ຂ່າວພາຍໃນກະຊວງ

ປະຊຸມປຶກສາຫາລື ສະເໜີຜ່ານຮ່າງແຜນຍຸດທະສາດ ເພື່ອສົ່ງເສີມຄວາມກ້າວໜ້າແມ່ຍິງ ຂະແໜງ ຍທຂ

ວັນ​ທີ 24 ກັນຍາ 2013 ທີ່​ໂຮງ​ແຮມ​ດອນ​ຈັນ ພາ​ເລດ ​ໄດ້​ຈັດ​ກອງ​ປະຊຸມ​ປຶກສາ​ຫາລື ສະ​ເໜີ​ຜ່ານ​ຮ່າງ​ແຜນ​ຍຸດ​ທະ​ສາດ ​ເພື່ອ​ສົ່ງ​​ເສີມ​ຄວາມ​ກ້າວໜ້າ​ຂອງ​ແມ່​ຍິງ ກະຊວງ ຍທຂ ຄັ້ງ​ທີ I (2013-2015), ​ໂດຍ​ການ​ເປັນ​ປະທານ​ຂອງ​ທ່ານ ກິດສະໜາ ຈັນທະ​ວຽງ ຮອງ​ຫົວໜ້າ​ຫ້ອງການ, ຮອງ​ປະທານ​ຄະນະ​ກຳມາທິການ​ ​ເພື່ອ​ຄວາມ​ກ້າວໜ້າ​ຂອງ​ແມ່ຍິງ ກະ​ຊວງ ຍທຂ, ນັບ​ແຕ່​ທ້າຍ ​ເດືອນ ​ມັງກອນ ປີ 2013 ​ເປັນ​ຕົ້ນ​ມາ​ ທະນາຄານ​ພັດທະນາ​ອາຊີ ​ໄດ້​ໃຫ້ການ​ຊ່ວຍ​ເຫຼືອ​ທາງ​ດ້ານ​ວິຊາ​ການ ​ເພື່ອ​ເຊື່ອມ​ສານ​ບົດບາດ​ຍິງ-ຊາຍ ​ແລະ ສ້າງ​ຄວາມ​ເຂັ້ມ​ແຂງ​ໃຫ້​ສາຍ​ໃຍ​ການຈັດ​ຕັ້ງ ຂອງ​ຄະນະ​ກຳ​ມະາທິ ການ ​ເພື່ອ​ຄວາມ​ກ້າວໜ້າ​ຂອງ​ແມ່ຍິງ ຢູ່​ໃນ​ກະຊວງ ຍທຂ, ເຊິ່ງ​ໂຄງການ​ໄດ້​ເລີ່​ມຈັດ​ຕັ້ງ​ປະຕິບັດ ​ໂດຍ​ມີ​ພະ​ແນ​ກສົ່ງ​​ເສີມຄວາມ​ກ້າວໜ້າ​ຂອງ​ແມ່ຍິງ ກະຊວງ ຍທຂ ​ເປັນ​ຜູ້​ຈັດ​ຕັ້ງ​ປະຕິບັດ ​ແລະ ຄະນະ​ກຳມາ​ທິການ ​ເພື່ອ​ຄວາມ​ກ້າວໜ້າ​ແມ່ຍິງ​ກະຊວງ ຍທຂ ​ເປັນ​ຜູ້​ຊີ້​ນຳ. ກອງ​ປະຊຸມ​ໃນ​ຄັ້ງ​ນີ້ ທາງ​ວິຊາ​ການຈະ​ໄດ້​ສະ​ເໜີ​ລາຍ​ລະອຽດ​ຂອງ​ຮ່າງ​ແຜນຍຸດ​ທະ​ສາດ ​ເພື່ອເປັນ​ທິດ​​ໃນ​ການຈັດ​ຕັ້ງ​ປະຕິບັດ​ບົດບາດ​ຍິງ-ຊາຍ ​ໃນ​ກະຊວງ ຍທຂ, ​ແນໃສ່​ເພື່ອ​ຍົກ​ລະດັບ​ຄວາມ​ຊຳ​ນານ​ງານ ​ແລະຄວາ​ມ ສາມາດ​ໃຫ້​ແກ່​ແມ່ຍິງ, ​ໃຫ້​ມີ​ບົດບາດ​ໃນ​ການ​ປະຕິບັດ​ໜ້າ​ທີ່​ວຽກ​ງານ ​ໃນຕຳແໜ່​ງນຳພາ​ ​ແລະ ຕັດສິນ​ບັນຫາ​ຫຼາຍ​ຂື້ນ. ໃນແຜນຍຸດ​ທະ​ສາດ ​​ເພື່ອ​ສົ່ງ​ເສີມ​ຄວາມ​ກ້າວໜ້າ​ແມ່ຍິງ​ກະຊວງ ຍທຂ ປະກອບ​ມີ 5 ​ແຜນ​ງານ ​ດັ່ງ​ນີ້: ​ແຜນ​ງານ​ທີ 1: ​ເພີ່ມ​ຈຳນວນ​ແມ່ຍິງ​ເຂົ້າ​ໃນ ກະຊວງ ຍທຂ, ​ແຜນ​ງານ​ທີ 2: ເພີ່ມ​ຈຳນວນ​ແມ່ຍິງ​ໃນຕຳ​ແໜ່​ງຕັດສິນ​ບັນ​ຫາ ​ແລະ ຍົກ​ສູງ​ພາລະ​ບົດບາດ​ໃນ​ການ​ຕັດສິນ​ບັນຫາ, ​ແຜນ​ງານ​ທີ 3: ປັບປຸງ​ຄວາມ​ອາດ​ສາມາດ ​ແລ​ະ ຄວາມ​ຊຳ​ນານ​ງານ​ຂອງ​ແມ່ຍິງ​ໃນ​ກະຊວງ ຍທຂ, ​ແຜນ​ງານ​ທີ 4: ສ້າງ​ກົນ​ໄກ​ໃນ​ການ​ເຊື່ອມ​ສານ​ບົດບາດ​ຍິງ-ຊາຍ ​ເຂົ້າ​ໃນ​ການວາງ​ແຜນ, ​ແຜນ​ງານ​ທີ 5: ສ້າງ​ລະບົບ​ການ​ປະ​ເມີນ​ຜົນ ​ແລະຕີ​ລາຄາ​ສຳລັບ​ວຽກ​ງານ​ເຊື່ອມ​ສານ​ບົດບາດ​ຍິງ-ຊາຍ.

