ຂ່າວຕ່າງແຂວງ

ກອງປະຊຸມໃຫຍ່ຜູ້ແທນ ຄະນະພັກຮາກຖານ ພະແນກ ໂຍທາທິການ ແລະ ຂົນສົ່ງ ຄັ້ງທີ VII ແຂວງຫຼວງພະບາງ

   

    ໃນຕອນບ່າຍຂອງວັນທີ 26 ກັນຍາ 2014, ກອງປະຊຸມໃຫຍ່ຜູ້​ແທນ ຄະນະ​ພັກຮາກຖານ ພະແນກ ​ໂຍທາທິການ ​ແລະ ຂົນ​ສົ່ງ ຄັ້ງທີ VII ແຂວງຫຼວງພະບາງ, ໄດ້ໄຂຂຶ້ນຢ່າງເປັນທາງການ, ໂດຍການ ເປັນປະ ທານຂອງ ສະຫາຍ ດຣ ຄໍາແພງ ໄຊສົມແພງ, ກໍາມະການສູນກາງພັກ, ເລຂາຄະນະບໍລິຫານງານພັກ ແຂວງຫຼວງພະບາງ; ສະຫາຍ ດຣ ບຸນຈັນ ສິນທະວງ, ເລຂາຄະນະພັກ ກະຊວງ ໂຍທາທິການ ແລະ ຂົນສົ່ງ; ສະຫາຍ ສາຍສະໜອນ ທິດາກອນ, ກໍາມະການພັກແຂວງ, ຫົວໜ້າຄະ ນະຊີ້ນໍາບັ້ນດໍາເນີນຊີວິດການເມືອງ ກຸ່ມເສດຖະກິດໜ່ວຍ2; ສະຫາຍ ຄໍາຫວັນ ວັນວິໄລ, ກໍາມະການພັກແຂວງ, ຫົວໜ້າຄະນະຈັດຕັ້ງແຂວງ; ສະຫາຍ ຟ້າສະນັ່ນ ທໍາມະວົງ, ເລຂາຄະ ນະພັກຮາກຖານ ພະແນກ ຍທຂ ​ແລະ ຜູ້​ແທນຄະນະ​ພັກຮາກຖານ ພະແນກ ​ໂຍທາທິການ ​ແລະ ຂົນ​ສົ່ງ ແຂວງຫຼວງພະບາງ ເຂົ້າຮ່ວມທັງໝົດ 57 ສະຫາຍ, ຍິງ 7 ສະ​ຫາຍ.

    ກອງປະຊຸມ​ໃຫຍ່ໄດ້ຜ່ານຮ່າງບົດລາຍງານການເມືອງ, ບົດສະຫຼຸດຕີລາຄາວຽກງານຮອບດ້ານໃນການຈັດ ຕັ້ງປະຕິບັດວຽກງານຜ່ານມາ ແຕ່ປີ 2010-2014 ແລະ ຜ່ານຮ່າງບົດສໍາຫຼວດກວດກາການເຄື່ອນໄຫວນໍາ ພາລວມ ຂອງ ສະຫາຍ ຟ້າສະນັ່ນ ທໍາມະວົງ ເລຂາຄະນະພັກຮາກຖານ ພະແນກ ຍທຂ.

      ກອງປະຊຸມໄດ້ດໍາເນີນການປ່ອນບັດເລືອກຕັ້ງເອົາຄະນະພັກຮາກຖານຊຸດໃໝ່, ຊຶ່ງມີຜູ້ສະໝັກເລືອກຕັ້ງ 7 ສະຫາຍ, ເລືອກເອົາ 5 ສະຫາຍ, ຊຶ່ງ​ລ້ວນ​ແຕ່​ແມ່ນຜູ້​ທີ່​ມີ​ຄວາມ​ຮູ້ ຄວາມ​ສາມາດ ມີ​ບົດຮຽນ​ໃນ​ການ​ຊີ້​ນຳ​-ນໍາພາ ທັງ​ເປັນ​ຜູ້​ທີ່​ຈົງ​ຮັກ​ພັກດີ,​ ຢຶດໝັ້ນຕໍ່ອຸດົມ​ການ​ຂອງ​ພັກ. ຜ່ານ​ການ​ປ່ອນ​ບັດ​ເລືອກ​ຕັ້ງສາມາດເລືອກໄດ້ຄະນະ​ພັກຮາກ​ຖານ​ຊຸດ​ໃໝ່ດັ່ງລຸ່ມ​ນີ້:

 

  1. ສະຫາຍ ຟ້າສະນັ່ນ ທໍາມະວົງ  ເປັນເລຂາຄະນະພັກຮາກຖານ, ຮັບຜິດຊອບຊີ້ນໍາລວມ
  2. ສະຫາຍ ສຸລິດ ຈິນດາມະນີ    ເປັນຮອງເລຂາຄະນະພັກຮາກຖານ
  3. ສະຫາຍ ບຸນຄົງ ສຸກສະຫວັດ   ເປັນຮອງເລຂາຄະນະພັກຮາກຖານ
  4. ສະຫາຍ ອັດສະວິນ ອິນພິທັກ  ເປັນຄະນະພັກຮາກຖານ ​ແລະ ເປັນປະທານກວດກາພັກ
  5. ສະຫາຍ ວຽງສະໄໝ ສີລິລັດ   ເປັນຄະນະພັກຮາກຖານ.

 

    ກອງປະຊຸມຍັງໄດ້ດຳເນີນການປ່ອນບັດເລືອກຕັ້ງເອົາຜູ້ແທນສົມບູນ ແລະ ສຳຮອງ ເພື່ອໄປເຂົ້າຮ່ວມ ກອງ ປະຊຸມໃຫຍ່ຂອງອົງຄະນະພັກແຂວງ ຄັ້ງທີ VII ເຊີ່ງປະກອບມີດັ່ງນີ້:

  1. ສະຫາຍ ຟ້າສະນັ່ນ ທຳມະວົງ        ເລຂາຄະນະພັກຮາກຖານ           ຜູ້​ແທນ​ສົມບູນ
  2. ສະຫາຍ ສຸລິດ ຈີນດາມະນີ          ຮອງເລຂາຄະນະພັກຮາກຖານ        ຜູ້​ແທນ​ສົມບູນ
  3. ສະຫາຍ ບຸນຄົງ ສຸກສະຫວັດ   ຮອງເລຂາຄະນະພັກຮາກຖານ        ຜູ້​ແທນ​ສົມບູນສຳຮອງ

 

      ກອງປະຊຸມຄັ້ງນີ້ໄດ້ຮັບຟັງການໂອ້ລົມຂອງ ສະຫາຍ ດຣ ຄໍາແພງ ໄຊສົມແພງ, ກໍາມະການສູນກາງພັກ, ເລຂາຄະນະບໍລິຫານງານພັກແຂວງຫຼວງພະບາງ, ສະຫາຍໄດ້ຊົມເຊີຍຕໍ່ຜົນງານ ​ແລະ ຜົນສໍາເລັດຫຼາຍ​ດ້ານ ທີ່ຄະ​ນະ​ພັກ​ຮາກ​ຖານ ​ພະ​ແນ​ກ ຍທຂ ​ແຂວງ​ຫຼວງ​ພະ​ບາງ ສາມາດຍາດມາໄດ້ ແລະ ສຶບຕໍ່ເປັນເຈົ້າການປົກ ປັກຮັກສາເສັ້ນທາງ, ຄຸ້ມຄອງເຄຫາ-ຜັງເມືອງ ແລະ ສິ່ງແວດລ້ອມ ພາຍໃນແຂວງຫຼວງພະບາງ, ໃຫ້ສົມກັບ ວ່າຫຼວງພະບາງເປັນເມືອງມໍລະດົກໂລກ ​ແລະ ເສ້າງທ່າແຮງໃນການດຶງດູດນັກທ່ອງທ່ຽວເຂົ້າມາທ່ຽວຊົມ ຫຼວງພະບາງໃຫ້ຫຼາຍຂຶ້ນ.

