ຂ່າວຕ່າງແຂວງ

ພິທີມອບໜ່ວຍພັກແຂງຮູ້ນໍາພາຮອບດ້ານ ຂອງຂະແໜງເຄຫາຜັງເມືອງ ທີ່ຂື້ນກັບ ຍທຂ ແຂວງອັດຕະປື

    ໃນຕອນເຊົ້າຂອງວັນທີ 19 ມີນາ 2014 ຢູ່ທີ່ຫ້ອງປະຊຸມໃຫຍ່ ຂອງພະແນກ ຍທຂ ແຂວງອັດ ຕະປື ໄດ້ຈັດກອງປະຊຸມຮັບຮອງແຜນການ ກໍ່ສ້າງໜ່ວຍພັກເຂັ້ມແຂງ-ຮູ້ນໍາພາຮອບດ້ານ ສົກປີ 2013-2014 ຂອງໜ່ວຍພັກ ບໍລິຫານ-ເຄຫາຜັງເມືອງ ທີ່ຂື້ນກັບຄະນະພັກຮາກຖານ ພະແນກ ຍທຂ ແຂວງ ອັດຕະປື ຂື້ນຢ່າງເປັນທາງການ. ໂດຍການເປັນປະທານຂອງ ສະຫາຍ ສົມຮັກ ກອງບົວຄໍາ ກໍາມະການພັກແຂວງ, ຫົວໜ້າຄະນະໂຄສະນາອົບຮົມແຂວງ, ສະຫາຍ ເພັດມີໄຊ ຄໍາພັກດີ, ກໍາມະການພັກແຂວງ, ເລຂາໜ່ວຍພັກຮາກຖານ, ຫົວໜ້າພະແນກ ຍທຂ ແຂວງອັດຕະປື, ມີບັນດາສະມາຊິກພັກພາຍໃນຂະແໜງ ບໍລິຫານ-ເຄຫາຜັງເມືອງ ແລະສະມະຊິກພັກອ້ອມຂ້າງພະແນກ ຍທຂ ແຂວງ ອັດຕະປື ກໍ່ໄດ້ເຂົ້າຮ່ວມ.

      ກອງປະຊຸມຄັ້ງ​ນີ້ ສະຫາຍ ສູນນະຄອນ ແກ້ວວຽງຄໍາ, ຄະນະພັກຮາກຖານ, ທັງເປັນເລຂາ ໝ່ວຍພັກບໍລິຫານ, ຮອງຫົວໜ້າພະແນກ ຍທຂ ແຂວງອັດຕະປື, ໄດ້ໃຫ້ກຽດລາຍງານ ໂດຍຫຍໍ້ຂອງການຈັດ ຕັ້ງເຄື່ອນໄຫວວຽກງານໜ່ວຍພັກ ໃນໄລຍະທີ່ຜ່ານມາ ແລະຄາດໝາຍສູ້ຊົນຂອງໝ່ວຍພັກ ບໍລິຫານ-ເຄຫາຜັງເມືອງ ໃນການເສີມສ້າງທຸກເງື່ອນໄຂໃຫ້ໄດ້ຕາມມາດຖານຂອງ ການສ້າງໝ່ວຍພັກ​ເຂັ້ມແຂງ-ຮູ້ນໍາພາຮອບດ້ານ ຕາມທີ່ສູນກາງພັກວາງອອກ, ພ້ອມດຽວກັນນັ້ນກອງປະຊຸມຍັງໄດ້ຮັບຟັງ ການໂອ້ລົມຂອງ ສະຫາຍ ສົມຮັກ ກອງບົວຄໍາ ກໍາມະການພັກແຂວງ, ຫົວໜ້າຄະນະໂຄສະນາອົບຮົມແຂວງ ເຊິ່ງເພີ່ນໄດ້ ສະແດງຄວາມຍິນດີຊົມເຊີຍ ຕໍ່ຜົນງານລວມຂອງໝ່ວຍພັກ ທີ່ຍາດມາໄດ້ໃນໄລຍະຜ່ານມາ ແລະທ່ານກໍ ຍັງໄດ້ໃຫ້ທິດຊີ້ນໍາຕື່ມ ຕາມເນື້ອໃນຕົ້ນຕໍຂອງກອງປະຊຸມໃຫຍ່ສະໃໝ່ IX ຂອງສູນກາງພັກ. ຊຶ່ງສະຫາຍ ໄດ້ຮຽກຮ້ອງໃຫ້ສະມາຊິກພັກທຸກສະຫາຍ ແລະໝ່ວຍພັກທຸກຂັ້ນ ຕ້ອງໄດ້ສຸມໃສ່ໃນການສ້າງ ແລະປົກປັກຮັກສານາມມະຍົດໝ່ວຍພັກ​ເຂັ້ມແຂງ-ຮູ້ນໍາພາຮອບດ້ານ ຂອງຕົນໃຫ້ມີຄວາມຢືນຢົງຕະຫລອດໄປ.

