ກອງປະຊຸມເປີດກວ້າງທາບທາມຄຳເຫັນໃສ່ຮ່າງດໍາລັດວ່າດ້ວຍເຈົ້າໜ້າທີ່ລົດໄຟ

Details

Published on ອັງຄານ, 25 ສິງຫາ 2020 06:13

ກອງປະຊຸມເປີດກວ້າງທາບທາມຄຳເຫັນໃສ່ຮ່າງດໍາລັດວ່າດ້ວຍເຈົ້າໜ້າທີ່ລົດໄຟ ໄດ້ຈັດຂື້ນໃນວັນທີ 25 ສິງຫາ 2020 ທີ່ເມືອງວັງວຽງ ແຂວງວຽງຈັນ, ໂດຍການເປັນປະທານຂອງ ທ່ານ ວຽງສະຫວັດ ສີພັນດອນ ຮອງລັດຖະມົດຕີກະຊວງ ຍທຂ, ທ່ານ ພົຈວ ນີລະວົງ ເຈືອງຕະວະລາດ ຮອງຫົວໜ້າກົມໃຫຍ່ຕຳຫຼວດ, ກະຊວງປ້ອງກັນຄວາມສະຫງົບ, ມີບັນດາຕາງໜ້າຈາກກົມ, ກອງອ້ອມຂ້າງກະຊວງ ຍທຂ, ກະຊວງ ປກສ, ກະຊວງ ຍຸຕິທຳ, ກະຊວງພາຍໃນ, ຫ້ອງວ່າການ ສນຍ, ບັນດາທ່ານຕາງໜ້າຫ້ອງວ່າການປົກຄອງແຂວງ, ກອງບັນຊາການປ້ອງກັນຄວາມສະຫງົບແຂວງ, ນະຄອນຫຼວງ ແລະບັນດາ ພະແນກ ຍທຂ ແຂວງ, ຈາກ 5ແຂວງຄື: ນະຄອນຫຼວງວຽງຈັນ, ແຂວງວຽຈັນ, ແຂວງຫຼວງນໍ້າທາ, ແຂວງອຸດົມໄຊ ແລະແຂວງຫຼວງພະບາງ ແລະບັນດາທ່ານຄະນະຮັບຜິດຊອບການຮ່າງດໍາລັດວ່າດ້ວຍເຈົ້າໜ້າທີ່ລົດໄຟ ທັງສອງກະຊວງ ຄະນະຄຸ້ມຄອງໂຄງການລົດໄຟ ລາວ-ຈີນ, ລັດວິສາຫະກິດລົດໄຟແຫ່ງຊາດລາວ ແລະບໍລິສັດລົດໄຟ ລາວ-ຈີນ ກໍ່ໃຫ້ກຽດເຂົ້າຮ່ວມ.

