ຂ່າວພາຍໃນກະຊວງ

ການພົບປະເຮັດວຽກ ລະຫວ່າງ ສອງກະຊວງ ລາວ-ຫວຽດນາມ

ອີງຕາມການຕອບຮັບ ຕາມຄໍາເຊີນຂອງກະຊວງ ໂຍທາທິການ ແລະຂົນສົ່ງ ສປປ ລາວ, ຄະນະຜູ້ແທນ ກະຊວງ ຄົມມະນາຄົມ-ຂົນສົ່ງ ສສ ຫວຽດນາມ ນໍາພາໂດຍ ທ່ານ ເລດີງເທາະ, ລັດຖະມົນຕີຊ່ວຍວ່າການ ກະຊວງ ຄົມມະນາຄົມ-ຂົນສົ່ງ ສສ ຫວຽດນາມ ພ້ອມດ້ອຍຄະນະ ໄດ້ເດີນທາງມາພົບປະ ຢ້ຽມຢາມ ແລະເຮັດວຽກ ກັບ ກະຊວງໂຍທາທິການ ແລະຂົນສົ່ງ ສປປ ລາວ ນໍາໂດຍ ທ່ານ ດຣ ບຸນຈັນ ສິນທະວົງ ລັດຖະມົນຕີຊ່ວຍວ່າການ ໃນລະຫວ່າງວັນທີ 14-16 ສິງຫາ 2013. ເພື່ອປຶກສາຫາລື ກ່ຽວກັບໜ້າວຽກຂອງການຮ່ວມມືທັງສອງກະຊວງ.

      ຜ່ານກອງປະຊຸມພົບປະປຶກສາຫາລື ທັງສອງຝ່າຍໄດ້ຕົກລົງເປັນເອກະພາບກັນຕາມເນື້ອໃນດັ່ງ ນີ້: ໂຄງການກໍ່ສ້າງເສັ້ນທາງ ພູທິດເຜີ້ງ-ນາຊອນ ແຂວງຫຼວງພະບາງ ສປປ ລາວ ຕິດກັບຊາຍແດນ ແຂວງດຽນບຽນຟູ ຂອງ ສສ ຫວຽດນາມ ທີ່ມີຄວາມຍາວ 104.7 ກມ. ພາຍຫຼັງທີ່ໄດ້ຮັບການລາຍງານ ປັບປຸງຄືນຜົນການສໍາຫຼວດ ແລະສຶກສາ ທາງດ້ານເສດຖະກິດ-ເຕັກນິກ ສໍາລັບໂຄງການດັ່ງກ່າວຂອງ TEDI ແລະທັງສອງຝ່າຍ ໄດ້ປຶກສາຫາລື ແລະຕົກລົງ ເປັນເອກກະພາບກັນ ດັ່ງນີ້:

-    ກ່ຽວກັບແລວທາງ ທັງສອງຝ່າຍໄດ້ເປັນເອກະພາບຕາມການລາຍງານຂອງທີ່ປຶກສາ ໂດຍສະເພາະແມ່ນ ໄລຍະຕອນທາງແຕ່ ນາຊອນ-ດ່ານຊາຍແດນ (ຫຼັກໝາຍຊາຍແດນ 144) ອີງຕາມ ການສະເໜີຂອງຝ່າຍລາວ ໃຫ້ປ່ຽນແລວທາງຢູ່ໃກ້ຊາຍແດນ ແລະແລວທາງເວັ້ນຕົວ ເມືອງໂພນທອງ ທາງກະຊວງ ຄົມມະນາຄົມ-ຂົນສົ່ງ ສສ ຫວຽດນາມ ເຫັນດີນໍາການສະເໜີ ແລະມອບໃຫ້ TEDI ສົມທົບກັບ ແຂວງຫຼວງພະບາງ ເພື່ອຄົ້ນຄ້ວາອອກແບບ ແລະປ່ຽນແລວທາງໃຫ້ມີຄວາມເໝາະສົມ ກັບການພັດທະນາຂອງຝ່າຍລາວ ຫຼັງຈາກນັ້ນ ຈຶ່ງລາຍງານຕໍ່ທັງສອງ ກະຊວງ ເພື່ອພິຈາລະນາ.

-    ສອງຝ່າຍເປັນເອກະພາບກັບບົດບັນທຶກ ລະຫວ່າງທັງສອງກະຊວງ ໃນຄັ້ງວັນທີ 16 ພຶດສະພາ 2013.

