ຂ່າວພາຍໃນກະຊວງ

ກອງປະຊຸມພົບປະລະຫວ່າງ ລັດຖະມົນຕີ ຄົມມະນາຄົມ-ຂົນສົ່ງ ລາວ-ໄທ-ຫວຽດນາມ ແລະ ພິທີເຊັນບົດບັນທຶກສາມຝ່າຍ ກ່ຽວກັບການອຳນວຍຄວາມສະດວກໃຫ້ແກ່ການຂົນສົ່ງຜ່ານແດນ

ກອງປະຊຸມພົບປະລະຫວ່າງ ລັດຖະມົນຕີ ຄົມມະນາຄົມ-ຂົນສົ່ງ ລາວ-ໄທ-ຫວຽດນາມ ແລະ ພິທີເຊັນບົດບັນທຶກ ສາມຝ່າຍ ກ່ຽວກັບການອຳນວຍຄວາມສະດວກໃຫ້ແກ່ການຂົນສົ່ງຜ່ານແດນໄດ້ຈັດຂື້ນໃນວັນທີ 20 ກຸມພາ 2013 ທີ່ ໂຮງແຮມເຊີຣາຕັນ, ຮ່າໂນ້ຍ, ສສຫວຽດນາມ. ໃນກອງປະຊຸມ, ທັງສາມຝ່າຍໄດ້ປຶກສາຫາລືກ່ຽວກັບການຂະຫຍາຍ ບັນດາສາຍທາງ ແລະ ດ່ານ ເພື່ອອຳນວຍຄວາມສະດວກໃຫ້ແກ່ການຂົນສົ່ງຜ່ານແດນ, ລວມທັງຊຸກຍູ້ ການຈັດຕັ້ງ ປະຕິບັດການກວດກາປະຕູດຽວຮ່ວມກັນ, ຊຶ່ງປະຈຸບັນ ລາວ-ຫວຽດນາມ ກຳລັງຈັດຕັ້ງປະຕິບັດຢູ່ດ່ານ ສາກົນແດນ ສະຫັວນ (ຊາຍແດນລາວ)-ລາວບາວ (ຫວຽດນາມ). ພ້ອມດຽວກັນນີ້, ທັງສາມຝ່າຍຍັງໄດ້ເປັນເອກະພາບກັນ ເຫັນ ຄວນໃຫ້ມີການປະຊຸມປຶກສາຫາລືສະເພາະກ່ຽວກັບການຮ່ວມມືດ້ານຂົນສົ່ງທ່ອງທ່ຽວ ໂດຍມີຜູ້ຕາງ ໜ້າຈາກຂະແໜງ ທ່ອງທ່ຽວ ແລະ ພາກສ່ວນກ່ຽວຂ້ອງຂອງສາມຝ່າຍເຂົ້າຮ່ວມ. ນອກຈາກນັ້ນ, ທັງສາມຝ່າຍຍັງ ໄດ້ເປັນເອກະພາບ ຈະຈັດຕັ້ງປະຊຸມພົບປະກັນເປັນປະຈຳໂດຍຜັດປ່ຽນກັນເປັນເຈົ້າພາບ, ແນໃສ່ເພີ້ມທະວີຊຸກຍູ້ການ ຮ່ວມມືດ້ານຄົມມະ ນາຄົມ-ຂົນສົ່ງ ຂອງສາມປະເທດ ໄດ້ຮັບການພັດທະນາໃຫ້ດີຂື້ນກວ່າເກົ່າ. ໃນໂອກາດນີ້, ທັງສາມ ຝ່າຍຍັງໄດ້ເຊັນ ບົດບັນທຶກກ່ຽວກັບການອຳນວຍຄວາມສະດວກໃຫ້ແກ່ການຂົນສົ່ງຜ່ານແດນ, ຊຶ່ງເປັນການຜັນ ຂະຫຍາຍການຈັດຕັ້ງ ປະຕິບັດສັນຍາການຂົນສົ່ງຜ່ານແດນ ໃນກອບ GMS ແລະ ມີເນື້ອໃນເພີ້ມເຕີມຈາກບົດບັນທຶກ ທີ່ໄດ້ເຊັນຮ່ວມກັນ ສາມຝ່າຍ ລາວ-ໄທ-ຫວຽດນາມ ໃນປີ 2007 ທີ່ແຂວງສະຫັວນນະເຂດ, ໂດຍສະເພາະການ ກຳນົດເພີ້ມບັນດາ ສາຍທາງຜ່ານແດນຂອງສາມປະເທດ. ບົດບັນທຶກສະບັບນີ້, ຈະມີຜົນບັງຄັບໃຊ້ໄດ້ພາຍຫຼັງທີ່ ລັດຖະບານທັງສາມ ປະເທດ ໄດ້ໃຫ້ສັດຕະຍາບັນແລ້ວເທົ່ານັ້ນ.

