືອງວົງ ຮອງຫົວໜ້າກົມກວດກາ, ສູນກາງຊາວໜຸ່ມ, ມີບັນດາ ຊາວໜຸ່ມຮາກຖານແຕ່ລະກົມ, ກອງ, ສະຖາບັນອ້ອມຂ້າງກະຊວງ ຍທຂ ເຂົ້າຮ່ວມຢ່າງພ້ອມພຽງ.

ດັ່ງທີ່ຮູ້ນໍາກັນແລ້ວວ່າ ການຈັດຕັ້ງປະຕິບັດຂໍ້ແຂ່ງຂັນ 4 ບຸກ  ແມ່ນມີຄວາມສໍາຄັນເປັນການປຸກລະດົມທຸກກໍາລັງແຮງຂອງຊາວໜຸ່ມ ເຂົ້າໃນການປະຕິບັດ, ບັນດາແນວທາງນະໂຍບາຍຂອງພັກ, ແຜນພັດທະນາເສດຖະກິດຂອງລັດເວົ້້າລວມ ເວົ້າສະເພາະແມ່ນການປະຕິບັດທິດທາງແຜນການຂອງຄະນະພັກຮາກຖານ, ຂອງໜ່ວຍພັກ, ຂອງກົມກອງ ໃຫ້ສໍາເລັດຕາມຄາດໝາຍ; ເຮັດໃຫ້ການຈັດຕັ້ງຊາວໜຸ່ມ ມີຄວາມເຂັ້ມແຂງໜັກແໜ້ນ, ມີຄວາມສາມັກຄີພາຍໃນແໜ້ນແຟ້ນ, ມີແບບແຜນວິທີເຮັດວຽກຖືກຕ້ອງ, ມີຂະບວນການຟົດຟື້ນ, ຕ້ານ ແລະ ສະກັດກັ້ນປະກົດການຫຍໍ້ທໍ້ຕ່າງໆ ໃນຊາວໜຸ່ມ-ໄວໜຸ່ມ, ກອງປະຊຸມຄັ້ງນີ້ຈະພ້ອມກັນຄົ້ນຄວ້າ ແລະ ແລກປ່ຽນບົດຮຽນ ກ່ຽວກັບ ວຽກງານກວດກາ ແລະ ການສະຫລຸບຕີລາຄາປະເຜີນຜົນຂໍ້ແຂ່ງຂັນ 4 ບຸກຂອງ ຄຊປປລ, ຈະໄດ້ຮັບຮູ້ວ່າ ວຽກງານກວດກາຂອງຊາວໜຸ່ມ ມີວຽກຫຍັງແດ່, ຜູ້ເຮັດວຽກກວດກາ ມີໜ້າທີ່ຫຍັງແດ່, ຊຶ່ງຢູ່ໃນກົດລະບຽບຂອງ ຄຊປປລ ໝວດທີ VI ມາດຕາ 36 ກໍໄດ້ກໍານົດໄວ້ ແຕ່ຍັງເປັນສິດໜ້າທີອັນລວມ ແມ່ນຈະໄດ້ຮູ້ລະອຽດຂື້ນຕື່ມ, ພ້ອມກັນນີ້, ກໍຈະໄດ້ຮັບຮູ້ວິທີ, ຂັ້ນຕອນລະອຽດ ໃນການສະຫລູບຕີລາຄາປະເຜີນຜົນຂໍ້ແຂ່ງຂັນ 4 ບຸກ.

ເນື່ອງຈາກວ່າກອງປະຊຸມໃນຄັ້ງນີ້ ມີເນື້ອໃນສຳຄັນຫຼາຍ ດັ່ງທີ່ໄດ້ກ່າວມາຂ້າງເທິງນັ້ນ ດ້ວຍເວລາອັນຈຳກັດ ຈຶ່ງຮຽກຮ້ອງມາຍັງບັນດາສະຫາຍທັງໝົດທີ່ເຂົ້າຮ່ວມກອງປະຊຸມໃນຄັ້ງນີ້, ຈົ່ງເຊີດຊູ ແລະ ຍົກສູງຄວາມຮັບຜິດຊອບຂອງຕົນ ພ້ອມກັນຄົ້ນຄວ້າ ແລະ ປະກອບຄໍາຄິດຄໍາເຫັນຢ່າງກົງໄປກົງມາ,  ມີເຫດມີຜົນຖືກກັບສະພາບຕົວຈິງການເຄື່ອນໄຫວວຽກງານຊາວໜຸ່ມຂອງຂະແໜງ ຍທຂ ໃຫ້ເກີດປະສິດທິຜົນສູງສຸດ, ໃນການປະຕິບັດຕົວຈິງຜ່ານມາມີບັນຫາໃດບໍ່ເຂົ້າໃຈ ກໍໃຫ້ຍົກມາສົນທະນານໍາອາຈານ ເພື່ອເຮັດໃຫ້ຄະນະກວດກາຊາວໜຸ່ມກະຊວງ ກໍຄືຜູ້ກວດກາຂອງໜ່ວຍຊາວໜຸ່ມຮາກຖານຮັບຮູ້, ເຂົ້າໃຈ ແລະ ສາມາດເຄື່ອນໄຫວວຽກງານກວດກາເປັນປົກກະຕິ ແລະ ສາມາດສະຫຼຸບຕີລາຄາປະເຜີນຜົນຂໍ້ແຂ່ງຂັນ 4 ບຸກຂອງຕົນໄດ້ທຸກໆປີ.

