ຂ່າວພາຍໃນກະຊວງ

ກອງປະຊຸມໂຄງການປັບປຸງການຂົນສົ່ງສາທາລະນະ ໃນນະຄອນຫຼວງວຽງຈັນ

ວັນ​ທີ 29 ​ເມສາ 2013 ທີ່​ຫ້ອງປະຊຸມ ​ຫ້ອງ​ວ່າການ​ປົກຄອງ​ນະຄອນຫຼວງ​ວຽງ​ຈັນ ​ໄດ້​ຈັດ​ກອງ​ປະຊຸມລາຍ​ງານ​ຄວາມ​ຄຶ​ບໜ້າ​ ​ແລະ ປຶ​ກສາ​ຫາລື​ບາງ​ບັນ​ຫາ​ຂອງ​ໂຄງການ ປັບປຸງ​ການ​ຂົນ​ສົ່ງ​ສາທາລະນະ​ໃນ​ນະຄອນຫຼວງ​ວຽງ​ຈັນ ຊີ່​ງ ມີທ່ານ ສຸ​ກັນ ມະຫາລາດ ​ເຈົ້າ​ຄອງ​ນະຄອນຫຼວງ​ວຽງ​ຈັນ, ມີ​ທ່ານ ສົມ​ມາດ ພົລ​ເສນາ ລັ​ດຖະມົນຕີ​ວ່າການ​ກະຊວງ ຍທຂ, ມີ​ທ່ານ ນາງ ໂຈ​ໂກະ ​ໂຍ​ໂກະ​ຕະ ​ເອກ​ອັກຄະ​ລັດຖະທູດ​ຍີ່ປຸ່ນ​ປະຈຳ​ລາວ ມີ​ຮອງ​ເຈົ້າ​ຄອງ, ມີ​ລັດຖະມົນຕີຊ່ວຍ​ວ່າການ, ຫົວໜ້າ​ຫ້ອງການ, ຫົວໜ້າ​ກົມ ຮອງ​ຫົວໜ້າ​ກົມ, ຫົວໜ້າ​ພະ​ແນ​ກ ​ແລະ ວິຊາ​ການ​ທີ່​ກ່ຽວຂ້ອງ​ຈາກ​ນະຄອນ ຫຼວງ ກະຊວງ ​ແລະ​ໂຄງການເຂົ້າ​ຮ່ວມ​ຢ່າງ​ພ້ອມພຽງ. ກອງ​ປະຊຸມ ທ່ານ ​ໂຕ​ດະ ​ໂຕ​ຊິໂນຣິ ຫົວໜ້າ​ຄະນະ​ຊ່ຽວຊານ ​ໂຄງການ​ປັບປຸງ​ລະບົບ​ຂົນ​ສົ່ງ ລົດ​ເມສາ​ທາ​ລະນະ​ໃນ​ນະຄອນຫຼວງວຽງ​ຈັນ ​ໄດ້​ຂື້ນ​ລາຍ​ງານ​ຄວາ​ມຄຶ​ບໜ້າຂອງ​ການ​ຈັດ​ຕັ້ງ​ປະຕິບັດ​ໂຄງການ ​ໃນ​ໄລຍະ​ຜ່ານ​ມາ ​ແລະ​ຜ່ານ​ແຜນ​ດຳ​ເນີນ​ໂຄງການ​ໃນ​ຕໍ່ໜ້າ  ຈາກ​ນັ້ນ ຜູ້​ເຂົ້າ​ຮ່ວມ​ກອງ​ປະຊຸມ​ກໍ​​ໄດ້​ພ້ອມ​ກັນ​ປະກອບ​ຄຳ​ຄິດ​ຄຳ​ເຫັນ​ໃສ່​ໂຄງການດັ່ງກ່າວ ​ເພື່ອ​ພ້ອມ​ກັນ​ຊອກ​ຫາ​ຊ່ອງ​ທາງ​ແກ້​ໄຂ​ບັນຫາ​ຄວາມ​ແອ​ອັດ​ຂອງ​ການ​ສັນຈອນຂອງ​ລົດ ​ແລະ​ຄວບ​ຄຸມ​ຫຼຸດຜ່ອນ​ອຸປະຕິ​ເຫດ ຢູ່​ໃນ​ຕົວ​ເມືອງ​ນະຄອນຫຼວງ​ວຽງ​ຈັນ. ນອກ​ຈາກນີ້ ຫົວໜ້າ​ຄະນະ​ຊ່ຽວຊານ​ໂຄງການ​ຍັງ​ໄດ້​ຍົກ​ໃຫ້​ເຫັນ​ຕື່ມ​ອີກ​ວ່າ:​ ພວກ​ເຮົາ​ຕ້ອງ​ສ້າງ​ບູລິ​ມະ​ສິດ​ສຳລັບ​ລົດ​ເມ ດ້ວຍ​ເລນ​ລົດ​ສ່ວນ​ຕົວ ​ເພື່ອ​ເຮັ​ດ​ໃຫ້ລົດ​ເມສາ​ມາດ​ແລ່ນ​ໄວ​ຂື້ນ ​ເພື່ອ​ຫຼຸດຜ່ອນ​ຄວາມ​ແອ້​ອັດ​ໃນ​ຊົ່ວ​ໂມງ​ຮີບ​ດ່ວນ​ໃນ​ຕອນ​ເຊົ້າ ​ໂດຍ​ການ​ທົດ​ລອງ​ໃຫ້​ສັງຄົມ ນຳ​ໃຊ້​ລະບົບ​ລົດ​ເມ​ດ່ວນ​ຢູ່​ສອງ​ເສັ້ນທາງ ​ແຕ່​ຂົວ​ມິດຕະພາບ​ລາວ-​ໄທ ຫາ​ສະຖາ​ນີລົດ​ເມ (ຕະຫລາດ​ເຊົ້າ) ​ແລະ ​ເສັ້ນທາງ ​ແຕ່​ສະຖາ​ນີລົດ​ເມ ຫາ​ວິທະຍາ​ເຂດ​ດົງ​ໂດກ ​ໂດຍ​ກຳນົດ​ຊ່ອງ​ທາງ​ໜຶ່ງ ​ໃຫ້​ລົດ​ເມ​ດ່ວນ​ແລ່ນ ຈາກນີ້​ແລ້ວ​ກໍ​ມີ​ການ​ປັບປຸງ ລັດ​ວິ​ສາ​ຫະກິດ​ລົດ​ເມ​ຄືນ​ໃໝ່  ​ເພື່ອ​ໃຫ້​ທຸລະ​ກິດ​ລົດ​ເມ​ມີ​ລາຍ​ຮັບ ​ແລະ​ ມີ​ຜົນ​ກຳ​ໄລ ​ເພື່ອ​ບໍລິການ​ທີ່​ຍາວ​ນານ ​ໂດຍ​ການ​ນຳ​ໃຊ້​ເງິນ​ອຸດໜູນ​ຈາກລັດຖະບານ ມາ​ຈັດ​ຊື້​ລົດ​ເມ​ໃໝ່​ເຂົ້າ​ມາ​ແທນ​ລົດ​ເມ​ເກົ່າ ປັບປຸງ​ທາງ​ດ້ານ​ກົດໝາຍ​ຂອງ​ລົດ​ເມ​ໂດຍ​ສານ ​ແລະ ອື່ນໆ ພ້ອມ​ນີ້​ກອງ​ປະຊຸມ​ຍັງ​ໄດ້​ປຶກສາ​ຫາລື​ການ​ປັບປຸງ ສະຖານີລົດ​ເມ​ໃໝ່ ຊຶ່​ງທາງ​ໂຄງການ​ໄດ້​ສະ​ເໜີ​ເອົາ ຂ້າງ​ຕະຫລາດ​ເຊົ້າ​ເບື້ອງ​ບ້ານ​ຫັດສະດີ ​ເປັນ​ສະຖານີ​ລັດ​ເມ​ຊົ່ວຄາວ ​ແລະ ສຳລັບ​ໂຄງການ​ປັບປຸງ​ສະຖານີ​ລັດ​ເມ​ໃໝ່​ນີ້ ​ແມ່ນ​ຈະ​ໃຊ້​ເວລາ​ການ​ກໍ່ສ້າງ​ປະມານ 3 ປີ​ຈຶ່ງ​ສຳ​ເລັດ.

