ກະຊວງ ຍທຂ ຝຶກອົບຮົມບົດບາດຍິງ-ຊາຍ ເຂົ້າໃນຂະແໜງການ ຄັ້ງທີ 3

Details

Published on ສຸກ, 13 ກັນຍາ 2013 04:59

ວັນ​ທີ 10 ຫາ 11 ກັນຍາ 2013 ຢູ່​ທີ່​ຫ້ອງ​ປະຊຸ​ມ​ເບີ 1 ກະຊວງ ຍທຂ ​ໄດ້​ຈັດການ​ຝຶກ​ອົບກ່ຽວກັບ “ການ​ເຊື່ອມ​ບົດບາດ​ຍິງ-ຊາຍ​ເຂົ້າ​ໃນ​ຂະ​ແໜງ​ການ ຍທຂ “ ຄັ້ງ​ທີ 3 ຂື້ນ, ​ໂດຍ​ການ​ເປັນ​ປະທານ​ຂອງ​ທ່ານ ລັດຕະນະມະນີ ຄູນ​ນີວົງ ລັດຖະມົນຕີ​ຊ່ວຍ​ວ່າ​ການ​ກະ​ຊວງ ຍທຂ ທັງ​ເປັນ​ປະທານ ຄະນະ​ກຳມະການ ​ເພື່ອ​ຄວາມ​ກ້າວໜ້າ​ຂອງ​ແມ່ຍິງ​ຂັ້ນກະຊວງ(ຄກມ), ທ່ານ​ ດຣ. ສັນຕິ​ສຸກ ສິມ​ມາລາ​ວົງ, ຫົວໜ້າ​ຫ້ອງການ, ທ່ານ ​ປທ ນ. ສຸລິ​ຄອນ ພົມມະ​ວົງສາ ຮອງ​ອຳນວຍ​ການ​ສູນ​ໃຫ້​ຄຳ​ປຶກສາ​ແມ່ ​ແລະເດັກ (ສປມດ), ທ່ານ ນ. ຈັນ​ດີ ພອນ​ທິບ ຫົວໜ້າ​ກອງ​ເລຂາ ຄະນະ​ກຳມະການ ​ເພື່ອ​ຄວາມ​ກ້າວໜ້າ​ຂອງ​ແມ່ຍິງ​ແຫ່ງ​ຊາດ, ທ່ານ ນ. ຈັນ​ດີ ປັນ​ແກ້ວ ຜູ້​ຊ່ວຍ​ລັດຖະມົນຕີ ຄກມຊ  ພ້ອມ​ດ້ວຍ ຄະນະ​ກົມ, ຄະນະ​ພະ​​ແນ​ກ ທີ່ມາຈາກ​ບັນ​ດາ​ກົມ, ກອງ, ສະພາ, ສະ​ຖາ​ບັນ, ອົງການ, ສູນ​ຝຶກ ​ແລະ ລັດ​ວິ​ສາ​ຫະກິດ​ອ້ອມ​ຂ້າງ​ກະຊວງ​ເຂົ້າ​ຮ່ວມທັງ​ໝົດ 58 ທ່ານ ຍິງ 24 ທ່ານ.

