ຂ່າວພາຍໃນກະຊວງ

ພິທີເຊັນສັນຍາ ຮັບເໝົາ ປັບປຸງ ແລະ ສ້ອມແປງທາງ 13 ໃຕ້

 

   ໃນຕອນເຊົ້າຂອງວັນທີ 11 ມີນາ 2021 ໄດ້ມີພິທີເຊັນສັນຍາ ຮັບເໝົາ ໂຄງການປັບປຸງ ແລະສ້ອມແປງທາງ 13 ໃຕ້ ຊ່ວງສັນຍາ 1, ກມ 71 ຫາ ກມ 111, ຍາວ 40 ກມ, ແຂວງບໍລິຄຳໄຊ; ລະຫວ່າງ ກົມຂົວທາງ, ກະຊວງ ຍທຂ ກັບຜູ້ຮັບເໝົາ Joint Venture of Thang Long Joint Stock Corporation – ສຸພາພອນ ກໍ່ສ້າງ ສໍາລວດ-ອອກແບບ ແລະ ຂົວທາງຈໍາກັດຜູ້ດຽວ, ພິທີ່ດັ່ງກ່າວຈັດຂື້ນທີ່ຫ້ອງປະຊຸມກົມຂົວທາງ ກະຊວງ ຍທຂ, ໃຫ້ກຽດເຂົ້າຮ່ວມພິທີ່ດັ່ງກ່າວ, ມີທ່ານ ລິຕາ ຂັດທິຍະ ຫົວໜ້າກົມຂົວທາງ, ທ່ານ ບຸນຈັນ ສິນຣາຊະວົງ ຫົວໜ້າຫ້ອງການ, ບັນດາທ່ານຫົວໜ້າກົມ, ຮອງກົມ, ຕ່າງໜ້າຈາກບໍລິສັດ ທີ່ຮັບເໝົາການກໍ່ສ້າງ ແລະ ພາກສ່ວນທີ່ກ່ຽວຂ້ອງເຂົ້າຮ່ວມເປັນສັກຂີພະຍານ.

   ໂຄງການປັບປຸງ ແລະສ້ອມແປງທາງ 13 ໃຕ້ (ຊ່ວງສັນຍາ 1) ກມ 71-ກມ 111 ມີຄວາມຍາວ 40 ກມ, ແມ່ນນອນຢູ່ໃນໂຄງການປັບປຸງ ແລະສ້ອມແປງທາງ 13 ໃຕ້ແຕ່ ກມ 71 (ແຂວງ ບໍລິຄຳໄຊ) ຫາ ກມ 346 (ແຂວງ ຄໍາມ່ວນ) ມີຄວາມທັງໝົດ 275 ກມ, ຊຶ່ງໄດ້ແບ່ງອອກເປັນ 4 ຊ່ວງສັນຍາ, ໄດ້ຮັບການສະໜັບສະໜູນເງິນກູ້ດອກເບ້ຍຕໍ່າຈາກສາມສະຖາບັນຄື: ທະນາຄານໂລກ (WB) , ທະນາຄານລົງທຶນເອີຣົບ (EIB), ທະນາຄານການລົງທຶນໂຄງລ່າງພື້ນຖານອາຊີ (AIIB) ເເລະ ງົບປະມານຈາກກອງທຶນທາງ ລວມທັງໝົດ 157,5 ລ້ານໂດລາສະຫະລັດ, ໃນນີ້ຄ່າກໍ່ສ້າງ ເເລະ ປັບປຸງເສັ້ນທາງ 275 ກມ ຈຳນວນ 125 ລ້ານໂດລາສະຫະລັດ, ຄ່າຊົດເຊີຍສິ່ງກີດຂວາງ ເເລະ ເວນຄືນທີດີນ 1,7 ລ້ານໂດລາສະຫະລັດ, ຄ່າວ່າຈ້າງທີປຶກສາ 5 ລ້ານໂດລາສະຫະລັດ ເເລະ ຄ່າບູລະນະຮັກສາ 25,8 ລ້ານໂດລາ, ໄລຍະປະຕິບັດໂຄງການເເມ່ນ 10 ປີ ເເຕ່ປີ 2021-2031 ,  ໃນນີ້ ໄລຍະກໍ່ສ້າງ 2-3 ປີ ເເລະ ບູລະນະຮັກສາ 7-8 ປີ.

