ເຜີຍແຜ່ ຜົນສຳເລັດຂອງກອງປະຊຸມ ສຸດຍອດອາຊີ-ເອີລົບ (ASEM) ຄັ້ງທີ 9

Details

Published on ສຸກ, 25 ມັງກອນ 2013 04:35

 ໃນ​ວັນ​ທີ 24 ມັງກອນ 2013 ທີ່​ຫ້ອງ​ປະຊຸມ​ເບີ 1 ​ໄດ້​ຮັບ​ຟັງ​ກາ​ນ​ເຜີຍ​ແຜ່ ຜົນສຳ​ເລັດ​ຂອງ​ກອງ​ປະຊຸມ​ສຸກ​ຍອດ​ອາຊີ-​ເອີ​ລົບ (ASEM) ຄັ້ງ​ທີ 9, ​ໂດຍ​ໃຫ້​ກຽດ​ເຜີຍ​ແຜ່​ໂອ້​ລົມ ຂອງ​ ທ່ານ ດຣ. ທອງ​ລຸນ ສີ​ສຸ​ລິດ ຮອງ​ນາຍົກ ລັດຖະມົນຕີ, ລັດ​ຖະມົນຕີ​ວ່າການ​ກະຊວງ ການ​ຕ່າງປະ​ເທດ, ​ເປັນ​ກຽດ​ເຂົ້າ​ຮ່ວມ​ຮັບ​ຟັງ​ມີ ທ່ານ ສົມ​ມາດ ພົລ​ເສນາ ລັດຖະມົນຕີ​ວ່າການ​ກະຊວງ ​ໂຍທາ​ທິການ ​ແລະ ຂົນ​ສົ່ງ ພ້ອມ​ດ້ວຍ ຄະນະ​ພັກ​ກະຊວງ, ຄະນະ​ພັກ​ຮາກ​ຖານ, ຄະນະ​ໜ່ວຍ​ພັກ​ຮາກ​ຖານ, ຜູ້​ຊ່ວຍ​ວຽກ​ລັດຖະມົນຕີ​ວ່າການ ​ແລະ ຊ່ວຍ​ວ່າການ, ຫົວໜ້າ​ກົມ, ຮອງ​ຫົວໜ້າ​ກົມ, ຫ້ອງ​ການ, ອົງການ, ສະ​ຖາ​ບັນ, ສະພາ​ວິທະຍາສາດ ​ແລະ​ເຕັກ​ໂນ​ໂລ​ຊີ, ກອງ​ວິຊາ​ການ, ສູນ​ຝຶກ, ຜູ້ອຳ​ນວຍ​ການ ​ແລະ​ຮອງ​ອຳນວຍ​ການ ບໍລິສັດ ​ແລະ ລັດ​ວິ​ສາ​ຫະກິດ ອ້ອມ​ຂ້າງ​ກະຊວງ ຍທຂ ​ແລະຄະນະ​ຮັບຜິດຊອບ​ອົງການ​ຈັດ​ຕັ້ງ​ມະຫາຊົນ ຂັ້ນ​ກະຊວງ ​ເຂົ້າ​ຮ່ວມ​ຢ່າງ​ພ້ອມພຽງ.

      ​ໃນ​ໂອກາດ​ນີ້ ທ່ານ ດຣ. ທອງ​ລຸນ ສີ​ສຸ​ລິດ ຮອງ​ນາຍົກລັດຖະມົນຕີ, ລັດ​ຖະມົນຕີ​ວ່າການ​ກະຊວງ ການ​ຕ່າງ ປະ​ເທດ ​ໄດ້​ເລົ່າ​ປະຫວັດ​ຄວາມ​ເປັນ​ມາ​ຂອງ​ກອງ​ປະຊຸມ​ອາຊີ-​ເອີ​ລົບ (ອາ​ເຊັມ) (Asia Europe MeeTing ຫຼື ASEM) 1. ຕົ້ນ​ກຳ​ເນີ​ດຂອງ​ອາ​ເຊັມ, 2. ວີ​ວັດທະນາ​ການ​ຂອງ​ອາ​ເຊັມ, 3. ຂະ​ແໜງ​ການ​ຮ່ວມມືປະກອບ​ມີ 3 ​ເສົາ​ຄ້ຳ​ຄື: ການ​ຮ່ມມື​ທາງ​ດ້ານ​ການ​ເມືອງ, ​ເສດຖະກິດ ​ແລະ​ວັດທະນະທຳ-ສັງຄົມ, 4. ຈຸດ​ພິ​ເສດ​ຂອງ​ອາ​ເຊັມ ​ແລະ 5. ກົນ​ໄກ​ການ​ຮ່ວມ​ມື​ຂອງ​ອາ​ເຊັມ. ທ່ານ​ຍັງ​ກ່າວ​ອີກ​ວ່າ ຜົນສຳ​ເລັດ​ກອງ​ປະຊຸມ​ສຸດ​ຍອດ​ອາ​ເຊັມ ຄັ້ງ​ທີ 9 ມີ​ຜົນສຳ​ເລັດ​ຫລາຍ​ຄື:

1. ຄວາມ​ສຳ​ເລັດ​ໃນ​ການ​ປ້ອງ​ກັນ​ຄວາມ​ສະຫງົບ,

2. ຄວາມ​ສຳ​ເລັດ​ຈາກ​ເນື້ອ​ໃນ​ທີ່​​ເລີກເຊີ່ງ, ມີ​ວິ​ໄສ​ທັດ ​ແລະ​ເປັນ​ຂິດ​ໝາຍປະຫວັດສາດ,

3. ຄວາມ​ສຳ​ເລັດ​ຈາກການ​ເຂົ້າ​ຮ່ວມ​ຢ່າງ​ຫຼວງ​ຫລາຍ,

4. ຄວາມ​ສຳ​ເລັດ​ຈາກການ​ອຳນວຍ​ຄວາມ​ສະ​ດວ​ກດ້ານ​ໂຄງ​ລ່າງ,

5. ຄວາມ​ສຳ​ເລັດ​ຈາກພິທີການ​ອັນ​ສະ​ຫງ່າ​ງາມ,

6. ຄວາມ​ສຳ​ເລັດ​ຈາກການ ອອກຄຳ​ເຫັນ​ທີ່​ຫ້າວຫັນ.

7. ຄວາມ​ສຳ​ເລັດ​ຈາກການ​ພົບປະ 2 ຝ່າຍ ລະຫວ່າງ​ຄະນະຜູ້​ແທນກັບ​ເຈົ້າ​ພາບ,

8. ຄວາມ​ສຳ​ເລັດ​ຈາກຄວາມ​ຮູ້ສຶກປີຕິ​ຊົມ​ຊື່ນ ຂອງ​ຄະນະ​ຜູ້​ແທນ ​ແລະ

9. ຄວາມ​ສຳ​ເລັດ​ລວມ ຂອງ​ການ​ເປັນ​ປະທານ​ອາ​ເຊັມ ຂອງ ສປປ ລາວ.

ໝາກຜົນ​ຂອງ​ກອງ​ປະຊຸມ​ປີ່​ນອ້ອມ ມີ​ກອງ​ປະຊຸມ ການ​ເປັນ​ຄູ່​ຮ່ວມ​ລັດຖະສະພາ​ອາຊີ-​ເອີ​ລົບ ຄັ້ງ​ທີ 7 (ASEP-7), ກອງປະຊຸມ​ພາກ​ປະ​ຊົນອາຊີ-​ເອີ​ລົບ ຄັ້ງ​ທີ 9 (AEPE-9), ກອງ​ປະຊຸມພາກທຸລະ​ກິດ ອາຊີ-​ເອີ​ລົບ ຄັ້ງ​ທີ 13 (AEBF-13).

