ພິທີວາງສີລາລຶກ ເປີດໂຄງການ ກໍ່ສ້າງຂົວມິດຕະພາບລາວ-ມຽນມາ

Details

Published on ຈັນ, 18 ກຸມພາ 2013 05:52

ໃນຕອນເຊົ້າຂອງວັນທີ 16 ກຸມພາ 2013 ຢູ່ທີ່ຊຽງກົກ ເມືອງລອງ ແຂວງຫຼວງນ້ຳທາ ໄດ້ມີພິທີວາງສີລາລຶກ ແລະເປີດການກໍ່ສ້າງຂົວຂ້າມນ້ຳຂອງ ມິດຕະພາບລາວ-ມຽນມາ. ເປັນກຽດເຂົ້າຮ່ວມ ພິທີໃນຄັ້ງນີ້ ໂດຍມີ ທ່ານ ສົມມາດ ພົລເສນາ ລັດຖະມົນຕີວ່າການ ກະຊວງໂຍທາທິການ ແລະຂົນສົ່ງ, ທ່ານ ຈໍ ລິນ ລັດຖະມົນຕີວ່າການ ກະຊວງ ກໍ່ສ້າງ ສສ ມຽນມາ, ທ່ານ ພິມມະສອນ ເລືອງຄຳມາ ເຈົ້າ ແຂວງ ແຂວງຫຼວງນ້ຳທາ ພ້ອມດ້ວຍ ທ່ານເອກອັກຄະລັດຖະທູດ ແລະ ພະນັກງານວິຊາການທັງສອງຝ່າຍເຂົ້າຮ່ວມຢ່າງພ້ອມພຽງ.

 ໃນໂອກາດນີ້ ທ່ານ ໄຊສົງຄາມ ມະໂນທຳ ຫົວໜ້າໂຄງການ, ໃນນາມຕາງໜ້າໃຫ້ກົມຂົວທາງ ໄດ້ຂື້ນກ່າວລາຍ ງານກ່ຽວກັບໂຄງການດັ່ງນີ້: ເພື່ອຕອບສະໜອງຕາມຄວາມມຸ້ງມາດປາດຖະໜາຂອງ ລັດຖະບານ ແລະ ປະຊາຊົນ ສອງຊາດ ລາວ-ມຽນມາ ທີ່ຕ້ອງການໃຫ້ມີການອຳນວຍຄວາມສະດວກໃຫ້ແກ່ການໄປມາຫາສູ່ກັນ, ແນໃສ່ສົ່ງເສີມ ສາຍພົວພັນ ແລະ ການຮ່ວມມືທີ່ມີມາແຕ່ດົນນານໃຫ້ໄດ້ຮັບການພັດທະນາໃຫ້ດີຍິ່ງຂື້ນ, ໃນໄລຍະຜ່ານມາ ຜູ້ນຳສູງ ສຸດຂອງສອງປະເທດ ຈຶ່ງໄດ້ມີວິໃສທັດຮ່ວມກັນກຳນົດໃຫ້ຄົ້ນຄ້ວາກໍ່ສ້າງຂົວຂ້າມນ້ຳຂອງ ລະຫວ່າງ ຊຽງກົກ, ສປປລາວ ແລະ ແກ້ງລາບ, ສສ ມຽນມາ, ຊຶ່ງຕັ້ງຢູ່ຈຸດທີ່ມີຄວາມໝາຍສຳຄັນບົນເສັ້ນທາງເຊື່ອມຕໍ່ດ້ານຄົມມະນາຄົມ -ຂົນສົ່ງ ຊຶ່ງບໍ່ສະເພາະແຕ່ລະຫວ່າງ ສປປ ລາວ ແລະ ສສ ມຽນມາ, ແຕ່ຍັງລວມທັງບັນດາປະເທດໃນອະນຸ ພາກພື້ນ. ຈາກນັ້ນ, ຄະນະວິຊາການທັງສອງຝ່າຍໂດຍສະເພາະແມ່ນ ກະຊວງໂຍທາທິການ ແລະ ຂົນສົ່ງ, ສປປ ລາວ ແລະ ກະຊວງ ກໍ່ສ້າງ ສສ ມຽນມາ ກໍໄດ້ລົງສຳຫຼວດພື້ນທີ່ກໍ່ສ້າງ ແລະ ປະຊຸມປຶກສາຫາລືຮ່ວມກັນຫຼາຍຫຼົບ ຫຼາຍຕ່າວ ເພື່ອເຮັດໃຫ້ຂົວດັ່ງກ່າວ ໄດ້ຮັບການກໍ່ສ້າງຕາມແຜນການ. ດັ່ງນັ້ນ, ຈຶ່ງເວົ້າໄດ້ວ່າໂຄງການ​ກໍ່ສ້າງຂົວ​ມິດຕະພາບ​ລາວ-ມຽນມາ ​ແມ່ນ​ໝາກຜົນ​ຂອງ​ການ​ຮວ່ມມື​ ລະຫວ່າງ ລັດຖະບານ ສປປ ​ລາວ ​ແລະ ສສ ມຽນມາ, ຊຶ່ງໃນ​ລະຫວ່າງ​ການ​ຢ້ຽມຢາມ ສປປ ລາວ ​ຂອງ​ພະນະ​ທ່ານ ເທັນ ​ເຊັນ, ປະທານາທິບໍດີແຫ່ງ ສສ ມຽນມາ ຕາມ​ການ​ເຊື້ອ​ເຊີນ​ຂອງພະນະ​ທ່ານ ຈູ​ມມະ​ລີ ໄຊ​ຍະ​ສອນ, ປະທານ​ປະ​ເທດ ​ແຫ່ງ ສປປ ລາວ ໃນ​ວັນ​ທີ 22 ມີນາ 2012, ທັງສອງຝ່າຍໄດ້ລົງ​ນາມ ໃນສັນຍາລະຫວ່າງລັດຖະບານວ່າດ້ວຍ ການກໍ່ສ້າງຂົວຂ້າມນ້ຳຂອງ​ ມິດຕະພາບ​ລາວ- ມຽນມາ.  ຫຼັງ​ຈາກ​ນັ້ນ ກະຊວງ​ໂຍທາ​ທິການ ແລະ ຂົນ​ສົ່ງ ​ເວົ້າ​ລວມ, ​ເວົ້າ​ສະ​ເພາະ​ແມ່ນ​ກົມ​ຂົວ​ທາງ ​ໄດ້​ຮວ່ມມືກັບ​ວິຊາ​ການ​ ກົມ​ໂຍທາ​ທິການ, ກະຊວງ​ກໍ່ສ້າງ​ ຂອງ​ມຽນມາ ດຳເນີນ​ການ​ສຳ​ຫຼວດ ​ແລະ ອອກ​ແບບ​ຮວ່ມກັນ ​ມາ​ແຕ່​ເດືອນ ພຶດສະພາ 2012 ເປັນຕົ້ນ​ມາ. ມາເຖິງປະຈຸບັນນີ້ ການອອກແບບຂົວ ໄດ້ສຳເລັດແລ້ວ ​ແລະ ການ​ກໍ່ສ້າງ​ຂົວ​ແຫ່ງ​ນີ້​ ແມ່ນ​ພອ້ມ​ແລ້ວ.

