ຂ່າວພາຍໃນກະຊວງ

ຜົນສຳເລັດການເຂົ້າຮ່ວມກອງປະຊຸມຖອດຖອນບົດຮຽນ ກ່ຽວກັບວຽກງານການບໍລິການ ສະໜາມບິນ, ການບໍລິການທາງອາກາດ ຢູ່ທີ່ປະເທດຍີ່ປຸ່ນ

ກອງ​ປະຊຸມ​ຖອດ​ຖອນ​ບົດຮຽນ ກ່ຽວ​ກັບ​ວຽກ​ງານ​ການ​ບໍລິການ​ສະໜາມ​ບິນ, ການ​ບໍລິການ​ທາງ​ອາກາດ ລະຫວ່າງ ຄະນະ​ຜູ້​ແທນ​ລາວ ​ແລະ ຄະນະ​ຜູ້​ແທນ​ຝ່າຍ​ຍີ່ປຸ່ນ ​ໄດ້​ຈັດ​ຂື້ນ​ໃນ​ຕອນ​ເຊົ້າ ຂອງ​ວັນ​ທີ 27 ສິງຫາ 2013 ທີ່​ສຳນັກງານ​ໃຫຍ່ ບໍລິສັດ JALUX lnc. ຢູ່ TOKYO ປະ​ເທດ​ຍີ່ປຸ່ນໂດຍ​ຕາງໜ້າ ຝ່າຍ​ລາວ​ແມ່ນ​ທ່ານ ລັດຕະນະມະນີ ຄູນ​ນີວົງ ລັດຖະມົນຕີ​ຊ່ວຍ​ວ່າການ ກະຊວງ ​ໂຍທາ​ທິການ ​ແລະຂົນ​ສົ່ງ ​ແຫ່ງ ສປປ ລາວ ​ແລະ ​ສ່ວນຝ່າຍຍີ່ປຸ່ນ​ ແມ່ນ​ທ່ານ kunio HIRATA ຮອງ​ປະທານ ບໍລິສັດ JALUX lnc. ພ້ອມ​ດ້ວຍ​ຄະນະ​ທັງ​ສອງ​ຝ່າຍ.

