ຂ່າວພາຍໃນກະຊວງ

ກອງປະຊູມເຈົ້າໜ້າທີ່ອາວຸໂສຂົນສົ່ງອາຊຽນ ຄັ້ງທີ 35 ຈັດຂື້ນທີ່ແຂວງ ຫລວງພະບາງ ສປປ ລາວ

ໂດຍພາຍໃຕ້ການເປັນເຈົ້າພາບຂອງ ສປປ ລາວ, ກອງປະຊຸມເຈົ້າໜ້າທີ່ອາວຸໂສອາຊຽນ ໄດ້ຈັດຂື້ນຢ່າງເປັນທາງການ ທີ່ແຂວງຫລວງພະບາງ ແຕ່ວັນທີ 28-30/5 /2013 ທີ່ຜ່ານມາ.ໂດຍການເປັນປະທານຂອງທ່ານ ລັດຕະນະມະນີ ຄູນນີວົງ, ລັດຖະມົນຕີຊ່ວຍວ່າການ ກະຊວງໂຍທາທິການ ແລະຂົນສົ່ງ, ມີບັນດາຜູ້ແທນທີ່ມາຈາກ 12 ປະເທດ ທັງມາຈາກກຸ່ມປະເທດອາຊຽນ ແລະ ມາຈາກປະເທດຄູ່ຮ່ວມເຈລະຈາເຂົ້າຮ່ວມ.

ກອງປະຊຸມໃນຄັ້ງນີ້ ໄດ້ພິຈາລະນາຮັບຮອງເອົາບັນດາບັນຫາທີ່ກໍານົດໄວ້ ໃນວາລະກອງປະຊຸມດັ່ງນີ້:

  1. ມະຕິຕົກລົງຂອງກອງປະຊຸມສຸດຍອດອາຊຽນ ຄັ້ງທີ 22 ທີ່ ປະເທດ ບຣູນາຍດາຣູຊາລາມ;
  2. ແຜນການຈັດຕັ້ງປະຕິບັດການເຂົ້າສູ່ປະຊາຄົມອາຊຽນ ແລະການຈັດຕັ້ງປະຕິບັດ ແຜນດໍາເນີນງານບຣູນາຍ;
  3. ກອງປະຊຸມໜ່ວຍວິຊາການອາຊຽນ ດ້ານການຂົນສົ່ງທາງອາກາດ;
  4. ກອງປະຊຸມໜ່ວຍວິຊາການອາຊຽນ ດ້ານການຂົນສົ່ງທາງບົກ ຄັ້ງທີ 22;
  5. ກອງປະຊຸມໜ່ວຍວິຊາການອາຊຽນ ດ້ານການອໍານວຍຄວາມສະດວກໃຫ້ແກ່ການຂົນສົ່ງ;
  6. ກອງປະຊຸມໜ່ວຍວິຊາການອາຊຽນ ດ້ານການຂົນສົ່ງທາງທະເລ;
  7. ການລາຍງານຜົນຂອງກອງປະຊຸມສະພາປະສານງານ ການຂົນສົ່ງຜ່ານແດນຄັ້ງທີ 4;
  8. ການຮ່ວມມືດ້ານການຂົນສົ່ງ ກັບຄູ່ຮ່ວມເຈລະຈາ ແລະບັນຫາອື່ນໆ.   

 

ພິທີເຊັນສັນຍາກໍ່ສ້າງທາງ 1G (ຊ່ວງທາງແຂວງສາລະວັນ) ແຕ່ຊາຍແດນແຂວງສະຫວັນນະເຂດ ຫາ ບ້ານນາດອນຂວາງ