 

ພິທີເຊັນສັນຍາ ໂຄງການກໍ່ສ້າງທາງຫຼວງແຫ່ງຊາດເລກ 6A(ທາງລ້ອງ-ສົບເບົາ), ແລະ 6B(ສົບເບົາ-ປ່າຮ່າງ)

          ທີ່​ແຂວງ​ຫົວພັນ ວັນ​ທີ 23/02/2014, ກະຊວງ​ໂຍທາ​ທິການ ​​ແລະ ຂົນ​ສົ່ງ ຮ່ວມ​ກັບ​ອໍານາດ​ການ​ປົກຄອງ​ແຂວງ​ຫົວພັນ, ຈັດ​ຕັ້ງ​ປະຕິບັດ​ໂດຍ​ ກົມ​ຂົວ​ທາງ ​ແລະ ພະ​ແນ​ກ ຍທຂ ​ແຂວງ​ຫົວພັນ ​ໄດ້​ຈັດ​ພິທີ​ເຊັນ​ສັນຍາ​ຮັບ​ເໝົາ​ກໍ່ສ້າງ ​ເສັ້ນທາງ​ຫລວງ​ແຫ່ງ​ຊາດ 6A ຫາງ​ລ້ອງ ຫາ ສົບ​ເບົາ ລວງ​ຍາວ 60.62 ກມ ມູນ​ຄ່າສັນຍາ 14,486,646 USD ​ແລະ ​ເຊັນ​ສັນຍາ​ຮັບ​ເໝົາ​ກໍ່ສ້າງ ​ເສັ້ນທາງ​ຫລວງ​ແຫ່ງ​ຊາດ 6B ສົບ​ເບົາ ຫາ ປ່າ​ຮາງ ລວງ​ຍາວ 26.1 ກມ + ຂົວ​ນ້ຳ​ມ່າ 200​ແມັດ ມູນ​ຄ່າສັນຍາ 9,5​30,315 USD

                  ເຂົ້າ​ຮ່ວມ​ເປັນ​ສັກຂີ​ພິຍານ, ທ່ານ ດຣ ພັນ​ດວງ​ຈິດ ວົງສາ ປະ​ທານ​ແນວ​ລາວ​ສ້າງ​ຊາດ, ທ່ານ ຄໍາ​ຮຸ່ງ ​ເຮືອງ​ວົງ​ສີ​ ​ເຈົ້າ​ແຂວງ ​ແຂວງ​ຫົວພັນ, ບັນດາ​ທ່ານ​ຮອງ​ເຈົ້າ​ແຂວງ, ຫົວໜ້າ​ພະ​ແນ​ກ ຍທຂ ​ແຂວງ​ຫົວພັນ ​ແລະ ທ່ານ ຮອງ​ຫົວໜ້າ​ກົມ​ຂົວ​ທາງ, ທ່ານ​ຮອງ​ຫົວໜ້າ​ກົມ​ແຜນການ ​ແລະ ການ​ຮ່ວມ​ມື, ທ່ານຮອງ​ຫົວໜ້າ​ກົມ ຈັດ​ຕັ້ງ​ພະນັກງານ, ທ່ານຜູ້​ຕາງ​ໜ້າ​ກົມ​ການ​ເງິນ ຂອງ ກະຊວງ ຍທຂ ​ແລະ ທ່ານ ຜູ້ຕາງໜ້າ ຈາກ ກົມ​ພົວຕ່າງປະ​ເທດ ກະຊວງ​ແຜນການ ​ແລະ ການ​ລົງທຶນ.