​ກອງ​ປະຊຸມ​ຖອດ​ຖອນ​ບົດຮຽນ ​ໃນ​ຄັ້ງ​ນີ້​ໄດ້ປຶກສາ​ຫາລື ກ່ຽວ​ກັບ​ວຽກ​ງານ​ການ​ບໍລິການ​ສະ ໜາມ​ບິນ, ການ​ບໍລິການ​ທາງ​ອາກາດ ​ໂຄງການ​ຂະຫຍາຍ​ອາຄານ ຜູ້​ໂດ​ຍສານ​ສະໜາມ​ບິນ​ສາກົນ​ວັດ​ໄຕ ​ເພື່ອ​ຊຸກຍູ້​ໃຫ້​ຝ່າຍ​ຍີ່ປຸ່ນ ສະໜັບສະໜູນ​ໃຫ້​ໂຄງການ​ນີ້​ປະສົບ​ຜົນສຳ​ເລັດ​ເປັນ​ຢ່າງ​ດີ,​ ທັງ​ສອງ​ບໍລິສັດ​ຂອງ​ຍີ່ປຸ່ນ ​ໃນ​ຖານະ​ເປັນຂາ​ຮຸ້ນ​ຂອງ L-JATS ກໍຍັງມີແຜນການທີ່ຈະຂະຫຍາຍທຸລະກິດ ຢູ່ສະໜາມ​ບິນ​ສາກົນ​ວັດ​ໄຕ ພາຍຫຼັງສຳເລັດໂຄງການຂະຫຍາຍອາຄານ ຜູ້ໂດຍສານສະໜາມບິນ ໃນອານາ​ຄົດອັນໃກ້ນີ້. ນອກຈາກນັ້ນ, ທາງບໍລິສັດ JALUX ຍັງໄດ້ລົງທຶນປູກພຶດກະສິກຳ ຢູ່ແຂວງ ເຊກອງ  ສປປ ລາວ ຈຳນວນໜຶ່ງ. ທ່ານຮອງປະທານ ບໍລິສັດ JALUX ໄດ້ສະເໜີຕໍ່ຫົວໜ້າ ຄະນະຜູ້ແທນລາວ ເພື່ອພິຈາລະນາອະນຸມັດໃຫ້ຝ່າຍຂາຮຸ້ນ ໃນການຮ່ວມທຸລະກິດກັບ L-JATS ເພື່ອຮ່ວມລົງລາຍເຊັນສືບຕໍ່ສັນຍາ ໃນເດືອນກັນຍາ 2013 ທັງນີ້ ກໍເພື່ອໃຫ້ສອດຄ່ອງກັບຂໍ້ກຳນົດຂອງສັນຍາແມ່ສະບັບປີ 1999 ຊຶ່ງຈະໄດ້ແຈ້ງໃຫ້ອີກຝ່າຍໜຶ່ງຊາບກ່ອນ 6 ເດືອນ ກ່ອນທີ່ສັນຍາຈະໝົດວາລະ 5 ປີໃນທ້າຍເດືອນມີນາ 2014 ທີ່​ຈະ​ມາ​ເຖິງນີ້. ນອກຈາກນີ້ຝ່າຍລາວ ກໍໄດ້ສະເໜີໃຫ້ມີການຂະຫຍາຍ ຂອບການຮ່ວມມືເຊັ່ນ: ຂົງເຂດວຽກງານດ້ານການບິນ, ດ້ານການຂົນສົ່ງ ແລະ ອື່ນໆ ເຊິ່ງຝ່າຍຍີ່ປຸ່ນກໍຍິນດີຮັບເອົາຂໍ້ສະເໜີ ເພື່ອພິຈາລະນາໃນຕໍ່ໜ້າ ບໍ່ສະພາະແຕ່ເທົ່ານັ້ນຄະນະຜູ້ແທນລາວ ຍັງໄດ້ເຂົ້າຢ້ຽມຢາມ ກະຊວງທີ່ດິນ, ພື້ນຖານໂຄງລ່າງ ແລະ ການຂົນສົ່ງຂອງຍີ່ປຸ່ນ (MLIY) ຊຶ່ງໃຫ້ການຕ້ອນຮັບໂດຍທ່ານ LAJIYAMA ລັດຖະມົນຕີຊ່ວຍ ວ່າການ ພ້ອມດ້ວຍພະນັກງານຂັ້ນສູງ ຈຳນວນໜຶ່ງ, ທັງສອງຝ່າຍໄດ້ຕີລາຄາສູງຕໍ່ການພົວພັນຮ່ວມມື ລະຫວ່າງສອງລັດຖະບານ ລາວ-ຍີ່ປຸ່ນ ທີ່ຜ່ານມາ ລວມທັງບັນດາໂຄງການທີ່ຈະໄດ້ມີການລົງນາມຊ່ວຍເຫຼືອເພີ້ມເຕີມ ຂອງລັດຖະບານຍີ່ປຸ່ນ ໃຫ້ແກ່ ລັດຖະບານ ສປປ ລາວ ໃນຕໍ່ໜ້າເວົ້າລວມ, ເວົ້າສະເພາະກໍແມ່ນວຽກງານຂະແໜງການ ຍທຂ ຂອງລາວ ປະມານກາງເດືອນ 9 ປີ 2013 ນີ້ ກໍຈະມີການເຊັນບົດບັນທຶກຄວາມເຂົ້າໃຈຢູ່ ນະຄອນຫຼວງວຽງຈັນ ລະຫວ່າງ ຜູ້ຕາງໜ້າລັດຖະບານ ຍີ່ປຸ່ນ ແລະ ລັດຖະບານ ແຫ່ງ ສປປ ລາວ ເພື່ອສຶບຕໍ່ໃຫ້ໂຄງການຊ່ວຍເຫຼືອ ຈຳນວນໜຶ່ງ ຕາມການສະເໜີຂອງຝ່າຍລາວ, ຝ່າຍຍີ່ປຸ່ນຍັງໄດ້ສະເໜີໃຫ້ລັດຖະບານ ລາວ ພິຈາລະນາຕໍ່ອາຍຸສັນຍາຮ່ວມທຸລະກິດ ຂອງພາກສ່ວນທຸລະກິດຍີ່ປຸ່ນ ກັບຝ່າຍລາວ ສຳລັບວຽກງານ ຂອງ L-JATS ໃນຕໍ່ໜ້າ. ແລະໃນວັນຕໍ່ມາຄະນະຜູ້ແທນລາວກໍໄດ້ໄປຢ້ຽມຢາມ ສະໜາມບິນ NARITA ແລະ ສະໜາມບິນ CHUBU ເພື່ອຮັບຟັງການລາຍງານ ສະພາບການຂອງ ການບໍລິການສາຍການບິນຕ່າງໆອີກ​ດ້ວຍ.

ທ່ານ ລັດຖະມົນຕີວ່າການ ກະຊວງ ໂຍທາທິການ ແລະຂົນສົ່ງ ລົງເຄື່ອນໄຫວ ແກ້ໄຂວຽກສຸກເສີນໄພພິບັດນໍ້າປ່າໄຫຼຫຼາກ ແລະ ຝົນຕົກໜັກ ທີ່ ແຂວງອຸດົມໄຊ, ວັນທີ 24-25/08/2013

