ຂ່າວຕ່າງແຂວງ

ໂຄງການກໍ່ສ້າງຂົວຂ້າມນໍ້າຂອງດອນໂຂງ ແຂວງຈໍາປາສັກ

 

    ໂຄງການກໍ່ສ້າງຂົວຂ້າມນໍ້າຂອງດອນໂຂງ, ແຂວງຈໍາປາສັກ ແມ່ນໂຄງການໜຶ່ງທີ່ເປັນບູລິມະສິດຂອງລັດ ຖະບານ ​ເຊິ່ງນອນໃນແຜນພັດທະນາ ເສດຖະກິດສັງຄົມໃນທົ່ວປະເທດເວົ້າລວມກໍຄືຕາໜ່າງ ການຄົມມະ ນາຄົມເຂົ້າເຖິງດອນໂຂງ ເວົ້າສະເພາະ, ເພື່ອເອື້ອອໍານວຍຄວາມສະດວກໃຫ້ແກ່ການສັນຈອນຂອງ ປະຊາຊົນໃນຂົງເຂດດັ່ງກ່າວ, ໂດຍສະເພາະແມ່ນການພັດທະນາການທ່ອງທ່ຽວຂອງແຂວງຈໍາປາສັກ.

      ໂຄງການກໍ່ສ້າງຂົວດັ່ງກ່າວ ​ໄດ້ເລີ່ມລົງມືກໍ່ສ້າງຕັ້ງ​ແຕ່ວັນທີ 28 ພະຈິກ 2011, ​ຊຶ່ງມອບໃຫ້ກົມ ຂົວທາງ ກະຊວງ ໂຍທາທິການ ແລະຂົນສົ່ງ ເປັນເຈົ້າຂອງໂຄງການ ແລະຮັບຜິດຊອບວຽກງານໂດຍກົງ, ບໍລິສັດ HNDCI ສປ ຈີນ ເປັນຜູ້ຮັບເໝົາການກໍ່ສ້າງ, ລັດວິສາຫະກິດ ວິສະວະກໍາ ຄົມມະນາຄົມ (LTEC) ເປັນທີ່ປຶກສາ. ສໍາລັບແຫຼ່ງທືນທີ່ນໍາໃຊ້ໃນການກໍ່ສ້າງແມ່ນທືນ ກູ້ຢືມຈາກ ທະນາຄານ ຂາອອກ-ຂາເຂົ້າ (EXIM BANK) ສປ ຈີນ, ​ໃນມູນຄ່າການກໍ່ສ້າງທັງໝົດ 34,122,846​.32 ໂດລາສະຫະລັດ, ໃນນັ້ນທືນລັດຖະບານລາວສົມທົບ 1,706,142.32 ໂດລາສະຫະລັດ, ໄລຍະ​​ເວລາການ​ກໍ່ສ້າງ 36 ເດືອນ ​ແລະ ຄາດວ່າຈະໃຫ້ສໍາເລັດ​ ໃນວັນທີ 28 ຕຸລາ 2014.

