ຂ່າວຕ່າງແຂວງ

ຄືບໜ້າແລ້ວກວ່າ 10% ໂຄງການກໍ່ສ້າງຂົວຂ້າມນ້ຳເຊໂດນ 3 ເມືອງປາກເຊ

ພາຍ­ຫຼັງ​ທີ່​ໄດ້​ລົງ­ມື​ຈັດ​ ຕັ້ງ​ປະ­ຕິ­ບັດ​ເປັນ​ເວ­ລາ​ເກືອບ​ເຄິ່ງ​ປີໂຄງ­ການ​ກໍ່­ສ້າງ​ຂົວ​ຂ້າມ​ນ້ຳ​ເຊ​ໂດນ 3 ທີ່​ເມືອງ​ປາກ​ເຊ ແຂວງ ຈຳ­ປາ​ສັກ ກໍ​ມີ​ຄວາມ​ຄືບ​ໜ້າ​ແລ້ວ​ກວ່າ 10% ປະ­ຈຸ​ບັນ​ແມ່ນ​ກຳລັງ​ເລັ່ງ​ມື​ໃສ່​ການ​ຖອກ​ເບ​ຕົງ​ເສົາ​ໃຫຍ່, ນ້ອຍ ແລະ ຕັດ​ເສົາ​ຂົວເກົ່າ​ຖິ້ມ.

     ໂຄງ­ການ​ກໍ່­ສ້າງ​ຂົວ​ຂ້າມ​ນ້ຳ​ເຊ​ໂດນ 3 ທີ່​ເມືອງ​ປາກ​ເຊ ແຂວງຈຳ­ປາ​ສັກ, ແມ່ນ​ອີກ​ໂຄງ­ການ​ທີ່​ສຳ­ຄັນ​ຂອງ​ລັດ­ຖະ ບານ, ໂດຍສະ­ເພາະ​ແຂວງ​ຈຳ­ປາ​ສັກ​ທີ່​ໄດ້​ຕັດ­ສິນ​ໃຈ​ລົງ­ທຶນ​ເຂົ້າ​ໃສ່​ໃນ​ການ​ກໍ່ສ້າງແນ­ໃສ່​ຮັບ­ປະ­ກັນ​ຫຼາຍ​ເງື່ອນ­ໄຂ​ໃນ​ພາຍ​ພາກ​ໜ້າ​ເປັນ­ຕົ້ນ​ແມ່ນ​ ເພື່ອ​ອຳ­ນວຍ​ຄວາມ​ສະ­ດວກ​ໃຫ້​ແກ່​ການ​ສັນ­ຈອນ​ໄປ​ມາຂອງ​ປະ­ຊາ­ຊົນ, ຊຶ່ງ​ໂຄງ­ການ​ດັ່ງ­ກ່າວ​ແມ່ນ​ບໍ­ລິ­ສັດ​ລາວ​ເວີນ ເປັນຜູ້​ຮັບ​ເໝົາ​ກໍ່­ສ້າງ ແລະລົງ­ທຶນ​ກ່ອນ 100% ໃນ​ມູນ​ຄ່າ​ທັງ​ໝົດປະ­ມານ 14 ກວ່າ​ລ້ານ​ໂດ​ລາ​ສະ­ຫະ­ລັດ ໃນ​ກຳ­ນົດ​ເວ­ລາ​ການ​ກໍ່ສ້າງ​ຕາມ​ສັນ­ຍາ 30 ເດືອນ​ໃຫ້​ສຳ­ເລັດ ແລະ ໂຄງ­ການ​ດັ່ງ­ກ່າວໄດ້ເລີ່ມ​ລົງ­ມື​ຈັດ​ຕັ້ງ​ປະ­ຕິ­ບັດ​ມາ​ແຕ່​ກາງ​ເດືອນ​ ກຸມ­ພາ 2014 ເປັນ­ຕົ້ນມາ ຊຶ່ງ​ເປັນ​ຂົວ​ເບ​ຕົງ 4 ເລນ, ກວ້າງ 17 ແມັດ, ປະ­ກອບ​ດ້ວຍ​ທາງຍ່າງ​ທັງ​ສອງ​ເບື້ອງ ແລະມີ​ໄຟ­ຟ້າ​ເຍືອງ​ທາງ​ຄົບ​ຊຸດ.