ທ່ານ ສົມມາດ ພົລເສນາ, ລັດຖະມົນຕີວ່າການ ກະຊວງ ໂຍທາທິການ ແລະ ຂົນສົ່ງ ພ້ອມຄະນະວິຊາການ ຈາກທະນາຄານໂລກ, ກົມຂົວທາງ ແລະ ກົມເຄຫາ-ຜັງເມືອງ ໄດ້ລົງເຄື່ອນໄຫວແກ້ໄຂວຽກງານ ສຸກເສີນເສັ້ນທາງພາຍໃນ ແຂວງອຸດົມໄຊ ຍ້ອນນ້ຳປ່າ ໄຫຼຫຼາກ ແລະ ຝົນຕົກໜັກໃນໄລຍະຫຼາຍ ວັນຕິດຕໍ່ກັນ ຊື່ງເລີ່ມແຕ່ວັນທີ່ 20/8/2013, ອັນໄດ້ສ້າງຄວາມເສຍຫາຍ ຢ່າງຫຼວງຫຼາຍ ແກ່ຊີວິດ ແລະ ຊັບສິນ ຂອງປະຊາຊົນ ທີ່ດຳລົງຊີວິດຢູ່ເຂດເມືອງ ແບງ, ແຂວງອຸດົມໄຊ, ຕະລອດຮອດພື້ນຖານໂຄງລ່າງດ້ານຄົມມະ ນາຄົມ-ຂົນສົ່ງ ແລະ ອື່ນໆ. ຜ່ານການຈັດຕັ້ງປະຕິບັດແກ້ໄຂວຽກສຸກເສີນດັ່ງກ່າວໃນ ຫຼາຍວັນຜ່ານ ມາ, ເຫັນວ່າ ໂດຍລວມ ແມ່ນ ສາມາດແກ້ໄຂໄດ້ໂດຍພື້ນຖານ, ໂດຍ ພະແນກ ຍທຂ ແຂວງອຸດົມໄຊ ໄດ້ເປັນເຈົ້າການຊຸກຍູ້ ໃຫ້ບໍລິສັດກໍ່ ສ້າງແກ້ໄຂດີນເຈື່ອນ, ທໍ່ຫັກ, ທໍ່ຂາດ, ທາງຂາດ, ຂົວຫັກ ແລະຕັດຕົ້ນ ໄມ້ ແລະສີ່ງເສດເຫຼືອອອກຈາກໜ້າທາງ. ມາຮອດປະຈຸບັນ, ສາມາດແກ້ໄຂການສັນ ຈອນໄດ້ໂດຍພື້ນຖານ ສາມາດຮັບປະກັນການຄົມມະນາຄົມ-ຂົນສົ່ງ ກໍຄືການໄປມາໄດ້ຢ່າງຫຼົ່ງຫຼ່ຽນ ເຮັດໃຫ້ພາກລັດ, ເອກະ ຊົນ ແລະນັກທຸລະກິດທັງ ພາຍໃນແຂວງ, ຕ່າງແຂວງ ແລະອົງການຈັດຕັ້ງສາກົນຕ່າງໆ ສາມາດເດີນທາງເຂົ້າໄປໃຫ້ການຊ່ວຍເຫຼືອ ຜູ້ປະສົບເຄາະຮ້າຍໃນຄັ້ງນີ້ຢ່າງທັນການ.
ສຳລັບການແກ້ໄຂວຽກທາງຫຼວງແຫ່ງຊາດ, ທາງວິຊາການພະແນກ ຍທຂ ໂດຍ ສົມທົບກັບຄະນະວິຊາການກົມຂົວທາງ ໄດ້ເປັນ ເອກະພາບໃນ ເບື້ອງຕົ້ນເພື່ອເປັນແນວທາງໃນການຈັດຕັ້ງປະຕິບັດໃນ ຂັ້ນຕໍ່ໄປດັ່ງນີ້:
1. ທາງ​ເລກ 2​W(ເມືອງ​ໄຊ-​ເມືອງ​ແບ​ງ).
ວຽກແກ້ໄຂສຸກເສີນ: ສຶບຕໍ່ຕັກດີນເຈື່ອນອອກຈາກໜ້າທາງ, ຖົມຫີນບາງບ່ອນທີ່ມີຄວາມຈຳເປັນ ພ້ອມທັງເກດອາ ນາໄມໜ້າທາງທີເຫັນວ່າ ມີດີນຕົມຫຼາຍ ເພື່ອຮັບປະກັນຕໍ່ການສັນຈອນ.
ວຽກແກ້ໄຂຫຼັງລະດູຝົນ: ຈຸດຂົວນ້ຳສັດ (ທໍ່ລ່ຽມ5.5x2x2.5 ແມັດ) ທີ່ຫັກນັ້ນ, ຈະໄດ້ສຳຫຼວດອອກແບບ ເປັນທໍ່ລ່ຽມຂະໜາດ 3x3x3 ແມັດ (ຫຼືອາດຈະເຮັດເປັນຂົວຊ່ວງດຽວ), ຈຸດທາງ ເຈື່ອນຍ້ອນນ້ຳແບງກັດເຊາະ ຈະໄດ້ສຳຫຼວດອອກແບບລະອຽດພາຍຫຼັງລະດູຝົນ. ນອກນັ້ນ ກໍ່ຍັງມີຕ້ານ ເຈື່ອນອິກຕື່ມ 25 ຈຸດ.
2. ເສັ້ນທາງເລກທີ່13N:
ຕອນທາງ: ອຸດົມໄຊ ຫາ ນາເຕີຍ:
Ø    ວຽກລະດູຝົນ: ສາມາດແກ້ໄຂຢ່າງທັນການ ເຮັດໃຫ້ການສັນຈອນເປັນປົກກະຕິ.
Ø    ວຽກຫຼັງລະດູຝົນ: ສ້ອມແປງຄືນຈຸດທີ່ເປ່ເພເສຍຫາຍ.
ຕອນທາງ: ອຸດົມໄຊ ຫາ ປາກມອງ:
Ø     ວຽກລະດູຝົນ:ສາມາດແກ້ໄຂຢ່າງທັນການ ເຮັດໃຫ້ການສັນຈອນເປັນປົກກະຕິ.
3. ເສັ້ນທາງ ​ເມືອງໄຊ ຫາ ​ເມືອງງາ.
Ø    ວຽກລະດູຝົນ: ສາມາດແກ້ໄຂຢ່າງທັນການ ເຮັດໃຫ້ການສັນຈອນເປັນປົກກະຕິ.
Ø    ວຽກຫຼັງລະດູຝົນ: ສ້ອມແປງຄືນຈຸດຫົວຂົວ ກມ 14.
4. ທາງຫຼວງທ້ອງຖີ່ນ:
    ວຽກລະດູຝົນ: ໄດ້ມອບໃຫ້ຫ້ອງການ ຍທຂ ເມືອງ ເປັນຜູ້ຈັດຕັ້ງປະຕິບັດ. ມາຮອດປະຈຸບັນ ກຳລັງກະກຽມຈັດຫາຜູ້ຮັບເໜົາ ເຂົ້າດຳເນີນການ. ສຳລັບເສັ້ນທາງ ນາໝໍ້ ຫາ ແມວຈ່າຍ (ເສັ້ນທາງເລກ ທີ່ 1803) ແມ່ນໄດ້ປະຕິບັດຢ່າງຕໍ່ເນື່ອງ ສາມາດເປິດ ການສັນຈອນປົກກະຕິ.

