ຂ່າວຕ່າງແຂວງ

ພິທີເປີດການກໍ່ສ້າງ ໂຄງການກໍ່ສ້າງ ຂົວຂ້າມນໍ້າເຊກອງ

 ໃນຕອນເຊົ້າວັນທີ 16 ມີນາ 2015 ທີ່ຜ່ານມາ, ໄດ້ຈັດພິທີເປີດການກໍ່ສ້າງ ໂຄງການກໍ່ສ້າງຂົວຂ້າມນໍ້າເຊກອງ ຕາມ ທາງຫລວງແຫ່ງຊາດເລກ 16B ແຂວງເຊກອງ, ເປັນກຽດເຂົ້າຮ່ວມໂດຍ ທ່ານ ຄໍາເຜີຍ ບຸດດາວຽງ ກໍາມະການສູນ ກາງພັກ, ເລຂາພັກແຂວງເຈົ້າແຂວງໆເຊກອງ, ທ່ານ ຮີໂຣຢູກິ ກິຊິໂນະ ເອກອັກຄະລັດຖະທູດຍີ່ປຸ່ນ ປະຈໍາ ສປປ ລາວ, ທ່ານ ດຣ ບຸນຈັນ ສິນທະວົງ ລັດຖະມົນຕີວ່າການກະຊວງ ຍທຂ, ທ່ານ ຢູສຸເກະມິ ຫົວໜ້າອົງການໄຈກາ ປະຈໍາ ສປປ ລາວ, ທ່ານຮອງເຈົ້າແຂວງ, ທ່ານເຈົ້າເມືອງ, ຮອງເຈົ້າເມືອງ ແລະ ພໍ່ແມ່ປະຊາຊົນຊາວແຂວງເຊກອງ ເຂົ້າ ຮ່ວມ.

 

ໂຄງການກໍ່ສ້າງຂົວຂ້າມນໍ້າເຊກອງແຫ່ງນີ້, ເປັນໂຄງການໜຶ່ງ ທີ່ມີຄວາມໝາຍສໍາຄັນດ້ານການຄົມມະນາຄົມ-ຂົນສົ່ງ, ເປັນເສັ້ນທາງທີ່ສັ້ນ ເພື່ອເຊື່ອມຈອດລະຫວ່າງເມືອງລະມາມ, ເທດສະບານແຂວງເຊກອງ-ເມືອງດາກຈຶງ ແລະເຊື່ອມຕໍ່ ໃສ່ຊາຍແດນລາວ-ຫວຽດນາມ, ຊຶ່ງເປັນເສັ້ນທາງທີ່ມີປະສິດທິຜົນສູງທາງດ້ານເສດຖະກິດ-ສັງຄົມ, ເຮັດໃຫ້ການໄປມາ ຫາສູ່ຂອງປະຊາຊົນສະດວກສະບາຍຂື້ນ, ປະກອບສ່ວນເຂົ້າໃນການແກ້ໄຂຄວາມທຸກຍາກ ຂອງປະຊາຊົນບັນດາເຜົ່າ ໃນຂົງເຂດນີ້, ເຮັດໃຫ້ຊີວິດການເປັນຢູ່ດີຂຶ້ນ, ທັງເປັນການສົ່ງເສີມການຄ້າ, ການລົງທຶນ ແລະການທ່ອງທ່ຽວໃຫ້ສະ ດວກຂຶ້ນ, ຊຶ່ງເຫັນໄດ້ຄວາມສໍາຄັນດັ່ງກ່າວ, ລັດຖະບານຍີ່ປຸ່ນຈຶ່ງໄດ້ໃຫ້ການຊ່ວຍເຫຼືອລ້າກັບໂຄງການກໍ່ສ້າງຂົວ ແຫ່ງນີ້, ໃນມູນຄ່າ 1,62 ຕື້ເຢັນ ແລະ ລັດຖະບານລາວ  ແມ່ນປະຕິບັດຕາມພັນທະຂອງຕົນ ຕາມລະບຽບການຂອງ ຜູ້ໃຫ້ທຶນ, ດັ່ງບັນດາໂຄງການຮ່ວມມືລາວ-ຍີ່ປຸ່ນທີ່ເຄີຍໄດ້ປະຕິບັດຜ່ານມາ.