ພິທີເຊັນສັນຍາໂຄງການກໍ່ສ້າງປັບປຸງ ແລະ ຂະຫຍາຍລະບົບນໍ້າປະປາ ແລະ ສຸຂະພິບານ ເມືອງປາກຊັນ ແຂວງ ບໍລິຄຳໄຊ

 

ພິທີເຊັນສັນຍາໂຄງການກໍ່ສ້າງປັບປຸງ ແລະ ຂະຫຍາຍລະບົບນໍ້າປະປາ ແລະ ສຸຂະພິບານ (ວຽກປັບປຸງບໍ່ບາດານ, ໂຮງງານເກົ່າ, ວາງສາຍທໍ່ສົ່ງນໍ້າດີບ ແລະ ກໍ່ສ້າງອ່າງເກັບນໍ້າສູງ) ເມືອງປາກຊັນ ແຂວງບໍລິຄຳໄຊ, ໄດ້ຈັດຂຶ້ນໃນວັນທີ 25 ທັນວາ 2020 ທີ່ບໍລິສັດ DM ຈໍາກັດຜູ້ດຽວ ທີ່ບ້ານ ໂພນພະເນົາ ເມືອງໄຊເສດຖາ ນະຄອນຫຼວງວຽງຈັນ, ໂດຍການເປັນປະທານຂອງ ທ່ານ ບຸນຈັນ ສິນທະວົງ ລັດຖະມົນຕີກະຊວງ ຍທຂ; ທ່ານ ປອ ກອງແກ້ວ ໄຊສົງຄາມ ເຈົ້າແຂວງ ແຂວງບໍລິຄຳໄຊ; ທ່ານ ນາງ ວິໄລຄຳ ໂພສາລາດ ຮອງລັດຖະມົນຕີ ກະຊວງ ຍທຂ, ມີບັນດາທ່ານຫົວໜ້າກົມ, ຫ້ອງການ, ຮອງກົມ, ຫົວໜ້າພະແນກ ຍທຂ ແຂວງບໍລິຄຳໄຊ, ຫົວໜ້າໂຄງການ, ພະນັກງານວິຊາການ ເຂົ້າຮ່ວມເປັນສັກຂີພະຍານ.

ໂຄງການນໍ້າປະປາ ແລະ ສຸຂາພິບານ, ໄດ້ຮັບທືນກູ້ຢືມຈາກ ທະນາຄານອາຊີ (ADB Loan No.3041), ຈັດຕັ້ງປະຕິບັດໂດຍ ກະຊວງ ຍທຂ, ກົມນໍ້າປະປາ ເປັນຜູ້ຮັບຜິດຊອບ ກໍານົດເວລາໃນການຈັດຕັ້ງປະຕິບັດໂຄງການ 9 ຕຸລາ 2013-31 ມີນາ 2022, ເຊິ່ງໄດ້ເລີ່ມຕົ້ນຈັດຕັ້ງປະຕິບັດໂຄງການແຕ່ວັນທີ 9 ຕຸລາ 2013, ໂດຍມີຜົນສໍາເລັດລວມຍອດໃນປະຈຸບັນ 64.00% ຂອງແຜນລວມ ແລະ ຈະປິດສະຫຼຸບກິດຈະກໍາ, ບັນຊີທັງໝົດ ຮ່ວມກັບ ADB ສໍາເລັດໃນວັນທີ 31 ມີນາ 2022; ໂດຍແຫຼ່ງທຶນທີ່ໄດ້ມາມີ: ເງິນກູ້ຢືມຈາກ ADB Loan No 3041 ມູນຄ່າ 35,000,000 ໂດຣາສະຫາຣັດ; ເງິນສົມທົບຂອງລັດຖະບານ ສປປ ລາວ ມູນຄ່າ 5,380,000 ໂດຣາສະຫາຣັດ; ຜູ້ໄດ້ຮັບຜູ້ປະໂຫຍດປະກອບສ່ວນ 170,000 ໂດຣາສະຫາຣັດ; ລວມມູນຄ່າທັງໝົດ 40,550,000 ໂດຣາສະຫາຣັດ. ໂຄງການກໍ່ສ້າງ-ປັບປຸງ ແລະ ຂະຫຍາຍລະບົບນໍ້າປະປາ ເມືອງປາກຊັນ ແຂວງບໍລິຄຳໄຊ ໂດຍອີງຕາມສັນຍາເລກທີ WS-REHAB1 ວຽກກໍ່ສ້າງ-ປັບປຸງ ແລະ ຂະຫຍາຍລະບົບນໍ້າປະປາ ເມືອງປາກຊັນ ແຂວງບໍລິຄຳໄຊ ເຊິ່ງໄດ້ເລີ້ມປະກາດການປະມູນໃນວັນທີ 15 ກໍລະກົດ 2020 ແລະ ໄດ້ປິດຮັບຊອງປະມູນໃນວັນທີ 13 ສິງຫາ 2020.