ໃນ​ວັນ​ທີ 18 ພຶດສະພາ 2013 ​ໄດ້​ຈັດ​ພິທີ​ເຊັນ​ສັນຍາໂຄງການ​ກໍ່ສ້າງ​ທາງ 1G ​ແຕ່​ຊາຍ​ແດນ​ແຂວງສະຫວັນນະ​ເຂດ ຫາ ບ້ານ​ນາດ​ອນຂວາງ ​ແຂວງສາລະ​ວັນ ຍາວ 64,47 ກມ ລະຫວ່າງ ​ເຈົ້າ​ແຂວງ​ສາລະ​ວັນ ກັບ​ ກຸ່ມບໍລິສັດ​ດວງ​ຈະ​ເລີ​ນພັດທະນາ​ກໍ່ສ້າງ​ຈຳກັດ, ທີ່​ໂຮງ​ແຮມ​ລາວພລາຊ່າ ນະຄອນຫລວງ​ວຽງ​ຈັນ, ​ເປັນ​ກຽດ​ເຂົ້າ​ຮ່ວມ​ຂອງ​ທ່ານ ພົນ​ໂທ ດວງ​ໃຈ ພິຈິດ ກຳມະການ​ກົມ​ການ​ເມືອງ​ສູນ​ກາງ​ພັກ, ລັດຖະມົນຕີ​ວ່າການ​ກະຊວງປ້ອງ​ກັນ​ປະ​ເທດ, ທ່ານ ສົມ​ມາດ ພົລ​ເສນາ ກຳມະການ​ສູນ​ກາງ​ພັກ, ລັດຖະມົນ​ຕີວ່າການ​ກະຊວງໂຍທາ​ທິການ ​ແລະຂົນ​ສົ່ງ, ທ່ານ ຄຳ​ບຸ່ນ ດ້ວງປັນຍາ ກຳມະການ​ສູນ​ກາງ​ພັກ, ​ເຈົ້າ​ແຂວງ ແຂວງສາລະ​ວັນ, ທ່ານ ສັນຕິພາບ ພົມວິຫານ ລັດຖະມົນຕີ​ຊ່ວຍ​ວ່າການ​ກະ​ຊວງການ​ເງິ​ນ, ທ່ານ ດຣ ຄຳ​ລຽນ ພົນ​ເສນາ ລັດຖະມົນຕີຊ່ວຍ​ວ່າການ​ກະຊວງ ​ແຜນການ ​ແລະການ​ລົງທຶນ, ທ່ານ ຄຳ​ຜາຍ ສີ​ລາຊາ ຫົວໜ້າ​ກຸ່ມ​ບໍລິສັດ​ດວງ​ຈະ​ເລີ​ນພັດທະນາກໍ່ສ້າງຈຳກັດ, ພ້ອມ​ດ້ວຍ​ຫົວໜ້າ​ກົມ, ຮອງ​ກົມ ​ແລະ​ວິຊາ​ການ ​ທີ່​ກ່ຽວຂ້ອງ​ເຂົ້າ​ຮ່ວມ​ຢ່າງ​ພ້ອມ ພຽງ. ທ່ານ ​ແສງ​ດາ​ລິດ ຂັດຕິຍະ​ສັກ ຫົວໜ້າ​ພະ​ແນ​ກ ຍທຂ ​ແຂວງ​ສາລະ​ວັນ​ ກໍ​ໄດ້​ຂື້ນ​ງາຍ​ງານ ຄວາມ​ເປັນ​ມາ​ຂອງ​ໂຄງ​ການ, ​ເສັ້ນທາງ 1G ​(ແຍກ​ທາງ 15A ບ້ານ​ນາດ​ອນຂວາງ-ຊາຍ​​ແດນ​ແຂວງ​ສາລະ​ວັນ/​ແຂວງ​ສະຫວັນນະ​ເຂດ) ​ເປັນ​ເສັ້ນທາງ​ຫລວງ​ແຫ່ງ​ຊາດ ​ໄດ້​ຮັບ​ການ​ກໍ່ສ້າງ​ຂື້ນ​ໃນ​ສະ​ໃໝ​ສົງ​ຄາມ ຊຸມ​ປີ 1950 ໜ້າ​ທາງ​ໃນ​ປະຈຸ​ບັນ​ບາງ​ຊ້ວງ​ປູ​ດ້ວຍ​ດິນ​​ເຕີ​ລິດ, ບາງ​ຊ້ວງປູ​ດ້ວຍຫີ​ນມາ​ກາ​ດາມ​ເປັນ​ຊັ້ນໆ ທີ່​ມີ​ຂະໜາດ​ແຕກ​ຕ່າງ​ກັນ, ນອກ​ນີ້​ຍັງ​ມີ​ຂົວ​ນ້ອຍ, ​ໃຫຍ່​ຫລາຍ​ແຫ່ງ​ຕາມ​​ເສັ້ນທາງ​ນີ້ ​ແຕ່​ວ່າ, ​ໄດ້​ຖືກ​ທຳລາຍ​ໃນ​ສະ​ໃໝ​ສົງຄາມ ບໍ່​ສາມາດ​ນຳ​ໃຊ້​ໄດ້ ທີ່​ເຫັນ​ວ່າ​ໂດດ​ເດັ່ນ ​ແລະ​ເປັນ​ຂົວ​ໃຫຍ່​ກວ່າ​ໝູ່ ຍາວ​ປະທານ 200 ​ແມັດ ​ແມ່ນຂົວ​ຂ້າມ​ແມ່​ນ້ຳ​ເຊ​ໂດນ ຕັ້ງ​ຢູ່​ບ້ານ​ດ່ານ ​ເມືອງ ​ແລະ ​ແຂວງ​ສາລະ​ວັນ, ​ຂົວ​ນີ້​ແມ່ນ​ອອກ​ແບບ​ໂດຍ​ທ່ານ ປະທານ​ສຸພາ​ນຸວົງ (ຂົວ​ສຸພາ​ນຸວົງ) ​ເສັ້ນທາງ​ດັ່ງກ່າວ​ນີ້ມີ​ທີ່​ຕັ້ງ​ກວມ​ເອົາ ສອງ​ແຂ​ວງ ຄື: ​ແຂວງ​ສະຫວັນນະ​ເຂດ ​ແລະ​ແຂວງ​ສາລະ​ວັນ ມີ​ຄວາມ​ຍາວ​ທັງ​ໝົດ​ປະມານ 118.149 ກມ ​ໃນ​ນີ້ຂື້ນ​ກັບ​ແຂວງ​ສະຫວັນນະ​ເຂດ​ ຍາວ 53.675 ກມ ​ແລະ​ຂື້ນ​ກັບ​ແຂວງ​ສາລະ​ວັນ​ ຍາວ 64.47 ກມ ມີ​ຈຸດ​ເລີ້ມ​ຕົ້ນ​ຢູ່​ສາມ​ແຍກ​ທາງ​ເລກ 9 ກິ​ໂລ​ແມັດ​ທີ 161 ບ້ານ​ເວີນ​ຫົງ​ຄຳ ​ເມື​ອງພີນ ​ແຂວງ​ສະຫວັນນະ​ເຂດ ຈຸດ​ສຸດ​ທ້າຍ​ຂອງ​ເສັ້ນທາງ​ຢູ່​ສາມ​ແຍກ​ທາງ​ເລກ 15A ​ເປັນ​ເສັ້ນທາງ​ເຊື່ອມ​ຕໍ່​ໃສ່​ທາງ​ຫລວງ​ແຫ່ງ​ຊາດ​ເລກທີ 13 ​ໃຕ້ ຢູ່​ບ້ານ​ນາ​ປົ່ງ ​ເມືອງ​ຄົງ​ເຊ​ໂດນ ​ແຂວງ​ສາລະ​ວັນ ​ແລະ​ອີກ​ເບື້ອງ​ໜຶ່ງ​ເຊື່ອມ​ຕໍ່​ໃສ່​ທາງ​ເລກ 15B ອອກ​ສູ່​ແຂວງ​ກວາງ​ຈີ້ ສສ ຫວຽດນາມ. ​ເສັ້ນທາງ 1G ​ນີ້ ​ເປັນ​ເສັ້ນທາງ​ຍຸດ​ທະ​ສາດ​ເຊື່ອມ​ຕໍ່ ລະຫວ່າງ​ສອງ​ແຂວງ​ສະຫວັນ​ນະ​ເຂດ ​ແລະ​ແຂວງສາລະ​ວັນ ພ້ອມ​ທັງ​ຮັບ​ໃຊ້​ວຽກ​ງານ​ປ້ອງ​ກັນຊາ​ດປ້ອງ​ກັນ​ຄວາມ​ສະຫງົບ, ສາມາດ​ເຂົ້າ​ເຖິງ​ເຂດ​ຫ່າງ​ໄກ​ສອກຫລີກ ​ເພີ່ມ​ຂີດ​ຄວາມ​ສາມາດ ​ແລະ​ກາລະ​ໂອກາດ ທາງ​ດ້ານ​ການ​ໄປ-ມາ ລະຫວ່າງ​ທ້ອງ​ຖິ່ນເມືອງ-​ແຂວງ-ສູນ​ກາງ ​ແລະ​ປະ​ເທ​ດ​ເພື່ອນ​ບ້ານ​​ໄກ​ຄຽງ ສາມາດ​ຮອງ​ຮັບ​ການ​ພັດທະນາ ​ແລະ​ການ​ສົ່ງ​ເສີມ​ການ​ຂະຫຍາຍຕົວ​ທາງ​ດ້ານ​ເສດຖະກິດ-ສັງຄົມ, ການ​ຄ້າ ​ແລະ​ການ​ລົງທຶນ​ດ້ານ​ອຸດສາຫະກຳ ກະ​ສິກຳ ​ແລະ​ການທ່ອງທ່ຽວ. ສຳລັບ​ມາດຕະຖານ​ການ​ອອກ​ແບບ​ກໍ່ສ້າງ​ທາງ ​ເປັນ​ປະ​ເພດ​ທາງ​ຊັ້ນ IV ປູຢາງ 2 ຊັ້ນ ໜ້າ​ທາງ​ກວ້າງ 8ມ ໜ້າ​ທາງ​ລົດ​ແລ່ນ 7ມ  ​ແລະ​ບ່າ​ທາງ​ປູຢາງ 2 ຊັ້ນ ກວ້າງ​ເບື້ອງ​ລະ 0,50ມ ສຳລັບ​ເຂດຜ່ານ​ຊຸມ​ຊົນ ​ໄດ້​ອອກ​ແບບ​ກ້ວາງ 11ມ. ງົບປະມານ​ໃນ​ການ​ກໍ່ສ້າງ 548,676,126,922 ຕື້ກີບ ​ໄລຍະ​ເວ​ລາ​ການ​ກໍ່ສ້າງ 48 ​ເດືອນ ຫລື 4 ປີ ຮັບ​ເໝົາ​ກໍ່ສ້າງ​ໂດຍ​ກຸ່ມ​ບໍລິສັດດວງ​ຈະ​ເລີ​ນພັດທະນາ​ກໍ່ສ້າງ​ຈຳກັດ ມີ​ສຳນັກງານ​ຕັ້ງ​ຢູ່​ບ້ານ​ໂພນ​ທອງ ​ເມືອງ​ໄຊ​ເສດ​ຖາ ນະຄອນຫລວງ​ວຽງ​ຈັນ.