ລົດໂດຍສານວຽງຈັນ-ປາກເຊ ປີ້ນ ໂຊກດີບໍ່ມີຜູ້ເສຍຊີວິດ

    ລົດ​ໂດຍສານ ວຽງ​ຈັນ-​ປາກ​ເຊ ປີ້ນ​ທີ່​ ບ້ານຫີນສິ່ວ ເມືອງ​ຄົງ​ເຊ​ໂດນ ​ແຂວງ​ ສາລະ​ວັນ ມີ​ຜູ້​ບາດ​ເຈັບ 17 ຄົນ. ​ໂຊກ​ດີ​ບໍ່​ມີ​ຜູ້​ເສຍ​ຊີວິດ. ປະຊາຊົນ​ຜູ້​ເຫັນ​ເຫດການ ​ແລະ ​ເຈົ້າ​ໜ້າ​ທີ​ທີ່​ກ່ຽວຂ້ອງ​ຕ້ອງ​ນຳ​ຜູ້​ບາດ​ເຈັບ​ສົ່ງ​ໂຮງໝໍ​ເມືອງ​ຄົງ​ເຊ​ໂດນ​ເປັນ​ການ​ດ່ວນ. ສ່ວນ​ສາ​ເຫດ​ເຈົ້າ​ໜ້າ​ທີລະ​ບຸ​ວ່າ: ລົດ​ໂດຍສານ​ແລ່ນ​ດ້ວຍ​ຄວາມ​ໄວ ຫວັງ​ແຊງ​ລົດ​ດ້າມ​ທີ່​ຂັບ​ຂີ່​ມາ​ທາງ​ດຽວ​ກັນ​ແຕ່​ບໍ່​ວິດ ລົດຈື່ງ​ເສຍ​ຫຼັກ​ເຈືອກ​ອອກ​ນອກ​ທາງ​ກ່ອນ​ຈະ​ປີ້ນ​ຫງາຍ​ທ້ອງ​ປ່າງຫງ່າງ.

      ທ່ານ ຮ້ອຍ​ຕີ ​ໄກສອນ ຄໍ​ລະ​ຈັກ ຮອງ​ຫົວໜ້າ​ໜ່ວຍ​ງານ​ຈະລາຈອນ ປກສ ​ເມືອງ​ຄົງ​ເຊ​ໂດນ ​ແຂວງ​ ສາລະ​ວັນ ກ່າວ​ວ່າ: ​ເຫດ​ເກີດ​ຂື້ນ​ເມື່ອ​ເວລາ 6:18 ​ໂມງ ຂອງ​ວັນ​ທີ  6 ຕຸລາ 2014 ​ເມື່ອ​ລົດ​ໂດຍສານ​ວຽງ​ຈັນ-​ປາກ​ເຊ ​ເຊີ່ງ​ບັນຈຸ​ຜູ້​ໂດຍສານ 24 ຄົນ ​ແລ່ນ​ລົງ​ປາກ​ເຊ​ຕະຫລອດ​ຄືນ. ພໍ​ມາ​ເຖີ່​ງ​ເຂດ​ບ້ານ​ຫີນ​ສີ່ວ ​ເມືອງ​ຄົງ​ເຊ​ໂດນ ​ແຂວງ​ ສາລະ​ວັນ.​ໂຊ​ເຟີ​ໄດ້​ເພີ່ມ​ແຮງ​ຢຽບ​ຄັນ​ເລັ່ງ ຫວັງ​ແຊ່ງ​ລົດ​ດ້າມ ​ແຕ່​ບໍ່​ວິດ​ເຈື່ອກອອກ​ນອກ​ທາງ​ຈົນ​ລົດ​ໂດຍສານ​ປີ້ນ​ຫງາຍ​ທ້ອງ​ຕີນ​ຊີ້​ຂື້ນ​ຟ້າ ​ໂຊກ​ດີ​ທີ່​ບໍ່​ມີ​ຜູ້​ເສຍ​ຊີວິດ ​ແຕ່​ມີ​ຜູ້​ໄດ້​ຮັບ​ບາດ​ເຈັບ 17 ຄົນ, ປັດຈຸບັນ​ປອດ​ໄພ​ໝົດ​ທຸກ​ຄົນ​ແລ້ວ. ສ່ວນ​ຄວາມ​ເສຍ​ຫາຍ​ລວມທັງ​ຄ່າ​ປີ່​ນປົວ​ຜູ້​ບາດ​ເຈັບ, ບໍລິສັດ​ລົດ​ໂດຍສານ​ຈະ​ຮັບຜິດຊອບ​ທັງ​ໝົດ.

