ຂ່າວກິດຈະກຳຕ່າງໆ

ຄະນະກຳມະບານຮາກຖານ ຫ້ອງການ ຍທຂ ສ້າງກິດຈະກຳຮ່ວມ ກັບພະແນກ ຍທຂ ນະຄອນຫລວງ

ເພື່ອສ້າງຂະບວນການກະກຽມໃຫ້ແກ່ກອງປະຊຸມໃຫ່ຍຄະນະພັກຮາກຖານ ຫ້ອງການກະຊວງ ຄັ້ງທີ IV ແລະ ຂ່ຳນັບ ຮັບຕ້ອນວັນສຳຄັນຂອງຊາດ ຄະນະກຳມະບານຮາກຖານຫ້ອງການ ກະຊວງ ຈຶ່ງໄດ້ຈັດກິດຈະກຳແຂ່ງຂັນກິລາ ມິດຕະ ພາບປະເພດເປຕັງ (ບູ່ນ) ກັບ ຄະນະກຳມະບານຮາກຖານ ພະແນກ ໂຍທາທິການ ແລະ ຂົນສົ່ງ ນະຄອນຫລວງ ວຽງຈັນ ຂື້ນ ໃນວັນສຸກ ວັນທີ 19 /07/ 2013 ທີ່ສະໜາມກິລາເປຕັງ ພະແນກ ຍທຂ ນະຄອນຫລວງ, ຊຶ່ງໄດ້ເລີ່ມ ການແຂ່ງຂັນແຕ່ເວລາ 16:00 ໂມງ ແລະ ໄດ້ແບ່ງທີມຕີບູ່ນດັ່ງລາຍລະອຽດ ຄື: ທີມຄະນະນຳຫ້ອງການ ກະຊວງ ພົບກັບ ທີມຄະນະນຳຂອງພະແນກ ຍທຂ ນະຄອນຫລວງວຽງຈັນ ຜົນການແຂ່ງຂັນ ແມ່ນທີມຄະນະນຳພະແນກ ຍທຂ.ນວ ເອົາຊະນະທີມຄະນະນຳຫ້ອງການ ກະຊວງ, ທີມທີ 2 ແມ່ນທີມຄະນະກຳມະບານຮາກຖານ ຫ້ອງການ ພົບກັບທີມຄະນະກຳມະບານຮາກຖານ ພະແນກ ຍທຂ.ນວ ຜົນການ ແຂ່ງຂັນແມ່ນທີມຄະນະກຳມະບານຮາກຖານ ພະແນກ ຍທຂ.ນວ ເອົາຊະນະທີມຄະນະກຳມະບານ ຮາກຖານ ຫ້ອງການ ແລະ ອີກທີມສຸດທ້າຍ ເປັນການພົບກັນ ລະຫວ່າງທີມສະຫະພັນແມ່ຍິງຮາກຖານ ຫ້ອງການ ກັບທີມ ສະຫະພັນແມ່ຍິງ ພະແນກ ຍທຂ.ນວ ຜົນການແຂ່ງຂັນ ສະຫະພັນແມ່ຍິງ ຫ້ອງການ ສາມາດເອົາຊະນະທີມ ສະຫະພັນແມ່ຍິງ ພະແນກ ຍທຂ.ນວ ໄດ້, ແລະກິດຈະກຳດັ່ງກ່າວ ນີ້ ຍັງເປັນການສ້າງຄວາມສາຍສຳພັນອັນດີ ລະຫວ່າງ ຫ້ອງການກະຊວງ ໂຍທາທິການ ແລະຂົນສົ່ງ ກັບພະແນກ ໂຍທາທິການ ແລະຂົນສົ່ງ ນະຄອນຫລວງວຽງຈັນ ໃຫ້ດີຂື້ນເລື່ອຍໆ.

