ຂ່າວພາຍໃນກະຊວງ

ນຳສະເໜີຮ່າງແຜນຍຸດທະສາດເບື້ອງຕົ້ນ ເພື່ອສົ່ງເສີມຄວາມ ກ້າວໜ້າ ຂອງແມ່ຍິງ ກະຊວງ ຍທຂ

​ໃນ​ວັນ​ທີ 24 ມິ​ຖຸນາ 2013 ທີ່​ຫ້ອງ​ປະຊຸມ​ເບີ 1 ກະຊວງ ຍທຂ ​ໄດ້​ຈັດ​ກອງ​ປະຊຸມ​ປືກສາ​ຫາລື ນຳ​ສະ​ເ​ໜີຮ່າງ​ແຜນ​ຍຸດ​ທະ​ສາດ​ເບື້ອງ​ຕົ້ນ ​ເພື່ອ​ສົ່ງ​ເສີມ​ຄວາມ​ກ້າວໜ້າ​ຂອງ​ແມ່​ຍິງ ກະຊວງ ຍທຂ,​ ​ໂດຍ​ການ​ເປັນ​ປະທານ​ຂອງ​ທ່ານ ລັນ ​ແສງ​ອາພອນ ຄະນະ​ພັກ​ກະຊວງ, ຫົວໜ້າ​ກົມ​ຈັດ​ຕັ້ງ-ພະນັກງານ,​ ທ່ານ ກິດສະໜາ ຈັນທະ​ວຽງ ຮອງ​ຫົວໜ້າ​ຫ້ອງການ ກະຊວງ ຍທຂ,​ ມີ​ຄະນະ​ກຳມະການ ​ເພື່ອ​ຄວາມ​ກ້າວໜ້າ​ຂອງ​ແມ່ຍິງ​ ກະຊວງ ຍທຂ, ມີ​ຄະນະ​ປະສານ​ງານ ​ເພື່ອ​ຄວາມ​ກ້າວໜ້າ​ຂອງ​ແມ່ຍິງ​ຂັ້ນ​ກົມ ຊ່ຽວຊານປະຈຳ​ໂຄງການ ​ເຂົ້າ​ຮ່ວມ​ທັງ​ໝົດ 48 ທ່ານ.