     ສະເພາະລາຍລະອຽດທີ່ຕັ້ງຂົວ​ມິດຕະພາບ​ລາວ-ມຽນມາ ມີ​ທີ່ຕັ້ງຢູ່ບ້ານຫ້ວຍກຸ່ມ ປະມານ 15 ກິ​ໂລ​ແມັດ​ ຫ່າງ​ຈາກ ບ້ານ​ຊຽງ​ກົກ​ໄປ​ທາງ​ທິດ​ເໜືອ, ຂື້ນກັບ​ເມືອງ​ລອງ, ​ແຂວງ​ຫຼວງ​ນ້ຳ​ທາ  ສປປ ລາວ ​ແລະ ປະມານ 500 ແມັດ ທາງ​ໃຕ້​ ຂອງບ້ານ​ຊຽງ​ລາບ, ​ເມືອງທ່າ​ຂີ້​ເຫຼັກ, ລັດ​ສານ, ສສ ມຽນມາ. ​ຂົວດັ່ງກ່າວ ຫ່າງ​ຈາກ ນະຄອນຫຼວງ​ວຽງ​ຈັນ 698 ກິ​ໂລ​ແມັດ, ຫ່າງ​ຈາກ ນະຄອນຫຼວງ​ນາປີ​ຕໍ 940 ກິ​ໂລ​ແມັດ, ຫ່າງ​ຈາກ ນະຄອນ​ຫຼວງ​ຮ່າ​ໂນ​ຍ 1,020 ກິ​ໂລ​ແມັດ ​ແລະ​ຫ່າງ​ຈາກ ຊາຍ​ແດນ​ມຽນມາ-ອິນ​ເດຍ​-ບັງ​ກະລາ​ເດັດ 1,868 ກິ​ໂລ​ແມັດ.