ມອບເຄື່ອງຊ່ວຍເຫລືອໃຫ້ ທະຫານຊາຍແດນ

ເພື່ອເປັນການຮູ້ບຸນຄຸນຕໍ່ອ້າຍນ້ອງທະຫານ ທີ່ປະຈຳຢູ່ເຂດຫ່າງໄກສອກຫລີກ, ເພື່ອຮັກສາຄວາມປອດໄພ ໃຫ້ແກ່ພໍ່ແມ່ປະຊາຊົນລາວທຸກທົ່ວໜ້າ. ກະຊວງໂຍທາທິການ ແລະ ຂົນສົ່ງ ເຫັນໄດ້ເຖິງຄວາມ ເອົາໃຈໃສ່ຕໍ່ ໜ້າທີ່ວຽກງານດັ່ງກ່າວ. ຈຶ່ງໄດ້ມີການລະດົມເຄື່ອງຊ່ວຍເຫລືອ ເພື່ອທີ່ຈະນຳໄປ ມອບໃຫ້ອ້າຍນ້ອງທະທານ ທີ່ຢູ່ແນວໜ້າ. ດັ່ງນັ້ນ, ໃນວັນທີ 20 ກຸມພາ 2013 ທ່ານ ນາງ ວິໄລຄຳ ໂພສາລາດ ຫົວໜ້າສະຖາບັນໂຍທາ ແລະ ຂົນສົ່ງ, ຄະນະພັກກະຊວງ ຜູ້ຊີ້ນໍາວຽກງານອົງການຈັດຕັ້ງມະຫາຊົນ, ທ່ານ ຈັນຕຸລາ ພານະລາສີ ຫົວໜ້າ ກົມກວດກາ, ຮອງປະທານກວດກາກະຊວງ ພ້ອມຄະນະ ຈາກກະຊວງໂຍທາທິການ ແລະຂົນສົ່ງ ໄດ້ໄປມອບເຄື່ອງ ຊ່ວຍເຫລືອໃຫ້ອ້າຍນ້ອງທະຫານ ທີ່ປະຈຳການຢູ່ເຂດຫ່າງໄກສອກຫຼີກຂອງແຂວງວຽງຈັນ ແລະ ແຂວງຊຽງຂວາງ.

    ການມອບເຄື່ອງຊ່ວຍເຫລືອໃນຄັ້ງນີ້ ມີເຄື່ອງອຸປະໂພກແລະ ບໍລິໂພກຊຶ່ງປະກອບດ້ວຍ ໝີ່, ປ໋ອງປາ, ນ້ຳດື່ມ ແລະ ຜ້າຫົ່ມ ໄດ້ແບ່ງອອກເປັນ 3 ຈຸດ ຄື: ຈຸດທີໜຶ່ງໄດ້ມອບໃຫ້ກອງຮ້ອຍ 421 ເມືອງວັງວຽງ ແຂວງວຽງຈັນ ໃຫ້ກຽດ ມອບໂດຍ ທ່ານ ນາງ ວິໄລຄຳ ໂພສາລາດ ຫົວໜ້າສະຖາບັນໂຍທາ ແລະ ຂົນສົ່ງ, ເຄື່ອງທີ່ນຳມາມອບ ໃນຄັ້ງນີ້ ລວມມູນຄ່າການມອບເຄື່ອງຊ່ວຍເຫລືອທັງໝົດ 8.500.000 ກີບ, ຈຸດທີ 2 ແມ່ນມອບເຄື່ອງຊ່ວຍເຫລືອ ໃຫ້ທະ ຫານກອງຮ້ອຍ 101 ເມືອງໄຊສົມບູນ ແຂວງວຽງຈັນ ມອບໂດຍ ທ່ານ ນາງ ວິໄລຄຳ ໂພສາລາດ ມີມູນຄ່າ 8.300.000 ກີບ ແລະ ຈຸດສຸດທ້າຍແມ່ນໄດ້ມອບເຄື່ອງຊ່ວຍເຫລືອໃຫ້ກອງບັນຊາການທະຫານ ເມືອງຜາໄຊ ແຂວງ ຊຽງຂວາງ ລວມມູນຄ່າການຊ່ວຍ ເຫລືອ 8.900.000 ກີບເຄື່ອງທີ່ນຳມາຊ່ວຍເຫລືອໃນຄັ້ງນີ້ ມີມູນຄ່າທັງ ໜົດ 25.700.000 ກີບ. ເພື່ອເປັນການປະກອບສ່ວນເຂົ້າໃນວຽກງານປ້ອງການຊາດ ທີ່ຍາມໃດອ້າຍນ້ອງທະຫານ ຢູ່ແນວໜ້າ ກໍໄດ້ເອົາໃຈໃສ່ເວນຍາມ ເພື່ອຄວາມສະຫງົບສຸກຂອງປວງຊົນລາວທັງຊາດ.