      ​ໂຄງການ​ດັ່ງ​ກ່າວ​ແມ່ນໄດ້​ໃຫ້ການ​ຊ່ວຍ​ເຫຼືອ ທາງ​ດ້ານ​ວິຊາ​ການ ຈາກທະນາຄານ​ພັດທະນາ​ອາຊີ ​ເພື່ອ​ເຊື່ອມ​ສານ​ບົດບາດ​ຍິງ-ຊາຍ ​ແລະ ສ້າງ​ຄວາມ​​ເຂັ້ມ​ແຂງ​ໃຫ້​ສາຍ​ໃຍ ການ​ຈັດ​ຕັ້ງ​ຂອງ​ຄະນະ​ກຳມະການ​ ຢູ່​ໃນ​ກະຊວງ ​ໂຍທາ​ທິການ ​ແລະ ຂົນ​ສົ່ງ. ມາ​ຮອດ​ປະຈຸ​ບັນ ​ໂຄງການ​ໄດ້​ຈັດ​ກອງ​ປະຊຸມ​ຫລາຍ​ຄັ້ງ ​ແລະ ສຳພາດ​ຫລາຍ​ພາກສ່ວນ ​ເພື່ອ​ໄຈ້​ແຍກ​ປະ​ເດັນ ອຸປະສັກ ​ແລະ ປະ​ເມີນ​ຄວາມ​ຕ້ອງການ ​ໃນ​ການ​ເຊື່ອມ​ສານ​ບົດບາດ​ຍິງ-ຊາຍ ​ໃນ​ກະຊວງ ຍທຂ. ​​ໂດຍອີງ​ໃສ່​ບັນດາ​ເປົ້າ  ໝາຍ​ລວມຂອງ​ແຜນ​ຍຸດ​ທະ​ສາດ​ແຫ່ງ​ຊາດ ​ກະຊວງ ຍທຂ ຂອງ​ພວກ​ເຮົາ ຈະ​ຕ້ອງ​ສູ້​ຊົນ ​ໃຫ້​ມີ ພະນັກງານ​ເພດ​ຍິງ​ຢ່າງ​ໜ້ອຍ 30%,  ​ແລະ​ມີ​ເອື້ອຍ​ນ້ອງ​ແມ່ຍິງ ບັນຈຸ​ຢູ່​ໃນ​ຕຳ​ແໜ່​ງພະນັກງານ​ນຳພາຢ່າງ​ໜ້ອຍ 15% ​ແຕ່​ພວກ​ເຮົາ​ກໍ​ເຂົ້າ​ໃຈ​ກັນ​ແລ້ວ​ວ່າ ສິ່ງ​ເຫຼົ່າ​ນີ້ ບໍ່​ແມ່ນ​ຈະ​ສາມາດ​ເກີດ​ຂື້ນ​ໄດ້​ໃນ​ໄວໆ​ນີ້ ​ຊຶ່ງ​ຈະ​ຕ້ອງ​ໃຊ້​ເວລາ ​ປະສົບ​ການ, ຄວາມ​ສາມາດ ແລະ​ ເຫື່ອ​ແຮງ​ຂອງ​ພວກ​ເຮົາ ​ເພື່ອ​ເຮັດ​ໃຫ້​ເປັນ​ຈິງ​ໄດ້, ​ເພື່ອ​ບັນລຸ​ເປົ້າ​ໝາຍນີ້, ພວກ​ເຮົາ​ຈຳ​ເປັນ​ຕ້ອງ​ມີ​ແຜນ​ໜ້າ​ວຽກ ​ແລະ​ແຜນ​ຍຸດ​ທະ​ສາດ. ​ໃນ​ການ​ກຳນົດ​ຕຳ​ແໜ່​ງຕ່າງໆ ທີ່​ເໝາະ​ສົມ​ສຳລັບ​ເພດ​ຍິງ ​ແລະ​ແຜນການ​ສົ່ງ​ເສີມ​ແມ່ຍິງ​ສະ​ເພາະ ຈະ​ຕ້ອງ​ໄດ້​ປືກສາ​ຫາລື ກັບ​ຄະນະ​ປະສານ​ງານ ​ເພື່ອ​ຄວາມ​ກ້າວໜ້າ​ຂອງ​ແມ່ຍິງ​ຂັ້ນ​ກົມ,​ ກອງ ​ແລະ ຄະນະ​ນຳ​ຂອງ​ແຕ່​ລະ​ຂັ້ນ, ອີກ 3 ​ເດືອນ ຂ້າງ​ໜ້າ​ນີ້. ພາຍຫລັງ​ທີ່​ມີແຜນ​ຍຸດ​ທະ​ສາດ​ດັ່ງກ່າວ​ແລ້ວ ຈະ​ເປັນ​ສິ່​ງອຳນວຍຄວາມ​ສະດວກ ​ແລະ ​ເປັນ​ທິດ​ທາງ​ໃຫ້​ແກ່​ຄະນະ​ປະສານ​ງານ​ ເພື່ອ​ສົ່ງ​ເສີມ​ຄວາມ​ກ້າວໜ້າ​ແມ່​ຍິງ ແຕ່​ລະ​ກົມ​ໃນ​ການ​ດຳ​ເນີນ​ງານ​ວຽກ​ສົ່ງ​ເສີມ ຄວາມ​ກ້າວໜ້າ​ແມ່ຍິງ​ຂອງ​ຕົນ​ໄດ້.

ກະຊວງ ຍທຂ ເປີດພິທີ ນໍາໃຊ້ ກາສັນຍາລັກໃໝ່ຂອງຕົນ

ໃນວັນທີ 14 ມິຖຸນາ 2013 ຢູ່ທີ່ຫ້ອງປະຊຸມເບີ 1 ກະຊວງ ຍທຂ ໄດ້ມີພິທີເປີດການນໍາໃຊ້ກາສັນຍາລັກໃໝ່ ຂອງ ກະຊວງຂຶ້ນຢ່າງເປັນທາງການ. ໂດຍການໃຫ້ກຽດເຂົ້າຮ່ວມຂອງ ທ່ານ ສົມມາດ ພົລເສນາ ລັດຖະມົນຕີວ່າການ ກະຊວງ,  ມີບັນດາທ່ານຫົວໜ້າກົມ, ຮອງກົມ ຫົວໜ້າສະຖາບັນ, ປະທານສະພາວິທະຍາສາດ ເຕັກໂນໂລຊີ, ຫົວໜ້າກອງ, ຫົວໜ້າສູນ, ຜູ້ຕ່າງໜ້າສາມອົງການຈັດຕັ້ງມະຫາຊົນ ແລະ ຄະນະອໍານວຍການລັດວິສາຫະກິດ ອ້ອມຂ້າງກະຊວງ ເຂົ້າຮ່ວມຢ່າງ ພ້ອມພຽງ.