ຈຸດປະສົງ​ຕົ້ນຕໍ​ຂອງ​​ກອງ​ປະຊຸມ​ເປີດ​ກ້ວາງ​ໃນ​ຄັ້ງນີ້ ​ແມ່ນ​ເພື່ອ​ຄົ້ນຄວ້າ ​ແລະ ປະກອບ​ຄໍາ​ຄິດ​ເຫັນ​ຢ່າງ​ເປີດ​ກ້ວາງ, ສ້າງສັນ ​ແລະ ຫຼາກຫຼາຍ​ເຂົ້​າໃສ່​ເນື້​ອໃນຮ່າງ​ດຳລັດ​ວ່າ​ດ້ວຍ​ເຈົ້າໜ້າທີ່​ລົດ​ໄຟ​ໃຫ້​ມີ​ປະສິດ ທິພາບ ​ແລະປະສິດທິ​ຜົນ. ດໍາລັດ​ສະບັບ​ນີ້​ແມ່ນ​ນິຕິ​ກໍາໜຶ່ງ​ໃນ​ຫົວ​ຂໍ້​ນິຕິ​ກໍາ​ຂອງ​ກະຊວງ ຍທຂ ທີ່​ຈະ​ນໍາ​ສະ​ເໜີຜ່ານ​ກອງ​ປະຊຸມ​ນາຍົກ-​ຮອງ​ນາຍົກລັດຖະມົນຕີ ​ແລະກອງ​ປະຊຸມ​ລັດຖະບານປີ 2020 ຊຶ່ງ​ດໍາລັດ​ສະບັບ​ນີ້ຕາມ​ວາລະທີ່​ຈະ​ນໍາ​ເຂົ້າສະ​ເໜີລັດຖະບານ​ແມ່ນ​ເດືອ​ນ 11 ປີ 2020. ເນື່ອງຈາກ​ວ່າວຽກງານ​ທາງ​ລົດ​ໄຟ​ມີ​ການ​ຂະຫຍາຍຕົວຫຼາຍນັບ​ຕັ້ງ​ແຕ່​ປີ 2005-2008 ກໍ່​ໄດ້​ມີ​ການກໍ່ສ້າງເສັ້ນທາງ​ລົດ​ໄຟ​ທໍາ​ອິດມີ​ຄວາມຍາວ 3.5 ກມ, ຊຶ່ງ​ເປັນ​ເສັ້ນທາງ​ເຊື່ອມ​ຕໍ່ຊາຍ​ແດນລະຫວ່າງ ລາວ-​ໄທ (ທ່າ​ນາ​ແລ້ງ-ໜອງຄາຍ) ຕໍ່ມາ​ປີ 2017 ກໍ່​ໄດ້​ມີ​ໂຄງການ​ກໍ່ສ້າງ​ທາງ​ລົດ​ໄຟ​ ລາວ-​ຈີນ ນັບ​ຕັ້ງ​ແຕ່​ຊາຍ​ແດນ​ລາວ-​ຈີນ (ດ່ານ​ສາກົນ​ບໍ່​ເຕັນ) ຮອດນະຄອນຫຼວງວຽງຈັນ ມີ​ຄວາມ​ຍາວ 409 ກມ, ​ແລະວຽກງານ​ລົດ​ໄຟ​ນີ້ຍັງ​ມີ​ການ​ຂະຫຍາຍ​ຕາໜ່າງ​ເສັ້ນທາງການ​ພັດທະນາ​ດ້ານ​ອື່ນໆ ​ໃນ​ອະນາຄົດ​ອັນ​ໃກ້​ນີ້ ສະນັ້ນ, ​ເພື່ອ​ຮັບປະກັນ​ການ​ຄຸ້ມ​ຄອງ​ບໍລິຫານ​ດ້ວຍ​ກົດໝາຍ​ໃນ​ໂຂງ​ເຂດ​ວຽກງານ​ການຂົນ​ສົ່ງ​ທາງ​ລົດ​ໄຟທີ່​ໄດ້​ກ່າວ​ມາ​ຂ້າງ​ເທິງ​ນັ້ນ ​ໃຫ້​ມີ​ປະສິດທິພາບ ​ແລະມີປະສິດ​ທິຜົນ​ສູງຈໍາ​ເປັນ​ຕ້ອງ​ໄດ້​ມີ​ນິຕິ​ກໍາ​ທີ່​ຮັດກຸມ, ກໍານົດຫຼັກການ, ລະບຽບການ ​ແລະມາດຕາ​ການກ່ຽວກັບ​ພາລະ​ບົດບາດ, ສິດ, ໜ້າທີ່, ​ໂຄງ​ປະກອບ​ການຈັດຕັ້ງ ​ແລະບຸກຄະລາ​ກອນ, ການ​ຄຸ້ມ​ຄອງ ​ແລະຕິດຕາມ​ກວດກາ​ວຽກງານ​ຂອງ​ເຈົ້າໜ້າທີ່​ລົດ​ໄຟ ​ເພື່ອ​ໃຫ້​ແທດ​ເໝາະ ​ແລະສອດຄ່ອງ​ກັບ​ສະພາບ​ການ​ພັດທະນາ​ເສດຖະກິດ-​ສັງຄົມ ພ້ອມ​ທັງ​ເປັນ​ເຄື່ອງມື​ໃນ​ການ​ຮອງ​ຮັບ​ການ​ຂະຫຍາຍຕົວດ້ານ​ເສດຖະກິດ​ຂອງ​ປະ​ເທດຮັບປະກັນ​ການ​ເຊື່ອມ​ຈອດ, ​ເຊື່ອມ​ໂຍງ​ໃນ​ພາກພື້ນ ​ແລະສາກົນ ​ໃຫ້​ມີ​ຄວາມ​ສະຫງົບ​ເປັນ​ລະບຽບຮຽບຮ້ອຍ ​ແລະ ປອດ​ໄພ.