         ໂຄງການນີ້ມີຈຸດປະສົງ ເພືອປັບປຸງ ເເລະ ຍົກລະດັບຕອນທາງດັ່ງກ່າວໃຫ້ສາມາດຮັບນາໍ້ໝັກບັນທຸກໄດ້ 11 ໂຕນ/ເພົາ, ໂດຍຍົກລະດັບໂຄງສ້າງຂອງທາງຊ່ວງທີ່ຕາໍ່ ທີມີນາໍ້ຖ້ວມໃນໄລຍະຜ່ານມາ,ຂະຫຍາຍໝ້າທາງເກົ່າໃຫ້ກ້ວາງອອກຕື່ມ, ເສີມຄວາມເເຂງເເກ່ນໂດຍການເສີມຊັ້ນພື້ນທາງອີກ 10-20 ຊມ ເເລະ ປູທັບໝ້າທາງດ້ວຍຢາງຂົ້ວ.

         ສໍາລັບຊ່ວງສັນຍາ 1 ເເມ່ນເລີ່ມເເຕ່ ກມ 71 ຫາ ກມ 111 , ລວງຍາວ 40 ກມ, ເເມ່ນນຳໃຊ້ທຶນກູ້ຢືມຈາກທະນາຄານໂລກ ເພືອປັບປຸງຍົກ ລະດັບຈຸດນາໍ້ຖ້ວມ ເເລະ ຂະຫຍາຍໝ້າທາງເກົ່າ ຈາກ 9 ເເມັດເປັນ 12 ເເມັດ, ມີ 2 ຊ່ອງທາງຈາລະຈອນ (2 x 3,5 ມ) ເເລະ ບ່າທາງເບື້ອງລະ 2,5 ມ ພ້ອມທັງກໍ່ສ້າງຂົວໃໝ່ 2 ເເຫ່ງ ເເທນໃສ່ຈຸດເກົ່າ ລວງຍາວເເຫ່ງລະປະມານ 25 ມ, ກ້ວາງ 12 ມ, ໂຄງສ້າງທາງເເມ່ນໄດ້ອອກເເບບເປັນໝ້າທາງເເບບປູຢາງຂົ້ວ (ເບຕົງອັສຟານ)

         ໃນການຈັດຕັ້ງປະຕິບັດໂຄງການດັ່ງກ່າວນີ້ ໄດ້ຄັດເລືອກເອົາບໍລິສັດຮັບເໝົາໂດຍການປະມູນສາກົນໃນຮູບເເບບສັນຍາເເບບມອບເໝົາ (Output and Performances Base Road Contract-OPBRC) ຄື ຜູ້ຮັບເໝົາເປັນຜູ້ດຳເນີນການກໍ່ສ້າງສຳເລັດພາຍໃນ 2 ປີ ເເລະ ສືບຕໍ່ບູລະນະຮັກສາໄປຕື່ມອີກ 8 ປີ, ຈີ່ງມອບໃຫ້ເຈົ້າຂອງໂຄງການ.

         ມູນຄ່າຂອງສັນຍາຜ່ານການປະມູນ ສໍາລັບສັນຍານີ້ເເມ່ນ 17,5 ລ້ານໂດລາ, ສ່ວນຮູບການຊາໍລະໃຫ້ເເກ່ໂຄງການເເບ່ງອອກເປັນ 2 ໄລຍະຄື: ໄລຍະທີ 1: ເເມ່ນໄລຍະດຳເນິນການກໍ່ສ້າງ 2 ປີ, ມີມູນຄ່າປະມານ 14 ລ້ານໂດລາສະຫະລັດ, ໂດຍເເມ່ນ ທະນາຄານໂລກເປັນຜູ້ສຳລະ ແລະ ໄລຍະທີ 2: ເເມ່ນໄລຍະການນຳໃຊ້ ເເລະ ບູລະນະຮັກສາເສັ້ນທາງ 8 ປີ, ເເບ່ງຈ່າຍເປັນງວດໆໂດຍນຳໃຊ້ເງິນຈາກກອງທຶນທາງ (ຂອງລັດຖະບານ) ຈຳນວນ 3,5 ລ້ານໂດລາສະຫະລັດ.