 ຂົວແຫ່ງນີ້, ເປັນຂົວປະສົມລະຫວ່າງສາຍກາບ ແລະເບຕົງ ໄລຍະການກໍ່ສ້າງແມ່ນ 29 ເດືອນຈະໃຫ້ສໍາເລັດ ຊຶ່ງເລີ່ມ ກໍ່ສ້າງວັນທີ 04 ພະຈິກ 2014 ແລະຈະໃຫ້ສໍາເລັດວັນທີ 31 ມີນາ 2017, ຂົວດັ່ງກ່າວມີລວງຍາວ 300 ມ, ມີເສົາກາງ 3 ເສົາ, ລວງກວ້າງຂອງໜ້າຂົວ 2x3.5=7+ທາງຍ່າງ 1.5x2=3 ມ+ຂອບທາງ 0.5x2=1ມ, ລວມທັງມົດ 11ມ, ມີທາງເຂົ້າຂົວສອງເບື້ອງ (300+227)=527ມ ເພື່ອເຮັດໃຫ້ການຈັດຕັ້ງປະຕິບັດໂຄງການດັ່ງກ່າວໃຫ້ສໍາເລັດຕາມ ຄາດໝາຍນັ້ນ, ຜູ້ຮັບຜິດຊອບໂຄງ ການ ຈຶ່ງຂໍສະເໜີມາຍັງບັນດາພະແນກການທີ່ກ່ຽວຂ້ອງ, ອໍານາດການປົກຄອງທຸກ ຂັ້ນ ແລະ ປະຊາຊົນ ບັນດາເຜົ່າຈົ່ງໃຫ້ຄວາມຮ່ວມມື ໃນການຈັດຕັ້ງປະຕິບັດໂຄງການກໍ່ສ້າງ.

ພິທີມອບ-ຮັບ ໂຄງການປັບປຸງທາງ ຫລວງແຫ່ງຊາດ ເລກ 9

ໂຄງການປັບປຸງທາງເລກ 9 ແມ່ນນອນໃນບູລິມະສິດໜຶ່ງ ຂອງແຜນຍຸດທະສາດພັດທະນາຂອງລັດຖະບານ ແຕ່ປີ 2000-2015, ເນື່ອງຈາກ ສປປ ລາວ ບໍ່ມີຊາຍແດນຕິດກັບທະເລ ສະນັ້ນ, ທາງເລກ 9 ຈຶ່ງເປັນເສັ້ນທາງຍຸດທະສາດ ສໍາລັບການເຊື່ອມຕໍ່ບັນດາປະເທດໄກ້ຄຽງ ແລະ ມີບົດບາດສໍາຄັນໃນການພັດທະນາເສດຖະກິດ-ສັງຄົມ ເພື່ອກ້າວສູ່ ການເປັນສະມາຄົມອາຊຽນ, ເສັ້ນທາງດັ່ງກ່າວມີຄວາມໝາຍທີ່ສຳຄັນ ຊຶ່ງມີຄວາມຈໍາເປັນຕ້ອງໄດ້ຮັບການປັບປຸງຍົກ ລະດັບໃຫ້ທຽບເທົ່າກັບສາກົນ ເພື່ອເຮັດໃຫ້ການຄົມ ມະນາຄົມ-ຂົນສົ່ງ ມີຄວາມສະດວກວ່ອງໄວ, ປອດໄພ ແລະ ປະ ຢັດກວ່າເກົ່າ.