   ຂົວ​ມິດຕະພາບ​ລາວ-ມຽນມາ ມີ​ຄວາມຍາວ​ທັງ​ໝົດ 691.6 ແມັດ, ກວ້າງ 10.9​ ແມັດ, ມີ​ທາງ​ລົດ​ແລ່ນ 2 ຄອງ, ​ກວ້າງ 8.5 ແມັດ, ທາງ​ຍ່າງ 2 ເບື້ອງ ​ເບື້ອງລະ 1.2 ແມັດ.  ​ເປັນ​ຂົວ​ທີ່​ມີ​ຂາງປະສົມ ​ເຊິ່ງມີ​ຂາງ​ເຫຼັກ​ຍາວ 360 ແມັດ ສູງ 12 ແມັດ ​ຢູ່ທາງກາງ (ຢູ່​ວັງ) ​ແລະ ຂາງ​ເບ​ຕົງ​ອັດ​ແຮງ ​ຍາວ 331.6 ແມັດ ຢູ່​ທາງຝັ່ງ. ຂົວ​​ແຫ່ງ​ນີ້​ແມ່ນ​ໄດ້​ອອກ​ແບບ​ໃຫ້​ຮັບ​ນ້ຳໜັກ ​ລົດ​ບັນທຸກ 10 ລໍ້ ​ໄດ້ 75 ໂຕນ, ຮັບ​ແຮງ​ສັ່ນ ​ຂອງ​ແຜ່ນດິນ​ໄຫວ ​ໄດ້​ໃນ​ລະດັບ 7.0 ເຮັກ​ເຕີ ລົງ​ມາ ແລະ ກຳ​ປັ່ນ 500 ໂຕນສາມາ​ດລອດຜ່ານ​ໄປ​ໄດ້.

  ​ໂຄງການ​ນີ້ມີ​ມູນ​ຄ່າ 18 ລ້ານ​ໂດ​ລາ, ​ເຊິ່ງ​ຈະນຳໃຊ້​ງົບປະມານພາຍໃນ ຂອງລັດຖະບານ ສປປລາວ ​ແລະ ລັດຖະບານ ສສ ມຽນມາ. ຂົວນີ້ ຈະ​ກໍ່ສ້າງ​ໃຫ້​ສຳ​ເລັດ​ພາຍ​ໃນ​ໄລຍະ​ເວລາ 30 ເດືອນ, ​ເລີ່​ມ​ແຕ່​ມື້ນີ້ ວັນ​ທີ 16 ກຸມພາ 2013 ເປັນຕົ້ນ​ໄປ ຫາ ວັນ​ທີ 15 ສິງຫາ 2015.

      ພາຍຫຼັງສຳເລັດໂຄງການ​ກໍ່ສ້າງຂົວ​ມິດຕະພາບ​ລາວ-​ມຽນມາ, ຂົວດັ່ງກ່າວຈະກາຍເປັນ​ສັນຍາ​ລັກ​ແຫ່ງ​ສາຍ ພົວພັນການຮ່ວມມື​ ​ແລະ ຄວາມສາມັກຄີ ລະຫວ່າງ​ປະຊາຊົນ​ ຂອງສອງ​ປະ​ເທດ​ລາວ ​ແລະ ມຽນມາ, ໂດຍ​ຈະ​ເຊື່ອມ​ຕໍ່​ທາງ​ຫຼວງ​ເລກທີ 17 ຂອງ​ລາວ ​ເຂົ້າ​ກັບ​ ທາງ​ຫຼວງ​ເລກທີ 4 ຂອງ​ມຽນມາ, ແນໃສ່​ສ້າງ​ເງື່ອນ​ໄຂອຳນວຍ ຄວາມສະດວກ​​ໃນການໄປມາຫາສູ່ ແລະ ຄ້າຂາຍ​ນຳ​ກັນ, ຊຶ່ງເອົາຜົນປະໂຫຍດອັນໃຫ່ຍຫຼວງມາໃຫ້​ປະຊາຊົນ​ທັງ​ສອງ​ຊາດ, ລວມທັງບັນດາປະເທດໃນອະນຸພາກພື້ນ ​ໂດຍ​ສະ​ເພາະລະຫວ່າງ ລາວ, ມຽນມາ, ​ຫວຽດນາມ ແລະ ສປຈີນ, ແລະ ອາດຂະຫຍາຍໄປສູ່ອິນເດຍ ແລະ ບັງກາລາເດັດ ອີກດ້ວຍ, ໂດຍ​ຜ່ານ​ທາງຫຼວງ ​ເລກທີ 17, 13 ​ແລະ 2E ຂອງ​ລາວ ​ແລະ ທາງຫຼວງເລກ 4 ຂອງ​ມຽນມາ.