ກອງປະຊຸມຝຶກອົບຮົມວຽກງານກວດກາຂອງຂະແໜງ ໂຍທາທິການ ແລະ ຂົນສົ່ງ

 

ກອງປະຊຸມຝຶກອົບຮົມວຽກງານກວດກາຂອງຂະແໜງ ຍທຂ, ໄດ້ຈັດຂື້ນໃນວັນທີ 01 ມີນາ 2021, ທີ່ຫ້ອງປະຊຸມກອງຄຸ້ມຄອງສະໜາມບິນລາວ, ໂດຍພາຍໃຕ້ການເປັນປະທານຂອງທ່ານ ນາງ ວິໄລຄຳ ໂພສາລາດ ຄະນະປະຈຳພັກກະຊວງ, ຮອງລັດຖະມົນຕີກະຊວງ ຍທຂ, ມີຫ້ອງການ, ກົມ, ກອງ, ຍທຂ ທົ່ວປະເທດ, ລັດວິສາຫະກິດ ທີ່ຂື້ນກັບກະຊວງ ຍທຂ ກໍ່ໄດ້ໃຫ້ກຽດເຂົ້າຮ່ວມ.

ການຈັດຝຶກອົບຮົມວຽກງານກວດກາໃນຄັ້ງນີ້ ແມ່ນມີຄວາມສຳຄັນເປັນຢ່າງຍິ່ງ, ເພື່ອເປັນການຜັນຂະຫຍາຍເນື້ອໃນຈິດໃຈຂອງກອງປະຊຸມໃຫຍ່ຄັ້ງທີ XI ຂອງພັກ, ມະຕິກອງປະຊຸມໃຫຍ່ຄັ້ງທີ V ຂອງຄະນະພັກກະຊວງ ໃຫ້ປະກົດຜົນເປັນຈິງ, ທັງເປັນການຍົກລະດັບຄວາມຮູ້ຄວາມສາມາດໃຫ້ພະນັກງານກວດກາ ນັບແຕ່ຂັ້ນກະຊວງລົງຮອດພະແນກ ຍທຂ ແຂວງ ໃຫ້ສູງຂື້ນຕື່ມອີກບາດກ້າວໜຶ່ງ, ໂດຍສະເພາະຄວາມຮູ້ດ້ານທິດສະດີກັບພຶດຕິກຳຕົວຈິງ, ໃນວຽກງານຕິດຕາມກວດການັບມື້ນັບມີບາດກ້າວອັນພົ້ນເດັ່ນ ແລະ ມີປະສິດທິຜົນ.

ເມື່ອທຽບໃສ່ຄວາມຮຽກຮ້ອງຕ້ອງການຂອງໜ້າທີ່ການເມືອງໃນໄລຍະໃໝ່ແລ້ວ, ເຫັນວ່າຈະຕ້ອງໄດ້ສືບຕໍ່ເອົາ ໃຈໃສ່ສຶກສາອົບຮົມ, ຕິດຕາມ, ກວດກາ, ແກ້ໄຂບັນຫາໃຫ້ທັນເວລາ ແລະ ເຂັ້ມງວດ ຈຶ່ງສາມາດປົກປັກຮັກສາສິດ, ອໍານາດຂອງພັກໄວ້ໄດ້ ແລະ ຖືກຕ້ອງເປັນທຳ ຕໍ່ພໍ່ແມ່ປະຊາຊົນບັນດາເຜົ່າ, ການຄຸ້ມຄອງລັດ, ຄຸ້ມຄອງສັງຄົມ ໃຫ້ມີຄວາມສັກສິດ ຕາມກົດໝາຍ ແລະ ລະບຽບການໄດ້ວາງໄວ້, ສະນັ້ນ, ຈຸດປະສົງຂອງການຝຶກອົບຮົມໃນຄັ້ງນີ້ແມ່ນ: ສະເໜີບັນດານິຕິກຳກ່ຽວກັບຄວາມຮູ້ພື້ນຖານວຽກງານຕິດຕາມກວດກາພັກ, ວຽກງານກວດກາລັດ, ຕ້ານການສໍ້ລາດບັງຫຼວງ, ວຽກງານຄຳຮ້ອງຟ້ອງ-ຮ້ອງທຸກ ແລະ ຄຳສະເໜີ, ວຽກງານສະກັດກັ້ນການສໍ້ລາດບັງຫຼວງ, ວຽກງານການປະມູນຈັດຊື້-ຈັດຈ້າງ, ການຄຸ້ມຄອງສັນຍາ, ບົດຮຽນກ່ຽວກັບຄູ່ມືອີກຈໍານວນໜຶ່ງ ແລະ ບົດຮຽນກ່ຽວກັບວຽກງານກວດສອບ ແລະ ເອກະສານສໍາຄັນອື່ນໆ ລວມແລ້ວມີ 10 ກວ່າຫົວຂໍ້, ຈະມີການແລກປ່ຽນບົດຮຽນ ແລະ ປະກອບຄຳຄິດເຫັນຂອງນັກສຳມະນາກອນໃສ່ແຕ່ລະຫົວຂໍ້, ເນື້ອໃນຕາມວາລະກອງປະຊຸມຝຶກອົບຮົມຄັ້ງນີ້ທີ່ໄດ້ກຳນົດໄວ້.

ໃນບັ້ນດຳເນີນກອງປະຊຸມຝຶກອົບຮົມ ຈະດໍາເນີນເປັນເວລາ 5 ວັນ, ນັບແຕ່ວັນທີ 1-5 ມີນາ 2021, ຕາມວາລະຂອງກອງປະຊຸມ, ສະນັ້ນ ເພື່ອບັນລຸຈຸດປະສົງຄາດໝາຍທີ່ວາງໄວ, ນັກສໍາມະນາກອນທຸກທ່ານ ຕ້ອງໄດ້ຍົກສູງສະຕິຄວາມຮັບຜິດຊອບເຂົ້າໃນການຕິດຕາມຮັບຟັງ, ຄົ້ນຄວ້າ, ເຊື່ອມຊືມ ແລະ ປະກອບຄຳຄິດເຫັນຢ່າງສັດຈະວິພາກຕໍ່ເນື້ອໃນເອກະສານຕ່າງໆ, ພ້ອມກັນຊອກໃຫ້ເຫັນຂໍ້ຄົງຄ້າງ ແລະ ປຶກສາຫາລືຊອກວິທີ ແລະ ມາດຕະການແກ້ໄຂຕໍ່ການຈັດຕັ້ງປະຕິບັດໃຫ້ມີຜົນສໍາເລັດ, ຖືເອົາການຕິດຕາມ, ກວດກາພັກ-ລັດ ເປັນໜ້າທີ່ ແລະ ຄວາມຮັບຜິດຊອບຂອງທຸກຄົນໃນຂະແໜງ ຍທຂ ແລະ ນຳໄປເຜີຍແຜ່ໃຫ້ທົ່ວເຖິງ ແລະ ເຂົ້າໃຈເລິກເຊິ່ງຕໍ່ການຈັດຕັ້ງປະຕິບັດໃຫ້ຖືກຕ້ອງ ແລະ ສໍາເລັດເປັນກ້າວໆໄປ, ຮັບປະກັນໄດ້ເຖິງຄວາມຖືກຕ້ອງຕໍ່ກົດໝາຍ ແລະ ລະບຽບການ, ການຝຶກອົບຮົມ.

ພິທີ ມອບ-ຮັບ ໂຄງການນໍ້າປະປາ ແລະ ສຸຂາພິບານ ເມືອງລອງ ແຂວງຫຼວງນໍ້າທາ ແລະ ເມືອງຜາອຸດົມ ແຂວງບໍ່ແກ້ວ

 

ພິທີ ມອບ-ຮັບ ໂຄງການນໍ້າປະປາ ແລະ ສຸຂາພິບານ ເມືອງລອງ ແຂວງຫຼວງນໍ້າທາ ແລະ ເມືອງຜາອຸດົມ ແຂວງບໍ່ແກ້ວ ໄດ້ຈັດຂຶ້ນໃນວັນທີ 4 ມີນາ 2021 ທີ່ເມືອງລອງ ແຂວງຫຼວງນໍ້າທາ, ໃຫ້ກຽດເປັນປະທານໂດຍ ທ່ານ      ນ ວິໄລຄຳ ໂພສາລາດ ຄະນະພັກປະຈຳກະຊວງ, ຮອງລັດຖະມົນຕີກະຊວງ ຍທຂ, ທ່ານ ອ່ອນຈັນ ຄຳພາວົງ ຄະນະປະຈໍາພັກແຂວງ, ຮອງເຈົ້າແຂວງ ແຂວງຫຼວງນໍ້າທາ, ທ່ານ ເພັງສອນ ແກ້ວວິໄລ ຮອງເລຂາພັກແຂວງ, ຮອງເຈົ້າແຂວງ ແຂວງບໍ່ແກ້ວ, ມີບັນດາເຈົ້າເມືອງ, ຫົວໜ້າກົມ, ຮອງກົມ ຈາກກະຊວງ ຍທຂ ແລະ ກະຊວງທີ່ກ່ຽວຂ້ອງ, ຫົວໜ້າພະແນກ ຍທຂ ແຂວງຫຼວງນໍ້າທາ ແລະ ແຂວງບໍ່ແກ້ວ ແລະ ອໍານາດການປົກຄອງຂັ້ນແຂວງ ເມືອງ ທີ່ກ່ຽວຂ້ອງກໍ່ໄດ້ໃຫ້ກຽດເຂົ້າຮ່ວມ.