ກອງ​ປະຊຸມ​ເປີດ​ກວ້າງທາ​ບທາມ​ຄໍາ​ເຫັນ​ໃນ​ຄັ້ງນີ້ ຈະ​ໄດ້​ດຳ​ເນີນ​ໄປ​ຕາມ​ວາລະ​ຂອງ​ກອງ​ປະຊຸມ ນັບແຕ່ວັນທີ 25-27 ສິງຫາ 2020, ເພື່ອ​ໃຫ້​ບັນດາ​ທ່ານທີ່​ມາ​ຈາກ​ຫຼາຍພາກສ່ວນ, ​ຫຼາຍຂະ​​ແໜງການ​ຕ່າງໆທີ່​ກ່ຽວຂ້ອງ ​ໄດ້​ປະກອບ​ຄໍາ​ຄິ​ດຄໍາ​ເຫັນ​ໃສ່ເນື້ອ​ໃນຮ່າງ​ດຳລັດ ​ວ່າ​ດ້ວຍ​ເຈົ້າໜ້າທີ່​ລົດ​ໄຟ ​ເພື່ອ​ເຮັດ​ແນວ​ໃດ​ໃຫ້​ຮ່າງ​ດຳລັດ​ດັ່ງ​ກ່າວ​ຮັບປະກັນ​​ໃນ​ການຈັດຕັ້ງປະຕິບັດ​ໃຫ້​ໄດ້​ຮັບໝາກຜົນ​ອັນ​ດີງາມ ​ແລະ ສໍາ​ເລັດ​ຕາມ​ລະດັບ​ຄາດໝາຍທີ່​ວາງ​ໄວ້.

ກອງປະຊຸມໄລຍະກາງຂັ້ນສູນກາງສໍາລັບການກະກຽມການສຶກສາຄວາມເປັນໄປໄດ້ເບື້ອງຕົ້ນ ສໍາລັບໂຄງການຕົວເມືອງໜ້າຢູ່ນະຄອນຫຼວງວຽງຈັນ

Details

Published on ພຸດ, 19 ສິງຫາ 2020 06:57

 ກອງປະຊຸມໄລຍະກາງ ຂັ້ນສູນກາງສໍາລັບການກະກຽມ ການສຶກສາຄວາມເປັນໄປໄດ້ເບື້ອງຕົ້ນ ສໍາລັບຕົວເມືອງໜ້າຢູ່ ນະຄອນຫຼວງວຽງຈັນ, ໄດ້ຈັດຂື້ນໃນຕອນບ່າຍຂອງວັນທີ 14 ສິງຫາ 2020 ທີ່ໂຮງແຮມ ຄຼາວພາຊາ, ພາຍໃຕ້ການເປັນປະທານຂອງ ທ່ານ ນາງ ວິໄລຄຳ ໂພສາລາດ ຮອງລັດຖະມົນຕີ ກະຊວງ ຍທຂ; ທ່ານ ທ່ອນແກ້ວ ພຸດທະໄກລາດ ຮອງເຈົ້າແຂວງ ແຂວງສະຫວັນນະເຂດ; ທ່ານ ມະໄລທອງ ກົມມະສິດ ຮອງເຈົ້າແຂວງ ແຂວງຈໍາປາສັກ, ມີບັນດາທ່ານ ເຈົ້າເມືອງ, ຄະນະກົມ, ຄະນະພະແນກ, ຜູ້ຕາງໜ້າຈາກ ທະນາຄານພັດທະນາອາຊີ, CDIA (Cities Development Initiative for Asia), ຄະນະຮັບຜິດຊອບໂຄງການ ແລະ ພາກສ່ວນກ່ຽວຂ້ອງ ທີ່ມາຈາກສູນກາງ ແລະ ທ້ອງຖິ່ນ ກໍ່ໃຫ້ກຽດເຂົ້າຮ່ວມ.