ພິທີລົງນາມບົດບັນທຶກຊ່ວຍຈຳ (MOU) ກ່ຽວກັບການຂົນສົ່ງທາງບົກ 3 ຝ່າຍ ລາວ-ກຳປູເຈຍ-ຫວຽດນາມ (CLV)

Details

Published on ພຸດ, 23 ມັງກອນ 2013 05:45

​​ເພື່ອ​ເຮັດ​ໃຫ້ ສ​ປປ ລາວ ມີ​ທາງ​ອອກ​ສູ່​ທະ​ເລ ​ແລະ ທາງ​ເລືອກ​​ໃນ​ການ​ນຳ​ໃຊ້​ທ່າ​ເຮືອ​ທະ​ເລນ້ຳເລິ່ກຫລາຍ​ຂື້ນ, ປະ ຕິບັດ​ນະ​ໂຍບາຍ ຂອງ​ລັດຖະບານ ​ໃນ​ກາ​ນຫັນ​ຈາກ​ປະ​ເທດ​ທີ່​ບໍ່​ມີ​ຊາຍ​ແດນ​ຕິດ​ກັບ​ທະ​ເລ ​ໃຫ້ກາຍ​ເປັນ​ປະ​ເທດ​ເຊື່​ອມຕໍ່ ​ແລະ ບໍ​ລິກາ​ນທາງຜ່ານ​ດ້ານ​ຄົມມະນາຄົມ-ຂົນ​ສົ່ງ ​ແລະ ພ້ອມ​ທັງ​ເປັນ​ການ​ຜັນ​ຂະຫຍາຍ​ກອບ​ການ​ຮ່ວມ​ມື​ໃນ​ເຂດ 3 ຫລ່ຽມ​ພັດທະນາ (Development Triangle Area “DTA”) ​ໃຫ້ປະກົດ​ຜົນ​ເປັນ​ຈິງ. ກະຊວງ​ໂຍທາ​ທິການ ​ແລະ ຂົນ​ສົ່ງ ສປປ ລາວ ຈຶ່​ງ​ເປັນ​ເຈົ້າ​ການ​ໃນ​ການສະ​ເໜີ​ຂໍ​ລິ​ເລີ່​ມ​ໃນ​ການ​ສ້າງ​ບົດ​ບັນທຶກ​ຊ່ວຍ​ຈຳ (MOU) ກ່ຽວ​ກັບ​ການ​ຂົນ​ສົ່ງ​ທາງບົກ 3 ຝ່າຍ ລະຫວ່າງ​ ລາວ-ກຳປູ​ເຈຍ-ຫວຽດ​ນາມ ຂື້ນ ຊຶ່ງ​ໃນ​ໄລຍະ​ຜ່ານ​ມາ​ໄດ້​ມີ​ການນຳ ຂອງ 3 ປະ​ເທດ ໄດ້​ແລກປ່ຽນ​ການ​ຢ້ຽມ​ຢາມ ​ແລະສຳ​ຫລວດ​ເສັ້ນທາງ​ໃນ​ເຂດ 3 ຫລ່ຽມ​ພັດທະນາ ​ຫລາຍ​ຄັ້ງ. ນັບ​ແຕ່​ມີ​ການ​ລິເລີ່​ມດັ່ງກ່າວ, ​ໄດ້​ມີ​ການ​ປຶກສາ​ຫາລື 3 ຝ່າຍ ລາວ-ກຳປູ​ເຈຍ-ຫວຽດນາມ ທັງ​ເປັນ​ທາງ​ການ ​ແລະ​ບໍໍ່ເປັນ​ທາງ​ການ ຈຳນວນ​ຫລາຍ​ຄັ້ງ ສຳລັບ​ການ​ປຶ​ກສາ​ຫາລື​ເປັນ​ທາງ​ການ ມີ 3 ຄັ້ງ​ຄື: ຄັ້ງ​ທີ 1 ປີ 2010 ທີ່​ເມືອງ​ດົ່ງ​ສ່ວາຍ, ​ແຂວງ​ບີ່​ງ​ເຝືອກ, ປະ​ເທດ ຫວຽດນາມ, ຄັ້ງ​ທີ 2 ປີ 2011 ທີ່​ນະຄ​ອນຫຼວງ​ວຽງ​ຈັນ, ສປປ ລາວ ​ແລະ ຄັ້ງ​ທີ 3 ປີ 2012 ທີ່​ເມືອງ​ດາ​ຫລາດ, ​ແຂວງ​ເລີມດົງ, ປະ​ເທດ​ຫວຽດນາມ ຈຶ່ງ​ສາມາດ​ຕົກ​ລັງ​ກັນ​ໄດ້​ເນື້ອ​ໃນ​ຂອງ MOU ສະບັບ​ນີ້. ສຳລັບ​ຈຸດ​ປະສົງ​ຂອງ MOU ​ແມ່ນ​ເພື່ອ​ອຳນວຍ​ຄວາມ​ສະດວກ​ໃຫ້​ແກ່​ການ​ຂົນ​ສົ່ງ​ທາງບົກ 3 ປະ​ເທດ​ ໄດ້​ໄປມາຫາສູ່​ກັນ ​ແລະ ຂ້າມ​ແດນ​ຜ່ານ​ປະ​ເທດ​ໜຶ່ງ ​ໄປ​ຫາ​ອີກ​ປະ​ເທດ​ໜຶ່ງ ຢ່າງ​ສະດວກ​ສະບາຍ​ໂດຍ​ຜ່ານ​ດ່ານ​ສາກົນ​ທຸກ​ດ່ານ ຂອງ​ແຕ່ລະ​ປະ​ເທດ. ​ໃນ​ເບື້ອງ​ຕົ້ນ​ແມ່ນ​ກຳນົດ​ເອົາ​ພາຫະນະ​ປະ​ເທດ​ລະ 150 ຄັນ ​ແລະ ສາມາດ​ເພີ່ມ​ຈຳນວນ​ໄດ້​ບົນ​ພື້ນຖານ​ການ​ເຫັນ​ດີ ຈາກ​ປະ​ເທດ​ພາຄີ ທັງ 3, ສ່ວນ​ພາຫະນະ​ທີ່​ບໍ່​ເຮັດ​ທຸລະ​ກິດ​ເຊັ່ນ: ລົດ​ທາງ​ການ ​ແລະ ການ​ທູດ​ແມ່ນ​ສາ​ມາດໄປ​ໄດ້. ສຳລັບຜົນ​ປະ​ໂຫຍ​ດທີ່​ຈະ​ໄດ້​ຮັບ​ຈາກ​ການ​ລົງ​ນາມ MOU ສະບັບ​ນີ້ ​ແມ່ນ​ສ້າ​ງ​ໂອກາດ​ໃຫ້ ສປປ ລາວ ​ໄດ້​ມີ​ທາງ​ເລືອກ​ໃນ​ການ​ອອກ​ສູ່​ທ່າ​ເຮືອ​ທະ​ເລ ຂອງ​ກຳປູ​ເຈຍ ​ແລະ ຫວຽດນາມ ​ແລະ​ສາມາດ​ຜ່ານ​ກຳປູ​ເຈຍ ​ໄປ​ຫາ​ບັນດາ​ແຂວງ​ພາກ​ໃຕ້​ຂອງ​ຫວຽດນາມ ດ້ວຍ​ໄລຍະ​ທາງ​ທີ່​ສັ້ນ. ຮ່ວມ​ລົງ​ນາມ MOU ດັ່ງກ່າວ​ປະກອບ​ດ້ວຍ​ລັດ​ຖະມົນຕີ​ວ່າການ​ກະຊວງ​ຂົນ​ສົ່ງ 3 ປະ​ເທດ​ຄື: 1) ພະນະ​ທ່ານ ສົມ​ມາດ ພົລ​ເສນາ, ລັດຖະມົນຕີ​ວ່າການ​ກະຊວງ ​ໂຍທາ​ທິການ ​ແລະ ຂົນ​ສົ່ງ, ​ແຫ່ງ ສປປ ລາວ,​ 2) ພະນະ​ທ່ານ​ ຕຣາມ ອິບ ຕຶກ (Tram lv Tek), ລັດຖະມົນຕີ​ວ່າການ​ກະຊວງ​ໂຍທາ​ທິການ ​ແລະ ຂົນ​ສົ່ງ ​ແຫ່ງຣາຊະ​ອານາຈັກ​ກຳປູ​ເຈຍ ​ແລະ 3) ພະນະ​ທ່ານ ດີ່ງ ຫລ້າ ທັງ (Ding La Thang), ລັດຖະມົນ​ຕີ​ວ່າ​ການກະຊວງຄົມມະນາຄົມ-ຂົນ​ສົ່ງ ​ແຫ່ງ ສສ ຫວຽດນາມ, ນອກຈາກ​ນັ້ນ, ຍັງ​ມີ​ພະນະ​ທ່ານ ຊັດ​ຊາດ ສິດ​ທິພັນ (Chatchard Sittipunt),​ ລັດຖະມົນຕີ​ວ່າການ​ກະຊວງ​ຄົມມະນາຄົມ ​ແຫ່ງຣາຊະ​ອານາ​ຈັດ​ໄທ ​ເຂົ້າ​ຮ່ວມ​ເປັນ​ສັກ​ຂີ​ພິຍານ ​ແລະ​ຜູ້​ສັງ​ເກດ​ການ ມີ​ພະນະ​ທ່ານ ດຣ. ສອນ​ໄຊ ສີ​ພັນ​ດອນ ​ເຈົ້າ​​ແຂວງໆ​ຈຳປາ​ສັກ ​ເຂົ້າ​ຮ່ວມ​ໃນ​ນາມ​ເປັນ​ເຈົ້າ​ພາບ​ພິທີ​ລົງ​ນາມ​ໃນ​ຄັ້ນີ້.