     ຕາມ​ການ​ລາຍງານ​ຂອງ ທ່ານ ບຸນທະ­ວີ ວິ​ສຸດ­ທິ​ວົງ ຫົວ­ໜ້າ​ໂຄງ­ການ​ກໍ່ສ້າງ​ຂົວ​ດັ່ງ­ກ່າວ​ໃຫ້​ຮູ້­ເມື່ອ​ບໍ່​ດົນ​ມາ​ນີ້ວ່າ: ເຖິງ​ການ​ກໍ່­ສ້າງ​ໄລ­ຍະ​ນີ້​ຈະ​ເປັນລະດູຝົນ​ເຮັດ​ໃຫ້​ມີ​ອຸ­ປະ­ສັກ​ຫລາຍ​ຢ່າງ ໂດຍ​ສະ­ເພາະ​ແມ່ນ​ບັນ­ຫາ​ກະ­ແສ­ນ້ຳ​ທີ່ໄຫລ​ແຮງເຮັດ​ໃຫ້​ມີ​ຄວາມ​ຫຍຸ້ງ­ຍາກ​ ໃນການ​ກໍ່­ສ້າງ, ແຕ່​ຍ້ອນ​ນັກ­ວິ­ຊາ­ການ ແລະ ພະ­ນັກ­ງານ​ຂອງ​ບໍ­ລິ­ສັດ​ມີ​ຄວາມ​ຊຳນານ​ງານ ແລະ ມີ​ປະ­ສົບ​ການ​ສູງ​ສາມາດ​ເຮັດ​ໜ້າ­ທີ່​ຂອງ​ຕົນ​ໄດ້​ຢ່າງ​ສະ​ໝ່ຳສະ­ເໝີ, ຊຶ່ງ​ມາ​ຮອດ​ປະ­ຈຸ​ບັນ​ການ​ກໍ່­ສ້າງແມ່ນ​ສາ­ມາດ​ປະ­ຕິ­ບັດ​ໄດ້​ແລ້ວ 14%, ໃນ​ນັ້ນແມ່ນ​ໄດ້​ຖອກ​ເສົາ​ໃຫຍ່​ກາງ​ນ້ຳສອງ​ເສົາ​ ​ສຳ­ເລັດ ເກືອບ 100% ຍັງ​ເຫຼືອພຽງ​ຫົວ​ເສົາ​ເບື້ອງ​ເທີງ​ເທົ່າ​ນັ້ນ ແລະ ປະ­ຈຸ​ບັນ​ແມ່ນ​ກຳ­ລັງ​ສືບ­ຕໍ່​ໃສ່​ໜ້າ​ວຽກດັ່ງ­ກ່າວ ພ້ອມ​ທັງ​ເລັ່ງ​ມື​ໃສ່​ການ​ຖອກເສົາ​ນ້ອຍ​ທັງ​ສອງ​ຝັ່ງ​ ແລະ ກຳ­ລັງລົງ­ມື​ໃສ່​ໃນ​ການ​ຕັດ​ເສົາ​ຂົວ​ເກົ່າ​ອອກ ຊຶ່ງ​ຄາດ​ວ່າ​ໝົດ​ລະ­ດູ­ຝົນ​ນີ້​ໃຫ້​ສຳ­ເລັດ ແລະຄາດ​ວ່າ​ໂຄງການ​ດັ່ງ­ກ່າວ​ຈະ​ສຳເລັດ​ຕາມ​ແຜນ­ການ​ຢ່າງ​ແນ່­ນອນ.    

      ຢ່າງ­ໃດ​ກໍ​ຕາມ ສືບ​ເນື່ອງ​ມາ​ຈາກສະ­ພາບ​ການ​ສັນ­ຈອນ​ໃນ​ປະ­ຈຸ​ບັນ​ແມ່ນຜ່ານ​ຂົວ​ເຊ​ໂດນ 2 ຜູ້​ທີ່​ມີ​ຈຸດ­ປະ­ສົງ​ຈາກ ປາກ​ເຊຫາທ່າ​ຫີນ, ລົດ​ໃຫຍ່​ແມ່ນ​ສາມາດ​ສັນ­ຈອນ​ຕາມ​ເສັ້ນ­ທາງ ແລະ ລົດນ້ອຍ ຫຼື ລົດ​ເບົາ ແມ່ນ​ສາ­ມາດ​ໄປ​ທາງຕັດ​ຈາກ​ປ້ອມ​ຕຳ­ຫຼວດ​ຈະ­ລາ­ຈອນ, ແຕ່​ປະ­ຈຸ​ບັນ​ຍ້ອນ​ສະ­ພາບ​ທາງ​ເປ່​ເພໜັກ​ການ​ສັນ­ຈອນ​ຍັງມີຄວາມຫຍຸ້ງຍາກ, ໂດຍ​ສະ ­ເພາະ​ແມ່ນ​ລະດູ​ຝົນ­ຕົກ, ດັ່ງ­ນັ້ນ​ປະ­ຊາ­ຊົນ​ຈຶ່ງ​ຮຽກ­ຮ້ອງ​ເຖິງ​ບໍ​ລິສັດ​ທີ່​ຮັບ​ເໝົາ​ກໍ່­ສ້າງ​ຄື ​ບໍ­ລິ­ສັດ​ລາວ​ເວີນ ເພື່ອ​ຊ່ວຍ​ສ້ອມ ແປງ​ໃຫ້­ການ​ສັນ­ຈອນສະ­ດວກ​ຂຶ້ນ ທັງ​ນີ້​ກໍ​ເພື່ອ​ຫຼຸດ­ຜ່ອນ​ອຸ­ບັດເຫດ​ຕາມ​ຖະ­ໜົນ.