ກະຊວງ ຍທຂ ຈັດພິທີປະດັບຫລຽນກາ ມິດຕະພາບ

ອົງການ NEDA ປະເທດໄທ ແມ່ນອົງການໜຶ່ງ ທີ່ມີຜົນງານດີເດັ່ນ, ມີຜົນງານຄຸນງາມຄວາມດີ ປະກອບສ່ວນເຫື່ອແຮງ ແລະ ສະຕິປັນຍາຊ່ວຍເຫຼືອວຽກງານ ໃນຂະແໜງໂຍທາທິການ ແລະ ຂົນສົ່ງ ໃນໄລຍະຜ່ານມາ. ຊຶ່ງຜົນງານດັ່ງກ່າວເປັນ ການ ປະກອບສ່ວນອັນສຳຄັນເຂົ້າໃນການ ສ້າງສາພັດທະນາປະເທດ ສາທາລະນະລັດ ປະຊາທິປະໄຕ ປະຊາຊົນລາວ ດັ່ງນັ້ນ ໃນວັນທີ 13 ກັນຍາ 2013 ນີ້ ທີ່ຫ້ອງຮັບແຂກ ຂອງທ່ານລັດຖະມົນຕີວ່າການ ກະຊວງ ຍທຂ ໄດ້ຈັດພິທີປະດັບ ຫລຽນກາ ມິດຕະພາບ ຂອງນາຍົກລັດຖະມົນຕີ ແຫ່ງ ສປປ ລາວ ຂື້ນ, ຕາງໜ້າລັດຖະບານ ໂດຍແມ່ນ ທ່ານ ສົມມາດ ພົລເສນາ ລັດຖະມົນຕີວ່າການ ກະຊວງ ໂຍທາທິການ ແລະ ຂົນສົ່ງ ໃຫ້ກຽດຂື້ນມອບ ແລະ ທ່ານ ອັກຄະສີຣິ ບຸຮະນສີຣິ, ອາດິດ ປະທານອົງການ NEDA ແຫ່ງປະເທດໄທ ເປັນຜູ້ຮັບ.