ໃນວາລະໂອກາດນີ້ ທ່ານ ດຣ ສັນຕິສຸກ ສິມມາລາວົງ, ຫົວໜ້າຫ້ອງການກະຊວງ ຍທຂ ກ່າວວ່າ: “ ການຄົ້ນ​ຄ້ວາ​ອອກແບບເຄື່ອງໝາຍ​ຂອງ​ກະຊວງ ອອກ​ມາ​ເປັນ​ສັນຍາ​ລັກ( Logo ) ກະຊວງ ຍທຂ, ບົນຈິດໃຈຄຳຂັວນ ຂອງ ກະຊວງ ທີ່ວ່າ “ ບຸກທະລຸ​ເປັນ​ປາຍ​ແຫລມ​ ທີ່​ລົ່ງ​ລຽນ, ສະດວກ, ປອດໄພ, ທັນ​ສະ​ໄໝ​, ​ໂປ່​ງ​ໃສ ​ເພື່ອ​ປະຕິບັດ 2 ໜ້າ​ທີ່ຍຸດ​ທະ​ສາດ ​ແລະ ​ເຊື່ອມ​ຈອດກັບອະນຸ​ພາກພື້ນ ”,”.

ຫ້ອງການໄດ້ມອບໃຫ້ ບໍລິສັດ ບູກັຣສ (Blue Grass) ​ເປັນ​ຜູ້ຊ່ວຍອອ​ກແບບ ເຊິ່ງໄດ້ເລີ່ມມາແຕ່ຕົ້ນປີ 2012 ແລະ ກອງປະຊຸມຄະນະ​ນຳ​ກະຊວງ​​ ໄດ້ຕົກລົງ​ເປັນ​ເອກະ​ພາບ​ຮັບຮອງ​ເອົາແບບເຄື່ອງໝາຍຂອງກະຊວງນີ້ ໃນວັນທີ 17/05/2013 ທີ່ຜ່ານມາ.

ເວົ້າລວມແລ້ວ ເຄື່ອງໝາຍໃໝ່ຂອງກະຊວງໂຍທາທິການ ແລະ ຂົນສົ່ງ ໄດ້ຄິດຄົ້ນອອກແບບ ແມ່ນໄດ້ອີງໃສ່ແນວຄິດ ລະຫວ່າງ ຄວາມທັນສະໄໝໃໝ່ ປະສົມປະສານກັບສີສະເພາະຂອງກະຊວງ, ເຊິ່ງໄດ້ຖືກນຳໃຊ້ ແລະ ຄຸ້ນເຄີຍກັບສາຍ ຕາຂອງສັງຄົມ ໃນ ສປປ ລາວ ມີລັກສະນະດັ່ງນີ້:

  ເຄື່ອງໝາຍປະກອບດ້ວຍດັ່ງນີ້:

    -     ເປັນຮູບວົງຮູບໄຂ່ ທີ່ມີພື້ນເປັນສີເຫຼືອງ, ໝາຍເຖິງວຽກໂຍທາ​ທິການ ​ໂດຍລວມ ນັບທັງວຽກຂົວທາງ, ເຄຫາ, ຂົນສົ່ງ ປະເພດຕ່າງໆ  ມີໂຕໜັງສືຢູ່ໃຈກາງຂອງເຄື່ອງໝາຍ ຂຽນເປັນພາສາລາວວ່າ “ຍທຂ” ຢູ່ເທິງ ແລະ ພາສາ ອັງກິດວ່າ  “ PWT ” ຢູ່ລຸ່ມເປັນໜັງສືສີດໍາ.

    -     ລູກສອນຢູ່ຈອມຂອງເຄື່ອງໝາຍເປັນສີຟ້າ ໝາຍເຖິງວຽກເຮືອບິນ(ວຽກການບິນ) ແລະ ເສັ້ນຄ້າຍຄືແມ່ນໍ້າຢູ່ ຂອບລຸ່ມ ຂອງເຄື່ອງໝາຍເປັນສີຟ້າ ໝາຍເຖິງວຽກໂຍທາທາງນ້ຳ ແລະ ນ້ຳປະປາ.