-    ກະຊວງ ຄົມມະນາຄົມ-ຂົນສົ່ງ ສສ ຫວຽດນາມ ມອບໃຫ້ TEDI ສືບຕໍ່ລົງສໍາຫຼວດເກັບກໍາຂໍ້ມູນ ການສະ ເໜີຂອງ ຝ່າຍລາວ ຄົ້ນຄວ້າຄວາມເປັນໄປໄດ້ຂອງບັນດາໜ້າວຽກ, ໃຫ້ສໍາເລັດ ແລະລາຍງານຕໍ່ທັງສອງກະຊວງ ກ່ອນວັນທີ 15 ຕຸລາ 2013.

ໂຄງການທາງ ຊຽງຂວາງ-ຫົວພັນ-ແທງຮ້ວາ:

-    ທັງສອງຝ່າຍເປັນເອກະພາບມອບໃຫ້ TEDI ແລະ LTEC ສົມທົບກັບພະແນກ ໂຍທາທິການ ແລະຂົນສົ່ງ ແຂວງຊຽງຂວາງ ແລະແຂວງຫົວພັນ ດໍາເນີນການສໍາຫຼວດແລວທາງ ແລະເກັບກໍາຂໍ້ມູນເບື້ອງຕົ້ນ. ສ່ວນງົບປະມານ ຄ່າສໍາຫຼວດແມ່ນໃຫ້ນໍາໃຊ້ງົບປະມານຂອງສອງກະຊວງ ພ້ອມດຽວກັນນີ້ໃຫ້ຄົ້ນຄວ້າ ຈັດລຽງບູລິມະສິດຕອນທາງໃດ ຈະກໍ່ສ້າງກ່ອນ ພ້ອມທັງຄິດໄລ່ງົບປະມານການກໍ່ສ້າງໃຫ້ເລັດພາຍໃນເດືອນ 10/2013 ເພື່ອສະເໜີຕໍ່ກະຊວງ ພິຈາລະນາ ແລ້ວລາຍງານໃຫ້ລັດຖະບານ ຂອງສອງປະເທດ.

-    ກ່ຽວກັບວຽກສໍາຫຼວດອອກແບບຕອນທາງແຕ່ ທ່າເຫຼົ້າ-ຊໍາໃຕ້ 67 ກມ ທີ່ແຂວງໄດ້ຕົກລົງໃຫ້ບໍລິສັດສໍາຫຼວດອອກ ແບບແລ້ວນັ້ນ. ມອບໃຫ້ພະແນກ ຍທຂ ແຂວງຫົວພັນ ແລະພາກສ່ວນກ່ຽວຂ້ອງ ສົມທົບກັບ TEDI ແລະ LTEC ເພື່ອປຶກສາຫາລືກັນແກ້ໄຂດ້ວຍວິທີການທີ່ເໝາະສົມ ແລ້ວລາຍງານ ຂໍຄໍາເຫັນຕໍ່ການນໍາຂອງແຂວງ ແລະກະຊວງ.

-    ການຊີ້ນໍາການຈັດຕັ້ງປະຕິບັດຕົງຈິງ ດ້ານວິຊາການທັງສອງ ກະຊວງເປັນເອກະພາບ ມອບໃຫ້ກົມແຜນການ-ການ ລົງທຶນ ຝ່າຍຫວຽດນາມ ແລະກົມຂົວທາງ ຝ່າຍລາວ ເປັນຜູ້ປະສານງານກ່ຽວກັບໂຄງການນີ້ໃຫ້ແກ່ສອງກະຊວງ.

ກ່ຽວກັບວຽກງານຍົກລະດັບເວັບໄຊ໌ ແລະຂ່າວສານຂອງກະຊວງ:

ອີງຕາມການສະເໜີຂອງຝ່າຍລາວ ທາງກະຊວງຄົມມະນາຄົມ-ຂົນສົ່ງ ສສ ຫວຽດນາມ ຈະເຮັດຈົດໝາຍເຊີນທາງ ກະຊວງໂຍທາທິການ ແລະຂົນສົ່ງ ສປປ ລາວ ໄປແລກປ່ຽນບົດຮຽນ ແລະຝຶກອົບຮົມ ກ່ຽວກັບວຽກງານຂ່າວສານ ຂອງກະຊວງ ຄົມມະນາຄົມ-ຂົນສົ່ງ ສສ ຫວຽດນາມ ເພື່ອເປັນພື້ນຖານໃນການພັດທະນາຂໍ້ມູນຂ່າວສານ ຂອງຝ່າຍ ລາວ. ກະຊວງຄົມມະນາຄົມ-ຂົນສົ່ງ ສສ ຫວຽດນາມ ມອບໃຫ້ຫ້ອງການກະຊວງ ແລະສູນຂໍ້ມູນຂ່າວສານ, ກົມພົວພັນ ຕ່າງປະເທດ ເປັນຜູ້ປະສານງານ ທາງດ້ານເນື້ອໃນລາຍລະອຽດ. ກໍານົດວັນເວລາແມ່ນໃນເດືອນ 10/2013 ສໍາລັບ ທາງດ້ານອຸປະກອນຕ່າງໆ ກະຊວງຄົມມະນາຄົມ-ຂົນສົ່ງ ສສ ຫວຽດນາມ ໄດ້ມອບໃຫ້ບໍລິສັດ CIENCO1 ເປັນຜູ້ຮັບ ຜິດຊອບຈັດຊື້ໃຫ້ ທາງກະຊວງໂຍທາທິການ ແລະຂົນສົ່ງ ສປປ ລາວ ໃນປີ 2013 ນີ້.