      ເຂົ້າຮ່ວມໃນພິທີປະດັບຫລຽນກາມິດຕະພາບ ໃນຄັ້ງນີ້ ມີທ່ານລັດຖະມົນຕີຊ່ວຍວ່າການ, ບັນດາທ່ານຫົວໜ້າກົມ, ຮອງກົມ ແລະ ພະນັກງານຂັ້ນສູງ ທີ່ກ່ຽວຂ້ອງຈາກທັງສອງຝ່າຍ ເຂົ້າຮ່ວມຢ່າງພ້ອມພຽງ.

ພິທີເຊັນບົດບັນທຶກຄວາມເຂົ້າໃຈ ໂຄງການນໍ້າປະປາ ແລະສຸຂາພິບານ ຂະໜາດນ້ອຍ ແບບມີສ່ວຮ່ວມ ລະຫວ່າງພາກລັດ ແລະເອກະຊົນໄລຍະ III

ເພື່ອເປັນການປະກອບສ່ວນເຂົ້າໃນ ການພັດທະນາເສດຖະກິດ-ສັງຄົມ ຂອງ ສປປ ລາວ ກໍຄື ເຂົ້າໃນການປັບປຸງຊີວິດ ການເປັນຢູ່ ແລະສຸຂາພິບານ ຂອງປະຊາຊົນ ທີ່ອາໄສຢູ່ໃນພື້ນທີ່ເຄິ່ງຕົວ ເມືອງເຄິ່ງຊົນນະບົດ ຂອງ ສປປ ລາວ ໃຫ້ດີຂື້ນ ໂດຍການເພີ່ມໂອກາດໃນການເຂົ້າເຖິງລະບົບນໍ້າປະປາ ແລະສຸຂາພິບານ ທີ່ສະອາດປອດໄພ.

      ໃນຕອນເຊົ້າວັນທີ 17 ກັນຍາ 2013 ທີ່ຫ້ອງປະຊຸມ ຂອງກົມເຄຫາ-ຜັງເມືອງ ກະຊວງໂຍທາທິການ ແລະຂົນສົ່ງ ໄດ້ມີພິທີເຊັນບົດບັນທຶກຄວາມເຂົ້າໃຈ ໂຄງການນໍ້າປະປາ ແລະສຸຂາພິບານຂະໜາດນ້ອຍ (ມີເຣັບ) ພາຍໃຕ້ເຄື່ອຂ່າຍ ການຮ່ວມມື ລະຫວ່າງພາກລັດ ແລະເອກະຊົນໄລຍະ III. (ຢູ່ແຂວງວຽງຈັນ, ແຂວງບໍລິຄໍາໄຊ ແລະ ແຂວງໄຊຍະບູລີ). ໃຫ້ກຽດເຊັນບົດບັນທຶກໂດຍ ທ່ານ ຄໍາທະວີ ໄທພະຈັນ ຫົວໜ້າກົມເຄຫາ-ຜັງເມືອງ ແລະ ທ່ານ ອາກໂນ ວົງໂຕແບນ ຫົວໜ້າໂຄງການມີເຣັບ.