ຈຸດປະສົງເປົ້າໝາຍຂອງ ກອງປະຊຸມໃນມື້ນີ້ແມ່ນ ເພື່ອປຶກສາຫາລື ທົບທວນ ແລະ ປະກອບຄໍາເຫັນ ໃສ່ຮ່າງບົດລາຍງານ ໄລຍະກາງ, ປະກອບຄໍາເຫັນຕໍ່ ກອບໜ້າວຽກ ແລະ ການປະເມີນລາຄາຂອງບັນດາກິດຈະກໍາຍ່ອຍ ຂອງໂຄງການ  ປຶກສາຫາລືກ່ຽວກັບການສ້າງຄວາມເຂັ້ມແຂງໃນການໃຫ້ບໍລິການ, ການບໍາລຸງຮັກສາໃຫ້ມີຄວາມຍຶນຍົງ ແລະ ຄວາມມີປະສິດທິຜົນ  (ໂດຍສະເພາະວຽກ O&M) ແລະ ປຶກສາຫາລືບັນຫາທາງດ້ານສິ່ງແວດລ້ອມ-ສັງຄົມ ທີ່ຕິດພັນກັບບັນດາໜ້າວຽກ ໂດຍສະເພາະ 4 ໜ້າວຽກຕົ້ນຕໍ ເຊັ່ນ: 1. ການຄຸ້ມຄອງຂີ້ເຫຍື້ອ( Solid waste management); 2. ການຄຸ້ມຄອງນໍ້າເປື້ອນ( Wastewater management); 3. ການປັບປຸງຜັງເມືອງ ແລະ ພູມມິທັດໃນຕົວເມືອງ( Urban planning/ Streetlife improvement) ແລະ 4. ການສ້າງຂີດຄວາມສາມາດ (Capacity Building).

ທີ່ມາຂອງໂຄງການ, ໂຄງການດັ່ງ​ກ່າວ, ມີກອບວຽກເບື້ອງຕົ້ນມາແຕ່ເດືອນ 5/2019 ໂດຍມີການ​ກຳ​ນົດ​ຮ່ວມ​ກັນຈາກຜູ້ຕາງໜ້າ ຂອງ ADB, ​ຈາກ CDIA (ໜ່ວຍງານຊ່ວຍເຫລືອທາງດ້ານວິຊາການ