                     ຊັນ​ຕ່າງ​ໜ້າ​ເຈົ້າ​ຂອງ ​ໂຄງການ ສໍາ​ຫັລບສັນຍາ ທາງ​ຫລວງ​ແຫ່ງ​ຊາດ6A ​ແມ່ນ ທ່ານ​ສຸກ​ສາຄອນ ຊູ​ຕັນ​ນຸວົງ ຫົວໜ້າ​ໂຄງການ,ກົມ​ຂົວ​ທາງ, ກະຊວງ ຍທຂ ​ແລະ ຕາງໜ້າ​ບໍລິສັດຮັບ​ເໝົາ​ກໍ່ສ້າງ ລັດ​ວິ​ສະຫະ​ກິດ​ກໍ່ສ້າງ​ຂົວ​ທາງ ​ເລກ 8 ຮ່ວມ​ກັບ CEI18 ສສ ຫວຽດນາມ  ​ແມ່ນ​ທ່ານ​ ແສງ​ເພັດ ອານັນທະ​ວົງ ​ແລະເຊັນ​ຕ່າງ​ໜ້າ​ເຈົ້າ​ຂອງ ​ໂຄງການ ສໍາ​ຫັລບສັນຍາ ທາງ​ຫລວງ​ແຫ່ງ​ຊາດ6B ​ແມ່ນ ທ່ານ ດາວ​ອນ ວົງ​ລໍ​ຄໍາ ຫົວໜ້າ​ໂຄງການ, ກົມ​ຂົວ​ທາງ, ກະຊວງ ຍທຂ ​ແລະ ຕາງໜ້າ​ບໍລິສັດຮັບ​ເໝົາ​ກໍ່ສ້າງ Zhongmei Engineering Group Ltd ສປຈີນ ​ແມ່ນ ​ທ່ານ​  Zhang Huajun

 

ກອງປະຊຸມເຜີຍແຜ່ຂໍ້ມູນຂ່າວສານຜົນຂອງກອງປະຊຸມສະພາແຫ່ງຊາດຄັ້ງທີ VIII ສະໄໝທີ VI

         ໃນຕອນເຊົ້າຂອງວັນທີ 17 ມີນາ 2014 ຢູ່ທີ່ຫ້ອງປະຊຸມໃຫຍ່ພະແນກ ຍທຂ ແຂວງອັດຕະປື ໄດ້ຈັດກອງປະຊຸມເຜີຍແຜ່ຂໍ້ມູນຂ່າວສານຜົນຂອງກອງປະຊຸມສະພາແຫ່ງຊາດຄັ້ງທີ VIII ສະໄໝທີ VI ຂື້ນ. ພາຍໃຕ້ການເປັນປະທານຂອງ ທ່ານ ເພັດແກ້ວ ເຮືອງປັນຍາ, ກໍາມະການພັກແຂວງ, ຮອງຫົວ ໜ້າສະພາເຂດເລືອກຕັ້ງ 17 ແຂວງອັດຕະປື, ທ່ານ ເພັດມີໄຊ ຄໍາພັກດີ ກໍາມະການພັກແຂວງ, ຫົວໜ້າ ພະແນກ ຍທຂ ແຂວງອັດຕະປື, ທ່ານໂຊກໄຊ ສິມມາລາ ຄະນະສະພາເຂດເລືອກຕັ້ງທີ 17 ແຂວງອັດຕະປື, ມີບັນດາຄະນະນໍາພະແນກ ແລະພະນັກງານທຸກທ່ານໄດ້ເຂົ້າຮ່ວມ.

