ຂ່າວພາຍໃນກະຊວງ

ງານສັບປະດາແຫ່ງຊາດດ້ານຄວາມປອດໄພທາງຫຼວງປະຈໍາປີ 2021

ໃນຕອນເຊົ້າຂອງວັນທີ 03 ເມສາ 2021, ກະຊວງ ຍທຂ ໄດ້ຈັດງານສັບປະດາແຫ່ງຊາດດ້ານຄວາມປອດໄພ ທາງຫຼວງປະຈໍາປີ 2021 ຂື້ນ ທີ່ເດີ່ນພະທາດຫຼວງ ນະຄອນຫຼວງວຽງຈັນ, ພາຍໃຕ້ຫົວຂໍ້ຂັບ “ຂີ່ປອດໄພ ຕ້ອງໃສ່ສາຍຮັດນິລະໄພ ປູກຈິດສໍານຶກໃຫ້ສັງຄົມກໍ່ຄືນັກຂັບຂີ່ໃຫ້ສັງຄົມກໍ່ຄືນັກຂັບຂີ່ປອດໄພ ຕ້ອງໃສ່ສາຍເຮັດນິລະໄພ ປູກຈິດສໍານຶກ ໃຫ້ສັງຄົມກໍ່ຄືນັກຂັບຂີ່ໃຫ້ມີສະຕິ ແລະ ປະຕິບັດຕາມກົດລະບຽບຂອງການສັນຈອນ ສັບປະດາແຫ່ງຊາດ ດ້ານຄວາມປອດໄພທາງຫຼວງ”

          ໃຫ້ກຽດເຂົ້າຮ່ວມໂດຍທ່ານ ທ່ານ ພົນເອກ ຈັນສະໝອນ ຈັນຍາລາດ ຮອງນາຍົກລັດຖະມົນຕີ, ລັດຖະມົນຕີ ກະຊວງປ້ອງກັນປະເທດ, ທ່ານ ວຽງສະຫວັດ ສີພັນດອນ ລັດຖະມົນຕີກະຊວງ ຍທຂ, ທ່ານ ອາດສະພັງທອງ ສີພັນດອນ ເຈົ້າຄອງນະຄອນຫຼວງວຽງຈັນ, ມີພະນັກງານ, ທະຫານ, ຕຳຫລວດ, ນັກຮຽນດ ນັກສຶກສາ, ຕະຫຼອດຮອດພໍ່ແມ່ປະຊາຊົນທຸກຖ້ວນໜ້າທີ່ເຂົ້າຮ່ວມງານໃນງານຄັ້ງນີ້.

ບັນຫາການເກີດອຸບປະຕິເຫດທາງຫຼວງໃນທົ່ວໂລກ ໄດ້ມີອັດຕາການເພີ່ມຂຶ້ນຢ່າງໄວ ໂດຍສະເພາະໃນບັນດາປະເທດທີ່ກຳລັງພັດທະນາ ຊຶ່ງສ້າງຄວາມສູນເສຍຕໍ່ຊີວິດ ແລະ ຊັບສິນລວມທັງ ສ້າງຄວາມເສຍຫາຍທາງດ້ານເສດຖະກິດ ແລະ ການພັດທະນາຂອງຫຼາຍປະເທດ, ອີງຕາມການສະຫຼຸບລາຍງານ ຂອງອົງການອະນາໄມໂລກ ໃຫ້ຮູ້ວ່າ ໃນແຕ່ລະປີທົ່ວໂລກ ມີຜູ້ເສຍຊີວິດຈາກການເກີດອຸບປະຕິເຫດທາງຫຼວງ ຫຼາຍກວ່າ 1.3 ລ້ານຄົນ, ບາດເຈັບຫຼາຍກວ່າ 23 ລ້ານຄົນ ລວມມູນຄ່າການເສຍຫາຍກວມ 3% ຂອງ GDP ໂລກ ຫຼື ປະມານ 2.5 ພັນ ຕື້ໂດລາສະຫະລັດ.