ສຳຫຼວດໂຄງການກໍ່ສ້າງ ຂົວຂ້າມນ້ຳຂອງແຫ່ງທີ 05 ຢູ່ແຂວງບໍລິຄຳໄຊ

ໃນຕອນເຊົ້າຂອງວັນທີ 20 ກຸມພາ 2013 ທ່ານ ສົມມາດ ພົລເສນາ ລັດຖະມົນຕີວ່າການ ກະຊວງໂຍທາທິການ ແລະ ຂົນສົ່ງ, ທ່ານ ຊັດຊາດ ສິດທິພັນ ລັດຖະມົນຕີວ່າການ ກະຊວງ ຄົມມະນາຄົມ ແຫ່ງຣາຊະອານາຈັກໄທ, ທ່ານ ປ້ານ ນ້ອຍມະນີ ເຈົ້າແຂວງ ແຂວງບໍລິຄຳໄຊ, ທ່ານ ເອກອັກຄະລັດຖະທູດໄທ ປະຈຳຢູ່ ສປປ ລາວ ພ້ອມ ຄະນະ ຈາກທັງສອງຝ່າຍ ໄດ້ລົງສຳຫຼວດພື້ນທີ່ທີ່ຈະກໍ່ສ້າງ ຂົວຂ້າມນ້ຳຂອງ ແຫ່ງທີ 05 ແຂວງບໍລິຄຳໄຊ-ແຂວງ ບຶງການ.

 ໂດຍອີງຕາມການສຳຫລວດການກໍ່ສ້າງຂົວຂ້າມນ້ຳຂອງ ແຫ່ງທີ 05 ແຂວງບໍລິຄຳໄຊ-ແຂວງບຶງການ ຈະກໍ່ສ້າງຢູ່ ບໍລິເວນບ້ານກ້ວຍ ເມືອງປາກຊັນ ແຂວງບໍລິຄຳໄຊ, ສຳລັບຝ່າຍໄທ ແມ່ນຈະກໍ່ສ້າງຢູ່ບໍລິເວນ ບ້ານຫ້ວຍເຊື່ອມ ເໜືອ ແຂວງບຶງການ.  ເພື່ອເຮັດໃຫ້ເຄື່ອຄ່າຍການຄົມມະນາຄົມ-ຂົນສົ່ງ ເຊື່ອມຕໍ່ໄດ້ເຖິງ 4 ປະເທດ ຄື: ລາວ, ໄທ, ຫວຽດນາມ ແລະ ຈີນ. ສຳລັບຝ່າຍໄທແມ່ນຈະນຳໃຊ້ທາງຫລວງ ເລກທີ 212 ເພື່ອເຊື່ອມຕໍ່ກັບ ແຂວງໜອງຄາຍ, ບຶງການ ແລະ ນະຄອນພະນົມ, ຂ້າມຂົວເຂົ້າຫາຝັ່ງລາວເຂົ້າ ເມືອງປາກຊັນ, ເຂົ້າສູ່ທາງເລກ 13 ທີ່ມີຈຸດເຊື່ອມຕໍ່ ເສັ້ນທາງເລກ 8 ແລະ ຜ່ານເມືອງຄຳເກີດ (ຫລັກຊາວ) ແຂວງບໍລິຄຳໄຊ ໄປຫາ ເມືອງວິງ ແຂວງເງອານ ຂອງ ສສ ຫວຽດນາມ, ເຂົ້າຫາຊາຍແດນ ຜິງສຽງ ຂອງ ສປ ຈີນ ຈົນໄປເຖິງ ໜານໝິງ ໃນມົນທົນ ກວາງຊີ ສປ ຈີນ ຕອນໃຕ້ ເສັ້ນທາງດັ່ງກ່າວນີ້ ເໝາະສົມສຳລັບການຄົມມະນາຄົມ-ຂົນສົ່ງ ສິນຄ້າ ແລະການທ່ອງທ່ຽວ.