    ໃນໂອກາດນິີ້, ທ່ານ ລັດຖະມົນຕີວ່າການ ກະຊວງ ຍທຂ ຍັງໄດ້ພົບປະກັບ ທ່ານ ເຈົ້າແຂວງແຂວງອຸດົມໄຊ ເພື່ອປຶກສາຫາລື ກ່ຽວກັບການ ແກ້ໄຂວຽກໄພພິບັດດັ່ງກ່າວ, ໂດຍ ກະຊວງ ຍທຂ ຈະສືບຕໍ່ຊີ້ນຳຄະນະວິຊາການທີ່ກ່ຽວຂ້ອງຂອງຕົນ ໂດຍສົມທົບກັບ ພະແນກ ຍທຂ ແຂວງ ແກ້ໄຂສຸກເສີນ ແລະ ສ້ອມແປງໃຫ່ຍພາຍຫຼັງລະດູຝົນ, ພ້ອມທັງກວດກາດ້ານບໍລິມາດວຽກ ແລະ ມູນຄ່າກໍ່ ສ້າງ, ລວມທັງຂື້ນແຜນງົບປະມານ ເພື່ອສະເໜີລັດຖະບານ ແລະ ທະນາຄານໂລກ ພິຈາລະນາແກ້ໄຂ.