ສຳລັບ ສປປລາວ ການເກີດອຸບປະຕິເຫດທາງຫລວງ ໄດ້ສ້າງຄວາມສູນເສຍທາງດ້ານຊີວິດ ແລະ ຊັບສິນ ຂອງປະຊາຊົນລາວໃນແຕ່ລະປີ ຄິດເປັນມູນຄ່າມະຫາສານ ຖ້າຄິດໄລ່ຕາມການກໍານົດ ຂອງອົງການອະນາໄມໂລກ ຜູ້ເສຍຊີວິດໜຶ່ງຄົນ ຈະມີມູນຄ່າເທົ່າກັບ 70 ເທື່ອຂອງ  GDP ແລະ ຜູ້ບາດເຈັບໜຶ່ງຄົນເທົ່າກັບ 17 ເທື່ອຂອງ GDP ປະຈຸບັນລາຍຮັບສະເລ່ຍຕໍ່ຫົວຄົນຕໍ່ປີຂອງ ສປປ ລາວ ປະມານ 2.500 ໂດລາສະຫະລັດ, ສະຖິຕິການເກີດອຸບປະຕິເຫດຕາມການລາຍງານຂອງຕໍາຫຼວດຈະລາຈອນ ແຕ່ລະປີມີຜູ້ເສຍຊີວິດປະມານ 1.000 ຄົນ ແລະ ບາດເຈັບຫຼາຍກ່ວາ 8.000 ຄົນ ສະນັ້ນມູນຄ່າການສູນເສຍທາງເສດຖະກິດຈາກການເກີດອຸບປະຕິເຫດທາງຫລວງ ຈະມີຫຼາຍກວ່າ 500 ລ້ານໂດລາສະຫະລັດຕໍ່ປີ.

          ຍ້ອນເຫັນໄດ້ຄວາມສຳຄັນຕໍ່ບັນຫາດັ່ງກ່າວ, ອົງການສະຫະປະຊາຊາດຈຶ່ງໄດ້ມີ ມະຕິສະບັບເລກທີ A/RES/60/5, ລົງວັນທີ 26 ຕຸລາ 2005 ກ່ຽວກັບການປັບປຸງຄວາມປອດໄພທາງຫຼວງໃນທົ່ວໂລກ ໂດຍມອບໝາຍ ໃຫ້ຫ້ອງການອົງການສະຫະປະຊາຊາດ ແລະ ອົງການອະນາໄມໂລກປະຈໍາພາກພື້ນ ສົມທົບກັນຈັດສັບປະດາຄວາມປອດໄພທາງຫຼວງສາກົນຂຶ້ນ ໂດຍຈັດໃຫ້ມີກິດຈະກຳຕ່າງໆ  ເພື່ອຍົກສູງສະຕິຕໍ່ຄວາມປອດໄພທາງຫຼວງ, ຊຶ່ງມາຮອດປັດຈຸບັນໄດ້ຈັດມາແລ້ວ 5 ຄັ້ງ ແລະ ແຕ່ລະປີ ແຕ່ລະປະເທດສາມາດເລື່ອງເອົາຂໍຫົວຂໍ້ ທີ່ເໝາະສົມກັບສະພາບຂອງປະເທດຕົນເອງ.

ພ້ອມດຽວກັນນີ້ ກົດໝາຍວ່າດ້ວຍການຈະລາຈອນທາງບົກ ສະບັບປັບປຸງ ປີ 2012 ກໍໄດ້ກໍານົດໃຫ້ມີການຈັດສັບປະດາແຫ່ງຊາດດ້ານຄວາມປອດໄພທາງຫຼວງ ຂຶ້ນທຸກປີ ໃນອາທິດທໍາອິດ ຂອງເດືອນເມສາ. ດັ່ງນັ້ນ, ການຈັດງານດັ່ງກ່າວ ຈຶ່ງມີຄວາມໝາຍສໍາຄັນ ເພາະພວກເຮົາຈະໄດ້ພ້ອມໃຈກັນເຂັ້ມງວດ ຈັດຕັ້ງປະຕິບັດກົດໝາຍວ່າດ້ວຍການຈະລາຈອນທາງບົກແລ້ວ ຍັງໄດ້ປະຕິິບັດພັນທະຂອງຕົນຕໍ່ສາກົນ ກໍ່ຄືອົງການສະຫະປະຊາຊາດ ທີ່ ສປປລາວ ເປັນສະມາຊິກ.