    ໃນນັ້ນຕຳແໜ່ງຂົວຂ້າມນ້ຳຂອງຕາມທີ່ໄດ້ສະເໜີໄວ້ ກ່ອນໜ້ານີ້ແມ່ນມີຄວາມກວ້າງຂອງແມ່ນ້ຳຂອງ ຢູ່ປະມານ 980 ແມັດ ແລະ ຢູ່ບໍລິເວນໂຄ້ງຂອງແມ່ນໍ້າ, ໃນການກໍ່ສ້າງຕົວຈິງອາດມີການດັດແກ້ ເພື່ອຄວາມເໝາະສົມ. ສຳລັບ ໂຄງການກໍ່ສ້າງຂົວຂ້າມນ້ຳຂອງ ແຫ່ງທີ 05 ນີ້ ຄາດວ່າຈະໄດ້ກໍ່ສ້າງໃນໄວໆນີ້ ເພື່ອໃຫ້ທັນກັບຄວາມຮຽກຮ້ອງ ຕ້ອງການ ຂອງຜູ້ຊົມໃຊ້ເຊິ່ງເຂດດັ່ງກ່າວເປັນອານຸພາກພື້ນ ທີ່ເປັນແລວທາງເສດຖະກິດດ້ານຕາເວັນອອກ-ຕາເວັນຕົກ ທີ່ມີຄວາມໝາຍຄວາມສຳຄັນໃນລະດັບພາກພື້ນ.