                                                                                 ຂໍ້ມູນຈາກໜັງສືພິມເສດຖະກິດ-ສັງຄົມ, ສະບັບລົງວັນທີ 23 ກໍລະກົດ 2014

ເລີ່ມນຳໃຊ້ເສັ້ນທາງແຕ່ເທດສະບານ ຊຳເໜືອຫາໜອງຄ້າງ

    ໂຄງການກໍ່ສ້າງເສັ້ນທາງແຕ່ເທດສະບານເມືອງ ຫາ ບ້ານໜອງຄ້າງ ເມືອງຊຳເໜືອ ແຂວງຫົວພັນ ທີ່ມີ ມູນຄ່າການກໍ່ສ້າງ 2 ຮ້ອຍກວ່າຕື້ກີບ, ພາຍຫຼັງທີ່ເລີ່ມລົງມືກໍ່ສ້າງມາແຕ່ທ້າຍປີ 2011 ເປັນ ຕົ້ນມາຮອດປະ ຈຸບັນກໍໄດ້ເປີດການນຳໃຊ້ຢ່າງເປັນທາງການແລ້ວ.

   ​ໃນທ້າຍອາທິດຜ່ານມາ ພະແນກ ໂຍທາທິການ ແລະ ຂົ່ນສົ່ງ ແຂວງຫົວພັນ ໃນນາມເຈົ້າຂອງໂຄງ ການໄດ້ສົມທົບກັບ ບໍລິສັດຮັບເໝົາກໍ່ສ້າງ ຈັດພິທີມອບ-ຮັບ ແລະ ເປີດການນຳໃຊ້ເສັ້ນທາງດັ່ງກ່າວ ຊຶ່ງຕາງ ຫນ້າກ່າວມອບແມ່ນ ທ່ານ ຈັນທອງ ຊະນະວັນ ປະທານບໍລິສັດ ບໍ່ທອງອິນເຕີ ຈຳກັດຜູ້ດຽວ ແລະ ຕາງໜ້າ ກ່າວຮັບຂອງ ທ່ານ ນາງ ແພງກັນ ຍາພິມ ເຈົ້າເມືອງໆຊຳເໜືອ ໂດຍເຂົ້າຮ່ວມມີທ່ານ ພອນສຸກ ອິນທະວົງ ຫົວໜ້າພະແນກໂຍທາທິການ ແລະ ຂົນສົ່ງ ແຂວງຫົວພັນ, ບັນດາທ່ານໃນຄະນະກຳມະການກວດກາ ໂຄງການຂັ້ນແຂວງ ແລະ ເມືອງຊຳເໜືອ ພ້ອມດ້ວຍພະນັກງານທີ່ກ່ຽວຂ້ອງທັງສອງຝ່າຍເຂົ້າຮ່ວມ.

   ເຈົ້າໜ້າທີ່ຮັບຜິດຊອບໂຄງການ ລາຍງານໃຫ້ຮູ້ວ່າ: ໂຄງການດັ່ງກ່າວ ໄດ້ເລີ່ມຈັດຕັ້ງປະຕິບັດມາແຕ່ກາງ ເດືອນ ທັນວາ 2011 ເປັນຕົ້ນມາ ໂດຍລວມໄລຍະການກໍ່ສ້າງ 36 ເດືອນ, ມີຄວາມຍາວ 31 ກວ່າກິໂລແມັດ, ໜ້າທາງ ກວ້າງ 8,8 ແມັດ ເປັນທາງຊັ້ນ III ພູດອຍປູແຮ່ຢຽບແໜ້ນ ຂະນະທີ່ມີປະຊາຊົນອາໄສຢູ່ລຽບ ຕາມແຄມທາງ 7 ບ້ານ, 483 ຄອບຄົວ ພົນລະເມືອງ 3.319 ຄົນ ຊຶ່ງແມ່ນ ບໍລິສັດບໍ່ທອງອິນເຕີ ຈຳກັດຜູ້ດຽວ ແລະ ບໍລິສັດທີ່ປຶກສາ BM ວິສະວະກຳກໍ່ສ້າງເປັນຜູ້ຮັບເໝົາກໍ່ສ້າງທີ່ນຳໃຊ້ທຶນຂອງລັດຖະບານລວມມູນ ຄ່າທັງໝົດ 257,16 ຕື້ກວ່າກີບ.

   ຜ່ານການກວດກາຂອງຄະນະກຳມະການຄຸ້ມຄອງໂຄງການເຫັນວ່າໂຄງການດັ່ງກ່າວໄດ້ຈັດຕັ້ງປະຕິບັດຖືກ ຕ້ອງຕາມເຕັກນິກ, ການອອກແບບສຳເລັດໄປແລ້ວ 94,5% ຂອງໜ້າວຽກທັງໝົດ, ຍັງອີກໜ້າວຽກຈຳນວນ ໜຶ່ງທີ່ຍັງຄົງຄ້າງທາງໂຄງການຈະໄດ້ສືບຕໍ່ຈັດຕັ້ງປະຕິບັດໃຫ້ສຳເລັດຕາມແຜນການ ດັ່ງນັ້ນ ຈິ່ງໄດ້ມີພິທີ ມອບ-ຮັບເປີດການນຳໃຊ້ດັ່ງກ່າວ.