      ການຈັດຕັ້ງປະຕິບັດ ​ແລະ ຄວາມ​ຄືບ​ໜ້າຂອງໂຄງການ 29 ເດືອນ ທີ່​ຜ່ານ​ມາສາມາດປະຕິບັດໄດ້ເທົ່າ​ 80,56% ແລະ ເວລາທີ່ຍັງເຫຼືອຂອງ​ການຈັດ​ຕັ້ງ​ປະຕິບັດ​ໂຄງການແມ່ນ 7 ເດືອນ ​ເທົ່າ​ 19,44%. ບັນດາ​ໜ້າ​ວຽກທີ່​ກໍາລັງຈັດ​ຕັ້ງ​ປະຕິບັດປະ​ຈໍາເດືອນ ມີນາ 2014 ມີດັ່ງນີ້: ສໍາເລັດເທເບຕົງຂາງຂົວສໍາລັບເສົາເບີ 4#3 ແລະເສົາກາງນໍ້າ, ເສົາເບີ 6#13, ເສົາເບີ 7#12, ເສົາເບີ 8#10, ເສົາເບີ 9#11 ແລະເສົາເບີ 10#12, ເທົ່າ 52,5 ມຍ (ສໍາເລັດ 559,0 ມຍ ຂອງ 718,80 ມຍ, ເທົ່າ 77,77%). ກໍ່ສ້າງຂົວນ້ອຍ (ບ້ານ ໂຂງແຫຼມ-ບ້ານ ດອນສັນ) ປະຕິບັດໄດ້ 96,06%, ຍັງວຽກປູໜ້າຂົວ ແລະທາງເຂົ້າຂົວ; ສ່ວນ​ວຽກ​ສະພາບ​​ແວດ​ລ້ອມ​ແມ່ນ​ຕິດຕາມ ກວດກາ ​ແລະ ຄຸ້ມ​ຄອງ​ສະພາບ​ແວດ​ລ້ອມ​ທາງ​ນ້ຳ, ທາງດິນ ​ແລະ ທາງ​ອາກາດ ​ໃຫ້​ຢູ່​ໃນ​ສະພາບ​ເດີມ; ວຽກສ້ອມແປງ ແລະຂະຫຍາຍທາງເກົ່າ (ຈາກທາງແຍກ​ເລກ 13 ໃຕ້-ຫົວຂົວ ນໍ້າຂອງ ເບື້ອງບ້ານຫາດ) ປະຕິບັດໄດ້ 95%, ຍັງວຽກອານາໄມ-ເກັບມ້ຽນ-ວຽກປະດັບປະດາ; ທາງເຂົ້າຫົວຂົວ ແລະທ່າບັກສາ ຕິບັດໄດ້ 60%, ສືບຕໍ່ວຽກຖົມດິນເຂົ້າຫົວຂົວທັງສອງແຫ່ງ (4ສົ້ນ), ວຽກທ່າບັກ, ເບື້ອງບ້ານຫົວໂຂງພະໃຫຍ່, ເທເບຕົງທາງລົງທ່າບັກ ແລະເທເບຕົງຝາຕ້ານເຈື່ອນ ບ້ານຫ້ວຍຍາງ ​ແລະ ເລີ້ມຕັດດິນທາງລົງທ່າບັກ.

  ມາ​ຮອດປະຈຸ​ບັນຄວາມຄືບໜ້າ​ຂອງ​ວຽກ​ງານ​​ຕາມ​ແຜນການ​ຮອດ​ທ້າຍ​ເດືອນ​ນີ້ 83,58%; ​ແຜນການ​ປະຕິບັດ​ໄດ້​ໃນ​ເດືອນ 6,78%; ປະຕິບັດ​ໄດ້​ໃນ​ເດືອນ 7,26%(ລື​ນ​ແຜນການ​ໃນ​ເດືອນ 0,48%); ລວມປະຕິບັດ​ໄດ້​ຮອດ​ທ້າຍເດືອນນີ້ 80,88% ລຸ​ດແຜນການ -2,70%. ນອກ​ຈາກ​ນັ້ນ​ຍັງ​ມີ​ແຜນ​ວຽກ​ທີ່​ຈະ​ປະຕິ​ບັດໃນ​ເດືອນໜ້າຄື: ຂົວ​ໃຫຍ່: ສືບຕໍ່​ປະຕິບັດ​ວຽກ​ຕິດ​ຕັ້ງ​ແບບ, ມັດ​ເຫຼັກ​ຂາງ​ຂົວ ​ແລະ ​ເທ​ເບ​ຕົງ; ຂົວ​ນ້ອຍ: ​ເທ​ເບ​ຕົງ​ຂອບ​ກັນ​ຕົກ ​ແລະ ​ແຜນ​ກ່າຍ​ເຂົ້າ​ຂົວ​ເສົາ​ຫົວ​ຂົວ A0, A6; ວຽກສ້ອມ​ແປງ​ຂະຫຍາຍ​ທາງ​ແມ່ນ​ສືບ​ຕໍ່​ວຽກ​ຊິດ​ຢາງ​ຊັ້ນ​ສອງ ຈາກ​ທາງ​ແຍກ​ເລກ 13 ​ໃຕ້ ຫາ ບ້ານ​ຫາດ​ ໃຫ້​ສຳ​ເລັດ; ວຽກ​ທາງ​ເຂົ້າ​ຂົວ ​ແລະ ທ່າ​ບັກ ສືບ​ຕໍ່​ຖົມ​ດິນ​ເຂົ້າ​ຫົວ​ຂົວ​ເບື້ອງ ບ້ານ​ຫາດ-ບ້ານ​ຫ້ວຍ, ບ້ານ​ຫົວ​ໂຂງ-ບ້ານ​ດອນ​ສັນ, ສືບ​ຕໍ່​ເທ​ເບ​ຕົງ​ທາງ​ລົງ​ທ່າ​ບັກ ​ແລະ ຝາ​ປ້ອງ​ກັນ​ເຈືອ​ນ​ແຄມ​ນ້ຳ. ພ້ອມ​ດຽວ​ກັນ​ນັ້ນ​ກໍ່​ສະ​ເໜີ​ຂໍອະນຸຍາດ​ເປີດ​ການ​ນຳ​ໃຊ້​ເສັ້ນທາງ​ເຂົ້າ​ຫາ​ຂົວ​ຊົ່ວຄາວ ​ແຕ່ທາງ​ແຍກ​ເລກ 13 ​ໃຕ້-ຂົວ​ນ້ຳຂອງ.