ຫ້ອງການສ້າງຂະບວນການຕ້ອນຮັບ ກອງປະຊູມໃຫຍ່ສະໃໝທີ IV ຂອງຕົນ

ຄະນະພັກຮາກຖານຫ້ອງການ ແມ່ນຮາກຖານພັກໜຶ່ງທີ່ຂື້ນກັບອົງຄະນະພັກກະຊວງ ໂຍທາທິການ ແລະ ຂົນສົ່ງ, ປະກອບດ້ວຍ 3 ໜ່ວຍພັກທີ່ຂື້ນກັບ ແລະ 1 ຫ້ອງການຊ່ວຍວຽກ, ປະຈຸບັນ ຫ້ອງການໄດ້ມີການປັບປຸງກົງຈັກ ການຈັດຕັ້ງ ແລະໄດ້ຊັບຊ້ອນ ຍົກຍ້າຍສະມາຊິກພັກ-ພະນັກງານ ຕາມໜ້າທີ່ວຽກງານ ແລະ ຕາມຄວາມຮັບຜິດຊອບ ຂອງແຕ່ ລະສະຫາຍ. ຈຶ່ງເຮັດໃຫ້ຄະນະພັກຮາກຖານຫ້ອງການສະໃໝທີ III ໃນເບື້ອງຕົ້ນປະກອບມີ 5 ສະຫາຍ ຍັງເຫລືອ 4 ສະຫາຍ, ຍິງ 1 ສະຫາຍ, ມີຄະນະໜ່ວຍພັກ 7 ສະຫາຍ, ຍິງ 1 ສະຫາຍ, ສະມາຊິກທັງໝົດມີ 39 ສະຫາຍ ຍິງ 11 ສະຫາຍ, ໃນນີ້ມີສະມາຊິກສໍາຮອງ 6 ສະຫາຍ, ເປັນເພດຍິງ 2 ສະຫາຍ.