ຍີ່ປຸ່ນ ຊ່ວຍເຫຼືອກ່ຽວກັບ ການຄຸ້ມຄອງຈະລາຈອນ ທາງອາກາດຮູບແບບໃໝ່

  ຄະນະປະທານກອງປະຊຸມ

  ຄະນະຜູ້ແທນກອງປະຊຸມ ຈາກ ສປປ ລາວ

  ຄະນະຜູ້ແທນກອງປະຊຸມ ຈາກ ສສ ຫວຽດນາມ

  ຄະນະຜູ້ແທນກອງປະຊຸມ ຈາກ ຣາຊະອານາຈັກ ກຳປູເຈຍ

ໃນ​ວັນ​ທີ 16-17 ພຶດສະພາ 2013 ນີ້ ຢູ່​ທີ່​ສູນການ​ຮ່ວມມື​ສາກົນ​ ​ແລະຝຶກ​ອົບຮົມ ຫລັກ 5 ລາວ-ຍີ່ປຸ່ນ ​ໄດ້​ຈັດ​ກອງ​ປະຊຸມ ປະ​ເມີນ​ຜົນ​ກາງ​ສະ​ໄໝ ​ໂຄງການ​ພັດທະນາ​ລະບົບ​ວິທະຍຸ​ການບິ​ນ ​ແລະ​ການ​ຄຸ້ມ​ຄອງ ການ​ຈະລາຈອນ​ທາງ​ອາກາດ​ຮູບ​ແບບ​ໃໝ່ ລະຫວ່າງ ລາວ, ຫວຽດນາມ, ກຳປູ​ເຈຍ ​ແລະ​ຍີ່ປຸ່ນ ຄັ້ງ​ທີ 2, ​ໂດຍ​ການ​ເປັນ​ປະທານ​ຂອງ​ທ່ານ ຢາ​ກົວ ລໍ​ປາງ​ກາວ ຫົວໜ້າ​ກົມ​ການບິນພົນລະ​ເຮືອນ ກະຊວງ ຍທຂ ມີ​ຜູ້ຕາງໜ້າ​ຈາກ​ການຈັດ​ຕັ້ງ​ທີ່​ກ່ຽວຂ້ອງ ທັງ​ພາຍ​ໃນ ​ແລະຕ່າງປະ​ເທດ ​ເຂົ້າ​ຮ່ວມ 84 ທ່່ານ. ​ທ່ານ ສົມ​ມາດ   ພົລ​ເສນາ, ລັດຖະມົນ​ຕີ​ວ່າການ​ກະຊວງ ​ໂຍທາ​ທິການ ​ແລະ ຂົນ​ສົ່ງ ​​ໄດ້​ໃຫ້ກຽດກ່າວ​​ເປີດ​ກອງ​ປະຊຸມ ໃນ​ໂອກາດ​ນີ້ດ້ວຍ, ທ່ານ​ໄດ້​ຢັ້ງຢືນທັດສະນະ​ຂອງກະຊວງ ຍທຂ ​​ແລະ ໃຫ້ຄວາມສຳຄັນຕໍ່​ຄວາມ​ປອດ​ໄພ​ການບິນ ​ໂດຍ​ໄດ້​ຊີ້​ນຳ​ໃຫ້​ ກົມ​ການ​ພົນລະ​ເຮື​ອນ ສ້າງ​ແຜນ​ພັດທະນາລະບົບ​ວິທະຍຸ​ການບິນ ​ແລະ​ການ​ຄຸ້ມ​ຄອງ​ການ​ຈະລາຈອນ​ທາງ​ອາກາດ ຮູບ​ແບບ​ໃໝ່ ​ແລະ ​ໃຫ້​ມີ​ການຈັດ​ຕັ້ງ​ປະຕິບັດ​ຢ່າງ​ເປັນ​ຮູບ​ປະ​ທຳ. ເຊິ່ງແຜນ​ພັດທະນາ​ດັ່ງກ່າວ ​ໄດ້​ຖືກ​ຮັບຮອງ​ຈາກ​ລັດຖະບານ ​ໃນ​ເດືອນ ຕຸລາ ປີ 2012 ​ໂດຍ​ມີ​ກຳນົດ​ການຈັດ​ຕັ້ງ​ປະຕິບັດ​ຢູ່​ສອງ​ໄລຍະ ຄື: ​ໄລ​ຍະ​ທີ​ໜຶ່ງ: ​ແຕ່ປີ 2013 ​ເຖິງ​ປີ 2015 ​ແລະ ​ໄລ​ຍະ​ທີ​ສອງ: ​ແຕ່​ປີ 2016 ​ເຖິງ 2020. ​ເພື່ອ​ສົ່ງ​ເສີມ​ການຈັດ​ຕັ້ງ​ປະຕິບັດ​ແຜນ​ພັດທະນາ​ດັ່ງກ່າວ ​ໃຫ້​ບັນລຸ​ເປົ້າ​ໝາຍ, ລັດຖະບານ​ຍີ່ປຸ່ນ ​ໄດ້​ໃຫ້ການ​ຊ່ວຍ​ເຫຼືອລ້າ ​ໂຄງການ​ສ້າງ​ຄວາມ​ເຂັ້ມ​ແຂງ ທາງ​ດ້ານ​ບຸກຄະລາ​ກອນ  ​ໃນ​ການ​ຂ້າມ​ຜ່ານ​ສູ່​ລະບົບ​ວິ​ທະ​ຍຸ​ການບິນ ​ແລະ ການ​ຄຸ້ມ​ຄອງການຈະລາຈອນ​ທາງ​ອາກາດ​ຮູບ​ແບບ​ໃໝ່ ​ແກ່ສາມ​ປະ​ເທດ​ ຄື: ສປປ ລາວ, ຫວຽດນາມ ​ແລະ​ກຳປູ​ເຈຍ, ນັບ​ແຕ່​ປີ 2011-2015 (5ປີ) ມີໜ້າ​ວຽກສຳ​ຄັນ ​ດັ່ງ​ນີ້:

- ດ້ານ​ດານ​ອອກ​ແບບ​ແຜນ​ທີ່​ວົງ​ຈອນ​ຂື້ນ-ລົງ​ ສະໜາມ​ບິນ​ດ້ວຍ​ດາວ​ທຽມ;

- ດ້ານ​ການກໍ່ສ້າງ​ອາຈານ​ສອນ ວິຊາ​ຄຸ້ມ​ຄອງ​ການ​ຈະລາຈອນ​ທາງ​ອາກາດ ​ແລະ ວິທະຍຸ​ການບິນ;

- ດ້ານ​ການ​ສ້າງ​ລະບົບ​ຄຸ້ມ​ຄອງຄວາມ​ປອດ​ໄພ​ການ​ຈະລາຈອນ​ທາງ​ອາກາດ ​ໂຄງການ​ນີ້ ​ມີ​ມູນ​ຄ່າ 5 ລ້ານ​ໂດ​ລາສະຫະລັດ. ກອງ​ປະຊຸມ​ຄັ້ງ​ນີ້ ສາມ​ປະ​ເທດ ຍັງ​ໄດ້​ສ້າງ​ແຜນ​ປະຕິບັດ​ງານ​ຮ່ວມກັນ ​ແຕ່​ປີ 2013-2015 ​ເຊິ່ງ​ເນັ້ນ​ໜັກ​​ໃສ່ :​

- ການ​ຜັນ​ຂະຫຍາຍ​ເສັ້ນທາງ​ບິນ, ການ​ສ້າງ​ວົງ​ຈອນ​ກາ​ນບິນ​ຂື້ນ-ລົງ ສະໜາມ​ບິນ​ດ້ວຍ​ດາວ​ທຽມ ​ໃນ​ສະໜາມ​ບິນ​ອື່ນ​ນອກຈາກ​ວຽງ​ຈັນ ​ແລະ ປາກ​​ເຊ, ພ້ອມ​ນີ້​ຍັງ​ໄດ້​ຄົ້ນ​ ຄ້ວາ​ເຖິງການ​ນຳ​ໃຊ້​ເຮື​ອບິນ ​ເພື່ອ​ບິນ​ກວດ​ສອບ​ຄວາມ​ຖືກຕ້ອງ ​ແລະຄວາມ​ຊັດ​ເຈນ ຂອງ​ການ​ອອກ​ແບບ​ວົງ​ຈອນບິນ;

- ສື​ບຕໍ່​ກໍ່ສ້າງ​ອາຈານ​ສອນ​ລະດັບ​ສູງ;

- ການຈັດ​ຕັ້ງ​ປະຕິບັດລະບົບ​ຄຸ້ມ​ຄອງ​ຄວາມ​ປອດ​ໄພ​ການບິ​ນ ຂອງ​ກອງ​ວິຊາ​ການຄຸ້ມ​ຄອງ​ການ​ຈະລາຈອນ​ທາງ​ອາກາດ.