ພິທີ ມອບ-ຮັບ ໜ້າທີ່ລັດຖະມົນຕີກະຊວງ ຍທຂ ຜູ້ເກົ່າ ແລະ ຜູ້ໃໝ່

 

ກະຊວງ ໂຍທາທິການ ແລະ ຂົນສົ່ງ, ໄດ້ຈັດພິທີ ມອບ-ຮັບ ໜ້າທີ່ລັດຖະມົນຕີ ລະຫວ່າງ ທ່ານ ບຸນຈັນ ສິນທະວົງ ລັດຖະມົນຕີກະຊວງ ຍທຂ ຜູ້ເກົ່າ ແລະ ທ່ານ ວຽງສະຫວັດ ສີພັນດອນ ຮອງລັດຖະມົນຕີກະຊວງ ຍທຂ, ມາເປັນລັດຖະມົນຕີກະຊວງ ຍທຂ ຜູ້ໃໝ່, ພິທີໄດ້ຈັດຂື້ນໃນວັນທີ 29 ມີນາ 2021 ທີກະຊວງ ຍທຂ, ໂດຍການໃຫ້ກຽດເປັນປະທານຂອງ ທ່ານ ກິແກ້ວ ໄຂຄໍາພິທູນ ກໍາມະການກົມການເມືອງສູນກາງພັກ ຮອງນາຍົກລັດຖະມົນຕີ, ມີຄະນະບໍລິຫານງານພັກກະຊວງ, ຄະນະໜ່ວຍພັກ, ກົມ, ກອງ, ຜູ້ຕາງໜ້າຈາກຄະນະຈັດຕັ້ງສູນກາງພັກ, ພະນັກງານຫຼັກແຫຼ່ງ ຍທຂ ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.

ໃນໂອກາດດັ່ງກ່າວ ທ່ານ ນາງ ວົງຄຳ ສຸທຳມະວົງ ຕ່າງໜ້າຈາກຄະນະຈັດຕັ້ງສູນກາງພັກ, ໄດ້ຂຶ້ນຜ່ານ ບັນດານິຕິກໍາຕ່າງໆ ກ່ຽວກັບການຊັບຊ້ອນ ແລະ ແຕ່ງຕັ້ງລັດຖະມົນຕີ ກະຊວງ ຍທຂ ເປັນຕົ້ນແມ່ນ ມະຕິຂອງກອງປະຊຸມ ຄັ້ງປະຖົມມະລຶກ ຂອງສະພາແຫ່ງຊາດ ຊຸດທີ IX ສະບັບເລກທີ 9/ສພຊ, ລົງວັນທີ 22 ມີນາ 2021, ວ່າດ້ວຍການຮັບຮອງເອົາໂຄງປະກອບກົງຈັກລັດຖະບານ ແລະ ສະມາຊິກລັດຖະບານ, ໂດຍໄດ້ແຕ່ງຕັ້ງໃຫ້ ທ່ານ ວຽງສະຫວັດ ສີພັນດອນ ເປັນລັດຖະມົນຕີ ກະຊວງ ຍທຂ ຜູ້ໃໝ່ ແລະ ດໍາລັດຂອງປະທານປະເທດ ສປປລາວ, ເລກທີ 116/ປປທ, ລົງວັນທີ 24 ມີນາ 2021 ວ່າດ້ວຍການ ພັກການ-ຮັບອຸດໜູນ ບໍານານ, ໂດຍໄດ້ອະນຸມັດໃຫ້ ທ່ານ ບຸນຈັນ ສິນທະວົງ ລັດຖະມົນຕີກະຊວງ ຍທຂ (ຜູ້ເກົ່າ) ອອກພັກ-ຮັບອຸດໜູນບໍານານ.