ໂດຍອີງຕາມລະບຽບການຈັດກອງປະຊູມໃຫຍ່ ຄະນະພັກຮາກຖານ ແລະ ໜ່ວຍພັກ ຂອງພັກປະຊາຊົນປະຕິວັດລາວ, ຄະນະພັກຮາກຖານຫ້ອງການພວກເຮົາຈະໄດ້ເປີດກອງປະຊຸມໃຫຍ່ສະໃໝທີ IV ຂອງຕົນຂື້ນຢ່າງເປັນທາງການ ໃນ ລະຫວ່າງເດືອນ 4/2013 ທີ່ຈະມາເຖິງນີ້, ເພື່ອທົບທວນຫວນຄືນການຊີ້ນໍາ ນໍາພາ ການຈັດຕັ້ງປະຕິບັດວຽກງານ ໃນຂົງເຂດທີ່ຕົນຮັບຜິດຊອບ ຕາມມະຕິກອງປະຊູມໃຫຍ່ຄັ້ງທີ IX ຂອງພັກ, ມະຕິກອງປະຊູມໃຫ່ຍຄັ້ງທີ III ຂອງ ອົງຄະນະພັກກະຊວງ ແລະ ຕາມມະຕິກອງປະຊຸມໃຫຍ່ຄັ້ງທີ III ຂອງຄະນະພັກຮາກຖານຫ້ອງການ ພ້ອມທັງວາງ ທິດທາງແຜນການໃນຕໍ່ໜ້າ, ໃນນີ້, ຄະນະພັກຮາກຖານຫ້ອງການພວກເຮົາ ໄດ້ຊີ້ນໍາ ນໍາພາພະນັກງານ-ລັດ ຖະກອນພາຍໃນຫ້ອງການ ພ້ອມກັນສ້າງຂະບວນການເພື່ອຄໍານັບຮັບຕ້ອນວັນສໍາຄັນດັ່ງກ່າວ, ໂດຍສະເພາະແມ່ນ ການແຂ່ງຂັນກັນ ປະຕິບັດໜ້າທີ່ວຽກງານຕາມຄວາມຮັບຜິດຊອບຂອງຕົນ, ການແຂ່ງຂັນກັນນໍາໃຊ້ຊັບສົມບັດສິ່ງຂອງ ສ່ວນລວມຢ່າງຖືກຕ້ອງຕາມຄວາມຈໍາເປັນເຊັ່ນ: ການນໍາໃຊ້ໄຟຟ້າ, ນໍ້າປະປາ, ໂທລະສັບ, ຈັກອັດເອກະສານ ແລະ ອື່ນໆ ໂດຍມີການຕິດຕາມກວດກາຢ່າງຄັກແນ່ ແລະຜ່ານມາກໍ່ເຫັນວ່າສາມາດປະຢັດລາຍຈ່າຍທີ່ບໍ່ຈໍາເປັນລົງ ໄດ້ດີພໍ ສົມຄວນ. ນອກນີ້ ພວກເຮົາຍັງໄດ້ມອບໃຫ້ 3 ອົງການຈັດຕັ້ງມະຫາຊົນ ແຂ່ງຂັນກັນຮັກສາຄວາມສະອາດຢູ່ພາຍໃນ ຫ້ອງການ, ຈັດການແຂ່ງຂັນກິລາຕີບູ່ນ ເຊິ່ງເປັນກິລາທີ່ນິຍົມໃນໝູ່ພະນັກງານ ແລະ ແຂ່ງຂັນກິລາເຕະບານມິດຕະພາບຢ່າງເປັນ ຂະບວນຟົດຟື້ນ.

ຄຊປທ ໄດ້ຈັດກິດຈະກຳ ຂັບຂີ່ປອດໄພໃສ່ໝວກກັນກະທົບ

ໃນວັນທີ່ 29 ທັນວາ 2012 ຢູ່ທີ່ສວນປະຕູໄຊນະຄອນຫຼວງວຽງຈັນໄດ້ຈັດກິດຈະກຳ “ ຂັບຂີ່ປອດໄພໃສ່ໝວກກັນ ກະທົບ “ , ​ໂດຍເປັນກຽດເຂົ້າຮ່ວມຂອງທ່ານສົມມາດພົລເສນາ, ລັດຖະມົນຕີວ່າການກະຊວງໂຍທາທິການແລະຂົນສົ່ງ, ທ່ານສາຍທອງແກ້ວດວງດີຮອງເຈົ້າຄອງນະຄອນຫຼວງວຽງຈັນ, ທ່ານນາງ Dr. Aleria De Oliveira Cruz, ຕາງໜ້າອົງການອານະໄມໂລກປະຈຳລາວແລະແຂກຂອງກະຊວງຍທຂ, ມີບັນດາຫົວໜ້າ​ ​ແລະຮອງກົມ, ຫ້ອງການ, ອົງການ, ສະຖາບັນ, ສະພາວິທະຍາສາດ, ກອງວິຊາການ, ສູນຝຶກ, ​ແຂກຈາກອົງການຈັດຕັ້ງອ້ອມຂ້າງນະຄອນຫຼວງ, ມີຫົວໜ້າ​ ​ແລະຮອງກົມ, ພະແນກການ, ຜູ້ອຳນວຍການໂຮງຮຽນສາມັນຕອນປາຍ, ຜູ້ອຳນວຍ ການບໍລິສັດ, ຜູ້ອຳນວຍການໂຮງຮຽນສອນຂັບລົດແລະຫົວໜ້າສະມາຄົມລົດໂດຍສານຕ່າງເຂົ້າຮ່ວມຢ່າງພ້ອມພຽງ.