ກອງປະຊຸມໜ່ວຍວິຊາການພິເສດຫລາຍຝ່າຍ ດ້ານຄວາມປອດໄພທາງຖະໜົນ

ໃນ​ວັນ​ທີ່ 14 ພຶດສະພາ 2013 ຢູ່​ທີ່​ໂຮງ​ແຮມ​ດອນ​ຈັນ​ພາເລດ ​ໄດ້ຈັດ​ກອງ​ປະຊຸມ ໜ່ວຍ​ວິຊາ​ການ​ຫລາຍຝ່າຍ​ພິ​ເສດອາ​ຊຽນ ດ້ານ​ຄວາມ​ປອດ​ໄພ​ທາງ​ຖະໜົນ ຄັ້ງທີ 4 ຂື້ນ, ​ໂດຍ​ການ​ເປັນ​ປະທານ​ຂອງ​ທ່ານ ລັດຕະນະມະນີ ຄູນ​ນີວົງ ລັດຖະມົນ​ຕີ​ຊ່ວຍ​ວ່າການ​ກະຊວງ ​ໂຍທາ​ທິການ ​ແລະ ຂົນ​ສົ່ງ, ທ່ານ ນ. ມີ​ກາສາ​ລີ ວິນ​ຍາ​ຕີ ຫົວໜ້າ​ເລຂາ​ອາ​ຊຽນ, ທ່ານ ບົວ​ເພັດ ​ໄຊ​ຍະ​ສານ ຮອງ​ຫົວໜ້າ​ ກົມຂົນ​ສົ່ງ ກະຊວງ ຍທຂ ພ້ອມ​ດ້ວຍ​ຄະນະ​ຜູ້​ແທນ​ທີ່​ກ່ຽວຂ້ອງ​ຈາກ 10 ປະ​ເທດ​ອາ​ຊຽນດ້ວຍ​ກັນ​ຄື: ບຼູ​ໄນ, ກຳປູ​ເຈຍ,​ ອິນ​ໂດ​ເນ​ເຊຍ, ສປປ ລາວ, ມາ​ເລ​ເຊຍ, ມຽນມາ, ຟີ​ລິບ​ປິນ, ສີ​ງກະ​ໂປ,​​ ໄທ ​ແລະ ຫວຽດນາມ. ປະທານ​ກອງ​ຊຸມ ກໍ​ໄດ້​ໃຫ້​ຄະນະ​ຜູ້​ແທນ​ຂອງ​ແຕ່ລະ​ປະ​ເທດ ​ໄດ້​ທົບ​ທວນຄືນ​ວຽກ​ງານ​ທີ່​ຜ່ານ​ມາ ​ແລະ​ວາງ​ແຜນ​ກຳ​ເນີນ​ງານ​ໃນ​ຕໍ່ໜ້າ ກອງ​ປະຊຸມ​ໄດ້​ເປັນ​ເອກະ​ພາບ​ກັນ​ດັ່ງ​ນີ້: 1)  ການ​ສ້າງ​ແຜນ​ດຳ​ເນີນ​ງານ ​ແຫ່ງ​ຊາດ ​ແຕ່​ສົກ​ປິ 2012 - 2020 ດ້ານ​ຄວາມ​ປອດ​ໄພ​ທາງ​ຖະໜົນ ຂອງ​ປະ​ເທດ​ສະມາຊິກ​ອາ​ຊຽນທັງ​ໝົດ. 2) ການ​ສ້າງ​ແຜນ​ຍຸດ​ທະ​ສາດ ຂອງ​ພາກ​ພື້ນ​ອາ​ຊຽນ ​ແຕ່​ສົກ​ປີ 2012 – 2020 ​ດ້ວຍ​ຄວາມ​ປອດ​ໄພ​ທາງ​ຖະໜົນ. 3) ການ​ສ້າງ​ຕັ້ງ​ສູນ​ຄວາມ​ປອດ​ໄພ​ທາງ​ຖະໜົນ​ອາ​ຊຽນ ຊື່​ງ ສປປ ລາວ ​ເປັນ​ຜູ້​ຮັບຜິດຊອບ​ຂຽນ​ໂຄງການ. 4) ສະພາບ​ການຈັດ​ຕັ້ງ​ປະຕິບັດ ​ໂຄງການ​ຊ່ວຍ​ເຫຼືອ​ທາງ​ດ້ານ​ເຕັກນິກ ຂອງ​ທະນາຄານ ພັດທະນາ​ອາຊີ​ກ່ຽວ​ກັບ​ການ​ປັບ​ປຸງ​ຄວາມ​ປອດ​ໄພ​ທາງ​ຖະໜົນ​ໃນ​ອາ​ຊຽນ.

Additional information