 

 

ໂຄງການກໍ່ສ້າງພື້ນຖານໂຄງລ່າງທາງຊົນນະບົດ

    ໂຄງການ​ກໍ່ສ້າງ​ພື້ນຖານ​ໂຄງ​ລ່າງທາງ​ຊົນນະບົດ ​ໄລຍະ 4; 5 ​ທີກຳລັງ​ຈັດ​ຕັ້ງ​ປະຕິບັດ ແລ​ະ​ ແຜນການ ​ໄລຍະ 6 ທີ​ກຳລັງ​ກະກຽມ​ແມ່ນມີ​ລາຍ​ລະອຽດ​ດັ່ງ​ນີ້:

ໄລຍະ 4:

-    ການ​ກໍ່ສ້າງ​ເສັ້ນທາງ​ຊົນນະບົດ, ທ່າ​ເຮືອ​ນ້ອຍ, ຕະຫຼາດ​ນ້ອຍ​ຊຸມ​ຊົນ ​ແລະ ບ່ອນ​ລໍຖ້າ​ລົດ​ໂດຍສານ ຢູ່ ​ແຂວງ​​ໄຊ​ຍະ​ບູລີ ​ແລະ ​ແຂວງ ອັດ​ຕະປື ​ແມ່ນ​ສຳ​ເລັດ 100%;

-    ປະຈຸ​ບັນ​ກຳລັງ​ສ້ອມ​ແປງ​ທາງ ​ແລະ ຂົວ ຄືນທີ່​ໄດ້​ຮັບ​ຜົນ​ກະທົບ​ຈາກ​ທຳ​ມະ​ຊາດ ​ແລະ ຄາດ​ຄະ​ເນ​ວ່າ​ປະມານ​ທ້າຍ​ເດືອນ 7 ປີ 2014 ຈະ​ສຳ​ເລັດ.

ໄລຍະ 5:

-    ການ​ກໍ່ສ້າງ​ທາງ​ຊົນນະບົດ ​ແລະ ປັບປຸງຕະຫຼາດ ຢູ່​ແຂວງ​ເຊ​ກອງ ມີ​ຄວາມ​ຄືບ​ໜ້າ​ປະມານ 45% ​ແລະ ຄາດ​ຄະ​ເນຈະ​ສຳ​ເລັດ ​ໃນ​ເດືອນ 5 ປີ 2015;

-    ການ​ກໍ່ສ້າງ​ສູນ​ຝຶກ​ໂຍທາ​ທິການ ​ແລະ ຂົນ​ສົ່ງ ຢູ່​ຫຼັກ 19 ທ່າ​ເດື່ອ ມີ​ຄວາມ​ຄືບ​ໜ້າ 60% ​ແລະ ຄາດ​ວ່າ​ຈະ​ສຳ​ເລັດ ​ໃນ​ເດືອນ 9 ປີ 2014.

ໄລຍະ 6:

   ກອງ​ປະຊຸມ​ການ​ກະກຽມໂຄງການ ກໍ່ສ້າງ​ພື້ນຖານ​ໂຄງ​ລາງ​ທາງ​ຊົນນະບົດ​ ໄລຍະ 6 ​ໄດ້​ຈັດ​ຂື້ນ ​ໃນ​ວັນ​ທີ 4/06/2014 ທີ່​ຫ້ອງ​ປະຊຸມ ພະ​ແນ​ກ​ແຜ​ນການ ​ແລະ ການ​ຮ່ວມ​ມື ​ແຂວງ​ສາລະ​ວັນ ​ໂດຍ​ການ​ເປັນ​ປະທານ ຂອງ​ທ່ານ ສີ​ເຮັງ ຫອມ​ສົມບັດ ກຳມະການ​ປະຈຳພັກ​ແຂວງ, ຮອງ​ເຈົ້າ​ແຂວງ ຜູ້​ຊີ້​ນຳ​ວຽກ​ງານ​ເສ​ດຖະກິດ ແຂວງ​ສາລະ​ວັນ; ມີທ່ານ​ຮອງ​ຫົວໜ້າ ກົມ​ຂົວ​ທາງ ກະຊວງ ຍທຂ; ຕາງໜ້າ​ກະຊວງ ​ແຜນການ ​ແລະ ການ​ລົງທຶນ; ຕາງ​ໜ້າກອງ​ທຶນ​ຫຼຸດຜ່ອນ​ຄວາມທຸກ​ຍາກ; ທ່ານ​ເຈົ້າ​ເມື​ອງ ຕະ​ໂອ້ຍ ​ແລະ ​ເມືອງ​ສະ​ໜ້ວຍ; ທ່ານ​ການ​ນຳ​ພະ​ແນ​ກການ​ອ້ອມ​ຂ້າງ ຂອງ​ແຂວງ​ສາລະ​ວັນ ​ແລະ ການ​ນຳ​ພະ​ແນ​ກ ຍທຂ ​ແຂວງ​ເຊ​ກອງ; ທີ​ມງານ​ຜູ້​ຊ່ຽວຊານ​ລາວ; ຊ່ຽວຊານຕ່າງປະ​ເທດ​ຈາກ​ທີ​ມງານ​ທີ​ປຶກສາ GITEC Consult.

   ກອງ​ປະຊຸມ​ໄດ້​ນຳ​ສະ​ເໜີ ປະຫວັດ​ຄວາມ​ເປັນ​ມາ​ຂອງ​ໂຄງການ ​ແລະ ນະ​ໂຍບາຍຕ່າງໆ​ກ່ຽວ​ກັບ​ການ​ຊ່ວຍ​ເຫຼື​ອການ​ພັດທະ​ພື້ນຖານ​ໂຄງ​ລາງທາງ​ຊົນນະບົດ ພາຍ​ໃຕ້​ການ​ຮ່ວມ​ມື​ລະຫວ່າງ​ລັດຖະບານ​ລາວ ​ແລະ ລັດ ຖະບານ​ເຢຍລະ​ມັນ, ທາງ​ຊ່ຽວຊານ​ທີ​ປຶກສາ ​ແລະ ອົງການ​ຜູ້​ໃຫ້​ທຶນ KFW ​ໄດ້​ສະ​ເໜີ​ບັນດາ​ໜ້າ​ວຽກຕ່າງໆ ທີ​ໄດ້​ຈັດ​ຕັ້ງ​ປະ​ຕິ​ບັດ​ ໂຄງການກໍ່ສ້າງ​ພື້ນຖານ​ໂຄງ​ລາງ​ທາງ​ຊົນນະບົດ​ໄລຍະ 6 ຖືກ​ຈັດ​ຕັ້ງປະ​ຕິ​ບັດ​ຢູ່​ 2 ​​ແຂວງ ຄື: ​ແຂວງ ສາລະ​ວັນ ​ແລະ ​ແຂວງ​ ເຊກອງ ມີ​ດັ່ງ​ລຸ່ມ​ນີ້:

    ປະຈຸ​ບັນ​ແມ່ນ​ກຳລັງ​ກະກຽມ​ແຜນ​ໄລຍະ 6  ​ໂດຍ​ການ​ກຳ​ເນີນ​ການສື​ກສາ​ບັນດາ​ ເສັ້ນທາງຊົນນະບົດ​ຕ່າງໆ​ເພື່ອ​ຈັດ​ເຂົ້າ​ແຜນບູລິ​ມະ​ສິດ​ຂອງ ກະຊວງ ຍທຂ ​ໃນ​ແຕ່​ລະ​ສົກ​ປີ ດັ່ງ​ນີ້:

-    ສົກ​ປີ 2014-2015 : ສຳ​ຫຼວດ-ອອກ​ແບບ​ລະອຽດ ​ແລະ ດຳ​ເນີນ​ການ​ປະມູນ ​ໂດ​ຍ​ໄດ້​ມອບ​ໃຫ້ອຳນາດ​ການ​ປົກຄອງ​ແຂວງ ​ເປັນ​ຜູ້​ຈັດ​ຕັ້ງ​ປະຕິບັດ;

-    ​ເລີ້ມ​ຈາກ​ສົກ​ປີ 2015-2016 ​ເ​ປັນ​ຕົ້ນ​ໄປ: ຈັດ​ຕັ້ງ​ປະຕິບັດ​ໂຄງການ.

ຄາດຄະເນໜ້າວຽກຂອງໄລຍະ 6:

  1. ກໍ່​ສ້າງ​ທາງ​ຊົນນະບົດ ຢູ່ 2 ​ເມືອງຄື: ​ເມືອງ​ສະ​ໝ້ວຍ ​ແລະ ​ເມືອງ​ຕະ​ໂອ້ຍ, ປັບປຸງ​ສະຖານີ​ລົດ​ເມ, ປັບປຸງ​ຕະຫຼາດ ຢູ່​ແຂວງ​ສາລະ​ວັນ;
  2. ຟື້ນ​ຟູ ​ແລະ ສ້ອມ​ແປງ​ທາງ​ຊົນນະບົດ​ຢູ່ບັນດາ​ແຂວງ ພາກ​ເໜືອ ມີ ​ແຂວງ ອຸດົມ​ໄຊ, ​ແຂວງ ບໍ​ແກ້ວ ​ແລະ ​ແຂວງ ​ໄຊ​ຍະ​ບູລີ ທີ່​ໄດ້​ຮັບ​ທຶນ​ຜ່ານ​ມາ​ຈາກ ອົງການ KFW;
  3. ຟື້ນ​ຟູ ​ແລະ ປັບປຸງ​ເສັ້ນທາງບາງ​ຊ່ວງທີ່ໄດ້​ຮັບ​ຜົນ​ກະທົບ​ຈາກ​ໄພ​ທຳ​ມະ​ຊາດ;
  4. ສ້າງ​ຂິດ​ຄວາມ​ສາມາດ​ໃຫ້​ພະນັກງານ ຍທຂ ​ເມືອງ, ຍທຂ ​ແຂວງ.