 

ກອງປະຊຸມໃຫຍ່ ສະມາຊິກພັກ ໜ່ວຍພັກພະແນກ ໂຍທາທິການ ແລະ ຂົນສົ່ງ ຄັ້ງທີ VII ແລະ ກອງປະຊຸມໃຫຍ່ ສະມາຊິກພັກ ໜ່ວຍພັກຄຸ້ມຄອງທາງບົກ ຄັ້ງທີ I ແຂວງຫຼວງພະບາງ


    ໃນຕອນເຊົ້າຂອງວັນທີ 26 ກັນຍາ 2014 ຢູ່ທີ່ຫ້ອງປະຊຸມໃຫຍ່ ຂອງພະແນກ ຍທຂ ປະຈໍາແຂວງຫຼວງພະ ບາງ, ໄດ້ເປີດກອງປະຊຸມໃຫຍ່ ຄັ້ງ​ທີ VII ຂອງໜ່ວຍພັກຮາກຖານ ພະແນກ ຍທຂ ແຂວງຫຼວງພະບາງ ຂື້ນຢ່າງເປັນທາງການ; ໂດຍການເປັນປະທານຂອງ ສະຫາຍ ສາຍສະໝອນ ທິດາກອນ, ກໍາມະການພັກແຂວງ, ຫົວໜ້າຄະນະຊີ້ນໍາບັ້ນດໍາເນີນຊີວິດການເມືອງ ກຸ່ມເສດຖະກິດໜ່ວຍ 2; ສະຫາຍ ຟ້າສະນັ່ນ ທໍາມະວົງ, ເລຂາຄະນະພັກຮາກຖານ ພະແນກ ຍທຂ ແຂວງຫຼວງພະບາງ; ສະຫາຍ ຄໍາຫວັນ ວັນວິໄລ, ກໍາມະການພັກແຂວງ, ຫົວໜ້າຄະນະຈັດຕັ້ງແຂວງ; ສະຫາຍ ເຊັ່ງ ທະນົງສັກ, ເລຂາໜ່ວຍພັກ ພະແນກ ຍທຂ ແຂວງຫຼວງພະບາງ; ສະຫາຍ ນ. ສົມພອນ ສຸທິວົງ, ປະທານສະຫະພັນແມ່ຍິງ ພະແນກ ຍທຂ ແຂວງຫຼວງພະບາງ, ມີບັນດາແຂກຖຶກເຊີນ ແລະ ສະມາຊິກພັກຂອງໜ່ວຍພັກ ພະແນກ ຍທຂ ແຂວງຫຼວງພະບາງ ເຂົ້າຮ່ວມຢ່າງພ້ອມພຽງ.

   ກອງປະຊຸມໃນຄັ້ງນີ້ໄດ້ຮັບຟັງບົດລາຍການການເມືອງ ສະຫຼຸບຕີລາຄາວຽກງານຮອບດ້ານໃນການຈັດຕັ້ງ ປະຕິບັດວຽກງານຜ່ານມາແຕ່ປີ 2010-2014 ແລະ ຜ່ານຮ່າງບົດສໍາຫຼວດກວດກາ, ການເຄື່ອນໄຫວນໍາ ພາລວມຂອງຄະນະໜ່ວຍພັກ ແລະ ໄດ້ຜ່ານມະຕິຕົກລົງຂອງຄະນະປະຈໍາພັກແຂວງ, ວ່າດ້ວຍການອານຸມັດ ແບ່ງໜ່ວຍພັກ ພະແນກ ຍທຂ ແຂວງຫຼວງພະບາງ, ຈາກໜ່ວຍພັກດຽວອອກເປັນ 2 ໜ່ວຍພັກຄື:

   ໜ່ວຍພັກພະແນກ ຍທຂ ປະກອບມີ: ຄະນະນໍາພະແນກ 2 ສະຫາຍ, ຂະແໜງຈັດຕັ້ງແລະ ບໍລິຫານ, ຂະແໜງກວດກາ, ຂະແໜງຄຸ້ມຄອງການຂົນສົ່ງ, ຂະແໜງຄຸ້ມຄອງທາງນໍ້າ, ກອງຄຸ້ມຄອງພາຫະນະ ແລະ ການຂັບຂີ່;

   ໜ່ວຍພັກຄຸ້ມຄອງທາງບົກປະກອບມີ: ຄະນະນໍາພະແນກ 2 ສະຫາຍ, ຂະແໜງຄຸ້ມຄອງທາງບົກ, ຂະແໜງແຜນການ-ງົບປະມານ ແລະ ສະຖິຕິ, ຂະແໜງຄຸ້ມຄອງເຄຫາ-ຜັງເມືອງ ແລະ ສິ່ງແວດລ້ອມ.