      ກອງປະຊຸມໄດ້ຮັບຟັງການເຜີຍແຜ່ຂໍ້ມູນຂ່າວສານຜົນຂອງກອງປະຊຸມສະພາແຫ່ງຊາດຄັ້ງທີ VIII ສະໄໝທີ VI, ພ້ອມດຽວກັນນັ້ນ ຄະນະນໍາຂອງພະແນກ ຍທຂ ແຂວງອັດຕະປື ໄດ້ມີການປະກອບຄໍາຄິດ-ຄໍາເຫັນ ຕໍ່ທີ່ປະຊຸມ, ໃນການນໍາສະເໜີຕໍ່ຄະນະສະພາເຂດເລືອກຕັ້ງທີ 17, ເພື່ອໃຫ້ຄະນະສະພານໍາເອົາ ຄໍາຄິດ-ຄໍາເຫັນດັ່ງກ່າວໄປສະເໜີຕໍ່ກອງປະຊຸມສະພາໃນສະໄໝໜ້າ ແລະສະເໜີບົດລາຍງານຂອງອົງການກວດສອບແຫ່ງລັດ.

      ຫົວໜ້າພະແນກ ຍທຂ ແຂວງອັດຕະປື ໄດ້ສະຫຼຸບສັງລວມຄືນກ່ຽວກັບການຈັດຕັ້ງປະຕິບັດວຽກ ງານ ໃນປີທີ່ຜ່ານມາ ແລະທິດທາງຄາດໝາຍສູ້ຊົນໂດຍສັງເຂບດັ່ງນີ້:  ໂດຍພາຍໃຕ້ການຊີ້ນໍາຂອງຄະ ນະບໍລິຫານງານພັກແຂວງ ອັດຕະປື ກໍຄືຄະນະນໍາພະແນກ ໄດ້ເອົາໃຈໃສ່ຊີ້ນໍານໍາພາ ພະນັກງານ, ລັດຖະກອນໃນຂະແໜງການຂອງຕົນ ປະຕິບັດໜ້າທີ່ວຽກງານ ຢ່າງຕັ້ງໜ້າ, ປັບປຸງ ກໍ່ສ້າງພື້ນຖານ ໂຄງລ່າງ ແລະບໍລິການດ້ານໂຍທາທິການ ແລະຂົນສົ່ງ ເພື່ອຮັບໃຊ້ສັງຄົມນັບມື້ນັບດີຂື້ນເປັນກ້າວໆ, ໃນໄລຍະຜ່ານມານີ້ ການຈັດຕັ້ງປະຕິບັດແຜນການ ແມ່ນໄດ້ດີພໍສົມຄວນ ຊິ່ງໄດ້ສະແດງອອກຈາກຜົນສໍາເລັດ ທີ່ໄດ້ປະຕິບັດໃນຫຼາຍໂຄງການເຊັ່ນ: ໂຄງການກໍ່ສ້າງ ແລະສ້ອມແປງທາງ, ຫຼາຍໂຄງການກໍ່ໄດ້ລົງມືຈັດຕັ້ງປະຕິບັດ ເປັນຕົ້ນແມ່ນການກໍ່ສ້າງປັບປຸງຂະຫຍາຍ-ຍົກລະດັບເສັ້ນທາງປູຢາງພາຍໃນເທດສະ ບານແຂວງ, ສ້ອມແປງທາງຫຼວງແຫ່ງຊາດ, ທາງຫຼວງຊົນນະບົດ, ວຽກງານຂົນສົ່ງສິນຄ້າ, ໂດຍສານ ແລະວຽກງານເຄຫາ-ຜັງເມືອງ ໄດ້ມີການປັບປຸງໃຫ້ດີຂື້ນຢ່າງເປັນລະດັບ. ສໍາລັບວຽກງານຄຸ້ມຄອງມະຫາພາກ ກໍໄດ້ປັບປຸງພາລະບົດບາດ, ສິດຂອບເຂດໃຫ້ຫ້ອງການ ຍທຂ ຂັ້ນເມືອງ ແລະຂະແໜງ ການ ພາຍໃນພະແນກ ເພື່ອແນ່ໃສ່ສ້າງຄວາມເຂັ້ມແຂງໃຫ້ແກ່ກົງຈັກການຄຸ້ມຄອງຂະແໜງ ໂຍທາທິການ ແລະຂົນສົ່ງໃນແຕ່ລະຂັ້ນ ໃຫ້ສົມກັບຄໍາເວົ້າທີ່ວ່າ ທົນທາງດີ, ຂົນສົ່ງປອດໄພ, ບ້ານ-ເມືອງສົດໄສ, ບໍລິການວອງໄວເພື່ອເປັນການຕອບສະໜອງໃນການຮັບໃຊ້ໜ້າທີ່ ການເມືອງຂອງພັກ-ລັດ ແລະຄວາມ ຮຽກຮ້ອງຕ້ອງການຂອງສັງຄົມ ກໍຄືເນື້ອໃນຈິດໃຈຂອງສະພາແຫ່ງຊາດ.

