ຂ່າວພາຍໃນກະຊວງ

ກອງປະຊຸມຜັນຂະຫາຍາຍຜົນສຳເລັດຂອງກອງປະຊຸມ ຈັດຕັ້ງທົ່ວປະເທດ ຄັ້ງທີ 9 ຂອງພັກ, ກະຊວງ ຍທຂ

 ໃນວັນທີ 20 ທັນວາ 2012 ຢູ່ທີ່ຫ້ອງປະຊຸມເບີ 01 ​ໄດ້ຈັດກອງປະຊຸມຜັນຂະຫຍາຍຜົນສຳເລັດ ຂອງກອງປະຊຸມຈັດຕັ້ງ ທົ່ວປະເທດ ຄັ້ງທີ 9 ຂອງພັກ, ​ໂດຍການເປັນປະທານຂອງທ່ານ ສົມມາດ ພົລເສນາ ລັດຖະມົນຕີວ່າການກະຊວງໂຍທາທິການແລະ ຂົນສົ່ງ,​ ​ໂດຍເປັນກຽດເຂົ້າຮ່ວມຂອງທ່ານ ຈັນສີໂພສີຄຳເລຂາທິການສູນກາງພັກ,​ ຫົວໜ້າຄະນະຈັດຕັ້ງສູນກາງພັກ,​ ມີບັນດາຫົວໜ້າກົມ, ຫ້ອງການ​,​ ອົງການ, ສະຖາບັນ, ສະພາວິທະຍາສາດ,​ ກອງວິຊາການ, ສູນຝຶກແລະພະນັກງານ ທີ່ເຮັດວຽກຈັດຕັ້ງບໍລິຫານຂອງແຕ່ລະພາກສ່ວນເຂົ້າຮ່ວມທັງໝົດ 125 ທ່ານ.

      ໃນນີ້ ທ່ານ ບຸນຈັນ ສິນທະວົງ ລັດຖະມົນຕີຊ່ວຍວ່າການ ກໍໄດ້ແຜີແຜ່ບົດລາຍງານ​​ຜົນສຳເລັດຂອງ ກອງປະຊຸມຈັດຕັ້ງ ທົ່ວປະເທດ ຄັ້ງທີ 9 ຂອງພັກ (ສະບັບຄັດຈ້ອນ) ​ເພື່ອເຮັດ​​​ໃຫ້ພະນັກງານ​, ລັດຖະກອນ, ສະມາຊິກພັກ ມີຄວາມຮັບຜິດຊອບໃນໜ້າທີ່ວຽກງານວິຊາສະເພາະຈັດຕັ້ງຂອງຕົນໃຫ້ມີຄວາມກ້າວໜ້າໄປເລື້ອຍໆ, ຈາກນັ້ນ, ທ່ານບຸນກອງ ໜູຟອງສະໝຸດ ທີ່ປຶກສາລັດຖະມົນຕີ ກໍໄດ້ເຜີຍແຜ່ບົດລາຍງານ​​ແຜນບຳລຸງ-ກໍ່ສ້າງພະນັກງານຫຼັກແຫຼ່ງ, ​ສືບທອດການນຳແຕ່ປີ 2006-2010, ​ແຜນບຳລຸງ-ພະນັກງານແຕ່ນີ້ເຖີງປີ 2020 ​ແລະຕອນບ່າຍກໍໄດ້ຮັບຟັງການໂອ້ລົມຂອງທ່ານ ຈັນສີໂພສີຄຳເລຂາທິການສູນກາງພັກ, ຫົວໜ້າຄະນະຈັດຕັ້ງສູນກາງພັກ, ​ເພື່ອເປັນການທົບທວນຄືນສະພາບການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງທີ VIII ​ແລະຄັ້ງທີ IX ຂອງພັກ,​ ກອງປະຊຸມ ວຽກງານຈັດຕັ້ງ ທົ່ວປະເທດ ຄັ້ງທີ 9 ​ແລະ ມະຕິກອງປະຊຸມໃຫຍ່ ຄັ້ງທີ III ຂອງອົງຄະນະພັກກະຊວງ ຍທຂ ກ່ຽວກັບວຽກງານຈັດຕັ້ງກໍ່ສ້າງພັກ-ພະນັກງານໃນຂະ​​ແໜງການ ຍທຂ. ​ເພື່ອຈັດຕັ້ງປະຕິບັດໃນຊຸມປີຕໍ່ໜ້າ (2013- 2015), ​ແນ່ໃສ່ເຮັດໃຫ້ຂົງເຂດວຽກງານຈັດຕັ້ງກໍ່ສ້າງພັກ-ພະນັກງານ ຢູ່ໃນຂະແໜງການໂຍທາທິການແລະ ຂົນສົ່ງ ມີການຫັນປ່ຽນດີຂື້ນ ດ້ວຍຈິດໃຈ 4 ບຸກທະລຸຂອງພັກ ສາມາດຕອບສະໜອງໄດ້ຕາມຄວາມຮຽກຮ້ອງຕ້ອງການດ້ານບຸກຄະລາກອນໃຫ້ແກ່ ການພັດທະນາວຽກງານຂະແໜງການໂຍທາທິການແລະ ຂົນສົ່ງໃນສະເພາະໜ້າແລະ ຍາວນານ.