 

 

ເກີດເຫດລົດບັນທຸກ 18ລໍ້ ຕຳກັບ ລົດກະບະວີໂກ້ ຢູ່ຂົວຂ້າມນ້ຳຂອງ ເມືອງປາກເຊ ແຂວງຈຳປາສັກ.

 

                ເກີດ​ເຫດ​ສະຫຼົດ​ໃຈ​ຂື້ນ ​ໃນ​ຕອນ​ກາງຄືນ​ຂອງ​ວັນ​ທີ 28 ​ເມສາ 2014 ຜ່ານ​ມາ ທີ່​ຂົວ​ຂ້າມ​ນ້ຳຂອງ ​ເມືອງ​ປາກ​ເຊ ​ແຂວງ​ຈຳປາ​ສັກ, ​ເມື່ອລົດ​ບັນທຸກ 18ລໍ້ ຈາກ​ປະ​ເທດ​ໄທ ຕຳ​ກັບ ລົດ​ກະບະ​ວີ​ໂກ້​ຂອງ​ລາວ ​ເຮັດ​​ໃຫ້ລົດ​ບັນທຸກ​ຕົກລົງ​ນ້ຳຂອງ ​ເຮັດ​ໃຫ້​ມີ​ຜູ້​ເສຍ​ຊິວິດ 2ຄົນ ​ແລະ ບາດ​ເຈັບ​ສາຫັດ​ອິກ 2 ຄົນ. ສ່ວນ​ສາ​ເຫດ​ຂອງ​ການ​ເກີດ​ອຸບັດ​ເຫດ​ແມ່ນຍັງ​ຢູ່​ໃນ​ການ​ສືບສວນ​ສອບ​ສວນ​ຂອງ​ເຈົ້າ​ໜ້າ​ທີ​ຕຳຫຼວດ.

 

ຂົວເຊໂດນ 3 ວາງເສົາເຂັມເກືອບສໍາເລັດ 100%

 