​ເອກະສານ​ທີ່​ມາ​ຝຶກ​ອົບຮົມ​ໃນ​ເທື່ອ​ນີ້​ມີ 7 ບົດຄື: 1 ການ​ເຊື່ອມ​ບົດບາດ​ຍິງ-ຊາຍ​ເຂົ້າ​ໃນ​ທຸ​ກວຽກ​ງານ ຂອງ​ຂະ​ແໜງ​ການ ຍທຂ, - ການ​ວິ​ເຄາະບົດບາດ​ຍິງ-ຊາຍ, 2 ການ​ສ້າງ​ຄວາມ​ເຂັ້ມ​ແຂງ​ໃຫ້​ແກ່​​ແມ່ຍິງ, 3 ການວາງ​ແຜນ​ພັດທະນາທີ່​ເອົາ​ໃຈ​ໃສ່​ບົດບາດ​ຍິງ-ຊາຍ, 4 ຍຸດ​ທະ​ສາດ​ແຫ່ງ​ຊາດ ​ເພື່ອ​ຄວາມ​ກ້າວໜ້າ​ຂອງ​ແມ່ຍິງ​ຄັ້ງ​ທີ 2, - ​ໂຄງ​ຮ່າງ​ການຈັດ​ຕັ້ງ ​ແລະ ພາລະ​ບົດບາດ​ຂອງ ຄກມຊ,  5 ການ​ຕ້ານ​ການ​ໃຊ້​ຄວາມ​ຮຸນ​ແຮງ​ຕໍ່​ແມ່ຍິງ ​ແລະ ​ເດັດ​ນ້ອຍ, ເອກະສານ​ວ່າ​ດ້ວຍ​ການ​ສ້າງ​ຄອບຄົວ, ບ້ານ ​ແລະ​ເມືອງພັດ ທະນາ​ຕິດ​ພັນ​ກັບ ການ​ປະຕິບັດ​ສິ​ດ​ເສ​ລິ​ພາບ​ຍິງ-ຊາຍ ​ແລະ​ປະສະ​ຈາກ​ການ​ໃຊ້​ຄວາມ​ຮຸນ​ແຮງ​ໃນ​ຄອບຄົວ ​ໂດຍ​ສະ​ເພາະ​ຕໍ່​ແມ່ຍິງ ​ແລະເດັກນ້ອຍ, 6 ການ​ເຊື່ອ​ມສານວຽກ​ງານ​ບົດບາດ​ຍິງ-ຊາຍ​ ໃນ​ໂຄງການ​ນ້ຳ​ປະປາ ​ແລະ ສຸຂະ​ອະນາ​ໄມ ຢູ່​ສປປ ລາວ ​ແລະ 7 ​ໂຄງ​ຮ່າງ​ການ​ວິ​ເຄາະ​ບົດບາດ​ຍິງ-ຊາຍ ສຳລັບ​ການ​ຄຸ້ມ​ຄອງ​ສິ່ງ​ແວ​ດລ້ອມ​ຕົວ​ເມືອງ.

ຄະນະນຳກະຊວງ ຍທຂ ເຮັດວຽກຮ່ວມກັບຮອງ ເຈົ້າຄອງ ນະຄອນຫຼວງວຽງຈັນ ແລະ ບັນດາຮອງເຈົ້າແຂວງ ທົ່ວປະເທດ

Details

Published on ພຸດ, 11 ກັນຍາ 2013 01:12

ຢູ່​ທີ່​ຫ້ອງ​ປະຊຸມ​ເບີ 1 ກະ​ຂວງ ຍທຂ ​ໄດ້​ເປີດ​ກອງ​ປະຊຸມ​ລະຫວ່າງຄະນະ​ນຳ​ກະຊວງ ຍທຂ ກັບ ​ຮອງ​ເຈົ້າ​ຄອງ​ນະຄອນຫຼວງ​ວຽງ​ຈັນ ​ແລະ ບັນດາ​ຮອງ​ເຈົ້າ​ແຂວງ​ທົ່ວ​ປະ​ເທດ ຄັ້ງ​ວັນ​ທີ 06 ກັນຍາ 2013 ​ໂດຍ​ການ​ເປັນ​ປະທານ​ຂອງ​ທ່ານ ສົມ​ມາດ ພົລ​ເສນາ ລັດຖະມົນຕີ​ ວ່າການ​ກະຊວງ ຍທຂ ​ແລະ ທ່ານ ລັດຕະນະມະນີ ຄຸນ​ນີວົງ ລັດຖະມົນຕີ​ຊ່ວຍ​ວ່າການ​ກະຊວງ ຍທຂ, ມີ​ທ່ານ​ຮອງ​ເຈົ້າ​ຄອງ​ນະຄອນຫຼວງ​ວຽງ​ຈັນ, ບັນດາ​ຮອງ​ເຈົ້າ​ແຂວງ​ທົ່ວ​ປະ​ເທດ ​ແລະ ບັນດາ​ຫົວໜ້າ​ພະ​ແນ​ກ ຍທຂ ທົ່ວ​ປະ​ເທດ​ເຂົ້າ​ຮ່ວມ​ທັງ​ໝົດ 58 ທ່ານ.  ກອງ​ປະຊຸມ​ດັ່ງກ່າວ​ໄດ້​ຍົກ​ໃຫ້​ເຫັນ​​ເຖິງ​ຜົນງານ​ດ້ານ​ເດັ່ນ​ທີ່​ຍາດ​ມາ​ໄດ້ໃນ​ຕະຫຼອດ​ໄລຍະ​ຜ່ານ​ມາ ​ເຊັ່ນ: ສ້າງ​ສິ່ງອຳນວຍ​ຄວາມ​ສະດວກ​ຕ່າງໆ ​ໃຫ້​ແກ່​ການ​ຄົມມະນາຄົມ​-ຂົນ​ສົ່ງ ​ໃນ​ຂອບ​ເຂດ​ທົ່ວ​ປະ​ເທດ​ໃຫ້​ມີ​ຄວາມ​ລົ່ງລ່ຽນ, ສະດວກ, ປອດ​​ໄພ ​ແລະ ທັນ​ສະ​ໄໝ ​ເປັນ​ກ້າວໆ​ມາ, ​​ເພື່ອປະກອບສ່ວນ​ໃນ​ການ​ສ້າງສາ​ພັດທະນາ​ເສດຖະກິດ-ສັງຄົມຂອງ​ຊາດ ​ແລະ ບັນດາ​ສາ​ເຫດ ​ແລະ ຂໍ້ຄົງຄ້າງ​ທີ່​ຕ້ອງ​ໄດ້​ສຶບຕໍ່​ແກ້​ໄຂ ໂດຍ​ສະພາະ​ແມ່ນບັນຫາ​ຕ່າງໆ ທີ່​ຍັງ​ເປັນສິ່ງ​ທ້າ​ທາຍ​ໃນ​ຂະ​ແໜງ ຍທຂ ​ເປັນ​ຕົ້ນ:

1.​ ຂົງ​ເຂດ​ຂົວ​ທາງ ​ແລະ ກອງ​ທຶນ​ທາງ : - ການ​ຄຸ້ມຄອງ​ເຂດ​ສະຫງວນ​ຂອງ​ທາງ​ຫຼວງ: * ທາງຫຼວງ​ແຫ່ງ​ຊາດ​ກວ້າງ​ເບື້ອງ​ລະ 25 ​ແມັດ ນັບ​ແຕ່​ໃຈກາງ​ທາງ​ອອກ​ໄປ, * ທາງ​ຫຼວງ​ແຂວງ​ກວ້າງ​​ເບື້ອງ​ລະ 15 ​ແມັດ ນັບ​ແຕ່​ໃຈກາງ​ທາງ​ອອກ​ໄປ, * ທາງ​ຫຼວງ​ຂອງ​ເມືອງກວ້າງ​ເບື້ອງ​ລະ 10 ​ແມັດ ນັບ​ແຕ່​ໃຈກາງ​ທາງ​ອອກ​ໄປ, * ທາງ​ຊົນນະບົດກວ້າງ​ເບື້ອງ​ລະ 5 ​ແມັດ ນັບ​ແຕ່​ໃຈກາງ​ທາງ​ອອກ​ໄປ.

2. ຂົງ​ເຂດ​ຂົນ​ສົ່ງ : * ການ​ກະກຽມ​ຂື້ນ​ພາຫະນະ​ໃໝ່, * ການ​ກະກຽມ​ອອກ​ປ້າຍ​ທະບຽນ MGS ​ໃໝ່, * ການ​ແກ້​ໄຂ​ບັນຫາ​ການ​ອະນຸຍາດ​ສ້າງ​ຕັ້ງ​ສະຖານ​ນີລົດ​ໂດຍສານ​ຢູ່​ຕ່າງ​ແຂວງ, * ການ​ແກ້​ໄຂ​ບັນຫາ​ຄວາມ​ບໍ່​ສະດວກ​ຢູ່​ດ່ານ​ສາກົນ​ແຫ່ງ​ຕ່າງ​ໆ, * ການຈັດ​ຕັ້ງ​ຊັ່ງ​ນ້ຳໜັກ​ລົດ​ບັນທຸກ​ຜ່ານ ຂົວ-ທາງ.  

3. ຂົງ​ເຂດ​​ເຄຫາ-ຜັງ​ເມືອງ : * ການ​ປັບປຸງ​ຂໍ້​ຕົກລົງຂອງ​ລັດຖະມົນຕີ​ວ່າການ ສະບັບ​ເລກທີ 7681/ຄຂປກ, ລົງ​ວັນ​ທີ 29/06/2013 ກ່ຽວກັບ​ການ​ຄຸ້ມ​ຄອງ​ການ​ປຸກ​ສ້າງ ​ໃຫ້​ສອດຄ່ອງ​ຕາມ​ທິດສາ​ມສ້າງ.

4. ຂົງ​ເຂດ​ໂຍທາ​ທິການ​ທາງ​ນ້ຳ : * ການ​ແກ້​ໄຂ​ບັນຫາ​ປ້ອງ​ກັນ​ຕະຝັ່ງ​ເຈື່​ອນຮຸນ​ແຮງ.           