ໃນວັນທີ 14 ມີນາ 2015 ຈຶ່ງໄດ້ຈັດພິທີມອບ-ຮັບໂຄງການປັບປຸງທາງຫຼວງແຫ່ງຊາດ ເລກ 9 ຂຶ້ນໂດຍໃຫ້ກຽດເຂົ້າ ຮ່ວມຂອງທ່ານ ສົມສະຫວາດ ເລັ່ງສະຫວັດ ກໍາມະການກົມການເມືອງສູນກາງພັກ, ຮອງນາຍົກລັດຖະມົນຕີ, ຜູ້ຊີ້ນໍາ ວຽກງານຂົງເຂດເສດຖະກິດ ການຜະລິດ ແລະການຈໍລະຈອນ, ທ່ານ ຮີໂຣຢູກິ ກິຊີໂນະ ເອກອັກຄະຣາຊະທູດຍີ່ປຸ່ນ ປະຈໍາ ສປປ ລາວ, ທ່ານ ດຣ ບຸນຈັນ ສິນທະວົງ ລັດຖະມົນຕີວ່າການກະຊວງ ຍທຂ, ທ່ານ ສົມມາດ ພົລເສນາ ລັດ ຖະມົນຕີປະຈໍາຫ້ອງວ່າການລັດຖະບານ, ທ່ານ ດຣ ສຸພັນ ແກ້ວມີໄຊ ເລຂາພັກແຂວງ, ເຈົ້າແຂວງໆ ສະຫວັນນະ ເຂດ, ມີທ່ານຮອງເຈົ້າແຂວງ, ແຂກທີ່ຖືກເຊີນພາຍໃນແຂວງ, ເມືອງ ແລະພໍ່ແມ່ປະຊາຊົນ ເຂົ້າຮ່ວມ.

 

ໃນພິທີຄັ້ງນີ້, ທ່ານ ວຽງວິໄລ ສຸລິນທອນ ຫົວໜ້າໂຄງການ ໄດ້ຂື້ນລາຍງານກ່ຽວກັບສະພາບການຈັດຕັ້ງປະຕິບັດ ໂຄງການ ແລະມີມາດຖານເຕັກນິກໃນການກໍ່ສ້າງ ວ່າ: ເສັ້ນທາງຫລວງແຫ່ງຊາດເລກ 9 ໄດ້ກໍ່ສ້າງປັບປຸງຍົກລະດັບ ເປັນໄລຍະເວລາ 36 ເດືອນ, ເລີ່ມລົງມືແຕ່ວັນທີ 26 ເມສາ 2012 ແລະ ສຳເລັດຕາມແຜນການທີ່ກໍາໄວ້, ຊຶ່ງມີ ໜ້າວຽກຫລັກດັ່ງນີ້ ການຂູດຮື້ໜ້າທາງອັດສະຟານເກົ່າອອກແລະຍົກລະດັບຊັ້ນຮອງພື້ນທາງ, ຊັ້ນພື້ນທາງດ້ວຍ ວັດສະດຸຫີນຂົບ ແລະປູຢາງອັດສະຟານ 2 ຊັ້ນ, ມີຄວາມໜາ 10 ຊັງຕີແມັດ, ໜ້າທາງກວ້າງ 9 ແມັດ ແລະກໍ່ສ້າງ ທາງເບຕົງຢູ່ໜ້າສະຖານນີຕິດຊັ່ງລົດບັນທຸກໜັກ, ມີລວງຍາວ 265 ແມັດ, ຄວາມອາດສາມາດຮັບນໍ້າໜັກ 11 ໂຕນ/ເພົາ, ຄວາມໄວສະເລ່ຍ 56.3 ກມ/ຊມ, ມີລະບົບລະບາຍນໍ້າສອງຂ້າງທາງທີ່ກໍ່ສ້າງດ້ວຍເບຕົງ, ຕິດຕັ້ງລະບົບ ປ້ອງກັນຄວາມປອດໄພ, ປ້າຍຈໍລະຈອນ, ລະບົບໄຟຟ້າເຍື່ອງທາງໃນເຂດຕົວເມືອງ, ທາງຫຼວງແຫ່ງຊາດເລກ 9 ແຕ່ ຊາຍແດນໄທ-ຊາຍແດນ ສສຫວຽດນາມ ມີລວງຍາວ 242 ກມ, ແຕ່ຕອນທາງທີ່ນອນໃນໂຄງການປັບປຸງຄັ້ງນີ້ ມີລວງ ຍາວ 58,1 ກມ, ຊຶ່ງແບ່ງອອກເປັນ 2 ຕອນທາງຄື: ຕອທີ 1 ເລີ່ມແຕ່ ກມ 18+800 (ເມືອງອາດສະພັງທອງ)- ກມ 75+800 (ເມືອງພະລານໄຊ) ແລະຕອນທີ 2 ເລີ່ມແຕ່ ກມ 113+800 (ເຊທ່າມວກ)- ກມ 119+800 (ເມືອງພີນ), ທາງດັ່ງກ່າວສໍາເລັດ 100%, ຊຶ່ງຜົນສໍາເລັດດັ່ງກ່າວແມ່ນພາຍໃຕ້ການຊີ້ນໍາໆ ພາຈາກຂັ້ນເທິງ, ໂດຍສະເພາະກໍ ແມ່ນ ຄະນະນໍາກະຊວງ ຍທຂ, ອໍານາດການປົກຄອງແຂວງ, ເມືອງ ແລະໄດ້ຮັບການຮ່ວມມືຈາກພະແນກການທີ່ກ່ຽວຂ້ອງ, ອໍານາດການປົກຄອງທ້ອງຖິ່ນ ແລະພໍ່ແມ່ປະຊາຊົນເປັນຢ່າງດີ.