ພິທີເປີດໂຄງການປັບປຸງທາງເລກ 09 ແຂວງ ສະຫວັນນະເຂດ

Details

Published on ສຸກ, 15 ກຸມພາ 2013 02:56

ໂຄງການປັບປຸງທາງຫຼວງແຫ່ງຊາດ ເລກ 09 ທີ່ເປັນແລວເສດຖະກິດຕາເວັນຕົກ-ຕາເວັນອອກ ຂອງພາກ ພື້ນແມ່ນ້ຳຂອງ ໄດ້ເປີດພິທີຂື້ນຢ່າງເປັນທາງການ ໃນຕອນເຊົ້າຂອງວັນທີ 13 ກຸມພາ 2013 ຢູ່ທີ່ເມືອງພະລານໄຊ ແຂວງສະຫວັນນະເຂດ ເຂົ້າຮ່ວມມີ ທ່ານ ສົມມາດ ພົລເສນາ ລັດຖະມົນຕີວ່າການ ກະຊວງໂຍທາທິການ ແລະ ຂົນສົ່ງ, ທ່ານ ນາງ ຈຸນໂກຕະ ເອກອັກຄະຣາຊະທູດ ຍີ່ປຸ່ນ ປະຈຳ ສປປ ລາວ, ທ່ານ ໄກສອນ ຄູນລາດສະວົງ ຮອງເຈົ້າແຂວງ ແຂວງສະຫວັນນະເຂດ, ທ່ານຫົວໜ້າອົງການໄຈກາ ປະຈຳ ສປປ ລາວ ແລະ ພ້ອມດ້ວຍບັນດາ ພະນັກງານວິຊາການຈາກທັງສອງຝ່າຍກໍໄດ້ເຂົ້າຮ່ວມ. ໂດຍໄດ້ຮັບທຶນການຊ່ວຍລ້າຈາກອົງການໄຈກາ ກໍຄືລັດຖະ ບານຍີ່ປູ່ນ.

ໂຄງການ​ປັບປຸງ​ທາງຫລວງ​ແຫ່ງ​ຊາດ​ເລກ09 ຢູ່​ແຂວງ​ສະຫວັນ​ນະ​ເຂດ ນີ້​ເປັນ​ອີກ​ໂຄງການໜຶ່ງທີ່​ໄດ້​ຮັບ​​ບູລິ​ມະ​ສິດ​​ເປັນແຜນ​ພັດທະນາຂອງ​ລັດຖະບານ​ແຕ່​ປີ 2000-2015 ​ເນື່ອງ​ຈາກສປປລາວບໍ່ມີ​ຊາຍ​ແດນ​ຕິດ​ກັບ​ທະ​ເລສະ​ນັ້ນ, ທາງ​ເລກ 09 ຈຶ່ງ​ເປັນ​ເສັ້ນທາງ​ຍຸດ​ທະ​ສາດ​ສຳລັບ​ການ​ເຊື່ອມ​ຕໍ່ກັບ​ບັນດາ​ປະ​ເທດ​ໄກ້​ຄຽງ​ ແລະ ​ເປັນ​ທາງ​ຜ່ານ​ໃນ​ການ​ຂົນ​ສົ່ງ​, ໃນ​ໂຄງການ​ປັບປຸງ​ທາງຫລວງ​ແຫ່ງ​ຊາດ​ເລກ09 ​ແຂວງ​ສະຫວັນ​ນະ​ເຂດ​ເປັນ​ອີກ ໂຄງການໜຶ່ງທີ່​ໄດ້​ສ້າງ​ຕັ້ງ​ຂື້ນ​ຕາມ​ຂໍ້​ຕົກລົງ ຂອງ​ທ່ານລັດຖະມົນຕີ​ວ່າການກະຊວງໂຍທາ​ທິການ ​ແລະ ຂົນ​ສົ່ງ ສະບັບ​ເລກທີ 1614/ຍທຂ, ລົງ​ວັນ​ທີ 15 ພະຈິກ 2011. ​