      ກ່ຽວກັບການຊ່ວຍເຫຼືອ ທາງດ້ານລະບົບ ກວດກາຄຸນະພາບຍານພາຫະນະຂົນສົ່ງ ແລະການຂື້ນທະບຽນຂອງຝ່າຍລາວ:

     ທັງສອງກະຊວງເປັນເອກະພາບ ມອບໃຫ້ກົມກວດກາເຕັກນິກ ເປັນເຈົ້າການ, ສ່ວນກົມພົວພັນຕ່າງປະເທດ ເປັນ ຜູ້ປະສານງານ ກັບກະຊວງໂຍທາທິການ ແລະຂົນສົ່ງ ສປປ ລາວ ເພື່ອນໍາສະເໜີ ແລະວິທີການໃນການຊ່ວຍເຫລືອ ສ້າງລະບົບກວດກາຄຸນນະພາບຍານພາຫະນະຂົນສົ່ງໃຫ້ແກ່ຝ່າຍລາວ.

      ກ່ຽວກັບໂຄງການເພີ້ມທະວີຄວາມປອດໄພ ແລະວຽກງານຄຸ້ມຄອງການຂົນສົ່ງທາງບົກ ລະຫວ່າງ ລາວ-ຫວຽດນາມ:

     ທັງສອງຝ່າຍເປັນເອກະພາບກັບບົດສຶກສາໂຄງການໃນເບື້ອງຕົ້ນ. ກະຊວງຄົມມະນາຄົມ-ຂົນສົ່ງ ສສ ຫວຽດນາມ ມອບໃຫ້ກົມໃຫຍ່ທາງບົກ ສສ ຫວຽດນາມ ເປັນເຈົ້າການຈັດຕັ້ງປະຕິບັດ, ສ່ວນກົມພົວພັນຕ່າງປະເທດ ເປັນຜູ້ປະສານ ງານກັບ ກົມຂົນສົ່ງ ຝ່າຍລາວ ແລະບັນດາໝ່ວຍງານ ທີ່ກ່ຽວຂ້ອງຂອງຝ່າຍ ລາວ, ສ້າງແຜນການຂື້ນແຜນງົບປະມານ ແລະຮີບດ່ວນຄົ້ນຄ້ວານໍາສະເໜີລາຍງານຄວາມຄືບໜ້າ ເພື່ອນໍາໄປລາຍງານ ໃນວາລະກອງປະຊຸມປະຈໍາປີ 2013 ຂອງສອງກະຊວງ.

      ແລະບັນຫາອື່ນໆ:

     ກ. ການແລກປ່ຽນບົດຮຽນກ່ຽວກັບການຄຸ້ມຄອງ ແລະບູລະນະຮັກສາທາງບົກ:

     ທັງສອງຝ່າຍໄດ້ເປັນເອກະພາບກັນ ຈະເພີ້ມທະວີການແລກປ່ຽນບົດຮຽນກ່ຽວກັບວຽກງານດັ່ງກ່າວ ໂດຍໃຫ້ຝ່າຍ ລາວ ຈະແຕ່ງຕັ້ງໜ່ວຍງານວິຊາການ ໄປຖອດຖອນບົດຮຽນນໍາຝ່າຍ ຫວຽດນາມ, ກະຊວງ ຄົມມະນາຄົມ-ຂົນສົ່ງ ສສ ຫວຽດນາມ ມອບໃຫ້ກົມໃຫຍ່ທາງບົກ ຫວຽດນາມ ເປັນເຈົ້າການກ່ຽວກັບວຽກງານນີ້, ສ່ວນຝ່າຍລາວແມ່ນມອບໃຫ້ ກົມຂົວທາງ.

      . ກ່ຽວກັບການຮ່ວມມືລະຫວ່າງ TEDI ແລະ LTEC ມອບໃຫ້      TEDI ເປັນຜູ້ສ້າງແຜນການ-ການຮ່ວມມື ໃນການແລກປ່ຽນບົດຮຽນ, ບໍາລຸງກໍ່ສ້າງບຸກຄະລາກອນຊ່ວຍ LTEC.