ພິທີເຊັນສັນຍາ ໂຄງການກໍ່ສ້າງຍົກລະດັບເສັ້ນທາງ ແຕ່ບ້ານ ໂພນສະອາດ-ບ້ານນ້ຳລາ-ບ້ານໂຄ້ງ, ເມືອງນ້ຳບາກ ແຂວງຫຼວງພະບາງ

Details

Published on ພະຫັດ, 24 ມັງກອນ 2013 03:28

​ວັນ​ທີ 22 ມັງກອນ 2013 ຢູ່​ທີ່​ຫ້ອງ​ປະຊຸມ​ເບີ 2 ກະຊວງ ຍທຂ ​ໄດ້​ຈັດ​ພິທີ​ເຊັນ​ສັນຍາ “​ໂຄງການ​ກໍ່ສ້າງ​ຍົກ​ລະດັບ​ເສັ້ນທາງ ​ແຕ່​ບ້ານ​​ໂພນ​ສະອາດ-ບ້ານນ້ຳລາ-ບ້ານ​ໂຄ້ງ, ​ເມືອງ​ນ້ຳບາກ, ​ແຂວງ​ຫຼວງ​ພະ​ບາງ ລະຫວ່າງ ທ່າ​ນ ນ. ຈຸນ​ໂກະ ​ໂຍ​ໂກ​ຕະ ​ເອກ​ອັກຄະລາຊະທູດ​ຍີ່ປຸ່ນ ປະຈຳ​ລາວ ​ແລະ ທ່ານ ພົບ​ສະຫວາດ ​ແສນ​ດວງ​ເດດ ຫົວໜ້າ​ຫ້ອງການ ຍທຂ ​ເມືອງ​ນ້ຳ​ບາກ, ​ແຂວງ​ຫຼວງ​ພະ​ບາງ, ​ໂດ​ຍ​ເປັນ​ກຽດ​ເຂົ້າຮ່ວມ​ເປັນ​ສັກຂີ​ພິຍານ ຂອງ​ທ່ານ ສົມມາ​ດ ພົລ​ເສນາ ລັດຖະມົນຕີ​ວ່າການ​ກະຊວງ ​ໂຍທາ​ທິການ ​ແລະ ຂົນ​ສົ່ງ, ທ່ານ Yosuke Tsuruho, ລັດຖະມົນຕີ​ຊ່ວຍ​ວ່າການ ກະຊວງ​ໂຄງ​ລ່າງ​ທີ່​ດີ​ນ, ຂົນ​ສົ່ງ ​ແລະ​ທ່ອງ​ທ່ຽວ ​ແຫ່ງ​ປະ​ເທດ​ຍີ່ປຸ່ນ, ທ່ານ​ ຄຳ​ດົວ ​ເຢຍກົວ​ນໍ​ເຮີ​ວາງ ຮອງ​ເລຂາ​ພັກ​ແຂວງ​ ຫຼວງ​ພະ​ບາງ ພ້ອມ​ດ້ວຍ​ພະນັກງານ ວິຊາ​ການ​ ທີ່​ກ່ຽວຂ້ອງ​ເຂົ້າ​ຮ່ວມ​ຢ່າງ​ພ້ອມພຽງ. ​ເສັ້ນທາງ​ແຕ່​ບ້ານ​ໂພນ​ສະອາດ-ບ້ານ​ນ້ຳລາ-ບ້ານ​ໂຄ້ງ, ​ເມືອງ​ນ້ຳ​ບາກ, ​ແຂວງ​ຫຼວງ​ພະ​ບາງ ມີ​ຄວາມ​ຍາວ​ປະທານ 3 ກິ​ໂລ​ແມັດ ​ມູນ​ຄ່າ​ການ​ກໍ່ສ້າງ 111,192 USA ແມ່ນ​ມີ​ສະພາບ​ບໍ່ດີ ​ແລະ​ ຫຍຸ້ງຍາກ​ໃນ​ການ​ເດີນທາງ​ໄປມາ, ບ້ານ​ນ້ຳລາ ​ແລະ​ບ້ານ​ໂຄ້ງ ຢູ່​ເມືອງ​ນ້ຳ​ບາກ ​ເປັນ​ບ້ານ​ທີ່​ມີ​ຊື່​ສຽງ​ເລື່ອງ​ການ​ຜະລິດ​ໝາກກ້ຽງ​ເພື່ອ​ສົ່ງ​ຂາຍ ​ແລະ​ປະຊາຊົນ​ສ່ວນ​ໃຫຍ່​ແມ່ນ​ຊາວ​ໄຮ່,​ ຊາວສວນ. ດັ່ງ​ນັ້ນ ຖ້າຫາກຖະໜົນ​ເຊື່ອມ​ຕໍ່​ລະຫວ່າງ​ໝູ່​ບ້ານ​ດັ່ງກ່າວ ຫາກ​ໄດ້​ຮັບ​ການ​ແກ້​ໄຂ ​ແລະ​ຍົກ​ລະດັບ​ໃຫ້​ດີ​ຂື້ນ ຈະ​ຊ່ວຍ​ອຳນວຍ​ຄວາມ​ສະດວກ ​ໃນ​ການ​ໄປມາຫາສູ່​ກັນ​ລະຫວ່າງ​ປະຊາຊົນ ຈຳນວນ 2,453 ຄົນ​ຈາກ 2 ບ້ານ ​ແລະ​ປະຊາຊົນ​ຢູ່​ເຂດ​ໃກ້​ຄຽງ​ອີກ​ປະມານ 10,500 ຄົນ ກໍ​ຈະ​ໄດ້​ຮັບ​ຜົນ​ປະ​ໂຫຍ​ດ​ເຊັ່ນ​ດຽວ​ກັນ. ນອກ​ນັ້ນ​ຍັງ​ມີ​ຜົນ​ດີ​ຕໍ່​ການ​ຕິດ​ຕໍ່​ພົວພັນ​ກັບ​ພາຍ​ນອກ,​ ການ​ຂົນ​ສົ່ງ​ສິນຄ້າ​ກະ​ສີ​ກຳ​ອອກ​ສູ່​ຕະຫລາດ​ຢ່າງ​ສະດວກ, ການ​ນຳ​ສົ່ງ​ຄົນ​ເຈັບ​ໄປ​ໂຮງໝໍ​ເມືອງ, ການ​ໄປ​ໂຮງຮຽນ ​ແລະ​ການ​ສັນຈອນ​ປະ​ເພດ​ອື່ນໆ, ມາ​ຮອດ​ປະຈຸ​ບັນ, ລັດຖະບານ​ຍີ່ປຸ່ນ ​ໄດ້​ໃຫ້ການ​ຊ່ວຍ​ເຫຼືອ​ໂຄງການ​ຍົກ​ລະດັບ​ເສັ້ນທາງ​ເຂົ້າ​ໝູ່​ບ້ານ ​ໂດຍ​ຜ່ານ​ໂຄງການ GGP ​ແລ້ວ​ທັງ​ໝົດ 17 ​ໂຄງການ ​ເຊິ່ງ​ມີ​ມູນ​ຄ່າ​ປະມານ 1,249,803 ​ໂດ​ລາ​ສະຫະລັດ.