​ໂດຍ​ອີງ​​ໃສ່​ຈຸດ​ພິ​ສດດ້ານ​ທີ່​ຕັ້ງ​ຂອງ​ເສັ້ນທາງ​ເລກ 09 ທີ່​ເປັນ​ເສັ້ນທາງ​ຍຸດ​ທະ​ສາດ​ໃນ​ການ​ເຊື່ອມ​ຕໍ່ລະຫວ່າງ ​ທາງ​ທິດຕາ​ເວັນ​ອອກ-ຕາ​ເວັນ​ຕົກຂອງ​ປະ​ເທດ​ລາວ ​ແລະ ​ຍັງ​ເປັນ​ເສັ້ນທາງ​ອະນຸ​ພາກ​ພື້ນທີ່​ເປັນ​ລະບຽງ​ເສດຖະກິດ ດ້ານ​ຕາ​ເວັນ​ອອກ-ຕາ​ເວັນ​ຕົກ​ ທີ່​ມີ​ຄວາມໝາຍຄສາມ​ສຳຄັນ​ໃນ​ລະດັບ​ພາກ​ພື້ນ, ​ໂຄງການ​ປັບປຸງ​ທາງ​ເລກ 09 ​ແມ່ນ​ໄດ້​ປະກອບສ່ວນອັນ​ສຳຄັນ ​ໃຫ້​ແກ່​ການ​ພັດທະນາ​ພື້ນຖານ ​ໂຄງ​ລ່າງ​ດ້ານ​ການຂົນ​ສົ່ງ​ ພາຍ​ໃນແຂວງ​ສະຫວັນ​ນະ​ເຂດກໍ​ຄື​ ຂອງ ສປປ ລາວ ​ໃຫ້​ໄດ້​ຮັບ​ການ​ຍົກ​ລະດັບຕາມມາດຖານສາກົນ ແລະ ໄດ້ຊ່ວຍໃຫ້ ສປປ ລາວ ທີ່ເປັນ ປະເທດທີ່ບໍ່ມີຊາຍແດນຕິດກັບທະເລອອກໃຫ້ກາຍເປັນປະເທດບໍລິການທາງຜ່ານຂອງອະນຸພາກພື້ນໄດ້ຢ່າງແທ້ຈິງພ້ອມທັງສ້າງເງື່ອນໄຂອັນສະດວກໃຫ້ແກ່ປະຊາຊົນຂອງບັນດາອານຸພາກພື້ນແຫ່ງນີ້ສາມາດສັນຈອນໄປມາຫາສູ່, ສົ່ງເສີມການຜະລິດ, ການທ່ອງທ່ຽວແລະການຄ້າຂາຍນຳກັນໄດ້ດີຍີ່ງຂື້ນ. ໃນວັນທີ 26 ເມສາ 2012 ທີ່ຜ່ານໄດ້ ມີການເຊັນສັນຍາກັບບໍລິສັດຮັບເໝົາກໍ່ສ້າງລະຫວ່າງ ກະຊວງໂຍທາທິການ ແລະ ຂົນສົ່ງ ກັບບໍລິສັດໂອບາຢາ ຊິໂລດຈອຍເວັນເຈີ້, ມີບໍລິສັດອໍລຽນຕັນ ແລະ IDCJ ​ເປັນ​ທີ່​ປຶກສາ​ຂອງ​ໂຄງການ. ​ໃນ​ການ​ຍົກ​ລະດັບ​ທາງ​ເລກ 09 ​ແມ່ນ​ໄດ້​ແບ່ງ​ອອກ​ເປັນ 02 ​ໄລຍະ​ຄື: ​ໄລຍະ​ທີ 01 ​ເລີ່​ມ​ແຕ່ກມ 28+800 (​ເມືອງ​ອາດ​ສະພັງ​ທອງ) ຫາກມ 75+800 (​ເມືອງ​ພະ​ລານ​ໄຊ), ​ໄລຍະ​ທີ 02 ​ແມ່ນເລີ່​ມ​ແຕ່ກມ 113+800   ​(​ເມືອງ​ພີນ) ​ໃນ​ການ​ຍົກ​ລະດັບ​ແມ່ນຂູດ​ຮື້ໜ້າທາງ​ຢາງ​ອັດສະ​ຟານ​​ເກົ່າ​ອອກ ​ແລະ ​ຍົກ​ລະດັບ​ຊັ້ນ​ຮອງ​ພື້ນ​ທາງຊັ້ນ​ພື້ນ​ທາງ​ດ້ວຍ​ວັດ​ສະ​ດຸ​ຫີນ​ຂົບ ​ແລະ ​ປູ​ອັດສະ​ຟານ 2 ຊັ້ນ ທີ່​ມີ​ຄວາມໜາ 10 ຊມ, ໜ້າທາງ  ​ກ້ວາງ 9 ​ແມັດ, ມີ​ລະບົບ​ຮ່ອງ​ລະບາຍ​ນ້ຳ​ສອງ​ຂ້າງ​ທາງ​ທີ່​ກໍ່ດ້ວຍ​ເບ​ຕົງ ​​ໃນ​ການ​ຍົກ​ລະດັບ​ທາງ​ດັ່ງກ່າວ ​ແມ່ນ​ສາມາດ​ຮອງ​ຮັບ​ນ້ຳໜັກຂອງ​ລົດ​ໄດ້​ເຖີງ 11 ​ໂຕນ/​ເພົາ, ຄວາມ​ໄວ​ສະ​ເລ່ຍ 56,3 ກມ/ຊມ. ​ໃນ​ການ​ປັບປຸງ​ຍົກ​ລະດັບ​ມູນ​ຄ່າ​ຂອງ​ໂຄງການ​ແມ່ນ 2.464 ລ້ານ​ເຢັນ, ສຳລັບ​ຄ່າ​ໃຊ້​ຈ່າຍ​ໃຫ້​ທີ່​ປຶກສາ 276 ລ້ານ​ເຢັນເຊິ່ງເປັນການຊ່ວຍ​ເຫຼືອລ້າ​ຈາກ​ລັດຖະບານ​ຍີ່ປຸ່ນ 100%. ສຳລັບ​ຝ່າຍ​ລັດຖະບານ​ລາວ ​​ໄດ້​ສົມ​ທົບ​ຊ່ວຍ​ໃນ​ການ​ຍົກ​ເວັ້ນພາສີ, ອາກອນ ​ແລະ​ ຄ່າ​ທຳນຽມຕ່າງໆ. ພ້ອມທັງຈັດ​ຫາ ​ແລະ​ ອຳນວຍ​ຄວາມ​ສະດວກ​ທາງ​ດ້ານ​ສະຖານ​ທີ່​ປຸກ​ສ້າງ​ຊົ່ວຄາວ, ລະບົບ​ຕາ​ຄ່າ​ຍ​ໄຟຟ້າ, ​ເກັບ​ກູ້​ລະ​ເບີດ, ​ໄກ​ເກັ່ຍສິ່ງ​ກີດ ຂວາງ ​ແລະ​ ອື່ນໆທີ່​ຕິດ​ພັນ​ກັບ​ການຈັດ​ຕັ້ງ​ປະຕິບັດ​ຂອງ​ໂຄງການ. ​ໂຄງການດັ່ງກ່າວແມ່ນຈະໄດ້ດຳເນີນໄປເປັນ ເວລາຢູ່ 3 ປີ ​ຊຶ່ງ​ເລີ່ມ​ແຕ່ປີ 2012 ຈະ​ໃຫ້​ສຳ​ເລັດປີ 2015 ​ຕາມມາດຕະຖານທີ່ໄດ້ກຳນົດໄວ້.