 

ພິທີເຊັນສັນຍາໂຄງການກໍ່ສ້າງທາງແຕ່ ປາກລາຍ-ພູດູ່ ແຂວງໄຊຍາບູລີ

ໃນວັນທີ່ 30 ພະຈິກ 2012 ຢູ່ທີ່ໂຮງແຮມລາວພລາຊາ ນະຄອນຫຼວງວຽງຈັນໄດ້ຈັດພິທີ​​ເຊັນສັນຍາໂຄງການກໍ່ສ້າງທາງແຕ່ປາກລາຍ-ພູດູ່ແຂວງໄຊຍະບູລີ ໂດຍເປັນກຽດເຂົ້າຮ່ວມຂອງທ່ານ ບຸນຈັນ ສິນທະວົງ ລັດຖະທົນຕິຊ່ວຍວ່າ ການກະຊວງ ຍທຂ, ທ່ານ ພົງສະຫວັນ ສິດທະວົງ ຄະນະພັກແຂວງ ຮອງເຈົ້າແຂວງໄຊຍະບູລີ, ທ່ານ ນາງ ທິບພະວັນ ສຸພາມິດກິດຈາ, ​ເອກອັກຄະລັດຖະທູດໄທປະຈຳລາວ, ທ່ານ ອັກຄະສີລິ ບູລະນະສີລິ, ຜູ້ອຳນວຍການອົງ ການນິດາແຫ່ງລາຊະອານາຈັກໄທ. ​ເສັ້ນທາງປາກລາຍ-ພູດູ່, ​ແຂວງໄຊຍະບູລີ, ມີຈຸດເລີ້ມຕົ້ນ ຢູ່ສາມແຍກ ບ້ານແກ້ງສ້າວ    (ທາງເບີ 4) ​ເມືອງປາກລາຍ, ​ແຂວງໄຊຍະບູລີໄປເຖີງພູດູ່ (ຊາຍແດນໄທ), ມີຄວາມຍາວ 27,99 ກິໂລແມັດແລະທາງຮ່ອມເຂົ້າບ້ານບວມເລົາແລະບ້ານຜາແກ້ວ ມີຄວາມຍາວ​ 4,21 ກິໂລແມັດ ລວມທັງໝົດ: 32,20 ກິໂລແມັດເສັ້ນທາງແຕ່ປາກລາຍ-ພູດູ່ ປັດຈຸບັນເປັນທາງດີແດງ ຊີ່ງຈະໄດ້ຮັບການຍົກລະດັບເປັນທາງປູຢາງອັດສຟຼາ (AC) ​ເປັນເສັ້ນທາງທີ່ມີຄວາມສຳຄັນໃນການພັດທະນາເສດຖະກິດ-ສັງຄົມ ພື້ນຖານໂຄງລ່າງຂອງໄຊຍະບູລີແລະ​​ເປັນ​​ເສັ້ນທາເຊື່ອມຕໍ່ອອກໄປສູ່ປະເທດໄທ ຊື່ໃນຕໍ່ໜ້າຢູ່ຊາຍແດນລາວ-​ໄທ ຈະໄດ້ຍົກລະດັບຈາກດ່ານທ້ອງຖິ່ນເປັນດ່ານສາກົນ ຈະເຮັດໃຫ້ມີການຄ້າຂາຍແລກປ່ຽນສີ້ນຄ້າຫຼາຍຂື້ນກວ່າເກົ່າ. ຜ່ານມາເຖີງປະຈຸບັນເສັ້ນທາງດັ່ງກ່າວ ຍາມລະດູແລ້ງເປັນຝຸ່ນປົກຫຸ້ມທົ່ວເສັ້ນທາງ, ບ້ານ, ​ເຮືອນແລະການປູກຝັງຂອງປະຊາຊົນ ຍາມລະດູຝົນນ້ຳອັ່ງຖ້ວມ ໜ້າທາງເປັນຂຸ່ມ, ​ເປັນບໍ່ເຮັດ​​ໃຫ້ມີຄວາມຫຍຸ້ງຍາກໃນການສັນຈອນໄປມາຂອງປະຊາຊົນ ຢູ່ດຂກດັ່ງກ່າວຫຼາຍ. ງົບປະມານໃນການກໍ່ສ້າງແມ່ນລັດຖະບານແຫ່ງ ສປປ ລາວໄດ້ຂໍທຶນສະໜັບສະໜູນ ຈາກສຳນັກງານຄວາມຮ່ວມມືພັດທະນາເສດຖະກິດ ກັບປະເທດເພື່ອນບ້ານ ຫຼືເອີ້ນວ່າ: ອົງການນິດາແຫ່ງລາຊະອານາ ຈັກໄທໃນການປັບປຸງຍົກລະດັບເສັ້ນທາງໃຫ້ໄດ້ມາດຕະຖານ. ​ໃນວັນທີ 02 