ພ້ອມນີ້, ທ່ານ ກິແກ້ວ ໄຂຄຳພິທູນ ກໍາມະການກົມການເມືອງສູນກາງພັກ ຮອງນາຍົກລັດຖະມົນຕີ ໄດ້ໃຫ້ກຽດໂອ້ລົມໃນພິທີດັ່ງກ່າວ, ໂດຍມີເນື້ອໃນບາງຕອນວ່າ “ໄດ້ມອບໃຫ້ບັນດາສະຫາຍຄະນະພັກ, ການນໍາທຸກຂັ້ນ ເປັນເອກະພາບນໍາສູນກາງພັກ, ລັດຖະບານຕໍ່ການສັບປ່ຽນໜ້າທີ່ຄວາມຮັບຜິດຊອບ ຂອງພະນັກງານການນໍາຂັ້ນສູງໃນຄັ້ງນີ້ ບົນພື້ນຖານນັ້ນ, ໃຫ້ບັນດາສະຫາຍສືບຕໍ່ນໍາພາແນວຄິດ ຂອງພະນັກງານ-ສະມາຊິກພັກ ຢູ່ແຕ່ລະພະແນກການໃຫ້ເຂົ້າໃຈ ແລະ ຮັບຮູ້ຢ່າງທົ່ວເຖິງ ຕໍ່ການສັບປ່ຽນພະນັກງານການນໍາໃນເທື່ອນີ້, ເພື່ອພ້ອມກັນຜ່ານຜ່າທຸກອຸປະສັກນາໆ ປະການ ໃຫ້ໄດ້ຮັບຜົນດີຂື້ນເລື່ອຍໆ ສືບຕໍ່ມີສະຖຽນລະພາບດ້ານການເມືອງຢ່າງໜັກແໜ້ນ, ສັງຄົມມີຄວາມສະຫງົບ, ປະຊາຊົນມີຄວາມສາມັກຄີເປັນປຶກແຜ່ນແໜ້ນໜາ, ສ້າງຄວາມເປັນເອກະພາບພາຍໃນ ເພື່ອສືບຕໍ່ປົກປັກຮັກສາມູນ ເຊື້ອອັນດີງາມ, ເຕົ້າໂຮມຄວາມສາມັກຄີໃນຖັນແຖວພະນັກງານ, ສະໜັບສະໜູນລັດຖະມົນຕີຄົນໃໝ່ ເພື່ອຮ່ວມມືໃນການພັດທະນາວຽກງານ ໃຫ້ມີຄວາມໜັກແໜ້ນ, ປະຕິບັດແບບແຜນວິທີການເຮັດວຽກງານ ຍທຂ ໃຫ້ເຂັ້ມແຂງຂຶ້ນເປັນກ້າວໆ ໃຫ້ສົມກັບຄໍາຂວັນຂອງຂະແໜງ ຍທຂ ຕາມວິໄສທັດຮອດປີ 2030, ພັດທະນາໂຍທາທິການ ແລະ ຂົນສົ່ງໃຫ້ເປັນປາຍແຫຼມ, ມີຈຸດສຸມ, ມີປະສິດທິຜົນສູງ, ທັນສະໄໝ, ປອດໄພ, ມີຄວາມທົນທານຕໍ່ການປ່ຽນແປງດິນຟ້າອາກາດ, ເຊື່ອມໂຍງ-ເຊື່ອມຈອດ ແລະ ຍືນຍົງ”.

ພິທີປາຖະກະຖາວັນສ້າງຕັ້ງພັກປະຊາຊົນປະຕິວັດລາວ ຄົບຮອບ 66 ປີ ແລະ ວັນນັກຮົບເສຍອົງຄະ ແລະ ເສຍສະຫຼະຊີວິດເພື່ອຊາດ ຄົບຮອບ 75 ປີ ແລະ ພິທີມອບໃບຢັ້ງຢືນໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈໍາປີ 2020

 

ໃນຕອນເຊົ້າຂອງວັນທີ 31 ມີນາ 2021 ໄດ້ຈັດພິທີ ປາຖະກະຖາວັນສ້າງຕັ້ງ ພັກປະຊາຊົນປະຕິວັດລາວ ຄົບຮອບ 66 ປີ ແລະ ວັນນັກຮົບເສຍອົງຄະ ແລະ ເສຍສະຫຼະຊີວິດເພື່ອຊາດ ຄົບຮອບ 75 ປີ ແລະ ພິທີມອບໃບຢັ້ງຢືນໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈໍາປີ 2020, ໃຫ້ກຽດປາຖະກະຖາໂດຍ ສະຫາຍ ວຽງສະຫວັດ ສີພັນດອນ ກໍາມະການສູນກາງພັກ, ເລຂາຄະນະບໍລິຫານງານພັກ, ລັດຖະມົນຕີກະຊວງ ຍທຂ, ມີບັນດາພະນັກງານຫຼັກແຫຼ່ງຈາກ ຫ້ອງການ, ກົມ, ກອງ ແລະ ລັດວິສາຫະກິດທີ່ຂື້ນກັບກະຊວງ ຍທຂ ເຂົ້າຮ່ວມ.