 

ພະແນກ ຍທຂ ແຂວງຫຼວງພະບາງ ສະຫຼຸບການຈັດຕັ້ງປະຕິບັດວຽກງານ ປະຈໍາສົກປີ 2012-2013 ແລະ ທິດທາງແຜນການສົກປີ 2013-2014

           ໃນວັນທີ 28-29 ມັງກອນ 2014 ພະແນກ ໂຍທາທິການ ແລະຂົນສົ່ງປະຈໍາແຂວງ ຫຼວງພະ ບາງໄດ້ເປີດກອງປະຊຸມສະຫຼຸບປະຈໍາສົກປີ 2012-2013 ແລະ ວາງທິດທາງແຜນການປະຈໍາສົກປີ 2013-2014 ຂື້ນຢ່າງເປັນທາງການທີ່ຫ້ອງປະຊຸມໃຫຍ່ຂອງຫ້ອງວ່າການປົກຄອງແຂວງ.

ໃນທ່າມກາງ ບັນຍາກາດທີ່ທົ່ວພັກ, ທົ່ວກໍາລັງປະກອບອາວຸດ ແລະທົ່ວປວງຊົນລາວທັງຊາດ ພວມສະເຫຼີມສະຫຼອງວັນສ້າງຕັ້ງກອງທັບປະຊາຊົນປະຕິວັດລາວ ຄົບຮອບ 65 ປີ ເວົ້າລວມ. ເວົ້າສະເພາະແຂວງຫຼວງພະບາງ ແມ່ນຢູ່ໃນໄລຍະຂຸ້ນຂ້ຽວຈັດຕັ້ງຜັນຂະຫຍາຍມະຕິ IX ຂອງພັກ, ມະຕິເລກທີ 03/ກມສພ ວ່າດ້ວຍວຽກງານເຮັດທົດ ລອງສາມສ້າງ, ມະຕິ VII. ເພື່ອສະຫຼຸບການຈັດຕັ້ງປະຕິບັດວຽກງານ ໂຍທາທິການ ແລະຂົນສົ່ງ ໃນໜຶ່ງ ປີຜ່ານມາ ແລະວາງທິດທາງແຜນການໃນປີຕໍ່ໄປ.

ໂດຍການເປັນປະທານຮ່ວມຂອງ ທ່ານ ດຣ.ຄໍາແພງ ໄຊສົມແພງ ກໍາມະການສູນກາງພັກ, ເລຂາ ພັກແຂວງ, ເຈົ້າແຂວງແຂວງຫຼວງພະບາງ, ທ່ານ ສົມມາດ ພົລເສນາ ກໍາມະການສູນກາງພັກ, ລັດຖະ ມົນຕີວ່າການ ກະຊວງໂຍທາທິການ ແລະຂົນສົ່ງ, ທ່ານ ຟ້າສະນັ່ນ ທໍາມະວົງ ເລຂາຄະນະພັກຮາກ ຖານ, ຫົວໜ້າພະແນກ ໂຍທາທິການ ແລະຂົນສົ່ງ ປະຈໍາແຂວງຫຼວງພະບາງ. ມີບັນດາຫົວໜ້າກົມ, ເຈົ້າ ເມືອງ-ຮອງເຈົ້າເມືອງ, ຫົວໜ້າ-ຮອງພະແນກອ້ອມຂ້າງແຂວງ, ຫົວໜ້າຫ້ອງການ ຍທຂ ຈາກ 12 ຕົວ ເມືອງ, ບໍລິສັດວິສາຫະກິດ, ບໍລິສັດເອກະຊົນທີ່ຂື້ນກັບ ແລະສະມາຊິກພັກພາຍໃນພະແນກ ເຂົ້າຮ່ວມ ທັງໝົດ 123 ທ່ານ.