ມີຖຸນາ 2012 ລັດຖະບານລາວໄດ້ເຊັນສັນຍາຮັບເອົາການຊ່ວຍເຫຼືອດ້ານກາເງິນ ກັບອົງການນິດາໃນມູນຄ່າທັງໝົດ: 718 ລ້ານບາດໄທ, ​ແບ່ງເປັນທຶນຊາວເຫຼືອລ້າ 20% ​ເທົ່າກັບ 143,6 ລ້ານບາດແລະທຶນກູ້ຢືມດອກເບັ້ຍຕ່ຳ 80% ​ເທົ່າກັບ 574,4 ລ້ານບາດ ຊື່ງການຊ່ວຍດັ່ງກ່າວເປັນການປະຕິບັດຍຸດທະສາດຂອງການຮ່ວມມືໃນການພັດທະນາ ລະຫວ່າງປະເທດເພື່ອນບ້ານໂດຍສະເພາະ ສປປ ລາວແລະລາຊະອານາຈັກໄທໃນການປັບປຸງແລະຂະຫຍາຍຕາໜ່າງເສັ້ນທາງຫຼວງ ຂອງ ສປປ ລາວໃຫ້ເຊື່ອມຕໍ່ກັບປະເທດໄທແລະອະນຸພາກພື້ນແລະອີກດ້ານໜຶ່ງກໍເພື່ອແນ່ໃສ່ຟື້ນຟູແລະພັດທະ ນາ​​ເສດຖະກິດຂອງ ສປປ ລາວໃຫ້ບັນລຸເປົ້າໝາຍຍຸດທະສາດ ຂອງ ລັດຖະບານເພື່ອຫຼຸດພົ້ນຈາກຄວາມດ້ອຍພັດທະນາ ພາຍໃນປີ 2020. ​ໂຄງການດັ່ງກ່າວ ພາຍຫລັງການກໍ່ສ້າງສຳເລັດ​​ແລ້ວ ຈະນຳເອົາຜົນປະ​​ໂຫຍດອັນມະຫາສານ ມາໃຫເພໍ່ແມ່ປະຊາຊົນແລະເປັນສີ່ງອຳນວຍຄວາມສະດວກຢ່າງສູງ ​​ເພື່ອໃຫ້ເມືອງປາກລາຍແຂວງໄຊຍະບູລີມີຄວາມຈະເລີນສີວິໄລເຊັ່ນ: 1) ມີເສັ້ນທາງທີ່ມີມາດຕະຖານສູງ ຮັບປະກັນຄົມມະນາຄົມ ຂົນສົ່ງທຽວໄດ້ຕະຫລອດປີ ທັງມີຄວາມປອດໄພແລະມີຄວາມສວຍງາມ; 2) ປະຊາຊົນທີ່ນຳໃຊ້ເສັ້ນທາງມີຄວາມສະດວກ  ໃນການຂົນສົ່ງຜົນຜະລິດຂອງຕົນເຂົ້າສູ່ທ້ອງຕະຫລາດໃນຕົວເມືອງແລະສົ່ງອອກຊາຍແດນລະຫວ່າງປະເທດ; 3) ​ເມື່ອມີເສັ້ນທາງດີໄປມາສະດວກ ຈະເປັນການດຶງດູດເອົານັກທຸລະກິດເຂົ້າມາລົງທຶນໃນຂົງເຂດເມືອງປາກລາຍຫຼາຍຂື້ນ ຊື່ງຈະມີໂຮງຈັກໂຮງງານເກີດຂື້ນແລະປະຊາຊົນຈະມີວຽກຮັດງານທຳ  ແລະຈະມີລາຍຮັບໃນການພັດທະນາເສດຖະກິດຄອບຄົວຂອງຕົນ. ຜົນປະໂຫຍດຈາການດຳເນີນໂຄງການກໍ່ສ້າງທາງດັ່ງກ່າວ ບໍ່ຳງແຕ່ເຮັດໃຫເປະຊາຊົນ ທີ່ອາໄສຢູ່ຕາມຊົນນະບົດຫ່າງໄກສອກຫຼີກ ມີຄວາມສະດວກສະບາຍໃນດ້ານຄົມມະນາຄົມຂົນສົ່ງແລະຈໍລະຈອນສີນຄ້າດທົ່ານັ້ນ, ​ແຕ່ຍັງເປັນການສົ່ງເສີມການພັດທະນາຮອບດ້ານເພື່ອບັນລຸແຜນຍຸດທະສາດຂອງຊາດໃນການລົບລ້າງ ຄວາມທຸກຍາກ ຂອງປະຊາຊົນບັນດາເຜົ່າໃນທົ່ວປະເທດອີກດ້ວຍ.