ໂດຍສືບຕໍ່ຜັນຂະຫຍາຍ ມະຕິຂອງກອງປະຊຸມໃຫຍ່ຄັ້ງທີ VIII ຂອງພັກ ກໍ່ຄືການຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ XI ຂອງສູນກາງພັກ, ການຈັດຕັ້ງຜັນຂະຫຍາຍແຜນພັດທະນາເສດຖະກິດ-ສັງຄົມ 5 ປີ ຄັ້ງທີ IX ແລະ ມະຕິກອງປະຊູມໃຫຍ່ ຄັ້ງທີ V ຂອງອົງຄະນະພັກ ກະຊວງ ໂຍທາທິການແລະ ຂົນສົ່ງ ພ້ອມທັງປະຕິບັດພັນທະຂອງ ລັດຖະບານ ຕໍ່ມະຕິຂອງ ສະຫະປະຊາຊາດ ເພື່ອບັນລຸເປົ້າຫມາຍການພັດທະນາ ແບບຍືນຍົງ ແລະ ລົບລ້າງ ສປປ ລາວ ອອກຈາກບັນຊີລາຍຊື່ປະເທດດ້ອຍພັດທະນາ ໃນປີ 2023, ການຫັນເປັນອຸດສາຫະກຳ ແລະ ທັນສະໄຫມ, ການຫຍັບຊ່ອງຫວ່າງລະດັບຊີວິດການ, ຄວາມເປັນຢູ່ລະຫວ່າງ ປະຊາຊົນອາໄສຢູ່ຕົວເມືອງ ແລະ ຊົນນະບົດ ໃຫ້ໃກ້ຄຽງກັນ ແລະ ປະຕິບັດຍຸດທະສາດແຫ່ງການເຕີບໂຕ ແລະ ລົບລ້າງຄວາມທຸກຍາກແຫ່ງຊາດ, ກະຊວງ ຍທຂ ຈຶ່ງໄດ້ມີແຜນການພັດທະນາຂະແໜງການນ້ຳປະປາ ເພື່ອຕອບສະໜອງໄດ້ຕາມຄວາມຮຽກຮອ້ງຕອ້ງການຂອງສັງຄົມ ຕາມແຜນການທີ່ໄດ້ວາງໄວ້ ຮອດປີ 2030 ໃຫ້ໄດ້ 90%, ນ້ຳປະປາ ແມ່ນປັດໃຈໜຶ່ງທີ່ຈຳເປັນຕໍ່ການຍົກລະດັບຄຸນນະພາບຊີວິດ ຂອງປະຊາຊົນໃຫ້ນັບມື້ດີຂຶ້ນ, ການຊົມໃຊ້ນໍ້າປະປາ ໃນຕົວເມືອງ ແລະ ຊົນນະບົດ ຍັງແມ່ນຕົວຊີ້ບອກພື້ນຖານອັນໜຶ່ງ ໃນການພັດທະນາເສດຖະກິດ-ສັງຄົມ ໃນແຕ່ລະໄລຍະຂອງ ປະເທດເຮົາ. ສະນັ້ນ, ລັດຖະບານ ຍາມໃດກໍໄດ້ເອົາໃຈໃສ່ພັດທະນາ, ປັບປຸງ ແລະ ຂະຫຍາຍ ລະບົບນ້ຳປະປາໃຫ້ທົ່ວເຖິງທັງໃນຕົວເມືອງ ແລະ ຊົນນະບົດ ໃນທົ່ວປະເທດ.