ປຶກສາຫາລື ຮ່ວມກັບເຈົ້າໜ້າທີ່ຈາລະຈອນ ເພື່ອແກ້ໄຂ ການຈາລະຈອນແອອັດ ໃນນະຄອນຫລວງວຽງຈັນ

ໃນ​ວັນ​ທີ 14 ສິງຫາ 2013 ຢູ່​ທີ່​ຫ້ອງປະຊຸມ​ຕຳຫຼວດຈາລາຈອນ ນະຄອນຫຼວງ ​ຊັ້ນ​ 5 ​ໄດ້​ຈັດ​ກອງ​ປະຊຸມປຶກສາ​ຫາລື ​ເພື່ອ​ແກ້​ໄຂ​ການ​ຈາລະ​ຈອນ​ແອ​ອັດ ​ໃນ​ນະຄ​ອນຫລວງ​ວຽງ​ຈັນ, ​ໂດຍ​ການ​ເປັນ​ປະທານ​ຂອງ​ທ່ານ ພັທ ຄຳ​ສູຍ ​ແກ້ວ​ມະນີ​ວົງ ຮອງ​ຫົວໜ້າກົມ​ຕຳຫຼວດ ຈາລະ​ຈອນ ນະຄອນຫຼວງ​ວຽງ​ຈັນ, ທ່ານ ພັທ ສະຫຼອງ ​ແສງ​ອາທິດ ຫົວໜ້າຫ້ອງການຕຳຫຼວດ ປກສ ນະຄອນຫຼວງ, ທ່ານ ພັທ ພົມມະຈັນ ສວນ​ບຸນ​ມາ ຫົວໜ້າ​ພະ​ແນ​ກ ຕຳຫຼວດ​ຈາລະ​ຈອນ ນະຄອນຫຼວງ, ທ່ານ ພັຕ ຢຸດ​ຕະພົງ ສຸວັນນະ​ສິງ ຮ​ອງພະ​ແນ​ກ ຈາລະ​ຈອນ ນະຄອນຫຼວງ, ທ່ານ ພັຕ ບຸນ​ມາກ ສູນ​ດາ​​ໃລ ຮອງພະ​ແນ​ກຈາລະ​ຈອນ ນະຄອນຫຼວງ, ພາຍຫຼັງ​ທ່ານປະທານ ​ກ່າວ​ເປີດກອງ​ປະຊຸມ​ແລ້ວ ທ່ານ ສົມ​ນຶກ ​ເມກຕະກຸນ ​ຫົວໜ້າ​ພະ​ແນ​ກ ຄຸ້ມ​ຄອງ​ຈາລະ​ຈອນ ​ແລະ​ ການ​ຂັບ​ຂີ່ ກະຊວງ ຍທຂ ​ໄດ້​ລາຍ​ງານ​ວ່າ : ກົມ​ຂົນສົ່ງ ​ໄດ້​ຈັດສັນ​ງົບ​ປະມານ​ຈຳນວນ​ໜຶ່ງ ທີ່​ໄດ້​ຮັບ​ການ​ຊ່ວຍ​ເຫຼືອ​ຈາກ​ທະນາຄານ​ໂລກ ມາ​ປັບປຸງ​ການ​ສັນຈອນ​ທີ່​ແອ​ອັດ ​ແລະ​ແກ້​ໄຂ​ບັນຫາ​ອຸ​ບັດຕິ​ເຫດ​ທາງ​ຖະໜົນ ຢູ່​ນະຄອນຫລວງ​ວຽງ​ຈັນ ​​ເຊິ່ງ​ໄດ້​ຄົ້ນ​ຄ້ວາ​ວາງ​ແຜນ ​ແລະ ສຶກສາມາ​ແຕ່​ຕົ້ນ​ປີ 2012 ​ໂດຍ​ໄດ້​ປຶກສາ​ຫາລື​ໄປ​ຫລາຍ​ຫລົບ​ຫລາຍ​ຕ່າວ ຮ່ວມ​ກັບ​ນະຄອນຫລວງ​ວຽງ​ຈັນ, ​​ປະຈຸ​ບັນ​ ຜູ້​ໃຫ້​ທຶນ ​ແລະລັດຖະບານ ໄດ້​ຕົກລົງ​ໃຫ້ ບໍລິສັດ ​ແກຣນ​ນິວ​ໂຊນ​ຕັນ​ຟິກ ປະ​ເທດ​ໄທ (Cleanezone Traffie Thalland) ​ເປັນ​ຜູ້ຈັດ​ຕັ້ງ​ປະຕິບັດ​ເພື່ອປັບປຸງ​ຈັດ​ສັນ​ການ​ສັນຈອນ​ຄືນ​ໃໝ່. ການ​ປັບປຸງ​ຄັ້ງ​ນີ້ ຈະ​ກວມ​ເອົາ​ຫລາຍ​ເສັ້ນທາງ​ ຄື: 1) ຖະໜົນລ້ານ​ຊ້າງ, 2) ຖະໜົນໄກສອນ ພົມວິຫານ (​ແຕ່​ຄອງ​ສັນຕິພາບ-ດົງ​ໂດກ),​ 3) ຖະໜົນໂພນ​ຕ້ອງ (​ແຕ່​ອະນຸສາວະລີ-ດົງ​ໂດກ), 4) ຖະໜົນ 23 ສິງຫາ,​ 5) ຖະໜົນໜອງ​ບອນ, 6) ຖະໜົນອາ​ຊຽນ, 7) ຖະໜົນດົງ​ປາຍ​ນາ,​ 8) ຖະໜົນສາມ​ແສນ​ໄທ, 9) ຖະໜົນ​ເຊ​ດຖາ​ທິລາ​​ດ, 10) ຖະໜົນ ກຳແພງ​ເມືອງ    (​ແຕ່ຂົວ​ຮອງ​ແຊງ-​ໄຟ​ແດງ​ໂພນ​ທັນ) 11) ຖະໜົນທ່າ​ເດື່ອ (​ແຕ່​ໄຟ​ແດງ​ທາດ​ຂາວ-ວົງວຽນ​ຄ້າຍຈີ່ນາຍ​ໂມ້). ​ໂຄງການ​ດັ່ງກ່າວ ຈະ​ມີ​ການ​ປັບປຸງ​ລະບົບ​ໄຟ​ແດງ​ຢູ່ 5 ​ແຍກ​ໂອ​ດຽນ ​ເພື່ອ​ຮອງ​ຮັບ​ການ​ແລ່ນ​ລົດ 2 ທິດ​ທາງ​ຂອງ​ຖະໜົນ​ສີ​ຫອມ ​ແລະ ຖະໜົນ​ຂົວ​ຫລວງ ​ເພື່ອ​ຊ່ວຍ​ລະບາຍ​ລົດ​ທີ່​ແອ​ອັດ ຢູ່​ບໍລິ​ເວນ​ໄຟ​ແດງ​ໜອງ​ດ້ວງ ​ແລະ ​ໄຟ​ແດງ​ຕະຫລາດທົ່ງ​ຂັນ​ຄຳ (​ເວົ້າ​ລວມຖະໜົນ​ສີ​ຫອມ ​ແລະ​ ຖະໜົນ​ຂົວ​ຫລວງ ຈະ​ກາຍ​ເປັນຖະໜົນ​​ແລ່ນ​ລົດ​ສອງ​ທິດ​ທາງ) ໃນ​ນັ້ນ ຈະ​ມີ​ການ​ຕິດ​ຕັ້ງ​ປ້າຍ ຫ້າມ​ຢຸດ, ຫ້າມ​ຈອດ, ວາງ​ຖັງ​ຢາງ​ປລາສະຕິກ​ແບ່ງ​ທິດ​ທາງ​ການ​ສັນຈອນ, ປັບປຸງ ​ແລະ ຕິດ​ຕັ້ງ​ໄຟ​ແດງ​ຄືນ​ໃໝ່ ​ໃຫ້​ສົມ​ຄູ່​ກັບປະລິມານ​ການ​ສັນຈອນ ​ໃນ​ສະພາບ​ປະຈຸ​ບັນ, ນອກຈາກ​ນີ້ ຍັງຈະ​ມີ​ການ​ປັບປຸງ​ລະບົບ​ໄຟ​ແດງ ຢູ່​ບໍ​ລິ​ເວນອານຸສາ​ວະລີ (ສວນ​ປະຕູ​ໄຊ) ທັງ​ສອງ​ສົ້ນ ​ແລະ ຕິດ​ຕັ້ງ​ຖັງ​ຢາງ​ປລາສະຕິກ​ແບ່ງ​ເສັ້ນທາງຢູ່​ຕໍ່ໜ້າ​ຄອງ​ສັນຕິພາບ ​ແລະ ວົງວຽນ 450 ປີ ​ເພື່ອ​ຮອງ​ຮັບ​ການ​​ແລ່ນລົດ​ທິດ​ທາງ​ດຽວ ຂອງ​ຖະໜົນ 23 ສິງຫາ,​ ໜອງ​ບອນ, ​ແລະ ຖະໜົນ​ໄກສອນ ພົມວິຫານ ຊຶ່ງຈະ​ເລີ່​ມ​ແຕ່​ແຈ​ກະຊວງ ຍທຂ-​ໄຟ​ແດງ​ໜອງ​ບອນ-ວົງວຽນ 450 ປີ-ຄອງ​ສັນຕິພາບ, ສ່ວນ​ລາຍ​ລະອຽດ ​ແລະ ​ແຜນ​ວາ​ດປັບປຸງ ທິດ​ທາງ​ການ​ເດີນ​ລົດ ຈະ​ໄດ້​ມີ​ການ​ປະກາດ ປະຊາ​ຊຳພັນທາງ​ວິທະຍຸ ​ແລະ ​ໂທລະພາບ​ຕື່ມ​ຕາມ​ພາຍຫລັງ.