      . ບົນພື້ນຖານການຮ່ວມືລະຫວ່າງສອງກະຊວງ ທັງສອງຝ່າຍເປັນເອກະພາບຊີ້ນໍາບັນດາພະແນກ ຍທຂ ປະຈໍາ ແຂວງ ຂອງທັງສອງປະເທດ ທີ່ມີຊາຍແດນຕິດຈອດກັນ ເພີ້ມທະວີການຮ່ວມມືໃຫ້ແໜ້ນແຟ້ນຂື້ນຕື່ມ ໃນຂະແໜງການ ຄົມມະນາຄົມ-ຂົນສົ່ງ ຂອງສອງປະເທດ.

      ໃນໂອກາດທີ່ໄດ້ມາຢ້ຽມຢາມ ແລະເຮັດວຽກໃນຄັ້ງນີ້ ທ່ານ ເລດີງເທາະ ລັດຖະມົນຊ່ວຍວ່າການ ກະຊວງ ຄົມມະນາຄົມ-ຂົນສົ່ງ ສສ ຫວຽດນາມ ກໍໄດ້ເຂົ້າພົບປະກັບທ່ານ ສົມມາດ ພົລເສນາ ລັດຖະມົນຕີວ່າການ ກະຊວງ ໂຍທາທິການ ແລະຂົນສົ່ງ ສປປ ລາວ ເພື່ອຢ້ຽມຢາມຖາມຂ່າວ.

ກະຊວງ ຍທຂ ເຊື່ອມຊືມມະຕິ 6 ສະໄໝທີ IX ຂອງສູນກາງພັກ.