 

ປາຖະກະຖາ ວັນຊາດທີ 2 ທັນວາຄົບຮອບ 37 ປີ ແລະວັນເກີດ ຂອງທ່ານປະທານ ໄກສອນ ພົມວິຫານ ຄົບຮອບ 92 ປີ

ເນື່ອງໃນໂອກາດວັນຊາດທີ 2 ທັນວາຄົບຮອບ 37 ປີແລະ ວັນເກີດປະທານໄກສອນ ພົມວິຫານຄົບຮອບ 92 ປີໃຫ້ມີຄວາມໝາຍ, ມີເນື້ອໃນເລິກເຊິ່ງແລະມີບັນຍາກາດອັນຟົດຟື້ນ. ໃນຕອນເຊົ້າຂອງວັນທີ 13 ທັນວາ 2012 ຄະນະພັກ, ຄະນະນຳ ກະຊວງໂຍທາທິການແລະຂົນສົ່ງພ້ອມດ້ວຍຄະນະພັກ ບັນດາຮາກຖານ, ຫົວໜ້າ ຫ້ອງການ, ກົມ,ອົງການ, ສະຖາບັນ, ສະພາວິທະຍາສາດ-ເຕັກນິກ, ກອງວິຊາການ, ສູນຝຶກ, ຫ້ອງການດັດສົມນໍ້າປະປາແລະ ປະທານສາມອົງການຈັດຕັ້ງມະຫາຊົນຂັ້ນກະຊວງໄດ້ເຂົ້າຮ່ວມວາງພວງມາລາຢູ່ພິພິຕະພັນໄກສອນພົມວິຫານພາຍໃຕ້ການນຳພາຂອງທ່ານ ສົມມາດ ພົລເສນາ ກຳມະການສູນກາງພັກ ແລະຄະນະພັກ, ລັດຖະມົນຕີວ່າການກະຊວງໂຍທາທິການ ແລະຂົນສົ່ງ.

      ຫຼັງຈາກນັ້ນ, ທີ່ີຫ້ອງປະຊຸມໃຫຍ່ຂອງກະຊວງໂຍທາທິການແລະຂົນສົ່ງກໍໄດ້ຈັດພິທີປາຖະກະຖາວັນຊາດທີ 2 ທັນວາຄົບຮອບ 37 ປີແລະວັນເກີດປະທານໄກສອນ ພົມວິຫານຄົບຮອບ 92 ປີໂດຍການເຂົ້າຮ່ວມ ຂອງ ທ່ານ ສົມມາດ ພົລເສນາ ກຳມະການສູນກາງພັກ ແລະຄະນະພັກລັດຖະມົນຕີວ່າການ ກະຊວງໂຍທາທິການ ແລະຂົນສົ່ງ ພ້ອມດ້ວຍຄະນະພັກ, ຄະນະນຳກະຊວງ ແລະສະມາຊິກພະນັກງານອ້ອມຂ້າງກະຊວງເຂົ້າຮ່ວມ. ໃຫ້ກຽດປາຖະກະຖາໂດຍທ່ານດຣໄຊສົມພອນພົມວິຫານກຳມະການສູນກາງພັກ, ຮອງປະທານສະພາແຫ່ງ ຊາດ. ຊຶ່ງທ່ານໄດ້ຫວນຄືນມູນເຊື້ອອັນອົງອາດກ້າຫານ ຂອງປະຊາຊົນລາວບັນດາເຜົ່າ ເຮັດໃຫ້ພະນັກງານ, ສະມາຊິກພັກ ພາຍໃນອົງຄະນະພັກກະຊວງໂຍທາທິການແລະຂົນສົ່ງມີຄວາມຮັບຮູ້, ເຂົ້າໃຈແລະມີຄວາມເອກອ້າງ ທະນົງໃຈຕໍ່ມູນ ເຊື້ອ ປະຫວັດສາດແລະວິລະກຳຂອງຊາດ, ການປົກປັກຮັກສາແລະສ້າງສາພັດທະນາປະເທດຊາດ ໃນໄລຍະ 37 ປີຜ່ານມາ. ເພື່ອເປັນການລະນຶກເຖິງຄວາມຮູ້ບຸນຄຸນຕໍ່ຜົນງານ, ຄຸນງາມຄວາມດີອັນໃຫຍ່ຫຼວງຂອງ ປະທານ ໄກສອນ ພົມວິຫານ ຜູ້ນຳທີ່ເຄົາລົບຮັກຂອງພວກເຮົາ ໃນການຮ່ຳຮຽນເອົາຄຸນສົມບັດ, ທັດສະນະ ປະຕິວັດ, ແບບ ແຜນດຳລົງຊີວິດ ແລະອຸດົມຄະຕິປະຕິວັດຂອງ ປະທານ ໄກສອນ ພົມວິຫານ. ເປັນການສຶກສາອົບຮົມໃຫ້ພະນັກ ງານສະມາຊິກພັກທຸກຄົນໄດ້ເສີມຂະຫຍາຍມູນເຊື້ອຕໍ່ສູ້ອັນອົງອາດກ້າຫານແລະມູນເຊື້ອສາມັກຄີພາຍໃນຊາດພາຍໃຕ້ການນຳພາຂອງພັກປະຊາຊົນປະຕິວັດລາວໃນການເພີ່ມທະ ວີຄວາມຮັບຜິດຊອບແລະເປັນເຈົ້າການຂອງ ຖັນແຖວພະນັກງານສະມາຊິກພັກພາຍໃນກະຊວງ ໂຍທາທິການ ແລະ ຂົນສົ່ງ ໃນການສືບຕໍ່ຈັດຕັ້ງປະຕິບັດມະຕິ ກອງປະຊຸມໃຫຍ່ຄັ້ງທີ IX ຂອງພັກກໍຄືແຜນພັດທະນາເສດຖະກິດ-ສັງຄົມ 5 ປີຄັ້ງທີ VII ຂອງລັດ. ມະຕິກອງ ປະຊຸມໃຫຍ່ຄັ້ງທີ III ຂອງອົງຄະນະພັກກະຊວງ ແລະມະຕິກອງປະຊຸມໃຫຍ່ ຂອງບັນດາຮາກຖານພັກ ໃຫ້ປາກົດຜົນເປັນຈິງ.