ກອງປະຊຸມລາຍງານຄວາມຄຶບໜ້າ ການຈັດຕັ້ງເຮັດທົດລອງ ສາມສ້າງຂອງຂະແໜງ ຍທຂ ສຳລັບ 6 ເດືອນຕົ້ນສົກ ປີ 2012-2013 ແຕ່ວັນທີ 1/10/2012-31/03/2013 ແລະ ທິດທາງແຜນການໃນຕໍ່ໜ້າ

ໃນວັນທີ 04 ເມສາ 2013 ທີ່ຫ້ອງປະຊຸມເບີ 3 ກະຊວງ ຍທຂ, ໄດ້ຈັດກອງປະຊຸມວຽກງານສາມສ້າງຂື້ນ, ໂດຍການເປັນປະທານຂອງທ່ານ ສົມມາດ ພົລເສນາ ລັດຖະມົນຕີວ່າການກະຊວງ ໂຍທາທິການ ແລະ ຂົນສົ່ງ ພ້ອມຄະນະຈັດຕັ້ງເຮັດທົດລອງສາມສ້າງຂອງກະຊວງ, ມີຄະນະວິຊາການຊ່ວຍວຽກເພື່ອຈັດຕັ້ງເຮັດທົດລອງສາມສ້າງ, ມີພະນັກງານຂັ້ນພະແນກ ທີ່ໄປປະຈຳການເຮັດວຽກທົດລອງສາມສ້າງ ຢູ່ນະຄອນຫຼວງ. ຫລັງຈາກນັ້ນ ທ່ານ ດຣ.ສັນຕິສຸກ ສີມມາລາວົງ ຫົວໜ້າຫ້ອງການ, ຮອງຄະນະຮັບຜິດຊອບເຮັດທົດລອງສາມສ້າງຂັ້ນກະຊວງ ໄດ້ລາຍງານກ່ຽວກັບຄວາມຄຶບໜ້າການເຮັດທົດລອງສາມສ້າງຂອງຂະແໜງ ຍທຂ ໃນໄລຍະ 6 ເດືອນ ຕົ້ນສົກປີ 2012-2013 ທີ່ຜ່ານມາປະກອບມີ 4 ບາດກ້າວ, ຊຶ່ງມີລາຍລະອຽດດັ່ງນີ້ :

ບາດກ້າວທີ 1 ການກະກຽມ ແລະການແຕ່ງຕັ້ງຄະນະຮັບຜິດຊອບຂັ້ນຕ່າງໆ. - ໂດຍໄດ້ຈັດຕັ້ງເຊື່ອມຊືມ, ຄຳສັ່ງ, ບົດແນະນຳ ແລະ ເອກະສານກ່ຽວກັບວຽກງານສາມສ້າງໃຫ້ພະນັກງານຮັບຮູ້ ແລະ ເຂົ້າໃຈ ພ້ອມທັງແຕ່ງຕັ້ງຄະນະຮັບຜິດຊອບຂັ້ນກະຊວງ, ກອງເລຂາ ແລະພະນັກງານຊ່ວຍວຽກຈຳນວນໜຶ່ງ .

ບາດກ້າວທີ 2 ການຈັດຕັ້ງປະຕິບັດ ແລະ ໝາກຜົນໄດ້ຮັບ. - ໄດ້ສ້າງບັນດານິຕິກຳຕ່າງໆ ແລະລົງສົມທົບກັບອົງການປົກຄອງທ້ອງຖິ່ນ ເພື່ອຕິດຕາມ ແລະ ຊຸກຍູ້ວຽກງານສາມສ້າງ. - ເພື່ອຜັນ ຂະຫຍາຍເປັນໜ້າວຽກລະອຽດແຕ່ລະດ້ານ. ໂດຍມີການແບ່ງຂັ້ນຄຸ້ມຄອງຢ່າງລະອຽດແຕ່ສູນກາງຮອດ ຂັ້ນບ້ານ,​ ວຽກສາມສ້າງເຖິງຈະເປັນວຽກໃໝ່ ແຕ່ບັນດາພະນັກງານ-ລັດຖະກອນ ໃນຂະແໜງ ຍທຂ ໄດ້ທຸ່ມເທເຫືອແຮງຢ່າງເຕັມທີ່ ເພື່ອຮັບປະກັນຜົນສຳເລັດຕາມລະດັບຄາດໝາຍ ໂດຍສະເພາະຄະນະ ພັກ, ຄະນະນຳກະຊວງ ໄດ້ເອົາໃຈໃສ່ຊີ້ນຳ-ນຳພາຢ່າງເປັນປົກກະຕິ ແລະແທດເຖິງຕົວຈິງ ເຮັດໃຫ້ ການຈັດຕັ້ງປະຕິບັດເຮັດທົດລອງສາມສ້າງ ຂອງຂະແໜງ ຍທຂ ມີຄວາມຄຶບໜ້າ ແລະດຳເນີນໄປ ຕາມແຜນການເທື່ອລະກ້າວ.