ກອງປະຊຸມ ສາມັນຄົບຄະນະພັກກະຊວງ ໂຍທາທິການ ແລະ ຂົນສົ່ງ ຄັ້ງທີ 5 ສະໄໝທີ III

Details

Published on ອັງຄານ, 15 ມັງກອນ 2013 04:48

ໃນ​ຕອນເຊົ້າຂອງວັນ​ທີ 14 ມັງກອນ 2013 ຢູ່​ທີ່ຫ້ອງ​ປະຊຸມ​ເບີ 3 ​ຂອງກະຊວງຍທຂໄດ້​ມີພິທີເປີດ​ກອງ​ປະຊຸມ​ສາມັນ​ຄົບ​ຄະນະ​ພັກ​ກະຊວງ​ໂຍທາ​ທິການ​ແລະຂົນ​ສົ່ງຄັ້ງ​ທີ 5 ສະ​ໄໝ​ທີ III ຂື້ນ, ​ໂດຍ​ພາຍໃຕ້ການ​ເປັນ​ປະທານ​ຂອງ​ທ່ານສົມ​ມາດພົລ​ເສນາລັດຖະມົນ​ຕີ​ວ່າການ​ກະ​ຊວງ​​ໂຍທາ​ທິການ​ແລະ​ຂົນ​ສົ່ງພ້ອມ​ຄະນະພັກທົ່ວກະຊວງກໍໄດ້ເຂົ້າຮ່ວມ​.     