ການລິເລີ້ມການ​ພັດ​ທະນາເມືອງສໍາລັບອາຊີ ), ມີກົມເຄ​ຫາ ​ແລະ ​ຜັງ​ເມືອງ ກະຊວງ ຍທຂ ແລະ 3 ​ນະ​ຄອນ ເປົ້າໝາຍຄື ນະຄອນ ​ຫລວງ​ພະ​ບາງ, ນະຄອນ ​ໄກ​ສອນ​ພົມ​ວິ​ຫານ ແລະ ນະຄອນ​ ປາກ​ເຊ. ​ມາຮອດ​ວັນ​ທີ 13/12/2019 ໄດ້ຮັບການ​ເຫັນ​ດີຈາກ ກະຊວງ ແຜນ​ການ ແລະ ການ​ລົງ​ທຶນ ໃຫ້ກະຊວງ ຍທຂ ຮັບເອົາ ໂຄງການ ຊ່ວຍເຫລືອດັ່ງ​ກ່າວ. ໂດຍມອບໃຫ້ກົມ ເຄຫາ ແລະ ຜັງເມືອງ ເປັນຜູ້ເຊັນສັນຍາຮັບເອົາຈາກໜວ່ຍ​ງານ CDIA ເອີ້ນ​ວ່າ​ເປັນ ໂຄງການ ​ກະ​ກຽມ​ການ​ສຶກ​ສາ​ຄວາມ​ເປັນ​ໄປ​ໄດ້​ເບື້ອງ​ຕົ້ນ ​ຂອງ​ຕົວ​ເມືອງ​ໜ້າ​ຢູ່ໃນ 3 ນະຄອນ ​ມີ​ເລກລະ​ຫັດ​ ADB-RETA 8566 ມູນ​ຄ່າ  650 ພັນ​ ໂດຣາສະຫະລັດ ແລະ ຈະໃຊ້​ເວ​ລາ 6 ເດືອນ. ຈາກນັ້ນ​​ກົມ ເຄຫາ ແລະ ຜັງເມືອງ ໄດ້ປະ​ສານ​ນຳ​ ພະນັກງານ ຍ​ທ​ຂ ແຂວງ​ໃຫ້​ມີ​ການ​ແຕ່ງ​ຕັ້ງ​ທີມງານ ຂື້ນໃນ 3 ນ​ະຄອນ ​ເພື່ອ​ເຮັດ​ວຽກ​​ກັບທີມ​ງານ​ຊ່ຽວ​ຊານ CDIA ແລະ ລວມ​ກັບ​ທີມງານຂອງ​ກົມ​ເຄ​ຫາ ແລະ ຜັງ​ເມືອງ.

ສິ່ງ​ທີ່ໂຄງ​ການເຮັດ​ໄດ້​ຜ່ານ​ມາ ແມ່ນສຳ​ເລັດ​ການ​ຜ່ານບົດ​ລາຍ​ງານໄລ​ຍະຕົ້ນ​​ ຂອງ​ແຕ່​ລະ​ນະ​ຄອນ ໃນວັນ​ທີ່ 6/2/2020 ຕາມ​ກອບ​ວຽກທີ່​ທີມ​ງານຊຽວ​ຊານ CDIA ໄດ້​ສຶກ​ສາມີ 4 ຫົວ​ຂໍ້​ຄື 1. ເລື້ອງ​ຂີ້​ເຫຍື້ອ; 2. ເລື້ອງນໍ້າເປື້ອນ; 3. ເລື້ອງ​ພູ​ມີ​ທັດຕົວເມືອງ ແລະ 4. ເລື້ອງ ການ​ສ້າງ​ຄວາມ​ເຂັ້ມ​ແຂງດ້ານບຸ​ຄະ​ລາ​ກອນ. ຕໍ່​ມາໃນເດືອນ 3/2020  ກໍ່ມີ​ການ​ສືບຕໍ່​ວຽກງານໄລ​ຍະ​ກາງ​ຂອງ ໂຄງການ ແຕ່​ກໍ່​ບໍ່​ໄດ້ຄາດ​ຄິດ​ໃນ​ເວ​ລາ​ດຽວ​ກັນ​ກໍ່​ເກີດໂຣ​ລະ​ບາດ COVID-19 ຈຶ່ງ​ເປັນ​ຜົນ​ກະ​ທົບຕໍ່​ວຽກດັ່ງ​ກ່າວ ​ທີ່ຈະ​​​​ໃຫ້​ສຳ​ເລັດ​ບົດ​ລາຍ​ງານ​ໄລ​ຍະ​ກາງໃນ​ເດືອນ 5/2020 ນັ້ນຕ້ອງ​ຊັກ​ຊ້າ​ອອກ​ໄປ ແລະ ​ໃນເດືອນນີ້​ເອງຫ້ອງ​ການ CDIA ກໍ່​ມີ​ການ​ສັ່ງ​ໂຈ໊ະວຽກ​ງານ​ຂອງ​ທີມຊ່ຽວ​ຊານ​​ໃວ້​ກ່​ອນຈົນມາຮອດເດືອນ 7/2020 ນີ້ຈຶ່ງ​ໄດ້​ໃຫ້​ສືບ​ຕໍ່, ປະ​ຈຸ​ບັນ​ໂຄງ​ການ​ກໍ່​ສຳ​ເລັດ​ບົດ​ລາຍ​ງານ​ໄລ​ຍະ​ກາງ ແລະ ຈະ​ໄດ້​ນຳ​ສະ​ເໜີ​ຜ່ານ​ທີ່​ປະຊຸມ​ໂດຍ​​ໃຫ້ຜູ້​ຕາງ​ໜ້າຂອງ​ທີມ​ງານຊຽວ​ຊານ CDIA ນຳ​ສະ​ເໜີ​ເຖິງ​ຜົນ​ໄດ້​ຮັບ​ໃນ​ການ​ສຶກ​ສາ​ຄວາມ​ເປັນໄປ​ໄດ້ເບື້ອງ​ຕົ້ນໃນ​ການ​ລົງ​ທືນ ພັດ​ທະ​ນາ​ຕົວ​ເມືອງ​ໜ້າ​ຢູ່​ໃນ 3 ນະ​ຄອນ.​