ໃນພິທີດັ່ງກ່າວ, ໄດ້ຮັບຟັງການເລົ່າຄືນມູນເຊື້ອອັນພິລະອາດຫານ ຂອງພັກປະຊາຊົນປະຕິວັດລາວແຕ່ວັນທີ 22 ມີນາ 1955-22 ມີນາ 2021 ເພື່ອເປັນການສຶກສາອົບຮົມໃຫ້ພະນັກງານສະມາຊິກພັກໃຫ້ຮັບຮູ້ເຂົ້າໃຈກ່ຽວກັບມູນເຊື້ອແຫ່ງການຕໍ່ສູ້ອັນພິລາອາດຫານ ແລະ ໄຊຊະນະປະວັດສາດໃນພາລະກິດແຫ່ງການຕໍ່ສູ້ປົກປ່ອຍຊາດໃນເມື່ອກ່ອນ ແລະ ຜົນສໍາເລັດໃນພາລະກິດປົກປັກຮັກສາ ແລະ ສ້າງສພັດທະນາປະເທດຊາດຕະຫຼອດໄລຍະ 66 ປີທີ່ຜ່ານມາ ເພື່ອເປັນການສະແດງຄວາມຮູ້ບຸນຄຸນຕໍ່ພະນັກງານນັກຮົບປະຕິວັດ ທີ່ໄດ້ອຸທິດເລືອດເນື້ອເສຍອົງຄະ ແລະ ເສຍສະຫຼະຊີວິດ ເພື່ອປະເທດຊາດ ແລະ ຖືໂອກາດນີ້ມອບໃບຢັ້ງຢືນໜ່ວຍພັກເຂັ້ມແຂງ, ປອດໃສ ແລະ ໜັກແໜ້ນປະຈໍາປີ 2020 ໃຫ້ກັບ 12 ໜ່ວຍພັກມີຄື: ຄະນະພັກຫ້ອງການກະຊວງ (ມີ 2 ໜ່ວຍພັກ), ຄະນະພັກຮາກຖານລັດວິສາຫະກິດຄົມມະນາຄົມ ( ມີ 3 ໜ່ວຍພັກຄື: ໜ່ວຍພັກພາກສ່ວນບໍລິຫານ, ໜ່ວຍພັກພາກສ່ວນເຕັກນິກ ແລະ ຄຸ້ມຄອງກໍ່ສ້າງ ແລະ ໜ່ວຍພັກພາກສ່ວນສໍາຫຼວດອອກແບບ-ທໍລະນີ), ໜ່ວຍພັກຮາກຖານມີ 7 ຮາກຖານຄື: ໜ່ວຍພັກຮາກຖານກົມຈັດຕັ້ງ ແລະ ພະນັກງານ, ໜ່ວຍພັກຮາກຖານກົມນິຕິກໍາ, ໜ່ວຍພັກຮາກຖານກົມທາງລົດໄຟ, ໜ່ວຍພັກຮາກຖານກົມນໍ້າປະປາ, ໜ່ວຍພັກຮາກຖານສະຖາບັນຄົ້ນຄວ້າໂຍທາທິການ ແລະ ຂົນສົ່ງ, ໜ່ວຍພັກຮາກຖານສະຖາບັນຝຶກອົບຮົມໂຍທາທິການ ແລະ ຂົນສົ່ງ ແລະ ໜ່ວຍພັກຮາກຖານກອງຄຸ້ມຄອງທາງລົດໄຟ.