      ໂຄງການ ນໍ້າປະປາ ແລະສຸຂາພິບານ ຂະໜາດນ້ອຍ (ມີເຣັບ) ໄລຍະ III ຂອງ 3 ແຂວງ ທີ່ກ່າວມາຂ້າງເທິງນັ້ນ ເພື່ອໃຫ້ປະຊາກອນໃນຈໍານວນ 42.000 ຄົນ ທີ່ອາໄສຢູ່ໃນ 7.000 ຄົວເຮືອນ ໃນ ພື້ນທີ່ເຄິ່ງຕົວເມືອງ-ເຄິ່ງຊົນນະບົດ ສາມາດເຂົ້າເຖິງບໍລິການ ນໍ້າປະປາ ແລະສຸຂາພິບານ ໃນຫຼັກສະນະຖືກຕ້ອງຕາມຫຼັກສຸຂະອານາໄມ ແລະມີຄວາມຍືນຍົງ. ເພື່ອເປັນການສະໜັບສະໜູນ ແລະຜັນຂະຫຍາຍ ຕົວແບບ ເຄື່ອຂ່າຍການຮ່ວມມືລະຫວ່າງ ພາກລັດ-ເອກະຊົນ ເຂົ້າໃນ ການພັດທະນາຂະແໜງ ນໍ້າປະປາ ແລະສຸຂາພິບານ ຢູ່ບ່ອນທີ່ມີເງື່ອນໄຂ ທາງດ້ານເສດຖະກິດ-ສັງຄົມ ແລະເພື່ອເປັນ ການພັດທະນາເຕັກໂນໂລຊີ ທີ່ເໝາະສົມສໍາລັບການພັດທະນາລະບົບນໍ້າປະປາ ແລະສຸຂາພິບານ ດ້ວຍຕົ້ນທຶນທີ່ເໝາະສົມ ແລະພາກເອກະຊົນທ້ອງຖິ່ນ ສາມາດເຂົ້າເຖິງໄດ້. ດ້ວຍເຫດນີ້ ກະຊວງ ໂຍທາທິການ ແລະຂົນສົ່ງ ຈຶ່ງໄດ້ຊອກຫາວິທີ ດຶງດູດເອົາ ການລົງທຶນຈາກທຸກແຫຼ່ງ ລວມທັງພາກເອກະຊົນ ເພື່ອພັດທະນາ ພື້ນຖານໂຄງລ່າງລະບົບນໍ້າປະປາ ແລະ ສຸຂາພິບານ ຢູ່ໃນຕົວນ້ອຍ ແລະກຸ່ມບ້ານພັດທະນາທີ່ເກີດຂື້ນໃໝ່. ໂດຍໄດ້ຮັບທຶນສະໜັບສະໜູນ ຈາກສະມາຄົມນໍ້າ ອີລເດີຝຣັ່ງ (ເຊດີຟ). ໂຄງການນໍ້າປະປາ ແລະສຸຂາພິບານ ຂະໜາດນ້ອຍ (MIREP) ພາຍໃຕ້ເຄື່ອຂ່າຍການຮ່ວມມື ລະຫວ່າງພາກລັດ-ເອກະຊົນ ຈຶ່ງໄດ້ຮັບການຈັດຕັ້ງປະຕິບັດທົດລອງ ເລີ່ມແຕ່ທ້າຍປີ 2004 ຫາ ຕົ້ນປີ 2006 ຢູ່ 2 ແຫ່ງຂອງແຂວງວຽງຈັນ. ຜ່ານການທົດລອງໂຄງການ ດັ່ງກ່າວໄດ້ປະສົບຜົນສໍາເລັດ ຢ່າງໜ້າເພິ່ງພໍໃຈ. ທັງນີ້ກໍແມ່ນຍ້ອນມີການປະສານສົບທົບ ແລະຮ່ວມມືກັນຢ່າງໃກ້ຊິດ ລະຫວ່າງ ກົມເຄຫາ-ຜັງເມືອງ ຂອງກະຊວງ ໂຍທາທິການ ແລະຂົນສົ່ງ. ຍ້ອນເຫັນໄດ້ເຖິງຜົນສໍາເລັດດັ່ງກ່າວ. ໂຄງການຈຶ່ງໄດ້ສືບຕໍ່ປະຕິບັດໄລຍະ II ນັບແຕ່ປີ 2007 ຫາ ຕົ້ນປີ 2012 ໂດຍມີການເຂົ້າຮ່ວມສະໜັບສະໜູນ ຂອງຜູ້ໃຫ້ທຶນອື່ນອີກ ເປັນຕົ້ນ ກະຊວງ ການຕ່າງປະເທດ ຝຣັ່ງ, ນະຄອນຫຼວງປາຣີ, ອົງການສະຫະປະຊາຊາດ ເພື່ອການເຄຫາສະຖານ (UN HABITAT). ໂຄງການມີເຣັບ ໄລຍະ II. ໄດ້ຈັດຕັ້ງປະຕິບັດຢູ່ 6 ເມືອງ 2 ແຂວງ ຄື ແຂວງວຽງຈັນ ແລະແຂວງບໍລິຄໍາໄຊ ແລະໄລຍະທີ III ເລີ່ມແຕ່ປີ 2013 ຫາປີ 2017 ເຂົ້າຮ່ວມສະໜັບສະໜູນ ໂຄງການ ເປັນຕົ້ນ ອົງການບໍລິຫານຄຸ້ມຄອງແຫຼ່ງນໍ້າ ເຂດນະຄອນຫຼວງປາຣີ (AESN). ສະມາຄົມ AQUASSISTANCE. ໃນໄລຍະທີ III ນີ້ ໄດ້ມີການຈັດຕັ້ງປະຕິບັດຢູ່ 8 ເມືອງ ຂອງ 3 ແຂວງ ຄື: ແຂວງວຽງຈັນ, ແຂວງບໍລິຄໍາໄຊ ແລະແຂວງໄຊຍະບູລີ.