    -     ມີຮູບເສັ້ນທາງຫຼວງ ແລະ ເສັ້ນທາງລົດໄຟຢູ່ດ້ານຂ້າງທັງສອງພາກຂອງເຄື່ອງ ໝາຍເປັນສີເທົາ.

  • ສີທີ່ໃຊ້ໃນເຄື່ອງໝາຍ ມີສາມ ສີ ຄື: ດຳ, ຟ້າ ແລະ ເຫຼືອງ ເຊິ່ງແບ່ງອອກເປັນຄວາມໝາຍດັ່ງນີ້:

-  ສີທຳອິດທີ່ຖືກເລືອກແມ່ນສີເຫຼືອງ, ເຊີ່ງແມ່ນສີສະຫວ່າງຂອງດວງຕາເວັນໃນຍາມເຊົ້າເໝືອນກັບວ່າ ກະຊວງ ດັ່ງກ່າວນີ້ປຽບຄືກັບທວນໄຟດວງທຳອິດທີ່ກໍ່ ໃຫ້ເກີດແສງສະຫວ່າງ, ພ້ອມດຽວກັນນັ້ນກໍ່ແມ່ນສີ ທີ່ເປັນສັນຍາລັກ ຂອງການເຕືອນອັນຕະລາຍ ແລະ ຖືກນຳໃຊ້ຢູ່ໃນມາດຕະຖານຂອງ ໂຍທາທິການ ສາກົນ.

- ສີ ຟ້າ ສ່ວນຫລາຍຈະສື່ເຖິງຄວາມກ້ວາງໃຫຍ່ໄພສານ ເຊິ່ງໃນນີ້ໄດ້ສື່ໃຫ້ເຫັນເຖິງສາຍນ້ຳ ແລະ ທ້ອງຟ້າອັນບໍລິສຸດ ຜຸດຜ່ອງ ແລະ ສົດໃສຂອງເມືອງລາວ.

-  ສີ ດຳ ແມ່ນສີທີ່ເປັນສັນຍາລັກແຫ່ງຄວາມເຂັ້ມແຂງ ແລະ ຄວາມໝັ້ນຄົງ, ເຊິ່ງເຮົາໄດ້ເລືອກເອົາມາໃຊ້ເປັນສີ ຄໍາຫຍໍ້ຂອງ ກະຊວງ ໂຍທາທິການ ແລະ ຂົນສົ່ງ ຍທຂ, PWT”        ເບິ່ງລວມແລ້ວຄື່ອງໝາຍນີ້ເຮົາເຫັນໄດ້ ເຖິງຄວາມກະທັດຫັດ, ຄວາມສະອາດ, ຄວາມທັນສະໄໝ, ຄວາມແຈ່ມແຈ້ງດ້ວຍສີສັນອັນງົດງາມ ແລະ ກຳລັງກ້າວ ຂຶ້ນໄປທະລຸເປົ້າໝາຍຍຸດທະສາດ ຂອງຂະແໜງການພວກເຮົາ, ທີ່ສື່ໃຫ້ເຫັນເຖິງພາລະບົດ ບາດໂດຍລວມຮອບດ້ານ ຂອງກະຊວງໄດ້ດີ.

