ຂ່າວພາຍໃນກະຊວງ

ທ່ານ ລັດຖະມົນຕີວ່າການ ກະຊວງ ຍທຂ ເຂົ້າຮ່ວມກອງ ປະຊຸມ ລັດຖະມົນຕີ ຄົມມະນາຄົມ - ຂົນສົ່ງ ຈີນ-ອາຊຽນ ກ່ຽວກັບການເຊື່ອມໂຍງ ດ້ານຄົມມະນາຄົມ ຂົນສົ່ງ ທີ່ນະຄອນນານນິງ, ສປ ຈີນ

ກອງປະຊຸມລັດຖະມົນຕີ ຄົມມະນາຄົມ ຂົນສົ່ງ ຈີນ - ອາຊຽນ ກ່ຽວກັບການເຊື່ອມໂຍງດ້ານຄົມມະນາຄົມ ຂົນສົ່ງ ​ໄດ້​ຈັດ​ຂື້ນ ວັນ​ທີ 02  ກັນຍາ 2013 ທີ່​ໂຮງ​ແຮມ ມາຣີອ໋ອດ, ນະຄອນ​ນານ​ນິງ, ສປ ຈີນ ​ໂດຍ​ການ​ເປັນ​ປະທານ​ຮ່ວມ ລະຫວ່າງ ທ່ານ ຢັງ ຈວນ ຖັງ, ລັດຖະມົນຕີ​ວ່າການ ກະຊວງ ຄົມ​ມະ​ນາຄົມ ຂົນ​ສົ່ງ, ສປ ຈີນ ​ແລະ ທ່ານ ສົມ​ມາດ ພົລ​ເສນາ, ລັດຖະມົນຕີ​ວ່າການ ກະຊວງ ​ໂຍທາ​ທິການ ​ແລະຂົນ​ສົ່ງ, ສປປ ລາວ ທີ່​ຕາງໜ້າ​ໃຫ້​ບັນດາ​ລັດຖະມົ​ນຕີ ຄົມມະນາ​ຄົມ ຂົນ​ສົ່ງ ​ອາຊຽນ, ​ໂດຍ​ມີ​ການ​ເຂົ້າຮ່ວມ ຂອງບັນດາ​ລັດຖະມົນຕີ​ວ່າ​ການ, ລັດຖະມົນຕີຊ່ວຍ​ວ່າການ, ຜູ້ຕາງໜ້າ ​ແລະ ​ເຈົ້າໜ້າທີ່ທີ່​ກ່ຽວຂ້ອງ ຈາກ ກະຊວງ ຄົມມະນາຄົມ ຂົນ​ສົ່ງ ຂອງ​ບັນດາ​ປະ​ເທດອາຊຽນ. ຜ່ານການດໍາເນີນ​ກອງ​ປະຊຸມ​, ທີ່ປະຊຸມໄດ້ເປັນເອກະພາບ ແລະຕົກລົງບັນຫາສຳຄັນ, ໂດຍໄດ້ມີຖະແຫລງ ການຮ່ວມ ຊຶ່ງມີເນື້ອໃນຫຍໍ້ ດັ່ງລຸ່ມນີ້:

  1. ກ່ຽວກັບ​ການ​ກຳນົດ​ກົນ​ໄກ​ການ​ປະສານ​ງານດ້ານ​ການ​ຮ່ວມ​ມື​ໃນ​ວຽກງານດັ່ງກ່າວ ລະຫວ່າງ ລັດຖະບານ ສປ ຈີນ ​ແລະ ລັດຖະບານ ບັນດາ​ປະ​ເທດ​ອາຊຽນ, ​ກອງປະຊຸມ​ໄດ້ຕົກລົງ​ເຫັນ​ດີ ​ໃຫ້​ກະຊວງຄົມມະນາຄົມ ຂົນ​ສົ່ງ ຂອງ​ແຕ່ລະ​ປະ​ເທດ ​ຕາງໜ້າຂອງ​ລັດຖະບານ​ຕົນ ​​ເປັນ​ອົງການ​ລະດັບ​ສູງ​ສຸດ​ໃນດຳ​ເນີນ​ກົນ​​ໄກ​ການ​ຮ່ວມ​ມື​ສອງ​ຝ່າຍ ຈີນ - ອາຊຽນ, ​ໂດຍ​ມອບ​ໃຫ້​ເຈົ້າໜ້າທີ່​ອາວຸ​ໂສ ​ເປັນ​ໃຈກາງ​ໃນ​ການ​ປະສານ​ງານ ​ແລະ ປຶກສາ​ຫາລື.