      ກອງປະຊຸມໄດ້ປອນບັດເລືອກຕັ້ງເອົາຄະນະໜ່ວຍພັກ ພະແນກ ໂຍທາທິການ ແລະ ຂົນສົ່ງ ​ແລະ ໜ່ວຍພັກ ຄຸ້ມຄອງທາງບົກ ຊຸດໃໝ່ ຊຶ່ງມີຜູ້ສະໝັກເລືອກຕັ້ງ 5 ສະຫາຍ, ເລືອກເອົາ 3 ສະຫາຍ ດັ່ງ​ນີ້:

  1. ສະຫາຍ ບຸນຄົງ ສຸກສະຫວັດ      ເປັນເລຂາໜ່ວຍພັກ ຮັບຜິດຊອບຊີ້ນຳລວມ.
  2. ສະຫາຍ ໄຊແກ້ວ ທະວີໃຈ       ເປັນຮອງເລຂາໜ່ວຍພັກ
  3. ສະຫາຍ ສິງ ອານຸສອນ          ເປັນຄະນະ ​ແລະ ປະທານກວດກາໜ່ວຍພັກ

 

   ນອກຈາກ​ນັ້ນ ກອງປະຊຸມໄດ້ປອນບັດເລືອກຕັ້ງເອົາຄະນະໜ່ວຍພັກ ຄຸ້ມຄອງທາງບົກ ຊຸດໃໝ່ ຊຶ່ງມີຜູ້ສະໝັກເລືອກຕັ້ງ 5 ສະຫາຍ, ເລືອກເອົາ 3 ສະຫາຍ ດັ່ງ​ນີ້:

  1. ສະຫາຍ ອັດສະວິນ ອິນພິທັກ        ເປັນເລຂາໜ່ວຍພັກ ຮັບຜິດຊອບຊີ້ນຳລວມ.
  2. ສະຫາຍ ບຼົ່ງວ່າງ ຫວ່າງເຈ່ຍຊ່າ       ເປັນຮອງເລຂາໜ່ວຍພັກ
  3. ສະຫາຍ ສີພັນ ພົມມະລີ            ເປັນຄະນະ ​ແລະ ປະທານກວດກາໜ່ວຍພັກ

 

ແຕ່ລະສະຫາຍລ້ວນ​ແຕ່​ແມ່ນ​ຜູ້​ທີ່​ມີ​ຄວາມ​ຮູ້ຄວາມ​ສາມາດ, ມີ​ບົດບາດໃນ​ການ​ຊີ້​ນຳ​-ນໍາພາ ທັງ​ເປັນ​ຜູ້​ທີ່​ຈົງ​ຮັກ​ພັກດີ, ​ແລ​ະ ຢຶດໝັ້ນຕໍ່ອຸດົມ​ການ​ ​ແລະ ​ແນວທາງ​ນະ​ໂຍບາຍຂອງ​ພັກ.

   ກອງປະຊຸມໄດ້ຮັບຟັງການໂອ້ລົມຂອງ ສະຫາຍ ສາຍສະໜອນ ທິດາກອນ, ກຳມະການພັກແຂວງ, ຫົວໜ້າຄະນະຊີ້ນໍາບັ້ນດໍາເນີນຊີວິດການເມືອງ ກຸ່ມເສດຖະກິດໜ່ວຍ 2, ຊຶ່ງສະຫາຍໄດ້ເນັ້ນໜັກໃຫ້ເອົາ ໃຈໃສ່ການ​ຊີ້​ນຳ-ນໍາພາ, ສືບຕໍ່ບຸກທະລຸວຽກງານທີ່ຕົນຮັບຜິດຊອບ​ໃຫ້​ປະກົດຜົນຈິງ ແລະ ຜົນສໍາເລັດໃນຂົງ ເຂດວຽກງານ ຍທຂ ທີ່ທາງ​ຄະນະ​ພັກ​ຂອງ​ຕົນ​ມອບ​ໝາຍ​ໃຫ້ ​ແລະ ເພື່ອພ້ອມກັນເຮັດສໍາເລັດໜ້າທີ່ວຽກງານ ທີ່ກໍານົດໄວແຕ່ນີ້ເຖິງປີ 2017.