      ​ດ້ວຍ​ຄວາມ​ເອົາ​ໃຈ​ໃສ່​ຂອງ​ຄະນະພັກຄະນະ​ນຳ​ກະຊວງ ຍທຂ ​ທີ່ເຫັນ​ໄດ້​ເຖີງຄວາມ​ໝາຍສຳຄັນ​ຂອງ​ມະຕິ ກອງ​ປະຊຸມ​ຄົບ​ຄະນະ​ ບໍລິຫານ​ງານ​ສູນ​ກາງ​ພັກ ຄັ້ງ​ທີ 6 ສະ​ໄໝ​ທີ IX. ໃນ​ວັນທີ 05 ສິ​ງຫາ 2013 ​​ຢູ່​ທີ່​ຫ້ອງ​ປະຊຸມ​ໃຫຍ່ ກະຊວງ ​ໂຍທາ​ທິການ ​ແລະ ຂົນ​ສົ່ງໄດ້​ມີ​ພິທີຈັດ​ຕັ້ງ​ເຊື່ອມ​ຊືມ ມະຕິ 6 ສະ​ໄໝ​ທີ IX ຂອງ​ສູນ​ກາງ​ພັກ, ​ໂດຍ​ແມ່ນ​ທ່ານ ສົມ​ມາດ ພົລ​ເສນາ ກໍາມະການສູນກາງພັກ, ​​ເລຂາ​ຄະນະ​ພັກ ລັດຖະມົນຕີ​ວ່າການ ແລະ ທ່ານ​ ດຣ. ບຸນ​ຈັນ ສິນ​ທະ​ວົງ ຮອງ​ເລຂາ​ຄະນະ​ພັກ ລັດຖະມົນຕີ​ຊ່ວຍ​ວ່າການ, ສະມະຊິກສະພາແຫ່ງຊາດ ຊຸດທີ VII ເຂດເລືອກຕັ້ງທີ່ 13 ແຂວງສະຫວັນນະເຂດ ​ໃຫ້​ກຽດ ​ພັດ​ປ່ຽນ​ກັນ ຂື້ນ​ບັນ​ລະ​ຍາຍ ​ເອກະສານ. ​​ເຂົ້າ​ຮ່ວມ​ຮັບ​ຟັງ​ໃນ​ຄັ້ງ​ນີ້ ມີ​ທີ່​ປຶກສາ ລັດຖະມົນຕີ​ວ່າການ, ບັນດາຫົວໜ້າ​ກົມ,​ ຮອງ​ຫົວໜ້າ​ກົມ, ຄະນະ​ພັກຮາກ​ຖານ, ຄະນະ​ໜ່ວຍ​ພັກ​ຮາກ​ຖານ, ​ເລຂາ,​ ຮອງ​ເລຂາ​ໜ່ວຍ​ພັກ ທີ່​ຂື້ນ​ກັບ​ຄະນະ​ພັກ​ຮາກ​ຖານ, ຫົວໜ້າພະ​ແນ​ກ, ຮອງ​ຫົວໜ້າພະ​ແນ​ກ, ພະນັກ​ງານ​ວິຊາ​ການ​ລະດັບ​ປະ​ລິນຍາ​ເອກ ທີ່​ແມ່ນ​ສະມາຊິກ​ພັກ​ ມາ​ຈາກ​ຫ້ອງການ, ກົມ, ສະ​ຖາ​ບັນ, ສະພາ​ວິທະ ຍາ​ສາດ ​ແລະ ​ເຕັກ​ໂນ​ໂລ​ຊີ, ກອງ​ວິຊາ​ການ, ສູນ​ຝຶກ, ຫ້ອງການ​ດັດສົມ​ນ້ຳ​ປະປາ,​ ຄະນະ​ອຳນວຍ​ການບັນ​ດາ​ລັດ​ວິ​ສາ​ຫະກິດ​ອ້ອມ​ຂ້າງ​ກະຊວງ, ຄະນະ​ບໍລິຫານ​ງານ ສາມ​ອົງການ​ຈັດ​ຕັ້ງ​ມະຫາຊົນ ຂັ້ນ​ກະຊວງ ​ເຂົ້າ​ຮ່ວມ​ທັງ​ໝົດ 176 ທ່ານ ຍິງ 34 ທ່ານ. ການ​​​ເຜີຍ​ແຜ່ເຊື່ອມ​ຊືມມະຕິ 6 ສະໄໝທີ IX ໃນຄັ້ງ​ນີ້ ໄດ້​ເນັ້ນ​ໜັກ​ ເພື່ອ​ເສີມ​ຂະຫຍາຍຜົນສຳ​ເລັດ​ອັນ​ພົ້ນ​ເດັ່ນ ສ້າງ​ບາດ​ກ້າວບຸກທະລຸ​ໃຫ້​​ເຂັ້ມແຂງ​ ​ເພື່ອ​ຈັດ​ຕັ້ງ​ປະຕິບັດ​ມະຕິ​ກອງປະຊຸມ​ໃຫຍ່ ຄັ້ງ​ທີ IX ຂອງ​ພັກ​ ໃຫ້​ປາກົດ​ຜົນ​ເປັນ​ຈິງຕາມ​ຄາດໝາຍທີ່​ວາງ​ໄວ້, ​ປັບ​ປຸງ ​ແບບ​ແຜນ​ວິທີ​ເຮັດ​ວຽກ ​ເພື່ອ​ຍົກ​ສູງ​ຄວາມ​ສາມາດການ​ນຳພາ​ຂອງ​​ພັກ  ​ແລະ ​ເພີ່ມ​ທະວີຄວາມ​ສັກສິດ​ຂອງ​ການ​ບໍລິຫານ​ລັດ​ກໍ​ຄື​ການຈັດ​ຕັ້ງ​ປະຕິບັດ​ວຽກ​ງານ​ໃນ​ຂະ​ແໜງ ຍທຂ ​ໃນ​ຕໍ່ໜ້າ​ໃຫ້ມີ​ຄວາມ​ສອດຄ່ອງ​ຖືກຕ້ອງ ​ແລະຊັດ​ເຈນຂຶ້ນກວ່າເກົ່າ, ຕອບ​ສະໜອງ​ໄດ້​ຕາມ​ຄວາມ​ຮຽກຮ້ອງ​ຕ້ອງ​ການໃນໄລຍະໃໝ່ ​ຂອງ​ພັກເຮົາ, ​ເພື່ອ​ເຮັດ​ໃຫ້ບັນດາ​ຜູ້​ເຂົ້າ​ຮ່ວ​ມມີ​ຄວາມ​ຮັບ​ຮູ້ ​ແລະ ກຳ​ແໜ້ນ​ບັນດາ​ເນື້ອ​ໃນ​ຂອງ​ມະຕິ​ກອງ​ປະຊຸມ​ດັ່ງ​ກ່າວ ນຳ​ເອົາ​ໄປ​ຜັນ​ຂະຫຍາຍ​ເຂົ້າ​ໃນ​ໜ້າ​ທີ່​ວຽກ​ງານ​ທີ່​ຕົນ​ຮັບຜິດຊອບ ໃຫ້ປະສົບຜົນ​ສຳ​​ເລັດ. ​​ໃນ​ຕອນ​ບ່າຍ​ ​ຜູ້​ເຂົ້າ​ຮ່ວມຮັບຟັງການເຊື່ອມຊຶມ ກໍ່ໄດ້​ຄົ້ນຄ້ວາປະ​ກອບ​ຄຳ​ເຫັນ, ຈາກ​ນັ້ນ​ກໍ​ໄດ້​ມີ​ພິທີ​ ມອບ​ບັດ​ສະມາຊິກ​ພັກ​ສົມ​ບູນ​ໃຫ້​ແກ່ ຄະນະ​ປະຈຳ​ພັກ​ກະຊວງ ​ແລະ 14 ​ຮາກ​ຖານ​ພັກອ້ອມຂ້າງກະຊວງ ​ມີ​ທັງ​ໝົດ 351 ສະຫາຍ.