 

ພິທີມອບ-ຮັບ ໂຄງການກໍ່ສ້າງທາງ ເລກທີ 15

ໃນວັນທີ 15 ມີນາ 2015 ຜ່ານມານີ້ ຢູ່ທີ່ແຂວງສາລະວັນ ໄດ້ຈັດພິທີມອບ-ຮັບໂຄງການກໍ່ ສ້າງທາງເລກທີ 15 ຂຶ້ນ ໂດຍການໃຫ້ກຽດເຂົ້າຮ່ວມຂອງ ທ່ານ ສົມສະຫວາດ ເລັ່ງສະຫວັດ ຮອງນາຍົກ ລັດຖະມົນຕີ ຜູ້ຊີ້ນຳວຽກງານເສດ ຖະກິດ ການຜະລິດ ແລະຈໍລະຈອນ, ທ່ານ ດຣ ບຸນຈັນ ສິນທະວົງ ລັດຖະມົນຕີວ່າການກະຊວງ ຍທຂ, ທ່ານ ສົມມາດ ພົລເສນາ ລັດຖະມົນຕີປະຈໍາຫ້ອງວ່າການລັດຖະບານ, ທ່ານ ຄໍາ​ບຸ່ນ ດ້ວງ​ປັນຍາ ​ເລຂາ​ພັກ​ແຂວງເຈົ້າ​ແຂວງໆສາລະ​ວັນ, ຮອງ​ເຈົ້າ​ແຂວງ​, ບັນດາຫົວໜ້າ, ຮອງພະ​ແນ​ກການ​ອ້ອມ​ຂ້າງ, ​ແຂກ​ທີ່​ຖືກ​ເຊີນ ​ແລະ​ພໍ່​ແມ່​ປະຊາຊົນ​ທີ່ຢູ່​ພ້ອມ​ຂ້າງ​​ໄດ້​ເຂົ້າ​ຮ່ວມ.

 