ກອງປະຊຸມວິທະຍາສາດ ກະກຽມເນື້ອໃນໃຫ້ກອງປະຊຸມໃຫຍ່ ຄັ້ງທີ V ຂອງອົງຄະນະພັກກະຊວງ ຍທຂ

Details

Published on ສຸກ, 21 ສິງຫາ 2020 13:34

ກອງປະຊຸມວິທະຍາສາດ ກະກຽມເນື້ອໃນໃຫ້ກອງປະຊຸມໃຫຍ່ ຄັ້ງທີ V ຂອງອົງຄະນະພັກກະຊວງ ຍທຂ ໄດ້ຈັດຂື້ນໃນວັນທີ 19 ສິງຫາ 2020 ທີ່ຫ້ອງປະຊຸມໃຫຍ່ຂອງກະຊວງ, ໂດຍການເປັນປະທານ ຂອງທ່ານ ນາງ ວິໄລຄຳ ໂພສາລາດ ຮອງລັດຖະມົນຕີກະຊວງ ຍທຂ, ທ່ານ ປອ ສັນຕິສຸກ ສິມມາລາວົງ ຮອງລັດຖະມົນຕີກະຊວງ ຍທຂ, ທ່ານ ວຽງສະຫວັດ ສີພັນດອນ ຮອງລັດຖະມົນຕີ ກະຊວງ ຍທຂ, ມີບັນດາຫ້ອງການ, ກົມ, ສະຖາບັນ, ກອງ, ລັດວິສາຫະກິດທີ່ຂື້ນກັບກະຊວງ ຍທຂ, ພະແນກ ຍທຂ ປະຈໍາແຂວງ ແລະ ນະຄອນຫຼວງ, ຕາງໜ້າຈາກກະຊວງອ້ອມຂ້າງ, ມະຫາວິທະຍາໄລແຫ່ງຊາດ (ຄະນະທີ່ກ່ຽວຂ້ອງກັບ ວຽກງານ ຍທຂ) ກໍ່ໄດ້ເຂົ້າຮ່ວມຢ່າງພ້ອມພຽງ.