 

    ກອງ​ປະ​ໄດ້​ປຶກສາ​ຫາລື ​ໃນ​ການ​ຄັດ​ເລືອກ ​ແລະ ຈັດ​ບູລິ​ມະ​ສິດ ​ໃນ​ການ​ກໍ່ສ້າງ​ທາງ​ຊົນນະບົດ​ຢູ່ 2 ​ເມືອງ ຄື: ​ເມືອງ​ສະ​ໝ້ວຍ ​ແລະ ​ເມືອ​ງຕະ​ໂອ້​ຍ ​ແຂວງ​ສາລະ​ວັນ ​ເພືອນຳ​ສະ​ເໜີ​ຕໍ່​ອົງການ​ຜູ້​ໃຫ້​ທຶນ KFW ດັ່ງ​ນີ້:

ເມືອງ ສະໝ້ວຍ:

  ສໍາລັບ​ເມືອງ​ສະ​ໝ້ວຍມີ​ເສັ້ນ​ທາງທີ່​ສະ​ເໜີ​ທັງ​ໝົດ 14 ​ເສັ້ນ ​ເຂົ້າໃນ​ການ​ສຶກສາ​ໂຄງການ ລວມລວງ​ຍາ​ວທັງ​ໝົດ 146,5 ກມ; ບໍ່​ຖືກຄັດ​ເລືອກ 8 ​ເສັ້ນ ລວງ​ຍາວ 72,2 ກມ; ບໍ່​ໄດ້​ສ້າງຕະຫຼາດ ​ແລະ​ ສະຖາ​ນີລົດ​ເມ; ສ່ວນ​ເສັ້ນທາງທີ​ຖືກ​ຄັດ​ເລືອກ​ແມ່ນ​ມີ​ດັ່ງ​ລຸ່ມ​ນີ້:

-    ​ແຍກ​ທາງ 15B ຫາ ຊາຍ​ແດນ​ຫວຽດນາມ                         ຍາວ 42,8 ກມ;

-    ສາມ​ແຍກ ​​3,6910 ຫາ ​ບ້ານ​ອາຊາ​ວ ​ແລະ ບ້ານ​ຕາດິນ         ຍາວ 3,4 ກມ;

-    ສາມ​ແຍກ ​​3,6910 ຫາ ບ້ານ​ອາມ​ອນ​ໃຕ້                          ຍາວ 5,1 ກມ;

-    ສາມ​ແຍກ ​​3,6910 ຫາ ບ້ານ​ອາ​ໂຫ ​ແລະ ບ້ານ​ຕະລຽບ         ຍາວ 2,2 ກມ;

-    ທາງ​ແຍກ​ແຂວງ 2,6905 ບ້ານອາ​ໂຕະ ຫາ ບ້ານກະ​ແລ່ງ       ຍາວ 8,3 ກມ;

-    ບ້ານກະ​ແລ່ງ ຫາ ບ້ານ​ອາ​ໂຫ                                       ຍາວ 8,9 ກມ;

ລວມ​ເສັ້ນທາງ​ທີ່​ຖືກ​ຄັດ​ເລືອກ​ຢູ່​ເມືອ​ງສະ​ໝ້ວຍ                         ຍາວ 70,7 ກມ​.

ເມືອງ ຕະໂອ້ຍ:

    ສໍາລັບ​ເມືອງ​ຕະ​ໂອ້​ຍມີ​ເສັ້ນ​ທາງທີ່​ສະ​ເໜີ​ທັງ​ໝົດ 9 ​ເສັ້ນ ​ເຂົ້າໃນ​ການ​ສຶກສາ​ໂຄງການ ລວມລວງ​ຍາ​ວທັງ​ໝົດ 110 ກມ; ບໍ່​ຖືກຄັດ​ເລືອກ 5 ​ເສັ້ນ ລວງ​ຍາວ 62,8 ກມ; ​ໄດ້​ປັບປຸງ​ສ້ອມ​ແປງ​ແລະ ກໍ່ສ້າງຕະຫຼາດ ​ແລະ​ ປັບປຸງ​ກໍ່ສ້າງສະຖາ​ນີລົດ​ເມ ​ເມືອງ​ຕະ​ໂອ້​ຍ; ສ່ວນ​ເສັ້ນທາງທີ​ຖືກ​ຄັດ​ເລືອກ​ແມ່ນ​ມີ​ດັ່ງ​ລຸ່ມ​ນີ້:

-    ທາງ​ແຍກ 5,7202 ຫາ ບ້ານ ຈາລະ​ວຽງ                         ຍາວ 9,6 ກມ;

-    ທາງ​ແຍກ 15B ຫາ ບ້ານ ປະ​ສິງ ​ແລະ ບ້ານ ຕຸ​ມລື​ເກົ່າ         ຍາວ 17,1 ກມ;

-    ທາງ​ແຍກ 15B ຫາ ບ້ານ ຕຸ​ມລື​ເກົ່າ                               ຍາວ 3,2 ກມ;

-    ທາງ​ແຍກ 15B ຫາ ບ້ານ ປະ​ດອນ ​ຫາ ບ້ານ ລະ​ຫາດ         ຍາວ 10,3 ກມ;

ລວມ​ເສັ້ນທາງ​ທີ່​ຖືກ​ຄັດ​ເລືອກ​ຢູ່​ເມືອ​ງຕະ​ໂອ້​ຍ                        ຍາວ 40,3 ກມ​.