      ອິງຕາມວາລະຂອງການຈັດງານ, ກອງເລຂາຄະນະກຳມະການ​​ແຫ່ງຊາດດ້ານຄວາມປອດ​​ໄພທາງຖະໜົນໄດ້ເຕົ້າໂຮມນັກສຶກສາມັດທະຍົມທັງສາມໂຮງຮຽນມສວຽງຈັນ, ມສສີໂຄດຕະບອງແລະມສເພຍວັດເຂົ້າຮ່ວມຕັ້ງແຕ່ເວລາ 6:30 ​ເຊົ້າຂອງວັນທີ່ 29 ທັນວາ 2012 ນີ້ແລະໄດ້ປ່ວຍຂະບວນລົດຈັກນັກສຶກສາທັງສາມຂະບວນແລ່ນຮອບເມືອງວຽງຈັນສາມເສັ້ນທາງໃນ​​ເວລາ 7:00 ຄື: 1) ມສວຽງຈັນແລ່ນເສັ້ນທາງສວນປະຕູ​​ໄຊຫາສີແຍກໄຟແດງ 450 ປີ, 2) ມສສີໂຄດແລ່ນເສັ້ນທາງສວນປະຕູໄຊຫາຕະຫຼາດສີໄຄແລະ3)ມສເພຍວັດແລ່ນເສັ້ນທາງສວນປະຕູໄຊຫາວົງວຽນຄ້າຍຈີ່ນາຍໂມ້. ນອກຈາກນີ້ຍັງມີນັກສຶກສາຈາກວິມະຍາໄລລັດຕະນະບໍລິຫານທຸລະກິດແລະພະນັກງານຈາກບໍລິສັດໂຄລາວເຂົ້າຮ່ວມຂະບວນຂີ່ລັດຮອບເມືອງນຳອີກ.  ຈາກຕົວເລກສະຖີຕິຂອງກອງເລຂາຄຊປທຊີ້ໃຫ້ເຫັນວ່າຈຳນວນພາຫະນະທີ່ລົງທະບຽບໃນປີ 2011 ມີ 1.141.585 ຄັນຖ້າຄິດອັດຕາເພີ້ມຂື້ນເມື່ອທຽບກັບປີ 1996 ​ແມ່ນເພີ້ມຂຶ້ນສະເລັ່ຍປີລະປະມານ 15%, ຊື່ໃນນັ້ນມີລັດຈັກກວມເອົາປະມານ 80%. ສ່ວນຈຳນວນອຸປະຕິເຫດໃນປີ 2011 ​ແມ່ນສູງເຖີ 4.462 ກໍລະນີຊື່ໃນນັ້ນມີຈຳນວນຜູ້ເສຍຊີວິດ 856 ຄົນ. ​ເວົ້າລວມໃນໄລຍະ 15 ປີຜ່ານມາ, ຈຳນວນອຸປະຕິເຫດເກີດຂຶ້ນສະເລັ່ຍແມ່ນບໍ່ຕ່ຳກວ່າ 5.000 ຄັ້ງຕໍ່ປີ ແລະມີຜູ້ເສບຊີວິດບໍ່ຕ່ຳກວ່າ 550 ຄົ້ນຕໍ່ປີ, ຈຳນວນອຸປະຕິເຫດແລະເສຍຊີວິດມີທ່າອ່ຽງເພີ້ມຂຶ້ນເປັນເງົາຕາມຕົວຂອງການເພີ້ມຂຶ້ນຂອງຍານພາຫະນະ, ສະເລັ່ຍປະມານ7% ຕໍ່ປີ.

Additional information