ກອງປະຊຸມໜ່ວຍງານໂຄງລ່າງພື້ນຖານ ໃນຂະແໜງການ ຍທຂ

ໃນ​ວັນ​ທີ 12 ກັນຍາ 2013 ຢູ່ທີ່ຫ້ອງປະຊູມເບີ 1 ໄດ້ຈັດກອງປະຊູມພື້ນຖານໂຄງລ່າງ ໃນ ຂະແໜງ ຍທຂ ຂື້ນ, ໂດຍການ ເປັນປະທານຂອງທ່ານ ສົມມາດ ພົລເສນາ ລັດຖະມົນຕີວ່າການ ກະຊວງ ໂຍທາທິການ ແລະຂົນສົ່ງ, ທ່ານ ນ. ຢຸນໂກະ ໂຢໂກະຕາ ເອກອັກຄະລັດຖະທູດວິສາມັນ ຍີ່ປູ່ນ ປະຈຳລາວ, ທ່ານ Barend Frielink ຮັກສາການຫົວໜ້າທະນາຄານ ພັດທະນາອາຊີ ADB ປະຈຳລາວ, ທ່ານ ນ. ເຄໂກະ ມີວາ ຫົວໜ້າຫ້ອງການທະນາຄານໂລກ ປະຈຳລາວ ແລະ ມີບັນດາ ຜູ້ແທນຕາງໜ້າຄູ່ຮ່ວມພັດທະນາ ເຊັ່ນ: ໄທ, ຫວຽດນາມ, ສປ ຈິນ, ເກົາຫຼີ, KFW ແລະ ພະນັກ ງານ ວິຊາການທີ່ກ່ຽວ ຂ້ອງເຂົ້າຮ່ວມທັງໝົດ 44 ທ່ານ ຍິງ 9 ທ່ານ ກອງປະຊຸມໃນຄັ້ງນີ້ ແມ່ນເພື່ອທົບທວນການຈັດຕັ້ງປະຕິບັດວຽກງານປະຈຳປີ 2013 ຂອງໜ່ວຍງານໂຄງລ່າງພື້ນຖານ ເຊີ່ງເປັນໜ່ວຍງານຍ່ອຍໜື່ງ ຂອງຂະບວນການໂຕະມົນ.  ໜ່ວຍງານໂຄງລ່າງ ພື້ນຖານນີ້ ຍັງໄດ້ແບ່ງອອກເປັນ 3 ໜ່ວຍງານຍ່ອຍຄື: 1) ໜ່ວຍງານຍ່ອຍ ດ້ານການພັດທະນາໂຄງລ່າງ, 2) ໜ່ວຍງານ ຍ່ອຍດ້ານການພັດທະນາຂົນສົ່ງ ແລະ 3) ໜ່ວຍງານ ຍ່ອຍດ້ານການພັດທະນານ້ຳປະປາ ແລະ ສຸຂະອານາໄມ.          ກອງປະຊຸມ ແມ່ນໄດ້ຮັບຟັງການລາຍງານ ຈາກ ສາມໜ່ວຍງານຍ່ອຍ ກ່ຽວກັບຜົນສຳເລັດ ຂອງການປະຕິບັດວຽກງານ ຂອງຕົນປະຈຳປີ 2013 ແລະ ແຜນການໃນປີ 2014. ຫລັງຈາກນັ້ນ, ຜູ້ແທນທີ່ເຂົ້າຮ່ວມກອງປະຊຸມໄດ້ມີຄຳຄິດຄຳເຫັນ ໃສ່ບາງບັນຫາທີ່ຕ້ອງໄດ້ຮ່ວມກັນແກ້ໄຂ ເຊັ່ນ: ການຄຸ້ມຄອງບົວລະບັດຮັກສາຕາໜ່າງເສັ້ນທາງ, ວິທີການຮັບມືກັບບັນຫາ ໄພທຳມະຊາດ, ການເພີ່ມຂື້ນຂອງຍານພາຫະນະ ແລະ ແກ້ໄຂບັນຫາຈະລາຈອນແອອັດໃນຕົວເມືອງ ແລະ ອື່ນໆ.

Additional information