 

ສ່ວນ​ເສັ້ນທາງ​ທີ່​ບໍ່​ຖືກ​ຄັດ​ເລືອກ​ໃນ​ການ​ກໍ່ສ້າງ​ຄັ້ງ​ນີ້​ແມ່ນ​ຍ້ອນ​ຫຼາຍ​ບັນຫາ​ດັ່ງ​ນີ້:

-   ເສັ້ນທາງ​ບາງ​ເສັ້ນ​ທີ່​ແຂວງ​ສະ​ເໜີ​ມາ​ແມ່ນ ​ແຂວງ​ໄດ້​ມີ​ຂໍ້​ຕົກລົງ​ໃຫ້​ບໍລິສັດ​ເອກະ​ຊົນ​ລົງທຶນ​ກອ່ນ​ແລ້ວ(​ເປັນ​ໂຄງການ​ຊ້ຳ​ກັນ);

-    ​ເສັ້ນ​ທາງ​ບາງ​ເສັ້ນ​ແມ່ນ​ຖືກ​ທາງ​ໄປ​ຫາ​ເຂື່ອນ​ໄຟຟ້າ(ຜູ້​ກໍ່ສ້າງ​ເຂື່ອນ​ເປັນ​ຜູ້​ຮັບຜິດຊອບ);

-    ບາງ​ເສັ້ນທາງ​ແມ່ນ​ບໍ່​ຖືກ​ກັບ​ນະ​ໂຍບາຍຂອງ​ອົງການ​ຜູ້​ໃຫ້​ທຶນ KFW ທີ່​ກຳນົດ​ໄວ້​ໃນ​ການ​ຊ່ວຍ​ເຫຼືອ;ຕະ ຫຼາດ​ເມືອງ ສະ​ໝ້ວຍ ບໍ່​ຖືກ​ຄັດ​ເລືອກ​ໃນ​ການ​ກໍ່ສ້າງ​ຍ້ອນ​ໂຄງການ​ໄດ້​ມີ​ບົດຮຽນ​ຜ່ານ​ມາ​ຢູ່​ແຂວງ​ອັດ​ຕະປື ​ເຮັດ​ໃຫ້ການ​ກໍ່ສ້າງ​ສຳ​ເລັດ​ແລ້ວ​ແຕ່​ບໍ່​ມີ​ປະຊາຊົນ​ເຂົ້າ​ໄປ​ຊື້​ຂາຍ ​ເຮັດ​ໃຫ້ການ​ຊ່ວຍ​ເຫຼືອບໍ່​ມີ​ປະສິດ​ຕິ​ຜົນ​ຂອງ​ອົງການ​ຜູ້​ໃຫ້​ທຶນ.

 

 

ເສັ້ນທາງເລກ 13 ເໜືອອຸດົມໄຊ ຫາ ປາກມອງ ສໍາເລັດຫລາຍກວ່າ 7%

                                                                 (ພາບປະກອບເສັ້ນທາງອຸດົມໄຊ-ປາກມອງ)