​ເວົ້າ​ລວມ​ແລ້ວ​ເສັ້ນທາງ​ເລກ 09 ຖື​ວ່າເປັນ​ເສັ້ນທາງ​ທີ່​ສຳຄັນ​ໃນການລຳລຽງ, ການ​ຂົນ​ສົ່ງ​ໃນ​ເຂດ​ດັ່ງກ່າວ ​ ສຳ​ລັບ ໂຄງການ​ດັ່ງກ່າວຈະ​ນຳ​ເອົາ​ຜົນ​ປະ​ໂຫຍ​ດອັນ​ໃຫຍ່ຫລວງມາສູ່ການ​ພັດທະນາ ​ເສດຖະກິດ-ສັງຄົມການຫຼຸດຜ່ອນ​ຄວາມທຸກ​ຍາກກໍ​ຄື​ການ​ຍົກ​ລະດັບ​ຊີວິດ​ການ​ເປັນ​ຢູ່ຂອງ​ປະຊາຊົນ​ລາວ​ບັນດາ​ເຜົ່າ ​​ໃຫ້ນັບ​ມື້​ນັບ​ດີ​ຂື້ນ.

ການເຂົ້າຢ້ຽມອຳລາຂອງ ທ່ານ Masato TOGAWA

Details

Published on ສຸກ, 15 ກຸມພາ 2013 07:48

 ​​ໃນ​ຕອນ​ບ່າຍ ຂອງ​ວັນ​ທີ 14 ກຸມພາ 2013 ທີ່​ຜ່ານ​ມາ, ທ່ານ ສົມ​ມາດ ພົລ​ເສນາ ລັດຖະມົນຕີ​ວ່າການ ກະຊວງ​ໂຍທາ​ທິການ ​ແລະ ຂົນ​ສົ່ງ ​ໄດ້​ຕອນ​ຮັບ​ການ​ເຂົ້າ​ຢ້ຽມ​ອຳ​ລາ​ຂອງ​ທ່ານ Masato TOGAWA, ຫົວໜ້າ​ອົງການ​ສາກົນ​ເພື່ອ​ການ​ຮ່ວມ​ມື​ແຫ່ງ​ປະ​ເທດ​ຍີ່ປຸ່ນ (JICA) ປະຈຳ ສປປ ລາວ​ ທີ່​ໝົດ​ວາລະ​ການ​ປະຕິບັດ​ໜ້າ​ທີ່. ​ໃນ​ໂອກາດ​ນີ້,​ ທ່ານ ລັດຖະມົນຕີ​ວ່າການ ກະຊວງ​ໂຍທາ​ທິການ ​ແລະ ຂົນ​ສົ່ງ ​ໄດ້​ຕີ​ລາຄາ​ສູງ ​ໃນ​ການ​ປະຕິບັດ​ໜ້າ​ທີ່​ຂອງ​ທ່ານ Masato TOGAWA ​ໃນ​ຕະຫຼອດ​ສາມ​ປີ​ທີ່​ຜ່ານ​ມາ, ທ່ານ​ໄດ້​ປະຕິບັດ​ວຽກ​ງານ​ຢ່າງ​ຕັ້ງໜ້າ​ປະກອບ ສ່ວນຊຸກຍູ້​ປະ​ຕິ​ບັດ​ໂຄງການ​ຮ່ວມ​ມື​ໃນ​ຂະ​ແໜງການ​ໂຍທາ​ທິຫານ ​ແລະ ຂົນ​ສົ່ງ ​ຊຶ່ງ​ເປັນ​ການ​ປະກອບ​ສ່ວນ​ອັນ​ສຳຄັນ ​ໃຫ້​ແກ່​ການ​  ເພີ້​ມພູນ​ຄູນ​ສ້າງສາຍ​ພົວພັນ​ມິດຕະພາບ ​ແລະ​ການ​ຮ່ວມ​ມືລະຫວ່າງລາວ-ຍີ່ປຸ່ນ ​ໃຫ້​ນັບ​ມື້​ນັບ​ມີ​ປະສິດທິ​ຜົນ​ສູງ​ຂື້ນ. ຈາກ​ນັ້ນທ່ານລັດຖະມົນຕີ​ວ່າການກະຊວງ​ໂຍທາ​ທິການ ​ແລະຂົນ​ສົ່ງກໍ​ໄດ້​ມອບ​ໃບ​ຍ້ອງຍໍ ​ໃຫ້​ແກ່​ທ່ານ Masato TOGAWA ​ເພື່ອ​ເປັນ​ການ​ສັນລະ​ເສີນ​ຕໍ່​ຜົນງານ​ດັ່ງກ່າວພ້ອມ​ດຽວ​ກັນ​ນັ້ນ,​ ທ່ານ Masato TOGAWA ກໍ​ໄດ້​ສະ​ແດງ​ຄວາມ​ຂອບ​ໃຈຕໍ່​ລັດຖະບານ​ລາວ ​ແລະ​ ກະຊວງ​ໂຍທາ​ທິການ ​ແລະຂົນ​ສົ່ງທີ່​ໄດ້​ໃຫ້ການ​ສະໜັບສະໜູນ ​ແລະ​ ໃຫ້​ຄວາມ​ສະ​ດວກ ​ໃນ​ການ​ປະຕິບັດ​ໜ້າ​ທີ່​ຂອງ​ທ່ານຢູ່ສປປລາວ ​ແລະ ​ຢືນ​ຢັນ​ຈະ​ສຶບຕໍ່​ສົ່ງ​ເສີມ​ສາຍ​ພົວພັນ ​ແລະ​ການ​ຮ່ວມ​ມື​ລະຫວ່າງ​ສອງ​ຊາດ ​ໃຫ້​ດີ​ຍີ່​ງໆ​ຂື້ນ. ​ໃນ​ໂອ​ກາດ​ພົບ​ປະ​ນີ້, ທັງ​ສອງ​ຝ່າຍ ຍັງ​ໄດ້​ເຊັນ​ບັດ​ບັນທຶກ​ຮ່ວມ​ກັນ ກ່ຽວ​ກັບ​ການ​ຊ່ວຍ​ເຫຼືອ​ລ້າ​ທາງ​ດ້ານ​ເຕັກນິກ ສຳລັບ​ໂຄງການ​ຂົນ​ສົ່ງ ທີ່​ມີ​ມົນ​ລະ​ພິດ​ຕ່ຳ ຢູ່ ສປປ ລາວ, ຊຶ່ງ​ການ​ຄົ້ນຄ້ວາ ​ແລະ ລິເລີ້ມ​ການ​ສົ່ງ​ເສີມ​ນຳ​ໃຊ້​ພາ​ຫະ​ນະ​ຂົນ​ສົ່ງ​ທີ່​ມີ​ມົນ​ລະ​ພິດ​ຕ່ຳ ​ເປັນ​ຕົ້ນ​ແມ່ນລົດ​ໄຟຟ້າ​ ​ເປັນ​ການ​ຮັກສາ​ສະພາບ​ແວັ​ດລ້ອມ ​ໂດຍ​ສະ​ເພາະ​ໃນ​ຕົວ​ເມືອງ​ນະຄອນຫຼວງວຽງ​ຈັນ.