ໂຄງການນໍ້າປະປາ ແລະ ສຸຂະພິບານ ຢູ່ເມືອງລອງ ແຂວງ ຫຼວງນໍ້າທາ ແລະ ເມືອງຜາອຸດົມ ແຂວງບໍ່ແກ້ວ ໄດ້ຮັບທຶນກູ້ຢືມຈາກທະນາຄານພັດທະນາອາຊີ (ADB Loan 3041-Lao), ໂຄງການດັ່ງກ່າວໄດ້ເຊັນສັນຍາກູ້ຢືມລະຫວ່າງກະຊວງການເງິນ ແລະ ທະນາຄານພັດທະນາອາຊີ ໃນຄັ້ງວັນທີ 11 ຕຸລາ 2013 ແລະ ໄດ້ເຊັນສັນຍາວ່າຈ້າງບໍລິສັດທີ່ປຶກສາ ລາວຄອນຊາວຕິງກຸບ ເປັນທີ່ປຶກສາປະຈໍາໂຄງການ, ຄັ້ງວັນທີ 9 ກໍລະກົດ 2015, ໂຄງການໄດ້ກໍານົດ ເອົາຕົວເມືອງໂຄງການເພື່ອ ກໍ່ສ້າງ-ປັບປຸງຂະຫຍາຍລະບົບນໍ້າປະປາຢູ່ 4 ເມືອງເອກ ແລະ 5 ຕົວເມືອງນ້ອຍ ຢູ່ໃນ 6 ແຂວງ 9 ຕົວເມືອງ ເຊິ່ງແບ່ງອອກເປັນ 3 ໄລຍະຄື: ໄລຍະທີ 1ມີ: ເມືອງຫຼວງນໍ້າທາ ແຂວງຫຼວງນໍ້າທາ (ປັບປຸງ ແລະ ຂະຫຍາຍ), ເມືອງລອງ ແຂວງຫຼວງນໍ້າທາ (ກໍ່ສ້າງໃໝ່) ແລະ ເມືອງຜາອຸດົມ ແຂວງບໍ່ແກ້ວ (ກໍ່ສ້າງໃໝ່), ໄລຍະທີ 2ມີ: ເມືອງໄຊຍະບູລີ ແຂວງໄຊຍະບູລີ (ປັບປຸງ ແລະ ຂະຫຍາຍ), ເມືອງບໍ່ແຕນ ແຂວງໄຊຍະບູລີ (ກໍ່ສ້າງໃໝ່), ເມືອງປາກຊັນ ແຂວງບໍລິຄຳໄຊ (ປັບປຸງ ແລະ ຂະຫຍາຍ), ເມືອງປາກກະດິງ ແຂວງບໍລິຄຳໄຊ (ກໍ່ສ້າງໃໝ່) ແລະ ໄລຍະທີ 3: ເມືອງດາກຈິງ ແຂວງເຊກອງ (ກໍ່ສ້າງໃໝ່), ເມືອງສະໜາມໄຊ ແຂວງອັດຕະປື (ກໍ່ສ້າງໃໝ່), ສໍາລັບໜ້າວຽກໃນການກໍ່ສ້າງຢູ່ 2 ຕົວເມືອງປະກອບມີ: ການກໍ່ສ້າງລະບົບນໍ້າປະປາແບບຄົບຊຸດ ແລະ ຮ່ອງລະບາຍນໍ້າ, ພ້ອມທັງວຽກປັບປຸງສະພາບແວດລ້ອມບ້ານ ຢູ່ເມືອງລອງ ແຂວງຫຼວງນໍ້າທາ ແລະ ເມືອງຜາອຸດົມ ແຂວງບໍ່ແກ້ວ ໄດ້ສໍາເລັດທັງມົດ, ພ້ອມທັງໄດ້ມີການແຕ່ງຕັ້ງຄະນະກໍາມະການ ເພື່ອກວດກາຜົນສໍາເລັດໂຄງການ ແລະ ການນໍ້າໃຊ້ທືນ ເຊິ່ງຄະນະກໍາມະການຈາກສູນກາງ ໄດ້ລົງສົມທົບກັບ ຄະນະກໍາມະການແຕ່ລະແຂວງ ລົງກວດກາຜົນສໍາເລັດ, ພ້ອມທັງເປັນເອກະພາບກັນເຊັນບົດບັນທຶກ.