ໃນພິທີ ສະຫາຍ ວຽງສະຫວັດ ສີພັນດອນ ກໍາມະການສູນກາງພັກ, ເລຂາຄະນະບໍລິຫານງານພັກ, ລັດຖະມົນ ຕີກະຊວງ ຍທຂ ໄດ້ໂອລົມຕໍ່ພະນັກງານ, ບັນດາສະມາຊິກພັກກະຊວງວ່າ “ພັກເຮົາຍາມໃດກໍ່ຖືສໍາຄັນ ການປັບປຸງກໍ່ສ້າງພັກ ແລະ ການສ້າງສະມາຊິກພັກ ໃຫ້ມີຄວາມຮູ້ຄວາມສາມາດ ເພື່ອຮັບໃຊ້ໜ້າທີ່ການເມືອງຂອງພັກ ໃຫ້ມີຜົນສໍາເລັດ ແລະ ຄຸນະພາບສູງຂື້ນໃນແຕ່ລະໄລຍະໃນມະຕິກອງປະຊຸມໃຫຍ່ຄັ້ງທີ XI ຂອງພັກກໍ່ໄດ້ກໍານົດໄວ້ວ່າ: “ຕ້ອງສືບຕໍ່ປັບປຸງການຈັດຕັ້ງພັກແຕ່ລະຂັ້ນ ໃຫ້ມີຄວາມເຂັ້ມແຂງ, ເດັດດ່ຽວແກ້ໄຂບັນຫາທີຄົງຄ້າງຢູ່ພາຍໃນພັກ ແລະ ເຮັດໃຫ້ການຈັດຕັ້ງພາຍໃນພັກ ມີຄວາມປອດໃສ, ເຂັ້ມແຂງ ແລະ ໜັກແໜ້ນ, ເປັນແກນນໍາໃນລະບົບການເມືອງ” ໃນໄລຍະຜ່ານມາບັນດາຮາກຖານພັກ ແມ່ນໄດ້ເອົາໃຈໃສ່ໃນການກໍ່ສ້າງໜ່ວຍພັກ ປອດໃສ, ເຂັ້ມແຂງ ແລະ ໜັກແໜ້ນ ເປັນຕົ້ນ ແມ່ນແຕ່ລະຮາກຖານໄດ້ສ້າງແຜນການ ແລະ ສະຫຼຸບຕີລາຄາປະເມີນຜົນ ການກໍ່ສ້າງໜ່ວຍພັກ ປອດໃສ, ເຂັ້ມແຂງ ແລະ ໜັກແໜ້ນເຊິ່ງໃນປີ 2020 ມີທັງໝົດ 16 ໜ່ວຍພັກ ທີ່ໄດ້ສະຫຼຸບຕີລາຄາປະເມີນຜົນ ແລະ ສະ      ເໜີເປັນໜ່ວຍພັກ ປອດໃສ, ເຂັ້ມແຂງ ແລະ ໜັກແໜ້ນ, ສະນັ້ນ ກົມຈັດຕັ້ງ ແລະ ພະນັກງານ ແລະ ກົມກວດກາ ໄດ້ຄົ້ນຄວ້າ ແລະ ສະເໜີຕໍ່ຄະນະພັກປະຈໍາກະຊວງ ສາມາດຮັບຮອງເປັນໜ່ວຍພັກ ປອດໃສ, ເຂັ້ມແຂງ ແລະ ໜັກແໜ້ນ ໄດ້ 12 ໜ່ວຍພັກ, ໂດຍອີງໃສ່ຜົນງານການຊີ້ນໍານໍາພາ ແລະ 5 ເນື້ອໃນຂອງຄໍາສັ່ງເລກທີ 01/ກມສພ ແລະ ມີ 4 ໜ່ວຍພັກໄດ້ສືບຕໍ່ກໍ່ສ້າງໃນປີຕໍ່ໄປ ເນື່ອງຈາກວ່າຍັງມີບັນຫາຂໍ້ຄົງຄ້າງທີ່ຈະຕ້ອງແກ້ໄຂ ແລະ ປັບປຸງຕື່ມອີກ".

ພິທິເປີດຝຶກອົບຮົມພາສາອັງກິດການບິນ

ພິທີເປີດຝຶກອົບຮົມພາສາອັງກິດການບິນ, ໄດ້ຈັດຂຶ້ນໃນວັນທີ 19 ມີນາ 2021 ໄດ້ສະເຫຼີມສະຫຼອງການເລີ່ມຕົ້ນຂອງຫຼັກສູດພາສາອັງກິດການບິນໃໝ່ ແລະ ການເລີ່ມຕົ້ນຂອງການຮ່ວມມືໃໝ່ ລະຫວ່າງສູນອົບຮົມການບິນພົນລະເຮືອນ (CATC) ແລະ ສູນພາສາ ARDA ນະ​ຄອນ​ຫຼວງວຽງ​ຈັນ. ທ່ານເອກອັກຄະລັດຖະທູດ​ອັງ​ກິດ ໄດ້ຮັບ​ຮູ້ ແລະ ໄດ້ມອບປື້ມແບບຮຽນ ໃຫຄູ່ຮ່ວມງານໃນດ້ານການບິນ ແລະ ເຕັກໂນໂລຢີການສື່ສານ (PACTEC). ປື້ມ 75 ຫົວມີມູນຄ່າ ສາມ​ພັນ​ສາມ​ສິບ​ຫົກ​ປອນ (3036 £).