   ໂຄງການກໍ່ສ້າງຂົວເຊໂດນ 3 ມາຮອດປະຈຸບັນນີ້ມີຫຼາຍໜ້າວຽກທີ່ໄດ້ສຸມໃສ່ຈັດຕັ້ງປະຕິບັດ, ໃນນັ້ນໄດ້ວາງເສົາ ເຂັມສຳເລັດແລ້ວ ເກືອບ 100%. 
   ທ່ານ ບຸນຈັນ ວັນສີລິ ຫົວໜ້າຫ້ອງການກໍ່ສ້າງຂົວເຊໂດນ 3 ໃຫ້ຮູ້ວ່າ: ໂຄງການກໍ່ສ້າງຂົວເຊໂດນ 3 ປະຈຸບັນ ແມ່ນໄດ້ສຸມ ໃສ່ຈັດຕັ້ງປະຕິບັດໃນ 2 ໜ້າວຽກໃຫຍ່ຄື: ວຽກກໍ່ສ້າງຂົວໃໝ່ ແລະ ວຽກຮື້ມ້າງ ຂົວເກົ່າ, ໃນນັ້ນວຽກກໍ່ສ້າງຂົວ ໃໝ່ແມ່ນໄດ້ແບ່ງ ອອກເປັນ ສອງພາກຄື: ວຽກກໍ່ສ້າງພາກ ລຸ່ມ ຊຶ່ງລວມມີວຽກກໍ່ສ້າງເສົາ ເຂັມມີທັງໝົດ 4 ເສົາ, ໃນນີ້ ເສົາກາງນ້ຳມີ 2 ເສົາສຳເລັດ ແລ້ວ 100% ແລະ ເສົາສົ້ນຂົວ ມີ 2 ເສົາສຳເລັດແລ້ວ 50%, ສ່ວນວຽກກໍ່ສ້າງຕີນເສົາທັງ ສອງເບື້ອງຄາດວ່າຈະໃຫ້ສຳ ເລັດກ່ອນວັນທີ 25 ພຶດສະພາ 2014 ນີ້ ແລະ ຈະສືບຕໍ່ຈັດຕັ້ງ ປະຕິບັດວຽກກໍ່ສ້າງເສົາຂົວ, ສ່ວນວຽກກໍ່ສ້າງພາກສ່ວນເທິງ ທີ່ປະກອບມີວຽກກໍ່ສ້າງຂົວ, ກໍ່ສ້າງເທິງຂົວ ແລະ ວຽກປະກອບອື່ນໆ ແມ່ນຕ້ອງລໍຖ້າບັນດາໜ້າວຽກກໍ່ສ້າງພາກລຸ່ມສຳເລັດກ່ອນ ຊຶ່ງມາຮອດ ປະຈຸບັນ ນີ້ໜ້າວຽກຕ່າງໆມີຄວາມຄືບ ໜ້າແລ້ວ 10%.
  ສ່ວນໜ້າວຽກຮື້ມ້າງຂົວເກົ່ານັ້ນກໍໄດ້ຈັດຕັ້ງປະຕິບັດຄວບຄູ່ກັນໄປໂດຍໄດ້ມ້າງເປັນຊິ້ນສ່ວນ, ມ້າງອອກເທື່ອ ລະນ້ອຍ, ເພາະທັງ ໝົດຂອງຂົວເກົ່າປະກອບມີ 5 ຫວ່າງ, ໃນນັ້ນມ້າງສຳເລັດແລ້ວ 2 ຫວ່າງ ແລະ ປະຈຸບັນແມ່ນກຳ ລັງກະກຽມສ້າງຂົວຫວ່າງທີ 3 ລົງ, ສ່ວນຫວ່າງທີ່ເຫຼືອແມ່ນຈະສືບຕໍ່ຈັດຕັ້ງປະຕິບັດໃຫ້ສຳ ເລັດພາຍໃນກາງເດືອນມິຖຸນາ 2014 ທີ່ຈະມາເຖິງນີ້. ທ່ານຫົວໜ້າຫ້ອງການກໍ່ ສ້າງຂົວເຊໂດນ 3 ໃຫ້ຮູ້ຕື່ມອີກວ່າ: ຜ່ານການຈັດຕັ້ງປະຕິບັດ ໂຄງການໃນໄລຍະຜ່ານມາ ນັ້ນ ເຖິງແມ່ນວ່າຈະມີຄວາມ ຫຍຸ້ງ ຍາກພໍສົມຄວນຈາກບັນຫາສິ່ງກີດຂວາງຕ່າງໆເປັນຕົ້ນ ກ່ຽວກັບລະບົບນ້ຳປະປາ, ໄຟຟ້າ, ສາຍໂທລະສັບ ແລະ ອື່ນໆ, ແຕ່ທາງພາກ ສ່ວນກ່ຽວຂ້ອງ ໂດຍສະເພາະແມ່ນພະແນກໂຍທາທິການ ແລະ ຂົນສົ່ງກໍ ໄດ້ພະຍາຍາມເອົາໃຈໃສ່ໃນການແກ້ໄຂ ແລະ ອຳນວຍ ຄວາມ ສະດວກ ໂດຍປະສານສົມທົບກັບພາກສ່ວນ ຕ່າງໆ ທີ່ກ່ຽວຂ້ອງ, ເຮັດໃຫ້ການຈັດຕັ້ງປະ ຕິບັດໂຄງການມີຄວາມຄືບໜ້າ ແລະ ສຳເລັດຕາມລະດັບຄາດ ໝາຍມາຮອດປະຈຸບັນກວມ ເອົາ 10% ຂອງໂຄງການ.
   ໂຄງການກໍ່ສ້າງຂົວເຊໂດນ 3 ແທນຂົວເຫຼັກເກົ່າແມ່ນເປັນຂົວເບຕົງ 4 ເລນ ທີ່ຈະສາມາດສັນຈອນຂຶ້ນ - ລົງໄດ້, ມີຄວາມກວ້າງ 17 ແມັດ, ຍາວ 220 ແມັດ ໂດຍແມ່ນບໍລິສັດລາວເວີນອະສັງຫາລິມະຊັບ ເປັນຜູ້ ລົງທຶນ ແລະ ກໍ່ສ້າງໃນມູນຄ່າທັງໝົດ 14,82 ລ້ານໂດລາສະຫະລັດ ແລະ ຄາດວ່າຈະໃຫ້ສຳເລັດ ພາຍໃນທ້າຍປີ 2015 ທີ່ຈະມາເຖິງນີ້.