ການພົບປະເຮັດວຽກ ລະຫວ່າງ ສອງກະຊວງ ລາວ-ຫວຽດນາມ

ອີງຕາມການຕອບຮັບ ຕາມຄໍາເຊີນຂອງກະຊວງ ໂຍທາທິການ ແລະຂົນສົ່ງ ສປປ ລາວ, ຄະນະຜູ້ແທນ ກະຊວງ ຄົມມະນາຄົມ-ຂົນສົ່ງ ສສ ຫວຽດນາມ ນໍາພາໂດຍ ທ່ານ ເລດີງເທາະ, ລັດຖະມົນຕີຊ່ວຍວ່າການ ກະຊວງ ຄົມມະນາຄົມ-ຂົນສົ່ງ ສສ ຫວຽດນາມ ພ້ອມດ້ອຍຄະນະ ໄດ້ເດີນທາງມາພົບປະ ຢ້ຽມຢາມ ແລະເຮັດວຽກ ກັບ ກະຊວງໂຍທາທິການ ແລະຂົນສົ່ງ ສປປ ລາວ ນໍາໂດຍ ທ່ານ ດຣ ບຸນຈັນ ສິນທະວົງ ລັດຖະມົນຕີຊ່ວຍວ່າການ ໃນລະຫວ່າງວັນທີ 14-16 ສິງຫາ 2013. ເພື່ອປຶກສາຫາລື ກ່ຽວກັບໜ້າວຽກຂອງການຮ່ວມມືທັງສອງກະຊວງ.

      ຜ່ານກອງປະຊຸມພົບປະປຶກສາຫາລື ທັງສອງຝ່າຍໄດ້ຕົກລົງເປັນເອກະພາບກັນຕາມເນື້ອໃນດັ່ງ ນີ້: ໂຄງການກໍ່ສ້າງເສັ້ນທາງ ພູທິດເຜີ້ງ-ນາຊອນ ແຂວງຫຼວງພະບາງ ສປປ ລາວ ຕິດກັບຊາຍແດນ ແຂວງດຽນບຽນຟູ ຂອງ ສສ ຫວຽດນາມ ທີ່ມີຄວາມຍາວ 104.7 ກມ. ພາຍຫຼັງທີ່ໄດ້ຮັບການລາຍງານ ປັບປຸງຄືນຜົນການສໍາຫຼວດ ແລະສຶກສາ ທາງດ້ານເສດຖະກິດ-ເຕັກນິກ ສໍາລັບໂຄງການດັ່ງກ່າວຂອງ TEDI ແລະທັງສອງຝ່າຍ ໄດ້ປຶກສາຫາລື ແລະຕົກລົງ ເປັນເອກກະພາບກັນ ດັ່ງນີ້:

-    ກ່ຽວກັບແລວທາງ ທັງສອງຝ່າຍໄດ້ເປັນເອກະພາບຕາມການລາຍງານຂອງທີ່ປຶກສາ ໂດຍສະເພາະແມ່ນ ໄລຍະຕອນທາງແຕ່ ນາຊອນ-ດ່ານຊາຍແດນ (ຫຼັກໝາຍຊາຍແດນ 144) ອີງຕາມ ການສະເໜີຂອງຝ່າຍລາວ ໃຫ້ປ່ຽນແລວທາງຢູ່ໃກ້ຊາຍແດນ ແລະແລວທາງເວັ້ນຕົວ ເມືອງໂພນທອງ ທາງກະຊວງ ຄົມມະນາຄົມ-ຂົນສົ່ງ ສສ ຫວຽດນາມ ເຫັນດີນໍາການສະເໜີ ແລະມອບໃຫ້ TEDI ສົມທົບກັບ ແຂວງຫຼວງພະບາງ ເພື່ອຄົ້ນຄ້ວາອອກແບບ ແລະປ່ຽນແລວທາງໃຫ້ມີຄວາມເໝາະສົມ ກັບການພັດທະນາຂອງຝ່າຍລາວ ຫຼັງຈາກນັ້ນ ຈຶ່ງລາຍງານຕໍ່ທັງສອງ ກະຊວງ ເພື່ອພິຈາລະນາ.

-    ສອງຝ່າຍເປັນເອກະພາບກັບບົດບັນທຶກ ລະຫວ່າງທັງສອງກະຊວງ ໃນຄັ້ງວັນທີ 16 ພຶດສະພາ 2013.