ບາດກ້າວທີ 4 ທິດທາງແຜນການໃນຕໍ່ໜ້າ. ທິດທາງໃນຕໍ່ໜ້າມີດັ່ງນີ້ : -ສຶບຕໍ່ຕັ້ງໜ້າສຸມໃສ່ປະຕິບັດແຜນດຳເນີນງານລວມ ການຈັດຕັ້ງເຮັດທົດລອງສາມສ້າງຂອງຂະແໜງ ຍທຂ, - ເພີ່ມທະວີຄວາມເປັນເຈົ້າການ ໃນການປະຕິບັດພາລະບົດບາດຄຸ້ມຄອງມະຫາພາກ, ພ້ອມທັງຈັດຕັ້ງເຜີຍແຜ່ເຊື່ອມຊຶມ ໃຫ້ພະນັກງານ-ລັດຖະກອນ ທົ່ວຂະແໜງ ຍທຂ ໃຫ້ກຳແໜ້ນ ແລະເຊື່ອມຊຶມມະຕິ 03/ກມສພ. - ສົມທົບຢ່າງສະໜິດແໜ້ນກັບນະຄອນຫຼວງວຽງຈັນ ຊຶ່ງເປັນຈຸດຕົວແບບເຮັດທົດລອງສາມສ້າງ ເພື່ອ ຈັດຕັ້ງປະຕິບັດບົດບັນທຶກການແບ່ງຄວາມຮັບຜິດຊອບ ລະຫວ່າງບັນດາກົມ, ກະຊວງ ໃຫ້ພະແນກ ຍທຂ ນະຄອນຫຼວງ ແລະ ຫ້ອງການ ຍທຂ 3 ເມືອງທົດລອງໃຫ້ປະກົດຜົນເປັນຈິງ. - ໂດຍມອບໃຫ້ພະແນກ ຍທຂ ບັນດາແຂວງ, ນະຄອນຫຼວງ ສົມທົບກັບຫ້ອງການ ຍທຂ ເມືອງທົດລອງ ສ້າງແຜນການ ທົດລອງຈັດຕັ້ງປະຕິບັດວຽກງານໃນແຕ່ລະຂົງເຂດ ເຊັ່ນ: ຂົງເຂດຂົວທາງ, ເຄຫາ-ຜັງເມືອງ, ຂົນສົ່ງ ແລະ ໂຍທາທິການທາງນ້ຳ ແລ້ວສົ່ງໃຫ້ຂັ້ນເທິງຮັບຊາບນຳ. - ໃຫ້ທຸກພາກສ່ວນທີ່ກ່ຽວຂ້ອງ ເລີ່ມເຮັດທົດລອງຕົວຈິງໃນໄຕມາດ 3 ຂອງສົກປີ 2012-2013. - ຄະນະຮັບຜິດຊອບ ແລະ ຄະນະວິຊາການຊ່ວຍວຽກເຮັດທົດລອງສາມສ້າງກະຊວງ  ຍທຂ ລົງໄປສົມທົບຢ່າງໄກ້ຊິດກັບ ບັນດາອົງການປົກຄອງທ່ອງຖິ່ນທົ່ວປະເທດ. - ຄົ້ນຄ້ວາ ແລະກວດກາຄືນບັນດານິຕິກຳຂອງຂະແໜງ ການ ທີ່ເຫັນວ່າບໍ່ສອດຄ່ອງ ແລະ ຍັງອັດຕັນ, ເພື່ອປັບປຸງ ແລະລົບລ້າງແລ້ວສ້າງໃໝ່ ເພື່ອໃຫ້ສອດຄ່ອງຕາມທິດສາມສ້າງ. ສະຫຼຸບ, ຕີລາຄາ ແລະ ຖອດຖອນບົດຮຽນການຈັດຕັ້ງ ເຮັດທົດລອງສາມສ້າງ ຂອງຂະແໜງການ ຍທຂ ເປັນປະຈຳເດືອນ, ປະຈຳງວດ ແລະ ສະຫຼຸບໝົດປີ ໃຫ້ກອງເລຂາຄະນະຮັບຜິດຊອບຊີ້ນຳເຮັດທົດລອງສາມສ້າງ ຂັ້ນສູນກາງຢ່າງເປັນປະຈຳ ແລະ ປົກກະຕິ.

ຄະນະພັກກະຊວງ ໂຍທາທິການ ແລະ ຂົນສົ່ງ ປະຊຸມເປີດກ້ວາງ ຄັ້ງທີ 6 ສະໄໝທີ III

ໃນ​ວັນ​ທີ 19 ​ເມສາ 2013 ຢູ່​ຫ້ອງ​ປະຊຸມ​ເບີ 01 ກະຊວງ ຍທຂ ​ໄດ້​ຈັດ​ກອງ​ປະຊຸມ​ເປີດ​ກ້ວາງ ສາມັນ​ຄົບ​ຄະນະ​ບໍລິ ຫານ​ງານພັກ​ກະຊວງ ​ໂຍທາ​ທິການ ​ແລະຂົນ​ສົ່ງ ຄັ້ງ​ທີ 6 ສະ​ໄໝ​ທີ III ​ໂດຍ​ການເ​ປັນ​ປະທານ​ຂອງ​ສະຫາຍ  ສົມ​ມາດ ພົລ​ເສນາ ກຳມະການ​ສູນ​ກາງ​ພັກ, ​ເລຂາ​ຄະນະພັກກະ ຊວງ,​ ລັດຖະມົນ​ຕີ​ວ່າການ​ກະຊວງ ​ໂຍທາ​ທິການ ​ແລະ ຂົນ​ສົ່ງ ມີ​ຄະນະ​ພັກ​ກະຊວງ, ​ເລຂາ, ຮອງ​ເລຂາ, ກຳມະການ​ຄະນະ​ພັກ​ຮາກ​ຖານ, ໜ່ວຍ​ພັກ​ຮາກ​ຖານ, ​ເລຂາ, ຮອງ​ເລຂາ​ໜ່ວຍ​ພັກ ທີ່​ຂື້ນ​ກັບ​ຄະນະ​ພັກ​ຮາກ​ຖານ, ທີ່​ປຶກສາ​ທ່ານລັດຖະມົນຕີ, ທີ່​ປຶກສາ​ປະທານຄະນະກວດ​ກາ​ພັກ​ກະຊວງ, ຫົວໜ້າ​ກົມ,​ ຮອງ​ຫົວໜ້າ​ກົມ ຫລື ​ທຽບ​ເທົ່າ ຂອງ​ບັນດາ​ກົມ, ຫ້ອງການ, ອົງການ, ສະ​ຖາ​ບັນ, ສະພາ​ວິທະຍາສາດ ​ແລະ​ເຕັກ​ໂນ​ໂລ​ຊີ, ຫົວໜ້າ, ຮອງ​ຫົວໜ້າ​ກອງ​ວິຊາ​ການ, ສູນ​ຝຶກ, ຫ້ອງການ​ດັດສົມ​ນ້ຳ​ປະປາ, ຜູ້ອຳ​ນວຍ​ການ ພ້ອມ​ຄະນະ​ອຳນວຍ​ການ​ລັດ​ວິ​ສາ​ຫະກິດ ອ້ອມ​ຂ້າງ​ກະຊວງ, ປະທານ, ຮອງ​ປະທານ ຫຼື ​ເລຂາ, ຮອງ​ເລຂາ ສາມ​ອົງການ​ຈັດ​ຕັ້ງ​ມະຫາຊົນ​ຂັ້ນ​ກະຊວງ​ເຂົ້າ​ຮ່ວມ​ທັງ​ໝົດ 90 ກວ່າ​ສະຫາຍ. ກອງ​ປະຊຸມ​ຄັ້ງ​ນີ້ ​ໄດ້​ສະຫລຸບຕີ​ລາຄາ​ການ​ນຳພາ ຂອງ​ຄະນະ​ພັກ​ກະຊວງ​ໂຍທາ​ທິການ ​ແລະ ຂົນ​ສົ່ງ ປະຈຳ 6 ​ເດືອນ​ຕົ້ນ​ສົກ​ປີ 2012-2013 ​ແລະ​ວາງ​ທິດ​ທາງ​ແຜນການ 6 ​ເດືອນ​ປີ 2013, ​ໃນ​ນັ້ນ ​ໄດ້​ສະຫລຸບ​ການ​ຈັດ​ຕັ້ງ​ປະ​ຕິ​ບັດ​ແຜນການ​ພັດທະນາ​ເສດຖະກິດ-ສັງຄົມ 5 ປີ ຄັ້ງ​ທີ VII ຂອງ​ຂະ​ແໜງ​ການ​ໂຍທາ​ທິການ ​ແລະ​ຂົນ​ສົ່ງ, ລາຍ​ງານ​ການ​ເຄື່ອນ​ໄຫວ​ວຽກ​ງານ ຂອງ​ຄະນະ​ປະຈຳ​ພັກ​ ກະຊວງ ​ແລະ​ຜ່ານ​ຮ່າງ​ພາລະ​ບົດບາດ​ວຽກ​ງານ​ກວດກາ, ​ໃນ​ທີ່​ປະຊຸມ​ບັນດາ​ຜູ້​ເຂົ້າ​ຮ່ວມ​​ໄດ້​ປະກອບ​ຄຳ​ຄິດ​ຄຳ​ເຫັນ ​ເພື່ອ​ເປັນ​ການ​ກະກຽມ​ໃນ​ການ​ເຂົ້າ​ຮ່ວມ​ກອງ​ປະຊຸມ​ຂັ້ນ​ສູນ​ກາງ​ໃນ​ຕໍ່ໜ້າ. ທິດ​ທາງ​ແຜນການ​​ໃນ​ຕໍ່ໜ້າ ວຽກ​ງານ​ການ​ເມືອງ​-ແນວ​ຄິດຍັງ​ແມ່ນ​ວຽກ​ງານ​ບູລິ​ມະ​ສິດ​ຕົ້ນຕໍ​ ສອດ​ຫ້ອຍ​ໃນ​ທຸກ​ຂົງ​ເຂດ​ວຽກ​ງານ, ການ​ສຶກສາ​ອົບຮົມ​ແນວ​ຄິດ​ໃຫ້​ສະມາຊິກ​ພັກ, ​ພະນັກງານ ມີ​ຈິດ​ໃຈ​ຮັບ​ໃຊ້ຊາດ, ຮັບ​ໃຊ້​ປະຊາຊົນ​ຢ່າ​ງ​ແທ້​ຈິ​ງ, ​ໂດຍ​ການຈັດຕັ້ງ​ການ​​ໂຄສະນາ- ປາຖະ ກະຖາ​ໃນ​ວັນສຳຄັນ ຕ່າງໆ ຂອງ​ພັກ ​ແລະ​ຂອງ​ຊາດ. ສຶບຕໍ່ດຳ​ເນີນ​ລາຍການ​ໂທລະພາບ, ວາລະສານ ຂອງ​ກະຊວງ​ໃຫ້​ຕໍ່​ເນື່ອງ, ນຳພາ​ການຈັດ​ຕັ້ງ​ປະຕິບັດ​ວຽກ​ງານ​ວິຊາ​ສະ​ເພາະ​ຂອງ​ບັນດາ​ກົມ​ກອງ ຕາມ​ແຜນ​ທີ່​ວາງ​ໄວ້, ວຽກ​ປ້ອງ ກັນ​ ນຳພາ​ບັນ​ດາ​ຄະນະ​ພັກ​ຮາກ​ຖານ ​ໃຫ້​ເອົາ​ໃຈ​ໃສ່​ປ້ອງ​ກັນຄວາ​ມສະຫງົບ​ພາຍ​ໃນ ​ແລະ​ລະບຽບ​ການ​ອອກ-​ເຂົ້າ ສຳນັກງານ, ອົງການ​ຂອງ​ຕົນ​ຢ່າງ​ເຂັ້ມ​ງວດ, ຄົ້ນ​ຄ້ວາ ປັບປຸງ​ບັນດາ​ນິຕິ​ກຳ​ຕ່າງໆ ​ໃຫ້​ເໝາະ​ສົມ​ກັບ​ວຽກ​ງານ​ ຫັນ​ແຂວງ​ເປັນ​ຫົວໜ່ວຍ​ຍຸດ​ທະ​ສາດ, ​ເມືອງ​ເປັນ​ຫົວໜ່ວຍ​ເຂັ້ມ​ແຂງ​ຮອບດ້ານ, ບ້ານ​ເປັນ​ຫົວໜ່ວຍ​ພັດທະນາ ຢູ່​ໃນ​ກະຊວງ ຍທຂ ​ໃຫ້​ສຳ​ເລັດ, ປະຕິບັດ​ພາລະ​ບົດບາດ​ຄຸ້ມຄອງ​ມະຫາ​ພາກ​ຂອງ​ກະຊວງ​ໃຫ້​ເຂັ້ມ​ແຂງ, ຊຸກຍູ້​ສາມ​ອົງການ​ຈັດ​ຕັ້ງ​ມະຫາຊົນ​ໃຫ້​ເປັນ​ໃຈກາງ ​ໃນ​ການ​ສ້າງ​ຂະ​ບວນການ​ຕ່າງໆ, ປະຕິບັດ​ອອກ​ບັດ-ມອບ​ບັດ​ໃຫ້​ສະມາຊິກ​ພັກ​ສົມບູນ ພາຍ​ໃນ​ປີ 2013, ຄົ້ນ​ຄ້ວາ ປັບປຸງ​ກົງຈັກ​ການຈັດ​ຕັ້ງ​ຢູ່​ບັນດາ​ກົມ ກອງ​ຕ່າງ​ໆ ​ໃຫ້​ສຳ​ເລັດ, ຕິດ​ຕາມ​ກວດກາ, ປະ​ເມີນ​ຜົນ​ການ​ປະຕິບັດ​ໜ້າ​ທີ່​ວິຊາ​ສະ​ເພາະ ຢູ່​ກະຊວງ ​ແລະ ພະ​ແນ​ກ ຍທຂ ປະຈຳ​ແຂວງ

ສະຫາຍ​ເລຂາ​ຄະນະ​ພັກໄດ້​ເນັ້ນ​ໜັກ​ໃຫ້​ຄະນະ​ພັກ​ທຸກ​ຂັ້ນອ້ອມ​ຂ້າງ​ກະຊວງ ​ເປັນ​ເຈົ້າ​ການ ຄົ້ນ​ຄ້ວາ​ກຳ​ແໜ້ນ​ທິດ​ທາງ​ແຜນການ​ແຕ່​ລະ​ດ້ານ ​ເພື່ອ​ສ້າງ​ເປັນ​ແຜນ​ລະອຽດ ​ແລະ​ ຈັດ​ຕັ້ງ​ຜັນ​ຂະຫຍາຍ​ໃຫ້ປະ ກົ​ດຜົນ​ເປັນ​ຈິງ.

ຍີ່ປຸ່ນໃຫ້ການຊ່ວຍເຫລືອລ້າ ປັບປຸງທາງທ້ອງຖິ່ນ ຢູ່ແຂວງສາລະວັນ

ລັດຖະບານຍີ່ປຸ່ນໄດ້ໃຫ້ການຊ່ວຍເຫລືອລ້າ ໂຄງການກໍ່ສ້າງທາງ ຢູ່ບ້ານນາສະດອ໋ງ ແຂວງສາລະວັນ ພາຍໃຕ້ແຜນ ການຊ່ວຍເຫລືອລ້າຂອງຕົນສໍາລັບໂຄງການຄວາມປອດໄພ ໃນຂັ້ນພື້ນຖານຂອງມະນຸດ ( ຈີຈີພີ ) ເປັນມູນຄ່າ 123,000 ໂດລາສະຫະລັດ.

ໃນວັນທີ 28 ມີນາ 2013 ຢູ່ທີ່ຫ້ອງປະຊູມໃຫຍ່ ຂອງກະຊວງໂຍທາທິການ ແລະຂົນສົ່ງ, ນະຄອນຫລວງວຽງຈັນ ໄດ້ມີພິທີເຊັນສັນຍາໂຄງການຊ່ວຍເຫືລອລ້າຂອງລັດຖະບານຍີ່ປຸ່ນລະຫວ່າງ ທ່ານ ນາງ ຈູນໂກະ ໂຍກາຕະ, ເອກອັກ ຄະລັດຖະທູດຍີ່ປຸ່ນ ປະຈໍາລາວ ແລະທ່ານ ສົມລິດ ອຸ່ນຈິດ, ຫົວໜ້າຫ້ອງການໂຍທາທິການ ແລະຂົນສົ່ງ ປະຈໍາເມືອງ ຄົງເຊໂດນ, ແຂວງສາລະວັນ. ໃຫ້ກຽດເຂົ້າຮ່ວມໃນພິທີເຊັນສັນຍາໃນຄັ້ງນີ້ ມີ ທ່ານ ສົມມາດ ພົລເສນາ, ລັດຖະມົນຕີ ວ່າການ ກະຊວງໂຍທາທິການ ແລະຂົນສົ່ງ, ທ່ານ ສີເຮັ່ງ ຫອມສົມບັດ, ຮອງເຈົ້າແຂວງ ແຂວງສາລະວັນ, ທ່ານ ດຣ ສັນຕິສຸກ ສິມມາລາວົງ, ຫົວໜ້າຫ້ອງການ ກະຊວງ ຍທຂ ແລະພະນັກງານທີ່ກ່ຽວຂ້ອງທັງສອງຝ່າຍເຂົ້າຮ່ວມ. 