ໂດຍປະຕິບັດຕາມ ກົດລະບຽບພັກປະຊາຊົນປະຕິວັດລາວ ສະໄໝທີ X, ຄໍາສັ່ງຂອງຄະນະເລຂາທິການສູນກາງພັກ, ສະບັບເລກທີ 04/ຄລສພ, ລົງວັນທີ 07/05/2018 ວ່າດ້ວຍການກະກຽມດໍາເນີນກອງປະຊຸມໃຫຍ່ ຂອງອົງຄະນະພັກກະຊວງ-ອົງການ, ແຂວງ-ນະຄອນຫຼວງ, ອົງຄະນະພັກເມືອງ ແລະຮາກຖານພັກໃນຂອບເຂດທົ່ວປະເທດ ແລະຄໍາສັ່ງແນະຂອງຄະນະຈັດຕັ້ງສູນກາງພັກ, ສະບັບເລກທີ 784/ຄຈສພ, ລົງວັນທີ 14/09/2018 ກ່ຽວກັບການຈັດຕັ້ງປະຕິບັດຄໍາສັ່ງເລກທີ 04/ຄລສພ, ກອງປະຊຸມວິທະຍາສາດຄັ້ງນີ້ ມີຈຸດປະສົງ ເພື່ອລະດົມຄວາມຄິດໃສ່ ຮ່າງບົດລາຍງານການເມືອງ ຕໍ່ກອງປະຊຸມໃຫຍ່ຄັ້ງທີ XI ຂອງພັກ ແລະ ກະກຽມໃຫ້ແກ່ກອງປະຊຸມໃຫຍ່ຄັ້ງທີ V ຂອງອົງຄະນະພັກກະຊວງ ຍທຂ; ໃນຄັ້ງນີ້ຈະໄດ້ລົງເລິກປຶກສາຫາລື ແລະ ລະດົມແນວຄວາມຄິດ ໃສ່ບັນດາແຜນງານຈຸດສຸມບູລິມະສິດ ຂອງ ຮ່າງແຜນພັດທະນາ 5 ປີ 2021-2025 ຂອງກະຊວງ ຍທຂ ທີ່ຈະເປັນເນື້ອໃນຕົ້ນຕໍ ໃນບົດລາຍງານການເມືອງ ຂອງກອງປະຊຸມໃຫຍ່ຄັ້ງທີ V ຂອງອົງຄະນະພັກກະຊວງ ຍທຂ ເຊິ່ງຈະຖືກໄຂຂື້ນໃນໄວໆ. ໂດຍອີງຕາມການຖອດຖອນບົດຮຽນໃນການຈັດຕັ້ງປະຕິບັດ ແຜນພັດທະນາ 5 ປີ 2016-2020 ຂອງກະຊວງ ຍທຂ; ແລະອີງໃສ່ກາລະໂອກາດ ແລະທ່າແຮງທາງດ້ານການພັດທະນາໃນໄລຍະໃໝ່, ກະຊວງ ຍທຂ ໄດ້ກໍານົດ 14 ແຜນງານ ຈຸດສຸມບູລິມະສິດ ໃນຮ່າງແຜນພັດທະນາ 5 ປີ 2021-2025. ກອງປະຊຸມຈະໃຊ້ເວລາຢູ່ໜຶ່ງວັນ, ເຊິ່ງເປັນກອງປະຊຸມທີ່ມີຄວາມໝາຍ, ຄວາມສໍາຄັນເພາະວ່າເປັນກອງປະຊຸມວິທະຍາສາດ ໂດຍທີ່ຈະຄົ້ນຄວ້າ, ປຶກສາຫາລື, ປະກອບຄໍາເຫັນ ແລະ ພິຈາລະນາຮັບຮອງ ກ່ຽວກັບກຳນົດບັນດາຄາດໝາຍ, ຕົວຊີ້ບອກ; ແຜນວຽກຈຸດສຸມເພື່ອບັນລຸຕາມຄາດໝາຍ ແລະ ສິ່ງທ້າທ້າຍຫຼືກົນໄກການຈັດຕັ້ງປະຕິບັດບັນດາ ແຜນວຽກຈຸດສຸມ ໃນສະພາບປົກກະຕິໃໝ່ (New Normal) ຫຼືສະພາບທີ່ໄດ້ຮັບຜົນກະທົບຈາກ Covid-19 ທີ່ປະເທດເຮົາກໍ່ຄືທົ່ວໂລກກຳລັງປະເຊີນຢູ່.