  2. ທັງ​ສອງ​ຝ່າຍ ​ເຫັນ​ດີ​ໃຫ້​ມີ​ການ​ສ້າງ​ແຜນຄວາມ​ຕ້ອງການ​ດ້ານ​ການ​ເງິນ ​​ແນ​ໃສ່​ກໍ່ສ້າງ​ພື້ນຖານ​ໂຄງ​ລ່າງ​ການ​ເຊື່ອມ​​ໂຍງ, ​ພ້ອມທັງ ເຫັນ​ດີ​ໃຫ້​ມີການ​ສ້າງ​ແຜນ​ແມ່​ບົດ​ພັດທະນາ​ພື້ນຖານ​ໂຄງ​ລ່າງ​ຄົມມະນາຄົມ ຂົນ​ສົ່ງ ​ໂດຍໃຫ້​ສອດຄ່ອງ​ກັບ​ແຜນ​ເຊື່ອມ​ໂຍງ ຈີນ - ອາຊຽນ.
  3. ​​ເຫັນ​ດີ​ໃຫ້ມີ​ການ​ຊຸກຍູ້​ບັນດາ​ວິ​ສາ​ຫະກິດ ​ເຂົ້າຮ່ວມ​ໃນ​ການ​ລົງ​ທຶນ, ກໍ່ສ້າງ ​ແລະ ດຳ​ເນີນບັນດາ​ໂຄງການ​ຕ່າງໆ ໂດຍນຳໃຊ້ເຕັກໂນໂລຊີ ທີ່ທັນສະໄໝໃນການປະຕິບັດ.
  4. ຕົກລົງເຫັນດີໃຫ້ນຳໃຊ້ກອງທຶນຮ່ວມມືທາງທະເລ ຈີນ - ອາຊຽນ ເພື່ອນໍາໃຊ້ໃນການສຶກສາ ແລະ ຊຸກຍູ້ການຈັດຕັ້ງປະຕິບັດ ໂຄງການພັດທະນາທ່າເຮືອ ທີ່ຢູ່ໃນແຜນການເຊື່ອມໂຍງ ຈີນ ແລະ ບັນດາປະເທດອາຊຽນ ແນໃສ່ສົ່ງເສີມການຮ່ວມມື ລະຫວ່າງບັນດາເມືອງທ່າເຮືຶອ ແລະ ສົ່ງເສີມການເຊື່ອມໂຍງທາງທະເລ.
  5. ເພື່ອສົ່ງເສີມການເຊື່ອມໂຍງດ້ານການບິນພົນລະເຮືອນ, ຜ່ານມາຂໍ້ຕົກລົງວ່າດ້ວຍການຂົນສົ່ງທາງອາກາດລະຫວ່າງ ສປ ຈີນ - ອາຊຽນ ແລະ ອະນຸສັນຍາ1 ກ່ຽວກັບສິດທິທີ 1 ແລະ ທີ 3 ດ້ານການບິນ ແມ່ນໄດ້ລົງນາມ ແລະ ມີຜົນສັກສິດແຕ່ ເດືອນ ສິງຫາ 2012. ດັ່ງນັ້ນ, ຈຶ່ງຕົກລົງເຫັນດີ ໃຫ້ສືບຕໍ່ສູ້ຊົນໃຫ້ໄດ້ລົງນາມ ໃນອະນຸສັນຍາທີ 2 ກ່ຽວກັບສິດທິການບິນທີ 5 ໄວເທົ່າ ທີ່ຈະໄວໄດ້.
  6. ເພື່ອເຮັດໃຫ້ການພັດທະນາການເຊື່ອມໂຍງ ຈີນ - ອາຊຽນ ໃຫ້ມີຄວາມໃກ້ຄຽງກັນ ແນໃສ່ຫຼຸດຜ່ອນຄວາມແຕກໂຕນໃນການ ພັດທະນາພື້ນຖານໂຄງລ່າງຂອງບັນດາປະເທດຕ່າງໆ, ກອງປະຊຸມ ໄດ້ຕົກລົງເຫັນດີ ມອບໃຫ້ເຈົ້າໜ້າທີ່ອະວຸໂສຂອງທັງ ສອງຝ່າຍ ຈີນ - ອາຊຽນ ຄົ້ນຄ້ວາກໍານົດບັນດາໂຄງການເຊື່ອມໂຍງທີ່ສໍາຄັນ ລະຫວ່າງຈີນ - ອາຊຽນ ຫຼື ບັນດາປະເທດ ອາຊຽນດ້ວຍກັນ.