ໂຄງການດັ່ງກ່າວນີ້ ກໍ່ແມ່ນໜຶ່ງໃນບັນດາໂຄງການ ທີ່ທາງລັດຖະບານ ໄດ້ສຸມໃສ່ຊອກຫາແຫຼ່ງທຶນຊ່ວຍເຫຼືອຈາກອົງການສາກົນຕ່າງໆເວົ້າລວມ   ເວົ້າສະເພາະແມ່ນ ທະນາຄານພັດທະນາອາຊີ ເຊິ່ງເປັນຄູ່ຮ່ວມພັດທະນາທີ່ສໍາຄັນ ໃນນາມຕາງໜ້າໃຫ້ລັດຖະບານກໍ່ຄື ເຈົ້າຂອງໂຄງການ ຜູ້ຈັດຕັ້ງປະຕິບັດຕົວຈິງ, ທະນາຄານພັດທະນາອາຊີ ທີ່ຍາມໃດກໍ່ເຫັນໄດ້ຄວາມສໍາຄັນ ແລະ ຄວາມຈໍາເປັນຂອງ ສປປ ລາວ ພວກເຮົາ ຊ່ວຍເຫຼືອດ້ານແຫຼ່ງທຶນເພື່ອພັດທະນາພື້ນຖານໂຄງລ່າງດ້ານຕ່າງໆເວົ້າລວມ, ເວົ້າສະເພາະແມ່ນຂະແໜງນໍ້າປະປາ ເພື່ອໃຫ້ປະຊາຊົນໄດ້ຊົມໃຊ້ນໍ້າທີ່ສະອາດ ແລະ ຫວັງຢ່າງຍິ່ງວ່າ ຈະໄດ້ຮັບສະໜັບສະໜູນຊ່ວຍເຫຼືອໃນຕໍ່ໜ້າຕື່ມ.

ກອງປະຊຸມເປີດກວ້າງທາບທາມຄວາມຄິດເຫັນໃສ່ຮ່າງຂໍ້ຕົກລົງວ່າດ້ວຍການຄຸ້ມຄອງ ໃບຂັບຂີ່ຍານພາຫະນະທາງບົກ ແລະການຄຸ້ມຄອງໂຮງຮຽນສອນຂັບລົດ

 

ກອງປະຊຸມ ເປີດກວ້າງທາບທາມຄວາມຄິດເຫັນ ໃສ່ຮ່າງຂໍ້ຕົກລົງວ່າດ້ວຍການຄຸ້ມຄອງ ໃບຂັບຂີ່ຍານພາຫະ ນະທາງບົກ ແລະ ການຄຸ້ມຄອງໂຮງຮຽນສອນຂັບລົດ, ໄດ້ຈັດຂຶ້ນໃນວັນທີ 24-25 ກຸມພາ 2021 ທີ່ຫໍປະຊຸມແຫ່ງຊາດ, ໂດຍການເປັນປະທານຂອງ ທ່ານ ປອ ບຸນຕາ ອ່ອນນາວົງ ຫົວໜ້າກົມຂົນສົ່ງ, ມີຫ້ອງການ, ກົມທີ່ກ່ຽວຂ້ອງ, ພະແນກ ຍທຂ ທົ່ວປະເທດ, ໂຮງຮຽນສອນຂັບລົດໃນທົ່ວປະເທດ ກໍ່ໄດ້ໃຫ້ກຽດເຂົ້າຮ່ວມ.