ກອງປະຊຸມ ປຶກສາຫາລື ເພື່ອແກ້ໄຂ ການຈາລະຈອນແອອັດ ໃນນະຄອນຫລວງວຽງຈັນ

ໃນ​ວັນ​ທີ 08 ກໍລະກົດ 2013 ຢູ່​ທີ່​ກະຊວງ ຍທຂ ຫ້ອງ​ປະຊຸ​ມ​ເບີ 1 ​ໄດ້​ຈັດ​ກອງ​ປະຊຸມ ປຶກສາ​ຫາລື ​ເພື່ອ​ແກ້​ໄຂ​ການ​ຈາລະ​ຈອນ​ແອ​ອັດ ​ໃນ​ນະຄ​ອນຫລວງ​ວຽງ​ຈັນ, ​ໂດຍ​ການ​ເປັນ​ປະທານ​ຂອງ​ທ່ານ ທອງ​ວັນ ​ເພັດ​ທະວີ​ແສງ ຮອງ​ຫົວໜ້າ​ກົມ​ຂົນ​ສົ່ງ ກະຊວງ ຍທຂ ​ແລະ ທ່ານ​ ຊາວັດ​ໄຊ ມີ​ພະ​ແນ​ກ ຍທຂ, ຫ້ອງການ ຍທຂ 4 ຕົວ​​ເມືອງ (ຈັນທະ​ບູລີ,​ ສີ​ໂຄດ​ຕະບອງ, ​ໄຊ​ເສດ​ຖາ, ສີ​ສັດຕະ​ນາກ), ​ອພບ ​ແລະ ນາຍບ້ານ ບ້ານສີ​ຫອມ, ບ້ານຂົວ​ຫລວງ,​​ ບ້ານເຈົ້າ​ອານຸ, ບ້ານທົ່ງ​ຕຸ​ມ, ບ້ານໜອງ​ດ້ວງ, ບ້ານໜອງຈັນ, ບ້ານສີ​ເມືອງ, ​ບ້ານໂພນ​ຕ້ອງ, ​ບ້ານໂພນ​ໄຊ, ບ້ານໜອງ​ບອນ, ບ້ານດົງ​ປາ​ລານ, ບ້ານວັດ​ນາກ, ​ບ້ານໂນ​ສີນ​ວນ, ບ້ານສະພານ​ທອງ, ​ບ້ານໂພນ​ປ່າ​ເປົ້າ ​ເຂົ້າ​ຮ່ວມ.  ກອງ​ປະຊຸມ​ນີ້ ທ່ານ ທອງ​ວັນ ​ເພັດ​ທະວີ​​ແສງ ຮອງ​ຫົວໜ້າ​ກົມ​ຂົນ​ສົ່ງ ກະຊວງ ຍທຂ ​ໄດ້​ເວົ້າ​ວ່າ​: ກົມ​ຂົນສົ່ງ ​ໄດ້​ຈັດສັນ​ງົບ​ປະມານ​ຈຳນວນ​ໜຶ່ງ ທີ່​ໄດ້​ຮັບ​ການ​ຊ່ວຍ​ເຫຼືອ​ຈາກ​ທະນາຄານ​ໂລກ ມາ​ປັບປຸງ​ການ​ສັນຈອນ​ທີ່​ແອ​ອັດ ​ແລະ​ແກ້​ໄຂ​ບັນຫາ​ອຸ​ບັດຕິ​ເຫດ​ທາງ​ ຖະໜົນ ຢູ່​ນະຄອນຫລວງ​ວຽງ​ຈັນ ​​ເຊິ່ງ​ໄດ້​ຄົ້ນ​ຄ້ວາ​ວາງ​ແຜນ ​ແລະ ສຶກສາມາ​ແຕ່​ຕົ້ນ​ປີ 2012 ​ໂດຍ​ໄດ້​ປຶກສາ​ຫາລື​ໄປ​ຫລາຍ​ຫລົບ​ຫລາຍ​ຕ່າວ ຮ່ວມ​ກັບ​ນະຄອນຫລວງ​ວຽງ​ຈັນ, ຜູ້​ໃຫ້​ທຶນ ​ແລະ ລັດຖະບານ ​​ປະຈຸ​ບັນ​ໄດ້​ຕົກລົງ​ໃຫ້ ບໍລິສັດ ​ກຣີນ​​ໂຊນ ​ທຣາ​ຟິກ ປະ​ເທດ​ໄທ (Clean zone Traffic Thailand) ​ເປັນ​ຜູ້ ປັບປຸງ​ຈັດ​ສັນ ​ການ​ສັນຈອນ​ຄືນ​ໃໝ່. ການ​ປັບປຸງ​ຄັ້ງ​ນີ້ ຈະ​ກວມ​ເອົາ​ຫລາຍ​ເສັ້ນທາງ​ຄື: 1) ຖະໜົນ ລ້ານ​ຊ້າງ, 2) ຖະໜົນ ​ໄກສອນ ພົມວິຫານ (​ແຕ່​ຄອງ​ສັນຕິພາບ-ດົງ​ໂດກ),​ 3) ຖະໜົນ ​ໂພນ​ຕ້ອງ (​ແຕ່​ອະນຸສາວະລີ-ດົງ​ໂດກ), 4) ຖະໜົນ 23 ສິງຫາ,​ 5) ຖະໜົນ ໜອງ​ບອນ, 6) ຖະໜົນ ອາ​ຊຽນ, 7) ຖະໜົນ ດົງ​ປາຍ​ນາ,​ 8) ຖະໜົນ ສາມ​ແສນ​ໄທ, 9) ຖະໜົນ ​ເຊ​ດຖາ​ທີລາ​​ດ, 10) ຖະໜົນ ກຳແພງ​ເມືອງ    (​ແຕ່ຂົວ​ຮອງ​ແຊງ-​ໄຟ​ແດງ​ໂພນ​ທັນ) 11) ຖະໜົນ ທ່າ​ເດື່ອ (​ແຕ່​ໄຟ​ແດງ​ທາດ​ຂາວ-ວົງວຽນ​ຄ້າຍຈີ່ນາຍ​ໂມ້). ​ໂຄງການ​ດັ່ງກ່າວ ຈະ​ມີ​ການ​ປັບປຸງ​ລະບົບ​ໄຟ​ແດງ​ຢູ່ 5 ​ແຍກ​ໂອ​ດຽນ ​ເພື່ອ​ຮອງ​ຮັບ​ການ​ແລ່ນ​ລົດ 2 ທິດ​ທາງ​ຂອງ​ຖະໜົນ​ສີ​ຫອມ ​ແລະ ຖະໜົນ​ຂົວ​ຫລວງ ​ເພື່ອ​ຊ່ວຍ​ລະບາຍ​ລົດ​ທີ່​ແອ​ອັດ ຢູ່​ບໍລິ​ເວນ​ໄຟ​ແດງ​ໜອງ​ດ້ວງ ​ແລະ ​ໄຟ​ແດງ​ຕະຫລາດທົ່ງ​ຂັນ​ຄຳ (​ເວົ້າ​ລວມຖະໜົນ​ສີ​ຫອມ ​ແລະ​ ຖະໜົນ​ຂົວ​ຫລວງ ຈະ​ກາຍ​ເປັນຖະໜົນ​ເດີນ​ລົດ​ສອງ​ທິດ​ທາງ) ຊຶ່ງ​ໃນ​ນັ້ນ ຈະ​ມີ​ການ​ຕິດ​ຕັ້ງ​ປ້າຍ ຫ້າມ​ຢຸດ, ຫ້າມ​ຈອດ, ວາງ​ຖັງ​ຢາງ​ປລາສະຕິກ​ແລ່ນ​ແບ່ງ​ທິດ​ທາງ​ການ​ສັນຈອນ, ປັບປຸງ ​ແລະ ຕິດ​ຕັ້ງ​ໄຟ​ແດງ​ຄືນ​ໃໝ່ ​ໃຫ້​ສົມ​ຄູ່​ກັບປະລິມານ​ການ​ສັນຈອນ ​ໃນ​ສະພາບ​ປະຈຸ​ບັນ, ນອກຈາກ​ນີ້ ຍັງຈະ​ມີ​ການ​ປັບປຸງ​ລະບົບ​ໄຟ​ແດງ ຢູ່​ບໍ​ລິ​ເວນອານຸສາ​ວະລີ (ສວນ​ປະຕູ​ໄຊ) ທັງ​ສອງ​ສົ້ນ ​ແລະ ຕິດ​ຕັ້ງ​ຖັງ​ຢາງ​ປລາສະຕິກ​ແບ່ງ​ເສັ້ນທາງຢູ່​ຕໍ່ໜ້າ​ຄອງ​ສັນຕິພາບ ​ແລະ ວົງວຽນ 450 ປີ ​ເພື່ອ​ຮອງ​ຮັບ​ການ​​ແລ່ນລົດ​ທິດ​ທາງ​ດຽວ ຂອງ​ຖະໜົນ 23 ສິງຫາ,​ ໜອງ​ບອນ ​ແລະ ຖະໜົນ​ໄກສອນ ພົມວິຫານ ຊຶ່ງຈະ​ເລີ່​ມ​ແຕ່​ແຈ​ກະຊວງ ຍທຂ-​ໄຟ​ແດງ​ໜອງ​ບອນ-ວົງວຽນ 450 ປີ-ຄອງ​ສັນຕິພາບ, ສ່ວນ​ລາຍ​ລະອຽດ ​ແລະ ​ແຜນ​ວາ​ດປັບປຸງ ທິດ​ທາງ​ການ​ເດີນ​ລົດ ຈະ​ໄດ້​ມີ​ການ​ປະກາດ ປະຊາ​ສຳພັນທາງ​ວິທະຍຸ ​ແລະໂທລະພາບ​ຕື່ມ ​ຕາມ​ພາຍຫລັງ.