ລະດັບຄາດໝາຍຂອງກອງປະຊຸມໃນຄັ້ງນີ້ ແມ່ນເພື່ອຄົ້ນຄວ້າລະດົມແນວຄິດ ແລະສ້າງຄວາມເປັນເອກະພາບ ໃນບັນດາຄາດໝາຍ, ຕົວຊີ້ບອກ, ແຜນວຽກຈຸດສຸມ ແລະກົນໄກການຈັດຕັ້ງປະຕິບັດ ໃນສະພາບ New Normal ຂອງແຕ່ລະແຜນງານບູລິມະສິດ; ບົນພື້ນຖານເນື້ອໃນ ແລະໝາກຜົນຂອງກອງປະຊຸມໃນຄັ້ງນີ້ ຈະຖືກບັນຈຸເຂົ້າໃນ ເນື້ອໃນຂອງຮ່າງບົດລາຍງານການເມືອງ ກໍ່ຄືຮ່າງມະຕິກອງປະຊຸມໃຫຍ່ຄັ້ງທີ V ຂອງອົງຄະນະພັກກະຊວງ ຍທຂ ທີ່ຈະມີຂື້ນໃນໄວໆນີ້.  

ໂຄງການທາງລົດໄຟ ລາວ-ຈີນ ມອບເຄື່ອງຊ່ວຍເຫຼືອ ຕ້ານໂຄວິດ-19 ໃຫ້ກະຊວງ ຍທຂ

Details

Published on ສຸກ, 14 ສິງຫາ 2020 08:18

ພິທີມອບ-ຮັບ​ອຸ​ປະ​ກອນຊ່ວຍ​ເຫຼືອ ເພື່ອນຳ​ໃຊ້​ເຂົ້າ​ໃນ​ການປ້ອງກັນ ແລະ ຕ້ານການແຜ່ລະບາດຂອງພະຍາດ COVID-19 ​ໄດ້​ຈັດ​ຂື້ນໃນຕອນ​ບ່າຍວັນທີ 13 ສິງຫາ 2020 ຢູ່ຫ້ອງປະຊຸມເບີ 2 ຂອງກະຊວງ ຍທຂ, ໄດ້​ໃຫ້​ກຽດ​ມອບ​ໂດຍຜູ້ຕາງໜ້າໂຄງການທາງລົດໄຟ ລາວ-ຈີນ ໃຫ້ກະຊວງໂຍທາທິການ ແລະ ຂົນສົ່ງ ແລະ ຮັບ​ໂດຍ​ ທ່ານ ບຸນ​ຈັນ ສິນຣາ​ຊະ​ວົງ ຫົວໜ້າ​ຫ້ອງ​ການກະ​ຊວງ ໂຍ​ທາ​ທິ​ການ ແລະ ຂົນ​ສົ່ງ, ບັນ​ດາ​ຄະ​ນະ​ຫ້ອງ​ການ ແລະ ຄະ​ນະພະ​ແນກເຂົ້າ​ຮ່ວມ; ເຄື່ອງອຸປະກອນທີ່​ນຳ​ມາ​ມອບ​ໃນ​ຄັ້ງ​ນີ້: ມີຜ້າປິດປາກອານນາໄມໃຊ້ເທື່ອດຽວ ຈຳນວນ 77,500 ແຜ່ນ , ສະບູລ້າງມື ຈໍານວນ 530 ກ໋ອງ, ເຄື່ອງແທກອຸນຫະພູມ 10 ອັນ, ເຈວລ້າງມື ຈໍານວນ 124 ຂວດ, ນໍ້າຢາຂ້າເຊື້ອ ຈໍານວນ 12 ຕຸກ, ລວມມູນຄ່າທັງໝົດ 396,590,000 ກີບ. ເພື່ອ​ນຳໃຊ້ເຂົ້າໃນວຽກງານການປ້ອງກັນ, ສະ​ກັດ​ກັ້ນ, ເຝົ້າລະ​ວັງ ແລະ ຕ້ານການແຜ່ລະບາດ ຂອງພະຍາດໂຄວິດ-19.