 

ກອງປະຊຸມແຜນຈັດຕັ້ງປະຕິບັດ ເນື້ອໃນຂໍ້ແຂ່ງຂັນ 3 ດີ ຂອງໝ່ວຍແມ່ຍິງພະແນກ ຍທຂ ແຂວງອັດຕະປື.

 

    ເພື່ອເປັນການສະຫຼຸບການເຄື່ອນໄຫວຂອງ ໜ່ວຍແມ່ຍິງ ພະແນກ ຍທຂ ແຂວງອັດຕະປື ໃນໄລ ຍະ 3 ປີ ແຕ່ສົກປີ 2010 ຫາ 2013 ແລະທິດທາງແຜນການ 3 ປີຕໍ່ໜ້າ ສົກປີ 2013 ຫາ 2016. ດັ່ງນັ້ນໃນວັນທີ 26 ມີນາ 2014 ທີ່ຜ່ານມາ ຢູ່ທີ່ຫ້ອງປະຊຸມໃຫ່ຍ ພະ​ແນ​ກ ຍທຂ ແຂວງອັດຕະປື ​ໄດ້​ເປີດກອງປະຊຸມແຜນຈັດຕັ້ງປະຕິບັດ ເນື້ອໃນຂໍ້ແຂ່ງຂັນ 3 ດີ ຂອງໝ່ວຍແມ່ຍິງ. ໂດຍການເປັນປະທານ ຂອງທ່ານ ເພັດມີໄຊ ຄໍາພັກດີ, ຫົວໜ້າພະແນກ ຍທຂ ແຂວງອັດຕະປື, ນາງ ອາລົມຈິດ ສຸດທິຈັກ ຄະນະໜ່ວຍແມ່ຍິງ ແລະ ສະຫະພັນແມ່ຍິງ ພະແນກ ຍທຂ ປະຈໍາແຂວງດັ່ງກ່າວ ເຂົ້າຮ່ວມຢ່າງພ້ອມພຽງ.