ທ່ານລັດຖະມົນຕີຊ່ວຍວ່າການ ກະຊວງ ຍທຂ ຕ້ອນຮັບ ຄະນະຜູ້ແທນຈາກ ສ. ເບລາຣຸສ

ໃນ​ຕອນ​ບ່າຍ​ຂອງ​ວັນ​ທີ 17 ມິ​ຖຸນາ 2013 ຢູ່​ທີ່​ຫ້ອງ​ຮັບ​ແຂ​ກກະຊວງ ທ່ານ ລັດຕະນະມະນີ ຄູນ​ນີວົງ ລັດຖະມົນຕີ​ຊ່ວຍ​ວ່າການ​ກະຊວງ ​ໂຍທາ​ທິການ ​ແລະ​ຂົນ​ສົ່ງ ​ໄດ້​ຕ້ອນຮັບ​ການ​ເຂົ້າ​ຢ້ຽມ​ຂ່ຳ ນັບ​ຂອງ​ຄະນະ​ຜູ້​ແທນ ສ. ​ເບ​ລາຣຸສ ນຳ​ໂດຍ​ທ່ານ Nikolai SNOPKOV ລັດຖະມົນຕີ​ວ່າການ​ກະຊວງເສດຖະກິດ ​ແຫ່ງ​ສາທາລະນະ​ລັດ​ເບ​ລາຣຸສ ພ້ອມ​ດ້ວຍ​ຄະນະ ​ເນື່ອ​ງ​ໃນ​ໂອກ​າດທີ່​ທ່ານ ​ໄດ້​​ເດີນທາງ​ມາ​ຢ້ຽມຢາມ ສປປ ລາວ ຢ່າງ​ເປັນ​ທາງ​ການ ​ແຕ່ວັນ​ທີ 16-19 ມິຖຸນາ 2013.        ບັນຍາ​ກາດ​ການ​ພົບ​ປະ​ໃນ​ຄັ້ງ​ນີ້ ​ໄດ້​ດຳ​ເນີນ​ໄປ​ດ້ວຍ​ໄມຕີ​ຈິດ​ມິດຕະພາບ ​ແລະ​ຄວາມ​ຮັກ​ແພງ​ເຊີ່ງ​ກັນ ​ແລະ​ ກັນ ​​ຊຶ່ງທ່ານ ລັດຕະນະມະນີ ຄູນ​ນີວົງ ລັດຖະມົນຕີ​ຊ່ວຍ​ວ່າການ​ກະຊວງ ​ໂຍທາ​ທການ ​ແລະ ​ຂົນ​ສົ່ງ ກໍ​ໄດ້​ໃຫ້ ການ​ຕ້ອນຮັບ​ຢ່າງ​ອົບ​ອຸ່ນ ພ້ອມ​ທັງ​ໄດ້​ຕີ​ລາຄາ​ສູງ​ຕໍ່​ການ​ມາ​ຢ້ຽມຢາມ ກະຊວງໂຍທາ​ທິການ ​ແລະຂົນ​ສົ່ງ ອັນ​ຈະ​ເປັນ​ການ​ເພີ່ມ​ພູນ​ຄູນ​ສ້າງສາ​ຍພົວພັນ ​ແລະ​ການຮ່ວ​ມ ມື ລະ​ຫວ່າງ ກະຊວງໂຍທາ​ທການ ​ແລະ​ຂົນ​ສົ່ງ ​ແລະ​ ກະຊວງເສ​ດຖະກີດ ​ແຫ່​ງສາທາລະນະ​ລັດ​ເບ​ລາຣຸສ  ​ໃຫ້​ໜັກ​ແໜ້ນ​ ຍິ່​ງໆ​ຂື້ນ. ທັງ​ສອງ​ຝ່າຍ​ສະ​ແດງ​ຄວາມ​ຍິ​ນດີ​ທີ່​ເຫັນ​ວ່າການ ພົວພັນ ​ແລະ​ການ​ຮ່ວ​ມມື​ລະຫວ່າງ ກະຊວງໂຍທາ​ທການ ​ແລະ​ຂົນ​ສົ່ງ ​ແຫ່ງ ສປປ ລາວ ​ແລະ ​ກະຊວງ​ເສ​ດຖະກີດ ​ແຫ່​ງສາທາລະນະ​ລັດ​ເບ​ລາຣຸສ ​ໄດ້​ມີ​ບາດ​ກ້າວ​ຂະຫຍາຍຕົວ​ດີ​ຂື້ນ​ເປັນ​ລຳດັບ ​ແລະ​ການ​ມາ​ຢ້ຽ​ມຢາມຂອງ​ຄະນະ​ຜູ້​ແທນ​ໃນ​​ເທື່ອ​ນີ້ ​ແມ່ນ​ໄດ້​ຢືນ​ຢັນ​ເຖິງຄວາມ​ຕັ້ງໜ້າ ​ແລະ​ເອົາ​ໃຈ​ໃສ່ ​ໃນການ​ພົວພັນ​ຮ່ວມມື​ສອງ​ກະຊວງ ​ໃຫ້​ເກີດ​ຜົນ​ປະ​​ໂຫຍ​ດຢ່າງ​​ເປັນ​ຮູບ​ປະທຳ.