ຜົນສຳເລັດຂອງການຕ້ອນຮັບ ຄະນະຜູ້ແທນທີ່ເຂົ້າຮ່ວມກອງປະຊູມ ອາຊີ-ຢູໂຣບ ຄັ້ງທີ 9 ທີ່ ສປປ ລາວ

 ກອງປະຊຸມສຸດຍອດອາຊີ-​ເອີຣົບຫຼື (ASEM) ຄັ້ງທີ IX ​ໂດຍແມ່ນສປປລາວໄດ້ຮັບກຽດເປັນເຈົ້າພາບນັ້ນ​ ​ໄດ້ເປັນຈຸດໝາຍອັນສຳຄັນຄັ້ງປະຫວັດສາດຂອງຊາດລາວເຮົາ​ ​ໃນການເຊື່ອມໂຍງກັບພາກພື້ນແລະສາກົນ, ທັງເປັນການປະກອບສ່ວນຢ່າງຕັ້ງໜ້າຂອງສປປລາວໃນພາລະກິດແຫ່ງສັນຕິ ພາບ, ມິດຕະພາບແລະການຮ່ວມມືກັບສາກົນ.

      ດັ່ງນັ້ນເພື່ອເຮັດໃຫ້ກອງປະຊຸມສຸດຍອດອາຊີ-​ເອີຣົບໃນຄັ້ງທີ IX ທີ່ນະຄອນຫຼວງວຽງຈັນ ເປັນເຈົ້າພາບ ລາບລື້ນໄປດ້ວຍດີ. ທຸກຂະແໜງການທີ່ກ່ຽວຂ້ອງໄດ້ດຳເນີນການຫ້າງຫາກະກຽມຢ່າງຕັ້ງໜ້າ. ​ໃນນັ້ນກົມການບິນພົນລະ​​ເຮືອນທີ່ຂື້ນກັບຂະແໜງໂຍທາທິການແລະຂົນສົ່ງກໍເປັນອີກຂະແໜງ ການໜຶ່ງທີ່ມີພາລະບົດບາດອັນສຳຄັນໃນຄວາມຮັບຜິດຊອບ ​ ​ໃນການຮອງຮັບບັນດາເຮືອບິນຂະໜາດກາງ, ຂະໜາດໃຫຍ່ຂອງບັນດາປະມຸກລັດແລະຫົວໜ້າລັດຖະບານຈາກປະເທດຕ່າງໆທີ່ເຂົ້າຮ່ວມກອງປະຊຸມໃນຄັ້ງນີ້. ສະໜາມບິນສາກົນວັດໄຕເປັນດ່ານປະຕູທາງອາກາດທີ່ເຂົ້າສູ່ສປປລາວທັງເປັນດ່ານທີ່ມີຄວາມສຳຄັນໃນການຕ້ອນຮັບແຂກບ້ານ, ​ແຂກເມືອງທີ່ມາຢ້ຽມຢາມ, ​ເຮັດວຽກ ຫຼື