    ກອງປະຊຸມດັ່ງກ່າວໄດ້ວາງແຜນການຈັດຕັ້ງປະຕິບັດ, ເນື້ອໃນຂໍ້ແຂງຂັນ 3 ດີ ຂອງໜ່ວຍແມ່ຍິງ ພາຍໃນພະແນກ ຍທຂ ແຂວງອັດຕະປື, ແນໃສ່ເພື່ອຜັນຂະຫຍາຍເນື້ອໃນຈິດໃຈ ກອງປະຊຸມໃຫຍ່ຄັ້ງທີ VI ຂອງແມ່ຍິງລາວ ທົ່ວປະເທດ ແລະ ມະຕິກອງປະຊຸມໃຫຍ່ຄັ້ງທີ VI ຂອງສະຫະພັນແມ່ຍິງແຂວງ, ໃຫ້ກາຍເປັນຮູບປະທໍາ ຕົວຈິງ. ໂດຍໄດ້ປຸກລະດົມສະມາຊິກແມ່ຍິງພາຍໃນໜ່ວຍ ໃຫ້ມີການພັດທະນານາຕົນເອງ ແລະຄອບຄົວ, ພ້ອມທັງຕັ້ງໜ້າປະຕິບັດວຽກງານຂອງແມ່ຍິງ ໃຫ້ປາກົດຜົນເປັນຈິງ ແລະສ້າງຄວາມເຂັ້ມແຂງໃຫ້ແກ່ໜ່ວຍ, ໃນນີ້ໄດ້ສົ່ງເສີມໃຫ້ສະມາຊິກແມ່ຍິງ ໄດ້ມີການເຄື່ອນໄຫວຕາມພາລະບົດບາດ ແລະຄວາມສາມາດຂອງຕົນ, ເພື່ອໃຫ້ກາຍເປັນແມ່ຍິງ 3 ດີ, ຫນ່ວຍ 3 ດີ ແລະສ້າງຄອບຄົວໃຫ້ກາຍເປັນ ຄອບຄົວຜາສຸກ ຄື: ສ້າງສະມາຊິກແມ່ຍິງ 3 ດີໃຫ້ໄດ້ 100% ຂອງຈໍານວນສະມາຊິກ 16 ສະຫາຍ, ສ້າງສະມາຊິກແມ່ຍິງ 3 ດີ ປະເພດ I ໃຫ້ໄດ້ 80%, ສ້າງສະມາຊິກແມ່ຍິງ 3 ດີປະເພດ II ໃຫ້ໄດ້ 20%, ສູ້ຊົນສ້າງຄອບຄົວດີມີຄວາມຜາສຸກໃຫ້ໄດ້ 80% ແລະສູ້ຊົນເປີດຮຽນເນື້ອໃນຂໍ້ແຂ່ງຂັນ 3 ດີໃຫ້ໄດ້ 100%.

      ໃນພິທີໄດ້ມີການມອບໃບຍ້ອງຍໍປະເພດ I ໃຫ້ແກ່ສະມາຊິກແມ່ຍິງຊິ່ງປະກອບມີ 8 ທ່ານ ແລະປະເພດ II ມີ 5 ທ່ານ, ໃນຕອນທ້າຍຂອງ​ກອງ​ປະຊຸມ ຫົວໜ້າພະແນກ, ໄດ້ຂື້ນໂອ້ລົມຕໍ່ ໜ່ວຍແມ່ຍິງ​ແລະ ສະມາຊິກແມ່ຍິງ ພາຍໃນພະແນກ ຍທຂ ແຂວງອັດຕະປື, ໃຫ້ຕັ້ງໜ້າສູ້ຊົນປະຕິບັດຂໍ້ແຂ່ງຂັ້ນ 3 ດີ ໃຫ້ປາກົດຜົນເປັນຈິງ ແລະສໍາລັບຜູ້ທີ່ ໄດ້ໃບຍ້ອງຍໍປະເພດ I ແລະ II ກໍ່ໃຫ້ສຶບຕໍ່ຮັກສາມູນເຊື້ອອັນດີງາມນີ້ໄວ້.

 

Additional information