ພິທີປະກາດ ເມືອງຄູນ ແລະເມືອງ ທ່າໂທມ ເປັນເມືອງຫຼຸດ ພົ້ນອອກ ຈາກເມືອງທຸກຍາກ

ໃນທີ່ສຸດເມືອງຄູນ ແລະ ເມືອງ ທ່າໂທມ ແຂວງຊຽງຂວາງ ກໍສາມາດສູ້ຊົນພັດທະນາເສດຖະກິດ, ຍົກລະດັບຊີວິດ ການເປັນຢູ່ຂອງ ພໍ່ແມ່ປະຊາຊົນ ພາຍໃນ 02 ເມືອງດັ່ງກ່າວຫຼຸດພົ້ນອອກຈາກເມືອງທຸກຍາກທີ່ສຸດໃນ 47 ເມືອງທຸກ ຍາກທີ່ສຸດໃນທົ່ວປະເທດ. ຊຶ່ງພິທີປະກາດຢ່າງ ເປັນທາງການໄດ້ຈັດຂຶ້ນໃນວັນທີ 14 -15 ມິຖຸນາ 2013 ທີ່ຜ່ານມາ. ພາຍໃຕ້ການເປັນປະທານຂອງ ທ່ານ ບຸນເຮືອງ ດວງພະຈັນ ລັດຖະມົນຕີວ່າການ, ປະຈໍາຫ້ອງວ່າການລັດຖະບານ, ຫົວໜ້າຄະນະພັດທະນາຊົນນະບົດ ແລະລຶບລ້າງຄວາມທຸກຍາກ ຂັ້ນສູນກາງ ກໍໃຫ້ກຽດເຂົ້າຮ່ວມໃນພິທີ ປະກາດ, ຕັດແຖບຜ້າເປີດ ແລະ ລັ່ນຄອງ 09 ບາດ ເພື່ອເປັນສິລີມຸງຄຸນ ແລະ ສຈ ດຣ ສົມກົດ ມັງໜໍ່ເມກ ກໍາມະການສູນກາງ ພັກ, ເລຂາ ຄະນະບໍລິຫານງານພັກແຂວງ, ເຈົ້າແຂວງໆຊຽງຂວາງ ກໍໃຫ້ກຽດເຂົ້າຮ່ວມ. ຊ່ອງໜ້າການນຳຈາກຂັ້ນສູນກາງ ຈາກກະຊວງຕ່າງໆ, ຈາກຂັ້ນແຂວງຊຽງຂວາງ, ພ້ອມປະຊາຊົນພາຍໃນເມືອງ. ຊຶ່ງຕາງໜ້າກະຊວງ ໂຍທາທິການ ແລະ ຂົນສົ່ງ ໂດຍແມ່ນ ທ່ານ ລັນ ແສງອາພອນ, ຄະນະພັກກະ ຊວງ, ເລຂາ ໜ່ວຍພັກ, ຫົວໜ້າກົມຈັດຕັ້ງ ແລະ ພະນັກງານ ກໍ່ໃຫ້ກຽດເຂົ້າຮ່ວມ ແລະ ຕາງໃຫ້ ກະຊວງ ຍທຂ ມອບເງິນອຸປະຖຳ ເຂົ້າໃນການ ສ້າງສາ ແລະ ພັດທະນາເສດຖະກິດ-ສັງຄົມ ຂອງ 02 ເມືອງທີ່ຫາກໍ່ຫຼຸດພົ້ນອອກຈາກເມືອງທີ່ທຸກຍາກ ທີ່ສຸດ ໃນ ສປປ ລາວ ເມືອງລະ 2.000.000 ກີບ ລວມເປັນຈຳນວນເງິນ 4.000.000 ກີບ. ຫຼັງຈາກນັ້ນ ທ່ານ ລັນ ແສງອາພອນ ກໍ່ຍັງລົງຢ້ຽມຢາມ ຫ້ອງການ ໂຍທາການທິການ ແລະ ຂົນສົ່ງ 02 ເມືອງດັ່ງກ່າວ ເພື່ອໃຫ້ທິດຊີ້ນຳ ໃນການຈັດຕັ້ງປະຕິວັດວຽກງານ, ພ້ອມລົງຕິດຕາມຊຸກຍູ້ຄວາມຄຶບໜ້າຂອງວຽກງານຈໍານວນໜຶ່ງ ຂອງຂະແໜງ ຍທຂ ເຊັ່ນ: ວຽກງານກໍ່ສ້າງຂົວ, ທາງ, ຕະຝັ່ງກັ່ນເຈື່ອນ ແລະ ອື່ນໆ.. ..ພາຍໃນ 02 ເມືອງດັ່ງກ່າວຕື່ມອີກ.

Additional information