5. ຂົງ​ເຂດ​ການບິນ​ພົນລະ​ເຮືອນ : * ການ​ແກ້​ໄຂ​ບັນຫາ​ການ​ອອກ​ອະນຸຍາດ​ປຸກ​ສ້າງ​ອາຄານ ​ໃນ​ບໍລິ​ເວນ​ລັດສະໝີ​ການບິນ​ຂື້ນ-ລົງ​ຂອງ​ເຮື​ອບິນ ຢູ່​ສະໜາມ​ບິນທົ່ວ​ປະ​ເທດ.                     

ກອງ​ປະຊຸມ​ຄັ້ງ​ນີ້ ​ຍັງ​ໄດ້​ປຶກສາ​ຫາລື​ກ່ຽວ​ກັບຍຸດ​ທະ​ສາດ​ການ​ພັດທະນາ​ພື້ນຖານ​ໂຄງ​ລ່າງ​ຄົມມະນາຄົມ (ທາງບົກ, ທາງ​ນ້ຳ, ທາງ​ອາກາດ ​ແລະ​ທາງ​ລົດ​ໄຟ)  ຕາມ​ທິດ​ຫັນ​ເປັນ​ທັນ​ສະ​ໄໝ ສົ່ງ​ເສີມ​ການ​ຜະລິດ​ສິນຄ້າ ​ແລະ​ການ​ເຊື່ອມໂຍງ​ກັບ​ພາກ​ພື້ນ ​ແລະ ສາກົນ ​ໄລຍະ​ໃໝ່ ພ້ອມ​ທັງ​ຄົ້ນ​ຄ້ວາ ປຶກສາ​ຫາລື ​​ເພື່ອ​ຊອກ​ຫາ​ວິທີ​ແກ້​ໄຂ​ບັນຫາ​ຕ່າງໆ ທີ່​ຍັງ​ເປັນ​ສິ່ງ​ທ້າ​ທາຍຂອງ ຂະ​ແໜງ ຍທຂ ​ໃນ​ຂອບ​ເຂດ​ທົ່ວ​ປະ​ເທດ ​ເພື່ອ​ລາຍ​ງານ​ຕໍ່​ກອງ​ປະຊຸມ​ລັດຖະບານ​ເປີດ​ກວ້າງ ປະຈຳ​ປີ 2013.

ສະຫະພັນກຳມະບານ ກະຊວງ ຍທຂ ໄປທັດສະນະສຶກສາ ແລກປ່ຽນບົດຮຽນກັບ ສະຫະພັນກຳມະບານ ກະຊວງ ຄົມມະນາຄົມ-ຂົນສົ່ງ ຢູ່ ສສ ຫວຽດນາມ

Details

Published on ພະຫັດ, 12 ກັນຍາ 2013 03:25

ໂດຍປະຕິບັດຕາມການຕົກລົງເຫັນດີຂອງ ທ່ານລັດຖະມົນຕີວ່າການ ແລະ ໜັງສືເຊີນຂອງປະທານສະຫະພັນກຳມະບານກະຊວງ ຄົມມະນາຄົມ ຂົນສົ່ງ ສສ ຫວຽດນາມ, ຄະນະຜູ້ແທນສະຫະພັນກຳມະບານຂອງກະຊວງໂຍທາທິການ ແລະຂົນສົ່ງ ນຳໂດຍ ສະຫາຍ ແສງດາວວີ ກັດຕິຍະສັກ ຮອງປະທານສະຫະພັນກຳມະບານກະຊວງ ພ້ອມດ້ວຍຄະນະລວມຈຳນວນ 11 ທ່ານ (ປະກອບດ້ວຍ ສະຫະພັນກຳມະບານກະຊວງ, ຮາກຖານ 8 ທ່ານ, ຄະນະຊາວໜຸ່ມກະຊວງ 2 ທ່ານ ແລະ ຄະນະສະຫະພັນແມ່ຍິງກະຊວງ 2 ທ່ານ ) ໄດ້ເດີນທາງໄປທັດສະນະສຶກສາ ແລກປ່ຽນບົດຮຽນກັບ    ສະຫະພັນກຳມະບານກະຊວງ ຄົມມະນາຄົມ ຂົນສົ່ງ ສສ ຫວຽດນາມ ທີ່ ສສ ຫວຽດນາມ.  ແຕ່ວັນທີ  12 - 16/08/2013 ແລະ ປະສົບຜົນສຳເລັດເປັນຢ່າງດີ ດັ່ງມີລາຍລະອຽດລຸ່ມນີ້:

1. ຄະນະຂອງພວກເຮົາ ໄດ້ຮັບການຕ້ອນຮັບຢ່າງອົບອຸ່ນ ແລະ ເອົາໃຈໃສ່ຈາກປະທານ, ຮອງປະທານພ້ອມຄະນະສະຫະພັນ ກຳມະບານກະຊວງ ຄົມມະນາຄົມ ຂົນສົ່ງ ສສ ຫວຽດນາມ ນັບແຕ່ເວລາເດີນທາງໄປເຖິງ ສະໜາມບິນສາກົນໂນ້ຍບາຍ ຕະຫລອດເຖິງ ການທັດສະນະສຶກສາ ແລກປ່ຽນບົດຮຽນ ແມ່ນແບບເພື່ອນສະຫາຍ.
2. ໃນການພົບປະຄັ້ງນີ້ ກ່ອນອື່ນທັງສອງຝ່າຍໄດ້ແຈ້ງສະພາບການເຄື່ອນໄຫວ ກໍຄືພາລະບົດບາດຄວາມຮັບຜິດຊອບໃຫ້ກັນຊາບ ພ້ອມທັງໄດ້ແລກປ່ຽນຄຳຄິດ ຄຳເຫັນ ເພື່ອສືບຕໍ່ເສີມຂະຫຍາຍການພົວພັນ ຮ່ວມມື, ການພົບປະຄັ້ງນີ້ ຫົວໜ້າຄະນະຂອງລາວ     ຍັງໄດ້ນໍາເອົາຄວາມຢື້ຢາມຖາມຂ່າວຂອງ ທ່ານລັດຖະມົນຕີວ່າການ ກະຊວງໂຍທາທິການ ແລະຂົນສົ່ງ ຂອງ ສປປ ລາວ ຝາກເຖິງຄະນະພັກ, ຄະນະນຳກະຊວງ ຄົມມະນາຄົມ ຂົນສົ່ງ ສສ ຫວຽດນາມ.
3. ຕອນແລງຂອງ ວັນທີ 13/08/2013 ຄະນະກຳມະບານຂອງທັງສອງຝ່າຍ ໄດ້ພົບປະຫາລື, ຄົ້ນຄວ້າເຈລະຈາລົງເລິກ ເນື້ອໃນຂອງບົດບັນທຶກການຮ່ວມມື ຢ່າງເປັນເອກະພາບ ແລະ ກໍໄດ້ມີພິທີເຊັນບົດບັນທຶກການຮ່ວມມື ຊື່ງຝ່າຍສະຫະພັນກຳ ມະບານ ກະຊວງ ຍທຂ ລາວ ນຳໂດຍ ທ່ານ ແສງດາວວີ ກັດຕິຍະສັກ ຮອງປະທານສະຫະພັນກຳມະບານ ກະຊວງ ຍທຂ ສປປ ລາວ; ຝ່າຍສະຫະພັນກຳມະບານ ກະຊວງ ຄົມມະນາຄົມ ຂົນສົ່ງ ສສ ຫວຽດນາມ  ນໍາໂດຍ ທ່ານ  ນາງ ຫງຽນທິທູທຸ່ຍ ຮອງປະທານສະຫະພັນກຳມະບານກະຊວງ, ໂດຍໃຫ້ກຽດເຂົ້າຮ່ວມຂອງ ທ່ານ ໂດງາວຽດ ຄະນະພັກ, ກຳມະການສູນກາງ ສະມາພັນແຮງງານ ຫວຽດນາມ, ປະທານສະຫະພັນກໍາມະບານກະຊວງ; ພາຍໃຕ້ບັນຍາກາດ ແຫ່ງຄວາມເຂົ້າອົກເຂົ້າໃຈ ແລະ ເຕັມໄປດ້ວຍຄວາມສາມັກຄີຮັກແພງແບບເພື່ອນສະຫາຍ, ເຊິ່ງມີຜູ້ເຂົ້າຮ່ວມໃນພິທີເຊັນບົດບັນທຶກດັ່ງກ່າວທັງໝົດ ຈຳນວນ 22 ສະຫາຍ (ເນື້ອໃນຂອງບົດບັນທຶກການຮ່ວມມື ໄດ້ຄັດຕິດມາພ້ອມນີ້).
4. ໃນການທັດສະນະສຶກສາ ຄັ້ງນີ້  ຄະນະໄດ້ໄປຢ້ຽມຢາມ  ອະນຸສອນສະຖານ ປະທານ ໂຮ່ຈິມິນ    ທີ່ນະຄອນຫວຼງຮ່າໂນ້ຍ.
5. ຄະນະຂອງພວກເຮົາ ຍັງໄດ້ໄປເຂົ້າຮ່ວມພິທີເປີດກອງປະຊຸມສຳມະນາ ຂອງສະຫະພັນກຳມະບານຄົມມະນາຄົມ ຂົນສົ່ງ ສສ ຫວຽດນາມ ທົ່ວປະເທດ ປະຈຳປີ 2013 ທີ່ ຫ່າຍຟອງແລະ ທ່ຽວຊົມສະຖານທີ່ທ່ອງທ່ຽວຂອງເມືອງ ດັ່ງກ່າວ, ເຂົ້າຊົມການ ແຂ່ງຂັນກິລາບານເຕະມິດຕະພາບຂອງນັກສຳມະນາກອນ ຊຸດສຳມະນາດັ່ງກ່າວ ແລະ ເຂົ້າຮ່ວມງານລ້ຽງທີ່ສະຫະພັນ ກຳມະບານ ເມືອງຫ່າຍຟອງ ຈັດເປັນກຽດແດ່ຄະນະຜູ້ແທນຝ່າຍລາວ ແລະ ຄະນະສະຫະພັນກຳມະບານຄົມມະນາຄົມ ຂົນສົ່ງ ສສ ຫວຽດນາມ.
6. ຜ່ານການໄປທັດສະນະສຶກສາ ແລກປ່ຽນບົດຮຽນ ກັບສະຫະພັນກຳມະບານກະຊວງຄົມມະນາຄົມ ຂົນສົ່ງ ຢູ່ ສສ ຫວຽດນາມ ຄັ້ງນີ້ ເຫັນໄດ້ບົດຮຽນ ໃນການສ້າງຄັງກຳມະບານ ຄື:

- ສະມາຊິກກຳມະບານ ຢູ່ກະຊວງ ຄົມມະນາຄົມ ຂົນສົ່ງ ຢູ່ ສສ ຫວຽດນາມ ເວົ້າສະເພາະ, ເວົ້າລວມ ສະມາຊິກກໍາມະບານຢູ່ ສສ ຫວຽດນາມ ນອກຈາກເກັບເງິນສະຕິ 5,000 ດົງ/ເດືອນ ແລ້ວ ຍັງເກັບພັນທະຕື່ມອີກ, ແຕ່ລະເດືອນສະມາຊິກກຳມະບານ ແຕ່ລະ ສະຫາຍຢູ່ໃນຂົງເຂດບໍລິຫານ ແມ່ນເສຍ 1% ຂອງເງິນເດືອນ, ສຳລັບຂົງເຂດທຸລະກິດ ແມ່ນ 2% ຂອງເງິນເດືອນ.

- ວຽກປົກປ້ອງສິດຜົນປະໂຫຍດອັນຊອບທໍາຂອງສະມາຊິກກໍາມະບານ, ຊາວຜູ້ອອກແຮງງານ ໂດຍສຸມໃສ່ການແກ້ໄຂຄວາມທຸກ ຍາກ, ການຊອກວຽກເຮັດງານທຳ ແລະການສ້າງສີມືແຮງງານ ໃຫ້ມີການພັດທະນາສູງຂື້ນ.

ທ່ານ ລັດຖະມົນຕີວ່າການ ກະຊວງ ຍທຂ ເຂົ້າຮ່ວມກອງ ປະຊຸມ ລັດຖະມົນຕີ ຄົມມະນາຄົມ - ຂົນສົ່ງ ຈີນ-ອາຊຽນ ກ່ຽວກັບການເຊື່ອມໂຍງ ດ້ານຄົມມະນາຄົມ ຂົນສົ່ງ ທີ່ນະຄອນນານນິງ, ສປ ຈີນ