  7. ໃນຕອນທ້າຍ, ກອງປະຊຸມ  ໄດ້ສະແດງຄວາມຊົມເຊີຍ ມາຍັງກະຊວງ ຄົມມະນາຄົມ - ຂົນສົ່ງ ສປ ຈີນ, ກະຊວງ ການຕ່າງ ປະເທດ ສປ ຈີນ ແລະ ເຂດປົກຄອງຕົນເອງແຂວງກວາງຊີ ທີ່ໄດ້ເປັນເຈົ້າການຈັດກອງປະຊຸມຄັ້ງນີ້, ລວມທັງໃຫ້ການຕ້ອນຮັບ ອັນອົບອຸ່ນແກ່ບັນດາຜູ້ແທນທີ່ເຂົ້າຮ່ວມກອງປະຊຸມ. ກອງປະຊຸມ ຍັງໄດ້ສະແດງຄວາມຂອບໃຈ ຕໍ່ກອງເລຂາອາຊຽນ ທີ່ໄດ້ໃຫ້ ການສະໜັບສະໜູນດ້ານເຕັກນິກຕ່າງໆ ຂອງກອງປະຊຸມ.

ປຶກສາຫາລື ຮ່ວມກັບເຈົ້າໜ້າທີ່ຈາລະຈອນ ເພື່ອແກ້ໄຂ ການຈາລະຈອນແອອັດ ໃນນະຄອນຫລວງວຽງຈັນ

ໃນ​ວັນ​ທີ 14 ສິງຫາ 2013 ຢູ່​ທີ່​ຫ້ອງປະຊຸມ​ຕຳຫຼວດຈາລາຈອນ ນະຄອນຫຼວງ ​ຊັ້ນ​ 5 ​ໄດ້​ຈັດ​ກອງ​ປະຊຸມປຶກສາ​ຫາລື ​ເພື່ອ​ແກ້​ໄຂ​ການ​ຈາລະ​ຈອນ​ແອ​ອັດ ​ໃນ​ນະຄ​ອນຫລວງ​ວຽງ​ຈັນ, ​ໂດຍ​ການ​ເປັນ​ປະທານ​ຂອງ​ທ່ານ ພັທ ຄຳ​ສູຍ ​ແກ້ວ​ມະນີ​ວົງ ຮອງ​ຫົວໜ້າກົມ​ຕຳຫຼວດ ຈາລະ​ຈອນ ນະຄອນຫຼວງ​ວຽງ​ຈັນ, ທ່ານ ພັທ ສະຫຼອງ ​ແສງ​ອາທິດ ຫົວໜ້າຫ້ອງການຕຳຫຼວດ ປກສ ນະຄອນຫຼວງ, ທ່ານ ພັທ ພົມມະຈັນ ສວນ​ບຸນ​ມາ ຫົວໜ້າ​ພະ​ແນ​ກ ຕຳຫຼວດ​ຈາລະ​ຈອນ ນະຄອນຫຼວງ, ທ່ານ ພັຕ ຢຸດ​ຕະພົງ ສຸວັນນະ​ສິງ ຮ​ອງພະ​ແນ​ກ ຈາລະ​ຈອນ ນະຄອນຫຼວງ, ທ່ານ ພັຕ ບຸນ​ມາກ ສູນ​ດາ​​ໃລ ຮອງພະ​ແນ​ກຈາລະ​ຈອນ ນະຄອນຫຼວງ, ພາຍຫຼັງ​ທ່ານປະທານ ​ກ່າວ​ເປີດກອງ​ປະຊຸມ​ແລ້ວ ທ່ານ ສົມ​ນຶກ ​ເມກຕະກຸນ ​ຫົວໜ້າ​ພະ​ແນ​ກ ຄຸ້ມ​ຄອງ​ຈາລະ​ຈອນ ​ແລະ​ ການ​ຂັບ​ຂີ່ ກະຊວງ ຍທຂ ​ໄດ້​ລາຍ​ງານ​ວ່າ : ກົມ​ຂົນສົ່ງ ​ໄດ້​ຈັດສັນ​ງົບ​ປະມານ​ຈຳນວນ​ໜຶ່ງ ທີ່​ໄດ້​ຮັບ​ການ​ຊ່ວຍ​ເຫຼືອ​ຈາກ​ທະນາຄານ​ໂລກ ມາ​ປັບປຸງ​ການ​ສັນຈອນ​ທີ່​ແອ​ອັດ ​ແລະ​ແກ້​ໄຂ​ບັນຫາ​ອຸ​ບັດຕິ​ເຫດ​ທາງ​ຖະໜົນ ຢູ່​ນະຄອນຫລວງ​ວຽງ​ຈັນ ​​ເຊິ່ງ​ໄດ້​ຄົ້ນ​ຄ້ວາ​ວາງ​ແຜນ ​ແລະ ສຶກສາມາ​ແຕ່​ຕົ້ນ​ປີ 2012 ​ໂດຍ​ໄດ້​ປຶກສາ​ຫາລື​ໄປ​ຫລາຍ​ຫລົບ​ຫລາຍ​ຕ່າວ ຮ່ວມ​ກັບ​ນະຄອນຫລວງ​ວຽງ​ຈັນ, ​​ປະຈຸ​ບັນ​ ຜູ້​ໃຫ້​ທຶນ ​ແລະລັດຖະບານ ໄດ້​ຕົກລົງ​ໃຫ້ ບໍລິສັດ ​ແກຣນ​ນິວ​ໂຊນ​ຕັນ​ຟິກ ປະ​ເທດ​ໄທ (Cleanezone Traffie Thalland) ​ເປັນ​ຜູ້ຈັດ​ຕັ້ງ​ປະຕິບັດ​ເພື່ອປັບປຸງ​ຈັດ​ສັນ​ການ​ສັນຈອນ​ຄືນ​ໃໝ່. ການ​ປັບປຸງ​ຄັ້ງ​ນີ້ ຈະ​ກວມ​ເອົາ​ຫລາຍ​ເສັ້ນທາງ​ ຄື: 1) ຖະໜົນລ້ານ​ຊ້າງ, 2) ຖະໜົນໄກສອນ ພົມວິຫານ (​ແຕ່​ຄອງ​ສັນຕິພາບ-ດົງ​ໂດກ),​ 3) ຖະໜົນໂພນ​ຕ້ອງ (​ແຕ່​ອະນຸສາວະລີ-ດົງ​ໂດກ), 4) ຖະໜົນ 23 ສິງຫາ,​ 5) ຖະໜົນໜອງ​ບອນ, 6) ຖະໜົນອາ​ຊຽນ, 7) ຖະໜົນດົງ​ປາຍ​ນາ,​ 8) ຖະໜົນສາມ​ແສນ​ໄທ, 9) ຖະໜົນ​ເຊ​ດຖາ​ທິລາ​​ດ, 10) ຖະໜົນ ກຳແພງ​ເມືອງ    (​ແຕ່ຂົວ​ຮອງ​ແຊງ-​ໄຟ​ແດງ​ໂພນ​ທັນ) 11) ຖະໜົນທ່າ​ເດື່ອ (​ແຕ່​ໄຟ​ແດງ​ທາດ​ຂາວ-ວົງວຽນ​ຄ້າຍຈີ່ນາຍ​ໂມ້). ​ໂຄງການ​ດັ່ງກ່າວ ຈະ​ມີ​ການ​ປັບປຸງ​ລະບົບ​ໄຟ​ແດງ​ຢູ່ 5 ​ແຍກ​ໂອ​ດຽນ ​ເພື່ອ​ຮອງ​ຮັບ​ການ​ແລ່ນ​ລົດ 2 ທິດ​ທາງ​ຂອງ​ຖະໜົນ​ສີ​ຫອມ ​ແລະ ຖະໜົນ​ຂົວ​ຫລວງ ​ເພື່ອ​ຊ່ວຍ​ລະບາຍ​ລົດ​ທີ່​ແອ​ອັດ ຢູ່​ບໍລິ​ເວນ​ໄຟ​ແດງ​ໜອງ​ດ້ວງ ​ແລະ ​ໄຟ​ແດງ​ຕະຫລາດທົ່ງ​ຂັນ​ຄຳ (​ເວົ້າ​ລວມຖະໜົນ​ສີ​ຫອມ ​ແລະ​ ຖະໜົນ​ຂົວ​ຫລວງ ຈະ​ກາຍ​ເປັນຖະໜົນ​​ແລ່ນ​ລົດ​ສອງ​ທິດ​ທາງ) ໃນ​ນັ້ນ ຈະ​ມີ​ການ​ຕິດ​ຕັ້ງ​ປ້າຍ ຫ້າມ​ຢຸດ, ຫ້າມ​ຈອດ, ວາງ​ຖັງ​ຢາງ​ປລາສະຕິກ​ແບ່ງ​ທິດ​ທາງ​ການ​ສັນຈອນ, ປັບປຸງ ​ແລະ ຕິດ​ຕັ້ງ​ໄຟ​ແດງ​ຄືນ​ໃໝ່ ​ໃຫ້​ສົມ​ຄູ່​ກັບປະລິມານ​ການ​ສັນຈອນ ​ໃນ​ສະພາບ​ປະຈຸ​ບັນ, ນອກຈາກ​ນີ້ ຍັງຈະ​ມີ​ການ​ປັບປຸງ​ລະບົບ​ໄຟ​ແດງ ຢູ່​ບໍ​ລິ​ເວນອານຸສາ​ວະລີ (ສວນ​ປະຕູ​ໄຊ) ທັງ​ສອງ​ສົ້ນ ​ແລະ ຕິດ​ຕັ້ງ​ຖັງ​ຢາງ​ປລາສະຕິກ​ແບ່ງ​ເສັ້ນທາງຢູ່​ຕໍ່ໜ້າ​ຄອງ​ສັນຕິພາບ ​ແລະ ວົງວຽນ 450 ປີ ​ເພື່ອ​ຮອງ​ຮັບ​ການ​​ແລ່ນລົດ​ທິດ​ທາງ​ດຽວ ຂອງ​ຖະໜົນ 23 ສິງຫາ,​ ໜອງ​ບອນ, ​ແລະ ຖະໜົນ​ໄກສອນ ພົມວິຫານ ຊຶ່ງຈະ​ເລີ່​ມ​ແຕ່​ແຈ​ກະຊວງ ຍທຂ-​ໄຟ​ແດງ​ໜອງ​ບອນ-ວົງວຽນ 450 ປີ-ຄອງ​ສັນຕິພາບ, ສ່ວນ​ລາຍ​ລະອຽດ ​ແລະ ​ແຜນ​ວາ​ດປັບປຸງ ທິດ​ທາງ​ການ​ເດີນ​ລົດ ຈະ​ໄດ້​ມີ​ການ​ປະກາດ ປະຊາ​ຊຳພັນທາງ​ວິທະຍຸ ​ແລະ ​ໂທລະພາບ​ຕື່ມ​ຕາມ​ພາຍຫລັງ.