ທ່ານລັດຖະມົນຕີວ່າການ ກະຊວງ ຍທຂ ເຂົ້າຮ່ວມກອງ ປະຊຸມດ້ານ ການຄົມມະນາຄົມ-ຂົນສົ່ງ ໃນຂົງເຂດ ພາກພື້ນອະນຸແມ່ນ້ຳຂອງ ຄັ້ງທີ 17

ກອງ​ປະຊຸມ​ດ້ານ​ການ​ຄົມມະນາຄົມ-ຂົນ​ສົ່ງ ​ໃນ​ຂົງ​ເຂດ​ພາກພື້ນອະນຸ​ແມ່ນ້ຳຂອງ ຄັ້ງທີ 17 ໄດ້ຈັດຂື້ນທີ່ ໂຮງແຮມດູສິດ, ຈັງຫວັດຊຽງຣາຍ, ໃນວັນທີ 1 ສິງຫາ 2013 ໂດຍແມ່ນ ທະນາຄານພັດທະນາອາຊີ ຮ່ວມກັບ ກະຊວງ ຄົມມະນາຄົມ ແຫ່ງ ຣາຊະອານາຈັກໄທ ເປັນເຈົ້າພາບຈັດກອງປະຊຸມດັ່ງກ່າວ. ເຂົ້າຮ່ວມກອງປະຊຸມໃນຄັ້ງນີ້, ສຳລັບ ສປປ ລາວ ມີ ທ່ານ ສົມມາດ ພົລເສນາ, ລັດຖະມົນຕີວ່າການ ກະຊວງ ໂຍທາທິການ ແລະຂົນສົ່ງ, ນອກຈາກນັ້ນ ຍັງມີ ທ່ານ ຊັດຊາດ ສິດທິພັນ, ລັດຖະມົນຕີວ່າການ ກະຊວງ ຄົມມະນາຄົມ ແຫ່ງ ຣາຊະອານາຈັກໄທ, ທ່ານ ລັດຖະມົນຕີ ຊ່ວຍວ່າການ ກະຊວງ ກໍ່ສ້າງ ສສ ມຽນມາ, ຜູ້ຕາງໜ້າ ຈາກ ກະຊວງ ຄົມມະນາຄົມ ຂົນສົ່ງ ສປ ຈີນ, ສສຫວຽດນາມ ແລະ ກະຊວງ ໂຍທາທິການ ແລະ ຂົນສົ່ງ ແຫ່ງ ຣາຊະອານາຈັກກຳປູເຈຍ, ນອກຈາກນັ້ນ ຍັງມີຜູ້ຕາງໜ້າ ຈາກອົງ ການຮ່ວມມືທາງດ້ານ ເສດຖະກິດກັບ ປະເທດເພື່ອນບ້ານ ແຫ່ງ ຣາຊະອານາຈັກໄທ (NEDA), ເຈົ້າໜ້າທີ່ຮັບຜິດຊອບ ວຽກງານຄົມມະນາຄົມ -ຂົນສົ່ງ ຈາກບັນດາປະເທດອະນຸພາກພື້ນແມ່ນຂອງ (GMS) ແລະ ທະນາຄານພັດທະນາ ອາຊີ. ສຳລັບຈຸດປະສົງ ຂອງກອງປະຊຸມຄັ້ງນີ້, ແມ່ນເພື່ອປຶກສາຫາລືກຳນົດແຜນໂຄງການພັດທະນາພື້ນຖານ ໂຄງລ່າງ ດ້ານຄົມມະນາຄົມຂົນສົ່ງ ຂອງ ບັນດາປະເທດ GMS ແລະ ການສ້າງຕັ້ງສະມາຄົມລົດໄຟ GMS, ນອກຈາກນັ້ນ ທ່ານ ລັດຖະມົນຕີວ່າການ ກະຊວງ ຄົມມະນາຄົມ ຂົນສົ່ງ ໄທ ຍັງໄດ້ຂື້ນລາຍງານ ກ່ຽວກັບແຜນພັດທະນາເສັ້ນທາງລົດໄຟ ຂອງໄທ ແນໃສ່ເຊື່ອມໂຍງ ກັບບັນດາປະເທດເພື່ອນບ້ານຕ່າງໆ.

 

Additional information