ພິທີເປີດການນຳໃຊ້ເສັ້ນທາງ 2E ແຕ່ເມືອງຂວາ-ໄຕຈາງ

ວັນທີ 23 ກຸມພາ 2013 ທີ່ດ່ານຊາຍແດນສາກົນ ປາງຫົກເມືອງໃໝ່ແຂວງຜົ້ງສາລີໄດ້ມີພິທີມອບ-ຮັບໂຄງການກໍ່ສ້າງເສັ້ນທາງ 2E ​ເມືອງຂວາ-​ໄຕຈາງຂື້ນ, ​ເປັນກຽດເຂົ້າຮ່ວມໃນພີທີໃນຄັ້ງນີ້ມີ ທ່ານສົມສະຫວາດເລັ່ງສະຫວັດ ຮອງນາຍົກລັດຖະມົນຕີ, ຜູ້ຊີ້ນຳວຽກງານດ້ານເສດຖະກິດທັງເປັນປະທານສະມາຄົມມິດຕະພາບລາວ-ຫວຽດນາມ ຂັ້ນສູນກາງ, ທ່ານ ຫວງຽນ ຊວນ ຟຸກ ຮອງນາຍົກລັດຖະມົນຕີ, ທັງເປັນປະທານສະມາຄົມມິດຕະພາບຫວຽດນາມ- ລາວ, ທ່ານ ສົມມາດ ພົລເສນາ ລັດຖະມົນຕີວ່າການກະຊວງໂຍທາທິການແລະຂົນສົ່ງ,​ ທ່ານ ດີງ ລາ ທັງ ລັດຖະມົນຕີວ່າການ ກະຊວງຄົມມະນາຄົມ-ຂົນສົ່ງ ສສ ຫວຽດນາມ,​ ທ່ານເອກອັກຄະລັດຖະທູດ ສສ ຫວຽດນາມປະຈຳລາວ, ທ່ານເອກຄະລັດຖະທູດລາວ ປະຈຳຫວຽດນາມ ແລະ ບັນດາແຂກຖືກເຊີນຈາກທັງສອງປະເທດ ເຂົ້າຮ່ວມ. ໂຄງການກໍ່ສ້າງເສັ້ນທາງເລກ 2E ​ເມືອງຂວາ-​ໄຕຈາງ ​​ແມ່ນໂຄງການທີ່ໄດ້ຮັບທຶນກູ້ຢືມ ຈາກລັດຖະບານ​​ແຫ່ງ ສສ ຫວຽດນາມໃນມູນຄ່າ​ 43,000,000 ​ໂດລາສະຫະລັດເພື່ອມາກໍ່ສ້າງແລະ ຂະຫຍາຍເສັ້ນທາງ 2E ຕາມແຜນພັດທະນາເສດຖະກິດ-ສັງຄົມ ຂອງລັດຖະບານ ແຫ່ງ ສປປ ລາວ ກໍຄື ກະຊວງໂຍທາທິການແລະຂົນສົ່ງ ເສັ້ນທາງດັ່ງກ່າວ ຍັງໄດ້ເອື້ອອຳນວຍໃຫ້ແກ່ການຄົມມະນາຄົມໃນອະນຸພາກພື້ນແລະ ເປັນເສັ້ນທາງທີ່ມີຄວາມສະ ດວກໃນການລຳລຽງຂົນສົ່ງ ຢູ່ພາຍໃນແຂວງຜົ້ງສາລີ. ​ໂຄງການກໍ່ສ້າງ​​ເສັ້ນທາງເລກ 2E ​ເມືອງຂວາ-​ໄຕຈາງມີຄວາມຍາວທັງໝົດ: 68,2 ກິໂລແມັດແລະມີຂົວ 8 ​ແຫ່ງນັບແຕ່ເມືອງຂວາ ຮອດຊາຍແດນລາວ-ຫວຽດນາມ,​ ການກໍ່ສ້າງ ໄດ້ແບ່ງອອກເປັນ 2 ສັນຍາ ຄື​: ​ໃນວັນທີ 26/03/2009  ກົມຂົວທາງ ກະຊວງໂຍທາທິການແລະຂົນສົ່ງໄດ້ເຊັນສັນຍາວ່າຈ້າງທີ່ປຶກສາສຳຫຼວດອອກແບບ (TEDI) ຫວຽດນາມແລະທີ່ປຶກສາຄຸ້ມງານການກໍ່ສ້າງລັດວິສາຫະກິດວິສາວະກຳຄົມມະນາຄົມ  ແລະເຊັນສັນຍາເອົາຜູ້ຮັບ​​ເໝົາກໍ່ສ້າງ ຄື: ບໍລິສັດປະສົມລາວຮ່ວມກໍ່ສ້າງຈຳກັດ (LCC) ຮັບເໝົາກໍ່ສ້າງຊ່ວງສັນຍາ ທີ 1 ຍາວ 30 ກມໃນມູນຄ່າ 16,834,288.43 ໂດລາສະຫະລັດ ແລະ ບໍລິສັດ ທາງເລກ 18 (CEI18) ຫວຽດນາມຊ່ວງສັນຍາທີ 2 ຍາວ 38,2 ກມໃນມູນຄ່າ 23,248,655.57 ໂດລາສະຫະລັດ ໂຄງການກໍ່ສ້າງ​​ເສັ້ນທາງເລກ 2E ​ເມືອງຂວາ-​ໄຕຈາງ ຕາມແຜນການ​​ແມ່ນຈະໃຊ້ເວລາກໍ່ສ້າງ 42 ​ເດືອນ ນັບແຕ່ທ້າຍເດືອນ 05/2009 ​ເຖິງທ້າເດືອນ 11/2012 ໃຫ້ສຳເລັດແຕ່ຍ້ອນການອອກແບບການກໍ່ສ້າງຕົວຈິງມີບາງໜ້າວຽກໄດ້ເພີ່ມຂື້ນເປັນຕົ້ນຄວາມຍາວຂອງຂົວບາງແຫ່ງແລະດິນຕັດບາງຈຸດ ດັ່ງນັ້ນຈຶ່ງໄດ້ຕໍ່ສັນຍາ ເພີ່ມຕື່ມອີກ 2 ​ເດືອນລວມເວລາການກໍ່ສ້າງເປັນ 44 ​ເດືອນເຮັດໃຫ້ທັງສອງສັນຍານີ້ມີມູນຄ່າເພີ່ມ 2,837,000.00 ​ໂດລາສະຫະລັດ ເສັ້ນທາງເລກ 2E ​ເມືອງຂວາ-​ໄຕຈາງ ກ່ອນການກໍ່ສ້າງເປັນເສັ້ນທາງ​​ແຄບມີບາງຫ້ວຍ​​ບໍ່ມີຂົວ ການສັນຈອນໄປມາມີຄວາມຫຍຸ້ງຍາກສ່ວນຫລາຍທຽວໄດ້ລະດູດຽວແຕ່ຮອດປະຈຸບັນເສັ້ນທາງດັ່ງກ່າວໄດ້ຮັບການກໍ່ສ້າງແລະ​​ ມີຄວາມສະດວກໃນການສັນຈອນໄປມາດີຂື້ນກວ່າເກົ່າສາມາດທຽວໄດ້ສອງລະດູ, ນອກຈາເປັນເສັ້ນ ທາງທີ່ມີຄວາມສະດວກ​​ໃນການລຳລຽງຂົນສົ່ງ ຢູ່ພາຍໃນແຂວງຜົ້ງສາລີ.