ຜົນສຳເລັດການເຂົ້າຮ່ວມກອງປະຊຸມຖອດຖອນບົດຮຽນ ກ່ຽວກັບວຽກງານການບໍລິການ ສະໜາມບິນ, ການບໍລິການທາງອາກາດ ຢູ່ທີ່ປະເທດຍີ່ປຸ່ນ

ກອງ​ປະຊຸມ​ຖອດ​ຖອນ​ບົດຮຽນ ກ່ຽວ​ກັບ​ວຽກ​ງານ​ການ​ບໍລິການ​ສະໜາມ​ບິນ, ການ​ບໍລິການ​ທາງ​ອາກາດ ລະຫວ່າງ ຄະນະ​ຜູ້​ແທນ​ລາວ ​ແລະ ຄະນະ​ຜູ້​ແທນ​ຝ່າຍ​ຍີ່ປຸ່ນ ​ໄດ້​ຈັດ​ຂື້ນ​ໃນ​ຕອນ​ເຊົ້າ ຂອງ​ວັນ​ທີ 27 ສິງຫາ 2013 ທີ່​ສຳນັກງານ​ໃຫຍ່ ບໍລິສັດ JALUX lnc. ຢູ່ TOKYO ປະ​ເທດ​ຍີ່ປຸ່ນໂດຍ​ຕາງໜ້າ ຝ່າຍ​ລາວ​ແມ່ນ​ທ່ານ ລັດຕະນະມະນີ ຄູນ​ນີວົງ ລັດຖະມົນຕີ​ຊ່ວຍ​ວ່າການ ກະຊວງ ​ໂຍທາ​ທິການ ​ແລະຂົນ​ສົ່ງ ​ແຫ່ງ ສປປ ລາວ ​ແລະ ​ສ່ວນຝ່າຍຍີ່ປຸ່ນ​ ແມ່ນ​ທ່ານ kunio HIRATA ຮອງ​ປະທານ ບໍລິສັດ JALUX lnc. ພ້ອມ​ດ້ວຍ​ຄະນະ​ທັງ​ສອງ​ຝ່າຍ.

​ກອງ​ປະຊຸມ​ຖອດ​ຖອນ​ບົດຮຽນ ​ໃນ​ຄັ້ງ​ນີ້​ໄດ້ປຶກສາ​ຫາລື ກ່ຽວ​ກັບ​ວຽກ​ງານ​ການ​ບໍລິການ​ສະ ໜາມ​ບິນ, ການ​ບໍລິການ​ທາງ​ອາກາດ ​ໂຄງການ​ຂະຫຍາຍ​ອາຄານ ຜູ້​ໂດ​ຍສານ​ສະໜາມ​ບິນ​ສາກົນ​ວັດ​ໄຕ ​ເພື່ອ​ຊຸກຍູ້​ໃຫ້​ຝ່າຍ​ຍີ່ປຸ່ນ ສະໜັບສະໜູນ​ໃຫ້​ໂຄງການ​ນີ້​ປະສົບ​ຜົນສຳ​ເລັດ​ເປັນ​ຢ່າງ​ດີ,​ ທັງ​ສອງ​ບໍລິສັດ​ຂອງ​ຍີ່ປຸ່ນ ​ໃນ​ຖານະ​ເປັນຂາ​ຮຸ້ນ​ຂອງ L-JATS ກໍຍັງມີແຜນການທີ່ຈະຂະຫຍາຍທຸລະກິດ ຢູ່ສະໜາມ​ບິນ​ສາກົນ​ວັດ​ໄຕ ພາຍຫຼັງສຳເລັດໂຄງການຂະຫຍາຍອາຄານ ຜູ້ໂດຍສານສະໜາມບິນ ໃນອານາ​ຄົດອັນໃກ້ນີ້. ນອກຈາກນັ້ນ, ທາງບໍລິສັດ JALUX ຍັງໄດ້ລົງທຶນປູກພຶດກະສິກຳ ຢູ່ແຂວງ ເຊກອງ  ສປປ ລາວ ຈຳນວນໜຶ່ງ. ທ່ານຮອງປະທານ ບໍລິສັດ JALUX ໄດ້ສະເໜີຕໍ່ຫົວໜ້າ ຄະນະຜູ້ແທນລາວ ເພື່ອພິຈາລະນາອະນຸມັດໃຫ້ຝ່າຍຂາຮຸ້ນ ໃນການຮ່ວມທຸລະກິດກັບ L-JATS ເພື່ອຮ່ວມລົງລາຍເຊັນສືບຕໍ່ສັນຍາ ໃນເດືອນກັນຍາ 2013 ທັງນີ້ ກໍເພື່ອໃຫ້ສອດຄ່ອງກັບຂໍ້ກຳນົດຂອງສັນຍາແມ່ສະບັບປີ 1999 ຊຶ່ງຈະໄດ້ແຈ້ງໃຫ້ອີກຝ່າຍໜຶ່ງຊາບກ່ອນ 6 ເດືອນ ກ່ອນທີ່ສັນຍາຈະໝົດວາລະ 5 ປີໃນທ້າຍເດືອນມີນາ 2014 ທີ່​ຈະ​ມາ​ເຖິງນີ້. ນອກຈາກນີ້ຝ່າຍລາວ ກໍໄດ້ສະເໜີໃຫ້ມີການຂະຫຍາຍ ຂອບການຮ່ວມມືເຊັ່ນ: ຂົງເຂດວຽກງານດ້ານການບິນ, ດ້ານການຂົນສົ່ງ ແລະ ອື່ນໆ ເຊິ່ງຝ່າຍຍີ່ປຸ່ນກໍຍິນດີຮັບເອົາຂໍ້ສະເໜີ ເພື່ອພິຈາລະນາໃນຕໍ່ໜ້າ ບໍ່ສະພາະແຕ່ເທົ່ານັ້ນຄະນະຜູ້ແທນລາວ ຍັງໄດ້ເຂົ້າຢ້ຽມຢາມ ກະຊວງທີ່ດິນ, ພື້ນຖານໂຄງລ່າງ ແລະ ການຂົນສົ່ງຂອງຍີ່ປຸ່ນ (MLIY) ຊຶ່ງໃຫ້ການຕ້ອນຮັບໂດຍທ່ານ LAJIYAMA ລັດຖະມົນຕີຊ່ວຍ ວ່າການ ພ້ອມດ້ວຍພະນັກງານຂັ້ນສູງ ຈຳນວນໜຶ່ງ, ທັງສອງຝ່າຍໄດ້ຕີລາຄາສູງຕໍ່ການພົວພັນຮ່ວມມື ລະຫວ່າງສອງລັດຖະບານ ລາວ-ຍີ່ປຸ່ນ ທີ່ຜ່ານມາ ລວມທັງບັນດາໂຄງການທີ່ຈະໄດ້ມີການລົງນາມຊ່ວຍເຫຼືອເພີ້ມເຕີມ ຂອງລັດຖະບານຍີ່ປຸ່ນ ໃຫ້ແກ່ ລັດຖະບານ ສປປ ລາວ ໃນຕໍ່ໜ້າເວົ້າລວມ, ເວົ້າສະເພາະກໍແມ່ນວຽກງານຂະແໜງການ ຍທຂ ຂອງລາວ ປະມານກາງເດືອນ 9 ປີ 2013 ນີ້ ກໍຈະມີການເຊັນບົດບັນທຶກຄວາມເຂົ້າໃຈຢູ່ ນະຄອນຫຼວງວຽງຈັນ ລະຫວ່າງ ຜູ້ຕາງໜ້າລັດຖະບານ ຍີ່ປຸ່ນ ແລະ ລັດຖະບານ ແຫ່ງ ສປປ ລາວ ເພື່ອສຶບຕໍ່ໃຫ້ໂຄງການຊ່ວຍເຫຼືອ ຈຳນວນໜຶ່ງ ຕາມການສະເໜີຂອງຝ່າຍລາວ, ຝ່າຍຍີ່ປຸ່ນຍັງໄດ້ສະເໜີໃຫ້ລັດຖະບານ ລາວ ພິຈາລະນາຕໍ່ອາຍຸສັນຍາຮ່ວມທຸລະກິດ ຂອງພາກສ່ວນທຸລະກິດຍີ່ປຸ່ນ ກັບຝ່າຍລາວ ສຳລັບວຽກງານ ຂອງ L-JATS ໃນຕໍ່ໜ້າ. ແລະໃນວັນຕໍ່ມາຄະນະຜູ້ແທນລາວກໍໄດ້ໄປຢ້ຽມຢາມ ສະໜາມບິນ NARITA ແລະ ສະໜາມບິນ CHUBU ເພື່ອຮັບຟັງການລາຍງານ ສະພາບການຂອງ ການບໍລິການສາຍການບິນຕ່າງໆອີກ​ດ້ວຍ.

ທ່ານ ລັດຖະມົນຕີວ່າການ ກະຊວງ ໂຍທາທິການ ແລະຂົນສົ່ງ ລົງເຄື່ອນໄຫວ ແກ້ໄຂວຽກສຸກເສີນໄພພິບັດນໍ້າປ່າໄຫຼຫຼາກ ແລະ ຝົນຕົກໜັກ ທີ່ ແຂວງອຸດົມໄຊ, ວັນທີ 24-25/08/2013

ທ່ານ ສົມມາດ ພົລເສນາ, ລັດຖະມົນຕີວ່າການ ກະຊວງ ໂຍທາທິການ ແລະ ຂົນສົ່ງ ພ້ອມຄະນະວິຊາການ ຈາກທະນາຄານໂລກ, ກົມຂົວທາງ ແລະ ກົມເຄຫາ-ຜັງເມືອງ ໄດ້ລົງເຄື່ອນໄຫວແກ້ໄຂວຽກງານ ສຸກເສີນເສັ້ນທາງພາຍໃນ ແຂວງອຸດົມໄຊ ຍ້ອນນ້ຳປ່າ ໄຫຼຫຼາກ ແລະ ຝົນຕົກໜັກໃນໄລຍະຫຼາຍ ວັນຕິດຕໍ່ກັນ ຊື່ງເລີ່ມແຕ່ວັນທີ່ 20/8/2013, ອັນໄດ້ສ້າງຄວາມເສຍຫາຍ ຢ່າງຫຼວງຫຼາຍ ແກ່ຊີວິດ ແລະ ຊັບສິນ ຂອງປະຊາຊົນ ທີ່ດຳລົງຊີວິດຢູ່ເຂດເມືອງ ແບງ, ແຂວງອຸດົມໄຊ, ຕະລອດຮອດພື້ນຖານໂຄງລ່າງດ້ານຄົມມະ ນາຄົມ-ຂົນສົ່ງ ແລະ ອື່ນໆ. ຜ່ານການຈັດຕັ້ງປະຕິບັດແກ້ໄຂວຽກສຸກເສີນດັ່ງກ່າວໃນ ຫຼາຍວັນຜ່ານ ມາ, ເຫັນວ່າ ໂດຍລວມ ແມ່ນ ສາມາດແກ້ໄຂໄດ້ໂດຍພື້ນຖານ, ໂດຍ ພະແນກ ຍທຂ ແຂວງອຸດົມໄຊ ໄດ້ເປັນເຈົ້າການຊຸກຍູ້ ໃຫ້ບໍລິສັດກໍ່ ສ້າງແກ້ໄຂດີນເຈື່ອນ, ທໍ່ຫັກ, ທໍ່ຂາດ, ທາງຂາດ, ຂົວຫັກ ແລະຕັດຕົ້ນ ໄມ້ ແລະສີ່ງເສດເຫຼືອອອກຈາກໜ້າທາງ. ມາຮອດປະຈຸບັນ, ສາມາດແກ້ໄຂການສັນ ຈອນໄດ້ໂດຍພື້ນຖານ ສາມາດຮັບປະກັນການຄົມມະນາຄົມ-ຂົນສົ່ງ ກໍຄືການໄປມາໄດ້ຢ່າງຫຼົ່ງຫຼ່ຽນ ເຮັດໃຫ້ພາກລັດ, ເອກະ ຊົນ ແລະນັກທຸລະກິດທັງ ພາຍໃນແຂວງ, ຕ່າງແຂວງ ແລະອົງການຈັດຕັ້ງສາກົນຕ່າງໆ ສາມາດເດີນທາງເຂົ້າໄປໃຫ້ການຊ່ວຍເຫຼືອ ຜູ້ປະສົບເຄາະຮ້າຍໃນຄັ້ງນີ້ຢ່າງທັນການ.
ສຳລັບການແກ້ໄຂວຽກທາງຫຼວງແຫ່ງຊາດ, ທາງວິຊາການພະແນກ ຍທຂ ໂດຍ ສົມທົບກັບຄະນະວິຊາການກົມຂົວທາງ ໄດ້ເປັນ ເອກະພາບໃນ ເບື້ອງຕົ້ນເພື່ອເປັນແນວທາງໃນການຈັດຕັ້ງປະຕິບັດໃນ ຂັ້ນຕໍ່ໄປດັ່ງນີ້:
1. ທາງ​ເລກ 2​W(ເມືອງ​ໄຊ-​ເມືອງ​ແບ​ງ).