 

 

ຈະປັບປຸງເສັ້ນທາງສັນຕິພາບ ເມືອງໄກສອນພົມວິຫານ ໃຫ້ເປັນ 4 ເລນ

ເສັ້ນ­ທາງ​ສັນ­ຕິ­ພາບ ຫຼື ເສັ້ນ­ທາງດອນ​ຫໍ​ທີ່​ຊາວ​ເມືອງ​ໄກ­ສອນ​ພົມ­ວິ­ຫານ ແຂວງ​ສະ­ຫວັນ​ນະ​ເຂດ ຮູ້­ຈັກ​ກັນ​ເປັນຢ່າງ​ດີ ປະ­ຈຸ​ບັນ​ໃຜກໍ​ເວົ້າ​ເປັນ​ສຽງ​ດຽວກັນ​ວ່າການເດີນທາງຜ່ານເສັ້ນທາງດັ່ງກ່າວມີຄວາມ​ລຳ­ບາກ​ແຮງ​ ເພາະເສັ້ນທາງເປັນ​ຂຸມ ​ເກືອບ​ສຸດເສັ້ນ, ປະຈຸບັນ​ເສັ້ນ­ທາງ​ດັ່ງ­ກ່າວກຳລັງ​ມີ​ການ​ປັບ­ປຸງ​ກໍ່­ສ້າງ​ໃໝ່​ ໂດຍຂະ­ຫຍາຍ​ອອກ​ໃຫ້​ເປັນ 4 ເລນ.

   ວັນ​ທີ 21 ສິງ­ຫາ 2014 ຜ່ານມານີ້, ທ່ານ ດຣ. ສຸ­ພັນ ແກ້ວ​ມີ​ໄຊ ເຈົ້າ­ແຂວງໆ​ສະຫວັນ​ນະ​ເຂດ, ບັນດາ​ພະແນກ ການ​ຕ່າງໆອ້ອມ​ຂ້າງ​ແຂວງ ແລະ ບັນ­ດາ​ບໍ­ລິ­ສັດ​ກໍ່­ສ້າງເສັ້ນ­ທາງ​ໄດ້​ລົງ​ເຄື່ອນ​ໄຫວ​ຕິດ­ຕາມ​ການ​ກໍ່­ສ້າງ​ຖະ­ໜົນ​ພາຍ​ໃນ​ຕົວ​ເມືອງ​ໄກ­ສອນ​ພົມ­ວິ­ຫານ​ໃນ​ຫຼາຍ​ຈຸດ ເພື່ອ​ກະ­ຕຸກ​ຊຸກ­ຍູ້​ໃຫ້​ພາກ­ສ່ວນ​ທີ່​ກ່ຽວ­ຂ້ອງ​ກໍ່​ຄື​ຜູ້​ທີ່​ໄດ້​ຮັບ​ໂຄງ­ການ​ກໍ່­ສ້າງ​ເສັ້ນ ທາງ​ໄດ້​ເອົາ­ໃຈ­ໃສ່​ຂຸ້ນ­ຂ້ຽວ​ສ້າງ​ໃຫ້​ສຳ­ເລັດ​ໂດຍ​ໄວ.

   ທ່ານ ດຣ. ແສງ​ທອງ ວັງ​ແກ້ວ​ມະ­ນີ ຫົວ­ໜ້າ​ພະ​ແນກ​ໂຍ­ທາ​ທິ​ການ ແລະ ຂົນສົ່ງ​ແຂວງ​ໃຫ້​ຮູ້​ວ່າ: ປະ­ຈຸ​ບັນ​ເສັ້ນ ທາງຕາມ​ຕົວ​ເມືອງ​ໄກ­ສອນ​ພົມ­ວິ­ຫານ ພວມໄດ້​ຮັບ​ການ​ປັບ­ປຸງ​ໃໝ່​ໃນ​ຫຼາຍ​ເສັ້ນ ທັງນີ້​ກໍ​ເພື່ອ​ກຽມ​ໃຫ້​ແກ່​ການ​ເປັນ​ນະ ຄອນຫຼວງ​ໃນ​ຊຸມ​ປີ​ຕໍ່ໜ້າ, ຊຶ່ງ​ເສັ້ນ­ທາງ​ທີ່​ໄດ້ ລົງ­ມື​ກໍ່­ສ້າງ​ພ້ອມ​ກັນ​ທັງ​ໝົດ​ມີ 10 ເສັ້ນໄດ້­ແກ່: ຖະ­ໜົນ​ຈອມ​ແກ້ວ ຄວາມ​ຍາວ 3,6 ກິ­ໂລ­ແມັດ, ມະ­ຄະ​ສະ­ຫວັນ ຍາວ 1.864 ແມັດ, ອຸ­ດົມສິນ ຍາວ 1.600 ແມັດ, ໄຊ­ຊະ­ນະ​ຍາວ 425 ແມັດ, A3 ຍາວ 1.165 ແມັດ, ເຈົ້າ​ກິ່ມ​ຍາວ 1.370 ແມັດ, ລາດ​ສະ​ດາ ໃນ ຍາວ 758 ແມັດ, ຊຽງ​ສາ ຍາວ 452 ແມັດ, ໃຈ​ເມືອງ ຍາວ 1.850 ແມັດ, ພະ­ຍາ​ປຸ້ຍ ຍາວ 455 ແມັດ ແລະ ຖະໜົນ​ສັນ­ຕິ­ພາບ ຍາວ 2.650 ແມັດ ຖະໜົນ​ທັງ​ໝົດ​ໄດ້​ລົງ­ມື​ກໍ່­ສ້າງ​ໄປ​ແລ້ວ​ຫຼາຍ​ກວ່າ 67,8%.