           PACTEC, ອົງການບໍ່ຫວັງຜົນກຳໄລສາກົນ ກຳລັງດຳເນີນງານພາຍໃຕ້ MOU ໄລຍະ 3 ກັບ ກະຊວງ ໂຍທາທິການ ແລະ ຂົນສົ່ງ (PTTI), ເຊິ່ງ ທ່ານ ສີ​ລິ​ພອນ ອິນ​ທິ​ລາດ ຫົວ​ໜ້າ​ສະ​ຖາ​ບັນ​ຝຶກ​ອົບ​ຮົມ ຍ​ທ​ຂ ເປັນປະທານເປີດໃນພິທີດັ່ງກ່າວ. PACTEC, ໃນຂະນະທີ່ເຮັດວຽກຢ່າງໃກ້ຊິດກັບ ສູນຝຶກການບິນພົນລະເຮືອນ ພາຍໃຕ້ການເປັນຜູ້ອຳນວຍການ ທ່ານ ທັດ​ສະ​ພອນ ໄຊ​ຍະ​ສານ ຫົວ​ໜ້າ​ສູນ​ຝຶກ​ການ​ບິນ​ພົນ​ລະ​ເຮືອນ, ໄດ້ໃຫ້ການຝຶກອົບຮົມພາສາອັງກິດດ້ານການບິນໃຫ້ແກ່ນັກຮຽນປະມານ 800 ຄົນນັບແຕ່ປີ 2004, ໃນນັ້ນມີນັກບິນ ແລະ ນັກ​ບັນ​ຊາ​ຈະ​ລາ​ຈອນ​ທາງ​ອາ​ກາດ.

ນັກ​ບັນ​ຊາ​ຈະ​ລາ​ຈອນ​ທາງ​ອາ​ກາດ 7 ຄົນໄດ້ລົງທະບຽນເຂົ້າໃນຫລັກສູດພາສາອັງກິດການບິນໃໝ່ ນີ້. ພວກເຂົາມີແຜນທີ່ຈະໃຊ້ເວລາ 64 ຊົ່ວໂມງກັບຄູອາຈານຂອງພວກເຂົາ, ທ່ານນາງ Julia Phonkeo ຈາກ ສູນ ARDA, ເພື່ອ​ເຮັດ​ໃຫ້​ນັກ​ຮຽນ​ດັ່ງ​ກ່າວ​ທີ່ເວົ້າພາສາອັງກິດ​ຂັ້ນ​ພຶ້ນ​ຖານໂດຍປັບປຸງພາສາອັງກິດຂອງພວກເຂົາ ແລະ ເພື່ອພະຍາຍາມໃຫ້​ນັກ​ຮຽນ​ດັ່ງ​ກ່າວ​ສາ​ມາດ​ຜ່ານການທົດສອບຄວາມສາມາດດ້ານພາສາອັງກິດຂອງອົງການການບິນພົນລະເຮືອນສາກົນໃນລະດັບ 4 ຫຼືສູງກວ່າ​ເພື່ອອະນຸຍາດໃຫ້ພວກເຂົາ​ໄດ້ປະຕິບັດງານ ຢູ່ສະໜາມສາກົນ.