ຫຼັງຈາກນັ້ນ, ກະຊວງ ຍທຂ ໄດ້ອອກຂໍ້ຕົກລົງອະນຸມັດຮັບຮອງເອົາຜົນການປະມູນໃນວັນທີ 21 ທັນວາ 2020; ມາຮອດວັນທີ 25 ທັນວາ 2020 ຈິ່ງໄດ້ລົງນາມໃນພິທີເຊັນສັນຍາຮ່ວມມືການກໍ່ສ້າງໂຄງການປັບປຸງ ແລະ ຂະຫຍາຍລະບົບນໍ້າປະປາ ແລະ ສຸຂະພິບານ ເມືອງປາກຊັນ ແຂວງ ບໍລິຄຳໄຊ, ຄາດວ່າຈະເລີ້ມລົງມືກໍ່ສ້າງໃນວັນທີ 15 ມັງກອນ 2021 ນີ້, ໂດຍຈະໃຊ້ໄລຍະເວລາການກໍ່ສ້າງ 12 ເດືອນ, ໃນມູນຄ່າການກໍ່ສ້າງທັງໝົດ 9,905,364,142 ກີບ (ລາຄານີ້ບໍ່ລວມພາສີນໍາເຂົ້າ ແລະ ອາກອນເຂົ້າວັດສະດຸກໍ່ສ້າງ) ແຕ່ລວມອາກອນມູນຄ່າເພີ່ມ VAT 10%. ໃນນັ້ນ ບໍລິສັດຮັບເໝົາການກໍ່ສ້າງແມ່ນ ກຸ່ມບໍລິສັດ ດີເອັມ ຈໍາກັດຜູ້ດຽວ ໂດຍຂອບເຂດໂຄງການແມ່ນ ຕັ້ງຢູ່ໃນເຂດເທດສະບານ ເມືອງປາກຊັນ ແຂວງບໍລິຄຳໄຊ; ໂຄງການດັ່ງກ່າວແມ່ນການປັບປຸງ ແລະ ຂະຫຍາຍລະບົບນໍ້າປະປາເກົ່າທີ່ມີແລ້ວ ໃຫ້ມີປະລິມານການຜະລິດທີ່ພຽງພໍ ເພື່ອບໍລິການໃຫ້ແກ່ປະຊາຊົນໃນເທດສະບານເມືອງປາກຊັນ ເຊິ່ງຈໍານວນບ້ານທີ່ຈະໄດ້ຮັບການບໍລິການ ແລະ ນຳໃຊ້ນໍາ້ປະປາມີ 16 ບ້ານ.

          ສໍາລັບໜ້າວຽກທີ່ຈະໄດ້ກໍ່ສ້າງປັບປຸງປະກອບມີບັນດາໜ້າວຽກດັ່ງນີ້: ປັບປຸງແຫຼ່ງນໍ້າເກົ່າ, ນໍ້າບາດານ ຈໍານວນ 10 ບໍ່ ຢູ່ເຂດ ບ້ານປາກຊັນໃຕ້; ໄດ້ມີການອອກແບບກໍ່ສ້າງອ່າງເກັບນໍ້າສະອາດ ຂະໜາດບັນຈຸ 650 ແມັດກ້ອນ ຢູ່ພາຍໃນບໍລິເວນໂຮງງານເກົ່າ; ມີການປ່ຽນຖ່າຍປໍ້າສູບນໍ້າ ແລະ ເພີ້ມເຕີມສາຍທໍ່ DN160 ຂຶ້ນອ່າງ 200 ແມັດກ້ອນ ຢູ່ບ້ານອະນຸໄຊ ແລະ ອ່າງເກັບນໍາ້ 500 ແມັດກ້ອນ ຢູ່ພາຍໃນບໍລິເວນໂຮງງານເກົ່າ ພ້ອມທັງສ້ອມແປງອ່າງເກັບນໍ້າເກົ່າທີ່ມີແລ້ວພາຍໃນບໍລິເວນໂຮງງານ ແລະ ກໍ່ສ້າງອ່າງເກັບນໍ້າສູງໃຫມ່ຂະໜາດບັນຈຸ 350 ແມັດກ້ອນ ຢູ່ບໍລິເວນ ໂຮງຮຽນ ບ້ານ ສີວິໄລ ພ້ອມທັງໄດ້ສະໜອງ ແລະ ຕິດຕັ້ງລະບົບ SCADA.

          ທັງໝົດນີ້ກໍ່ແມ່ນບັນດາໜ້າວຽກທີ່ຕ້ອງໄດ້ຈັດຕັ້ງປະຕິບັດໃນເອກະສານສັນຍາ ເພື່ອໃຫ້ສອດຄ່ອງກັບການນໍາໃຊ້ ນໍ້າ ເພື່ອຄວາມຢູ່ດີກິນດີຂອງປະຊາຊົນລາວບັນດາເຜົ່າ.

Additional information