Details

Published on ສຸກ, 06 ກັນຍາ 2013 07:36

ກອງປະຊຸມລັດຖະມົນຕີ ຄົມມະນາຄົມ ຂົນສົ່ງ ຈີນ - ອາຊຽນ ກ່ຽວກັບການເຊື່ອມໂຍງດ້ານຄົມມະນາຄົມ ຂົນສົ່ງ ​ໄດ້​ຈັດ​ຂື້ນ ວັນ​ທີ 02  ກັນຍາ 2013 ທີ່​ໂຮງ​ແຮມ ມາຣີອ໋ອດ, ນະຄອນ​ນານ​ນິງ, ສປ ຈີນ ​ໂດຍ​ການ​ເປັນ​ປະທານ​ຮ່ວມ ລະຫວ່າງ ທ່ານ ຢັງ ຈວນ ຖັງ, ລັດຖະມົນຕີ​ວ່າການ ກະຊວງ ຄົມ​ມະ​ນາຄົມ ຂົນ​ສົ່ງ, ສປ ຈີນ ​ແລະ ທ່ານ ສົມ​ມາດ ພົລ​ເສນາ, ລັດຖະມົນຕີ​ວ່າການ ກະຊວງ ​ໂຍທາ​ທິການ ​ແລະຂົນ​ສົ່ງ, ສປປ ລາວ ທີ່​ຕາງໜ້າ​ໃຫ້​ບັນດາ​ລັດຖະມົ​ນຕີ ຄົມມະນາ​ຄົມ ຂົນ​ສົ່ງ ​ອາຊຽນ, ​ໂດຍ​ມີ​ການ​ເຂົ້າຮ່ວມ ຂອງບັນດາ​ລັດຖະມົນຕີ​ວ່າ​ການ, ລັດຖະມົນຕີຊ່ວຍ​ວ່າການ, ຜູ້ຕາງໜ້າ ​ແລະ ​ເຈົ້າໜ້າທີ່ທີ່​ກ່ຽວຂ້ອງ ຈາກ ກະຊວງ ຄົມມະນາຄົມ ຂົນ​ສົ່ງ ຂອງ​ບັນດາ​ປະ​ເທດອາຊຽນ. ຜ່ານການດໍາເນີນ​ກອງ​ປະຊຸມ​, ທີ່ປະຊຸມໄດ້ເປັນເອກະພາບ ແລະຕົກລົງບັນຫາສຳຄັນ, ໂດຍໄດ້ມີຖະແຫລງ ການຮ່ວມ ຊຶ່ງມີເນື້ອໃນຫຍໍ້ ດັ່ງລຸ່ມນີ້:

1. ກ່ຽວກັບ​ການ​ກຳນົດ​ກົນ​ໄກ​ການ​ປະສານ​ງານດ້ານ​ການ​ຮ່ວມ​ມື​ໃນ​ວຽກງານດັ່ງກ່າວ ລະຫວ່າງ ລັດຖະບານ ສປ ຈີນ ​ແລະ ລັດຖະບານ ບັນດາ​ປະ​ເທດ​ອາຊຽນ, ​ກອງປະຊຸມ​ໄດ້ຕົກລົງ​ເຫັນ​ດີ ​ໃຫ້​ກະຊວງຄົມມະນາຄົມ ຂົນ​ສົ່ງ ຂອງ​ແຕ່ລະ​ປະ​ເທດ ​ຕາງໜ້າຂອງ​ລັດຖະບານ​ຕົນ ​​ເປັນ​ອົງການ​ລະດັບ​ສູງ​ສຸດ​ໃນດຳ​ເນີນ​ກົນ​​ໄກ​ການ​ຮ່ວມ​ມື​ສອງ​ຝ່າຍ ຈີນ - ອາຊຽນ, ​ໂດຍ​ມອບ​ໃຫ້​ເຈົ້າໜ້າທີ່​ອາວຸ​ໂສ ​ເປັນ​ໃຈກາງ​ໃນ​ການ​ປະສານ​ງານ ​ແລະ ປຶກສາ​ຫາລື.
2. ທັງ​ສອງ​ຝ່າຍ ​ເຫັນ​ດີ​ໃຫ້​ມີ​ການ​ສ້າງ​ແຜນຄວາມ​ຕ້ອງການ​ດ້ານ​ການ​ເງິນ ​​ແນ​ໃສ່​ກໍ່ສ້າງ​ພື້ນຖານ​ໂຄງ​ລ່າງ​ການ​ເຊື່ອມ​​ໂຍງ, ​ພ້ອມທັງ ເຫັນ​ດີ​ໃຫ້​ມີການ​ສ້າງ​ແຜນ​ແມ່​ບົດ​ພັດທະນາ​ພື້ນຖານ​ໂຄງ​ລ່າງ​ຄົມມະນາຄົມ ຂົນ​ສົ່ງ ​ໂດຍໃຫ້​ສອດຄ່ອງ​ກັບ​ແຜນ​ເຊື່ອມ​ໂຍງ ຈີນ - ອາຊຽນ.
3. ​​ເຫັນ​ດີ​ໃຫ້ມີ​ການ​ຊຸກຍູ້​ບັນດາ​ວິ​ສາ​ຫະກິດ ​ເຂົ້າຮ່ວມ​ໃນ​ການ​ລົງ​ທຶນ, ກໍ່ສ້າງ ​ແລະ ດຳ​ເນີນບັນດາ​ໂຄງການ​ຕ່າງໆ ໂດຍນຳໃຊ້ເຕັກໂນໂລຊີ ທີ່ທັນສະໄໝໃນການປະຕິບັດ.
4. ຕົກລົງເຫັນດີໃຫ້ນຳໃຊ້ກອງທຶນຮ່ວມມືທາງທະເລ ຈີນ - ອາຊຽນ ເພື່ອນໍາໃຊ້ໃນການສຶກສາ ແລະ ຊຸກຍູ້ການຈັດຕັ້ງປະຕິບັດ ໂຄງການພັດທະນາທ່າເຮືອ ທີ່ຢູ່ໃນແຜນການເຊື່ອມໂຍງ ຈີນ ແລະ ບັນດາປະເທດອາຊຽນ ແນໃສ່ສົ່ງເສີມການຮ່ວມມື ລະຫວ່າງບັນດາເມືອງທ່າເຮືຶອ ແລະ ສົ່ງເສີມການເຊື່ອມໂຍງທາງທະເລ.
5. ເພື່ອສົ່ງເສີມການເຊື່ອມໂຍງດ້ານການບິນພົນລະເຮືອນ, ຜ່ານມາຂໍ້ຕົກລົງວ່າດ້ວຍການຂົນສົ່ງທາງອາກາດລະຫວ່າງ ສປ ຈີນ - ອາຊຽນ ແລະ ອະນຸສັນຍາ1 ກ່ຽວກັບສິດທິທີ 1 ແລະ ທີ 3 ດ້ານການບິນ ແມ່ນໄດ້ລົງນາມ ແລະ ມີຜົນສັກສິດແຕ່ ເດືອນ ສິງຫາ 2012. ດັ່ງນັ້ນ, ຈຶ່ງຕົກລົງເຫັນດີ ໃຫ້ສືບຕໍ່ສູ້ຊົນໃຫ້ໄດ້ລົງນາມ ໃນອະນຸສັນຍາທີ 2 ກ່ຽວກັບສິດທິການບິນທີ 5 ໄວເທົ່າ ທີ່ຈະໄວໄດ້.
6. ເພື່ອເຮັດໃຫ້ການພັດທະນາການເຊື່ອມໂຍງ ຈີນ - ອາຊຽນ ໃຫ້ມີຄວາມໃກ້ຄຽງກັນ ແນໃສ່ຫຼຸດຜ່ອນຄວາມແຕກໂຕນໃນການ ພັດທະນາພື້ນຖານໂຄງລ່າງຂອງບັນດາປະເທດຕ່າງໆ, ກອງປະຊຸມ ໄດ້ຕົກລົງເຫັນດີ ມອບໃຫ້ເຈົ້າໜ້າທີ່ອະວຸໂສຂອງທັງ ສອງຝ່າຍ ຈີນ - ອາຊຽນ ຄົ້ນຄ້ວາກໍານົດບັນດາໂຄງການເຊື່ອມໂຍງທີ່ສໍາຄັນ ລະຫວ່າງຈີນ - ອາຊຽນ ຫຼື ບັນດາປະເທດ ອາຊຽນດ້ວຍກັນ.
7. ໃນຕອນທ້າຍ, ກອງປະຊຸມ  ໄດ້ສະແດງຄວາມຊົມເຊີຍ ມາຍັງກະຊວງ ຄົມມະນາຄົມ - ຂົນສົ່ງ ສປ ຈີນ, ກະຊວງ ການຕ່າງ ປະເທດ ສປ ຈີນ ແລະ ເຂດປົກຄອງຕົນເອງແຂວງກວາງຊີ ທີ່ໄດ້ເປັນເຈົ້າການຈັດກອງປະຊຸມຄັ້ງນີ້, ລວມທັງໃຫ້ການຕ້ອນຮັບ ອັນອົບອຸ່ນແກ່ບັນດາຜູ້ແທນທີ່ເຂົ້າຮ່ວມກອງປະຊຸມ. ກອງປະຊຸມ ຍັງໄດ້ສະແດງຄວາມຂອບໃຈ ຕໍ່ກອງເລຂາອາຊຽນ ທີ່ໄດ້ໃຫ້ ການສະໜັບສະໜູນດ້ານເຕັກນິກຕ່າງໆ ຂອງກອງປະຊຸມ.