-    ກະຊວງ ຄົມມະນາຄົມ-ຂົນສົ່ງ ສສ ຫວຽດນາມ ມອບໃຫ້ TEDI ສືບຕໍ່ລົງສໍາຫຼວດເກັບກໍາຂໍ້ມູນ ການສະ ເໜີຂອງ ຝ່າຍລາວ ຄົ້ນຄວ້າຄວາມເປັນໄປໄດ້ຂອງບັນດາໜ້າວຽກ, ໃຫ້ສໍາເລັດ ແລະລາຍງານຕໍ່ທັງສອງກະຊວງ ກ່ອນວັນທີ 15 ຕຸລາ 2013.

ໂຄງການທາງ ຊຽງຂວາງ-ຫົວພັນ-ແທງຮ້ວາ:

-    ທັງສອງຝ່າຍເປັນເອກະພາບມອບໃຫ້ TEDI ແລະ LTEC ສົມທົບກັບພະແນກ ໂຍທາທິການ ແລະຂົນສົ່ງ ແຂວງຊຽງຂວາງ ແລະແຂວງຫົວພັນ ດໍາເນີນການສໍາຫຼວດແລວທາງ ແລະເກັບກໍາຂໍ້ມູນເບື້ອງຕົ້ນ. ສ່ວນງົບປະມານ ຄ່າສໍາຫຼວດແມ່ນໃຫ້ນໍາໃຊ້ງົບປະມານຂອງສອງກະຊວງ ພ້ອມດຽວກັນນີ້ໃຫ້ຄົ້ນຄວ້າ ຈັດລຽງບູລິມະສິດຕອນທາງໃດ ຈະກໍ່ສ້າງກ່ອນ ພ້ອມທັງຄິດໄລ່ງົບປະມານການກໍ່ສ້າງໃຫ້ເລັດພາຍໃນເດືອນ 10/2013 ເພື່ອສະເໜີຕໍ່ກະຊວງ ພິຈາລະນາ ແລ້ວລາຍງານໃຫ້ລັດຖະບານ ຂອງສອງປະເທດ.

-    ກ່ຽວກັບວຽກສໍາຫຼວດອອກແບບຕອນທາງແຕ່ ທ່າເຫຼົ້າ-ຊໍາໃຕ້ 67 ກມ ທີ່ແຂວງໄດ້ຕົກລົງໃຫ້ບໍລິສັດສໍາຫຼວດອອກ ແບບແລ້ວນັ້ນ. ມອບໃຫ້ພະແນກ ຍທຂ ແຂວງຫົວພັນ ແລະພາກສ່ວນກ່ຽວຂ້ອງ ສົມທົບກັບ TEDI ແລະ LTEC ເພື່ອປຶກສາຫາລືກັນແກ້ໄຂດ້ວຍວິທີການທີ່ເໝາະສົມ ແລ້ວລາຍງານ ຂໍຄໍາເຫັນຕໍ່ການນໍາຂອງແຂວງ ແລະກະຊວງ.

-    ການຊີ້ນໍາການຈັດຕັ້ງປະຕິບັດຕົງຈິງ ດ້ານວິຊາການທັງສອງ ກະຊວງເປັນເອກະພາບ ມອບໃຫ້ກົມແຜນການ-ການ ລົງທຶນ ຝ່າຍຫວຽດນາມ ແລະກົມຂົວທາງ ຝ່າຍລາວ ເປັນຜູ້ປະສານງານກ່ຽວກັບໂຄງການນີ້ໃຫ້ແກ່ສອງກະຊວງ.

ກ່ຽວກັບວຽກງານຍົກລະດັບເວັບໄຊ໌ ແລະຂ່າວສານຂອງກະຊວງ:

ອີງຕາມການສະເໜີຂອງຝ່າຍລາວ ທາງກະຊວງຄົມມະນາຄົມ-ຂົນສົ່ງ ສສ ຫວຽດນາມ ຈະເຮັດຈົດໝາຍເຊີນທາງ ກະຊວງໂຍທາທິການ ແລະຂົນສົ່ງ ສປປ ລາວ ໄປແລກປ່ຽນບົດຮຽນ ແລະຝຶກອົບຮົມ ກ່ຽວກັບວຽກງານຂ່າວສານ ຂອງກະຊວງ ຄົມມະນາຄົມ-ຂົນສົ່ງ ສສ ຫວຽດນາມ ເພື່ອເປັນພື້ນຖານໃນການພັດທະນາຂໍ້ມູນຂ່າວສານ ຂອງຝ່າຍ ລາວ. ກະຊວງຄົມມະນາຄົມ-ຂົນສົ່ງ ສສ ຫວຽດນາມ ມອບໃຫ້ຫ້ອງການກະຊວງ ແລະສູນຂໍ້ມູນຂ່າວສານ, ກົມພົວພັນ ຕ່າງປະເທດ ເປັນຜູ້ປະສານງານ ທາງດ້ານເນື້ອໃນລາຍລະອຽດ. ກໍານົດວັນເວລາແມ່ນໃນເດືອນ 10/2013 ສໍາລັບ ທາງດ້ານອຸປະກອນຕ່າງໆ ກະຊວງຄົມມະນາຄົມ-ຂົນສົ່ງ ສສ ຫວຽດນາມ ໄດ້ມອບໃຫ້ບໍລິສັດ CIENCO1 ເປັນຜູ້ຮັບ ຜິດຊອບຈັດຊື້ໃຫ້ ທາງກະຊວງໂຍທາທິການ ແລະຂົນສົ່ງ ສປປ ລາວ ໃນປີ 2013 ນີ້.