ຈຸດປະສົງຂອງກອງປະຊຸມໃນຄັ້ງນີ້, ເພື່ອກໍານົດຫຼັກການ, ລະບຽບການ ແລະ ມາດຕະການກ່ຽວກັບຄຸ້ມຄອງ ໂຮງຮຽນສອນຂັບລົດ, ເພື່ອເຮັດໃຫ້ໂຮງຮຽນສອນຂັບລົດໄດ້ມາດຕະຖານ ທັງຮັບປະກັນໃຫ້ແກ່ການ ຮຽນ-ການສອນ, ການຝຶກອົບຮົມ ປະຕິບັດຖືກຕ້ອງຕາມຫຼັກສູດ ຂອງກະຊວງ ຍທຂ  ທີ່ກໍານົດໄວ້, ແນ່ໃສ່ເຮັດໃຫ້ຜູ້ຂັບຂີ່ມີຄວາມຮູ້, ຄວາມສາ ມາດອັນແນ່ນອນໃນການຂັບຂີ່ຍານພາຫະນະ, ມີຄວາມຮູ້ພື້ນຖານທາງດ້ານເຕັກນິກກ່ຽວກັບການຂັບຂີ່ຍານພາຫະນະທາງບົກ, ຄວາມຮູ້ກ່ຽວກັບກົດຈາລະຈອນທາງບົກຢ່າງເລີກເຊິ່ງ ແລະ ມີມາລະຍາດທີ່ດີຂອງການຂັບຂີ່, ປະກອບສ່ວນເຂົ້າໃນການນໍາໃຊ້ທາງຫຼວງໃຫ້ມີຄວາມເປັນລະບຽບຮຽບຮ້ອຍ ແລະ ມີຄວາມປອດໄພສູງ, ໃນກອງປະຊຸມດັ່ງກ່າວ ຜູ້ເຂົ້າຮ່ວມທັງມົດໄດ້ສຸມສະຕິປັນຍາ ຄົ້ນຄວ້າ ແລະ ໄດ້ມີການປະກອບຄຳຄິດເຫັນໃສ່ຮ່າງຂໍ້ຕົກລົງ ວ່າດ້ວຍການຄຸ້ມຄອງໃບຂັບຂີ່ຍານພາຫະນະທາງບົກ ເພື່ອເຮັດໃຫ້ວຽກງານດັ່ງກ່າວ ມີຄຸນະພາບ, ທັນສະໄໝ ແລະ ໄດ້ມາດຕະຖານສາກົນ, ແນ່ໃສ່ຮັບປະກັນ ປະສິດທິພາບຂອງຜູ້ຂັບຂີ່, ຫຼຸດຜ່ອນ ການເກີດອຸບັດຕິເຫດ ແລະ ການຈາລະຈອນແອອັດ, ມີລະບົບການຈັດຕັ້ງປະຕິບັດ ຢ່າງເປັນເອກະພາບໃນຂອບເຂດທົ່ວປະເທດ, ພ້ອມທັງປະກອບສ່ວນເຂົ້າໃນການ ພັດທະນາ ເສດຖະກິດ-ສັງຄົມ ຂອງຊາດ.

ກອງປະຊຸມໄດ້ດຳເນີນເປັນເວລາ 1 ມື້ເຄິ່ງ, ຕໍ່ຄວາມເອົາໃຈໃສ່, ຄວາມຕັດສິນໃຈເສຍລະເວລາອັນມີຄ່າຂອງຜູ້ເຂົ້າຮ່ວມກອງປະຊຸມ ນັບແຕ່ຕົ້ນຈົນຈົບ, ການເຂົ້າຮ່ວມຂອງທຸກທ່ານລ້ວນແຕ່ແມ່ນຄວາມເປັນຫ່ວງເປັນໄຍ ຕໍ່ວຽກງານຄຸ້ມຄອງລັດ, ຄຸ້ມຄອງມະຫາພາກ, ໂດຍສະເພາະແມ່ນວຽກງານການຄຸ້ມຄອງການຂັບຂີ່ຍານພາຫະນະທາງບົກ ຊຶ່ງເປັນອີກວຽກງານໜຶ່ງທີ່ມີຄວາມສໍາຄັນ ແລະ ຈໍາເປັນໃນການປະກອບສ່ວນພັດທະນາ ເສດຖະກິດ-ສັງຄົມ ຂອງຊາດ ເວົ້າລວມ, ເວົ້າສະເພາະແມ່ນການບໍລິການຂົນສົ່ງທາງບົກໃຫ້ມີຄວາມສະດວກ, ປອດໄພ ແລະ ເຊື່ອມໂຍງກັບສາກົນ, ອີກຢ່າງໜຶ່ງກໍເພື່ອເຮັດໃຫ້ວຽກງານ ການຄຸ້ມຄອງໂຮງຮຽນສອບຂັບລົດ ໃຫ້ມີຄວາມເປັນເອກະພາບກັນໃນທົ່ວປະເທດ ແລະ ເປັນເງື່ອນໄຂອັນໜຶ່ງ ໃນການການສ້າງນັກຂັບຂີ່ຂອງລາວໃຫ້ມີຄຸນນະພາບ ແລະ ປະສິດຕິຜົນສູງ.

Additional information