ໂຄງການກໍ່ສ້າງທາງເລກ 15 ແມ່ນໂຄງການໜຶ່ງທີ່ນອນ ຢູ່ໃນແຜນພັດທະນາພື້ນຖານ ໂຄງລ່າງດ້ານການຄົມມະນາຄົມ ຂອງລັດຖະບານ ຊຶ່ງເປັນໂຄງການທີ່ມີຄວາມໝາຍສຳຄັນທາງດ້ານເສດຖະກິດ-ສັງຄົມ, ການຄ້າ, ການລົງທຶນ ແລະ ການທ່ອງທ່ຽວ. ເປັນເສັ້ນທາງເຊື່ອມຈອດໜຶ່ງລະຫວ່າງບັນດາປະເທດໃນອາຊຽນ ກໍຄືໃນອະນຸພາກພື້ນລຸ່ມແມ່ນ້ຳຂອງ ທີ່ມີໄລຍະສັ້ນນັບແຕ່ທາງເລກ 13 ໃຕ້ ຜ່ານແຂວງສາລະວັນ ຮອດຊາຍແດນລາວ-ຫວຽດນາມ ຄວາມຍາວ 200 ກວ່າ ກິໂລແມັດ, ທັງມີປະສິດທິຜົນສູງໃນ ການພັດທະນາທາງດ້ານເສດຖະກິດ ເຮັດໃຫ້ການໄປມາຫາສູ່ກັນ ແລະ ການ ຂົນສົ່ງສິນຄ້າ ມີຄວາມສະດວກສະບາຍຂື້ນ ປະກອບສ່ວນສຳຄັນເຂົ້າໃນການພັດທະນາເສດຖະກິດ-ສັງຄົມຂອງຊາດ ກໍຄືຂອງທ້ອງຖິ່ນ ໃຫ້ມີການຂະຫຍາຍຕົວເປັນກ້າວໆ ໂດຍສະເພາະສາມາດຍົກລະດັບຊີວິດການເປັນຢູ່ຂອງປະຊາຊົນ ຕາມເສັ້ນທາງດັ່ງກ່າວໃຫ້ນັບມື້ນັບດີຂື້ນ.

ໂຄງການກໍ່ສ້າງທາງເລກ 15 ແບ່ງອອກເປັນ 2 ໄລຍະ ຂອງໂຄງການຄື: ເສັ້ນທາງ 15 B ເປັນໂຄງການທີ່ໄດ້ຮັບ ການ ຈັດຕັ້ງປະຕິບັດກ່ອນ ເພື່ອແກ້ໄຂການຄົມມະນາຄົມຂອງ ປະຊາຊົນ 4 ເມືອງຄື: ເມືອງສາລະວັນ, ຕຸ້ມລານ, ຕະໂອ້ຍ ແລະ ເມືອງສະໝ້ວຍ ຫາຊາຍແດນຫວຽດນາມ ທີ່ເມື່ອກ່ອນຕ້ອງໃຊ້ເວລາເດີນທາງເຖິງ 2 ວັນ ເປັນໄລຍະທາງກວ່າ 1 ພັນກິໂລແມັດ ຊຶ່ງເສັ້ນທາງ 15B ແມ່ນມີໄລຍະທາງພຽງ 147,3 ກິໂລແມັດ, ໄດ້ເລີ່ມອອກແບບສຳຫຼວດມາແຕ່ປີ 2000 ແລະ ໄດ້ເລີ່ມກໍ່ສ້າງໃນທ້າຍປີ 