           ໃນພິທີມື້ນີ້, ທ່ານ Tubbesing, ຫົວໜ້າ ຝ່າຍຝຶກອົບຮົມຂອງໂຄງ​ການ​ຝຶກ​ແອບ​ນັກ​ບິນ ອົງການ PACTEC ໄດ້ໃຫ້ ຄຳເຫັນວ່າ: ພະນັກງານຂອງພວກເຮົາ, ຜູ້ທີ່ມີຄວາມກະຕືລືລົ້ນໃນການບິນ, ໄດ້ຮັບໂອກາດເຮັດວຽກຢູ່ທີ່ນີ້ ແລະ ໄດ້​ຮັບການຝຶກອົບຮົມທີ່ມີຄຸນນະພາບ ແລະ ການສື່ສານພາສາອັງກິດທີ່ດີ, ຊຶ່ງ​ເຫັນ​ວ່າການສື່ສານພາສາອັງກິດ ແມ່ນມີສຳຄັນໃນດ້ານການບິນ. ໃນຂະນະທີ່ກໍ​າ​ລັງບິນ ແມ່ນສະພາບແວດລ້ອມທີ່ໜ້າຕື່ນເຕັ້ນທີ່ສຸດ, ມິ​ຄວາມ​ສ່ຽງ​ຫຼາຍ​ສຸດ, ຊຶ່ງມັນກຳລັງຈະກໍ່ໃຫ້ຄວາມຜິດພາດ ແລະ ການສື່ສານພາ​ສາ​ອັງ​ກິດທີ່ບໍ່ຖືກຕ້ອງເຊິ່ງສາມາດ ນຳໄປສູ່ການສູນເສຍຊີວິດ ແລະ ການທຳລາຍອຸປະກອນທີ່ແພງ. ພວກເຮົາຂໍສະແດງຄວາມຂອບໃຈຕໍ່ການສະໜັບສະໜູນຈາກສະຖານທູດອັງກິດ, ແລະ ເຊື່ອໝັ້ນວ່າການຊ່ວຍເຫຼືອຂອງພວກທ່ານ ຈະເປັນໄປໄດ້ຍາວນານ ແລະ ​ຈະ​ໄດ້​ຮັບ​ການປັບປຸງການສື່ສານພາສາອັງກິດໃນຂະແໜງການບິນ. ພວກເຮົາຍັງຄອງຄອຍການຮ່ວມມື ແລະ ຊ່ວຍ​ເຫຼືອຂອງພວກ​ທ່ານກັບ ສູນ ARDA ແລະ ຫວັງວ່າຈະສາມາດໃຫ້ການຝຶກອົບຮົມພາສາອັງກິດທີ່ມີຄຸນນະພາບ ບໍ່ພຽງແຕ່ຢູ່ໃນນະຄອນຫຼວງວຽງຈັນ ເທົ່ານັ້ນ ແຕ່ຍັງຢູ່ໃນຫລາຍໆແຂວງຂອງ​ປະ​ເທດ​ລາວ ໃນອະນາຄົດອັນໃກ້ນີ້.

           ນອກຈາກ, ການໃຫ້ການຝຶກອົບຮົມພາສາອັງກິດ, PACTEC ຍັງເປັນອົງການຈັດຕັ້ງທີ່ໄດ້ຮັບການອະນຸມັດ ດ້ານ(ATO) ແລະ ຕັ້ງແຕ່ປີ 2013 ໄດ້ຝຶກອົບຮົມໃຫ້ນັກບິນສາຍການບິນມືອາຊີບ ຈຳນວນ 11 ຄົນໃຫ້ແກ່ ບໍ​ລິ​ສັດ Lao Skyway ໂດຍມີນັກຮຽນເພີ່ມຕື່ມອີກ 3 ຄົນທີ່ກຳລັງຝຶກອົບຮົມໃນ​ປັດ​ຈຸ​ບັນ​ນີ້. ນັກ​ບິນ​ທີ່​ໄດ້​ຮັບ​ຜົນ​ສຳ​ເລັດ​ການ​ຝຶກ​ອົບ​ຮົມ ຈາກ PACTEC ໄດ້ຮັບການຝຶກອົບຮົມຢ່າງເຂັ້ມງວດ ແລະ ໄດ້ມາດຕະຖານສູງ.

           ເຖິງແມ່ນວ່າ ທ່ານ Renicker ບໍ່ສາມາດເຂົ້າຮ່ວມພິທີໃນມື້ນີ້ກໍ່​ຕາມ, ແຕ່ທ່ານ Renicker ຜູ້ອຳນວຍການປະຈຳຕ່າງປະເທດຂອງ PACTEC ກ່າວໃນຄຳຖະແຫຼງທີ່ເປັນລາຍລັກອັກສອນວ່າ ທ່ານມີ​ຄວາມ​ຮູ້​ສຶກ​ເປັນ​ກຽດ ແລະ ຮູ້ບຸນຄຸນຢ່າງສູງຕໍ່ການສະໜັບສະໜູນ ແລະ ການຮ່ວມມືທີ່ PACTEC ໄດ້ມີຄວາມສຸກໃນການເຮັດວຽກກັບຄູ່ຮ່ວມງານຂອງ ສ​ປ​ປ ລາວ. ນອກຈາກນັ້ນ, ທ່ານຍັງໄດ້ກ່າວວ່າ PACTEC ຫວັງວ່າຈະສືບຕໍ່ການຮ່ວມມືກັບທັງສອງລັດຖະບານ ແລະ ຄູ່ຮ່ວມ​ງານສາກົນ ເພື່ອຄາດຄະເນໃນການພັດທະນາໂຮງຮຽນບຳລຸງຮັກສາເຮືອບິນ ໃນອະນາຄົດ, ພ້ອມທັງໂຄງການຝຶກອົບຮົມການຄວບຄຸມການຈະລາຈອນທາງອາກາດ.

Additional information