 ພາຍຫຼັງທ່ານ ຫົວໜ້າພະແນກ ໄດ້ກ່າວເປີດພິທີຢ່າງເປັນທາງການແລ້ວ, ຈາກນັ້ນ ທ່ານ ເຊັ່ງ ທະນົງສັກ ຮອງຫົວໜ້າພະແນກ ຍທຂ ແຂວງຫຼວງພະບາງ ໄດ້ຂື້ນຜ່ານບົດສະຫຼຸບການຈັດຕັ້ງປະຕິບັດວຽກງານ ຍທຂ ປະຈໍາສົກປີ 2012-2013 ແລະຜ່ານທິດທາງແຜນການປະຈໍາສົກປີ 2013-2014 ຕໍ່ກອງປະຊຸມ. ໃນກອງປະຊຸມ ທ່ານ ເຈົ້າແຂວງ ແຂວງຫຼວງພະບາງ. ໄດ້ໂອ້ລົມໃຫ້ທິດຊີ້ນໍາຕໍ່ກອງປະຊຸມ, ທ່ານໄດ້ເນັ້ນໜັກໃຫ້ສະມາຊິກພັກ, ພະນັກງານ-ລັດຖະກອນ ໃນຂົງເຂດ ຍທຂ ທຸກຄົນຕ້ອງເປັນເຈົ້າການ ເພີ້ມຄວາມຮັບຜິດຊອບສູງ ແລະມີວິໃສທັດໃນການຈັດຕັ້ງປະຕິບັດໜ້າທີ່ວຽກງານວິຊາສະເພາະຂອງຕົນ, ສືບຕໍ່ເອົາໃຈໃສ່ສຶກສາອົບຮົບການເມືອງ-ແນວຄິດ ຂອງສະມາຊິກພັກ ພະ ນັກງານ-ລັດຖະກອນ, ໃຫ້ມີຫຼັກໝັ້ນຄຸນທາດການເມືອງໜັກແໜ້ນ, ຜ່ານມາໜ່ວຍພັກຮາກຖານພະແນກ ຍທຂ ປະຈໍາແຂວງຫຼວງພະບາງ, ໄດ້ຮັບນາມມະຍົດເປັນໜ່ວຍພັກເຂັ້ມແຂງ-ຮູ້ນໍາພາຮອບດ້ານ 4 ປີຊ້ອນ ສະເໜີໃຫ້ມີການສະຫຼຸບຖອດຖອນບົດຮຽນ ເພື່ອແກ້ໄຂບັນດາຫາງສຽງ ແລະໃຫ້ສືບຕໍ່ຜັນຂະຫຍາຍຈຸດດີ, ສືບຕໍ່ລົງກໍ່ສ້າງຮາກຖານການເມືອງ, ໂຄສະນາເຜີຍແຜ່ບັນດານິຕິກໍາ-ລະບຽບກົດໝາຍຂອງຂະແໜງ ຍທຂ ເພື່ອສຶກສາອົບຮົມປະຊາຊົນບັນດາເຜົ່າ, ຜູ້ປະກອບການທຸລະກິດໃນຂະແໜງ ຍທຂ ໃຫ້ມີຄວາມເຂົ້າໃຈທົ່ວເຖິງ. ຈາກນັ້ນກອງປະຊຸມ, ຍັງປຶກສາຫາລື ແລະ ແລກປ່ຽນບົດຮຽນນໍາກັນ ເພື່ອແກ້ໄຂວຽກງານໃນຕໍ່ໜ້າ. ໂດຍໄດ້ສະເໜີຂັ້ນເທິງ ເພື່ອຂໍເພີ່ມບຸກຄະລາກອນໃຫ້ຫ້ອງການ ຍທຂ ເມືອງ ແລະຂະແໜງການພາຍໃນພະແນກຕື່ມອີກ, ສະເໜີກະຊວງ ຍທຂ ຂໍງົບປະມານຈັດຝືກອົບຮົມວຽກງານວິຊາສະເພາະ ໃຫ້ພະນັກງານໃນຂະແໜງ, ສ້ອມແປງເສັ້ນທາງ ທີ່ໄດ້ຮັບຜົນກະທົບຈາກໄພທໍາມະຊາດໃນລະດູຝົນປີ 2013 ທີ່ຜ່ານມາ. ວຽກງານຄຸ້ມຄອງທາງບົກ ແມ່ນໄດ້ ເອົາໃຈໃສ່ປັບປຸງ ການກໍ່ສ້າງຂົວ-ທາງແຕ່ລະປະເພດ ຕ້ອງມີການໄລ່ລຽງຜົນປະໂຫຍດທາງດ້ານເສດຖະກິດ-ສັງຄົມ, ຕ້ອງມີການກໍານົດຫົວໜ່ວຍລາຄາໃຫ້ຖືກຕ້ອງ, ສອດຄ່ອງຕາມລະບຽບຫຼັກການ ເພື່ອເປັນບ່ອນ ອີງໃຫ້ແກ່ການຂື້ນແຜນຂອງໂຄງການ, ໄດ້ເອົາໃຈໃສ່ວຽກບູລະນະປົກປັກຮັກສາທາງ ຢ່າງເປັນປົກກະຕິ, ວຽກສຸກເສີນ, ໂຄງການບູລິມະສິດໃຫ້ເອກະຊົນລົງທຶນກ່ອນ, ກຽມພ້ອມເພື່ອຮອງຮັບໂຄງການທີ່ຈະເກີດຂື້ນໃນຕໍ່ໜ້າເຊັ່ນ: ໂຄງການກໍ່ສ້າງທາງເລກທີ 13 ເໜືອ ປາກມອງ-ອຸດົມໄຊ, ທາງເລກ 1C (ປາກມອງ-ຫົງສາ), ຂົວຂ້າມນໍ້າຂອງ, ໂຄງການກໍ່ສ້າງທາງພູທິດເຜີ້ງ-ນາຊອນ ແລະໂຄງການອື່ນໆ. ວຽກຄຸ້ມຄອງທາງນໍ້າ ແມ່ນໄດ້ເອົາໃຈໃສ່ຕັ້ງໜ້າກວດກາການປຸກສ້າງອາຄານ, ເຄຫາສະຖານທີ່ບໍ່ໄດ້ຮັບອະນຸຍາດ ພ້ອມທັງລົງແກ້ໄຂຈັດສັນຄວາມບໍ່ເປັນລະບຽບຮຽບຮ້ອຍໃນຕົວເມືອງ, ສືບຕໍ່ລົງສໍາຫຼວດ-ອອກແບບປັບປຸງ ຈັດສັນຜັງຊີ້ນໍາລວມຂອງບັນດາເມືອງ, ເຂດຈຸດສຸມພັດທະນາຂອງແຂວງ ແລະເມືອງ. ສໍາລັບວຽກງານການຂົນສົ່ງ ແມ່ນໄດ້ປັບປຸງຍົກລະດັບວຽກງານສົ່ງສິນຄ້າ-ໂດຍສານທາງບົກ, ທາງອາກາດໃຫ້ມີຄຸນນະພາບ, ຮັບປະກັນຄວາມປອດໄພ, ສະດວກວອງໄວ, ໄດ້ເອົາໃຈໃສ່ກວດກາ-ຄຸ້ມຄອງການສັນຈອນໃຫ້ມີຄວາມເປັນລະບຽບຮຽບຮ້ອຍພາຍໃນເທດສະບານເມືອງ, ສືບຕໍ່ຕິດຕາມການເຮັດທົດລອງການແລ່ນລົດໄຟຟ້າບໍລິການ ຜູ້ໂດຍສານໃນເທດ ສະບານເມືອງ, ເອົາໃຈໃສ່ຂອດບໍລິການຂື້ນທະບຽນລົດ, ການຈັດພິມໃບທະບຽນ ແລະໃບຂັບຂີ່ຖາວອນໃຫ້ວ່ອງໄວຂື້ນກວ່າເກົ່າ ແລະສືບຕໍ່ກວດກາລົດປ້າຍລັດທີ່ນໍາໃຊ້ບໍ່ຖືກເປົ້າໝາຍ, ລົດທີ່ບໍ່ມີປ້າຍ.