ກອງ​ປະຊຸມໃນ​ຄັ້ງ​ນີ້, ສຸດ​ທີ່​ມີ​ຄວາມ​ໝາຍຄວາມ​ສຳຄັນ​ເພາະເປັນການ​ກັນ​ຕີ​ລາຄາ​ຄືນ​ໃນການ​ປະ​ຕິບັດ ມະຕິ​ຂອງກອງ​ປະຊຸມ​ສາມັນ​ຄົບ​ຄະນະ​ພັກ​ກະຊວງ ຄັ້ງ​ທີ 4 ສະ​ໄໝ​ທີ III ຂອງ​ອົງຄະ​ນະພັກ​ກະຊວງ ທີ່ຜ່ານ​ມາ ​ແລະ ວາງ​ທິດ​ທາງ​ແຜນການ 3 ​ເດືອນ ຕໍ່ໜ້າ, ພ້ອມ​ທັງ​ພິຈາລະນາ ບັນຫາ​ສຳ​ຄົນ​ຕ່າງ​ໆ ​ເພື່ອ​ສຶບຕໍ່​ນຳ​ເອົາ​ເນື້ອ​ໃນ​ຈິດ​ໃຈ​ຂອງ 4 ບຸກທະລຸ ກໍ່​ຄື​ມະຕິ​ກອງ​ປະຊຸມ​ໃຫຍ່ ຄັ້ງ​ທີ IX ຂອງ​ພັກ, ມະຕິ​ກອງ​ປະຊຸມ​ໃຫຍ່ ຄັ້ງ​ທີ III ຂອງ​ອົງຄະ​ນະ​ພັກ​ກະ​ຊວງ ​ນຳໄປ​ຈັດ​ຕັ້ງ​ຜັນ​ຂະຫຍາຍ​ເຂົ້າ​ໃນ​ຊີວິດ​ຕົວ​ຈິງ​ຂອງ​ຂະ​ແໜງ ​ໂຍທາ​ທິການ ​ແລະ ຂົນ​ສົ່ງ ​ໃຫ້ປະກົດ​ຜົນ​ເປັນ​ຈິງ ​ແລະ ສຶບຕໍ່​ນຳພາ​ກະຊວງ​ ຍທຂ ສຸ່ມ​ໃສ​ຈັດ​ຕັ້ງ​ປະຕິບັດ​ແຜນ​ພັດທະນາ​ເສດຖະກິດ-ສັງ​ຄົມ​ຂອງ​ລັດ 5 ປີ ​ຄັ້ງ​ທີ VII ພ້ອມ​ກັນ​ສູ້​ຊົນ​ ເຮັດ​ໃຫ້​ປະ​ເທດ​ຊາດ​ຫຼຸດພົ້ນ​ອອກ​ຈາກ​ຄວາມ​ດ້ອຍພັດທະນາ ​ໃນ​ປີ 2020. ​

​ກອງ​ປະຊຸມ​ຍັງ​ໄດ້​ພ້ອມ​ກັນ​ຄົ້ນຄ້ວາ​ຕີ​ລາຄາ, ພິຈາລະນາ ​ແລະ​ຮັບຮອງ​ເອົາ​ຫຼາຍ​ບັນຫາ​ທີ່​ສຳຄັນ​ຄື: ສະຫລຸ​ບຕີ​ລາຄາການ​ປະຕິບັດ​ວຽກ​ງານ 3 ​ເດືອນ​ທ້າຍ​ປີ 2012 ​ແລະ​ວາງ​ທິດທາງແຜນການ​ໃນ​ຕໍ່ໜ້າ ຂອງ​ອົງຄະ​ນະ​ພັກ​ກະ​ຊວງ, ສະຫຼຸບ​ການຈັດ​ຕັ້ງ​ປະຕິບັດ​ວຽກ​ງານ ຂອງ​ຄະນະ​ປະຈຳ​ພັກ​ກະຊວງ, ລາຍ​ງານ​ການ​ເຄື່ອນ​ໄຫວ​ນຳພາ​ຂອງ ຄະນະ​ພັກ​ຮາກ​ຖານກົມ​ເຄ ​ແລະ ຜັງ​ເມືອງ,  ລາຍ​ງານ​ການ​ເຄື່ອນ​ໄຫວ​ນຳພາ​ຂອງ ໜ່ວຍ​ພັກ​ຮາກ​ຖານ ກົມ​ໂຍທາ​ທິ​ການ ທາງ​ນ້ຳ ແລະ ລາຍ​ງານ​ກ່ຽວກັບ​ວຽກ​ງານ​ແຂ່ງຂັນ-ຍ້ອງຍໍ​ກະຊວງ ປະຈຳປີ 2012.