ເສັ້ນທາງດັ່ງກ່າວນີ້ ມີຄວາມຍາວທັງໝົດ 9 ກິໂລແມັດ ແລະກ້ວາງ 4,5 ແມັດ ເຊິ່ງຈະຊ່ວຍເຮັດໃຫ້ປະຊາຊົນໃນ 6 ໜູ່ ບ້ານຂອງເມືອງຄົງເຊໂດນ ມີຄວາມສະດວກ, ປອດໄພ ແລະວ່ອງໄວ ໃນການ ເດີນທາງເຂົ້າຫາຕົວເມືອງ. ໃນປະຈຸ ບັນນີ້ ການເດີນທາງໄປມາຂອງປະຊາຊົນຢູ່ໃນເຂດດັ່ງກ່າວນີ້ ແມ່ນມີຄວາມຫຍຸ້ງຍາກຫລາຍ ເພາະເປັນເສັ້ນທາງທີ່ ນໍາໃຊ້ໄດ້ໃນລະດູແລ້ງເທົ່ານັ້ນ, ສ່ວນໃນລະດູຝົນປະຊາຊົນຕ້ອງໄດ້ຍ່າງເອົາ ຫລືໃຊ້ລົດໄຖນາເທົ່ານັ້ນ. ຫາກສ້າງເສັ້ນ ທາງດັ່ງກ່າວນີ້ສໍາເລັດ, ນອກຈາກ ຈະຊ່ວຍເຮັດໃຫ້ປະຊາຊົນຢູ່ໃນເຂດດັ່ງກ່າວເຂົ້າເຖີງການບໍລິການທາງດ້ານການ ສຶກສາ ແລະ ສາທາລະນະສຸກ ແລ້ວ ຍັງຈະຊ່ວຍເຮັດໃຫ້ເຂົາເຈົ້າໄປມາຊື້ຂາຍສິນຄ້າໃນທ້ອງຕະຫລາດອີກດ້ວຍ, ເຊິ່ງ ຈະຊ່ວຍໃຫ້ຊີວິດການເປັນຢູ່ຂອງເຂົາເຈົ້າໄດ້ຮັບການປັບປຸງໃຫ້ດີຂຶ້ນເທື່ອລະກ້າວ.

ໂຄງການໃຫ້ຄວາມຊ່ວຍເຫລືອປັບປຸງດ້ານພື້ນຖານໂຄງລ່າງ ແມ່ນໂຄງການບູລິມະສິດໜຶ່ງຂອງລັດຖະບານຍີ່ປຸ່ນ ໃນ ການໃຫ້ຄວາມຊ່ວຍເຫລືອແກ່ ສປປ ລາວ, ເພື່ອປະກອບສ່ວນເຮັດໃຫ້ ສປປ ລາວ ບັນລຸເປົ້າໝາຍ ການພັດທະນາ ເສດຖະກິດ-ສັງຄົມຂອງຕົນ. ຮອດປະຈຸບັນລັດຖະບານຍີ່ປຸ່ນ ກໍໄດ້ໃຫ້ການຊ່ວຍເຫລືອ ໃນຂະແໜງຄົມມະນາຄົມ ແລະຂົນສົ່ງ ພາຍໃຕ້ໂຄງການ ຈີຈີພີ ມາແລ້ວ 34 ໂຄງການ, ໃນນີ້ລວມມີໂຄງການກໍ່ສ້າງເສັ້ນທາງທ້ອງຖິ່ນ 17 ໂຄງການ, ລວມມູນຄ່າທັງໝົດ 1.261.611 ໂດລາສະຫະລັດ.

Additional information