ກະຊວງ ຍ.ທ.ຂ ເຜີຍແຜ່ວຽກງານ 3 ສ້າງ

​ໃນວັນທີ 14 ກຸມພາ 2013 ທີ່ຜ່ານມາ. ກະຊວງໂຍທາທິການ ແລະຂົນສົ່ງ ໄດ້ຈັດຕັ້ງເຜີຍແຜ່ວຽກງານ 3 ສ້າງຂື້ນທີ່ຫ້ອງປະຊຸມໃຫຍ່ຂອງກະຊວງ. ໂດຍການເປັນປະທານຂອງ ທ່ານ ສົມມາດ ພົລເສນາ ກຳມະການສູນກາງ ພັກ ເລຂາຄະນະພັກ ລັດຖະມົນຕີວ່າການ ກະຊວງໂຍທາທິການ ແລະຂົນສົ່ງ. ເຊິ່ງມີຄະນະພັກກະຊວງ, ລັດຖະມົນ ຕີຊ່ວຍວ່າການ, ຄະນະພັກ-ໜ່ວຍພັກຮາກຖານ, ສະມາຊິກພັກ, ພະນັກງານ-ລັດຖະກອນ ອ້ອມຂ້າງກະຊວງເຂົ້າຮ່ວມ ຢ່າງພ້ອມພຽງ.

 ການຈັດຕັ້ງເຜີຍແຜ່ວຽກງານ 3 ສ້າງຄັ້ງນີ້ ທ່ານ ສົມມາດ ພົລເສນາ ໄດ້ນຳເອົາບົດຄຳເຫັນ ຂອງ ທ່ານ ຈູມມາລີ ໄຊຍະສອນ ເລຂາທິການໃຫຍ່ ຄະນະບໍລິຫານງານສູນກາງພັກ, ປະທານປະເທດແຫ່ງ ສປປ ລາວ ກ່າວຕໍ່ກອງ ປະຊຸມທົ່ວປະເທດ ເພື່ອຊຸກຍູ້ວຽກງານ 3 ສ້າງເຂົ້າສູ່ລວງເລິກ ທີ່ຫາກໍ່ສຳເລັດໄປຫວ່າງມໍ່ໆນີ້ ນຳມາເຜີຍແຜ່ເຊິ່ງມີ ເນື້ອໃນບາງຕອນສຳຄັນ ວ່າ: 3 ສ້າງ ແມ່ນການເອົາມະຕິກອງປະຊຸມໃຫຍ່ ຄັ້ງທີ IX ຂອງພັກ ເຂົ້າສູ່ການປະຕິບັດ ຕົວຈິງ ໂດຍສະເພາະແມ່ນທິດນຳຍຸດທະສາດສ້າງຄວາມໝັ້ນຄົງໃຫ້ແກ່ລັດປະຊາທິປະໄຕ ປະຊາຊົນ ແລະ ທິດນຳ ກ່ຽວກັບ 4 ບຸກທະລຸໃຫ້ເປັນຈິງ.