ໃນຕອນທ້າຍຂອງກອງປະຊຸມ ທ່ານ ລັດຖະມົນຕີວ່າການ ກະຊວງໂຍທາທິການ ແລະຂົນສົ່ງ, ໄດ້ຂື້ນໂອ້ລົມຕໍ່ກອງປະຊຸມ, ທ່ານໄດ້ເນັ້ນໃຫ້ບັນດາຜູ້ແທນກອງປະຊຸມໃຫ້ມີຄວາມຮັບຜິດຊອບສູງ ໂດຍ ສະເພາະແມ່ນທ່ານເຈົ້າເມືອງທີ່ກໍາໄດ້ ແລະເຫັນຄວາມສໍາຄັນຕໍ່ວຽກງານ ໂຍທາທິການ ແລະຂົນສົ່ງ, ທ່ານໄດ້ແນະນໍາໃຫ້ທົບທວນຄືນ ກ່ຽວກັບທັດສະນະກໍານົດຍຸດທະສາດ ແຫ່ງການປັບປຸງບູລະນະຂະ ຫຍາຍ ການຈັດຕັ້ງຄຸ້ມຄອງການຄົມມະນາຄົມ ຂອງປະທານໄກສອນ ພົມວິຫານ ຕໍ່ກອງປະຊຸມວຽກງານ ຄົມມະນາຄົມ-ຂົນສົ່ງ ໄປສະນີ ແລະກໍ່ສ້າງ ຄັ້ງທີ I ແລະບົດ​ຄວາມ​ເຫັນສະຫຼຸບ​ກອງ​ປະຊຸມຄົມມະນາຄົມ ຂົນ​ສົ່ງ-​ໄປສະນີ ​ແລະກໍ່ສ້າງ ຄັ້ງ​ທີ່ I ຂອງທ່ານ ຄໍາໄຕ ສີພັນດອນ. ໃນນັ້ນ, ທ່ານ ຍັງໄດ້ມີຄໍາເຫັນ ແລະໃຫ້ທິດຊີ້ນໍາຕໍ່ກອງປະຊຸມໃຫ້ເອົາໃຈໃສ່ປະຕິບັດ ແກ້ໄຂວຽກໄພພິບັດ, ໂຄງການກໍ່ສ້າງຂົວອູ່, ທໍ່ລະບາຍນໍ້າລອດທາງ ແລະເສັ້ນທາງຕ່າງໆ ທີ່ທາງເມືອງສະເໜີ ໂດຍໃຫ້ຈັດລຽງເປັນບູລິມະສິດໃນການແກ້ໄຂ, ໃຫ້ມີການປັບປຸງຫາງສຽງຂອງສັງຄົມ ຕໍ່ຂະແໜງການ ຍທຂ ເປັນຕົ້ນແມ່ນລາຄາການກໍ່ສ້າງ, ຄຸນນະພາບບໍ່ທັນດີ, ເວລາໂຄງການແກ່ຍາວ, ການຂື້ນທະບຽນລົດຈັກແມ່ນຄວນມອບໃຫ້ ຫ້ອງການ ຍທຂ ເມືອງ, ໃຫ້ບັນດາກົມມີການສົມທົບກັບພະແນກ ຍທຂ ຈັດຕັ້ງເຜີຍແຜ່ກົດໝາຍ ແລະ ນິຕິກໍາຕ່າງໆ.

 

 

 

 

Additional information