ລົງທືນດ້ານທຸລະກິດແລະທ່ອງທ່ຽວໃນສປປລາວ. ຍ້ອນເຫັນໄດ້ເຖິງຄວາມໝາຍຄວາມສຳຄັນໃນການຂົນສົ່ງທາງອາກາດທີ່ມີຄວາມສະດວກສະບາຍ, ວອງໄວທັນກັບສະພາບການແລະເວລາ. ດ້ວຍເຫດນີ້ພັກແລະລັດຖະບານເຮົາຍາມໃດກໍໄດ້ເອົາໃຈໃສ່ໃນການພັດທະນາຂົງເຂດການບິນໃຫ້ທຽບເທົ່າກັບພາກພືນແລະສາກົນເພື່ອຮອງຮັບໃຫ້ແກ່ບັນດາສາຍການບິນພາຍໃນແລະຕ່າງປະເທດໂດຍສະເພາະແມ່ນຮອງຮັບເຮືອບິນບັນດາປະມຸກລັດແລະຫົວໜ້າລັດຖະບານປະເທດຕ່າງໆທີ່ເຂົ້າຮ່ວມກອງປະຊຸມສຸດຍອດອາຊີ-​ເອີຣົບຫຼື (ASEM) ຄັ້ງທີ IX ໃນວັນທີ 5-6 ພະຈິກ 2012 ຜ່ານມານີ້.

ສະໜາມບິນສາກົນວັດ​​ໄຕເປັນສະໜາມບິນທີ່ສາມາດຮອງຮັບບັນດາສາຍການບິນພາຍໃນແລະຕ່າງປະເທດມາເປັນເວລາດົນນານແລ້ວ. ​ມີບົດບາດອັນສຳຄັນໃນການລໍາ ລຽງຂົນສົ່ງທາງອາກາດທີ່ມີຄວາມສະດວກ, ວ່ອງໄວແລະທັນສະໄໝ ນີ້ເປັນອີກສິ່ງໜຶ່ງທີ່ໄດ້ປະກອບສ່ວນຢ່າງຕັ້ງໜ້າໃນການສ້າງສາພັດທະນາເສດຖະກິດ-ສັງຄົມເຮັດໃຫ້ ສປປ ລາວໄດ້ກ້າວສູ່ເວທີສາກົນໂດຍໄດ້ຮັບຄວາມໄວ້ວາໃຈຈາກບັນດາປະເທດ​​ເພື່ອນມິດສາກົນໃຫ້ຈັດກອງປະຊຸມສຸດຍອດອາຊີ-​ເອີຣົບ ຄັ້ງທີ IX ນີ້ ສະ  ໜາມບິນສາກົນວັດໄຕ ກໍໄດ້ກຽມພ້ອມທຸກຢ່າງ​ ​ເພື່ອເອື້ອອຳນວຍຄວາມສະດວກ ສະບາຍໃຫ້ແກ່ບັນດາເຮືອບິນຕ່າງໆ ທີ່ຈະຂື້ນໆ ລົງໆ ນຳເອົາຜູ້ແທນຈາກປະເທດຕ່າງໆ ມາຮ່ວມກອງປະຊຸມດ້ວຍຄວາມຍິນດີແລະມີຄວາມພ້ອມໃນການ​​​ຕ້ອນຮັບແຂກບ້ານແຂກເມືອງດ້ວຍໄມຕີຈິດມິດຕະພາບອັນດູດດື່ມ.

 

Additional information