2005 ເປັນປະເພດທາງຊັ້ນ IV ປະກອບດ້ວຍ 2 ຂະໜາດໜ້າທາງຄື: ໜ້າທາງ ກວ້າງ 7 ແມັດ ມີໄລຍະທາງ 80 ກິໂລແມັດ ແລະ ໜ້າທາງ 9 ແມັດ ຍາວ 67,3 ກິໂລແມັດ. ນອກຈາກນີ້ ຍັງໄດ້ກໍ່ສ້າງ ທາງ ໃນເທດສະບານເມືອງສາລະວັນ 2 ເສັ້ນຍາວ 5,5 ກິໂລ ແມັດ ໜ້າທາງກວ້າງ 13,5 ແມັດ, ທາງຄົນຍ່າງ ເບື້ອງລະ 1,75 ແມັດ ພ້ອມລະບົບໄຟເຍືອງທາງ ແລະ ລະບົບລະບາຍນ້ຳ ໂດຍໃຊ້ເວລາໃນການກໍ່ສ້າງທັງໝົດ 7 ປີ 5 ເດືອນ ຄິດເປັນມູນຄ່າເກືອບ 85 ລ້ານ ໂດລາສະຫະລັດ. ສ່ວນໂຄງການໄລຍະສອງ ແມ່ນການກໍ່ສ້າງທາງເລກ 15A ຊຶ່ງເປັນ ເສັ້ນທາງທີ່ຕິດພັນກັບການພັດທະນາທາງຫລວງແຫ່ງຊາດ ເລີ່ມແຕ່ທາງຫລວງເລກ 13 ໃຕ້ ຈຸດທາງແບ່ງ ບ້ານນາປົ່ງ ຫາ ຕົວເມືອງສາລະວັນ ເປັນໄລຍະທາງ 70,2 ກິໂລແມັດ ເປັນເສັ້ນທາງປູຢາງສອງຊັ້ນ ສາມາດຮັບນ້ຳ ໜັກໄດ້ 11 ໂຕນ ຕໍ່ເພົາ. ພ້ອມນີ້, ຍັງໄດ້ກໍ່ສ້າງທາງເວັ້ນແຕ່ຈຸດແຍກທາງເລກ 15A ຜ່ານບ້ານນາທ່ອນ ຫາ ທາງເລກ 20 ທີ່ບ້ານນາຄອຍສາວ ຍາວ 7,5 ກິໂລແມັດ, ກໍ່ສ້າງທາງໃນເທດສະບານຂອງ 6 ເມືອງໆລະ 3 ກິໂລແມັດ ຄື: ເມືອງລະຄອນເພັງ, ຄົງເຊໂດນ, ວາປີ, ຕຸ້ມລານ, ຕະໂອ້ຍ ແລະເມືອງສະໝ້ວຍ ແລະ ກໍ່ສ້າງລະບົບນ້ຳປະປາ ໃຫ້ 5 ຕົວເມືອງຄື: ເມືອງລະຄອນເພັງ, ວາປີ, ຕຸ້ມລານ, ຕະໂອ້ຍ ແລະເມືອງສະໝ້ວຍ ຊຶ່ງເລີ່ມລົງມືກໍ່ສ້າງມາແຕ່ເດືອນເມສາ 2011 ໃນໄລຍະເວລາຕາມສັນຍາ 4,2 ປີ ເປັນມູນຄ່າ 68 ລ້ານກວ່າໂດລາສະຫະລັດ.