ວຽກແກ້ໄຂສຸກເສີນ: ສຶບຕໍ່ຕັກດີນເຈື່ອນອອກຈາກໜ້າທາງ, ຖົມຫີນບາງບ່ອນທີ່ມີຄວາມຈຳເປັນ ພ້ອມທັງເກດອາ ນາໄມໜ້າທາງທີເຫັນວ່າ ມີດີນຕົມຫຼາຍ ເພື່ອຮັບປະກັນຕໍ່ການສັນຈອນ.
ວຽກແກ້ໄຂຫຼັງລະດູຝົນ: ຈຸດຂົວນ້ຳສັດ (ທໍ່ລ່ຽມ5.5x2x2.5 ແມັດ) ທີ່ຫັກນັ້ນ, ຈະໄດ້ສຳຫຼວດອອກແບບ ເປັນທໍ່ລ່ຽມຂະໜາດ 3x3x3 ແມັດ (ຫຼືອາດຈະເຮັດເປັນຂົວຊ່ວງດຽວ), ຈຸດທາງ ເຈື່ອນຍ້ອນນ້ຳແບງກັດເຊາະ ຈະໄດ້ສຳຫຼວດອອກແບບລະອຽດພາຍຫຼັງລະດູຝົນ. ນອກນັ້ນ ກໍ່ຍັງມີຕ້ານ ເຈື່ອນອິກຕື່ມ 25 ຈຸດ.
2. ເສັ້ນທາງເລກທີ່13N:
ຕອນທາງ: ອຸດົມໄຊ ຫາ ນາເຕີຍ:
Ø    ວຽກລະດູຝົນ: ສາມາດແກ້ໄຂຢ່າງທັນການ ເຮັດໃຫ້ການສັນຈອນເປັນປົກກະຕິ.
Ø    ວຽກຫຼັງລະດູຝົນ: ສ້ອມແປງຄືນຈຸດທີ່ເປ່ເພເສຍຫາຍ.
ຕອນທາງ: ອຸດົມໄຊ ຫາ ປາກມອງ:
Ø     ວຽກລະດູຝົນ:ສາມາດແກ້ໄຂຢ່າງທັນການ ເຮັດໃຫ້ການສັນຈອນເປັນປົກກະຕິ.
3. ເສັ້ນທາງ ​ເມືອງໄຊ ຫາ ​ເມືອງງາ.
Ø    ວຽກລະດູຝົນ: ສາມາດແກ້ໄຂຢ່າງທັນການ ເຮັດໃຫ້ການສັນຈອນເປັນປົກກະຕິ.
Ø    ວຽກຫຼັງລະດູຝົນ: ສ້ອມແປງຄືນຈຸດຫົວຂົວ ກມ 14.
4. ທາງຫຼວງທ້ອງຖີ່ນ:
    ວຽກລະດູຝົນ: ໄດ້ມອບໃຫ້ຫ້ອງການ ຍທຂ ເມືອງ ເປັນຜູ້ຈັດຕັ້ງປະຕິບັດ. ມາຮອດປະຈຸບັນ ກຳລັງກະກຽມຈັດຫາຜູ້ຮັບເໜົາ ເຂົ້າດຳເນີນການ. ສຳລັບເສັ້ນທາງ ນາໝໍ້ ຫາ ແມວຈ່າຍ (ເສັ້ນທາງເລກ ທີ່ 1803) ແມ່ນໄດ້ປະຕິບັດຢ່າງຕໍ່ເນື່ອງ ສາມາດເປິດ ການສັນຈອນປົກກະຕິ.

    ໃນໂອກາດນິີ້, ທ່ານ ລັດຖະມົນຕີວ່າການ ກະຊວງ ຍທຂ ຍັງໄດ້ພົບປະກັບ ທ່ານ ເຈົ້າແຂວງແຂວງອຸດົມໄຊ ເພື່ອປຶກສາຫາລື ກ່ຽວກັບການ ແກ້ໄຂວຽກໄພພິບັດດັ່ງກ່າວ, ໂດຍ ກະຊວງ ຍທຂ ຈະສືບຕໍ່ຊີ້ນຳຄະນະວິຊາການທີ່ກ່ຽວຂ້ອງຂອງຕົນ ໂດຍສົມທົບກັບ ພະແນກ ຍທຂ ແຂວງ ແກ້ໄຂສຸກເສີນ ແລະ ສ້ອມແປງໃຫ່ຍພາຍຫຼັງລະດູຝົນ, ພ້ອມທັງກວດກາດ້ານບໍລິມາດວຽກ ແລະ ມູນຄ່າກໍ່ ສ້າງ, ລວມທັງຂື້ນແຜນງົບປະມານ ເພື່ອສະເໜີລັດຖະບານ ແລະ ທະນາຄານໂລກ ພິຈາລະນາແກ້ໄຂ.

Additional information