   ສຳ­ລັບ​ເສັ້ນ­ທາງ​ສັນ­ຕິ­ພາບ ຫຼື ເສັ້ນທາງ​ດອນ​ຫໍ​ແມ່ນ​ໄດ້​ສຳ­ເລັດ​ໃນ​ການ​ສຳຫຼວດ​ອອກ​ແບບ, ເປັນ​ເສັ້ນ­ທາງ​ເບ​ຕົງ​ເສີມ ເຫຼັກ​ມີ​ຄວາມ​ກວ້າງ​ຂອງ​ເສັ້ນ­ທາງ​ທັງໝົດ 24 ແມັດ, ຂະ­ຫຍາຍ​ອອກ​ເປັນ 4 ເລນ, ມີ​ດອນ​ທາງ​ກາງ ແລະ ລະບົບ​ຄອງ ນ້ຳ​ຄົບ​ຊຸດ, ບັນດາບໍ­ລິ­ສັດ​ທີ່​ໄດ້​ຮັບ​ໂຄງ­ການ​ດັ່ງກ່າວ​ມີ: ບໍ­ລິ­ສັດ​ຄູນ​ຄຳ​ກໍ່­ສ້າງ, ບໍ­ລິສັດ​ຊາ ສີ​ກຼຸບ ແລະ ບໍ­ລິ­ສັດ​ລາວ​ມີ​ໄຊ ກໍ່­ສ້າງ

 ໃນ​ວັນ​ດຽວ​ກັນ​ຄະ­ນະ​ການ​ນຳ​ຂອງ​ແຂວງ​ກໍ​ໄດ້​ຂີ່​ລົດ​ເລາະ​ຕາມ​ເສັ້ນ­ທາງ​ທີ່​ໄດ້​ຮັບ​ຜົນ​ກະ­ທົບ​ຈາກ​ນ້ຳ​ຖ້ວມ, ໂດຍສະ ເພາະ ແມ່ນເສັ້ນ­ທາງ​ທີ່​ມີ​ການ​ອັດ​ຕັນ​ຂອງ​ຂີ້​ເຫຍື້ອ​ເຮັດໃຫ້​ນ້ຳ​ຖ້ວມ​ລົ້ນ​ໄຫຼ​ເຂົ້າ​ເຮືອນ​ຂອງ​ປະຊາ​ຊົນ, ​ທ່ານ​ເຈົ້າ­ແຂວງ​ໄດ້​ເໜັ້ນ​ໜັກ ແລະ ແນະນຳ​ໃຫ້​ພາກສ່ວນ​ທີ່​ກ່ຽວ­ຂ້ອງ​ແກ້​ໄຂ​ບັນ­ຫາ​ຮ່ອງ­ນ້ຳທີ່​ອັດ​ຕັນ​ດ້ວຍ​ຂີ້­ເຫຍື່ອ​ໂດຍ​ຮີບ​ດ່ວນ ແລະ ບັນ­ຫາ​ອື່ນໆ​ທີ່​ເປັນ​ສາ­ເຫດ​ເຮັດ​ໃຫ້​ນ້ຳ​ຖ້ວມ​ຂັງ.

                                                                                    ຂໍ້ມູນຈາກໜັງສືພິມເສດຖະກິດ-ສັງຄົມ, ສະບັບລົງວັນທີ 25 ສິງຫາ 2014

Additional information