ຂົວຂ້າມນ້ຳຂອງດອນໂຂງ ພ້ອມເປີດໃຊ້ໃນທ້າຍເດືອນພະຈິກ ປີນີ້

  ໂຄງການ​ກໍ່ສ້າງ​ຂົວ​ຂ້າມນ້ຳຂອງ​ດອນ​ໂຂງ (ບ້ານ​ຫາດ-ບ້ານ​ຫ້ວຍ) ແຂວງ​ຈຳປາ​ສັກ ເຊິ່ງ​ມາ​ຮອດ​ປັດຈຸ​ບັນ ສຳເລັດ​ເກືອບ 100% ພາຍຫຼັງ​ໄດ້​ດຳເນີນ​ການ​ກໍ່ສ້າງ​ມາ​ແຕ່​ປີ 2012 ແລະ ຈະ​ເປີດ​ນຳ​ໃຊ້​ຢ່າງ​ເປັນ​ທາງ​ການ​ ໃນ​ທ້າຍ​ເດືອນພະຈິກ ປີ 2014 ທີ່​ຈະ​ມາ​ເຖິງ​ນີ້.

   ທ່ານ ຄຳ​ຮຸ່ງ ໜູ​ພະ​ໄຊ ຫົວໜ້າ​ໂຄງການ​ກໍ່ສ້າງ​ຂົວ​ຂ້າມ​ນ້ຳຂອງດອນ​ໂຂງ ໄດ້​ໃຫ້​ສຳພາດ​ຕໍ່​ສື່​ມວນ​ຊົນ ໃນ​ວັນ​ທີ 26 ເດືອນ​ຕຸລາ ປີ 2014 ນີ້​ວ່າ: ໂຄງການ​ກໍ່ສ້າງ​ຂົວ​ຂ້າມ​ນ້ຳຂອງ​ດອນ​ໂຂງ ແຂວງ​ຈຳປາ​ສັກ ແມ່ນໂຄງການ​ບູ​ລິ​ມະ​ສິດ​ຂອງ​ລັດຖະບານ ເຊິ່ງ​ນອນ​ໃນ​ແຜນ​ພັດທະນາເສດຖະກິດ-ສັງຄົມ ໃນ​ທົ່ວ​ປະເທດ ເວົ້າ​ລວມ, ເວົ້າ​ສະເພາະ ກໍ່​ຄືຕາ​ໜ່າງ​ຄົມມະນາຄົມ​ຂົນສົ່ງເຂົ້າ​ເຖິງ​ດອນ​ໂຂງ ຂົວ​ຂ້າມນ້ຳຂອງ​ດອນ​ໂຂງ​ນີ້​ ແມ່ນ​ມີຄວາມແຕກ​ຕ່າງ​ຈາກ​ຂົວ​ແຫ່ງ​ອື່ນໆ ເນື່ອງ​ຈາ​ກວ່າ​ມີ​ລັກສະນະ​ໂຄ້ງ ກົ່ງ​ກາງ ຮັບ​ນ້ຳໜັກ​ໄດ້ 100 ໂຕນ, ຍາວ 718 ແມັດ, ກວ້າງ 11 ແມັດ, ທາງ​ຄົນ​ຍ່າງ 2 ຂ້າງ-ຂ້າງ​ລະ 1,5 ແມັດ, ໜ້າ​ທາງ​ລົດ​ກວ້າງ 8 ແມັດ ແລະ ມີ​ອາຍຸ​ການ​ນຳ​ໃຊ້ 100 ປີ.

   ນອກຈາກ​ສ້າງ​ຂົວ​ດັ່ງກ່າວ​ແລ້ວ ​ຍັງ​ໄດ້​ສ້າງ​ຂົວ​ນ້ອຍ (ບ້ານ​ຫົວ​ໂຂງ​ແຫຼມ-ບ້ານ​ດອນ​ສັນ) ຍາວ 180 ແມັດ, ກວ້າງ 5 ແມັດ, ສ້ອມແປງ ແລະ ຂະຫຍາຍ​ທາງ​ຈາກ​ທາງ​ແຍກ ເລກ 13 ໃຕ້​ ເຂົ້າ​ຫາ​ຂົວ ມີ​ຄວາມ​ຍາວ 4,200 ແມັດ, ກວ້າງ 7 ແມັດ, ປູຢາງ 2 ຊັ້ນ ແລະ ກໍ່ສ້າງ​ທ່າ​ບັກ ບ້ານ​ຫົວ​ໂຂງ​ໃຫຍ່ (ເມືອງ​ໂຂງ) ຫາບ້ານ​ຫ້ວຍ​ຍາງ (ເມືອງ​ມຸນ​ລະ​ປະ​ໂມກ) ຕື່ມ​ອີກ ລວມ​ມູນ​ຄ່າ​ການ​ກໍ່ສ້າງ​ທັງ​ໝົດ 34 ລ້ານ​ກວ່າ​ໂດ​ລາ​ສະຫະລັດ ຫຼື ເທົ່າ​ກັບ 272 ຕື້​ກວ່າ​ກີບ. ໃນ​ນັ້ນ ແຫຼ່ງ​ທຶນ​ແມ່ນ​ກູ້​ຢືມ​ຈາກ​ທະນາຄານຂາ​ອອກ-ຂາ​ເຂົ້າ (EXIM BANK) ​ສປ ຈີນ ແລະ ທຶນ​ສົມທົບ​ຈາກ​ລັດຖະບານ​ລາວ 5% ໂດຍ​ແມ່ນ​ບໍລິສັດ HNDCI ​ສປ ຈີນ ເປັນ​ຜູ້​ຮັບ​ເໝົາ​ກໍ່ສ້າງ.

 

 

 

Additional information