      ກ່ຽວກັບການຊ່ວຍເຫຼືອ ທາງດ້ານລະບົບ ກວດກາຄຸນະພາບຍານພາຫະນະຂົນສົ່ງ ແລະການຂື້ນທະບຽນຂອງຝ່າຍລາວ:

     ທັງສອງກະຊວງເປັນເອກະພາບ ມອບໃຫ້ກົມກວດກາເຕັກນິກ ເປັນເຈົ້າການ, ສ່ວນກົມພົວພັນຕ່າງປະເທດ ເປັນ ຜູ້ປະສານງານ ກັບກະຊວງໂຍທາທິການ ແລະຂົນສົ່ງ ສປປ ລາວ ເພື່ອນໍາສະເໜີ ແລະວິທີການໃນການຊ່ວຍເຫລືອ ສ້າງລະບົບກວດກາຄຸນນະພາບຍານພາຫະນະຂົນສົ່ງໃຫ້ແກ່ຝ່າຍລາວ.

      ກ່ຽວກັບໂຄງການເພີ້ມທະວີຄວາມປອດໄພ ແລະວຽກງານຄຸ້ມຄອງການຂົນສົ່ງທາງບົກ ລະຫວ່າງ ລາວ-ຫວຽດນາມ:

     ທັງສອງຝ່າຍເປັນເອກະພາບກັບບົດສຶກສາໂຄງການໃນເບື້ອງຕົ້ນ. ກະຊວງຄົມມະນາຄົມ-ຂົນສົ່ງ ສສ ຫວຽດນາມ ມອບໃຫ້ກົມໃຫຍ່ທາງບົກ ສສ ຫວຽດນາມ ເປັນເຈົ້າການຈັດຕັ້ງປະຕິບັດ, ສ່ວນກົມພົວພັນຕ່າງປະເທດ ເປັນຜູ້ປະສານ ງານກັບ ກົມຂົນສົ່ງ ຝ່າຍລາວ ແລະບັນດາໝ່ວຍງານ ທີ່ກ່ຽວຂ້ອງຂອງຝ່າຍ ລາວ, ສ້າງແຜນການຂື້ນແຜນງົບປະມານ ແລະຮີບດ່ວນຄົ້ນຄ້ວານໍາສະເໜີລາຍງານຄວາມຄືບໜ້າ ເພື່ອນໍາໄປລາຍງານ ໃນວາລະກອງປະຊຸມປະຈໍາປີ 2013 ຂອງສອງກະຊວງ.

      ແລະບັນຫາອື່ນໆ:

     ກ. ການແລກປ່ຽນບົດຮຽນກ່ຽວກັບການຄຸ້ມຄອງ ແລະບູລະນະຮັກສາທາງບົກ:

     ທັງສອງຝ່າຍໄດ້ເປັນເອກະພາບກັນ ຈະເພີ້ມທະວີການແລກປ່ຽນບົດຮຽນກ່ຽວກັບວຽກງານດັ່ງກ່າວ ໂດຍໃຫ້ຝ່າຍ ລາວ ຈະແຕ່ງຕັ້ງໜ່ວຍງານວິຊາການ ໄປຖອດຖອນບົດຮຽນນໍາຝ່າຍ ຫວຽດນາມ, ກະຊວງ ຄົມມະນາຄົມ-ຂົນສົ່ງ ສສ ຫວຽດນາມ ມອບໃຫ້ກົມໃຫຍ່ທາງບົກ ຫວຽດນາມ ເປັນເຈົ້າການກ່ຽວກັບວຽກງານນີ້, ສ່ວນຝ່າຍລາວແມ່ນມອບໃຫ້ ກົມຂົວທາງ.

      . ກ່ຽວກັບການຮ່ວມມືລະຫວ່າງ TEDI ແລະ LTEC ມອບໃຫ້      TEDI ເປັນຜູ້ສ້າງແຜນການ-ການຮ່ວມມື ໃນການແລກປ່ຽນບົດຮຽນ, ບໍາລຸງກໍ່ສ້າງບຸກຄະລາກອນຊ່ວຍ LTEC.

      . ບົນພື້ນຖານການຮ່ວມືລະຫວ່າງສອງກະຊວງ ທັງສອງຝ່າຍເປັນເອກະພາບຊີ້ນໍາບັນດາພະແນກ ຍທຂ ປະຈໍາ ແຂວງ ຂອງທັງສອງປະເທດ ທີ່ມີຊາຍແດນຕິດຈອດກັນ ເພີ້ມທະວີການຮ່ວມມືໃຫ້ແໜ້ນແຟ້ນຂື້ນຕື່ມ ໃນຂະແໜງການ ຄົມມະນາຄົມ-ຂົນສົ່ງ ຂອງສອງປະເທດ.

      ໃນໂອກາດທີ່ໄດ້ມາຢ້ຽມຢາມ ແລະເຮັດວຽກໃນຄັ້ງນີ້ ທ່ານ ເລດີງເທາະ ລັດຖະມົນຊ່ວຍວ່າການ ກະຊວງ ຄົມມະນາຄົມ-ຂົນສົ່ງ ສສ ຫວຽດນາມ ກໍໄດ້ເຂົ້າພົບປະກັບທ່ານ ສົມມາດ ພົລເສນາ ລັດຖະມົນຕີວ່າການ ກະຊວງ ໂຍທາທິການ ແລະຂົນສົ່ງ ສປປ ລາວ ເພື່ອຢ້ຽມຢາມຖາມຂ່າວ.

Additional information