 3 ສ້າງ ແມ່ນການປະຕິບັດອັນເລິກເຊິ່ງເຖິງຖອງໃນເງື່ອນໄຂໃໝ່. ສິ່ງນີ້ໝາຍຄວາມວ່າ 3 ສ້າງແມ່ນພາລະກິດ ຂອງທົ່ວພັກ, ທົ່ວລັດ ແລະ ທົ່ວປວງຊົນ ຫລື ແມ່ນພາລະກຳປະຫວັດສາດ ທີ່ຕ້ອງເຮັດໃຫ້ສຳເລັດ ເພື່ອສ້າງປະ ເທດເຮົາໃຫ້ມັ່ງຄັ່ງເຂັ້ມແຂງ, ປະຊາຊົນຮັ່ງມີຜາສຸກ, ສັງຄົມສາມັກຄີປອງດອງ ມີປະຊາທິປະໄຕຍຸຕິທຳ ແລະ ສີວິໄລ.

   3 ສ້າງ ແມ່ນການເສີມຂະຫຍາຍສິດເປັນເຈົ້າໃຫ້ແກ່ທ້ອງຖິ່ນ-ຮາກຖານ. ອັນນີ້ໝາຍຄວາມວ່າ ເນື້ອໃນສຳຄັນ ຂອງ 3 ສ້າງ ນັ້ນແມ່ນການແບ່ງຂັ້ນຄຸ້ມຄອງ ລະຫວ່າງກະຊວງ, ອົງການອ້ອມຂ້າງສູນກາງ ກັບຄະນະພັກ, ອົງການ ປົກຄອງທ້ອງຖິ່ນ (ແຂວງ, ເມືອງ, ບ້ານ) ໃຫ້ຈະແຈ້ງຕື່ມອີກ ແລະ ມີລັກສະນະຂາດຕົວ ຕາມທິດເພີ່ມສິດເພີ່ມ ຄວາມຮັບຜິດຊອບໃຫ້ແກ່ທ້ອງຖິ່ນ ຕິດພັນກັບການແບ່ງຜົນປະໂຫຍດໃຫ້ແກ່ທ້ອງຖິ່ນຢ່າງເໝາະສົມ.

    3 ສ້າງແມ່ນການຊຸກຍູ້ການພັດທະນາສູ່ບາດລ້ຽວໃໝ່. ສິ່ງດັ່ງກ່າວໝາຍເຖິງ: ຂະບວນການ 3 ສ້າງຕ້ອງເປັນ ກຳລັງແຮງຊຸກຍູ້ການສ້າງສາພັດທະນາຢູ່ແຕ່ລະທ້ອງຖິ່ນ, ຮາກຖານໃຫ້ມີການຫັນປ່ຽນອັນຕັ້ງໜ້າ, ມີປັດໄຈໃໝ່, ມີຜົນສຳເລັດໃໝ່ທີ່ເດັ່ນຊັດຍິ່ງຂື້ນ. ເຮັດ 3 ສ້າງຢູ່ບ່ອນໃດບ່ອນນັ້ນຕ້ອງມີການການພັດທະນາດີຂື້ນ, ບ້ານຊ່ອງມີ ໃບໜ້າໃໝ່. ນີ້ຈຶ່ງບັນລຸຈຸດໝາຍທີ່ວ່າແຂວງເປັນຫົວໜ່ວຍຍຸດທະສາດທີ່ໜັກແໜ້ນ, ເມືອງເປັນຫົວໜ່ວຍເຂັ້ມແຂງ ຮອບດ້ານ ແລະ ບ້ານເປັນຫົວໜ່ວຍພັດທະນາທີ່ຍືນຍົງ.

Additional information