ກອງປະຊຸມໄລຍະຕົ້ນຂອງໂຄງການພັດທະນາຂີດຄວາມສາມາດ ແລະ ສ້າງຄວາມເຂັ້ມແຂງໃຫ້ສາຍໃຍການຈັດຕັ້ງຂອງຄະນະກໍາ ມາທິການ ເພື່ອຄວາມກ້າວໜ້າຂອງແມ່ຍິງ ກະຊວງ ຍທຂ

Details

Published on ພຸດ, 13 ກຸມພາ 2013 08:11

ກະຊວງ ຍທຂ ໄດ້ຮັບທຶນຊ່ວຍເຫຼືອລ້າ ຈາກທະນາຄານພັດທະນາອາຊີ ດ້ວຍການຊຸກຍູ້ ແລະ ສະໜັບສະໜູນຂອງ ຄະນະກໍາມາທິການ ເພື່ອສົ່ງເສີມຄວາມກ້າວໜ້າຂອງແມ່ຍິງແຫ່ງຊາດ. ໂຄງການດັ່ງກ່າວແມ່ນແນ່ໃສ່ ພັດທະນາຂີດ ຄວາມສາມາດ ແລະ ສ້າງຄວາມເຂັ້ມແຂງໃຫ້ສາຍໃຍການຈັດຕັ້ງຂອງຄະນະກໍາມາທິການ ເພື່ອຄວາມກ້າວໜ້າຂອງ ແມ່ຍິງ ກະຊວງ ຍທຂ, ເຊິ່ງມີມູນຄ່າທັງໝົດ 225.000 USD, ມີກໍານົດເວລາ 18 ເດືອນ (2013-2014). ໂດຍອີງຕາມແຜນໜ້າວຽກຂອງໂຄງການ ໃນວັນທີ່ 12 ກຸມພາ 2013, ທີ່ຫ້ອງປະຊຸມເບີ 01 ຂອງກະຊວງ ຍທຂ ຈຶ່ງໄດ້ຈັດກອງປະຊຸມໄລຍະຕົ້ນຂື້ນ ເພື່ອສະເໜີຜ່ານແຜນການ, ບັນດາໜ້າວຽກ ແລະ ເວລາໃນການຈັດຕັ້ງປະຕິບັດ ໂຄງການ. ກອງປະຊຸມໄດ້ຈັດຂື້ນພາຍໃຕ້ການເປັນປະທານ ຂອງ ທ່ານ ລັດຕະນະມະນີ ຄູນນີວົງ ລັດຖະມົນຕີຊ່ວຍ ວ່າການ ກະຊວງ ຍທຂ, ປະທານຄະນະກໍາມາທິການ ເພື່ອສົ່ງເສີມຄວາມກ້າວໜ້າຂອງແມ່ຍິງ ກະຊວງ ຍທຂ, ແລະ ມີທ່ານ Chong Chi Nai, Country Director, ADB. ມີບັນດາຜູ້ແທນມາຈາກ ເອດີບີ, ຄກມຊ, ຄະນະ ກໍາມາທິການ ເພື່ອສົ່ງເສີມຄວາມກ້າວໜ້າຂອງແມ່ຍິງ ກະຊວງ ຍທຂ, ຄະນະປະສານງານ ເພື່ອສົ່ງເສີມຄວາມກ້າວ ໜ້າຂອງແມ່ຍິງ ຂັ້ນກົມເຂົ້າຮ່ວມຢ່າງພ້ອມພຽງ ທັງໝົດ 62 ຄົນ, ຍິງ 33 ຄົນແລະ ຊາຍ 29 ຄົນ. ນອກຈາກ ໄດ້ຮັບຟັງການສະເໜີແຜນການ ແລະ ບັນດາໜ້າວຽກ ແລະ ເວລາໃນການຈັດຕັ້ງປະຕິບັດໂຄງການແລ້ວ, ບັນດາ ຜູ້ແທນແມ່ນໄດ້ປະກອບຄໍາເຫັນໃສ່ແຜນດັ່ງກ່າວ ເພື່ອໃຫ້ສົມບູນຍິ່ງຂື້ນ, ກອງປະຊຸມຄັ້ງນີ້ແມ່ນຂີດໝາຍ ໃນການ ຈັດຕັ້ງປະຕິບັດໜ້າວຽກຂອງໂຄງການທີ່ກ່າວມາຂ້າງເທິງນັ້ນ.