ທ່ານ ວັນທອງ ບຸດຕະນະວົງ ຫົວໜ້າໂຄງການກໍ່ສ້າງເສັ້ນທາງເລກ 13 ເໜືອ ແຕ່ເທດສະບານແຂວງອຸດົມໄຊ ຫາ ປາກມອງ ແຂວງຫຼວງພະບາງກ່າວວ່າ: ການກໍ່ສ້າງເສັ້ນທາງເລກທີ 13 ເໜືອ ໃນໄລຍະທີໜຶ່ງແຕ່ນາເຕີຍ ແຂວງ ຫຼວງນ້ຳທາຫາ ຂົວນ້ຳກໍ 1 ເທດສະບານແຂວງອຸດົມໄຊແມ່ນສຳເລັດແລ້ວ, ສຳລັບໄລຍະທີ 2 ແຕ່ເທດສະບານ ແຂວງອຸດົມໄຊ ຫາ ປາກມອງ ແຂວງຫຼວງພະບາງ ແມ່ນພວມກໍ່ສ້າງປະຈຸບັນແມ່ນສຳເລັດຫຼາຍກວ່າ 7% ແລະ ໃນໄລຍະນີ້ແມ່ນພວມ ເລັ່ງກໍ່ສ້າງໃນ ໄລຍະທາງ 6 ກິໂລແມັດ ໃນເທດສະບານແຂວງອຸດົມໄຊ ເພື່ອໃຫ້ສຳເລັດກ່ອນ ງານມະຫາກຳກິລາແຫ່ງຊາດ ໃນເດືອນທັນວາປີນີ້.
   ທາງເລກ 13 ເໜືອ ແຕ່ເທດສະບານແຂວງອຸດົມໄຊຫາປາກມອງແຂວງຫຼວງພະບາງ ໄດ້ວາງສີລາລືກກໍ່ສ້າງຢ່າງເປັນ ທງການ ໃນວັນທີ 7 ມີນາ ຜ່ານມາ ຊຶ່ງມີຄວາມຍາວ 82 ກິໂລແມັດ, ມູນຄ່າສັນຍາການກໍ່ສ້າງ 82 ລ້ານກວ່າໂດລາ ສະຫະລັດ, ຊຶ່ງໃຊ້ເວລາກໍ່ສ້າງທັງໝົດ 3 ປີ ໃຫ້ສຳເລັດ ໂດຍໄດ້ຮັບທຶນກູ້ຢືມດອກເບ້ຍຕ່ຳຈາກລັດຖະບານ ສາທາລະ ນະລັດ ປະຊາຊົນຈີນ ຈາກທະນາຄານອີຊິມແບັງຂອງຈີນພາຍໃຕ້ຂອບສັນຍາວ່າດ້ວຍການຮ່ວມມືທາງດ້ານເສດຖະກິດ - ເຕັກນິກ ລະຫວ່າງ ລັດຖະບານ ສປປ ລາວ ແລະ ລັດຖະບານ ສປ ຈີນ ເພື່ອດຳເນີນການກໍ່ສ້າງປັບປຸງຍົກລະດັບທາງ ດັ່ງກ່າວ. ມາຮອດປະຈຸບັນທາງເລກ 13 ເໜືອແມ່ນພວມດຳເນີນກໍ່ສ້າງ ໂດຍໄດ້ແບ່ງເປັນສອງທີມກໍ່ສ້າງຄື: ແຕ່ເທດສະບານແຂວງອຸດົມ ໄຊຫາຂົວຫ້ວຍໝ້ຽງ ແລະ ແຕ່ຂົວຫ້ວຍໝ້ຽງຫາປາກມອງແຂວງຫຼວງພະບາງ. ທ່ານ ວັນທອງ ບຸດຕະນະວົງ ກ່າວວ່າ: ການກໍ່ສ້າງແມ່ນຫຼ້າຊ້າເກືອບ 2 ເດືອນ ຫຼັງວາງສີລາລືກກໍ່ສ້າງ ເນື່ອງຈາກການນຳ ເຂົ້າພາຫະນະ ແລະ ອຸປະກອນຕ່າງໆ ແຕ່ເຖິງຢ່າງໃດກໍຕາມປະຈຸບັນກຳລັງດຳເນີນການກໍ່ສ້າງ ແລະ ສ້ອມແປງຖົມຂຸມ ອັດແໜ້ນເພື່ອໃຫ້ການສັນຈອນສະດວກສະບາຍໃນໄລຍະກໍ່ສ້າງ, ສ່ວນການສັນຈອນຂອງປະຊາຊົນ ແລະ ນັກກິລາທີ່ ເຂົ້າມາ ແຂວງອຸດົມໄຊໃນງານມະຫາກຳກິລາແມ່ນໄດ້ກະກຽມແບ່ງທີມງານຢູ່ແຕ່ລະຈຸດລະບາຍລົດບໍ່ໃຫ້ຫຼ້າຊ້າໃນການ ສັນຈອນ.
   ໂຄງການກໍ່ສ້າງທາງເລກ 13 ເໜືອຖືວ່າເປັນໂຄງການ ທີ່ສຳຄັນແຕ່ການກໍ່ສ້າງກໍ່ພົບຄວາມຫຍຸ້ງຍາກບາງ ບັນຫາ ເລັກນ້ອຍເປັນຕົ້ນແມ່ນການຍົກຍ້າຍທີ່ຢູ່ອາໄສ, ສິ່ງກໍ່ສ້າງ, ການໄກ່ເກ່ຍເນື້ອທີ່ດິນຂອງ ປະຊາຊົນ ແຕ່ກໍ່ມີການຊົດເຊີຍ ຕາມລະບຽບການທີ່ຂັ້ນເທິງວາງອອກ, ແຕ່ຄວາມຫຍຸ້ງຍາກອີກອັນໜຶ່ງແມ່ນການຍົກຍ້າຍຕາຂ່າຍໄຟຟ້າພາຍໃນເທດ ສະບານເຮັດໃຫ້ວຽກຫຼ້າຊ້າ ແຕ່ເຖິງຢ່າງໃດກໍຕາມ ທ່ານ ວັນທອງ ບຸດຕະນະວົງ ກ່າວຕື່ມວ່າ: ຈະເລັ່ງດຳເນີນການ ກໍ່ສ້າງໄລຍະທາງເທດສະບານ ໃຫ້ແລ້ວກ່ອນ ງານມະຫາກຳກິລາໃນທ້າຍປີນີ້ ແລະ ທາງແຕ່ເທດສະບານແຂວງ ອຸດົມໄຊ ຫາປາກມອງ ແມ່ນຈະເລັ່ງກໍ່ ສ້າງຕາມແຜນການເຊັ່ນກັນ ພ້ອມທັງສ້ອມແປງໃຫ້ທຽວໄດ້ສະດວກສະບາຍ ແຕ່ກໍມີບາງໄລຍະຜູ້ສັນຈອນຈະບໍ່ສະດວກສະນັ້ນ ຈຶ່ງຂໍຮຽກຮ້ອງໃຫ້ມີການລະມັດລະວັງໃນການເດີນທາງ ແລະ ໃຫ້ ການຮ່ວມມືກັບໂຄງການກໍ່ສ້າງເສັ້ນທາງນີ້ດ້ວຍ.

                                                                                              ຂໍ້ມູນຈາກໜັງສືພິມປະຊາຊົນ, ສະບັບລົງວັນທີ 30 ມິຖຸນາ 2014

Additional information